ᓄᓇᕕᒃᒥ ᐃᙱᕐᑎ ᖁᙱᐊᖅᑕᐅᕗᖅ ᑯᐸᐃᒃᒥᑦ ᓄᑖᒥ ᐊᕐᕌᒍᒥ ᓴᖅᑭᔮᖅᑐᒃᓴᒥ

For English version, see Nunavik artist takes stage on Quebec New Year’s special

ᓄᓇᕕᒃᒥ ᐃᙱᕐᑎ ᓃᕕ ᓯᓅᐸ ᖁᓕᓂ ᓄᓇᖃᖅᑳᖅᑐᓂ ᐃᙱᕐᑎᐅᖃᑕᐅᔪᓂᒃ ᑯᐸᐃᒃᒥ ᐊᖏᓛᒥ ᓴᖅᑭᔮᕐᕕᒃᒦᑦᑐᑦ ᑯᐸᐃᒃ ᑕᓚᕕᓴᓐᑯᑦ — ᐅᕙᓂ En Direct de l’Univers (ᓴᖅᑭᔮᑲᐅᑎᒋᔪᑦ ᓄᓇᕐᔪᐊᕐᒥ) ᐊᕐᕌᒍᒥ ᓄᑖᒥ ᓴᖅᑭᔮᖅᑎᑕᐅᔪᒥᒃ.

ᓈᓚᐅᑎ ᑲᓇᑕᒥ ᑎᑕᒃᑐᓂᒃ ᓴᖅᑭᔮᖅᑎᑦᑎᕙᒃᑐᖅ ᐅᓄᕐᑐᒻᒪᕆᐊᓗᖕᓂ ᑕᐅᑐᒃᑎᑦᑎᕗᑦ ᐊᕐᕋᒍ ᐃᓱᐊᓂ ᓴᖅᑭᔮᖅᑎᑦᑎᓪᓗᑎᒃ, ᓯᓅᐸ ᐅᖃᐅᔾᔭᐅᓂᕋᓚᐅᕐᑐᖅ ᐋᖅᑭᒃᓱᐃᔨᒧᑦ.

ᐃᙱᖃᑕᐅᖁᔭᐅᑎᓪᓗᒍ ᓂᕆᐅᓚᐅᙱᑦᑎᐊᖅᑐᖅ.

“ᔫᕆᓂ ᐃᙱᖃᑕᐅᓂᐊᓚᐅᕐᑐᖅ ᓯᕗᓪᓕᕐᓂ,” ᐅᖃᕐᑐᖅ ᐅᖃᐅᓯᖃᖅᖢᓂ ᑰᔾᔪᐊᕐᒥᐅᖃᑎᖓᓂ ᑎᑕᒃᑎᒥ ᐅᖄᓚᐅᑎᒃᑯᑦ ᐊᐱᕐᓱᖅᑕᐅᑎᓪᓗᒍ.

ᔪᐃ ᐹᑐᕆᔾ, ᐃᙱᕐᑎ ᐊᑎᖃᖅᖢᓂ ᔪᕆᓂᒥ, ᐃᓚᒋᔭᐅᔪᖅ ᐅᑯᓇᙵ Kwe!, ᑎᑕᒃᑎᑦ 11-ᓂ ᑯᐸᐃᒃᒥ ᓄᓇᖃᖅᑳᖅᑐᓂᙶᕐᓯᒪᔪᓂᒃ.

ᐃᑲᔪᓚᐅᕐᓯᒪᔪᖅ ᐃᖏᐅᓯᕐᒥ 1974 ᐆᒥᖓ Un musicien parmi tant d’autres (One Musician Among Many Others) ᐅᑯᓄᖓ ᐃᙱᐅᓯᐅᔪᖅ ᑯᐸᐃᒃᒥ ᑎᑕᒃᑎᓂ Harmonium ᐱᓕᕆᖃᑎᖃᖅᖢᓂ ᐃᙱᕐᑎ ᐃᙱᐅᓯᐅᖅᑎ ᓯᐅᔾᔪ ᕕᐅᕆᒥ, ᐃᓚᒋᔭᐅᓂᑯ ᐃᖏᕐᑎᐅᖃᑎᒌᓂᒃ. ᐃᓚᖃᕐᑐᖅ ᐃᖏᕐᓯᑐᖃᕕᓂᕐᒥ ᐃᖏᐅᓯᕆᔭᐅᓂᑯᓂᒃ. “ᓇᓃᓕᕐᐸᓪᓕ ᐃᓄᐃᑦ ᐅᖃᐅᓯᒃᓴᖃᖅᑐᕕᓃᑦ,” ᐊᑐᓂ ᐃᙱᕐᑎ ᑕᐃᒪᓐᓇ ᐃᙱᐅᓯᓖᑦ ᐅᖃᐅᓯᖏᑦᑎᒍᑦ.

Kwe! ᐃᙱᐅᓯᖃᓚᐅᕐᑐᑦ ᔫᓂ 21-ᖑᑎᓪᓗᒍ ᐃᓚᒋᔭᐅᓪᓗᑎᒃ ᑲᓇᑕᒥ ᓄᓇᖃᖅᑳᖅᑐᓄᑦ ᐅᓪᓗᕐᒥ ᖁᕕᐊᓲᑎᖃᖅᖢᑎᒃ. ᑕᐃᑲᓂᓕ ᐃᓅᒃ ᕿᓚᐅᔾᔭᖅᑏᑦ ᓵᓐᑎ ᐃᒧᓪᓗᒃ ᐊᒻᒪ ᔮᓂᔅ ᐹᓴᓐᔅ ᑎᑕᖃᑕᐅᓚᐅᕐᓯᒪᔪᑦ ᑖᒃᑯᓇᓂ.

ᑖᒃᑭᑯᐊ ᐃᙱᕐᓂᐊᓚᐅᕐᒥᔪᑦ ᔫᓂ 24-ᒥ ᑯᐸᐃᒃ ᓴᐃᓐ ᔮᓐ ᐸᑎᔅᑎᐅᑉ ᐅᓪᓗᖓᓂ ᑭᓯᐊᓂᓕ ᓯᓚ ᓈᒻᒪᓚᐅᙱᓐᓂᖓᓄᑦ ᐃᖏᕈᓐᓇᓚᐅᙱᑦᑐᑦ ᐊᒻᒪᓗ ᕕᐅᕆ ᐃᓅᔪᓐᓃᓚᐅᕐᓯᒪᓪᓗᓂ ᑕᕝᕙᓂ ᐅᓪᓗᕐᒥ.

ᓄᑖᒥ ᐊᕐᕌᒍᒧᑦ ᖁᕕᐊᓲᑎᖃᕐᓂᖅ ᐃᓱᒪᒋᔭᖃᕈᑎᐅᓚᐅᕐᑐᖅ ᕕᐅᕆᒥ, ᑯᐃᐸᒃᒥᐅᑕᐅᓪᓗᓂ ᐊᒻᒪ ᐃᑕᓕᒥ ᓯᕗᕚᖃᖅᖢᓂ, ᐊᒻᒪ ᑲᑎᑎᑦᑎᓯᒪᓇᓱᒃᖢᓂ ᑯᐸᐃᒃᒥ ᓄᓇᖃᖅᑳᖅᑐᓂ.

ᔫᕆᓂ ᐊᑐᐃᓐᓇᐅᓚᐅᕐᓯᒪᙱᒻᒪᑦ ᓂᐱᓕᐅᑲᑕᖕᓂᐊᖅᑎᓪᓗᒋᑦ ᐃᙱᑲᑕᒃᑐᓂᒃ ᐱᓇᓱᐊᕈᓰᒃ ᒪᕐᕉᒃ ᓯᕗᓂᐊᓂ ᐊᕐᕌᒍ ᓄᑖᖅ ᐱᒋᐊᙱᓱᖓᖅᑎᓪᓗᒍ. ᑎᑎᕋᓚᐅᕐᑐᖅ ᓯᓅᐹᒧᑦ ᐃᓇᖏᕐᓯᖁᔨᓪᓗᓂᒃ ᑖᔅᓱᒥᖓ ᑭᓯᐊᓂᓕ ᑐᑭᓯᑎᑦᑎᒻᒪᕆᙱᖢᓂ ᖃᓄᐃᑦᑕᕆᐊᖃᕐᓂᐊᕐᓂᖓᓂ.

“ᑕᐃᑯᙵᕋᒪ, ᐃᒪᐃᓚᐅᕐᑐᖓ, ‘ᐅᐊᑦᑎᐊᕈ, ᖃᐅᔨᒪᔪᖓ ᓇᓃᓐᓂᓐᓂ.’” ᐅᖃᕐᑐᖅ.

ᐃᓕᖅᑯᓯᖃᕐᒪᑦ ᓯᓅᐸ ᐊᒻᒪ ᐊᓈᓇᑦᑎᐊᖓ ᑕᐅᑐᒃᐸᒃᖢᑎᒃ En Direct de l’Univers ᐊᕐᕌᒍ ᓄᑖᖅ ᐱᒋᐊᕐᓂᐊᓕᕐᑎᓪᓗᒍ ᐃᓚᒋᓪᓗᒍ ᓈᓚᐅᑎᑦ ᑲᓇᑕᒥ ᓴᖅᑭᔮᖅᑎᑉᐸᒃᑕᖏᓐᓄ ᐃᓚᒋᓪᓗᒍ Infoman ᐊᒻᒪ Bye Bye ᑎᓯᓇᑲᑕᒃᑐᓂᒃ.

“ᖃᐅᔨᒪᓚᐅᕐᑐᖓ ᑕᐅᑐᖕᓂᐊᕐᑐᖅ ᐊᒻᒪᓗ ᖃᐅᔨᒪᙱᖢᓂ ᐃᓚᐅᓂᐊᕐᓂᓐᓂ, ᓲᖃᐃᒻᒪ ᐅᖃᐅᓯᖃᖁᔭᐅᓚᐅᙱᑦᑐᖓ ᐃᓚᐅᓂᐊᕐᓂᕋᕐᓗᖓ ᑖᒃᑯᓇᓂ,” ᓯᓅᐸ ᐅᖃᕐᑐᖅ.

ᐊᔾᔨᓕᐅᕐᑕᐅᓚᐅᕐᑐᑦ ᐅᓪᓘᖕᓂ ᒪᕐᕉᖕᓂ, ᓯᕗᓪᓕᕐᒥ ᐅᓪᓗᕐᒥ ᐊᔪᕈᓐᓃᕐᓴᑲᑕᒃᖢᑎᒃ. ᓯᓅᐸ ᖃᓄᐃᓕᐅᕈᑎᒥᓂ ᐋᖅᑭᒋᐊᖅᓯᓚᐅᕐᑐᖅ ᓲᖃᐃᒻᒪ ᐋᖅᑭᒃᑕᐅᓯᒪᓚᐅᕋᓗᐊᕐᒥ ᔪᕆᓂᐅᑉ ᓂᐱᖓᓄᑦ.

ᖃᐅᒃᐸᙳᕐᑎᓪᓗᒍ, ᑖᒃᑯᐊ ᐃᙱᕐᑏᑦ ᖃᐃᖁᔭᐅᓪᓗᑎᒃ 1:00-ᒥ ᐅᓪᓗᒃᑯᑦ ᐊᒻᒪ “ᐱᒋᐊᒻᒪᕆᒃᖢᑎᒃ” ᐃᖏᑲᑕᖕᓂᕐᒥ.

ᓇᖕᒥᓂᖅ ᐱᐅᓴᓚᐅᕐᑐᖅ, ᐅᖃᕐᑐᖅ, ᓲᖃᐃᒻᒪ ᐃᓕᖅᑯᓯᖃᐅᔭᕐᒥᒐᒥ.

ᐃᑲᕐᕋᓂ 13-ᓂ ᐅᑕᕿᓚᐅᕐᑐᑦ ᖁᙱᐊᖅᑕᐅᕝᕕᖕᒧᐊᓚᐅᕋᑎᒃ ᖁᙱᐊᖅᑕᐅᓂᐊᕐᑎᓪᓗᒋᑦ.

“ᐅᓇ ᖃᓄᐃᓕᐅᕈᓯ ᐊᑐᓕᒪᓚᐅᙱᑕᕋ,” ᓯᓅᐸ ᐅᖃᕐᑐᖅ.

“ᑭᓯᐊᓂᓕ ᐃᓄᖕᓂ ᐊᔾᔨᒌᙱᑦᑑᑎᓂ ᑕᑯᑲᑕᓚᐅᕐᑐᖓ ᐊᒻᒪ ᖃᐅᔨᒪᓂᓴᐅᓂᐊᓕᖅᖢᖓ,” ᐱᓗᐊᕐᑐᒥ ᑯᐸᐃᒃᒥ ᓄᓇᖃᖅᑳᖅᑐᓂ ᐃᙱᕐᑎᓂᒃ. “ᐊᑑᑎᖃᒻᒪᕆᓚᐅᕐᑐᖅ.”

2026-ᒥ ᓯᓅᐸ ᐃᖏᐅᓯᖏᓐᓂ ᓯᕗᓪᓕᕐᐸᓂ ᓴᖅᑭᑎᑦᑎᓂᐊᕐᑐᖅ ᐊᒻᒪ ᐊᐅᔭᖅ ᓄᓇᓕᖕᓄᐊᑲᑕᒡᓗᓂ ᐃᙱᑲᑕᒡᓗᓂ.