ᓄᓇᕕᖕᒥ ᐸᖅᓴᐃᓂᕐᒧᑦ ᐅᒥᐊᑦ ᐱᕗᑦ ᖁᑦᑎᒃᑐᒥ-ᓄᑖᙳᖅᐸᓪᓕᐅᔪᒥ ᓄᑖᙳᕆᐊᖅᑎᑕᐅᕗᑦ

For the English version of this story, please see New high-tech equipment to be installed on rescue boats: KRG

ᓄᑖᖑᔪᓂ ᐊᑦᑕᓇᔾᔭᐃᖅᓯᓯᒪᓂᕐᒧᑦ ᐱᓕᕆᔾᔪᑎᓂ ᐱᔪᓐᓇᖅᑎᑦᑎᔪᒥ ᐸᖅᓴᐃᔨᓂᑦ ᑕᑯᓂᖏᓐᓂ ᑭᓱᑐᐃᓐᓇᓂ ᐅᖓᓯᒃᑎᒋᔪᒥ ᒪᕐᕉᖕᓂ ᑭᓛᒥᑐᓂ ᐃᓕᔭᐅᔪᒃᓴᐅᑕᐅᕗᖅ ᐸᖅᓴᐃᓂᕐᒧᑦ ᐅᒥᐊᓄᑦ ᓄᓇᕕᓕᒫᒥ.

ᓄᓇᓕᖕᓂ ᒥᐊᓂᖅᓯᔩᑦ ᑐᑭᒧᐊᒃᑎᑦᑎᔨᖓ ᑯᕋᐃᒡ ᓕᙶᑦ ᑕᐃᓯᓚᐅᖅᑐᒥ ᐱᓕᕆᔾᔪᑎᓂ “ᒫᓐᓇᓕᓴᐅᓛᖑᔪᒥ,” ᐅᖃᐅᔾᔨᓚᐅᖅᐳᖅ ᑲᑎᕕᒃ ᐊᕕᑦᑐᖅᓯᒪᓂᐅᔪᒥ ᒐᕙᒪᖓᓐᓂ ᑲᑎᒪᔨᐅᔪᓂ ᒪᐃ 29−ᒥ 10−ᓂ ᐸᖅᓴᐃᓂᕐᒧᑦ ᐅᒥᐊᖏᑦ ᐋᖅᑭᒃᓱᖅᑕᐅᓯᒪᓂᐊᕐᓂᐊᖅᐳᑦ ᐊᓱᐃᖅᑲᔪᓄᑦ ᑐᐊᕕᕐᓇᖅᑐᒦᑦᑐᓄᑦ ᖁᒻᒧᐊᔫᓂ ᐱᓕᕆᔾᔪᑕᐅᔪᒥ ᐱᓕᕆᓲᖑᔪᒥ “ᐱᓕᕆᓂᐅᔪᒥ ᓇᓗᓇᐃᖅᓯᓂᕐᒧᑦ ᓈᓚᐅᒻᒥ.”

ᐱᓕᕆᔾᔪᑎ ᐊᑐᓲᖑᕗᖅ ᐆᓇᕐᓂᖓᓂ ᓇᓗᓇᐃᖅᓯᓂᐅᔪᒥ ᐱᔭᐅᕙᒃᑐᒥ ᐆᓇᕐᓂᐅᔪᒥ ᓄᑖᙳᕆᐊᖅᐸᓪᓕᐊᓂᐅᔪᒥ. ᑐᕌᖅᑎᑕᐅᔪᓐᓇᖅᐳᖅ ᐊᒻᒪ ᑕᐅᑐᒃᑕᑐᐊᖃᑲᐃᓐᓇᕐᓗᓂ ᖃᔅᓯᒐᓚᖕᓄᑦ ᑭᓛᒥᑐᓄᑦ ᐅᖓᓯᖕᓂᐅᔪᒥ ᐊᒻᒪ ᑐᙵᕕᖃᑦᑎᐊᓕᖅᑎᑦᑎᓲᖑᕗᖅ ᐊᑐᖅᑕᐅᑎᓪᓗᒍ ᒪᓪᓕᕐᔪᐊᖅᑎᓪᓗᒍ.

ᐱᓕᕆᔾᔪᑎ ᖃᐅᔨᓴᖅᑕᐅᓯᒫᓂᒃᐳᖅ ᐸᖅᓴᐃᓂᕐᒧᑦ ᐅᒥᐊᕐᒥ ᑲᖏᖅᓱᕐᔪᐊᒥ.

“ᐃᖏᕐᕋᓚᐅᖅᐳᒍᑦ 60 ᑭᓛᒥᑐᓂ ᐃᑲᕐᕋᒥ, ᒪᓪᓖᑦ ᒦᑕᐸᓗᖕᒥ ᖁᑦᑎᒃᑎᒋᓪᓗᑎᒃ,” ᓕᙶᑦ ᐅᖃᓚᐅᖅᐳᖅ. “ᐊᒻᒪ ᑕᑯᓚᐅᖅᐳᒍᑦ ᑐᒃᑐᓂ ᓯᒡᔭᒥ ᒪᕐᕉᖕᓂ ᑭᓛᒥᑐᓂ ᐅᖓᓯᒃᑎᒋᔪᒥ ᑕᑯᔪᓐᓇᕋᔭᙱᑕᑦᑎᓐᓂ ᐃᔨᑐᐃᓐᓇᑎᒍᑦ.”

ᐅᖃᓚᐅᖅᐳᖅ ᐅᓇ ᓄᑖᙳᖅᐸᓪᓕᐅᓂᐅᔪᖅ “ᐱᓕᕆᓂᕐᒥ ᐊᓯᔾᔨᕐᓂᐅᓂᐊᖅᐳᖅ [ᐃᑲᔪᖅᓱᐃᓂᕐᒥ] ᕿᓂᖅᑎᓪᓗᒋᑦ ᐃᓄᖕᓂ ᓯᓚᑦᑎᐊᕙᐅᙱᑎᓪᓗᒍ.”

ᐊᑐᓂ ᐸᖅᓴᐃᓂᕐᒧᑦ ᐅᒥᐊᖏᑦ ᓇᓗᓇᐃᒐᒃᓴᐅᓂᐊᖅᐳᑦ ᐊᒻᒪ ᖃᐅᔨᓴᒐᒃᓴᐅᓗᓂ ᓇᒦᓐᓂᖓᓂ ᓈᓚᐅᑎᖓ ᐃᑯᒪᑎᓪᓗᒍ. ᐱᔭᕆᐊᖃᑐᐃᓐᓇᖅᐳᖅ ᖃᕋᓴᐅᔭᑎᒍᑦ ᐃᓯᕐᓂᖓᓄᑦ ᐱᔨᑦᑎᕋᕐᓂᕐᒧᑦ ᐊᒻᒪ ᐊᔪᕐᓇᙱᑦᑐᑯᓘᕗᖅ ᐊᑐᕐᓂᕐᒥ, ᓕᙶᑦ ᐅᖃᓚᐅᖅᐳᖅ.

ᓕᙶᑦ ᐅᖃᐅᔾᔨᓚᐅᕆᕗᖅ ᑲᑎᒪᔨᓂ 7−ᖑᔪᓂ ᖃᑦᑎᕆᔾᔪᑎᓂ ᓄᓇᓯᐅᑎᓂ ᒫᓐᓇᐅᔪᒥ ᓴᓇᔭᐅᕙᓪᓕᐊᕗᑦ ᑐᓂᔭᐅᓂᖏᓐᓄᑦ ᓄᓇᕕᖕᒧᑦ ᐊᒻᒪᓗ ᐱᖓᓱᐃᑦ ᐊᑐᐃᓐᓴᐅᓂᐊᖅᐳᑦ ᓯᑎᐱᕆᒥ.

ᑳᓐᑐᕌᓂᑦ ᑐᓂᔭᐅᓯᒪᕗᑦ ᓄᑖᙳᕆᐊᖅᑎᑦᑎᓂᕐᒥ ᖃᑦᑎᕆᕝᕕᖕᓂ ᑕᓯᐅᔭᕐᒥ, ᑲᖏᖅᓱᒃ, ᖁᐊᖅᑕᖅ ᐊᒻᒪᓗ ᐊᑯᓕᕕᖕᒥ. ᑕᒪᕐᒥᒃ ᐱᓕᕆᓂᐅᔪᒥ ᓂᕆᐅᒋᔭᐅᕗᑦ ᐱᔭᕇᖅᑕᐅᓂᐊᕐᓂᖏᓐᓂ ᐅᑭᐊᒃᓵᒥ ᖃᓄᐃᙱᑦᑎᐊᕈᓂ ᐅᒥᐊᕐᔪᐊᒃᑰᖅᑎᑦᑎᓂᐅᔪᒥ.

ᓕᙶᑦ ᐅᖃᓚᐅᖅᐳᖅ ᐱᓕᕆᕝᕕᖓ ᐱᓕᕆᕙᓪᓕᐊᒋᕗᑦ ᑐᓂᓯᓂᕐᒥ ᑳᓐᑐᕌᖑᔪᓂ ᓄᑖᙳᕆᐊᖅᑎᑦᑎᓂᕐᒥ ᓴᓪᓗᐃᑦ ᖃᑦᑎᕆᕝᕕᖓᓂ, ᐱᔭᕇᖅᑕᐅᔪᒃᓴᐅᑕᐅᓪᓗᓂ ᐊᐅᔭᒥ 2025−ᒥ.

ᐅᓂᒃᑳᕆᓚᐅᕆᕗᖅ ᐃᑭᑦᑐᓄᑦ ᑭᓪᓕᓯᓂᐊᖅᑕᐅᓯᒪᔪᓂ 2023−ᒥ ᓄᓇᕕᖕᒥ, 68−ᓂ ᐃᑭᑦᑐᓂ ᐅᓂᒃᑳᕆᔭᐅᓪᓗᑎᒃ. ᑕᐃᒃᑯᓇᙵᑦ, 17−ᖑᔪᓂ ᖃᐅᔨᓴᖅᑕᐅᓚᐅᖅᐳᑦ ᓄᓇᕕᖕᒥ ᐸᓖᓯᒃᑯᓐᓂ ᐱᔨᑦᑎᕋᖅᑎᐅᔪᓂ, ᐃᓱᒪᓕᐅᕆᓚᐅᖅᑐᓂ ᐊᑕᐅᓯᐅᔪᒥ ᐃᑭᑦᑐᒥ ᐱᑎᑕᐅᔪᒃᓴᐅᓪᓗᓂ ᐱᔮᖅᑯᒻᒧᑦ ᐃᑭᑎᑦᑎᓂᕐᒥ ᐅᕝᕙᓘᓐᓃᑦ ᐸᓴᒋᔭᐅᓂᐅᔪᒥ ᖃᓄᐃᓐᓂᖓᓂ.

2022−ᒥ, 70−ᓂ ᐃᑭᑦᑐᖃᓚᐅᖅᐳᖅ.

41 ᐳᓴᓐᑎᒥ ᐊᕐᕌᓂᐅᑉ ᐃᑭᑦᑐᓂ, ᐅᕝᕙᓘᓐᓃᑦ 27−ᖑᔪᑦ ᑲᑎᓪᓗᒍ, ᐱᓚᐅᖅᐳᑦ ᑰᔾᔪᐊᕐᒥ, ᐃᓄᒋᐊᖕᓂᖃᖅᑐᒥ ᐅᓄᙱᓐᓂᖅᓴᐅᔪᒥ 2,700−ᓂ. ᑭᓯᐊᓂ, ᓕᙶᑦ ᐅᖃᓚᐅᖅᐳᖅ, ᐃᓚᖏᑦ ᓄᓇᓕᐅᔪᑦ ᑎᑎᕋᑦᑎᐊᖅᐸᙱᒻᒪᑕ ᖃᑦᑎᕆᔨᒃᑯᑦ ᖃᓄᐃᓕᐅᕐᓂᖏᓐᓂ.

ᓄᓇᕕᒃ ᑎᑎᕋᐃᓚᐅᖅᐳᑦ ᓱᒃᑲᓂᐅᔪᒥ 4.59 ᐃᑭᑦᑐᓂ ᐊᑐᓂ 1,000 ᐃᓅᔪᓄᑦ. ᐅᑯᓂᖓ ᑭᓪᓕᓯᓂᐊᖅᑕᐅᓯᒪᔪᓂ, ᓕᙶᑦ ᐱᓕᕆᕝᕕᖓ ᑕᑯᔪᓐᓇᖅᐳᑦ ᓄᓇᕕᖕᒥ ᐃᑭᑦᑐᓂ ᖃᓄᐃᓐᓂᐅᔪᓂ ᑯᐸᐃᒃ ᑕᐃᒪᐃᒐᔪᖕᓂᖓᓂ, ᐅᑯᐊᖑᔪᑦ 2.14 ᐃᑭᑦᑐᓂ ᐊᑐᓂ 1,000 ᐃᓄᓕᖕᓂ 2020−ᒥ.

ᐱᓕᕆᕝᕕᒃ ᓇᐃᓴᐅᓯᕆᓚᐅᖅᐳᑦ ᐅᓄᕐᓂᖅᓴᐅᔪᒥ $4.5 ᒥᓕᐊᓐᓂ ᓱᓇᒃᑯᑖᓂ ᔭᒐᐃᓂᐅᔪᓂ ᐃᑭᑦᑐᓂ ᐊᕐᕌᓂᐅᔪᒥ, ᑕᐅᑐᒃᖢᒍ $5.3 ᒥᓕᐊᓐᓂ ᔭᒐᐃᓂᐅᔪᓂ 2022−ᒥ.

ᓇᑉᐸᓪᓗᐊᖓᓂ ᔭᒐᐃᓂᐅᔪᓂ ᐊᕐᕌᓂᓂ ᐱᑎᑦᑎᓂᖃᓚᐅᖅᐳᑦ ᐃᑭᑦᑐᒥ ᓱᔪᐃᕐᔪᐊᖅᑐᒥ ᑲᖏᖅᓱᐊᓗᔾᔪᐊᕐᒥ ᐊᓐᓂᑭᑕᕐᕕᖓᓂ ᔫᓂ 2023−ᒥ.

ᔭᓇᕗ ᕼᐊᓐᑐᕐ, ᑭᒡᒐᖅᑐᐃᔪᒥ ᑰᔾᔪᐊᐹᐱᖕᒥ, ᐅᖃᐅᓯᖃᓚᐅᖅᐳᖅ ᐃᓱᒫᓘᑕᐅᔪᓂ ᓇᐹᖅᑐᖃᖅᑐᓂ ᐃᑭᓐᓂᐅᔪᓂ, ᐱᒋᐊᖅᑎᑦᑎᓚᐅᖅᑐᒥ ᖃᔅᓯᒐᓚᖕᓂ ᐊᓯᖏᓐᓂ ᑭᒡᒐᖅᑐᐃᔨᐅᔪᓂ ᐅᖃᐅᓯᖃᕐᓂᕐᒥ ᐅᖃᐅᓯᐅᔪᒥ.

“ᓄᓇᖓ ᐊᓯᔾᔨᖅᐸᓪᓕᐊᕗᖅ, ᓯᓚ ᐊᓯᔾᔨᖅᐸᓪᓕᐊᕗᖅ,” ᐅᖃᓚᐅᖅᐳᖅ ᓕᙶᑦ. “ᐊᓯᔾᔨᖅᓯᔭᕆᐊᖃᖅᐳᒍᑦ ᑐᕌᒐᕆᔭᑦᑎᓐᓂ, ᐱᓕᕆᕗᒍᑦ ᐃᔨᕗᑦ ᐅᐃᓴᑦᑎᐊᖅᖢᑎᒃ.”

ᐸᕐᓇᖕᓂᕐᒧᑦ ᐱᑕᖃᑐᐃᓐᓇᕆᐊᖃᕐᓂᖓᓂ ᐅᓄᕐᓂᖅᓴᐅᔪᓂ ᓇᐹᖅᑐᓕᖕᓂ ᐃᑭᓐᓂᐅᔪᓂ ᑕᒪᑐᒪᓂ ᐊᐅᔭᐅᔪᒥ, ᓕᙶᑦ ᐅᖃᖅᐳᖅ ᒪᕐᕉᖕᓂ ᐃᓚᒋᔭᐅᔪᓂ ᖃᑦᑎᕆᒡᒃᑯᓐᓂ ᐊᑐᓂ ᓄᓇᓕᐅᔪᒥ ᐱᓂᐊᖅᐳᑦ ᐱᓕᒻᒪᒃᓴᓂᐅᔪᒥ ᓄᓇᒥ, ᐃᕕᖕᒥ ᐊᒻᒪ ᓇᐹᖅᑐᓕᖕᓂ ᓄᓇᓂ ᖃᑦᑎᕆᓂᕐᒥ.