ᐃᒡᓗᓕᕆᔨᒃᑯᑦ ᐊᐅᓚᑦᑎᔾᔪᑎᒃᓴᓖᑦ $105 ᒥᓕᐊᓐ ᑖᓚᓂ ᐃᒡᓗᓂ ᓄᑖᙳᕆᐊᖅᑎᑦᑎᔾᔪᑎᒃᓴᓂᒃ

For English version, see Nunavik Housing Bureau budgets $105M for home renovations this year

ᓄᓇᕕᒃᒥ ᐃᒡᓗᓕᕆᔨᒃᑯᑦ ᐊᐅᓚᑦᑎᔾᔪᑎᒃᓴᓂ ᐋᖅᑭᒃᓯᓚᐅᕐᒪᑕ $105 ᒥᓕᐊᓐ ᑖᓚᐃᑦ ᐅᖓᑖᓂ ᓄᑖᙳᕆᐊᖅᑎᑦᑎᔾᔪᑎᐅᓂᐊᖅᑐᓂ ᑕᒪᑐᒪᓂ ᐊᕐᕌᒍᒥ — ᐅᓇ ᐱᓕᕆᐊᕆᔭᐅᓂᐊᖅᑐᖅ ᓄᓇᕕᓕᒫᒥᑦ.

ᐅᓇ ᐸᕐᓇᐅᑎ ᐊᑯᓂᕈᓗᒃ ᐊᕐᕌᒍᒐᓴᖕᓂ ᐋᖅᑭᒃᑕᐅᕙᓪᓕᐊᓇᓱᒃᑐᖅ ᐊᒻᒪ ᒪᓕᒃᓯᒪᓪᓗᓂ ᒐᕙᒪᑐᖃᒃᑯᑦ ᐊᕐᕌᒍᑦ 7-ᓄᑦ ᐊᑐᖅᑕᐅᔪᒃᓴᓯ $3.2 ᐱᓕᐊᓐ ᑖᓚᓂ ᐱᐅᓯᕚᓪᓕᕈᑎᒃᓴᓂ ᐃᒡᓗᓂ ᑯᐸᐃᒃᓕᒫᒥ, ᐅᖃᓚᐅᕐᑐᖅ ᓗᐱᓐ ᑕᐃᒡᓅ, ᐃᒡᓗᓕᕆᔨᒃᑯᑦ ᑐᑭᒧᐊᖅᑎᑦᑎᔨᖓ ᐃᒡᓗᓕᕆᓂᕐᒥ ᐊᒻᒪ ᓄᑖᙳᕆᐊᖅᑎᑦᑎᓂᕐᒥ, ᐊᐱᕐᓱᖅᑕᐅᓪᓗᓂ ᑰᔾᔪᐊᖅ ᑎᑎᕋᕐᕕᒃᒥ.

ᐅᖃᓚᐅᕐᑐᖅ ᑕᓪᓕᒪᑦ ᓄᓇᓖᑦ ᐊᐅᔭᖅ ᓴᓇᔭᐅᓂᐊᕐᑐᑦ ᓴᓇᑎᑕᐅᔪᓂᒃ ᐊᖏᔪᓂᒃ ᓄᑖᙳᕆᐊᖅᑕᐅᔭᕆᐊᓕᖕᓂ.

20 ᓄᑖᙳᕆᐊᖅᑕᐅᓂᐊᖅᑐᑦ ᓴᓪᓗᐃᑦ, 20 ᑰᔾᔪᐊᖅᒥ, 16 ᐳᕕᕐᓂᑐᖅᒥ, 13 ᑰᔾᔪᐊᕌᐱᒃᒥ ᐊᒻᒪ ᒪᕐᕉᒃ ᑲᖏᖅᓱᐊᓗᔾᔪᐊᖅᒥ.

ᑕᐃᒡᓅ ᐅᖃᓚᐅᕐᑐᖅ ᐃᒡᓗᓕᕆᔨᒃᑯᑦ ᐱᓕᕆᐊᖃᓛᕈᒪᔪᑦ 7-ᓂ ᓄᓇᓕᖕᓂ ᐊᕐᕌᒍ, ᐃᓚᒋᔭᐅᓗᑎᒃ ᐱᖓᓱᑦ ᓴᓇᔭᐅᔪᒃᓴᓄᑦ ᐊᖏᖅᑕᐅᓯᒫᓂᒃᑐᓂᒃ.

ᐊᖏᔪᓂ ᓄᑖᙳᕆᐊᖅᑎᑦᑎᓇᓱᒃᖢᓂ ᐊᑭᑐᔪᐊᓘᖕᒪᑦ, ᑕᐃᒡᓅ ᐅᖃᕐᑐᖅ.

“ᓴᓂᕋᖏᑦ ᐱᓕᕆᐊᕆᓂᐊᖅᑕᕗᑦ, ᐃᒡᓗᐃᑦ ᖁᓕᖏᑦ, ᐹᖏᑦ, ᐃᒐᓛᖏᑦ, ᐊᓃᕕᖏᑦ, ᒪᔪᕋᐅᑎᖏᑦ, ᓯᓚᑎᖏᑦ ᑭᓱᓕᒫᑦ ᓄᑖᙳᕆᐊᕐᓗᑎᒍᑦ.” ᐅᖃᕐᑐᖅ.

ᑕᒪᑐᒪᓂ ᓴᓇᔭᐅᔪᑦ ᐊᕐᕌᒍᒥ ᑕᒪᑐᒪᓂ ᐱᐊᓂᒃᑕᐅᔪᒪᔪᑦ ᐅᒃᑑᐱᕆ ᐊᓂᒍᓚᐅᖅᑎᓐᓇᒍ.

ᒥᑭᑦᑑᑎᐅᓂᕐᓴᓂ ᓴᓇᑲᑕᖕᒥᔪᑦ, ᐃᓚᖃᖅᖢᑎᒃ ᖁᓕᓂᒃ (10) ᐃᒡᓗᓂ ᑕᓯᐅᔭᖅᒥ ᐊᒻᒪ ᐃᕗᔨᕕᒃᒥ, ᑖᒃᑯᓇᓂᓕ ᒪᕐᕈᐃᓂ ᓴᓇᑎᑕᐅᔪᓂ ᓄᑖᙳᕆᐊᖅᑎᑦᑎᕙᓪᓕᐊᔪᑦ ᐃᒡᓗᐃᑦ ᓵᖏᓐᓂ.

ᐋᖅᑭᒃᓯᓯᒪᖕᒥᔪᑦ ᐃᒐᓛᓂ ᐊᓯᔾᔨᖅᓯᑲᑕᒍᒪᓪᓗᑎᒃ ᓄᓇᓕᒐᓴᖕᓃᑦᑐᓂᒃ.

“ᐊᕐᕌᒎᓕᕐᑐᖅ 10-15 ᐊᓂᒍᖅᑐᓂᒃ, ᐃᒐᓛᑦ ᐃᓕᐅᖅᑲᖅᑕᐅᓚᐅᕐᒪᑕ ᓴᓇᔭᐅᑦᑎᐊᙱᖢᑎᒃ,” ᑕᐃᒡᓅ ᐅᖃᕐᑐᖅ. “ᐃᓱᒪᓕᓚᐅᕐᕋᑦᑕ ᐃᓚᖓᓄᑦ ᑮᓇᐅᔭᒧᑦ ᑖᒃᑯᐊ ᐊᓯᔾᔨᕈᒪᓪᓗᑎᒍᑦ ᑖᒃᑯᓇᓂ ᐃᒡᓗᓂ.”

ᐅᓇ ᐃᓚᖃᕐᑐᖅ 15 ᐃᒡᓗᐃᑦ ᖁᐊᖅᑕᖅᒥ, 16 ᑲᖏᖅᓱᔾᔪᐊᖅᒥ, 10 ᑲᖏᕐᓱᒃᒥ ᐊᒻᒪ ᖕ8 ᐊᐅᐸᓗᒃᒥ. ᐊᒻᒪᓗ $11 ᒥᓕᐊᓐ ᑖᓚᐃᑦ ᓴᓂᕐᕙᒃᑕᐅᓯᒪᔪᖅ ᓴᓇᑎᑕᐅᓂᐊᖅᑐᓄᑦ ᐅᕝᕙᓘᓐᓃᑦ ᓄᓇᕕᒃᒥ ᐃᒡᓗᓕᕆᔨᒃᑯᑦ ᓴᓇᔾᔪᑎᓕᕆᔨᖏᑦ ᒥᑭᑦᑐᓂ ᓴᓇᑎᑕᐅᓗᑎ ᐃᓄᖃᕈᓐᓃᖅᑎᑕᐅᓯᒪᔪᓂᒃ.

ᓄᓇᕕᒃᒥ ᐃᒡᓗᓕᕆᔨᒃᑯᑦ ᑰᔾᔪᐊᖅᒥ ᑎᑎᕋᕐᕕᒃᒦᑦᑐᑦ ᐸᕐᓇᐅᓯᐅᓚᐅᕐᒪᑕ $105 ᒥᓕᐊᓐ ᑖᓚᓂ ᐊᑐᕐᓂᐊᕐᓗᑎᒃ ᓄᑖᙳᕆᐊᖅᑎᑦᑎᑲᑕᖕᓂᕐᒥ 2024 ᐃᒡᓗᓕᐅᕐᓇᒥᑦ. (ᐊᔾᔨᓕᐅᕆᔨ ᓯᑐᕆᒃ ᒑᓚᓐᑦ)

ᖃᓄᖅ ᐃᒡᓗᐃᑦ ᓄᑖᙳᕆᐊᖅᑕᐅᓂᐊᕐᒪᖔᑕ, ᐃᒡᓗᓕᕆᔨᒃᑯᑦ 6-ᓂ ᖃᐅᔨᓴᖅᑎᖃᖅᑐᑦ ᓄᓇᕕᒃᒥ ᓄᓇᓕᖕᓄᑦ ᐳᓛᑲᑕᒃᑐᓂ. ᑕᒪᕐᒥ ᐃᒡᓗᐃᑦ ᑕᑯᔭᖅᑐᖅᑕᐅᕙᒃᑐᑦ ᐊᕐᕌᒍ ᑕᓪᓕᒪᑦ ᐊᓂᒍᕌᖓᑕ ᐊᒻᒪᓗ ᖃᐅᔨᓴᖅᑕᐅᕙᒃᖢᑎᒃ ᐃᒡᓗ ᐋᓐᓂᐊᕐᓇᙱᒃᑲᓗᐊᕐᒪᖔᑦ ᖃᐅᔨᓴᖅᑕᐅᓚᐅᙱᑎᓪᓗᒋᑦ.

ᖃᐅᔨᓇᓱᒃᑕᐅᔪᑎᒍᑦ ᐃᒡᓗᐃᑦ ᓇᓗᓇᐃᒃᑯᑎᖅᑕᐅᕙᒃᑐᑦ ᒪᓕᒃᖢᑎᒃ ᐃᒡᓗᐃᑦ ᖃᓄᐃᓕᖓᓂᖏᓐᓄᑦ ᖃᐅᔨᒋᐊᕐᕕᒃᒥ, ᑲᓇᑕᓕᒫᒥᓪᓗ ᒥᑐᕆᒃᙳᓂᕋᖅᑕᐅᔪᒥ. ᐃᒡᓗᐃᑦ ᓇᓗᓇᐃᖅᑕᐅᕙᒃᑐᑦ ᐱᐅᓂᖅᐹᒥ-ᐱᐅᙱᓛᒧᑦ A-ᒥ E-ᒧ, ᑕᒪᒃᑯᐊ ᓇᓗᓇᐃᒃᑯᑎᓖ D ᐊᒻᒪ E ᓴᓇᔭᐅᑲᐅᑎᒋᔭᕆᐊᖃᓛᖑᓪᓗᑎ.

ᒐᕙᒪᑐᖃᒃᑯᑦ ᐊᑐᐃᓐᓇᐅᑎᑦᑎᓚᐅᖅᑐᑦ $3.2 ᐱᓕᐊᓐ ᑖᓚᓂ 2022-ᒥ 2028-ᒧ ᐱᐅᓯᕚᓪᓕᖅᑎᑦᑎᔾᔪᑎᐅᓂᐊᖅᑐᓂ ᐃᒡᓗᓂ ᑯᐸᐃᓕᒫᒥ.

ᐅᓇ ᓄᓇᕕᒃᒥ ᐃᒡᓗᓕᕆᔨᒃᑯᑦ ᐱᓕᕆᐊᒃᓴᖓᓂ ᐊᔪᕐᓇᙱᔾᔪᑎᒻᒪᕆᐅᔪᖅ, ᐅᖃᕐᑐᖅ ᑕᐃᒡᓅ.

ᐊᑕᐅᓯᖅ ᐃᒡᓗᓕᐅᕐᓇᖅ ᐊᐅᔭᒃᑯᑦ ᐊᕐᕌᒍᓂ ᐱᖓᓱᓂ ᐸᕐᓇᒃᑕᐅᕙᓪᓕᐊᖃᑦᑕᕐᒪᑦ, ᐅᖃᕐᑐᖅ, ᐱᔾᔪᑎᖃᖅᖢᓂ ᐱᑐᐃᓐᓇᐅᙱᔾᔪᑎᐅᔪᑦ ᐅᒥᐊᕐᔪᐊᒃᑯᑦ ᐃᓂᒃᓴᓕᐅᕆᐊᖃᕐᓂᖅ, ᓴᓇᑎᑕᐅᓇᔭᖅᑐᑦ ᐊᑐᐃᓐᓇᐅᓂᖏᓐᓂ ᐊᒻᒪᓗ ᐱᖁᑎᒃᓴᐃᑦ ᐊᑐᐃᓐᓇᐅᑎᒋᓂᖏᓐᓂᒃ.

ᐊᖏᖃᑎᒌᒍᑎᑎᒍᑦ ᒪᑭᕝᕕᒃᑯᓐᓂ — ᐃᓄᐃᑦ ᑯᐊᐳᕇᓴᖓ ᑲᒪᒋᔭᖃᕐᑐᖅ ᐃᖅᑲᓇᐃᔮᒃᓴᓂ ᐱᑕᖃᓕᖅᑎᑦᑎᓂᕐᒥᒃ ᐊᒻᒪᓗ ᐱᐅᓯᕚᓪᓕᖅᑎᑦᑎᔭᕆᐊᖃᕐᓂᕐᒥ ᐃᒡᓗᓂ — ᐊᒻᒪᓗ $20 ᒥᓕᐊᓐ ᑖᓚᐃ ᐊᑐᐃᓐᓇᐅᓪᓗᑎᒃ ᓄᓇᕕᒃᒥ ᐃᒡᓗᓕᕆᔨᒃᑯᓐᓄᑦ ᓱᕋᒃᓯᒪᔪᓂ ᐃᒡᓗᓂ ᓴᓇᔾᔪᑎᐅᓂᐊᖅᑐᓂᒃ ᐊᑐᖅᑕᐅᔪᓐᓇᐃᓪᓕᕋᓱᒋᔭᐅᓯᒪᔪᓂᒃ.

ᐊᑯᓕᕕᒃ, ᐃᓄᒃᔪᐊᒃ, ᑲᖏᖅᓱᔾᔪᐊᖅ, ᑲᖏᕐᓱᒃ ᐊᒻᒪ ᐳᕕᕐᓂᑑᖅᒥ ᐃᒡᓗᐃᑦ ᓱᕋᒃᓯᒪᔪᑦ ᓴᓇᔭᐅᑲᑕᖕᓂᐊᖅᑐᑦ 2024 ᐊᒻᒪ 2025-ᒥ. ᐃᒡᓗᓕᕆᔨᒃᑯᑦ ᐋᖅᑭᒃᓯᓯᒪᖕᒥᔪᑦ $6 ᒥᓕᐊᓐ ᑖᓚᓂ ᓱᕋᒃᓯᒪᓗᐊᙱᓐᓂᕐᓴᓂ ᐃᒡᓗᓂ ᓴᓇᔭᐅᔾᔪᑎᒃᓴᖏᓐᓄᑦ.

ᑕᒪᑐᒪᓂ ᐊᕐᕌᒍᒥ ᐊᕐᕌᒍᓗ ᓄᑖᙳᕆᐊᖅᑎᑦᑎᓐᓇᐅᓂᐊᕐᒪᑦ, ᐅᖃᕐᑐᖅ ᑕᐃᒡᓅ. ᓄᖃᖓᓐᓇᓚᐅᕐᑎᓪᓗᒍ ᓄᕙᒡᔪᐊᕐᓇᖅ-19 ᐋᓐᓂᐊᕕᒡᔪᐊᕐᓇᖅ, ᐅᖃᕐᑐᖅ, “ᑕᒪᑐᒨᓇ ᓴᓇᔭᕆᐊᖃᒻᒪᕆᖕᒪᑕ.”

ᓄᑖᓂ ᐃᓱᒪᓕᐅᕆᔭᐅᓯᒪᔪᓂ ᐃᓚᓕᐅᔾᔨᓂᐊᖅᑐᑦ ᑕᒪᑐᒪᓂ ᐃᒡᓗᓕᐅᕐᓇᒥ.

ᓲᕐᓗ, ᐃᒡᓗᐃᑦ ᖄᖏᑦ ᐊᓯᔾᔨᖅᑕᐅᓂᐊᖅᑐᑦ ᓴᕕᕋᔭᐅᓕᕐᓗᑎᒃ. ᓯᕗᓂᐊᒍᑦ ᕿᑰᔭᕐᒥ ᓴᓇᓯᒪᔪᓂᒃ ᐸᑎᒃᑎᕆᐊᓕᖕᓂ ᐊᑐᖃᑦᑕᓚᐅᕐᒪᑕ ᑭᓯᐊᓂᓕ ᐊᑭᑐᓂᕐᓴᐅᓪᓗᑎᒃ, ᓯᓚᒧᓪᓕ, ᐅᑎᖅᑎᑕᐅᔭᕆᐊᖃᓚᐅᕐᑐᑦ ᖃᓪᓗᓈᓄᑦ ᐊᓂᑕᐅᓂᐊᕐᒪᑕ ᑕᐅᓇᓂ.