ᓄᓇᕕᖕᒥ ᐃᒡᓗᖃᖅᑎᑦᑎᓂᖅ ‘ᑐᐊᕕᕐᓇᖅᑐᒦᑉᐳᖅ’ ᐅᖃᓪᓚᖕᓃᑦ ᑲᔪᓯᑎᓪᓗᒋᑦ: ᐅᓂᒃᑳᓕᐊᖅ

For the English version of this story, please see Nunavik housing in crisis as funding talks continue.

ᑕᐃᑲᓂᑦᑕᐃᓐᓇᖅ ᐅᓪᓗᖓᓂ ᓄᓇᕕᖕᒥ ᑲᑎᒪᔨᐅᔪᑦ ᑲᑎᒪᖃᑎᖃᖅᑎᓪᓗᒋᑦ ᑯᐸᐃᖕᒥ ᒥᓂᔅᑕᐃᑦ ᑲᑎᒪᔨᖏᓐᓂ ᐅᖃᐅᓯᖃᕐᓂᕐᒧᑦ ᓄᑖᙳᕆᐊᖅᑐᓂ ᑮᓇᐅᔭᖃᖅᑎᑦᑎᓂᕐᒥ ᐃᒡᓗᒃᓴᖃᕐᓂᕐᒧᑦ, ᓄᑖᖑᔪᒥ ᐅᓂᒃᑳᓕᐊᒥ ᓴᖅᑭᑎᑦᑎᓚᐅᖅᐳᖅ ᐊᕕᒃᑐᖅᓯᒪᓂᐅᔪᖅ ᐅᓄᕐᓂᖅᓴᐅᔪᓂ 1,000−ᓂ ᐊᖏᕐᕋᓂ ᐊᒥᒐᖅᐳᑦ ᐱᔭᕆᐊᖃᖅᑐᓂ ᐱᔨᑦᑎᕋᕐᓂᕐᒧᑦ ᐃᓄᒋᐊᖕᓂᐅᔪᓂ.

ᕕᕗᐊᕆ 3−ᒥ ᑲᑎᒪᓂᐅᔪᒥ ᑰᔾᔪᐊᕐᒥ, ᑭᒡᒐᖅᑐᐃᔨᐅᔪᑦ ᓄᓇᕕᖕᒥ ᐃᒡᓗᓕᕆᔨᕐᔪᐊᒃᑯᓐᓂ, ᑲᑎᕕᒃ ᐊᕕᒃᑐᖅᓯᒪᓂᐅᔪᒥ ᒐᕙᒪᒃᑯᓐᓂ, ᑲᑎᕕᒃ ᐃᓕᓴᕐᓂᓕᕆᓂᖅ, ᓄᓇᕕᖕᒥ ᐊᕕᒃᑐᖅᓯᒪᓂᐅᔪᒥ ᑲᑎᒪᔨᐅᔪᓂ ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓂ ᐊᒻᒪ ᐃᓄᓕᕆᔨᒃᑯᓐᓂ ᐱᔨᑦᑎᕋᖅᑎᒃᑯᓐᓂ ᐊᒻᒪ ᒪᑭᕝᕕᖕᒥ ᐅᖃᓪᓚᖃᑎᖃᓚᐅᖅᐳᑦ ᐃᒡᓗᖃᖅᑎᑦᑎᓂᕐᒥ ᐄᐊᓐ ᓚᕗᕆᓂᐅᕐᒥ, ᑯᐸᐃᖕᒥ ᓄᓇᖃᖅᑳᖅᓯᒪᔪᓄᑦ ᐱᓕᕆᓂᕐᒥ ᒥᓂᔅᑕᖓᓂ, ᐊᒻᒪ ᓄᕌᓐᔅ−ᐃᓚᐃᓐ ᑐᕌᓐᓲᒥ, ᐃᒡᓗᓕᕆᔨᒃᑯᑦ ᒥᓂᔅᑕᖓᓂ.

ᑕᒪᒃᑭᑦ ᐊᑕᐅᓯᕐᒥ ᐅᖃᐅᓯᕐᒥ ᐃᓱᒪᒋᔭᖃᓚᐅᖅᐳᑦ: ᑲᑐᔾᔨᖃᑎᒌᖕᓂᕐᒥ.

“ᑭᒃᑯᓕᒫᑦ [ᑲᑎᒪᓂᕐᒥ] ᑕᐅᖅᓰᓚᐅᖅᐳᑦ ᐊᒃᓱᕈᕈᑕᐅᔪᓂ ᐱᓕᕆᕙᖕᓂᖏᓐᓂ ᒪᓕᒃᑐᓂ ᑲᑐᔾᔨᖃᑎᒌᖏᓐᓂ,” ᐅᖃᓚᐅᖅᐳᖅ ᒫᒃᓰᒻ ᑖᑎᕝ, ᐅᖃᖅᑎᐅᔪᖅ ᓚᕗᕆᓂᐅᕐᒧᑦ, ᐅᐃᕖᑎᑐᑦ ᖃᕋᓴᐅᔭᑎᒍᑦ ᑎᑎᕋᕐᓂᐅᔪᒥ.

ᑖᑎᕝ ᐅᖃᓚᐅᖅᐳᖅ ᑕᒪᒃᑭᑦ ᑯᐸᐃᖕᒥ ᐊᒻᒪ ᒐᕙᒪᑐᖃᒃᑯᓐᓂ ᐅᖃᓪᓚᖕᓂᖃᖅᐳᑦ ᒪᑭᕝᕕᒃᑯᓐᓂ ᓄᑖᙳᕆᐊᖅᑎᑦᑎᓂᕐᒥ ᖃᔅᓯᒐᓚᖕᓂ-ᐊᕐᕌᒍᓂ ᑮᓇᐅᔭᖃᖅᑎᑦᑎᓂᐅᔪᒥ ᐃᒡᓗᒃᓴᓂ ᓇᑉᐸᖅᑎᕆᓂᕐᒥ ᐊᒻᒪ ᐋᖅᑭᐅᒪᑎᑦᑎᓂᕐᒥ ᓄᓇᕕᖕᒥ.

“ᒐᕙᒪᒃᑯᑦ ᐃᓚᐅᖃᑕᐅᑎᓪᓗᒍ ᑮᓇᐅᔭᖃᖅᑎᑦᑎᓂᐅᔪᒥ ᐃᒡᓗᒃᓴᓄᑦ, ᐱᔪᓐᓇᖅᑎᑦᑎᔨᐅᔪᓂ ᓄᓇᕕᖕᒥ ᑲᒪᒋᔭᖃᖅᑐᓂ ᐸᕐᓇᐃᓂᕐᒧᑦ ᐊᒻᒪ ᐱᔭᕇᖅᑕᐅᓂᖓᓂ ᐱᓕᕆᐊᒃᓴᐅᔪᓂ,” ᐅᖃᓚᐅᖅᐳᖅ.

ᓄᓇᕕᖕᒥ ᐃᒡᓗᖃᖅᑎᑦᑎᓂᕐᒥ ᖃᓄᐃᓕᖓᓂᐅᔪᖅ “ᓱᓕ ᑐᐊᕕᕐᓇᖅᐳᖅ,” ᐅᖃᐅᓯᐅᓪᓗᓂ ᖃᐅᔨᓴᖅᑕᐅᓂᐅᔪᒥ ᑎᑎᕋᖅᑕᐅᔪᒥ ᕕᕗᐊᕆ 3−ᒥ ᐅᖃᐅᔾᔨᒋᐊᖅᑎᐅᔪᓂ ᐱᓕᕆᕝᕕᖕᒥ ᕋᐃᒪᓐ ᓴᐆ ᒍᕌᓐᑦ ᑐᐊᓐᑕᓐ, ᐱᓕᕆᖃᑎᖃᖅᖢᑎᒃ ᓄᓇᕕᖕᒥ ᐃᒡᓗᓕᕆᔨᕐᔪᐊᒃᑯᓐᓂ.

ᐊᕐᕌᒍᑦ ᒪᕐᕉᒃ ᐊᓂᒍᑐᐊᕌᖓᑕ, ᐱᓕᕆᕝᕕᒃ ᑭᓪᓕᓯᓂᐊᖅᓯᓲᖑᕗᑦ ᓄᓇᕕᖕᒥ ᐊᖏᕐᕋᐅᔪᓂ ᐊᐱᕆᓪᓗᓂ ᖃᔅᓯᓂ ᐃᓄᖕᓂ ᐃᒡᓗᖃᖃᑕᐅᔪᓂ ᐊᒻᒪ ᖃᔅᓯᓂ ᐃᒡᓗᕈᓯᖃᕐᓂᖏᓐᓂ ᐊᑐᓂ ᐃᒡᓘᔪᑦ. ᑕᒪᑐᒪᓂ ᐊᕐᕌᒎᔪᒥ, ᐃᓄᐃᑦ ᐃᒡᓗᖃᖅᑐᑦ 3,738−ᓂ ᐃᒡᓗᓕᕆᔨᕐᔪᐊᒃᑯᓐᓂ ᐃᒡᓗᖁᑎᖏᓐᓂ ᑭᐅᓚᐅᖅᐳᑦ, ᐃᓱᒪᒋᔭᐅᔪᒥ ᖁᑦᑎᒃᑐᒥ ᐃᓚᐅᖃᑕᐅᓂᐅᔪᒥ ᐅᓄᕐᓂᖓᓂ.

ᓄᓇᕕᐅᑉ ᐃᓄᒋᐊᖕᓂᖓ — ᑎᑎᕋᖅᓯᒪᔪᒥ 14,045−ᖑᕗᓕ 2021−ᒥ ᑭᓪᓕᓯᓂᐊᕐᓂᐅᔪᒥ — ᓇᓚᐅᑦᑖᕆᔭᐅᕗᖅ ᐅᓄᖅᓯᒋᐊᕐᓂᐊᕐᓂᖓᓂ 1 ᐳᓴᓐᑎᒥ ᐊᕐᕌᒍᑕᒫᒥ ᕿᑎᐊᓂ 2021−ᒥ ᐊᒻᒪ 2041−ᒧᑦ, ᐅᖃᐅᓯᐅᓪᓗᓂ Institut de la statistique du Québec−ᑯᓐᓂ, ᖃᐅᔨᓴᖅᐸᒃᑐᓂ ᑕᐃᔅᓱᒥᖓ ᖃᐅᔨᓴᖅᑕᐅᓂᑯᓂ ᑎᑎᕋᖅᓯᒪᔪᓂ.

ᑕᐃᓐᓇ ᐱᕈᖅᐸᓪᓕᐊᓂᕐᒧᑦ ᐊᖏᓂᖓ ᒪᕐᕈᐃᓪᓗᐊᖅᑐᒥ ᑯᐸᐃᖕᒥ ᑕᐃᒪᐃᒐᔪᖕᓂᖓᓂ, ᐊᒻᒪ ᐊᔭᐅᕆᑎᑦᑎᓲᖑᕗᖅ ᓄᓇᕕᐅᑉ ᐃᒡᓗᖃᖅᑎᑦᑎᓂᐅᔪᒥ ᑐᐊᕕᕐᓇᖅᑐᒦᕌᓂᒃᑐᒥ.

“ᐋᖅᑭᒃᓱᖅᓯᒪᓂᐅᔪᒥ ᐃᓄᒋᐊᖕᓂᐅᔪᓂ ᐊᑲᐅᙱᓕᐅᕈᑕᐅᕗᖅ ᐃᓱᒪᒃᓴᖅᓯᐅᕆᔭᕆᐊᖃᖅᑕᑦᑎᓐᓂ ᓇᓚᐅᑦᑖᕆᑎᓪᓗᑕ ᐱᕙᓪᓕᐊᑎᑦᑎᓂᕐᒥs,” ᐅᖃᓚᐅᖅᐳᖅ ᓘᐱᓐ ᑕᐃᒡᓅᓪ, ᓄᓇᕕᖕᒥ ᐃᒡᓗᓕᕆᔨᕐᔪᐊᒃᑯᑦ ᑐᑭᒧᐊᒃᑎᑦᑎᔨᖓ, ᐅᐃᕖᑎᑐᑦ ᐊᐱᖅᓱᖅᑕᐅᓂᐅᔪᒥ.

ᐅᖃᐅᔾᔨᒋᐊᖅᑏᑦ ᖃᐅᔨᓴᕐᓂᖓ ᓇᓂᓯᓚᐅᖅᐳᖅ ᐅᓄᕐᓂᖅᓴᐅᔪᒥ ᐊᑕᐅᓯᕐᒥ ᑎᓴᒪᓂ ᑕᒪᒃᑭᓂ ᐊᖏᕐᕋᐅᔪᓂ ᓄᓇᕕᖕᒥ ᑕᓪᓕᒪᓪᓗᐊᓂ ᐃᒡᓗᖃᖃᑕᐅᕗᑦ, ᑕᒪᒃᑭᒐᓚᐃᑦ ᐃᒡᓗᒃᓴᐅᔪᑦ ᐃᓗᓕᖃᖅᖢᑎᒃ ᐅᓄᙱᓐᓂᖅᓴᐅᔪᓂ ᐱᖓᓱᓂ ᐃᒡᓗᕈᓯᓕᖕᓂ.

ᓇᓂᔭᐅᓚᐅᕆᕗᖅ ᑕᐃᒪᐃᒐᔪᖕᓂᐅᔪᒥ ᒥᒃᖠᕙᓪᓕᐊᔪᒥ ᐅᓄᕐᓂᐅᔪᓂ ᐃᒡᓗᕈᓯᓕᖕᓂ ᐊᑐᓂ ᐃᒡᓘᔪᒥ ᑕᐃᒪᙵᓂ 2021−ᒥ ᐅᓄᕐᓂᖅᓴᐅᔪᓂ ᐃᒡᓗᒃᓴᐃᑦ ᓴᓇᔭᐅᕙᓕᕐᒪᑕ ᐊᑕᐅᓯᕐᒥ-ᐃᒡᓗᕈᓯᓕᖕᒥ ᐃᒡᓗᖃᕐᓂᐅᔪᓂ.

ᒫᓐᓇᐅᔪᒥ, ᓄᓇᕕᖕᒥ ᐃᒡᓗᓕᕆᔨᕐᔪᐊᒃᑯᑦ 4,071−ᓂ ᐃᒡᓗᖃᖅᐳᑦ ᐃᒡᓗᖁᑎᖏᓐᓂ. ᑕᐃᒪᐃᒐᔪᖕᓂᐅᔪᒥ ᐅᓄᕐᓂᐅᔪᓂ ᐃᒡᓗᕈᓯᖕᓂ ᐊᑐᓂ ᐃᒡᓘᔪᒥ 2.5−ᖑᕗᖅ, ᑰᔾᔪᐊᕌᐱᒃ ᐊᑦᑎᓛᖑᔪᒥ ᑕᐃᒪᐃᒐᔪᖕᓂᖃᖅᑐᒥ 2.2 ᐃᒡᓗᕈᓯᕐᓂ ᐊᑐᓂ ᐃᒡᓘᔪᒥ.

ᐃᓱᒪᒋᔭᖃᖅᖢᓂ ᓇᓚᐅᑦᑖᕆᔭᐅᔪᒥ ᐃᓄᒋᐊᖕᓂᖓᓂ ᐱᕈᖅᐸᓪᓕᐊᓂᖓᓂ ᐊᒻᒪ ᒫᓐᓇᐅᔪᒥ ᐱᔭᕆᐊᓕᖏᓐᓂ, ᓄᓇᕕᒃ 1,039-ᐃᒡᓗᓂ ᐊᒥᒐᕐᓂᖃᖅᐳᑦ. 2021−ᒥ, ᐊᒥᒐᓗᐊᕐᓂᖃᓚᐅᖅᐳᖅ 893−ᓂ ᐃᒡᓗᓂᑦ.

ᖃᐅᔨᓴᕐᓂᖅ ᓇᓂᓯᓚᐅᕆᕗᖅ 19.5 ᐳᓴᓐᑎᒥ ᐃᓚᒌᖑᔪᓂ ᐅᑕᖅᑭᔪᓂ ᑎᑎᕋᖅᑕᐅᓯᒪᓂᐅᕗᑦ ᐃᒡᓗᒃᓴᓄᑦ ᓄᓇᕕᖕᒥ ᐃᒡᓗᓕᕆᔨᕐᔪᐊᒃᑯᓐᓂ, ᑕᒪᒃᑭᒐᓚᑦ ᖃᔅᓯᒐᓚᖕᓂ ᐃᓚᒌᖑᔪᓂ ᐃᒡᓗᖃᖅᑐᓂ ᐊᑕᐅᓯᕐᒥ ᐃᒡᓗᒥ.

“ᑕᐃᒫᒃ ᐱᒻᒪᕆᐅᕗᖅ ᐃᓱᒪᒋᓗᒍ ᑲᑎᙵᓂᐅᔪᒥ ᑕᐃᒫᒃ ᖃᖓᑭᐊᖅ ᐅᖃᕈᓐᓇᓛᖅᐳᒍᑦ ᑕᒪᑐᒪᓂ ᐊᕐᕌᒎᔪᒥ ᐱᔭᕆᐊᖃᑐᐃᓐᓇᖅᐳᒍᑦ 10−ᓂ ᐃᒡᓗᒃᓴᓂ. ᑖᓐᓇ ᐱᔪᒪᓂᕐᔪᐊᖑᓇᔭᖅᐳᖅ,” ᑕᐃᒡᓅᓪ ᐅᖃᓚᐅᖅᐳᖅ.

ᐅᖃᓚᐅᖅᐳᖅ ᐱᖃᕐᓂᕐᒥ ᑕᒪᒃᑭᓂ ᑲᑐᔾᔨᖃᑎᒌᖑᔪᓂ ᐃᓚᐅᖃᑕᐅᓗᑎᒃ ᐱᕙᓪᓕᐊᑎᑦᑎᓂᕐᒥ ᐃᒡᓗᒃᓴᓂ ᐊᐅᓚᑦᑎᓗᑎᒃ ᐊᒃᓱᕈᕐᓂᖏᓐᓂ ᐱᓕᕆᓂᐅᔪᒥ ᐊᑑᑎᖃᕐᓂᖅᓴᐅᓇᔭᖅᐳᖅ.

“ᐱᔭᕆᐊᖃᖅᑎᑦᑎᕗᖅ ᐊᐅᓚᑕᐅᓂᖓᓂ, ᐊᕕᒃᑐᖅᓯᒪᓂᐅᔪᖅ ᑭᒡᓕᓕᖕᒥ ᐱᓂᕐᒥ ᐱᔪᓐᓇᕐᓂᖃᕐᒪᑦ,” ᐅᖃᓚᐅᖅᐳᖅ. “ᐃᓚᖏᑦ ᓄᓇᓕᐅᔪᑦ ᑎᓴᒪᓂ ᐊᔾᔨᒌᙱᑦᑐᓂ ᑳᓐᑐᕌᒃᑎᖃᖅᐳᑦ ᐊᑕᐅᑦᑎᒥᒃ” ᐱᓕᕆᓪᓗᑎᒃ ᐊᔾᔨᒌᙱᑦᑐᓂ ᑲᑐᔾᔨᖃᑎᒌᖑᔪᓄᑦ ᐊᔾᔨᒌᙱᑦᑐᓂ ᐱᓕᕆᐊᒃᓴᐅᔪᓄᑦ.

ᐃᒻᒪᖄ, ᐊᑭᑭᓐᓂᖅᓴᐅᓇᔭᖅᐳᖅ ᐊᒻᒪ ᐊᑑᑎᖃᕐᓂᖅᓴᐅᓗᓂ ᐊᑕᐅᓯᕐᒥ ᑳᓐᑐᕌᒃᑎᖃᕐᓗᓂ ᐱᓕᕆᓗᓂ ᑕᒪᒃᑭᓂ ᐱᓕᕆᐊᒃᓴᐅᔪᓂ ᓇᓗᓇᐅᖅᑕᐅᓯᒪᔪᒥ ᓄᓇᓕᐅᔪᒥ.

“ᐊᔪᕐᓇᙱᑦᑐᑯᓘᕗᖅ, ᐃᓱᒪᒋᔭᓐᓂ, [ᑲᑐᔾᔨᖃᑎᒌᖑᔪᓄᑦ] ᐃᒃᓯᕚᕐᓗᑎᒃ ᐊᒻᒪ ᓇᓂᓯᓗᑎᒃ ᐱᓕᕆᓂᐅᔪᒥ ᐊᐅᓚᑦᑎᓂᕐᒧᑦ,” ᐅᖃᓚᐅᖅᐳᖅ.

ᕕᕗᐊᕆ 3−ᒥ ᑲᑎᒪᓂᖅ ᑰᔾᔪᐊᕐᒥ, ᐃᓚᒋᐊᖅᓯᓚᐅᖅᐳᖅ, “ᓯᕗᓪᓕᖅᐹᑦᑎᐊᒥ ᐊᕐᕌᒍᓂ ᑎᓴᒪᓂ ᖃᔅᓯᒐᓚᖕᓂ ᑲᑐᔾᔨᖃᑎᒌᖑᔪᓂ ᐅᖃᓪᓚᓚᐅᖅᐳᑦ ᐃᒡᓗᒃᓴᓂ ᐱᕙᓪᓕᐊᑎᑦᑎᓂᕐᒧᑦ ᐱᐅᔪᒻᒪᕆᐊᓗᖕᒥ.”