ᓱᒃᑲᔪᖅ ᐃᑭᐊᕿᕕᒃᑰᕈᑎ, ᐃᓅᓱᒃᑐᓄᑦ ᐅᐸᒡᕕᒃᓴᐃᑦ ᓄᓇᕕᒃᒥ ᐃᓚᒋᔭᐅᔪᑦ ᐆᒧᖓ $2.6 ᐱᓕᐊᓐ ᑖᓚᑐᕐᑐᒥ ᐅᑭᐅᕐᑕᖅᑐᕐᒥ ᐸᕐᓇᐅᑎᒃᓴᓄᑦ

For the English version of this story, please see High-speed internet, youth centres in Nunavik part of $2.6B northern action plan.

ᖃᓂᒋᔭᖓᓃᑦᑐᖅ $2.6 ᐱᓕᐊᓐ ᑖᓚᒧᑦ ᐊᑐᕐᑕᐅᓂᐊᖅᑐᖅ ᐱᓕᕆᐊᖑᐃᓐᓇᕐᓗᓂ ᐱᕙᓪᓕᐊᔪᓕᕆᓂᕐᒧᑦ ᓄᓇᕕᒃᒥ ᐊᒻᒪ ᑯᐸᐃᒃ ᐅᐊᖕᓇᖓᓂ ᓄᓇᒋᔭᐅᔪᓄᑦ ᐊᕐᕌᒍᓂ ᑕᓪᓕᒪᓂᒃ, ᑯᐸᐃᒃ ᒐᕙᒪᒃᑯᖏᑦ ᑐᓴᖅᑎᑦᑎᓚᐅᕐᑐᑦ ᑎᓯᐱᕆ 19-ᒥ.

ᑖᒃᑯᐊ ᐅᑭᐅᕐᑕᖅᑐᕐᒥ ᖃᓄᐃᓕᐅᕈᑎᒃᓴᓄᑦ ᐸᕐᓇᐅᑎᒃᓴᑦ ᐊᕐᕌᒍᓄᑦ 2023-2028ᒧ ᐃᓚᖃᕐᑐᑦ 45ᓂ ᓄᑖᓂᒃ ᐱᓕᕆᐊᒃᓴᓂᒃ ᐅᑯᑎᑐᓇᖅ ᐱᓕᕆᐊᓂᒃᓯᓗᑎᒃ ᐊᑐᐃᓐᓇᖃᓕᕈᑎᓂᒃ ᓱᒃᑲᔪᖅᒥ ᐃᑭᐊᕿᕕᒃᑰᕈᑎᒥᒃ ᓄᓇᕕᒃᒥ, ᓴᓇᓗᑎᒃ ᐃᓅᓱᒃᑐᓄᑦ ᐅᐸᒡᕕᒃᓴᐅᖃᑦᑕᕐᓂᐊᖅᑐᓂᒃ ᐅᑭᐅᕐᑕᖅᑐᓕᒫᒥᒃ ᐊᒻᒪᓗ ᓄᑖᓂ ᐃᒡᓗᓕᐅᑲᑕᒡᓗᑎᒃ ᓄᓇᓕᖕᓂ.

ᐅᓇ ᐸᕐᓇᐅᑎ ᑐᓴᒐᒃᓴᓕᐊᕆᓚᐅᕐᑕᖓ ᐆᒪ ᒪᐃᑦ ᐸᓛᓐᓴᑦ ᕙᔩᓇᐅᑉ, ᑯᐸᐃᒃᒥ ᒥᓂᔅᑕ ᐊᑐᒃᑲᓐᓂᕈᓐᓇᖅᑐᓕᕆᓂᕐᒧᑦ ᐊᒻᒪ ᓇᐹᖅᑐᖃᐅᖅᑐᓄᑦ ᒥᓂᔅᑕᐅᓪᓗᓂ ᐊᒻᒪᓗ ᒥᓂᔅᑕ ᑲᒪᒋᔭᖃᖅᖢᓂ ᐅᑭᐅᕐᑕᖅᑐᕐᒥ ᐸᕐᓇᐅᑎᓄᑦ ᑲᑐᔾᔨᖃᑎᒌᓄᑦ, ᑐᓴᒐᒃᓴᓕᐅᖅᖢᓂ ᑐᓴᒐᒃᓴᓕᕆᔨᓄᑦ ᐸᐃ-ᑯᒨ, ᑯᐸᐃᒃᒥ.

ᐅᓇ ᓄᑖᖅ ᐊᕐᕌᒍᓄᑦ ᑕᓪᓕᒪᓄᑦ ᐸᕐᓇᐅᑎ, ᕙᔩᓇᐅᑉ ᐅᖃᐅᓯᕆᔭᖓ “ᐱᓕᕆᔪᒥᓇᑦᑎᐊᖅᑐᖅ,” ᓴᖅᑭᓕᓚᐅᕐᑐᖅ ᐱᓕᕆᖃᑎᒌᖕᓂᖏᑦᑎᒍ 25 ᐅᖓᑖᓃᑦᑐᓄᑦ ᒐᕙᒪᒃᑯᑦ ᐱᓕᕆᕝᕕᖏᓐᓂᒃ ᐊᒻᒪ ᐱᓕᕆᔨᒋᔭᐅᔪᓄᑦ ᐊᒻᒪᓗ ᐅᑭᐅᕐᑕᖅᑐᕐᒥ ᓄᓇᖃᖅᑳᖅᑐᓄᑦ ᑲᑐᔾᔨᖃᑎᒌᓄᑦ.

ᐸᕐᓇᐅᑎ ᐋᖅᑭᒃᓱᐃᓯᒪᔪᖅ 45ᓂ ᖃᓄᐃᓕᐅᕈᑎᒃᓴᓂᒃ ᑎᓴᒪᐅᓕᖓᔪᓄᑦ: ᓄᓇᕕᒃᒧᑦ ᐊᒃᑐᐊᓂᖃᕐᓂᕐᓴᐅᓕᕐᓗᑎᒃ, ᓴᓇᕙᓪᓕᐊᓗᑎᒃ ᐅᑭᐅᕐᑕᖅᑐᕐᒥ ᑮᓇᐅᔭᓕᐅᕈᑎᐅᔪᓐᓇᖅᑐᓄᑦ, ᓄᓇᓕᖕᓂ ᖃᓄᐃᓕᐅᕈᑎᐅᔪᓐᓇᖅᑐᓄᑦ ᐊᒻᒪᓗ ᐊᕙᑎᒋᔭᐅᔪᖅ ᐊᓯᐅᑐᐃᓐᓇᖅᑎᑕᐅᑦᑕᐃᓕᓗᓂ.

ᐱᓕᕆᐊᒃᓴᐃᑦ ᓄᓇᕕᒃᒧᑦ ᐃᓚᖃᕐᑐᑦ ᐱᔨᑦᑎᕋᐅᑎᑦ ᒪᑯᓄᖓ ᓱᒃᑲᔪᓂᒃ ᐃᑭᐊᕿᕕᒃᑯᑦ ᐱᔨᑦᑎᕋᐅᑎᑦ ᐱᒋᐊᓪᓚᒃᑲᓐᓂᖅᑕᐅᓗᑎᒃ ᓴᓇᑎᑦᑎᓗᑎᒃ ᐊᑦᑕᑕᕈᓐᓇᐅᑎᓄᑦ ᐅᐊᔭᒐᓚᖕᓂᒃ (ᕙᐃᐳ ᐋᑉᑎᒃᔅ) ᐊᒻᒪᓗ ᐱᐅᓯᕚᓪᓕᖅᑎᑦᑎᓗᑎᒃ ᐊᑦᑕᑕᖃᑦᑕᐅᑎᓯᒪᓂᕐᒥᒃ ᐅᐊᖕᓇᖓᓃᑦᑐᓄᑦ.

ᐅᓇ ᐃᓱᒪᒋᔭᐅᔪᖅ ᐅᓄᒃᑲᓐᓂᖅᑐᓂᒃ ᐱᔨᑦᑎᕋᐅᑎᑕᖃᓕᕋᔭᕐᓂᖓᓂᒃ ᐅᑯᓄᖓᓗ ᐋᓐᓂᐊᖃᖅᑕᐃᓕᓂᕐᒧᑦ, ᒪᓕᒐᓕᕆᓂᕐᒧᑦ ᐊᒻᒪᓗ ᐃᓕᓐᓂᐊᕐᓂᕐᒧᑦ.

ᐸᕐᓇᐅᑎ ᐃᓚᖃᕐᒥᔪᖅ ᓴᓇᓂᐊᕐᓂᖏᓐᓂᒃ ᐃᓄᓱᒃᑐᒃᑯᕕᒃᓴᓂᒃ ᐅᑭᐅᕐᑕᖅᑐᓕᒫᒥᒃ, ᓴᓗᒻᒪᕐᓴᐃᓗᑎᒃ ᖁᐊᕐᓵᕐᓇᖅᑐᓂ ᐊᓂᑕᐅᓯᒪᔪᓂᒃ ᓄᓇᓕᖕᓂᑦ ᐊᒻᒪᓗ ᒪᓕᒐᓕᕆᓂᕐᒧᑦ ᐱᔨᑦᑎᕋᐅᑎᓂ ᐊᑐᐃᓐᓇᖃᕐᓂᕐᓴᐅᓕᕐᓗᑎᒃ.

ᐱᓕᕆᖃᑎᖃᕐᓂᐊᕐᓗᑎᒃ ᒪᑭᕝᕕᒃ ᑯᐊᐳᕇᓴᓐᑯᓐᓂᒃ, ᑲᑎᕕᒃ ᓄᓇᓕᓕᒫᑦ ᒐᕙᒪᖓᓂᒃ ᐊᒻᒪᓗ ᓄᓇᕕᒃᒥᑦ ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓂᒃ, ᐅᑯᐊ ᒪᓕᒐᓕᕆᔨᒃᑯᑦ ᐃᖅᑲᖅᑐᐃᕕᓕᕆᓂᕐᒥᒃ ᐱᔨᑦᑎᕋᐅᑎᓕᕆᔨᓂᒃ ᐱᐅᓂᕐᓴᓂᒃ ᐃᖅᑲᓇᐃᔭᖅᕕᖃᓕᖅᑎᑦᑎᓂᐊᖅᑐᑦ ᐊᒻᒪᓗ ᑐᓴᐅᒪᔾᔪᑎᓕᕆᓂᕐᒧᑦ ᐱᓕᕆᔾᔪᑎᓂ ᑕᒪᐃᓐᓂ ᓄᓇᓕᖕᓂ.

ᐅᓇ ᐸᕐᓇᐅᑎ ᐱᐅᓯᕚᓪᓕᖅᑎᑦᑎᔾᔪᑎᐅᔪᒪᖕᒥᔪᖅ ᒪᓕᒐᓕᕆᓂᕐᒧᑦ ᐱᔨᑦᑎᕋᐅᑎᓂᒃ ᓄᓇᓕᖕᓂ ᓲᕐᓗ ᑕᒪᐅᖓᒥᐊᖅ ᑐᓴᖅᑕᐅᔭᕆᐊᖃᙱᑦᑐᓂᒃ ᐅᐸᖃᑎᒌᑦᑎᐊᒻᒪᕆᒡᓗᑎᒃ ᐅᖃᖃᑎᖃᖃᑦᑕᕐᓗᑎᒃ ᐊᒻᒪᓗ ᓄᓇᓕᖕᓂ ᐃᖅᑲᖅᑐᐃᕕᓕᕆᕙᒡᓗᑎᒃ.

“ᖁᔭᓐᓇᒦᒃ ᑮᓇᐅᔭᐃᑦ ᐃᑲᔫᑎᒃᓴᓄᑦ ᐅᑯᐊ ᓄᓇᖃᖅᑳᖅᑐᑦ ᐊᒻᒪ ᐃᓄᐃᑦ ᓄᓇᓕᖏᑦ ᑮᓇᐅᔭᑎᒍᑦ ᐱᓕᕆᔾᔪᑎᖃᕐᓂᐊᕐᒪᑕ ᐱᐅᓯᕚᓪᓕᖅᑎᑕᐅᓂᖏᓐᓄᑦ ᐃᓕᓐᓂᐊᖅᑐᓕᕆᓂᖅ ᐊᒻᒪ ᑮᓇᐅᔭᓕᐅᕋᓱᒍᑎᐅᕙᒃᑯᑦ,” ᐅᖃᕐᑐᖅ ᐃᐊᓐ ᓚᕗᕆᓂᐄ, ᑯᐸᐃᒃᒥ ᒥᓂᔅᑕ ᑲᒪᒋᔭᓕᒃ ᐱᓕᕆᖃᑎᒌᒍᑎᓂᒃ ᓄᓇᖃᖅᑳᖅᑐᓂᒃ ᐊᒻᒪ ᐃᓄᖕᓂ.

ᐅᖃᓚᐅᕐᒥᔪᖅ ᑕᓂᔅ ᓚᒫᑦ, ᐅᖓᕙᒧᑦ ᒪᓕᒐᓕᐅᖅᑎ: “ᐱᒻᒪᕆᐊᓘᒻᒪ ᐅᑭᐅᕐᑕᖅᑐᕆᔭᕗᑦ ᑕᑯᒥᓇᕐᓂᕐᓴᐅᓕᕐᓗᓂ ᐊᒻᒪᓗ ᐊᑐᖅᑕᐅᖏᓐᓇᕈᓐᓇᖅᑐᓂᒃ ᐱᕙᓪᓕᐊᔪᓕᕆᓂᕐᒥᒃ.”

ᐅᓇ ᐱᖓᔪᒋᔭᐅᓕᕐᑐᖅ ᖃᓄᐃᓕᐅᕈᑎᒃᓴᓄᑦ ᐸᕐᓇᐅᑎᓂ ᐱᕙᓪᓕᐊᔪᓕᕆᓂᖅ ᑯᐸᐃᒃ ᐅᐊᖕᓇᖓᓅᖓᔪᓂᒃ. ᓯᕗᓂᐊᒍᑦ ᐸᕐᓇᐅᑎᐅᓚᐅᕐᑐᖅ 2020-2023ᒧ ᐃᓱᓕᓚᐅᕐᒪᑦ ᒫᔅᓯ 31, 2023ᒥ.