ᓄᓇᕕᒃᒥ ᖃᖓᑕᓲᖅᑎ ᐃᓕᓴᕆᔭᐅᔪᑎᑖᖅᐳ ᐱᓕᕆᔨᒻᒪᕆᐅᓂᖓᓂ ᐆᒥᖓ officer of Order of Canada
ᔮᓂ ᐋᑕᒻᔅ ᐃᓕᓴᕆᔭᐅᔾᔪᑎᑖᖅᑐᖅ ᑲᓇᑕᒥ ᖁᑦᑎᓛᒥ ᐃᓕᓴᕆᔭᐅᔾᔪᑎᒥᒃ
ᑮᓇᐅᔭᓕᐅᖅᑎᐅᓇᓱᒃᐸᒃᑐᖅ ᐊᒻᒪ ᖃᖓᑕᓲᖅᑎ ᔮᓂ ᐋᑕᒻᔅ ᐊᔾᔨᓕᐅᖅᑕᐅᔪᖅ ᑎᓯᐱᕆ 12 ᐃᓕᓴᕆᔭᐅᔾᔪᑎᑖᖅᑎᓪᓗᒍ ᐆᒥᖓ Officer of the Order of Canada ᐆᒧᖓ ᒐᕙᓇ ᔭᓄᕈᓪ ᒥᐊᓕ ᓴᐃᒪᓐᒧᑦ ᖁᕕᐊᓲᑎᖃᖅᑎᓪᓗᒋᑦ ᕇᑑ ᕼᐋᓪᒥ ᐋᑐᕚᒥ. (ᐊᔾᔨᓕᐅᕆᔨ ᑭᐅᔅᑕᓐ ᕗᐃᓕᐊᒻᔅ)
ᓄᓇᕕᒃᒥ ᑮᓴᐅᔭᓕᐅᖅᑎᐅᓇᓱᒃᐸᒃᑐᖅ ᐊᒻᒪ ᖃᖓᑕᓲᖅᑎ ᔮᓂ ᐋᑕᒻᔅ ᐃᓕᓴᕆᔭᐅᔾᔪᑎᑖᓚᐅᕐᑐᖅ ᐆᒥᖓ Officer of the Order of Canada ᖁᕕᐊᓲᑎᖃᖅᑎᓪᓗᒋ ᑎᓯᐱᕆ 12-ᒥ ᕇᑑ ᕼᐋᓪᒥ ᐋᑐᕚᒥ.
ᐋᑕᒻᔅ, ᑰᔾᔪᐊᖅᒥᐅᑕᖅ, ᐃᓚᒋᔭᐅᓚᐅᕐᑐᖅ 12-ᓂ ᐃᓕᓴᕆᔭᐅᔾᔪᑎᑖᖅᑐᓂ ᑐᒡᓕᕆᔭᐅᔪᒥ ᐃᓕᓴᕆᔭᐅᔾᔪᑎᒥ, ᐅᓇ ᒪᑯᓄᖓ ᖃᓄᐃᓕᐅᕐᓂᒃᑯᑦ ᐱᕙᓪᓕᐊᓂᕐᒧᑦ ᐊᒻᒪ ᐱᓇᓱᒻᒪᕆᖕᓂᕐᒧᑦ ᐱᔨᑦᑎᕋᐅᑎᒃᑯᑦ ᑲᓇᑕᒧᑦ.
“ᑮᓇᐅᔭᓕᐅᕋᓱᒃᑎ ᐊᒻᒪ ᖃᖓᑕᓲᖅᑎ ᔮᓂ ᐋᑕᒻᔅ ᐃᑲᔪᖅᓯᒪᖕᒪᑦ ᓄᓇᕕᐅᑉ ᑮᓇᐅᔭᓕᐅᕈᑎᒋᓇᓱᖃᑦᑕᖅᑕᖏᓐᓂ ᐊᒻᒪ ᐃᓅᖃᑎᒌᖕᓂᕐᒥ ᐃᓚᒋᔭᐅᓂᕐᒧᑦ ᐱᒋᐊᖅᑎᑦᑎᓯᒪᔪᓂ ᓄᓇᕕᒃᒥ ᖃᖓᑕᓲᓕᕆᓂᕐᒥ ᐱᔨᑦᑎᕋᐅᑎᓂᒃ,” ᐅᖃᕐᑐᖅ ᑭᐊᓐ ᒪᒃᑭᓚᑉ, ᑎᑎᕋᖅᑎᒋᔭᐅᔪᖅ ᒐᕙᓇ ᔭᓄᕈᒧᑦ, ᐅᖃᓪᓚᒃᑎᓪᓗᒍ ᑎᒃᑯᐊᖅᑕᐅᔪᓂ ᐃᓕᓴᕆᔭᐅᔾᔪᑎᒧ ᐊᒻᒪ ᖃᐃᖁᔭᐅᓯᒪᔪᓂᒃ.
“ᐱᓇᓱᒻᒪᕆᖕᓂᖓ ᓄᓇᖃᖅᑳᖅᑐᑦ ᑲᑐᔾᔨᖃᑎᒌᖏᓐᓄᑦ ᓇᓗᓇᙱᓚᖅ ᖃᓄᐃᓕᐅᕈᑎᒋᒋᕈᓘᔭᖅᑕᖏᑦᑎᒍᑦ.”
ᒐᕙᓇ ᔭᓄᕈᓪ ᒥᐊᓕ ᓴᐃᒪᓐ, ᑖᓐᓇᑦᑕᐅᖅ ᓄᓇᕕᒃᒥᐅᑕᖅ, ᐋᖅᑭᒃᓯᓚᐅᕐᑐᖅ ᐊᐅᐸᖅᖢᓂ ᐊᒻᒪ ᖃᐅᓪᓗᖅᑐᖃᖅᖢᓂ ᖃᓐᓂᙳᐊᑯᓗᖕᒥ ᐃᓕᓴᕆᔭᐅᔪᑎᒥ ᐋᑕᒻᔅᒧᑦ.
ᐋᑕᒻᔅ ᐱᓕᕆᖃᑕᐅᓚᐅᕐᑐᖅ ᐅᑯᐊ ᕘᔅᑦ ᐃᐅ ᐊᒻᒪ ᑲᓃᑎᐊᓐ ᓄᐊᑦ ᐊᑕᐅᓯᙳᖅᑎᑕᐅᓇᓱᓕᖅᑎᓪᓗᒋ ᐊᒻᒪᓗ ᒫᓐᓇ ᐃᒃᓯᕙᐅᑕᕆᔭᐅᓪᓗᓂ ᑲᓃᑎᐊᓐ ᓄᐊᑦᒧᑦ.
ᐱᒋᐊᖅᑎᑦᑎᔨᐅᖃᑕᐅᓯᒪᔪᖅ ᐊᒥᓱᓂ ᖃᖓᑕᓲᒃᑯᑦ ᐱᔨᑦᑎᕋᐅᑎᓂ, ᐃᓚᖃᖅᖢᑎᒃ ᐅᑯᓂᖓ ᐊᑕᐃ ᖃᖓᑕᓲ ᓵᑕᐃᑦ, ᕼᐊᓕ-ᐅᖓᕙ, ᓄᓇᕕᒃ ᕉᑐᔅ ᐃᖕᒃ., ᐊᒻᒪ ᐃᓄᒃᐊᑎᐅᔅ (Innukoptéres Inc.). ᑲᑎᒪᔨᐅᖃᑕᐅᓯᒪᓪᓗᓂ ᐊᔾᔨᒌᖏᑦᑐᓄᑦ ᑰᔾᔪᐊᖅᒥ, ᐊᒻᒪ ᕼᐋᒻᒪᓚᒃᑯᓐᓄᑦ ᑲᑎᒪᔨᐅᓂᑰᓪᓗᓂ 1987-ᒥ ᐊᒻᒪ ᒪᐃᔭᐅᓂᑰᓪᓗᓂ 1991 ᐊᒻᒪ 1997 ᐊᑯᓐᓂᖓᓂ.
2006-ᒥ, ᐋᑕᒻᔅ ᐃᓕᓴᕆᔭᐅᔾᔪᑎᑖᓚᐅᕐᓯᒪᔪᖅ ᐆᒥᖓ National Order of Quebec, ᐅᕙᙶᖅᖢᓂ ᑯᐸᐃᒃ ᓘᑕᓇᓐᑦ ᒐᕙᓇᖓᓂ.
ᐊᓯᖏᑦ ᓄᓇᖃᖅᑳᖅᑐᑦ ᑎᒃᑯᐊᖅᑕᐅᔪᑦ ᐃᓕᓴᕆᔭᐅᔾᔪᑎᒧᑦ ᐆᒧᖓ Order of Canada ᑎᓯᐱᕆ 12-ᒥ ᐅᑯᐊᖑᓚᐅᕐᑐᑦ ᓵᕕᔾ ᐱᐊ ᒪᓐᑐᕆᐊᒥ ᑯᕇᓂᙶᖅᑐᖅ, ᔮᓐ ᕗᐃᓕᐊᒻ ᐳᑳᔾ ᐅᕙᙵᑦ ᕗᐊᓴᐅᖕ ᓄᓇᖃᖅᑳᖅᑐᓂᒃ, ᕼᐋᓕ ᑯᕉᓲ ᐅᕙᙵᑦ ᐲᑲᓂ ᓄᓇᓕᖕᓂ ᐊᒻᒪ ᐹᑐᕆᓯᐊ ᓂᒍᕗᐊᓐᔅ ᕗᐊᐱ-ᐱᔨᑮᕗᐃ ᐅᕙᓚᑦ ᓛᒃ ᓲᓪ ᓄᓇᖃᖅᑳᖅᑐᓂᑦ.
J.A. was instrumental in the start up of Kuujjuaq’s Arpik Jam Festival which has been running for 25+ years. When will Don Burnstick out of Winnipeg be returning LOL.