ᓄᓇᕕᖕᒥ ᐸᓖᓯᒃᑯᑦ ᐊᑐᐃᓐᓇᖃᖅᑎᑦᑎᕗᑦ ᓇᖕᒥᓂᖅ ᐳᑦᑕᖅᑯᑎᓂ ᑭᕕᑦᑕᐃᓕᓂᕐᒧᑦ

For the English version of this story, please see Nunavik police offer personal life-saving devices to prevent drowning.

ᓄᓇᕕᖕᒥ ᐸᓖᓯᒃᑯᑦ ᑐᓐᓂᖅᓴᐃᕗᑦ 420−ᓂ ᓇᖕᒥᓂᖅ ᐳᑦᑕᖅᑯᑎᓂ ᓄᓇᓕᖕᓂ ᐊᕕᒃᑐᖅᓯᒪᓂᐅᔪᒥ ᓴᖅᑭᑎᑦᑎᓂᕐᒥ ᐅᔾᔨᕈᓱᖕᓂᐅᔪᒥ ᐃᒪᕐᒥ ᐊᑦᑕᓇᔾᔭᐃᖅᓯᓯᒪᓂᕐᒧᑦ.
ᑳᑉᑎᓐ ᑑᓂ ᐹᑭᑦ, ᑐᕌᖅᑎᑦᑎᓚᐅᖅᑐᒥ ᐱᓕᕆᐊᒃᓴᐅᔪᒥ, ᐅᖃᓚᐅᖅᐳᖅ ᐸᓖᓯᒃᑯᑦ ᐅᔾᔨᕆᓚᐅᖅᐳᑦ ᐊᑐᖅᑕᐅᕙᒃᑐᓂ ᐳᑦᑕᖅᑯᑎᓂ ᐊᑐᖅᑕᐅᒐᔪᓗᐊᙱᓐᓂᖏᓐᓂ ᐃᓄᖕᓄᑦ ᐅᒥᐊᖅᑐᒐᔪᒃᑐᓄᑦ.

“ᐊᓯᖓᓂ ᐱᔾᔪᑕᐅᔪᒥ ᖃᔅᓯᒐᓚᐅᔪᓂ ᑐᖁᓂᐅᓚᐅᖅᑐᓂ ᓯᕗᓂᐊᓂ ᐊᕐᕌᒎᔪᓂ,” ᐅᖃᓚᐅᖅᐳᖅ ᑲᔪᖏᖅᓴᐃᓂᐅᔪᒥ ᐱᓕᕆᐊᒃᓴᐅᔪᒧᑦ, ᐅᐃᕖᑎᑐᑦ-ᐅᖃᐅᓯᕐᒥ ᐅᖃᓘᑎᒃᑯᑦ ᐊᐱᖅᓱᖅᑕᐅᓂᐅᔪᒥ.

ᐳᑦᑕᖅᑯᑎᑦ, ᐅᖃᓚᐅᖅᐳᖅ, “ᓴᐳᔾᔨᔪᓐᓇᕋᔭᓚᐅᖅᐳᑦ ᐃᓅᓯᖏᓐᓂ.”

ᑕᐃᒫᒃ ᓄᓇᕕᖕᒥ ᐸᓖᓯᒃᑯᑦ, ᐱᓕᕆᖃᑎᖃᖅᖢᑎᒃ ᑲᑎᕕᒃ ᐊᕕᒃᑐᖅᓯᒪᓂᐅᔪᒥ ᒐᕙᒪᒃᑯᓐᓂ, ᓂᕈᐊᓚᐅᖅᐳᑦ ᑐᓐᓂᖅᓴᐃᓂᕐᒥ ᓇᖕᒥᓂᖅ ᐳᑦᑕᖅᑯᑎᓂ.

ᐳᑦᑕᖅᑯᑎᒥ-ᔭᐃᑲᖕᒥ ᐅᕝᕙᓘᓐᓃᑦ ᐃᑭᐊᖅᖠᒥᒃ ᐊᒡᕕᐊᕆᔭᐅᕙᒃᑐᒥ ᐊᑐᕐᓂᕐᒧᑦ ᐃᖃᓗᒐᓱᒃᑎᓪᓗᒋᑦ, ᓇᖕᒥᓂᖅ ᐳᑦᑕᖅᑯᑎ ᐊᑐᖅᑕᐅᓲᖑᕗᖅ ᕿᑎᖓᒍᑦ ᑎᕆᒃᓯᐅᑎᑐᑦ.

ᐊᒃᖢᓈᖃᖅᐳᖅ, ᓄᓱᒃᑕᐅᒍᓂ, ᐳᓪᓚᒃᑎᑦᑎᓲᖑᕗᖅ ᐳᑦᑕᖅᑯᑎᖓᓂ ᐳᔪᕐᓗᖕᒧᑦ. ᐊᑐᖅᑎᐅᔪᖅ ᓄᓱᒃᓯᓪᓗᓂ ᓄᓱᒃᓯᓕᖅᖢᓂ ᐳᓪᓚᒃᓯᒪᔪᒥ ᔭᐃᑲᐅᔪᒥ ᓂᐊᖁᖓᑕ ᖁᓛᒍᑦ.

“ᐱᐅᓪᓗᓂ ᐊᓯᐊᒎᖅᑐᒥ ᐆᒥᖓ ᐆᒃᑑᑎᐅᔪᒥ ᐱᖃᕐᓂᕐᒥ,” ᐅᖃᓚᐅᖅᐳᖅ ᐹᑭᑦ.

ᐅᖃᓚᐅᖅᐳᖅ Mustang Survival Corp., ᑐᓂᓯᓚᐅᖅᑐᓂ ᐳᖅᑕᖅᑯᑎᓂ, ᓇᓗᓇᐃᖅᓯᓚᐅᖅᐳᖅ ᐱᓕᕆᑦᑎᐊᕈᓐᓇᕐᓂᖏᓐᓂ ᓂᒡᓚᓱᖕᓂᐅᔪᓂ ᐊᑦᑎᒃᑎᒋᔪᒥ 0 C−ᒥ. ᓂᒡᓚᓱᖕᓂᖅᓴᐅᔪᓂ ᖃᓄᐃᓐᓂᐅᔪᓂ, ᐳᔪᕐᓗᒃ ᐊᔪᕐᓇᖅᑎᑦᑎᒐᓚᒃᐳᖅ ᐳᓪᓚᒃᑎᑦᑎᓂᖓᓂ ᐳᑦᑕᖅᑯᑎᒥ.

-10 C−ᒥ, ᐳᑦᑕᖅᑯᑎ ᐃᓚᐃᓐᓇᖓ ᐳᓪᓚᒍᓐᓇᖅᐳᖅ ᑕᐃᒫᒃ ᓱᓪᓗᓕᖕᒥ ᐃᓚᔭᐅᓚᐅᖅᐳᖅ ᐱᔪᓐᓇᖅᑎᑦᑎᔪᒥ ᐊᑐᖅᑎᐅᔪᒥ ᓇᖕᒥᓂᖅ ᓱᐴᕆᓂᖓᓂ ᐊᓂᕐᓂᒃᓴᒥ ᐃᓗᐊᓄᑦ. ᓂᒡᓚᓱᖕᓂᖅᓴᐅᔪᓂ, ᐳᑦᑕᖅᑯᑎ ᐊᑑᑎᖃᙱᓐᓂᖅᓴᐅᕗᖅ.

ᐹᑭᑦ ᐅᖃᓚᐅᖅᐳᖅ ᖃᔅᓯᒐᓚᖕᓂ ᓄᓇᓕᐅᔪᓂ ᐱᓯᒪᕙᒌᖅᐳᑦ ᐳᑦᑕᖅᑯᑎᖏᓐᓂ

ᐅᖃᐅᔾᔭᐅᓚᐅᖅᐳᑦ ᓄᓇᓕᖕᓂ ᐅᖃᓪᓚᒡᕕᖕᓂ ᐸᓖᓯᐅᔪᑦ ᐳᓚᕋᖅᑎᓪᓗᒋᑦ ᑐᓐᓂᖅᓴᐃᓂᕐᒥ ᐳᑦᑕᖅᑯᑎᓂ. ᐃᓂᒋᔭᖓᓂ, ᐸᓖᓯᐅᔪᑦ ᐃᓕᓐᓂᐊᖅᑎᑦᑎᓚᐅᖅᐳᑦ ᖃᓄᖅ ᑎᕆᕐᓯᐅᑎᑦ ᐊᑐᖅᑕᐅᕙᖕᓂᖓᓂ ᐊᒻᒪ ᑐᓂᓯᓪᓗᑎᒃ ᐃᓄᖕᓄᑦ ᐱᔪᒪᓚᐅᖅᑐᓂ.

“ᐱᐅᒋᔭᐅᕐᔪᐊᓚᐅᖅᐳᑦ,” ᐹᑭᑦ ᐅᖃᓚᐅᖅᐳᖅ, ᐃᓚᒋᐊᖅᓯᓪᓗᓂ ᐊᑕᐅᓯᐅᔪᒥ ᑲᑎᙵᓂᐅᔪᓂ ᐊᐅᓪᓚᓚᐅᖅᐳᑦ ᐅᒥᐊᖅᑐᕆᐊᖅᖢᑎᒃ ᐱᑐᐊᕋᒥᒃ ᑎᕆᒃᓯᐅᑎᓂ ᐳᑦᑕᖅᑯᑎᓂ.

ᓄᓇᕕᖕᒥ ᐸᓖᓯᒃᑯᑦ ᐊᒻᒪ ᑲᑎᕕᒃ ᐊᕕᒃᑐᖅᓯᒪᓂᐅᔪᒥ ᒐᕙᒪᒃᑯᑦ ᐸᕐᓇᒃᐳᑦ ᐱᓕᕆᓂᖓᓂ ᐊᔾᔨᐸᓗᐊᓂ ᐱᒋᐊᕈᑕᐅᔪᒥ ᐊᕐᕌᓂᐅᓂᐊᖅᑐᒥ, ᑕᐅᑐᒃᑕᑐᐊᖃᑲᐃᓐᓇᖅᑐᒥ ᐳᑦᑕᖅᑯᑎᓂ ᓈᒻᒪᒋᔭᐅᓂᖅᓴᐅᔪᓂ ᐃᓄᖕᓄᑦ ᐅᑭᐅᓕᖕᓂ 16−ᓂ ᐊᒻᒪ ᓄᑲᖅᖠᐅᔪᓄᑦ. ᐳᑦᑕᖅᑯᑎ ᑐᓐᓂᖅᓴᖅᑕᐅᔪᖅ ᑕᒪᑐᒪᓂ ᐊᕐᕌᒎᔪᒥ ᐃᓐᓇᖅᓯᐅᑎᑐᐃᓐᓇᐅᕗᑦ.

ᐹᑭᑦ ᐱᓚᐅᖅᐳᑦ ᑮᓇᐅᔭᖃᖅᑎᑕᐅᓂᐅᔪᒥ ᐅᕘᓇ ᐅᖓᓗᒃ ᐱᓕᕆᐊᖑᔪᒥ ᐊᑐᐃᓐᓇᐅᑎᑕᐅᔪᒥ ᒪᑭᕝᕕᒃᑯᓐᓂ ᐊᒻᒪ ᑲᑎᕕᒃ ᐊᕕᒃᑐᖅᓯᒪᓂᐅᔪᒥ ᒐᕙᒪᒃᑯᓐᓂ. ᐱᓕᕆᐊᖑᔪᖅ ᑐᓂᓯᓲᖑᕗᖅ $10 ᒥᓕᐊᓐᓂ ᐊᕐᕌᒍᑕᒫᒥ ᐱᓕᕆᐊᒃᓴᐅᔪᓄᑦ ᐱᔾᔪᑎᖃᖅᑐᒥ ᐱᕋᔭᒃᑎᑦᑕᐃᓕᒪᓂᐅᔪᒧᑦ.

“ᑕᔪᖏᖅᓴᕐᓇᖅᐳᖅ ᐅᓇ [ᐱᒋᐊᕈᑕᐅᔪᖅ] ᑐᙵᓱᒃᑎᑕᐅᑦᑎᐊᓚᐅᕐᓂᖓᓂ ᐃᓄᖕᓄᑦ,” ᐅᖃᓚᐅᖅᐳᖅ ᐹᑭᑦ. “ᐱᓕᕆᔾᔪᑎᑕᖃᓕᖅᐳᖅ ᒫᓐᓇ ᐃᓄᖕᓄᑦ ᐆᒪᐃᓐᓇᕈᓐᓇᕐᓂᕐᒧᑦ ᐃᒫᖅᑐᖃᕐᓂᕈᓂ, ᐅᕝᕙᓘᓐᓃᑦ ᖃᓄᐃᓐᓂᐅᔪᒥ ᐱᕐᕈᓗᐊᕿᓂᐅᔪᒥ.”