ᓄᓇᕕᒃᒥ ᐱᓕᕆᐊᖑᔪᖅ ᑐᓂᔭᐅᔪᖅ $680,000-ᓂ ᓄᓇᓕᖕᓂ ᖃᓄᐃᓕᐅᕈᑎᒃᓴᐅᓂᐊᖅᑐᓂᒃ

For an English version of this story, please see Nunavik projects get $680,000 for several community initiatives.

ᑯᐸᐃᒃ ᒐᕙᒪᖓ ᑐᓴᖅᑎᑦᑎᓚᐅᕐᑐᑦ ᒫᓂ $680,000-ᓂ ᐅᓄᕐᑐᓄᑦ ᐱᓕᕆᐊᓄᑦ ᐃᑲᔫᑎᖃᕐᓂᐊᕐᓂᕋᖅᖢᑎᒃ ᓄᓇᕕᒃᒥ.

ᐃᓚᖓ ᐱᓕᕆᐊᒃᓴᖅ ᐃᒡᓗᓕᐅᕈᑎᐅᓂᐊᖅᖢᓂ ᑰᔾᔪᐊᖅᒥ ᐃᓱᒪᒃᑯᑦ ᐋᓐᓂᐊᖃᖅᑕᐃᓕᓂᕐᒧ ᐱᓕᕆᐊᖃᖅᑐᓄᑦ, ᒐᕙᒪᒃᑯᑦ ᑐᓴᒐᒃᓴᖓ ᐅᖃᕐᓯᒪᓚᐅᕐᑐᖅ ᐋᒐᓯ 22-ᒥ.

ᐅᖓᕙ ᑲᒪᒋᔭᐅᔪᖅ ᐊᖏᕐᕋᖅ, ᐅᕙᓃᑦᑐᖅ ᑰᔾᔪᐊᖅᒥ, ᑐᓂᔭᐅᓂᐊᕐᑐᖅ $100,000-ᓂ ᐃᒡᓗᓂ ᓴᓇᔭᐅᓂᐊᖅᑐᓄᑦ ᐸᕐᓇᐅᑎᒃᓴᓄᑦ.

ᐊᒻᒪᓗ, ᓄᓇᓕᖕᓂ ᐋᓐᓂᐊᖃᖅᑕᐃᓕᓂᕐᒧᑦ ᐃᑲᔫᑎᑦ TLS ᓄᓇᕕᒃ ᐅᕙᓃᑦᑐᖅ ᑰᔾᔪᐊᖅᒥ ᑐᓂᔭᐅᓂᐊᕐᒥᔪᑦ $90,000-ᓂ ᐱᖓᓱᓂ ᐅᖃᐅᓯᓕᖕᒥ ᖃᕋᓴᐅᔭᒃᑯ ᓂᐅᕕᕐᕕᐅᖃᑦᑕᕐᓂᐊᖅᑐᒥ ᐃᓄᐃᑦ ᓴᓇᐅᒐᖏᓐᓂ.

ᐅᑯᐊᓕ ᑲᑐᔾᔨᖃᑎᒌᖑᔪᑦ ᐃᓕᓐᓂᐊᖅᑎᑦᑎᕙᒃᑐᑦ ᓄᓇᖃᖅᑐᓂ ᐊᒃᓱᕈᓐᓇᖅᑐᓕᕆᓂᕐᒥ ᐊᒻᒪ ᐃᑲᔪᖃᑦᑕᖅᖢᑎᒃ ᐃᒻᒥᓃᖅᑎᑦᑎᑦᑕᐃᓕᓂᒃᑯᑦ, ᐃᓅᓱᒃᑐᓕᕆᓂᕐᒥ ᐊᒻᒪᓗ ᐋᓐᓂᖅᓱᐃᑦᑕᐃᓕᑎᑦᑎᓂᕐᒥ.

ᐃᓱᐊᕐᓯᕕᒃ ᒪᒥᓴᕐᕕᒃ ᒪᕐᕈᐃᓂ ᐃᑲᔫᑎᒃᓴᖅᑖᓕᒑᖕᒥᔪᑦ. ᓯᕗᓪᓕᖅ $100,000-ᓂ ᐊᑐᖅᑕᐅᓂᐊᖅᖢᓂ ᐃᓄᐃᑦ ᐃᓕᖅᑯᓯᓕᕆᕝᕕᒃᓴᖓᓂ ᒪᒥᓴᕐᕕᐅᑉ ᖃᓂᒋᔭᖓᓂ ᑰᔾᔪᐊᖅᒥ.

ᐱᖃᑖᓕ ᐱᓕᕆᐊᒃᓴᖅ, ᐃᑲᔫᑎᑖᕐᓯᒪᓪᓗᓂ $90,000 ᖃᓂᒋᔭᖓᓂ, ᓂᐅᕕᕈᑎᐅᓂᐊᖅᖢᓂ ᐱᙳᐊᕈᑎᒃᓴᓂ ᐊᒻᒪ ᓯᓚᒥ ᐱᖁᑎᒋᔭᐅᓂᐊᖅᑐᓂ ᐃᓚᒌᓄᑦ ᐃᑲᔫᑎᐅᖃᑦᑕᕐᓂᐊᖅᑐᓂᒃ.

ᐃᓄᒃᔪᐊᒃᒥᓪᓕ, ᓯᕆᕕᒃ ᑐᓂᔭᐅᓂᐊᕐᑐᑦ $100,000-ᓂ ᐱᖁᑎᒃᓴᓄᑦ ᐊᒻᒪ ᐱᓕᕆᔾᔪᑎᒃᓴᓄᑦ ᓄᓇᓕᖕᓄᑦ ᓂᕿᓕᐅᕐᕕᐅᓂᐊᖅᑐᒥ, ᐱᕈᓯᐊᖃᕐᕕᒃᓴᒥ ᖃᖓᓕᒫᒧᑦ, ᐱᕈᕈᑎᒃᓴᓂᒃ, ᑎᑎᕋᕐᕕᒃᓴᒧᑦ ᐊᒻᒪ ᑲᑎᒪᕝᕕᒃᓴᓄᑦ.

ᒪᑭᕕᒃ ᑯᐊᐳᕇᓴᓐᑯ ᑐᓂᔭᐅᓂᐊᕐᒥᔪᑦ $100.000-ᓂ ᖃᐅᔨᓴᕈᑎᐅᓂᐊᓗᓂ ᐃᒪᕐᒥ ᐊᒻᒪ ᐆᒪᔪᓂ ᐅᕙᓃᑦᑐᓂᒃ ᔪᐊᔾ ᕆᕗ ᐃᒪᖃᕐᕕᐊᓂ.

ᐊᒻᒪᓗ ᐅᑯᐊ ᓴᖅᑭᑎᑦᑎᔨ ᐃᓐᓄ ᐋᙳ (Production Innu Assi) ᑐᓂᔭᐅᓂᐊᕐᒥᔪᑦ ᑎᑎᕋᖅᐸᓪᓕᐊᓂᐊᕐᒪᑕ ᐃᓐᓇᑐᖃᐃᑦ ᐅᖃᐅᓯᕆᕙᒃᑕᖏᓐᓂ ᖃᐅᔨᒪᔭᖏᓐᓂᓪᓗ ᖁᐊᖅᑕᖅᒥ.

ᒪᐃᑎ ᐸᓛᓐᓴᑦ ᕙᔩᓇ, ᑯᐸᐃᒃ ᒥᓂᔅᑕᖓ ᐊᑐᒃᑲᓐᓂᕈᓐᓇᖅᑐᓕᕆᓂᕐᒧᑦ ᐊᒻᒪ ᓇᐹᖅᑐᓕᖕᓄᑦ ᐊᒻᒪ ᒥᓂᔅᑕᐅᓂᒃᑯᑦ ᑲᒪᒋᔭᖃᖅᖢᓂ ᐅᑯᓂᖓ Société du Plan Nord, ᑐᓴᖅᑎᑦᑎᓚᐅᕐᑐᖅ ᐃᑲᔫᑎᒃᓴᓂ.

“ᖃᓄᐃᓕᐅᕈᑎᒃᓴᐃᑦ ᓂᕈᐊᖅᑕᐅᓯᒪᔪᑦ ᐃᑲᔫᑎᐅᓂᐊᖅᑐᑦ ᐅᐊᖕᓇᕐᒥ ᓄᓇᓕᖕᓂ ᐊᒻᒪᓗ ᓄᓇᕕᒃᒥ ᓴᖅᑭᑎᑦᑎᒃᑲᓐᓂᕈᑎᐅᓗᓂ,” ᐅᖃᓚᐅᕐᑐᖅ ᑐᓴᒐᒃᓴᓕᐅᖅᑎᓪᓗᒋᑦ.