ᐃᓕᓴᕐᓂᓕᕆᓂᕐᒧᑦ ᑲᑎᒪᔩᑦ ᑐᕌᒐᕆᔭᐅᓇᓱᒃᑐᓂ ᓄᑖᙳᕆᐊᖅᑎᑦᑎᓇᓱᒃᑐᑦ ᓄᓇᓕᖕᓂ ᑐᓴᑲᑕᓚᐅᕐᓗᑎᒃ

For English version, see Nunavik school board redefines its goals by listening to communities

ᓄᓇᕕᒃᒥ ᐃᓕᓴᕐᓂᓕᕆᓂᕐᒧᑦ ᑲᑎᒪᔩᑦ ᓄᓇᓕᖕᓄᑦ ᐃᑲᔪᖅᑕᐅᔪᒪᔪᑦ ᐱᐅᓯᕚᓪᓕᖅᑎᑦᑎᓇᓱᒃᖢᑎᒃ ᐃᓕᓐᓂᐊᖅᑎᓂᒃ ᐊᓂᒍᐃᑎᑦᑎᔪᓐᓇᕐᓂᕐᒥ.

ᓯᕗᓪᓕᕐᐹᖅ ᐱᒋᐊᕈᑎᐅᓚᐅᕐᑐᖅ ᓄᓇᓕᖕᓂ ᖃᐅᔨᓇᓱᑲᑕᒃᖢᑎᒃ ᑰᔾᔪᐊᖅᒥ ᐅᒃᑑᐱᕆ 9-ᒥ.

“ᐅᕙᓃᑦᑐᒍᑦ ᑐᓴᕋᓱᒃᖢᑕ ᑭᒃᑯᓕᒫᓂ ᐃᓕᓐᓂᐊᖅᑐᖁᑎᕗᑦ ᐊᓂᒍᐃᖃᑦᑕᕐᓂᖏᓐᓂ,” ᐅᖃᕐᑐᖅ ᑲᐅᕐᔭᒃ ᐸᑦᓚᔮᑦ, ᖃᓄᐃᓕᐅᕈᑎᒃᓴᓄᑦ ᑐᑭᒧᐊᖅᑎᑦᑎᔨ ᐅᑯᓇᓂ ᑲᑎᕕᒃ ᐃᓕᓴᕐᓂᓕᕆᓂᖅᑯᓐᓄᑦ, ᐊᐱᕐᓱᖅᑕᐅᑎᓪᓗᒍ ᑰᔾᔪᐊᖅᒥ ᑲᑎᒪᓂᕐᒥ, ᑕᕝᕙᓂᓗ ᖃᐅᔨᓇᓱᑲᑕᖢᑎᒃ.

ᐃᒪᓐᓇᐅᙱᖔᕐᑐᖅ ᖃᓄᐃᓕᐅᕈᑎᒃᓴᓂ ᐸᕐᓇᐅᓯᐅᕋᓱᖕᓂᕐᒥ ᓴᖅᑭᔮᒐᑎᒍᑦ ᑲᑎᒪᓂᕐᒥ ᐊᒻᒪ ᑲᑎᒪᑲᑕᖕᓂᕐᒥ, ᐃᓕᓴᕐᓂᓕᕆᓂᕐᒧᑦ ᑲᑎᒪᔩᑦ ᓂᕈᐊᖔᓚᐅᕐᑐᑦ ᐱᓇᓱᐊᕈᒪᓪᓗᑎᒃ ᐃᓚᐅᑎᓪᓗᒋᑦ ᐃᓕᓴᐃᔨᑦ, ᐊᖓᔪᖅᑳᑦ ᐊᒻᒪ ᐃᓕᓐᓂᐊᖅᑏᑦ ᐅᖃᐅᓯᖃᕐᓗᑎᒃ ᐃᓕᓐᓂᐊᖅᑏᑦ ᐊᓂᒍᐃᑦᑎᐊᕈᓐᓇᕐᓂᖏᓐᓂᒃ. ᑕᐃᔭᐅᔪᖅ ᓯᕗᒧᐊᑦᑏᑦ.

ᐸᑦᓚᔮᑦ ᐅᖃᒪᐅᕐᑐᖅ ᑐᕌᒐᖃᕐᓂᖏᓐᓂ ᖃᓄᖅ ᖃᐅᔨᔪᓐᓇᕐᒪᖔᑕ “ᐃᓱᒪᖃᑎᒌᖕᓂᕐᒥ” ᐃᓕᓐᓂᐊᖅᑏᑦ ᐊᓂᒍᐃᔪᓐᓇᕈᑎᒃᓴᖏᓐᓂ ᓄᓇᕕᒃᒥ ᐊᒻᒪ ᖃᓄᖅ ᑕᒪᓐᓇ ᑐᕌᒐᐅᔪᖅ ᑎᑭᐅᑎᔭᐅᓇᔭᕆᐊᒃᓴᖓᓂᒃ.

ᖃᓄᐃᓕᐅᕈᑎᒃᓴᓂ ᑐᑭᒧᐊᖅᑎᑦᑎᔨ ᑲᐅᑦᔭᒃ ᐸᑦᓚᔮᑦ ᐅᖃᕐᑐᖅ ᐅᒃᐱᕈᓱᖕᓂᕋᖅᖢᓂ ᖃᐅᔨᓇᓱᑲᑕᖕᓂᖅ ᓯᕗᒧᑦ ᐱᕙᓪᓕᐊᔾᔪᑎᐅᔪᓐᓇᕐᓂᖓᓂ ᑐᑭᓯᓇᓱᖕᓂᕐᒥ ᐃᓕᓐᓂᐊᖅᑐᓄᑦ ᐱᔭᐅᔭᕆᐊᓕᖕᓂ ᓄᓇᕕᒃ ᐃᓕᓐᓂᐊᖅᑎᖏᓐᓂ. (ᐊᔾᔨᓕᐅᕆᔨ ᓯᑐᕆᒃ ᒑᓚᓐᑦ)

ᓯᕗᒧᐊᑦᑏᑦ ᐊᕕᒃᑐᕐᓯᒪᖕᒪᑦ ᑎᓴᒪᐅᓕᖓᓪᓗᓂ — ᑐᓵᖃᑦᑕᕐᓂᖅ, ᐋᖅᑭᒃᓱᐃᓂᖅ ᐊᑐᖅᑕᐅᔪᒪᔪᓂ, ᐱᓕᕆᐊᖃᓕᕐᓂᖅ, ᐊᒻᒪ ᐃᓱᒪᒃᓴᖅᓯᐅᕐᓗᑎᒃ ᖃᓄᐃᓕᐅᕈᑎᒃᓴᓄᑦ ᐸᕐᓇᐅᑎᒃᓴᓂ ᓯᕗᓂᒃᓴᒧᑦ ᐃᓕᓐᓂᐊᕐᓂᓕᕆᓂᕐᒧᑦ ᓄᓇᕕᒃᒥ.

ᐃᓕᓴᕐᓂᓕᕆᓂᕐᒧᑦ ᑲᑎᒪᔩᑦ ᐃᓱᒪᔪᑦ ᐸᕐᓇᐅᑎᑦ ᐱᐊᓂᒍᒪᓪᓗᓂᔾᔪᒃ ᔫᓂ 2025-ᒥ.

ᓄᓇᓕᖕᓂ ᖃᐅᔨᓇᓱᑲᑕᖕᓂᖅ ᐃᓚᒋᔭᐅᔪᖅ ᑐᓵᖃᑦᑕᕐᓂᖅᒧᑦ ᐱᓕᕆᔾᔪᑎᓂ. ᑰᔾᔪᐊᖅ ᓯᕗᓪᓕᖅᐹᖑᓚᐅᕐᑐᖅ ᑕᐃᒪᐃᓕᐅᖅᑐᓂ ᐃᓚᐅᓪᓗᑎᒃ.

ᑕᐃᒪᓐᓇᑦᑕᐃᓐᓇ ᑲᑎᖃᑎᖃᕐᓂᐊᖅᑐᑦ ᐃᕗᔨᕕᒃᒥ ᐅᒃᑑᐱᕆ 29-ᒥ, ᐊᐃᕆᓕ 4-ᒥ ᖁᐊᖅᑕᖅᒥ, ᐊᒻᒪ ᐊᐃᕆᓕ 8-ᒥ ᐃᓄᒃᔪᐊᒃᒥ. ᖃᕋᓴᐅᔭᒃᑯᑦ ᖃᓄᓕᐅᕈᑎᐅᓂᐊᖅᑐᓂ ᐋᖅᑭᒃᓯᓯᒪᔪᑦ ᓄᕕᐱᕆ 12-ᒧᑦ ᐊᒻᒪ ᐊᐃᕆᓕ10-ᒧᑦ.

“ᖁᓕᕇᒃᑑᑎᐅᖕᒪᑕ ᖃᓄᖅ ᑐᓴᕋᓱᒍᓐᓇᕋᓱᒍᑎᕗᑦ ᑖᒃᑯᓇᙵᑦ ᐃᓄᖕᓂ,” ᐅᖃᕐᑐᖅ ᐄᕙ ᑲᐅᑭ, ᑰᔾᔪᐊᖅᒥ ᑲᒥᓯᓇ ᑲᑎᕕᒃ ᐃᓕᓴᕐᓂᓕᕆᓂᖅᑯᑦ ᑲᑎᒪᔨᖏᓐᓄᑦ.

“ᐊᑕᐅᓯᑐᐊᕐᒥ ᐃᓱᒪᔪᑐᐊᒥ ᐊᔪᕐᓇᕐᒪᑦ, ᑭᓯᐊᓂᓕ ᐅᓄᕐᑐᓂ ᐃᓱᒪᖃᑎᒌᒃᑐᖃᕐᐸᑦ ᑐᑭᓯᓇᓱᒡᓗᑎᒃ ᖃᓄᖅ ᐃᓕᓐᓂᐊᕐᕕᖕᒥ ᐱᓕᕆᔾᔪᓯᑦᑎᓐᓂ ᑐᑭᓯᑎᑦᑎᓇᓱᒡᓗᑕ ᒫᓐᓇ. ᐱᔭᕆᐊᖃᕋᑦᑕᑦ ᐊᑕᐅᓯᐊᓗᖕᒥ ᐃᓱᒪᖃᑎᒌᖕᓂᕐᒥ ᐃᓕᓐᓂᐊᕐᓂᐅᑉ ᒥᒃᓵᓄᒃ,” ᐅᖃᒃᑲᓐᓂᕐᑐᖅ ᐃᒡᓚᕐᓯᓪᓗᓂ.

ᑲᑎᒪᑎᓪᓗᒋᑦ ᑰᔾᔪᐊᖅᒥ, ᐊᑭᓐᓇᖏᑦ ᐃᓕᓯᕝᕕᐅᓯᒪᐅᓚᐅᕐᑐᑦ ᑎᑎᕋᕐᓯᒪᔪᓂ ᐊᒻᒪ ᐊᔾᔨᙳᐊᕐᓂ ᐅᐸᒍᑎᔪᓂ ᐃᓱᒪᖏᓐᓂᒃ ᑐᓴᕈᒪᑲᑕᒃᑐᓂ ᒪᑯᓂᖓ ᐃᓕᓐᓂᐊᕐᕕᒃᒥ ᐃᓅᓯᐅᕙᒃᑐᒥᑦ, ᖃᓄᖅ ᐃᓕᓐᓂᐊᖅᑏᑦ ᐃᓚᐅᑎᑕᐅᒃᑲᓐᓂᕈᓐᓇᕐᒪᖔᑕ, ᐊᒻᒪᓗ ᐱᓕᕆᐊᕆᔭᐅᔪᒥ ᐃᓕᓐᓂᐊᕐᓂᓕᕆᔨᑦ ᑲᑎᒪᔨᓄᑦ.

ᓄᓇᓕᖕᓂ ᖃᐅᔨᓇᓱᖕᓂᖅ ᐃᓱᒪᒋᔭᐅᔪᖅ ᐃᓱᒪᓕᐅᕆᑲᑕᒍᑎᐅᓗᓂ, ᐋᖅᑭᒃᓱᐃᓯᒪᔪᑦ ᑕᐃᒪᓐᓇ ᐅᖃᕐᓯᒪᔪᐃᑦ.

ᐹᑦᓚᔮᑦ ᐅᖃᓚᐅᕐᑐᖅ ᐱᓕᕆᖃᑎᒌᑦ ᑲᑎᑦᑎᓯᒪᓕᕐᓂᖏᓐᓂᒃ ᐅᓄᒻᒪᕆᒃᑐᓂ ᑎᑎᕋᕐᕕᕋᓛᒃᑯᑦ ᑎᑎᕋᕐᓯᒪᔪᓂ ᑭᐅᓯᒪᔪᓂᒃ ᐅᐃᕖᑎᑦ, ᖃᓪᓗᓈᑐᑦ ᐊᒻᒪ ᐃᓄᒃᑎᑐᑦ.

“ᐅᓇ ᐱᒋᐊᕐᕕᖓᓂᙶᖅᑐᖅ,” ᐅᖃᕐᑐᖅ. “ᐅᓇ ᐱᐅᓂᕐᐹᖅ ᐱᓕᕆᔾᔪᓯ ᐊᓂᒍᐃᑦᑎᐊᖃᑦᑕᖁᓪᓗᒋᑦ ᐃᓕᓐᓂᐊᖅᑏᑦ.”

ᑕᓂᔅ ᑕᐃᒍᓪ, ᐊᐅᓚᑦᑎᓂᕐᒧᑦ ᐱᔨᑦᑎᕋᐅᑎᓂ ᑐᑭᒧᐊᖅᑎᑦᑎᔨ ᐅᑯᓄᖓ ᑲᑎᕕᒃ ᐃᓕᓴᕐᓂᓕᕆᓂᒃᑯᓐᓄᑦ ᐅᖃᓚᐅᕐᑐᖅ ᐅᓇ ᐊᕐᕌᒍᓕᒫᖅ ᐋᖅᑭᒃᓱᖅᑕᐅᔪᖅ ᐱᓕᕆᔾᔪᓯᐅᓂᕋᖅᖢᓂᐅᒃ ᐊᒻᒪᓗ ᑲᑎᒪᔩᑦ ᓱᓕ ᖃᐅᔨᒪᙱᑦᑐᑦ ᖃᓄᐃᓕᐅᕈᑎᐅᓂᐊᖅᑐᓂ.

ᑕᒪᕐᒥ ᐃᓱᒪᓕᐅᕈᑎᐅᔪᑦ ᐊᒻᒪ ᐃᓱᒪᓕᐊᕆᔭᐅᔪᑦ ᐃᓚᐅᔪᓂᒃ “ᑲᒪᒋᔭᐅᓂᐊᕐᑐᑦ,” ᐅᖃᕐᑐᖅ.

ᑕᓂᔅ ᑕᐃᒍᓪ, ᐊᐅᓚᑦᑎᓂᕐᒧᑦ ᐱᔨᑦᑎᕋᐅᑎᓂ ᑐᑭᒧᐊᖅᑎᑦᑎᔨ ᐅᕙᓂ ᑲᑎᕕᒃ ᐃᓕᓴᕐᓂᓕᕆᔨᒃᑯᓐᓂ, ᐅᖃᓚᐅᕐᑐᖅ ᓄᓇᓖᑦ ᖃᓄᐃᓕᐅᕈᑎᒃᓴᓕᕆᓂᕐᒥ ᐃᓚᐅᑎᑕᐅᒍᑎ ᑐᑭᓯᕚᓪᓕᕈᓐᓇᕋᔭᕐᑐᑦ ᐃᓕᓐᓂᐊᕐᓂᓕᕆᓂᕐᒧᑦ ᑲᑎᒪᔩᑦ ᐱᔭᕆᐊᖃᖅᑕᖏᑦ ᐊᑐᓕᖅᑎᑕᐅᔪᓐᓇᕐᓂᖏᓐᓂᒃ. (ᐊᔾᔨᓕᐅᕆᔨ ᓯᑐᕆᒃ ᒑᓚᓐᑦ)

“ᐅᓄᕐᑐᓂ ᐃᓄᒃᑕᖃᐅᕐᑎᓪᓗᒍ ᐊᒻᒪᓗ ᐅᓄᕐᓂᕐᓴᐃᑦ ᐃᓚᐅᖃᑦᑕᖅᐸᑦ ᑕᐃᒪᓕ ᐱᒻᒪᕆᒋᔭᐅᓛᓂ ᓴᖅᑭᑦᑐᖃᖃᑦᑕᕋᔭᕐᑐᖅ.

“ᑕᐃᒪᓕ ᖃᐅᔨᓕᕈᓐᓇᕋᔭᕋᑦᑕ ᖃᓄᖅ ᐋᖅᑭᒍᑎᖃᕈᓐᓇᕋᔭᕐᒪᖔᑕ, ᐊᒻᒪᓗ ᖃᓄᐃᓕᐅᕆᐊᖃᕐᒪᖔᑕ ᑕᒪᑐᒥᖓ ᐱᓕᕆᐊᒧᑦ.”

ᑲᐅᑭ ᐊᖓᔪᖅᑳᕆᔭᐅᔪᓂ ᐃᓚᐅᒃᑲᓐᓂᖁᔨᔪᖅ ᐃᓕᓐᓂᐊᕐᕕᖏᓐᓂ.

“ᐊᖓᔪᖅᑳᖑᔪᑦ ᓱᕈᓯᖏᓐᓂ ᖃᐅᔨᒪᐅᕐᒪᑕ, ᖃᓄᖅ ᐱᕈᕐᓴᔭᐅᓯᒪᓂᖏᓐᓂ,” ᐅᖃᕐᑐᖅ. “ᐃᓕᓴᐃᔨᐅᓪᓗᓂ ᐃᓚᓐᓇ ᓇᓗᓇᖅᑐᐊᓘᖕᒪᑦ ᖃᓄᐃᑦᑕᕆᐊᒃᓴᖏᓐᓂ ᐊᒻᒪ ᐃᓚᒌᑦ ᖃᓄᐃᓕᐅᖃᑦᑕᕐᒪᖔᑕ.”

ᐃᓱᒪᔪᕐᓕ ᑕᐃᒪᓐᓇ ᑐᓴᑲᑕᒃᑕᖏᑦ ᐃᑲᔪᕐᓂᐊᕐᓗᓂ ᐃᓕᓐᓂᐊᕐᓂᓕᕆᓂᕐᒧᑦ ᑲᑎᒪᔨᓂ ᓇᖕᒥᓂᖅ ᐃᓕᓐᓂᐊᖅᑐᓕᕆᓂᕐᒧᑦ ᐱᓕᕆᔾᔪᓯᕆᐊᓂᐊᖅᑕᖏᓐᓂ ᐊᑑᑎᖃᕐᓂᐊᖅᑐᒥ ᐃᓄᖕᓄᑦ ᓄᓇᕕᒃᒥ.

“ᐊᑐᕋᓱᒃᐸᒃᖢᓂ ᑯᐸᐃᒃ ᐃᓕᓐᓂᐊᖅᑎᑦᑎᔾᔪᓯᖏᓐᓂ ᓈᒻᒪᐃᓐᓇᕈᓐᓇᙱᒻᒪᑦ,” ᐸᑦᓚᔮᑦ ᐅᖃᕐᑐᖅ. “ᓇᖕᒥᓂᖅ ᐃᓕᓐᓂᐊᒐᒃᓴᖃᕈᑦᑕ, ᓇᖕᒥᓂᖅ ᐱᓕᕆᔾᔪᓯᖃᕈᑎᑕ ᐅᓄᕐᓂᕐᓴᓂ ᓱᕈᓯᕐᓂ ᐃᓕᓐᓂᐊᒃᑲᓐᓂᕈᒪᔪᖃᕋᔭᕐᑐᖅ.”

ᐅᖃᒃᑲᓐᓂᖅᖢᓂ: “ᐊᓯᔾᔨᕐᓂᖅᑕᖃᕆᐊᖃᕐᒪᑦ, ᐊᒻᒪᓗ ᐃᓕᓐᓂᐊᖅᑐᓕᕆᓂᖅ ᐅᕙᑦᑎᓐᓄᑦ ᐋᖅᑭᒃᑕᐅᓯᒪᔭᕆᐊᖃᖅᖢᓂ, ᖃᓄᖅ ᐃᓕᓐᓂᐊᖅᑎᑕᐅᔪᒪᓂᑦᑎᓐᓄᑦ.”

ᑲᑎᕕᒃ ᐃᓕᓴᕐᓂᓕᕆᓂᖅ ᐃᓕᓴᐃᔨᖏᑦ ᐊᒻᒪ ᐃᖅᑲᓇᐃᔭᖅᑎᖏᑦ
ᑲᑎᓚᐅᕐᑐᑦ ᑰᔪᐊᖅᒥ ᑲᑎᒪᓂᕐᒥ ᐅᒃᑑᐱᕆ 9-ᖑᑎᓪᓗᒍ ᑕᒪᑐᒧᖓ
ᐃᓱᒪᒋᔭᐅᔪᓂᒃ ᑐᓴᑲᑕᒐᓱᒃᖢᑎᒃ ᓄᓇᓖᑦ ᖃᐅᔨᓇᓱᒡᕕᐅᓚᐅᕐᑎᓐᓇᒋᑦ.
(ᐊᔾᔨᙳᐊᖅ ᐅᕙᙵᑦ ᔭᐃᑦ ᐴᓂᐅ/ᑲᑎᕕᒃ ᐃᓕᓴᕐᓂᓕᕆᓂᖅ)