ᓄᓇᕕᒃᒥ ᒥᕐᓱᖅᑎ, ᑮᓇᐅᔭᓕᐅᕋᓱᒃᑎ ᑕᐃᔭᐅᔪᖅ ᓴᓇᐅᒐᓕᐅᖅᑎᐅᓂᕐᒥᒃ ᑕᒪᑐᒪᓂ ᐊᕐᕌᒍᒥ

For English version, see Nunavik seamstress, entrepreneur named artist of the year

ᑲᖏᕐᓱᒃ ᖃᓪᓗᓈᖅᑕᕐᓂ ᓴᓇᐅᒐᓕᐅᖅᑎ ᕕᓂᕗᕋᑦ ᓄᒐᒃ ᐃᓕᓴᕆᔭᐅᔾᔪᑎᑖᖅᑎᑕᐅᓚᐅᕐᑐᖅ ᓴᓇᐅᒐᓕᐅᕐᑎᐅᓂᕐᒥᒃ ᑯᐸᐃᒃᒥᑦ ᑲᑎᒪᔨᓄᑦ ᓴᓇᐅᒐᓕᕆᓂᕐᒧᑦ ᐊᒻᒪ ᑎᑎᖃᓄᑦ.

“ᐅᐱᒍᓱᑦᑎᐊᖅᑐᖓ. ᓂᕆᐅᓚᐅᙱᑦᑎᐊᖅᑐᖓ ᑖᔅᓱᒥᖓ. ᖁᔭᓐᓇᒦᓪᓛᓗᒃ, ᐊᑯᓂᐊᓗᒃ ᐱᓕᕆᐊᕆᓯᒪᓪᓗᒍ,” ᐅᖃᓚᐅᕐᑐᖅ ᑎᓯᐱᕆ 12-ᒥ ᐊᐱᕐᓱᖅᑕᐅᑎᓪᓗᒍ.

ᓄᙵᒃ ᒥᕐᓱᕆᐅᓚᐅᕐᓯᒪᔪᖅ ᓂᕕᐊᕐᓵᖑᑎᓪᓗᒍ ᐊᒻᒪᓗ ᑭᖑᓂᐊᒍᑦ ᐃᓕᓐᓂᐊᖅᖢᓂ ᓴᓇᐅᒐᓕᐅᕐᓂᕐᒥᒃ ᓚᓵᓪ ᓯᓚᑦᑐᖅᓴᕐᕕᒃᒥᑦ ᒪᓐᑐᕆᐊᒥᑦ, ᐊᔪᕈᓐᓃᖅᓴᕈᑎᖓ ᐱᓕᕆᐊᖃᓕᕈᑎᒋᓂᐊᕐᒪᒍ.

“ᓯᓚᑦᑐᖅᓴᕐᕕᖕᒦᑎᓪᓗᖓ ᓱᓕ ᖁᓕᑦᑕᐅᔭᓕᐅᖃᑦᑕᓚᐅᕐᑐᖓ ᐊᒻᒪ ᐃᓄᖕᓂ ᑎᑭᓴᐃᕝᕕᐅᕙᒃᖢᖓ,” ᐅᖃᕐᑐᖅ.

ᐱᐊᓂᓵᖅᑎᓪᓗᒍ ᐃᓕᓐᓂᐊᖅᑕᖓᓂᒃ ᓯᓚᑦᑐᖅᓴᕐᕕᒃᒥ ᒪᑐᐃᕐᓯᓚᐅᕐᓯᒪᔪᖅ ᐊᓐᓄᕌᓕᕆᓂᕐᒥᒃ ᐱᓕᕆᐊᖓᓂᒃ, ᕕᓂᕗᕋᑦ ᓴᓇᐅᒐᖏᓐᓂᒃ, ᓂᐅᕕᐊᒃᓴᖃᖅᐸᒃᖢᓂ ᓴᓇᔭᖏᓐᓂᒃ ᖃᕋᓴᐅᔭᒃᑯᑦ ᐊᒻᒪ ᕙᐃᔅᐳᒃᑯᑦ.

ᑕᐃᒪᙵᓂᓪᓕ ᓴᓇᐅᒐᖏᑦ ᒥᐊᓕᒐᕐᓄᐊᕐᓯᒪᓕᕐᑐᑦ ᕿᒥᕐᕈᐊᖅᑕᐅᔪᒃᓴᐅᓪᓗᑎᒃ ᑕᑯᔭᒐᖃᕐᕕᒃᒥ ᑕᐃᔭᐅᓪᓗᓂ ᓄᓇᖃᖅᑳᖅᑐᑦ ᐊᓐᓄᕌᖏᑦ ᒫᓐᓇ (Native Fashion Now). 2019-ᒥ, ᓂᕈᐊᕆᔭᐅᓚᐅᕐᓯᒪᔪᖅ ᑳᓇᑕ ᒎᔅ ᓴᓇᐅᒐᓕᐅᖅᑎᓂᒃ ‘ᐊᑎᒋ’ ᓴᓇᐅᒐᓄᑦ ᐊᒻᒪᓗ ᑖᒃᑯᐊ 14-ᓂ ᐃᓄᖕᓂ ᒥᕐᓱᖅᑎᓂ ᓴᖅᑭᔮᖅᑎᑦᑎᓪᓗᑎᒃ.

ᐃᓕᓴᕆᔭᐅᔾᔪᑎ ᐃᓚᖃᕐᒥᔪᖅ $10,000 ᓵᓚᒃᓴᐅᓯᐊᕐᒥ.

ᑐᓴᒐᒃᓴᑎᒍᑦ ᐅᑯᓇᙵᑦ ᑯᐸᐃᒃᒥ ᓴᓇᐅᒐᓕᐅᕐᓂᕐᒧᑦ ᑲᑎᒪᔨᓂᒃ ᐅᖃᕐᓯᒪᓚᐅᕐᑐᖅ ᓄᙵᒃ “ᓯᕗᓕᐅᖅᑎᐅᓂᖓᓂᒃ ᖃᓪᓗᓈᖅᑕᓂᒃ ᐊᒻᒪᓗ ᓄᓇᖃᖅᑳᖅᑐᑦ ᐊᓐᓄᕌᖏᓐᓄᑦ” ᐱᓕᕆᐊᖓ “ᐃᓚᖃᕐᒪᑦ ᐃᓕᖅᑯᓯᑐᖃᕐᓂᒃ ᐊᒻᒪ ᒫᓐᓇᓕᓴᕐᓂ ᒥᕐᓱᒐᕐᓂᒃ ᐱᐅᓯᓕᕐᓯᒪᑦᑎᐊᖅᑐᓂᒃ.”

ᓄᙵᒃ ᖁᓕᑦᑕᐅᔭᓕᐊᖏᑦ 1950-ᖏᓐᓂᒃ ᐊᒻᒪ 1960-ᖏᓐᓂᒃ ᓴᓇᔭᐅᕙᓚᐅᖅᑐᓂᙶᖅᑐᑦ ᑭᓯᐊᓂᓕ ᓇᖕᒥᓂᖅ ᑕᕐᓴᖏᑦ ᑖᔅᓱᒪᙶᖅᖢᑎᒃ.

ᐊᒻᒪᓗ ᐊᑕᐅᓯᐅᓪᓗᓂ ᓴᓇᔨᐅᓪᓗᓂ ᕕᓂᕗᕋᑦ ᓴᓇᐅᒐᖏᓐᓂᒃ, ᓄᙵᒃ ᓄᓇᓕᖕᓂ ᐱᓕᕆᕈᓘᔭᖃᑦᑕᕐᒥᔪᖅ. 2022-ᖑᑎᓪᓗᒍ ᓂᕈᐊᕆᔭᐅᓚᐅᕐᓯᒪᖕᒪᑦ ᕼᐋᒻᒪᓚᒃᑯᓐᓄᑦ ᑲᑎᒪᔨᐅᓂᕐᒥᒃ ᑲᖏᕐᓱᒥ.

ᖃᐅᔨᒪᔭᒥᓂ ᖃᐅᔨᑎᑦᑎᕙᓪᓕᐊᖕᒪ ᓄᑲᖅᖠᕐᓄᑦ ᑕᒪᓐᓇᓗ ᐱᒻᒪᕆᐅᒋᓪᓗᓂᐅᒃ. ᑕᐃᒪᙵᓪᓕ 2014-ᒥ ᓄᓇᓕᖕᓄ ᐊᔾᔨᒌᙱᑦᑐᓄᐊᕐᓯᒪᔪᖅ ᓄᓇᕕᒃᒥ ᐃᓕᓐᓂᐊᖅᑎᑦᑎᕙᒃᖢᓂ ᐊᕐᓇᓂ ᖁᓕᑦᑕᐅᔭᓕᐅᕐᓂᕐᒥᒃ.