ᓄᓇᕕᒃ ᐱᓕᕆᓂᖃᖅᐳᖅ ᐅᕗᖓ ᖁᑦᑎᖕᓂᖅᓴᒥ−ᐃᓕᓐᓂᐊᕐᓂᐅᔪᒥ ᐃᓕᓐᓂᐊᕐᕕᐅᔪᒥ

For English version, see Nunavik takes steps toward its own post-secondary institution

ᐸᕐᓇᐅᑎᒥᒃ ᒪᑐᐃᖅᓯᓂᕐᒥ ᖁᑦᑎᖕᓂᖅᓴᒥ−ᐃᓕᓐᓂᐊᕐᓂᐅᔪᒥ ᐃᓕᓐᓂᐊᕐᕕᐅᔪᒥ ᓄᓇᕕᖕᒥ ᐃᖏᕐᕋᕙᓪᓕᐊᓂᖃᖅᐳᖅ.

ᓄᓇᕕᒃᐅᑉ ᐃᓕᓐᓂᐊᕐᕕᖕᒧᑦ ᑲᑎᒪᔨᖏᑦ, ᑲᑎᕕᒃ ᐃᓕᓴᕐᓂᓕᕆᓂᖅ, ᐱᓕᕆᐊᖃᓚᐅᖅᐳᑦ ᑲᑎᙵᓂᐅᔪᓂ ᐃᓄᓕᒫᓄᑦ ᐅᖃᖃᑎᖃᕐᓂᐅᔪᓂ 2023-24−ᒥ ᑕᒪᒃᑭᓂ 14−ᖑᔪᓂ ᓄᓇᓕᐅᔪᓂ ᐊᑐᐃᓐᓇᖃᖅᑎᑦᑎᓂᕐᒥ ᖁᑦᑎᖕᓂᖅᓴᒥ−ᐃᓕᓐᓂᐊᕐᓂᐅᔪᒥ ᐃᓕᓐᓂᐊᕐᓂᓕᕆᓂᕐᒥ ᐊᕕᒃᑐᖅᓯᒪᓂᐅᔪᒥ. ᖃᓄᐃᓕᖓᓂᐅᔪᓂ ᐅᓂᒃᑳᓕᐊᒥ ᑎᑎᕋᖅᑕᐅᔪᒥ ᐅᒃᑐᐱᕆ 21−ᒥ ᑕᑯᒃᓴᐅᑎᑦᑎᕗᖅ ᓗᓇᕕᒻᒥᐅᒃ ᐃᑲᔪᖅᓱᐃᓂᖏᓐᓂ.

ᐊᑐᐃᓐᓇᖃᕐᓂᕐᒥ ᖁᑦᑎᖕᓂᖅᓴᒥ−ᐃᓕᓐᓂᐊᕐᓂᐅᔪᒥ ᐃᓕᓐᓂᐊᕐᓂᐅᔪᒥ ᐊᕕᒃᑐᖅᓯᒪᓂᐅᔪᒥ ᐊᒃᑐᐃᓂᖃᖅᐳᖅ ᐃᖅᑲᓇᐃᔮᖃᕐᓂᕐᒥ ᐊᒻᒪ ᑮᓇᐅᔾᔭᒃᓴᓂᕐᒧᑦ ᐱᕕᒃᓴᖃᕐᓂᐅᔪᓂ ᓄᓇᕕᒻᒥᐅᓄᑦ, ᐅᖃᓚᐅᖅᐳᖅ ᓯᐊᕋ ᐊᓘᐸ, ᑲᑎᕕᒃ ᐃᓕᓴᕐᓂᓕᕆᓂᕐᒧᑦ ᐊᖓᒧᖅᑳᖓ, ᐊᐱᖅᓱᖅᑕᐅᓂᐅᔪᒥ.

ᓯᐊᕋ ᐊᓘᐸ ᐊᖓᔪᖅᑳᖑᕗᖅ ᑲᑎᕕᒃ ᐃᓕᓴᕐᓂᓕᕆᓂᖅ, ᓄᓇᕕᐅᑉ ᐃᓕᓐᓂᐊᕐᕕᖓᓂ ᑲᑎ,ᔨᐅᔪᓄᑦ. (ᐊᔾᔨᓕᐅᖅᑕᐅᔪᖅ ᑲᑎᕕᒃ ᐃᓕᓴᕐᓂᓕᕆᓂᕐᒥᑦ/ᔭᐃᑦ ᑐᓴᔅᓄ ᐴᕐᓂᐊᕐ)

ᓯᐊᕋ ᐊᓘᐸ ᐊᖓᔪᖅᑳᖑᕗᖅ ᑲᑎᕕᒃ ᐃᓕᓴᕐᓂᓕᕆᓂᖅ, ᓄᓇᕕᐅᑉ ᐃᓕᓐᓂᐊᕐᕕᖓᓂ ᑲᑎ,ᔨᐅᔪᓄᑦ. (ᐊᔾᔨᓕᐅᖅᑕᐅᔪᖅ ᑲᑎᕕᒃ ᐃᓕᓴᕐᓂᓕᕆᓂᕐᒥᑦ/ᔭᐃᑦ ᑐᓴᔅᓄ ᐴᕐᓂᐊᕐ)

“ᐊᑕᐅᓯᐅᔪᒥ ᐱᔾᔪᑕᐅᔪᓂ ᐱᒋᐊᖅᑎᑦᑎᓂᕐᒥ ᐅᑯᓂᖓ ᐱᓕᕆᐊᖑᔪᓂ ᐅᓄᕐᓂᖅᓴᐅᔪᓂ ᐃᓱᓕᑦᑎᔪᖃᕐᓂᖓᓂ ᓯᓚᑦᑐᖅᓴᕐᕕᒃ/ᓯᓚᑦᑐᖅᓴᕐᕕᒡᔪᐊᖅ ᑭᒡᓕᐅᔪᓂᑦ ᐱᔭᕆᐊᖃᕐᒪᑦ ᐃᓂᖃᕐᓂᕐᒥ ᐃᓂᒃᓴᐅᔪᒥ ᐊᔾᔨᒌᙱᑦᑐᓂ ᑲᑐᔾᔨᖃᑎᒌᖑᔪᓂ,” ᐅᖃᓚᐅᖅᐳᖅ.

3.5 ᐳᓇᓐᑎᑐᐃᓐᓇᒥᒃ ᓄᓇᕕᐅᑉ ᐃᓄᒋᐊᖕᓂᖏᓐᓂ ᑎᒍᒥᐊᖅᐳᑦ ᓯᓚᑦᑐᖅᓴᕐᕕᖕᒥ ᐃᓕᓴᕆᔭᐅᓂᖓᓂ 1.2 ᐳᓴᓐᑎᒥ ᓯᓚᑦᑐᖅᓴᕐᕕᒡᔪᐊᖕᒥ ᐃᓕᓐᓂᐊᕐᓂᖃᖅᐳᑦ, ᐅᖃᐅᓯᐅᓪᓗᓂ ᑲᑎᕕᒃ ᐃᓕᓴᕐᓂᓕᕆᓂᕐᒧᑦ. ᖃᓂᒋᔭᖓᓂ 14,000−ᓂ ᐃᓄᖃᖅᐳᑦ ᓄᓇᕕᖕᒥ, ᐅᖃᐅᓯᐅᓪᓗᓂ ᓈᓴᐅᑎᓂᑦ ᑯᐸᐃᖕᒥ ᒐᕙᒪᖓᓐᓂ.

2023−ᒥ ᖃᐅᔨᓴᖅᑕᐅᓂᖓᓂ ᑎᓕᐅᕈᑕᐅᔪᒥ ᑯᐸᐃᖕᒥ ᒥᓂᔅᑕᖃᕐᕕᖓᓂ ᐃᓕᓐᓂᐊᕐᓂᓕᕆᓂᕐᒧᑦ ᐊᒻᒪ ᖁᑦᑎᖕᓂᖅᓴᐅᔪᒥ ᐃᓕᓐᓂᐊᕐᓂᕐᒥ ᐃᒪᐃᖁᒡᓇᔭᖅᐳᑦ ᒪᕐᕉᖕᓂ ᐆᒃᑑᑎᐅᔪᓂ ᐃᓕᓐᓂᐊᕐᕕᐅᔪᓂᑦ ᓈᒻᒪᒃᑐᓄᑦ ᓄᓇᕕᖕᒧᑦ.

ᐃᓄᓕᒫᓄᑦ ᐅᖃᖃᑎᖃᕐᓂᐅᔪᒥ ᐅᓂᒃᑳᓕᐊᖅ ᑕᑯᒃᓴᐅᑎᑦᑎᕗᖅ ᓄᓇᕕᖕᒥ ᐃᓕᓐᓂᐊᕐᕕᐅᔪᒥ — ᐊᑕᐅᓯᐅᔪᒥ ᐊᑐᖁᔭᐅᓇᔭᖅᑐᒥ ᐆᒃᑑᑎᐅᔪᓂ — ᓈᒻᒪᓛᖑᔪᒥ ᓂᕈᐊᒐᒃᓴᐅᓪᓗᓂ ᓇᓗᓇᐃᖅᓯᓂᕐᒧᑦ ᑕᒪᒃᑭᑦ ᓄᓇᕕᒻᒥᐅᑦ ᓂᐱᖏᑦ ᑐᓴᖅᑕᐅᓂᖏᓐᓂ.

“[ᓄᓇᕕᒃ ᐃᓕᓐᓂᐊᕐᕕᒃ] ᐊᑐᐃᓐᓇᖃᖅᑎᑦᑎᕗᖅ ᓴᖑᓴᕋᐃᓛᖑᔪᒥ ᐊᒻᒪ ᐱᔪᓐᓇᕐᓂᖃᑐᐃᓐᓇᕆᐊᖃᖅᐳᖅ CEGEP−ᑯᓐᓂ ᐊᒻᒪ ᓯᓚᑦᑐᖅᓴᕐᕕᒡᔪᐊᕐᒥ ᐊᒻᒪ ᐃᓐᓇᕐᓄᑦ ᐃᓕᓐᓂᐊᕐᓂᐅᔪᒥ ᐃᓕᓐᓂᐊᕈᑎᓂ ᐊᑖᓃᓐᓂᖓᓂ ᑕᐃᒃᑯᓇᓂ ᑲᑎᙵᓂᐅᔪᓂ,” ᐅᖃᓚᐅᖅᐳᖅ ᕖᐱ ᐸᓐᑦᓕ, ᑐᑭᒧᐊᒃᑎᑦᑎᔨ ᖁᑦᑎᖕᓂᖅᓴᒥ−ᐃᓕᓐᓂᐊᕐᓂᐅᔪᒥ ᐃᓕᓐᓂᐊᕐᓂᐅᔪᒥ ᐱᔨᑦᑎᕋᕐᓂᕐᒥ ᑲᑎᕕᒃ ᐃᓕᓴᕐᓂᓕᕆᓂᕐᒥ, ᐊᐱᖅᓱᖅᑕᐅᓂᐅᔪᒥ ᐅᒃᑐᐱᕆ 23−ᒥ.

ᓄᓇᕕᒻᒥᐅᑦ ᐃᓕᓐᓂᐊᕐᕕᖃᕈᒪᕗᑦ ᑐᙵᕕᖃᖅᑐᒥ ᐃᓄᐃᑦ ᖃᐅᔨᒪᔭᖏᓐᓂ ᐊᒻᒪ ᐃᓄᑦᑎᑐᑦ ᐅᖃᐅᓯᖓᓐᓂ, ᐅᓂᒃᑳᓕᐊᖅ ᓇᓂᓯᓚᐅᖅᐳᖅ. ᑭᓯᐊᓂ ᐃᓕᓐᓂᐊᕐᕕᐅᔪᒥ ᐊᑐᐃᓐᓇᖃᖁᔭᐅᕗᖅ ᐱᓕᕆᐊᖑᔪᓂ ᑐᕌᖅᑎᑦᑎᔪᒥ ᖃᓪᓗᓈᓂ-ᑐᙵᕕᓕᖕᓂ ᐱᔭᕆᑐᔪᓂ ᐊᒻᒪ ᐃᓕᓯᒪᓪᓚᕆᒃᑐᒥ ᐸᐃᑉᐹᖃᕐᓂᕐᒥ ᐃᓕᓴᕆᔭᐅᔪᓂ ᓯᓚᑖᓂ ᐊᕕᒃᑐᖅᓯᒪᓂᐅᔪᒥ.

ᐱᖃᕐᓂᕐᒥ ᖁᑦᑎᖕᓂᖅᓴᒥ−ᐃᓕᓐᓂᐊᕐᓂᐅᔪᒥ ᐃᓕᓐᓂᐊᕐᕕᐅᔪᒥ ᓄᓇᕕᖕᒥ ᑐᑭᖃᕆᕗᖅ ᐃᓕᓐᓂᐊᕈᓐᓇᕐᓂᖏᓐᓂ ᐊᖏᕐᕋᒥ, ᐊᓘᐸ ᐅᖃᓚᐅᖅᐳᖅ.

“ᐊᒥᓱᑦ ᐃᓕᓐᓂᐊᖅᑎᕗᑦ, ᓯᕗᓪᓕᖅᐹᒥ ᐅᐸᒋᐊᖅᑐᖅᖢᑎᒃ ᓯᓚᑦᑐᖅᓴᕐᕕᖕᒥ ᐅᕝᕙᓘᓐᓃᑦ ᓯᓚᑦᑐᖅᓴᕐᕕᒡᔪᐊᒥ, ᐃᓕᖅᑯᓯᒧᑦ ᖁᐊᖅᓵᕐᓂᖃᓲᖑᕗᖅ. ᐊᑯᓂᐅᔪᒥ ᖃᓪᓗᓈᑦ ᓄᓇᖓᓐᓃᑦᑐᓐᓇᙱᓚᑦ. ᑕᐃᒫᒃ, ᐃᓛᓐᓂᒃᑯᑦ ᐅᑎᑲᐅᑎᒋᓲᖑᕗᑦ,” ᐅᖃᓚᐅᖅᐳᖅ.

“ᐱᖃᕈᓐᓇᕈᑦᑕ ᐅᑯᓂᖓ ᐱᓕᕆᐊᖑᔪᓂ ᐅᕙᓂ ᐊᕕᒃᑐᖅᓯᒪᓂᑦᑎᓐᓂ, ᐊᔪᕐᓇᙱᓐᓂᖅᓴᐅᓇᔭᖅᐳᖅ ᐃᓄᖁᑎᑦᑎᓐᓂ ᑲᔪᓯᓂᖏᓐᓂ.”

ᐃᓄᐃᑦ ᓄᓇᕕᖕᒥ ᐆᒥᖓ ᐊᐱᕆᓯᒪᕗᑦ ᑕᐃᒪᙵᓂ ᐊᑎᓕᐅᖅᑕᐅᓂᖓᓂ ᓯᕿᓂᕐᒥᐅᑦ ᐊᒻᒪ ᐅᐊᖕᓇᒥ ᑯᐸᐃᖕᒥ ᐊᖏᕈᑕᐅᔪᒥ 1975−ᒥ ᑕᑯᒃᓴᐅᑎᑕᐅᓂᖓᓂ ᖃᔅᓯᒐᓚᖕᓂ ᐃᓄᓕᒫᓄᑦ ᐅᖃᖃᑎᒌᖕᓂᐅᔪᓂ ᐅᓂᒃᑳᓕᐊᓂ ᕿᑎᐊᓂ 1992−ᒥ ᐊᒻᒪ 2014−ᒧᑦ.

ᒫᓐᓇᐅᔪᒥ ᓯᓚᑦᑐᖅᓴᕐᕕᖃᙱᓚᑦ ᐅᕝᕙᓘᓐᓃᑦ ᓯᓚᑦᑐᖅᓴᕐᕕᒡᔪᐊᕐᒥ ᐃᓕᓐᓂᐊᕐᕕᐅᔪᓂ ᓄᓇᕕᖕᒥ.

ᑲᑎᕕᒃ ᐃᓕᓴᕐᓂᓕᕆᓂᖅ ᐱᔪᓐᓇᕐᓂᖃᙱᓚᑦ ᑐᓂᓯᓂᕐᒥ ᖁᑦᑎᖕᓂᖅᓴᒥ−ᐃᓕᓐᓂᐊᕐᓂᐅᔪᒥ ᐃᓕᓐᓂᐊᕐᓂᓕᕆᓂᕐᒥ ᓄᓇᕕᖕᒥ, ᐅᕘᓇ ᓯᕿᓂᕐᒥᐅᑦ ᐊᒻᒪ ᐅᐊᖕᓇᒥ ᑯᐸᐃᖕᒥ ᐊᖏᕈᑕᐅᔪᒥ.

ᓄᓇᕕᖕᒥ ᐃᓕᓐᓂᐊᕐᕕᖓᓂ ᐱᔪᓐᓇᑐᐃᓐᓇᕆᐊᖃᕐᓂᖓᓂ, ᐱᓕᕆᔨᕐᔪᐊᑦ ᐱᓕᕆᖃᑎᖃᖅᐳᑦ ᒪᑭᕝᕕᒃ ᑎᒥᖁᑕᐅᔪᓂ ᕿᒥᕐᕈᓂᕐᒧᑦ ᖃᓄᖅ ᐃᓕᓐᓂᐊᕐᕕᐅᑉ ᑲᑎᒪᔨᖏᑦ ᐱᓕᕆᐊᒃᓴᖏᑦ ᐊᖏᒡᓕᒋᐊᖅᑕᐅᔪᓐᓇᕐᓂᖓᓂ ᐃᓚᖃᕐᓂᕐᒥ ᖁᑦᑎᖕᓂᖅᓴᐅᔪᒥ ᐃᓕᓐᓂᐊᕐᓂᐅᔪᒥ.

ᐊᐱᕆᔭᐅᒐᒥᒃ ᐊᒃᓱᕈᕐᓇᕐᓂᐊᕐᓂᖓᓂ ᐃᓚᒋᐊᖅᓯᓂᕐᒥ ᓯᕿᓂᕐᒥᐅᑦ ᐊᒻᒪ ᐅᐊᖕᓇᒥ ᑯᐸᐃᖕᒥ ᐊᖏᕈᑕᐅᔪᒥ, ᐸᓐᑦᓕ ᐅᖃᓚᐅᖅᐳᖅ ᐊᔪᕐᓇᙱᑦᑐᑯᓘᔾᔮᙱᑦᑐᒃᓴᐅᕗᖅ, ᑭᓯᐊᓂ ᐋᔩᖃᑎᒌᖕᓂᐅᔪᓂ ᐱᓕᕆᐊᖑᔭᕆᐊᖃᕐᓂᐊᖅᐳᖅ.

“ᐸᕐᓇᒃᓯᒪᕗᒍᑦ ᐊᒃᓱᕈᕐᓇᖅᑐᒧᑦ,” ᐅᖃᓚᐅᖅᐳᖅ.

ᐸᓐᑦᓕ ᐅᖃᓚᐅᖅᐳᖅ ᐅᓇ ᐊᑯᓂᐅᔪᒃᑯᑦ ᐱᓕᕆᐊᒃᓴᐅᕗᖅ ᐊᕐᕌᒍᐸᓗᖕᓂ 10−ᓂ ᐅᖓᑖᓄᓪᓘᓐᓃᑦ ᐱᔭᕇᕐᓂᕐᒧᑦ.

ᒫᓐᓇᐅᔪᒥ, ᑲᑎᕕᒃ ᐃᓕᓴᕐᓂᓕᕆᓂᖅ ᐱᓕᕆᖃᑎᖃᖅᓯᒪᕗᑦ ᔮᓐ ᐋᐱᑦ ᓯᓚᑦᑐᖅᓴᕐᕕᖓᓂ ᒪᓐᑐᕆᐋᓪᒥ ᓇᒃᓴᕐᓂᕐᒧᑦ ᖁᑦᑎᖕᓂᖅᓴᒥ−ᐃᓕᓐᓂᐊᕐᓂᐅᔪᒥ ᐃᓕᓐᓂᐊᕐᓂᐅᔪᓂ ᓄᓇᕕᖕᒧᑦ.

“ᐱᔭᒃᓴᖃᕐᔪᐊᕐᓂᐊᖅᐳᑦ ᐋᖅᑭᒃᓯᓂᕐᒥ ᑐᙵᕕᒋᔭᖓᓂ ᓴᖅᑭᓛᖅᑐᒧᑦ ᐃᓕᓐᓂᐊᕐᕕᐅᔪᒧᑦ,” ᐸᓐᑦᓕ ᐅᖃᓚᐅᖅᐳᖅ.