ᓄᓇᕕᒃᒥ ᐃᓕᓴᐃᔩᑦ ᓄᖃᖓᔪᑦ ᐃᖅᑲᓇᐃᔮᖏᓐᓄᑦ ᐋᔩᕈᑎᒋᔭᐅᔪᑦ ᐊᓂᒍᑦᑎᐊᙱᑎᓪᓗᒋᑦ
ᐋᔩᑲᑕᒃᓯᒪᔪᑦ ᐊᕐᕌᒎᒃ ᒪᕐᕉᒃ ᐅᖓᑖᓂ
ᒫᓂ 50-ᖏᓐᓃᑦᑐᓂᒃ ᐃᓄᐃᑦ ᓇᖏᑲᑕᒃᑐᑦ ᑲᑎᕕᒃ ᐃᓕᓴᕐᓂᓕᕆᓂᒃᑯᑦ ᐊᖓᔪᖅᑳᖃᕐᕕᐊᓂ ᒪᓐᑐᕆᐊᒥ ᐃᓚᒋᔭᐅᓪᓗᑎᒃ ᐅᓪᓗᓂ ᑎᓴᒪᒥᒃ ᓄᖅᑲᖓᓂᕐᒥ ᐃᖅᑲᓇᐃᔮᖏᓐᓂ ᐱᒋᐊᖅᓯᒪᔪᒥᒃ ᔭᓄᐊᕆ 17-ᒥ. (ᐊᔾᔨᓕᐅᕆᔨ ᓯᑐᕆᒃ ᒑᓚᓐᑦ)
For English version, see Nunavik teachers take strike action after latest talks fail
ᓈᒻᒪᒃᓴᙱᓐᓂᕐᒧᑦ ᐃᖅᑲᓇᐃᔮᖏᓐᓂ ᐃᖅᑲᓇᐃᔭᖅᑎᐅᔪᑦ ᓄᓇᕕᒃ ᐃᓕᓐᓂᐊᕐᕖᑦ ᓯᓚᑖᓃᑦᑐᑦ ᐊᒻᒪ ᐅᕙᓂ ᑲᑎᕕᒃ ᐃᓕᓴᕐᓂᓕᕆᓂᖅ ᐊᖓᔪᖅᑳᖃᕐᕕᖓᓂ ᒪᓐᑐᕆᐊᒥ ᐃᓕᓴᐃᔩᑦ ᐅᓪᓗᕐᓂ ᑎᓴᒪᓂᒃ ᐃᖅᑲᓇᐃᔮᖏᓐᓂ ᓄᖅᑲᖓᓂᐊᕐᑎᓪᓗᒋ ᔭᓄᐊᕆ 16-ᒥ.
ᓄᓇᕕᒃᒥ ᒫᓂ 450-ᖏᓐᓂ ᑲᑎᕕᒃ ᐃᓕᓴᕐᓂᓕᕆᓂᒃᑯᓐᓄᑦ ᐃᓕᓴᐃᔨᐅᔪᑦ ᐃᖅᑲᓇᐃᔮᖏᓐᓂ ᓈᒻᒪᒃᓴᙱᓐᓂᕐᒧᑦ ᓄᖅᑲᖓᑲᐃᓐᓇᓕᓚᐅᕐᑐᑦ ᐋᔩᕈᑎᒋᔭᐅᔪᖅ ᑭᖑᓪᓕᖅᐹᖅ ᐋᖅᑭᒍᑎᐅᔪᓐᓇᓚᐅᙱᑎᓪᓗᒍ ᐱᓇᓱᐊᕈᓯᐅᓚᐅᕐᑐᒥᑦ.

ᓄᓇᕕᒃᒥ ᐃᓕᓴᐃᔨᑦ ᑲᑐᔾᔨᖃᑎᒌᖏᓐᓄᑦ ᐊᖓᔪᖅᑳᖅ ᓕᐅᕆ ᐃᒻᐳᑦ ᐃᑲᔪᖅᑐᐃᔪᓄᑦ ᐅᖃᓪᓚᒃᑐᑦ ᔭᓄᐊᕆ 16-ᒥ ᒪᓐᑐᕆᐊᒥ. (ᐊᔾᔨᓕᐅᕆᔨ ᓯᑐᕆᒃ ᒑᓚᓐᑦ)
ᓄᖅᑲᖓᓂᐅᔪᖅ ᑎᑭᓐᓂᐊᓚᐅᕐᑐᖅ ᐊᐃᑉᐹᓂ 11:00-ᒥ ᐅᓪᓛᒃᑯᑦ ᑖᒃᑯᐊᓗ ᐃᓕᓐᓂᐊᕐᕖᑦ ᒪᑐᓯᒪᓪᓗᑎᑦ ᐃᓕᓴᐃᔩᑦ ᐅᑎᖅᐸᑕ ᑭᓯᐊᓂ.
ᓕᐅᕆ ᐃᒻᐳᑦ, ᐊᖓᔪᖅᑳᕆᔭᐅᔪᖅ ᐃᖅᑲᓇᐃᔭᖅᑎᑦ ᑲᑐᔾᔨᖃᑎᒌᖏᓐᓄᑦ ᑯᐸᐃᒃ ᐅᐊᖕᓇᖓᓂ, ᐅᖃᓚᐅᕐᑐᖅ ᐋᔩᑲᑕᖕᓂᖅ ᐃᓱᓕᓚᐅᕐᓂᕋᖅᖢᓂᐅᒃ ᑲᑐᔾᔨᖃᑎᒌᑦ ᑮᓇᐅᔭᓕᕆᓂᒃᑯᑦ ᑐᓴᖅᑎᑦᑎᓪᓗᑎᒃ ᓯᕗᓪᓕᐅᑎᑕᐅᖁᔭᐅᔪᓂᒃ ᓄᑖᓂ ᑳᓐᑐᕌᖑᓂᐊᖅᑐᓂᒃ ᑯᐸᐃᒃ ᑮᓇᐅᔭᓕᕆᔨᒃᑯᑦ ᑲᑎᒪᔨᓄᑦ, ᑖᒃᑯᐊᑦᑕᐅᖅ ᐋᔩᕈᑎᒋᔭᐅᑲᑕᒃᑭᓪᓗᑎᒃ.
“ᓇᐃᓴᐅᑎᓂ ᓴᖅᑭᑦᑎᕝᕕᒋᓚᐅᕐᑕᕗᑦ ᖃᐅᔨᒪᓂᐊᕐᒪᑕ ᐊᐅᓚᔾᔪᑎᒃᓴᖏᑦ ᑭᓱᓄᑦ ᐊᑐᕐᒪᖔᑕ,” ᐃᒻᐳᑦ ᐅᖃᕐᑐᖅ ᐅᐃᕖᑐᑦ ᐊᐱᕐᓱᖅᑕᐅᑎᓪᓗᒍ.
ᐅᖃᖅᖢᓂ ᑮᓇᐅᔭᓕᕆᔨᒃᑯᑦ ᑲᑎᒪᔨᖏᑦ ᑭᐅᓚᐅᕐᓂᖏᓐᓂ ᐅᓪᓛᙳᖅᐸᑦ ᔭᓄᐊᕆ 16-ᒥ ᑐᓴᖅᑎᑦᑎᓂᐊᕐᓂᕋᖅᖢᑎᒃ. ᑭᐅᔾᔪᑎᒋᔭᐅᓂᐊᕐᑐᖅ ᑐᓴᖅᑕᐅᓚᐅᙱᑦᑐᑦ ᓈᒻᒪᒃᓴᙱᓐᓂᕐᒧᑦ ᓄᖃᖓᓕᖅᑎᓪᓗᒋᑦ, ᐅᖃᕐᑐᖅ.
ᑮᓇᐅᔭᓕᕆᔨᒃᑯᑦ ᑲᑎᒪᔨᖏᑦ ᐅᖃᓪᓚᒍᒪᓚᐅᙱᑦᑐᑦ ᓄᓇᑦᓯᐊᕐᒥ ᐱᕙᓪᓕᐊᔪᑦ ᑐᓴᕋᓱᒃᑎᓪᓗᒋᑦ.
“ᐃᓱᒪᒐᑦᑕ ᑕᒪᓐᓇ ᑐᐊᕕᕐᓇᖅᑐᕆᔭᐅᙱᓐᓂᖓᓂ ᐃᓕᓐᓂᐊᕐᕕᒃᒧᑦ ᑲᑎᒪᔨᓄᑦ ᑕᒪᓐᓇᓗ ᐊᐃᑦᑖᖑᒐᓗᐊᖅ,” ᐃᒻᐳᑦ ᐅᖃᕐᑐᖅ.
ᑲᑐᔾᔨᖃᑎᒌᑦ ᓇᓗᓇᐃᕐᓯᓯᒪᔪᑦ ᒪᕐᕉᖕᓂ ᐱᒻᒪᕆᒋᔭᐅᔪᓂᒃ ᓯᕗᓪᓕᐅᑎᔭᕆᐊᓕᖕᓂ ᑕᐃᒪᓐᓇᓗ ᐃᖅᑲᓇᐃᔭᖅᑎᓄᑦ ᓄᖅᑲᖓᓚᐅᑲᒍᑎᐅᓕᖅᖢᓂ: ᐱᐅᓯᕚᓪᓕᖅᑎᑦᑎᓗᑎᒃ ᐃᖅᑲᓇᐃᔭᖅᑎᓄᑦ ᑮᓇᐅᔭᖅᑖᒃᑲᓐᓂᕈᑎᒃᓴᖏᓐᓂᒃ, ᑖᓐᓇᓕ ᐋᖅᑭᒋᐊᖅᑕᐅᒃᑲᓐᓂᓚᐅᕐᓯᒪᙱᒻᒪ ᑕᐃᒪᙵᑦ 2001-ᖑᑎᓪᓗᒍ; ᐊᒻᒪᓗ ᐃᒪᖃᖅᑎᑦᑎᑦᑎᐊᑲᑕᒡᓗᑎᒃ ᐃᖅᑲᓇᐃᔭᖅᑎᓄᑦ ᐃᒡᓗᒋᑎᑕᐅᔪᓂᒃ.
ᒪᓐᑐᕆᐊᒥᓪᓕ ᒫᓂ 50-ᖏᓐᓃᑦᑐᓂ ᐊᔾᔨᒌᙱᑦᑑᑎᓂ ᑯᐸᐃᒃᒥ ᑲᑐᔾᔨᖃᑎᒌᓂ ᓈᒻᒪᒃᓴᙱᓐᓂᕐᒧᑦ ᐃᓕᓐᓂᐊᕐᕕᒃᒧᑦ ᑲᑎᒪᔩᑦ ᑎᑎᕋᕐᕕᖓᑕ ᓯᓚᑖᓃᓚᐅᕐᑐᑦ, ᑎᑎᕋᕐᓯᒪᔪᓂᒃ ᑎᒍᒥᐊᖅᖢᑎᒃ ᓯᓚ ᓂᒡᓚᓱᖕᓂᖃᖅᑎᓪᓗᒍ -8 ᐃᑲᔪᖅᑐᐃᓂᕐᒧᑦ ᓄᓇᕕᒃᒥ ᐃᓕᓴᐃᔨᓂᒃ.

ᐅᑯᓄᖓ Centre Trade Union (ᓴᓐᑐ ᑐᕇᑦ ᑲᑐᔾᔨᖃᑎᒌᑦ) ᐊᖓᔪᖅᑳᖓᑦᑕ ᑐᒡᓕᖓ ᐸᔅᑳᓪ ᑰᑎ ᐅᖃᓪᓚᒃᑐᖅ ᓈᒻᒪᒃᓴᙱᑦᑐᓄᑦ ᐊᒻᒪ ᐃᑲᔪᖅᑐᐃᔪᓄᑦ ᒪᓐᑐᕆᐊᒥ ᔭᓄᐊᕆ 16-ᖑᑎᓪᓗᒍ ᐅᑯᐊ ᓄᓇᕕᒃᒥ ᐃᓕᓴᐃᔨᑦ ᐊᖏᕈᑎᖏᑦ ᓱᓕ ᓄᖃᖓᑎᑕᐅᑐᐃᓐᓇᖅᑎᓪᓗᒋᑦ. (ᐊᔾᔨᓕᐅᕆᔨ ᓯᑐᕆᒃ ᒑᓚᓐᑦ)
“ᑕᐃᒪᓐᓇ 2025 ᐱᒋᐊᖅᑎᑦᑐᒪᓚᐅᙱᑕᕗᑦ,” ᐅᖃᕐᑐᖅ ᐸᔅᑳᓪ ᑰᑎ, ᐊᖓᔪᖅᑳᒧᑦ ᑐᒡᓕᕆᔭᐅᔪᖅ ᐃᖅᑲᓇᐃᔮᓄᑦ ᑲᑐᔾᔨᖃᑎᒌᓄᑦ ᑯᐸᐃᒃᒥ (Centre Trade Union of Quebec), ᑯᐸᐃᒃᒥ ᐊᖏᓂᖅᐹᑦ ᑲᑐᔾᔨᖃᑎᒌᓂᒃ ᑭᒡᒐᖅᑐᐃᓪᓗᑎᒃ 225,000-ᓂ ᐃᓚᒋᔭᐅᔪᓂᒃ.
ᑲᑎᕕᒃᒥ ᐃᓕᓴᐃᔨᑦ ᑲᑐᔾᔨᖃᑎᒌᖏᑦ ᐋᔩᖃᑎᖃᑲᑕᓕᓚᐅᕐᓯᒪᔪᑦ ᓄᑖᒥ ᑳᓐᑐᕌᒃᑖᕋᓱᒃᖢᑎᒃ ᐅᒃᑑᐱᕆ 2022-ᒥ. ᓄᑕᐅᙱᑦᑐᖅ ᐊᖏᖃᑎᒌᒍᑎ ᐃᓱᓕᓚᐅᕐᓯᒪᖕᒪᑦ ᒪᐃ 2023-ᒥ.
ᑭᓯᐊᓂᓕ 30 ᐅᖓᑖᓂ ᑲᑎᒪᖃᑎᒌᓚᐅᖅᖢᑎᒃ ᐊᕐᕌᒎᒃ ᒪᕐᕉᒃ ᐅᖓᑖᓂ, “ᐋᖃᑎᒌᖕᓂᐅᔪᖅ ᐱᓕᕆᐊᖑᑐᐃᓐᓇᐃᓐᓇᕐᒪᑦ,” ᐅᖃᕐᑐᖅ ᑰᑎ.
“ᐋᔩᖃᑎᒌᒃᑎᓪᓗᒋᑦ ᐱᔭᐅᔪᒪᔪᑦ ᐊᖏᔪᐊᓘᓚᐅᕐᓯᒪᔪᑦ, ᐃᖅᑲᓇᐃᔭᖅᑎᑖᕆᐊᖃᖅᖢᑕ, ᐱᔪᒪᔾᔪᑎᒃᓴᓂᒡᓗ, ᐃᖅᑲᓇᐃᔭᐃᓐᓇᕈᑎᒃᓴᓂᒡᓗ ᐊᒻᒪᓗ ᐃᓚᖃᖅᖢᓂ ᓄᑖᑦ ᐋᔩᕈᑎᐅᓂᑯᑦ ᑮᓇᐅᔭᓕᐊᓄᑦ ᓱᓕ ᐊᑐᖅᑎᑕᐅᓯᒪᙱᑦᑐᑦ” ᐃᓕᓴᐃᔨᓄᑦ ᐅᐊᖕᓇᕐᒦᑦᑐᓄᑦ.
ᐃᒻᐳᑦ ᐅᖃᓚᐅᕐᑐᖅ ᐊᑯᓂᐊᓗᒃ ᐋᔩᑲᑕᖕᓂᐅᖅ ᓴᖅᑭᑎᑦᑎᓯᒪᓂᖓᓂ “ᐃᖅᑲᓇᐃᔭᓕᖅᑎᑦᑎᓇᓱᖕᓂᒃᑯᑦ ᓈᒻᒪᙱᓕᐅᕈᑎᓂᒃ” ᐱᔾᔪᑎᖃᖅᖢᓂ ᑮᓇᐅᔭᓕᐊᕆᔭᐅᔪᑦ ᐊᔾᔨᒋᔭᐅᙱᓗᐊᕐᓂᖏᓐᓂ ᓄᓇᕕᒃᒥ ᐊᒻᒪ ᐊᓯᖏᓐᓃᑦᑐᓂᒃ.
“ᐃᖅᑲᓇᐃᔭᖅᑎᖃᕐᓂᕐᓴᐅᓕᕋᑦᑕ ᐃᓕᓐᓂᐊᕌᓂᒃᓯᒪᙱᓗᐊᖅᑐᓂᒃ ᐊᒻᒪᓗ ᐃᖅᑲᓇᐃᔭᖅᑎᓕᒫᑦ ᓇᑉᐸᖓᓃᖢᑎᒃ ᑕᒪᓐᓇᓗ ᓈᒻᒪᓗᐊᙱᖢᓂ,” ᐅᖃᕐᑐᖅ.
ᐅᖃᖅᖢᓂ ᐃᓕᓐᓂᐊᕐᓂᖅ ᐅᑭᐅᕐᑕᖅᑐᕐᒥ ᐊᔾᔨᖃᖅᑎᑕᐅᔭᕆᐊᖃᕐᓂᖓᓂ ᐊᓯᖏᓐᓃᑦᑐᓂ ᑯᐸᐃᒃᒥ.
ᑲᑎᕕᒃ ᐃᓕᓴᕐᓂᓕᕆᓂᖅᒧᑦ ᑐᓴᐅᒪᔾᔪᑎᓕᕆᓂᕐᒥ ᑐᑭᒧᐊᖅᑎᑦᑎᔨᖓ ᔭᐃᑦ ᐴᓂᐅ ᐅᖃᓚᐅᕐᑐᖅ ᓄᓇᑦᓯᐊᕐᒥ ᐱᕙᓪᓕᐊᔪᓄᑦ ᑲᑎᒪᔩᑦ ᑕᒪᑐᒧᖓ ᐅᖃᓪᓚᒍᒪᙱᓐᓂᕋᖅᖢᓂᒋᑦ ᐋᔩᑲᑕᖕᓂᖏᓐᓂᒃ.

ᐃᖅᑲᓇᐃᔮᖏᓐᓂ ᓈᒻᒪᒃᓴᙱᓐᓂᕐᒧᑦ ᑎᑎᕋᕐᓯᒪᔪᑦ ᐋᖅᑭᒃᓱᖅᑕᐅᓯᒪᔪᑦ ᐊᐳᑎᒥ ᑲᑎᕕᒃ ᐃᓕᓴᕐᓂᓕᕆᓂᖅ ᑎᑎᕋᕐᕕᐅᑉ ᓵᑦᑎᐊᖓᓂ ᔭᓄᐊᕆ 16-ᖑᑎᓪᓗᒍ ᓄᓇᕕᒃᒥ ᐃᓕᓴᐃᔩᑦ ᐅᓪᓗᕐᓂ ᑎᓴᒪᓂ ᓄᖃᖓᓂᐊᕐᓗᑎᒃ ᓈᒻᒪᒃᓴᙱᔾᔪᑎᖃᕐᓂᕐᒧᑦ. (ᐊᔾᔨᓕᐅᕆᔨ ᓯᑐᕆᒃ ᒑᓚᓐᑦ)
(0) Comments