ᓄᓇᕕᖕᒥᐅᑕᖅ ᐊᕐᓇᖅ ᐅᓇᑕᖅᑐᒃᓴᙳᐊᖑᕗᖅ ᐊᕐᕌᒍᒥ ᐱᓕᕆᖃᑎᖃᕐᓂᖓᓂ ᒪᒃᑯᒃᑐᓂ

For English version, see Nunavik woman named Ranger of the Year for her work with youth

ᓈᓐᓯ ᑰᒃᑑᒃ ᑐᕌᖅᑎᑦᑎᓯᒪᕗᖅ ᑕᒪᒃᑭᒐᓚᒃ ᐱᓕᕆᓂᖓᓂ master corporal−ᖑᓪᓗᓂ ᑲᓇᑕᒥ ᐅᓇᑕᖅᑐᒃᓴᙳᐊᓂᑦ ᐃᑲᔪᕐᓂᕐᒧᑦ ᒪᒃᑯᒃᑐᓂ ᐃᓄᖕᓂ ᐊᖏᕐᕋᖓᓂ ᓄᓇᓕᐅᔪᒥ ᑲᖏᖅᓱᐊᓗᔾᔪᐊᕐᒥ

ᐱᓕᕆᓂᖓᓄᑦ, ᑲᓇᑕᒥ ᐅᓇᑕᖅᑐᒃᓴᑦ ᒫᓐᓇᓕᓴᐅᔪᒥ ᐊᑦᑎᖅᓯᓚᐅᖅᐳᖅ ᐅᓇᑕᖅᑐᒃᓴᙳᐊᖅ ᐊᕐᕌᒎᔪᒧᑦ ᒪᕐᕈᖓᓂ ᑲᓇᑕᒥ ᐊᕕᒃᑐᖅᓯᒪᓂᐅᔪᒥ ᐱᓕᕆᐊᖃᖅᐸᒃᑐᓂ ᑕᒪᒃᑭᓂ ᐅᐊᓇᒥ ᑯᐸᐃᖕᒥ ᐃᓚᖃᖅᑐᒥ ᑕᒪᒃᑭᓂ ᐅᓇᑕᖅᑐᒃᓴᓂ ᐊᒻᒪ ᐅᓇᑕᖅᑐᒃᓴᙳᐊᓂ ᐊᕕᒃᑐᖅᓯᒪᓂᐅᔪᓂ.

ᑰᒃᑑᒃ ᐃᓚᐅᖃᑕᐅᓂᖓ ᑲᓇᑕᒥ ᐅᓇᑕᖅᑐᒃᓴᙳᐊᓂ ᐱᒋᐊᓚᐅᖅᐳᖅ 1990 ᓄᙳᐊᓂ 12−ᓂ ᐅᑭᐅᖃᖅᑎᑎᓪᓗᒍ ᐊᒻᒪ ᐃᓚᐅᖃᑕᐅᓪᓗᓂ ᓄᑲᖅᖠᓂ ᐅᓇᑕᖅᑐᒃᓴᙳᐊᓄᑦ ᐱᓕᕆᐊᖑᓂᐅᔪᒥ.

“ᐃᓚᐅᖃᑕᐅᓕᓚᐅᖅᐳᖓ ᐊᓕᐊᓇᐃᑦᑑᓚᐅᕐᒪᑦ ᐊᒻᒪ ᒪᓕᒍᒪᓚᐅᖅᐳᖓ ᐊᑖᑕᒪ ᑐᒥᖏᓐᓂ ,” ᐅᖃᓚᐅᖅᐳᖅ ᐅᖃᓘᑎᒃᑯᑦ ᐊᐱᖅᓱᖅᑕᐅᓂᐅᔪᒥ.

“ᐅᕙᓐᓂ ᐃᑲᔪᕐᔪᐊᖅᓯᒪᕗᖅ,” ᐃᓚᒋᐊᖅᓯᓚᐅᖅᐳᖅ ᓂᐱᖓ ᓴᔪᒃᓱᒃᖢᓂ, ᐅᖃᐅᓯᖃᖅᑎᓪᓗᒍ ᐊᑖᑕᒋᓚᐅᖅᑕᖓᓂ, ᓵᓕ ᐃᑦᑐᖅ, ᐅᓇᑕᖅᑐᒃᓴᙳᐊᖑᓚᐅᕐᒥᔪᖅ ᐊᕐᕌᒍᒐᑲᓴᖕᓂ 30−ᓂ. ᐱᓕᒻᒪᒃᓴᓂᖅ ᐊᔪᕐᓇᙱᑎᑦᑎᒋᐊᓚᐅᖅᐳᖅ ᐃᒻᒥᓄᑦ, ᑰᒃᑑᒃ ᐅᖃᓚᐅᖅᐳᖅ, ᑕᐃᓪᓗᓂᐅᒃ ᑲᔪᖏᖅᓴᐃᔨᐅᓂᖓᓂ ᐱᓕᕆᐊᕆᕙᒃᑕᖓᓂ ᒫᓐᓇᐅᔪᒥ.

ᑰᒃᑑᒃ ᑲᓇᑕᒥ ᐅᓇᑕᖅᑐᒃᓴᙳᐊᖑᓪᓚᕆᓚᐅᖅᐳᖅ 2005−ᒥ ᐊᒻᒪ ᖁᕝᕙᕆᐊᖅᐸᓪᓕᐊᓚᐅᖅᐳᖅ ᖁᑦᑎᖕᓂᖅᓴᓂᐅᔪᓄᑦ ᓇᓗᓇᐃᖅᓯᒪᔪᒥ ᑐᕌᒐᒃᓴᖃᖅᖢᓂ ᐃᓱᒪᖓᓂ, ᐊᑕᐅᓯᐅᔪᖅ ᐊᔾᔪᒥᒋᔭᙳᕐᓂᖓᓂ ᒪᒃᑯᒃᑐᓄᑦ.

ᑲᓇᑕᒥ ᐅᓇᑕᖅᑐᒃᓴᙳᐊᑦ ᐃᓚᒋᔭᐅᕗᒃ ᑲᓇᑕᒥ ᐅᓇᑕᖅᑐᒃᓴᓂ ᐱᓕᕆᐊᖃᖅᐸᒃᑐᓂ ᐱᓕᒻᒪᒃᓴᑎᓪᓗᒋᑦ ᐅᕝᕙᓘᓐᓃᑦ ᖃᐃᖁᔭᐅᓂᖃᕌᖓᑕ ᐃᑲᔪᖅᓱᐃᓂᕐᒧᑦ ᑐᐊᕕᕐᓇᖅᑐᒥ ᐅᕝᕙᓘᓐᓃᑦ ᓄᓇᓕᖕᓂ ᐊᐅᓚᑕᐅᓂᐅᔪᓂ.

5,000−ᐸᓗᖕᓂ ᐅᓇᑕᖅᑐᒃᓴᙳᐊᓂᑦ ᑐᙵᕕᖃᖅᐳᑦ ᐅᓄᕐᓂᖅᓴᐅᔪᓂ 200−ᓂ ᓄᓇᓕᖕᓂ ᑲᓇᑕᓕᒫᒥ, ᐅᖃᐅᓯᐅᓪᓗᓂ ᑲᓇᑕᒥ ᒐᕙᒪᒃᑯᓐᓂ.

“ᒪᒃᑯᒃᑐᑦᐊᔾᔪᒥᒋᔭᖃᕆᐊᖃᖅᐳᑦ,” ᐅᖃᓚᐅᖅᐳᖅ ᑰᒃᑑᒃ. “ᐊᑦᑕᓇᔾᔭᐃᖅᓯᒪᔭᕆᐊᖃᖅᐳᑦ ᐊᒻᒪ ᐅᐸᒃᓯᒪᕙᒃᐸᓪᓗᑎᒃ ᐃᓄᑦᑎᐊᕙᐅᔪᓂ ᐆᒻᒪᕆᒃᑐᖃᑦᑎᐊᖅᑐᓂᓗ.

“ᑕᐃᒪᓐᓇ ᐃᒃᐱᒍᓱᓲᖑᕗᖓ ᐅᐸᒃᓯᒪᓕᕌᖓᒃᑭᑦ, ᐊᓕᐊᓇᐃᒋᕙᒃᑕᕋ ᐅᐸᒃᓯᒪᓪᓗᒋᑦ.”

ᑰᒃᑑᒃ, ᐃᓚᒋᔭᐅᔪᒥ ᑲᖏᖅᓱᐊᓗᔾᔪᐊᕐᒥ ᑲᑎᙵᓂᐅᔪᓂ, ᐅᐱᒋᔭᐅᓂᐊᖅᐳᖅ ᐅᐱᒋᔭᐅᕐᔪᐊᕐᓂᐅᔪᒥ Brig.-Gen. ᑕᐃᕝ ᐊᐴᑦᒧᑦ.

“ᐅᐱᒍᓱᒃᐳᖓ ᐅᓇᑕᖅᑐᒃᓴᙳᐊᖑᓂᕐᒥ ᐊᕐᕌᒎᔪᒥ,” ᑰᒃᑑᒃ ᐅᖃᓚᐅᖅᐳᖅ.

“ᐅᓄᕐᓂᖅᓴᓂ ᐃᓄᖕᓂ ᐱᔭᕆᐊᖃᖅᐳᒍᑦ ᐸᖅᑭᔪᓐᓇᖅᑐᒥ ᒪᒃᑯᒃᑐᓂ. ᑭᓱᑐᐃᓐᓇᓂ ᐱᓕᕆᔪᓐᓇᖅᐳᑦ ᐱᔪᒪᓂᖃᖅᑎᓪᓗᒋᑦ, ᑭᓱᑐᐃᓐᓇᙳᕈᓐᓇᖅᐳᑦ ᐱᔪᒪᔭᒥᓂᒃ, ᐊᒻᒪ ᑎᑭᐅᑎᔪᓐᓇᖅᐳᑦ ᑐᕌᒐᒃᓴᖏᓐᓂ ᐱᔪᒪᑐᐊᕈᑎᒃ.”

ᑰᒃᑑᒃ ᐅᖃᓚᐅᖅᐳᖅ ᐅᖃᐅᓯᒃᓴᖓ ᒪᒃᑯᒃᑐᓄᑦ ᐅᓇᐅᕗᖅ “ᑕᒪᒃᑭᑦ ᐊᒃᓱᕈᖅᖢᑎᑦ ᐱᓕᕆᓃᑦ ᐊᑭᓖᓲᖑᕗᖅ. ᖃᖓᑐᐃᓐᓇᖅ, ᐃᓕᓴᕆᔭᐅᓂᐊᖅᐳᖅ. ᓴᐱᓕᖅᑕᐃᓕᒋᑦ.”

ᑰᒃᑑᒃᒧᑦ, ᐅᓇᑕᖅᑐᒃᓴᙳᐊᓃᖦᖢᓂ ᐃᓚᒌᓄᑦ ᐱᓕᕆᓂᐅᕗᖅ, ᐊᑖᑕᖓᓂ ᐃᒻᒥᓄᑦ ᐊᒻᒪ ᒫᓐᓇ 15-ᓂ-ᐅᑭᐅᓕᒃ ᐸᓂᖓᓄᑦ ᐃᓚᐅᖃᑕᐅᓕᖅᑐᒥ ᓄᑲᖅᖠᓂ ᑲᓇᑕᒥ ᐅᓇᑕᖅᑐᒃᓴᙳᐊᓂᑦ ᐱᓕᕆᐊᖑᔪᒥ.

ᐅᓇᑕᖅᑐᒃᓴᙳᐊᖅ ᐊᕐᕌᒍᒥ ᓵᓚᖃᐅᓯᐊᑦ ᓂᕈᐊᖅᑕᐅᓲᖑᕗᑦ ᑐᙵᕕᖃᖅᑐᒥ ᐃᓚᒋᔭᐅᔪᓂ ᓯᕗᓕᐅᖅᑎᐅᓂᖏᓐᓂ ᐊᔪᙱᓐᓂᖏᓐᓂ ᐊᒻᒪ ᐱᓕᕆᓂᖏᓐᓂ ᓄᓇᓕᖕᓂ, ᐅᖃᓚᐅᖅᐳᖅ Master Cpl. ᐃᑏᐊᓐ ᐴᑐᕌᓐᑦ.