ᓄᓇᕕᒃᒥ ᐃᓅᓱᒃᑐᑦ ᐱᓕᕆᓂᒃᑯᑦ ᖃᐅᔨᓚᐅᕐᑐᑦ ᐋᔩᖃᑎᒌᖕᓂᕐᒥ ᐊᖏᖃᑎᒌᒍᑎᓂᒃ

For an English version of this story, see Nunavik youths get hands-on look at negotiating a treaty.

ᐋᖅᑭᒃᓱᐃᓇᓱᒃᖢᑎᒃ ᓯᕗᓂᒃᓴᒥᑦ ᓯᕗᓕᐅᖅᑎᐅᓇᔭᖅᑐᓂᒃ ᐊᒻᒪ ᐋᔩᑲᑕᖕᓂᕐᒥᒃ ᒫᓂ 40 ᖃᓂᒋᔭᖓᓂ ᐃᓅᓱᒃᑐᑦ ᑲᑎᓚᐅᕐᑐᑦ ᐃᓄᒃᔪᐊᒃᒥ ᑕᖅᑭᐅᓚᐅᕐᑐᒥ ᐅᓪᓗᕐᓂ ᐱᖓᓱᓂ ᓄᓇᕕᒃᒥ ᐊᖏᖃᑎᒌᒍᑎᓕᕆᙳᐊᑲᑕᒃᖢᑎᒃ.

“ᐅᐊᑲᓪᓚᖔ, ᖁᕕᐊᓇᑦᑎᐊᒻᒪᕆᓚᐅᕐᑐᖅ,” ᐅᖃᕐᑐᖅ ᔮᓂᔅ ᐹᓴᓐᔅ, ᐊᖓᔪᖅᑳᖅ ᐅᑯᓄᖓ ᖃᕐᔪᐃᑦ ᐃᓅᓱᒃᑐᑦ ᑲᑎᒪᔨᓄᑦ, ᐅᖄᓚᐅᑎᒃᑯᑦ ᐊᐱᕐᓱᖅᑕᐅᑎᓪᓗᒍ.

ᐊᕕᒃᑐᖅᑕᐅᓯᒪᓂᖓ ᔭᐃᒻᔅ ᐸᐃ ᐊᒻᒪ ᑯᐸᐃᒃ ᐅᐊᖕᓇᖓᓄᑦ ᐊᖏᕈᑎᑦ ᑐᓂᔭᐅᓚᐅᕐᑐᑦ ᐃᓚᐅᔪᓄᑦ ᐅᕙᓂ ᐊᖏᖃᑎᒌᒍᑎᓕᕆᓂᕐᒥ ᑕᖅᑭᐅᓚᐅᕐᑐᒥᓐ, ᖃᐅᔨᕚᓪᓕᖢᑎᒃ ᓄᓇᕕᒃ ᒥᒃᓵᓂ. (ᐊᔾᔨᙳᐊᖅ ᐅᑯᓇᙵᑦ ᖃᕐᔪᐃᑦ ᐃᓅᓱᒃᑐᑦ ᑲᑎᒪᔨᖏᓐᓂᒃ)

ᐅᕙᙵ ᔭᓄᐊᕆ 26-ᒥ ᐅᕗᖓ ᔭᓄᐊᕆ 29-ᒧ, ᓄᓇᕕᒃᒥᙶᖅᑐᑦ ᐃᓚᐅᔪᑦ ᑲᑎᓚᐅᕐᑐᑦ ᐃᓄᒃᔪᐊᒃ ᐱᙳᐊᕐᕕᒃᒥ ᐊᒻᒪ ᖃᐅᔨᒪᔭᖏᓐᓂ ᐃᓐᓇᕐᓄᑦ ᐅᓂᒃᑲᐅᓯᕆᑲᑕᒃᖢᓂᔾᔪᒃ, ᐃᓚᖏ ᐅᑯᓇᙶᖅᓯᒪᓚᐅᕐᑐᑦ ᓄᓇᕕᒃᒥ ᐃᓄᐃᑦ ᑲᑐᔾᔨᖃᑎᒌᖏᓐᓂᒃ ᐊᑎᓕᐅᓚᐅᕐᓯᒪᔪᓂᒃ ᔭᐃᒻᔅ ᐸᐃ ᐊᒻᒪ ᓄᓇᕕᒃᒥ ᐊᖏᕈᑎᓂᒃ 50 ᐊᕐᕌᒎᓕᕐᑐᑦ ᑭᖑᓂᑦᑎᓐᓂ.

ᐊᖏᕈᑎᑦ, ᐊᑎᓕᐅᕐᑕᐅᓂᑯᑦ 1975-ᒥ, ᐱᔪᓐᓇᐅᑎᓂᖏᓐᓂ ᐃᓄᐃᑦ ᐊᒻᒪ ᐊᓪᓚᐃᑦ ᑯᕇ ᓄᓇᖓᓂ ᐋᖅᑭᒃᓯᒪᐅᕐᓯᒪᖕᒪᑕ ᓄᓇᕕᒃᒥ.

ᐅᓇ ᖃᓄᐃᓕᐅᕈᑎᐅᔪᖅ ᐋᖅᑭᒃᓱᖅᑕᐅᓚᐅᕐᑐᖅ ᖃᕐᔪᐃᑦ ᐃᓅᓱᒃᑐᑦ ᑲᑎᒪᔨᖏᓐᓄᑦ, ᒪᑭᕝᕕᒃ ᐊᒻᒪᓗ ᐅᑯᓇᙵᑦ ᒍᐊᑕᓐ ᑐᙵᕕᒃ, ᐃᑲᔫᑎᒃᓴᓕᕆᓂᕐᒧᑦ ᑲᑐᔾᔨᖃᑎᒌᑦ ᑲᓇᑕᐅᑉ ᐅᑭᐅᕐᑕᖅᑐᖓᓄᑦ.

ᐅᓇ ᑐᓴᕋᓱᖕᓂᕐᒨᖓᓚᐅᕐᑐᖅ ᐊᒻᒪ ᑐᑭᓯᕙᓪᓕᕋᓱᖕᓂᕐᒧᑦ ᐊᖏᖃᑎᒌᒍᑎᓂᒃ ᐊᒻᒪᓗ ᐊᔪᕈᓐᓃᖅᓴᖅᑎᑕᐅᓪᓗᑎᒃ ᐋᔩᖃᑎᒌᓂᕐᒧᑦ ᖃᓄᐃᓕᐅᕈᑎᐅᔪᓐᓇᖅᑐᓂᒃ.

“ᐅᓇ ᐃᓅᓱᒃᑐᓂᒃ ᐸᕐᓇᒃᑎᑦᑎᔾᔪᑎᐅᓇᓱᓚᐅᕐᑐᖅ ᐋᔩᖃᑎᒌᒍᓐᓇᕐᓂᕐᒥᒃ ᒪᑭᕝᕕᒃᑯᓐᓄᑦ ᐊᒻᒪ ᑯᐸᐃᒃᒧᑦ [ᓯᕗᓂᒃᓴᑦᑎᓐᓂ],” ᐅᖃᕐᑐᖅ ᐹᓴᓐᔅ.

“ᐊᓂᒍᑦᑎᐊᓚᐅᕐᑐᖅ; ᐃᓅᓱᒃᑐᑦ ᐃᓚᐅᑦᑎᐊᓚᐅᕐᑐᑦ, ᐅᖃᓪᓚᑲᑕᖃᑕᐅᓪᓗᑎᒃ ᐊᒻᒪᓗ ᐊᔪᕈᓐᓃᕐᓴᕈᒪᓪᓗᑎᒃ. ᐋᔩᖃᑎᖃᓪᓚᕆᖂᔨᓚᐅᕐᑐᑦ ᒐᕙᒪᒃᑯᓐᓂᒃ.

“ᐋᔩᖃᑎᒌᑲᑕᒃᑎᓪᓗᒋᑦ ᖁᕝᕕᐅᑲᑕᐃᓐᓇᓚᐅᕐᑐᖓ,” ᐅᖃᕐᑐᖅ.

ᐹᓴᓐᔅ ᓯᕗᓪᓕᖅᐹᒥ ᐋᔩᖃᑎᒌᙳᐊᖅᑐᓂᒃ ᐃᓚᐅᓚᐅᕐᓯᒪᔪᖅ ᑰᔾᔪᐊᖅᒥ 2022-ᖑᑎᓪᓗᒍ. ᑖᓐᓇᓗ ᑕᐃᒪᓐᓇᒥᐊᖅ ᐱᓕᕆᐊᖑᓚᐅᖅᖢᓂ, ᑭᓯᐊᓂᓕ ᐃᓄᒃᔪᐊᒃᒥ ᐋᖅᑭᒃᓱᖅᓯᒪᓂᕐᓴᐅᓚᐅᕐᒪᑦ ᐊᒻᒪᓗ ᖃᓄᐃᓕᐅᕈᑎᒃᓴᓂ ᐃᓂᒃᓴᓕᐅᕈᑎᐅᓪᓗᓂ.

ᐅᓇ ᖃᓄᐃᓕᐅᕈᑎ ᐱᔾᔪᑎᖃᓗᐊᓚᐅᕐᑐᖅ “ᐱᒻᒪᕆᐅᓂᖓ ᐊᔪᕈᓐᓃᖅᓴᕐᓂᖅ ᐋᔩᖃᑎᒌᖕᓂᕐᒥ ᐃᓅᓱᒃᑐᖁᑎᑦᑎᓐᓄᑦ ᐱᓕᕆᐊᖃᕈᓐᓇᕐᓯᓂᐊᕐᒪᑕ ᐊᒻᒪᓗ ᓯᕗᓕᐅᖅᑎᐅᔪᓐᓇᕐᓯᓗᑎᒃ,” ᐅᖃᕐᑐᖅ.

ᐃᓄᒃᔪᐊᒃ ᒪᐃᔭᖓ ᐲᑕ ᐃᓄᒃᐸᒃ, ᐊᑎᓕᐅᖃᑕᐅᓚᕐᓯᒪᔪᖅ ᐊᖏᖃᑎᒌᒍᑎᓂ ᑕᐃᔅᓱᒪᓂ ᐊᕐᕌᒎᓕᕐᑐᑦ 50 ᑭᖑᓂᑦᑎᓐᓂ, ᐅᐸᒃᓯᒪᓚᐅᕐᑐᖅ ᑐᓵᒋᐊᖅᑐᖅᖢᓂ ᐊᒻᒪ ᐅᖃᓪᓚᖃᑎᖃᑲᑕᒃᖢᓂ ᐃᓚᐅᔪᓂᒃ.

“ᐊᑎᓕᐅᖅᑎᐅᓚᐅᕐᓯᒪᔪᓂᒃ ᐅᖃᓪᓚᒃᑐᓂ ᑐᓴᕈᓐᓇᓚᐅᕋᑦᑕ, ᖃᓄᐃᓕᐅᕈᑎᕕᓂᖏᓐᓂᒃ, ᐊᒃᓱᕈᕈᑎᕕᓂᖏᓐᓂᒃ, ᐱᓇᓱᒍᑎᒋᒻᒪᕆᒃᑕᖏᓐᓂᒃ,” ᐹᓴᓐᔅ ᐅᖃᕐᑐᖅ.

“ᐃᓅᓱᒃᑐᑦ ᖃᐅᔨᓚᐅᕐᑐᑦ ᐊᓯᐊᒎᕈᑎᖃᓗᐊᓚᐅᕐᓯᒪᙱᓐᓂᖏᓐᓂᒃ ᐊᑎᓕᐅᖅᑎᐅᓂᑯᕕᓃᑦ.”

ᐹᓴᓐᔅ ᐅᖃᓚᐅᕐᑐᖅ ᑕᑯᔪᒪᓂᕋᖅᖢᓂ ᓄᓇᕕᒃᒥ ᐊᖏᖃᑎᒌᒍᑎᙳᐊᓕᕆᔪᓂ ᐊᕐᕌᒍ ᒪᕐᕉᒃ ᐊᓂᒍᕌᖓ ᐃᑲᔪᕈᑎᐅᓂᐊᕐᓗᓂ ᐃᓅᓱᒃᑐᓂᒃ ᓇᖕᒥᓂᖅ ᒐᕙᒪᓕᕆᓂᕐᒥᒃ, ᐱᓇᓱᒍᓐᓇᕐᓂᕐᒥᒃ, ᓯᕗᓕᐅᕐᑎᐅᔪᓐᓇᕐᓂᕐᒥᒃ ᐊᒻᒪᓗ ᓄᓇᕕᒃᒥ ᖃᓄᐃᑉᐸᓪᓕᐊᓂᖏᓐᓂᒃ.

ᐅᑯᓇᙵᑦ 40-ᓂ ᐃᓚᐅᔪᓂᒃ 20 ᑐᖏᑦᑎᐊᖓᓂ ᓄᓇᕕᒃ ᓯᕗᓂᒃᓴᕗᑦᒥᙶᓚᐅᕐᑐᑦ. ᒪᓐᑐᕆᐊᒥᙶᖅᖢᑎᒃ ᑕᒪᐅᖓ ᐃᓚᐅᔭᖅᑐᖅᓯᒪᓪᓗᑎᒃ.

ᐊᖏᖃᑎᒌᒍᑎᓕᕆᓂᕐᒥ ᐊᑐᖅᑕᐅᔪᕕᓂᕐᓂ ᐃᓚᐅᔪᑦ ᐊᔪᕈᓐᓃᖅᓴᓚᐅᕐᑐᑦ ᐃᓄᒋᐊᑦ ᐅᖃᓪᓚᒍᓐᓇᕐᓯᓂᕐᒥᒃ ᐊᒻᒪᓗ ᐋᔩᖃᑎᒌᖕᓂᕐᒥ ᐅᕙᓂ ᓄᓇᕕᒃᒥ ᐊᖏᖃᑎᒌᒍᑎᓕᕆᓂᕐᒥ ᐊᑐᖅᑐᕕᓂᕐᓂ ᐃᓄᒃᔪᐊᖅᒥ ᑕᖅᑭᐅᓚᐅᖅᑐᒥᓐ. (ᐊᔾᔨᙳᐊᖅ ᐅᑯᓇᙵᑦ ᖃᕐᔪᐃᑦ ᐃᓅᓱᒃᑐᑦ ᑲᑎᒪᔨᖏᓐᓂᒃ)

ᐹᓴᓐᔅ ᐅᖃᓚᐅᕐᑐᖅ ᐊᔪᕐᓇᕐᓂᕋᓚᐅᖅᖢᓂᐅᒃ ᐅᓄᒃᑲᓐᓂᖅᑐᓂᒃ ᐃᓄᒃᔪᐊᖅᒧᐊᖅᑎᑦᑎᔭᕆᐊᒃᓴᖅ. ᐃᓱᒪᔪᕐᓕ ᐅᓄᕐᓂᕐᓴᐃ ᐃᓚᐅᔪᓐᓇᓚᐅᕐᓂᖏᓐᓂᒃ, ᐅᖃᖅᖢᓂ ᐃᓅᓱᒃᑐᑦ ᐅᓄᙱᓗᐊᕐᓂᖏᓐᓂᒃ ᒪᓕᒐᓕᕆᓂᕐᒧᑦ ᓂᕈᐊᖅᑕᐅᔪᒪᓇᔭᖅᑐᓂᒃ ᑕᒫᓂ.

“ᐃᓅᓱᒃᑐᕗᑦ ᐃᓚᐅᔪᒪᓗᐊᙱᒻᒪᑕ ᖃᓄᐃᓕᐅᑲᑕᒃᑐᓂᒃ,” ᐅᖃᕐᑐᖅ. “ᖃᐅᔨᔪᒪᒐᓗᐊᖅᑐᖓ ᖃᓄᐃᒻᒪ ᐃᓅᓱᒃᑐᑦ ᐊᔪᕈᓐᓃᖅᓴᖅᑐᓂᒃ ᐃᓚᐅᙱᓗᐊᕐᓂᖏᓐᓂᒃ.”

ᐅᖃᒃᑲᓐᓂᖅᖢᓂ, “ᐊᕐᕌᒍᑕᒫᓐ ᐃᓚᐅᕙᒃᑐᑦ ᐅᓄᕈᓐᓃᖅᐸᓪᓕᐊᑐᐃᓐᓇᕐᒪᑕ,” ᐃᓚᖏᑦ ᓱᓕ ᐃᓚᐅᕙᒃᑲᓗᐊᖅᖢᑎᒃ.

“ᐃᓱᒪᔪᓂ ᐅᓄᕐᓂᕐᓴᓂ ᐃᓅᓱᒃᑐᓂ ᐃᓚᐅᔪᖃᖃᑦᑕᖅᐸᑦ ᓯᕗᓂᒃᓴᑦᑎᓐᓄᑦ — ᓱᕈᓯᑦᑕ ᓯᕗᓂᒃᓴᖏᑦ,” ᐅᖃᕐᑐᖅ.