ᕼᐋᔨ ᑐᓗᒐᖅ ᑐᑭᓯᑎᑦᓯᔪᖅ ᓇᓗᓀᕐᓯᓯᐊᕐᓱᓂ ᐱᕙᓪᓕᐊᓂᕆᓯᒪᔭᖓᓂ ᐳᕕᕐᓂᑑᑉ ᐱᓂᐊᕐᓂᓕᕆᓂᕐᑎᒍᑦ ᐃᓚᐅᖕᖏᓂᖓᓂᒃ

For an English version of this article, please see Nunavik’s ‘political dissidents’ remain opposed to JBNQA.

ᐳᕕᕐᓂᑐᖅ ᓄᓇᕕᒻᒥ ᓄᓇᓕᑑᕗᖅ ᐊᑎᓕᐅᖃᑕᐅᓯᒪᒐᓂ ᔦᒥᔅ ᐯ ᐊᒻᒪᓗ ᑯᐯᒃ ᑕᕐᕋᖓᓄᑦ ᐊᖏᖃᑎᒌᒍᑎᒥᒃ ᑖᓐᓇᓗ ᐃᓱᒪᒋᔭᐅᑦᓱᓂ ᑳᓇᑕᒥ ᓯᕗᓪᓕᐸᐅᓯᒪᒋᐊᖓ ᖃᒻᒥᓂᑕᐅᑦᓱᓂ ᑕᐅᕐᓰᓂᕐᒧᑦ ᐊᖏᐅᑎᒍᑎᐅᒋᐊᖓ. ᐊᒻᒪᓗ ᐱᓂᐊᕐᓂᓕᕆᔩᑦ ᓈᒻᒪᓴᑦᓯᒪᖕᖏᑐᑦ ᐃᓅᖏᓐᓈᓱᑎᒃ, ᓯᕗᕌᓃᑦᑎᐅᖏᓐᓈᓱᑎᓗ ᓄᓇᓖᑦ ᐃᓱᒪᒋᔭᖏᓐᓂᒃ ᑐᓴᕐᑕᐅᑎᑦᓯᓃᑦ, 50 ᐊᕐᕌᒍᐃᑦ ᐊᖏᖃᑎᒌᒍᑎᒃ ᐊᑎᓕᐅᕐᕕᐅᓚᐅᕐᑐᕕᓂᐅᑎᓗᒍ ᐊᓂᒍᕐᓯᒪᓕᕐᑎᓗᒋᑦ.

ᐳᕕᕐᓂᑐᕐᒥᐅᖅ ᐃᓄᒻᒪᕆᒃ ᕼᐋᔨ ᑐᓗᒐᖅ ᑌᒪᖕᖓᓂᑦ ᓂᐱᒋᔭᐅᓯᒪᔪ, ᑭᒡᒐᑐᕐᓂᖃᕐᓱᓂ ᐃᓱᒪᒋᔭᐅᑦᓱᑎᒃ ᐅᖃᐅᓯᕆᔭᐅᔪᓂᒃ ᐱᕙᓪᓕᑎᑦᓯᐅᑎᒋᒋᐊᕐᑕᖏᓐᓂᒃ ᐃᓄᐃᑦ ᑐᖓᕕᖓᑦ ᓄᓇᒥᓃᒃᑯᓄᑦ, ᑖᒃᑯᐊ ᐃᓚᒌᑦ ᐱᓂᐊᕐᓂᓕᕆᔩᑦ ᐊᑎᓕᐅᕈᒪᓯᒪᖕᖏᑐᑦ ᐊᖏᖃᑎᒌᒍᑎᒥᒃ.

ᑲᒪᔨᒻᒪᕆᐅᓯᒪᔪᖅ, ᕼᐋᔨ ᑐᓗᒐᖅ, ᓂᑯᕐᕋᔪᖅ ᐳᕕᕐᓂᑑᑉ ᑯᐊᐸᒃᑯᖏᑦᑕ ᑲᑕᖓᓂ. (ᐊᑦᔨᓕᐅᕐᑐᕕᓂᖅ ᓯᑐᕆᒃ ᑲᓚᓐ)

ITN-ᑯᑦ ᓈᒻᒪᓴᖕᖏᓂᖏᑦ ᑌᒣᓚᕿᐅᑎᐅᓯᒪᔪᑦ ᒪᓕᒐᖅ 2.1-ᖏᓐᓃᑐᓄᑦ ᑕᐅᕐᓰᓂᕐᒧᑦ ᐊᖏᐅᑎᒍᑎᐅᑉ, ᐃᒣᓕᒻᒪᑕ ᐃᓄᐃᑦ ᑯᐯᒻᒥᐅᑦ “ᓴᒃᑯᓯᑎᓗᒋᑦ, ᑎᒍᒥᐊᕈᓐᓀᓯᑎᓗᒋᑦ, ᐃᐸᕃᓐᓀᑎᓗᒋᑦ” ᓄᓇᖃᕐᖄᓯᒪᓂᕐᒥᓄᑦ ᐱᒋᓂᕋᕐᑕᒥᓂᒃ, ᐱᔪᓐᓇᐅᑎᒥᓂᒃ, ᐊᒻᒪᓗ ᓄᓇᒥ ᑲᒪᕕᖃᕈᒪᓂᕐᒥᓂᒃ.

“ᑕᒪᓐᓇ ᓂᕐᐱᑕᖓ ᐊᖏᖃᑎᒌᒍᑎᐅᑉ.” ᓚᓚᐅᔫᖅ ᑐᓗᒐᖅ, ᐳᕕᕐᓂᑐᒥ ᐊᓇᕐᕋᒥᓃᑦᓱᓂ, ᓯᑦᔭᐅᑉ ᓴᓂᐊᓃᑦᑐᒥ ᐱᐅᔪᒻᒪᕆᒻᒥᒃ ᐃᒐᓛᒃᑯᑦ ᑕᓯᐅᔭᒥᒃ ᓵᖕᖓᓯᔪᒥᒃ. “ᐊᓯᖏᑦ ᓱᓇᑐᐃᓐᓀᑦ ᑭᖑᓂᖓᒍ [ᒪᓕᒐᕐᑕᖏᑦᑕ] ᑐᑭᖃᖕᖏᑐᑦ, ᐁᑦᑑᓯᐊᕌᐱᑐᐃᓐᓀᑦ ᓂᐳᕐᑎᐅᑏᑦ, ᐊᒻᒪᓗ ᐅᖃᐅᓯᕐᑕᖏᑦ ᐊᖓᔪᕐᖃᐅᓵᕈᑎᐅᑦᓱᑎᒃ.”

ᑐᓗᒐᖅ ᐊᐅᓚᔨᔪᖅ ᐱᓇᓱᐊᕐᑎᓗᒋᑦ ᑯᐯᒃ ᑕᕐᕋᖓᓂ ᐃᓄᐃᑦ ᑲᑐᑦᔨᖃᑎᒌᓐᓂᒧᑦ ᐃᓚᐅᔪᑦ, ᑖᒃᑯᐊᓗ ᐊᑎᓕᐅᕐᕕᖃᕐᓱᑎᒃ ᑕᐅᕐᓰᓂᕐᒧᑦ ᐊᖏᐅᑎᒍᑎᒥᒃ, ᐅᓚᐱᑦᓯᓯᑦᓱᑎᒃ ᐱᓇᓱᐊᕐᑕᖏᓐᓂᒃ ᑯᐊᐸᓂᒃ ᓄᐃᑎᕆᔪᐃᑦ ᑲᔪᓯᑎᑦᓯᓴᐅᑎᒋᒋᐊᕐᓯᒪᑦᓱᑎᓪᓗ ᓇᒻᒥᓂ-ᑲᕙᒪᖃᕐᓂᒥᒃ ᓄᓇᕕᒻᒥ 10-ᑲᓵᑦ ᐊᕐᕌᒍᐃᑦ ᐊᓂᒍᕐᓯᒪᓕᕐᑎᓗᒋᑦ ᑌᒣᓚᐅᕐᓯᒪᑎᓗᒋᑦ.

ᓯᕗᓪᓕᐹᑦ ᑯᐊᐯᑦ ᓄᐃᑕᐅᓯᒪᔪᑦ 1959-ᒥ. Fédération des Coopératives du Nouveau-Québec. ᐃᓚᒌᓴᖅ-ᓚᔭᐅᓲᒍᓕᕐᑐᖅ, ᓇᓗᓀᕐᑕᐅᒍᑎᑖᕐᑐᕕᓂᖅ 1967-ᒥ, ᐱᖓᓲᔪᕐᑑᑎᓪᓗᒋᑦ ᐅᒃᑯᐃᖔᕐᑐᑦ ᑯᐊᐯᑦ ᓄᓇᓕᓐᓂ ᐅᑯᓇᓂ ᑲᖏᕐᓱᐊᓗᑦᔪᐊᖅ, ᑰᑦᔪᐊᖅ, ᑲᖏᕐᓱᒃ, ᐳᕕᕐᓂᑐᖅ, ᐊᒻᒪᓗ ᒪᕐᕉᒃ ᑰᑦᔪᐊᕌᐱᒻᒥ.

ᐃᓚᒌᓴᒃᑯᑦ ᓯᕗᓪᓕᐹᒥ ᑲᑎᒪᓂᖃᕐᑎᓗᒋᑦ ᓖᕕᒥ, ᐅᖃᐅᓯᐅᓚᐅᕐᓯᒪᔪᑦ ᐃᓅᖃᑎᒌᓂᒃ ᑮᓇᐅᑦᔭᕋᓱᐊᕈᑎᑦᓭᑦ ᐱᕙᓪᓕᐊᒍᑎᑦᓴᖃᖕᖏᓂᖏᑦ ᓄᓇᓕᓕᒫᓂ, ᐊᒻᒪᓗ ᐃᓅᒐᓱᐊᕐᓂᒥ ᐅᖁᒣᓪᓘᓂᕐᓴᐅᓱᑎᒃ ᓱᒃᑰᓂᕐᓴᐅᓱᑎᒃ ᐃᓄᐃᑦ ᐆᑦᑑᑎᒋᑦᓱᒋᑦ ᑳᓇᑕᐅᑉ ᓯᕿᓂᖓᓂᒥᐅᓂᓂᑦ. ᑐᕌᒐᕐᑖᓚᐅᕐᓯᒪᔪᑦ ᑌᒣᓕᖓᓂᕐᒥᒃ ᐋᕐᖀᒋᐊᓚᖓᑦᓱᑎᒃ ᑲᑎᑎᓗᒋᑦ ᐃᓘᓐᓇᑎᒃ ᓄᓇᓕᓕᒫᑦ ᑖᑦᓱᒧᖓ ᓯᕗᒧᐊᒋᐊᖃᑎᒌᒍᑎᒧᑦ.

ᑐᖕᖓᕕᐅᓯᒪᔪᑦ “ᐃᓄᐃᑦ ᐱᖏᑦ, ᐃᓄᐃᑦ ᓄᐃᑕᖏᑦ,” ᓚᓚᐅᔫᖅ ᑐᓗᒐᖅ. ᑭᓇᑐᐃᓐᓇᑯᑦ ᐃᓚᐅᒍᓐᓇᑐᑦ ᑯᐊᐸᓂᒃ ᓯᕗᒧᐊᑦᑎᓯᒋᐊᕐᓂᒧᑦ; ᖃᓄᐃᑦᑐᓴᔭᐅᒻᒪᖔᑕ ᐃᑉᐱᒍᓱᓐᓂᖃᓚᐅᕐᓯᒪᖕᖏᑐᖅ. ᓄᓇᓕᒥᐅᒍᒍᕕᑦ, ᐃᓚᐅᔪᖕᖑᕈᓐᓇᑐᑎᑦ ᑯᐊᐸᒧᑦ ᑐᓂᕐᕈᓯᓂᖃᕐᓗᑎᑦ ᓯᕗᓂᑦᓴᒧᑦ.

ᑯᐯᒃ ᑕᕐᕋᖓᓂ ᐃᓄᐃᑦ ᑲᑐᑦᔨᖃᑎᒌᓐᓂᖓ ᓄᐃᒐᒥ, ᑐᓗᒐᖅ ᓚᓚᐅᔫᖅ ᐅᓚᐱᑦᓯᓚᐅᕐᓯᒪᔪᑦ ᓇᒻᒥᓂ-ᑲᕙᒪᖃᕐᓂᒥᒃ ᐱᕙᓪᓕᐊᑎᑦᓯᒋᐊᓯᑦᓱᑎᒃ ᑌᑦᓱᒪᓂ ᑲᔪᓯᑎᑕᐅᒋᐊᕐᓯᒪᒻᒪᑦ, ᐅᖃᐅᓯᖃᕐᓱᑎᒃ ITN-ᑯᓐᓂᒃ ᓯᕗᓕᕐᑎᐅᓯᒪᔪᒥᒃ, ᑖᒧᓯ ᖁᒪᕐᒥᒃ.

ᓄᓇᕕᒻᒥᐅᑦ ᑯᐊᐯᑦ ᐱᒋᐊᕐᐸᓕᐊᑎᑕᐅᓂᖏᓐᓂᒃ ᐃᑉᐱᒍᓱᖕᖏᓂᕐᓴᐅᓕᓚᐅᕐᓯᒪᔪᑦ ᓴᖑᕕᖃᕐᓂᓴᐅᑦᓱᑎᒃ NQIA-ᒥᒃ. ᑌᑦᓱᒪᓂ, “ᕿᑲᑐᐃᓐᓇᓂᕐᓴᖑᓚᐅᕐᓯᒪᔪᑦ,” ᓚᓚᐅᔫᖅ ᑐᓗᒐᖅ. ᑲᐊᐸᓕᐅᕐᐸᓕᐊᓂᖅ ᐃᖏᕐᕋᓯᓪᓚᕆᒋᐊᓪᓚᓕᓚᐅᕐᓯᒪᒻᒥᔪᖅ 1983-ᒥ

“ᑯᐊᐸᓂᒃ ᐱᒋᐊᕐᑎᓯᓂᖅ ᐊᒻᒪᓗ ᐊᖏᖃᑎᒌᒍᑎᒃ ᐅᓂᒃᑳᕋᑦᓴᖑᕐᓯᒪᔫᒃ ᐹᕐᓯᖓᐅᑎᖃᑎᒌᒍᑕᐅᓯᒪᒐᒥᒃ, ᓲᕐᓗ ᐃᒪᖅ ᐅᕐᓱᓴᔭᕐᓗ ᐅᐊᕈᑎᒌᓕᕐᖃᔭᑦᔭᖏᒻᒪᓃᒃ,” ᓚᓚᐅᔫᖅ, ᓄᐃᓚᕿᑎᓗᒍ ᐱᓂᐊᕐᓂᓕᕆᓂᒃᑯᑦ ᑭᐱᓯᓯᒪᐅᑎᒃ ᓄᓇᕕᒻᒥ.

2018-ᒥ, ᒪᑭᕝᕕᑯᑦ ᐃᓕᑕᕐᓯᓂᕐᑖᓚᕆᓚᐅᕐᓯᒪᔪᑦ ᓄᐃᑕᓂᖓᓂᒃ ᐃᓄᐃᑦ ᑐᖓᕕᖓᑦ ᓄᓇᒥᓂᒥᒃ ᐊᕕᑦᓯᒪᐅᑎᒥᒃ ᐲᕐᓯᒍᑎᖃᕆᐊᕐᓱᑎᒃ.

ᑐᓗᒐᖅ ᓈᒻᒪᓴᖕᖏᑐᖅ ᓄᐃᑕᐅᓚᕿᓯᒪᔪᓂᒃ ᐊᖏᖃᑎᒌᓐᓂᒧᑦ, ᖃᓄᐃᓕᖓᑎᑕᐅᓂᖏᓐᓂᒃ ᐃᓄᐃᑦ ᑭᒡᒐᑐᕐᑕᐅᒍᑎᖏᑦᑕ, ᐆᑦᑑᑎᒋᑦᓱᒋᑦ ᑲᑎᕕᒃ ᓄᓇᓕᓕᒫᑦ ᑲᕙᒪᖓ, ᓄᓇᕕᐅᑉ ᐳᓖᓯᖏᑦ, ᐅᕝᕙᓘᓐᓃᑦ ᑲᑎᕕᒃ ᐃᓕᓴᕐᓂᓕᕆᓂᖅ “ᐃᓕᖓᖕᖏᓂᕋᕐᓱᒋᑦ” ᓄᓇᕕᐅᑉ ᐱᐅᓯᓪᓚᕆᖓᓄᑦ.

“ᖃᓄᐃᖕᖏᓯᐊᕐᓂᓕᕆᓂᕐᓄᑦ ᑭᒡᒐᑐᕈᑏᑦ ᓱᒃᑯᕈᑦᓯᐊᑐᑦ, ᐃᓕᓴᕐᓂᓕᕆᓂᖅ ᐃᓘᓐᓈᒍᑦ ᓱᒃᑯᕈᑦᑐᖅ, ᐳᓖᓯᖃᕐᓂᖅ ᐱᐅᑦᔭᖏᑦᑐᖅ, ᓄᓇᓕᓐᓂᒃ ᐱᓇᓱᐊᕐᓃᑦ ᑭᒡᒐᓕᕋᒍᑏᑦ ᑲᔪᓯᑦᓯᐊᖃᔭᖕᖏᑐᑦ, ᒐᓗᐊᕐᓱᑎᒃ ᑕᐅᕐᓰᓂᕐᒧᑦ ᐊᖏᐅᑎᒍᑎᓄᑦ ᐱᔪᓐᓇᐅᑎᒋᔭᐅᔪᑦ,” ᓚᓚᐅᔫᖅ ᓈᒻᒪᓴᖕᖏᓂᕐᒥᓂᒃ ᑐᓵᔭᐅᑎᑦᓯᓱᓂ.

“ᐃᓘᓐᓈᒍᑦ ᐊᒻᒪᓗ ᑕᑕᒥᓐᓇᓱᑎᐊᓪᓛᑦ ᓱᖕᖏᑑᒍᑎᖏᑦ ᐱᓇᓱᒉᑦ ᐱᐅᓭᒋᐊᖃᕐᓯᒪᔪᑦ ᐃᓅᓯᖏᓐᓂᒃ ᐊᒻᒪᓗ ᐃᓄᖏᓐᓂᒃ ᓄᓇᕕᒻᒥᐅᑦ,” ᓚᒋᐊᓪᓚᓚᐅᔫᖅ.

ᑭᐅᒪᒍᑎᖃᓚᐅᔫᖅ ᓄᓇᕕᒻᒥᐅᑦ ᐊᓯᑦᔩᒍᒪᒍᑎᒃ ᐊᖏᖃᑎᒌᒍᑎᒥᒃ ᐱᐅᓯᒋᐊᕐᓗᒍ ᐊᒻᒪᓗ ᐃᒻᒥᓂᕐᓱᕈᓐᓇᓯᓗᑎᒃ, “ᓱᒐᓛᒐᔭᖕᖏᑐᑦ ᐊᔪᐃᓐᓇᕈᑎᒋᒐᓗᐊᕈᓂᐅᒃ” ᐅᒃᑯᐃᓯᒋᐊᓪᓚᖃᔭᖕᖏᓇᒥᒃ ᑕᐅᕐᓰᓂᕐᒧᑦ ᐊᖏᐅᑎᓂᒥᒃ ᐊᒻᒪᓗ ᐱᓇᓱᐊᕈᑎᒋᒋᐊᑦᓯᐊᕋᓱᐊᓯᓗᒍ.

ᑭᐅᒪᒍᑎᒋᓲᒥᓂᒃ ᑐᑭᓯᓇᕐᑎᓯᒋᐊᕈᑎᖃᓚᐅᔫᖅ ᐊᓪᓚᓂ ᐅᓂᒃᑳᑕᐅᔪᓂᒃ ᔨᐊᑲᒥᒃ ᐊᒻᒪᓗ ᐄᓴᐅᒥᒃ ᓇᓗᓀᕐᓯᒋᐊᕐᓱᓂ ᐃᓱᒪᒋᔭᒥᓂᒃ. ᐄᓴᐅ ᓄᓇᑐᐃᓐᓇᒥ ᐆᒪᔪᕐᓯᐅᑐᕕᓂᐅᑦᓱᓂ ᐊᓇᕐᕋᓚᐅᕐᑐᕕᓂᖅ ᐱᕐᓕᓱᓂ, ᐊᒻᒪᓗ ᔨᐊᑲ ᓂᕐᓯᐅᑎᓗᒍ ᖃᔪᓕᐅᕐᓱᓂ ᐊᓇᕐᕋᓯᒪᑦᓱᓂ.

ᐄᓴᐅ ᖃᔪᕐᑐᕈᒪᔪᕕᓂᖅ, ᑭᓯᐊᓂ ᓚᔭᐅᔪᖅ ᔨᐊᑲᒧᑦ, “ᓂᐅᕐᕈᑎᖃᕐᕕᒋᕐᖄᖓ ᐃᓅᓕᕐᓱᑎᑦ ᓱᓇᑖᕆᓯᒪᔭᕐᓃᕕᑦ ᕿᒻᒪᑯᕝᕕᐅᒍᑎᒋᑦᓱᒍ.” “ᐄᓴᐅ ᒪᓂᔭᐅᒍᑎᒥᓂᒃ ᐊᖏᑐᐃᓐᓇᑐᖅ, ᑌᒣᒐᒥᓗ, “ᐄᓴᐅ ᖀᓕᖕᖑᓚᕆᑦᑐᕕᓂᖅ ᐃᓅᓕᕐᓱᓂ ᕿᒻᒪᑯᑦᑕᐅᓯᒪᐅᑎᒥᓂᒃ.”

“ᐄᓴᐅ ᐃᓱᒪᒋᔭᓕᕕᓂᖅ ᐃᓅᓕᕐᓱᓂ ᕿᒻᒪᑯᑦᑕᐅᓯᒪᐅᑎᒥᑕ ᓱᓇᑦᓴᐅᖏᒋᐊᖓᓂᒃ,” ᓚᓚᐅᔫᖅ ᑐᓗᒐᖅ. “ᑕᒐ ᐊᖏᖃᑎᒌᒍᑎᒃ ᑌᒣᑦᓯᒪᕗᖅ,” ᐅᖃᐅᓯᖃᕆᐊᓪᓚᓱᓂ ᓂᐅᕐᕈᑎᖃᕐᓯᒪᒋᐊᖏᓐᓂᒃ ᐃᓅᓕᕐᓱᑎᒃ ᐱᑖᕆᓯᒪᔭᒥᓂᒃ $90 ᒥᓕᐊᕌᕐᑎᓗᒋᑦ. “[ᓄᓇᕕᒻᒥᐅᑦ] ᐊᖓᔪᕐᖃᐅᕕᖃᕈᓐᓀᑐᑦ ᓄᓇᒥᑕ ᐱᑦᓴᖁᑎᖏᓐᓂᒃ.”

ᑭᓯᐊᓂ ᐳᕕᕐᓂᑐᒥᐅᑦ ᐊᑎᓕᐅᕐᕕᖃᕐᓯᒪᑦᔭᖏᑦᑐᑦ ᐊᖏᖃᑎᒌᒍᑎᒥᒃ. “ᓴᒃᑯᓯᓯᒪᖕᖏᑐᒍᑦ ᐊᖓᔪᕐᖃᐅᕕᖃᕐᓂᑎᓂᒃ, ᓇᔪᕐᑎᙯᓐᓈᑐᒍᑦ ᐃᓅᓕᕐᓱᑕ ᐱᑖᕆᓯᒪᔭᑦᑎᓂᒃ,” ᓚᒋᐊᓪᓚᓚᐅᔫᖅ ᑐᓗᒐᖅ. “ᑲᕙᒪᒃᑯᑦ ᐱᒻᒪᕆᒻᒥᒃ ᐊᑑᑎᔨᐊᖃᕐᓯᒪᔪᑦ ᐊᕝᕕᐊᓗᑕᕆᓯᑦᓱᒍ ᐊᑎᓕᒻᒥᒃ ITN.”

ᑐᓗᒐᖅ ᓚᓚᐅᔫᖅ ᑕᐅᕐᓰᓂᕐᒧᑦ ᐊᖏᐅᑎᖃᑎᖃᕈᑎᒃ ᓄᐃᑕᑎᑦᓯᓯᐊᕐᑐᖅ ᓱᓇᓪᓚᕆᐅᓂᖏᓐᓂᒃ NQIA ᓂᐅᕐᕈᑎᒋᓯᒪᔭᖏᑦᑕ, ᐊᒻᒪᓗ ᓇᓗᓀᕐᓯᓯᒪᑦᓯᐊᓱᓂ ᓱᓇᓪᓚᕆᐅᓂᖏᓐᓂᒃ ᐳᕕᕐᑐᓃᑦ ᐊᒻᒪᓗ ITN ᓴᒃᑯᓯᒪᖕᖏᑕᖏᓐᓂᒃ ᐱᒌᓐᓈᑕᖏᓐᓂᒃ.

ᐅᑉᐱᕆᔭᓕᒃ ᐳᕕᕐᓂᑐᖅ ᐱᖁᔭᑎᒍᑦ ᓴᒃᑯᓯᓯᒪᑦᔭᖏᒻᒪᑦ ᓄᓇᖃᕐᑳᑐᕕᓂᐅᓂᕐᒥᓄᑦ ᐱᖁᑎᒥᓂᒃ ᓄᓇᒥᒃ, ᓱᓕ ᓄᓇᖁᑎᖃᕆᐊᖓ ᐱᒋᓪᓚᕆᑦᓱᒍ. “ᑕᒪᓐᓇ ᐱᕕᑦᓴᖅ,” ᓚᓚᐅᔫᖅ. ᐊᖏᖃᑎᒌᒍᑎᒥᓂᑕᐅᖕᖏᑐᑦ, “ᓂᑯᕐᕋᕈᑎᒋᒐᒥᐅᒃ ᑌᒣᓕᖓᑎᓗᒍ, ᐊᒻᒪᓗ ᐊᖏᕐᓯᒪᔪᑦ ᐅᖃᐅᓯᕐᑕᖏᓐᓂᒃ ᐊᒻᒪᓗ ᒪᓕᒐᑦᓴᖏᓐᓂᒃ ᑖᒃᑯᓂᖓ ᒪᓕᓪᓗᑎᒃ ᑭᓯᐊᓂᐅᕗᑦ,” ᑭᓯᐊᓂ “ᐊᑦᑐᑕᐅᓯᒪᒐᓛᖕᖏᑐᒍᑦ ᖃᓄᑐᐃᓐᓇᖅ.”

ᑐᓗᒐᖅ ᓚᓚᐅᔫᖅ ITN ᓯᕗᓂᑦᓴᖓ ᑐᕌᒐᑦᓴᓯᐊᓂᒃ ᐱᑕᖃᑦᓯᐊᑐᖅ ᐅᑕᕐᕿᑐᐃᓐᓇᑐᓂᒃ. “ᐃᓕᒃᑰᓗᑕ ᑎᒥᐅᓚᖓᔪᒍᑦ ᐊᖓᔪᕐᖃᐅᕕᖃᕐᓗᑕ ᐊᐅᓚᑦᓯᒍᓐᓇᓗᑕ ᐱᖁᑎᑦᑎᓂᒃ, ᐊᑐᕋᑦᓴᖁᑎᑦᑎᓂᒃ, ᐊᒻᒪᓗ ᐃᓅᓕᕐᓱᑕ ᕿᒻᒪᖁᑎᑖᕆᓯᒪᔭᑦᑎᓂᒃ ᓯᕗᓪᓕᕕᓂᑦᑎᓂᑦ.”

ᑖᑦᓱᒥᖓ ᑲᑐᑦᔨᒍᑎᖃᕐᓂᒥᒃ ᐊᑦᔨᒋᔭᐅᒐᓛᖁᔨᔪᖅ ᑯᐊᐯᑦ ᑲᑐᑦᔨᐅᑎᐅᑦᓱᑎᒃ ᐱᔪᓐᓇᓯᓯᒪᓂᖏᓐᓄᑦ, ᐱᑕᖃᕐᓗᓂ ᐃᓄᐃᑦ ᐱᐅᓯᑐᖃᖏᓐᓂᒃ ᐊᒻᒪᓗ ᒪᓕᒐᑦᓴᔭᖏᓐᓂᒃ, ᖃᐅᔨᒪᓗᑎᓗ ᓯᕗᓪᓕᕕᓂᖏᑦᑕ ᓄᓇᖏᓐᓂᒃ ᐱᖃᕆᐊᒥᒃ.

“ ᓱᓪᓗᑯᑖᑉ ᑖᕐᑑᑉ ᐃᓱᐊᓂ ᐃᑯᒪᐅᔪᒍᑦ,” ᓚᓚᐅᔫᖅ “ᐱᔪᑦᓴᐅᔮᕈᑎᖃᑦᓯᐊᑐᒍᑦ ᒪᓂᔨᒍᒪᓂᑦᑎᓂᒃ ᑖᑦᓱᒥᖓ ᑐᖕᖓᕕᑦᑎᓂᒃ ᐱᑦᔪᑎᒋᓗᒍ ᓄᓇᕕᐅᑉ ᓄᐃᑦᓯᒍᓐᓇᐅᑎᒋᓂᐊᕐᑕᖓᓂ ᐊᐅᓚᑦᓯᓚᖓᓂᕐᒥᓂᒃ ᐱᑦᓴᖁᑎᑦᑎᓂᒃ ᐊᒻᒪᓗ ᐊᐅᓚᑦᓯᔨᐅᓗᑕ ᓯᕗᓪᓕᕕᓂᑦᑎᓂᑦ ᓄᓇᑖᕆᓯᒪᔭᑦᑎᓂᒃ.”

This project has been made possible in part by the Government of Canada.