ᓄᓇᕗᒥᐅᑕᑦ ᐱᐅᕆᔅᒦᑦᑐᑦ: ᑲᑎᖅᑐᒑᐱᒃᒥ ᐱᖃᓐᓇᕇᒃ ᐅᐸᒍᑎᓯᒪᔫᒃ ᐅᓕᒻᐱᒃ ᐱᙳᐊᕕᒡᔪᐊᕐᓇᒧᑦ

For the English version of this story, please see Nunavummiut in Paris: Clyde River residents attend Olympic Games.

ᔭᓯ ᑕᐃᐊᑦᔾ ᑲᖏᖅᑐᒑᐱᒃᒥᐅᑕᖅ ᐱᒃᑯᓕᓪᓕᓂ ᑎᒍᒥᐊᖅᑐᖅ ᓄᓇᕗᑦ ᓴᐃᒻᒪᑎᐊᓂᒃ ᐅᕙᓂ 2024 ᐊᐅᔭᒃᑯᑦ ᐅᓕᒻᐱ ᐱᙳᐊᕕᒡᔪᐊᕐᓇᒥ ᐱᐅᕆᔅ, ᕗᕌᓐᔅᒥ..

“ᐊᒃᓱᐊᓗᒃ ᖁᕕᐊᓱᒃᑲᒪ ᒫᓐᓇ ᐅᐸᒃᓯᒪᔭᓐᓂ,” ᐅᖃᕐᑐᖅ ᑕᐃᐊᑦᔾ, ᑖᓐᓇ 4,000 ᑭᓛᒥᑕ ᐅᖓᑖᓂ ᖃᖓᑕᓚᐅᕐᑐᖅ ᖁᙱᐊᕆᐊᖅᑐᖅᖢᓂ ᓄᓇᕐᔪᐊᒥ ᐱᙳᐊᕕᒡᔪᐊᕐᓇᒥ ᐱᒡᒍᓴᐅᑎᔪᒪᒃ ᐱᒋᐊᓚᐅᕐᑐᒥ ᔪᓚᐃ 26-ᒥ ᐱᐊᓂᒡᓗᑎᒃ ᐋᒐᓯ 11.

ᐱᖃᑎᒋᔭᐅᓚᐅᕐᑐᖅ ᖃᖓᑕᓪᓗᓂ ᐱᐅᕆᔅᒧᑦ ᐆᒧᖓ ᑲᓛᔅ ᕘᒍᓪ, ᐃᓕᓐᓂᐊᕐᕕᒃᒥ ᐊᖓᔪᖅᑳᖅ ᑲᖏᖅᑐᒑᐱᒃᒥ ᐃᑲᔪᖃᑕᐅᔭᖅᑐᖅᖢᓂ ᐃᓚᒌᑦ ᑲᓇᑕᒥ ᐅᕙᓂ ᑲᓇᑕᒥ ᐅᓕᒻᐱᒃ ᐃᒡᓗᐊᓗᒃᒥ, ᐱᒡᒍᓴᐅᑎᔭᖅᑐᖅᑐᑦ ᐊᖏᕐᕋᕆᔭᖓᓂ ᐱᙳᐊᕕᒡᔪᐊᕐᓇᒥ.

ᑕᐃᑯᖓ ᑎᑭᓚᐅᕐᓯᒪᔪᑦ ᒪᑐᐃᖏᓱᖓᖅᑎᓪᓗᒍ ᔪᓚᐃ 24-ᒥ, ᐊᒻᒪᓗ ᐱᐅᕆᔅᒦᓐᓂᐊᖅᖢᑎᒃ ᐋᒐᓯ 19 ᑎᑭᓪᓗᒍ.

ᑕᐃᐊᑦᔾ, ᐃᓕᓐᓂᐊᖅᑎ ᓯᓚᑦᑐᖅᓴᕐᕕᐊᓗᒃᒥ ᑳᒍᕆᒥ, ᐅᖃᓚᐅᕐᑐᖅ ᑖᓐᓇ ᐊᒻᒪ ᕘᒍᓪ ᓄᓇᕗᑦ ᓴᐃᒻᒪᑎᖓᓂ ᐋᑐᕚᒧ ᑎᑭᑎᓪᓗᒋ ᐱᓚᐅᕐᓂᕋᖅᖢᑎᒃ ᕗᕌᓐᔅᓕᐊᓕᖅᑎᓪᓗᒋᑦ. ᒥᑭᓐᓂᕐᓴᓂᒡᓕ ᓴᐃᒻᒪᑎᓂ ᐱᖃᑑᒐᓗᐊᑦ ᐊᖏᕐᕋᖏᓐᓂ ᑭᓯᐊᓂᓕ ᐊᖏᓂᕐᓴᒥ ᐱᔪᒪᓚᐅᕐᒪᑕ ᑕᑯᔭᐅᔪᓐᓇᕐᓂᐊᕐᒪᑦ ᐅᓕᒻᐱᒃᔅᓂ.

“ᐃᒪᐃᓚᐅᕐᑐᖓᓕ, ‘ᐅᐸᒍᑎᓂᐊᕋᑦᑕ ᓄᓇᕐᔪᐊᕐᒧᑦ ᖁᙱᐊᕐᕕᐅᓂᐊᖅᑐᒥ, ᓄᓇᕐᔪᐊᓕᒫᖅ ᑕᕝᕙᓃᓐᓂᐊᕐᒪᑕ ᐊᒻᒪᓗ ᓴᐃᒻᒪᑎᕗᑦ ᑭᒃᑯᓕᒫᓄᑦ ᑕᑯᔭᐅᔭᕆᐊᖃᖅᖢᓂ,’ ᐊᒻᒪᓗ ᐱᓱᑲᑕᒃᓯᒪᓪᓗᑕ ᐱᓯᒪᓪᓗᑎᒃ,” ᑕᐃᐊᑦᔾ ᐊᐱᖅᓱᖅᑕᐅᓪᓗᓂ ᐅᖃᓚᐅᕐᑐᖅ.

“ᐅᓇ ᖁᕕᐊᓇᑦᑎᐊᒻᒪᕆᒃᑐᖅ ᑕᑯᓪᓗᒍ ᐃᓕᖅᑯᓯᕆᔭᐅᔪᑦ ᐊᒻᒪ ᓂᕿᖏᑦ ᐊᒻᒪᓗ ᐃᓚᒋᔭᐅᔪᑦ ᖁᕕᐊᓲᑎᖃᑲᑕᒃᖢᑎᒃ ᐃᓚᖏᓐᓂ ᐱᙳᐊᖃᑕᐅᔪᓂᒃ.”

ᐋᒐᓯ 1 ᐅᓪᓗᖓᓂᒃ, ᑲᓇᑕ 9-ᒋᔭᐅᓚᐅᕐᑐᖅ ᓵᓚᒃᓴᐅᓯᐊᖅᑐᓂᒃ 8-ᓂ ᓵᓚᒃᓴᐅᓯᐊᖅᖢᑎᒃ — ᐱᖓᓱ ᒎᓗ, ᒪᕐᕉᒃ ᓯᐊᕗ ᐊᒻᒪ ᐱᖓᓱᑦ ᐳᕌᓐᔾ. ᓴᐃᓇ ᓯᕗᓪᓕᖅᐸᐅᓚᐅᕐᑐᑦ 11-ᓂ ᓵᓚᒃᓴᐅᓯᐊᖅᓯᒪᓪᓗᑎᒃ.

ᑕᐃᐊᑦᔾ ᓄᓇᑦᓯᐊᕐᒥ ᐱᕙᓪᓕᐊᔪᓄᑦ ᐅᖃᓪᓚᖃᑎᖃᓚᐅᕐᑐᖅ ᐅᕙᙵᑦ ᑲᓇᑕ ᐅᓕᒻᐱᒃ ᐃᒡᓗᐊᓗᒃᒥ, ᑲᑎᕝᕕᐅᕙᒃᑐᖅ ᑲᓇᑕᒥᐅᓄᑦ ᐃᓚᒌᓄᑦ, ᐱᖃᓐᓇᕆᔭᐅᔪᓄᑦ ᐊᒻᒪ ᖁᙱᐊᕆᐊᖅᑐᓄᑦ ᑖᒃᑯᓂᖓ ᐃᑲᔪᕆᐊᖅᓯᒪᓪᓗᑎᒃ ᐊᒻᒪ ᖁᕕᐊᓲᑎᖃᕆᐊᖅᓯᒪᓪᓗᑎᒃ ᐱᙳᐊᖅᑎᓂᒃ.

ᑖᔅᓱᒧᖓᓕ, ᐳᐃᔾᔪᕌᑲᑕᒃᑐᑦ ᑕᑯᔪᒪᓪᓚᕆᓚᐅᕐᑕᖏ, ᐊᒻᒪᓗ ᑕᐅᑐᒍᒪᓗᐊᖅᖢᓂᐅᒃ ᑲᓇᑕᒥᐅᑕᖅ ᐳᓕᒻᐱᒃᔅᓂ ᐱᙳᐊᖅᓯᒪᔪᓂ ᐃᓕᓴᕆᔭᐅᔾᔪᑎᑖᕐᓯᒪᓛᖅ, 7-ᓂ ᓵᓚᒃᓴᐅᓯᐊᖅᓯᒪᔪᖅ ᐱᐊᓂ ᐅᓕᓯᐊᒃ, ᐱᒡᒍᓴᐅᑎᖃᑕᐅᑎᓪᓗᒍ ᐊᕐᓇᐃᑦ 4×100 ᒦᑖ ᓱᒃᑲᓴᐅᑎᓂᖅᒥ.

ᐅᓕᓯᐊᒃ ᐃᓚᖏᓪᓗ ᓱᒃᑲᓴᐅᑎᖃᑎᒋᔭᖏ ᑎᓴᒪᒋᔭᐅᓚᐅᕐᑐᑦ ᔪᓚᐃ 27-ᒥ, ᑕᐃᑦᔾ ᐅᖃᓚᐅᕐᑐᖅ “ᑕᑯᕋᓐᓂᒻᒪᕆᓚᐅᕐᑐᖅ” ᖁᙱᐊᖃᑎᖏᓐᓄᓪᓗᑦ.

“ᑕᐅᑐᒍᒪᓪᓚᕆᓚᐅᕋᒃᑐ ᐱᐊᓂ ᐳᐃᔾᔪᕋᖅᑐᖅ ᓲᖃᐃᒻᒪ ᑲᓇᑕᒥ ᐳᐃᔾᔪᕋᕐᕕᒃᒥᐅᑕᖅ,” ᐅᖃᕐᑐᖅ.

“ᑖᓐᓇᓕ ᖁᙱᐊᓚᐅᖅᑕᕋ; ᑕᐅᑐᒃᓯᒪᔭᕋ ᐳᐃᔾᔪᕋᖅᑐᖅ ᐆᒻᒪᑎᒐᓗ ᓈᒻᒪᒃᓴᓕᖅᖢᓂ.”

ᑕᐃᐊᑦᔾ ᓱᓕ ᖁᙱᐊᒐᒃᓴᖃᕈᓘᔭᖅᑐᖅ ᐅᓕᒻᐱᒃᔅᓂ ᐋᖅᑭᒃᑕᐅᓯᒪᔪᓂᒃ.

ᑕᐅᑐᖕᓂᐊᕈᒪᖕᒥᔪᖅ ᖃᔭᖅᑐᓂᒃ, ᓴᕕᐅᔾᔪᐊᖅᑐᓂᒃ, ᐅᑯᒪᐃᑦᑐᓂ ᑭᕕᒃᓯᑲᑕᒃᑐᓂᒃ, ᐃᒪᕐᒥ ᐊᕐᓴᖅᑐᓂᒃ, ᐸᐃᓯᑰᕐᑐᓂᒃ, ᕚᓪᓕᐹᓪᑐᓂᒃ ᐊᒻᒪ ᓇᑎᒃᑯᑦ ᖃᓄᐃᓕᐅᑲᑕᒃᑐᓂᒃ ᐊᒻᒪ ᐅᐸᒍᑎᓂᐊᖅᖢᓂ ᒪᑐᕙᓪᓕᐊᓕᖅᐸᑦ.