ᓄᓇᕗᒻᒥᐅᑦ ‘ᐱᖃᖅᑎᑕᐅᑦᑎᐊᖅᑐᑦ’ ᓴᓗᒪᔪᒥᒃ ᐃᒪᕐᒥ: ᓄᓇᕐᔪᐊᕐᒥ ᑲᑐᔾᔨᖃᑎᒌᓂ ᖃᐅᔨᒪᔨ

ᓄᓇᕗᑦ “ᐱᔪᓐᓇᕐᓂᖃᑦᑕᐊᖅᑐᑦ” ᐅᓗᕆᐊᓇᙱᑦᑐᒥ ᐃᒥᖃᖅᕕᖃᕐᓂᖏᓐᓂᒃ, ᐅᖃᓚᐅᕐᑐᖅ ᓄᓇᕐᔪᐊᕐᒥᑦ ᑲᑐᔾᔨᖃᑎᒌᑦ (UN) ᖃᐅᔨᒪᔨᖓ ᐅᖃᐅᓯᖃᖅᖢᓂ ᓴᓗᒪᓇᓱᒋᐊᖃᕐᓂᕐᒥᒃ ᐊᒻᒪ ᐃᒥᒐᒃᓴᒥ ᐃᒪᕐᒥ.

ᐱᑐᕈ ᐊᕈᔪ-ᐊᒍᑐ, ᓄᓇᕐᔪᐊᕐᒥ ᑲᑐᔾᔨᖃᑎᒌᑦ ᐅᓂᒃᑳᓕᐊᖅᑎᖓ ᑭᒃᑯᑐᐃᓐᓇᐃᑦ ᐱᔪᓐᓇᐅᑎᖏᓐᓄᑦ ᒪᐅᖓ ᐅᓗᕆᐊᓇᙱᑦᑐᓂᒃ ᐃᒥᖃᖅᕕᖕᓄᑦ ᐊᒻᒪ ᓴᓗᒪᔭᕆᐊᖃᕐᓂᖅᒧᑦ, ᐅᖃᓪᓚᓚᐅᖅᑐᖅ ᑐᓴᒐᒃᓴᓕᐅᖅᑎᓄᑦ ᐋᑐᕚᒥ ᐊᐃᕆᓕ 19-ᖑᑎᓪᓗᒍ ᐱᓇᓱᐊᕈᓯᑲᓵᖕᓂ ᒪᕐᕉᖕᓂ ᑲᓇᑕᒦᓚᐅᖅᖢᓂ — ᐃᓚᒋᓪᓗᓂᐅᒃ ᓄᓇᕗᒥᑦ — ᖃᐃᖁᔭᐅᓯᒪᓪᓗᓂ ᒐᕙᒪᑐᖃᒃᑯᓐᓂ.

ᐳᓚᕋᖅᖢᓂ ᐃᖃᓗᐃᑦ ᐃᓚᒋᓚᐅᖅᑕᖓ ᐊᒻᒪᓗ ᑲᑎᖃᑎᖃᖅᖢᓂ ᓄᓇᕗᒥᑦ ᒐᕙᒪᒃᑯᓐᓄᑦ ᐱᓕᕆᔨᒻᒪᕆᖕᓂ, ᐃᓐᓇᑐᖃᕐᓂᖅ ᐊᒻᒪᓗ ᓄᓇᕗᒥᑦ ᐃᒪᓕᕆᔨᒃᑯᑦ ᑲᑎᒪᔨᖏᓐᓄᑦ ᑭᒡᒐᖅᑐᐃᔨᓂᒃ, ᕼᐋᒻᒪᓚᒃᑯᓐᓂ, ᓄᓇᕗᒥᑦ ᐱᖓᓱᓂ ᐊᕕᒃᑐᖅᓯᒪᓂᒃᑯᑦ ᑲᑐᔾᔨᖃᑎᒌᓂ ᐊᒻᒪᓗ ᓄᓇᕗᑦ ᑐᙵᕕᒃᑯᓐᓂ.

ᐊᕈᔪ-ᐊᒍᑐ ᐅᖃᓚᐅᕐᑐᖅ ᑲᒪᓚᐅᕐᓂᖓᓂᒃ ᖃᐅᔨᒐᒥ ᐊᒥᓱᑦ ᐃᓄᐃᑦ ᐅᑭᐅᕐᑕᖅᑐᕐᒥ ᐃᒪᖃᖃᑕᕐᓂᖏᓐᓂ ᓄᓇᖏᓐᓂᙶᖅᑐᓂᒃ ᑰᖕᓂ ᐊᒻᒪ ᑕᓯᕐᓂ.

“ᐅᓇ ᐅᕙᓐᓄᑦ ᑐᑭᖃᑦᑎᐊᖅᑐᖅ ᓲᖃᐃᒻᒪ ᐅᖃᐅᓯᖃᕋᑦᑕ ᓄᓇᒋᔭᐅᔪᒥᒃ, ᖃᐅᔨᒪᓇᖅᖢᓂ, ᓱᕈᔾᔪᑎᖃᙱᑦᑐᒦᒻᒪᑕ,“ ᐅᖃᕐᑐᖅ.

ᐊᕈᔪ-ᐊᒍᑐ, ᑲᓇᑕᐅᑉ ᐅᑭᐅᕐᑕᖅᑐᖓᓄᐊᓚᐅᕐᓯᒪᙱᑦᑐᖅ, ᐅᖃᐅᓯᖃᓚᐅᖅᑐᖅ ᑕᒪᑐᒥᖓ “ᐱᐅᓪᓚᕆᒃᑐᐊᓘᓂᕋᖅᖢᓂᐅᒃ.”

ᖃᐅᔨᒪᓂᕋᕋᓗᐊᖅᖢᓂ ᓈᒻᒪᒋᓕᐅᕈᑎᑕᖃᕐᓂᖓᓂᒃ, ᐅᖃᓚᐅᕐᒥᔪᖅ ᓄᓇᕗᑦ ᐃᒪᖓᓂ “ᐱᖃᖅᑎᑕᐅᑦᑎᐊᓂᖏᓐᓂ.”

ᐳᓚᕋᖅᑎᓪᓗᒍ ᐳᓛᓚᐅᕐᒥᔪᖅ ᓄᓇᖃᖅᑳᖅᑐᑦ ᓄᓇᖏᓐᓄᑦ ᐊᒻᒪ ᐊᓯᖏᓐᓂ ᐋᓐᑎᐅᕆᐅᒥᓄ, ᐳᕆᑎᔅ ᑲᓚᒻᐱᐊᒧᑦ  ᐊᒻᒪ  ᐋᐴᑕᒧᑦ.

ᓯᕗᓪᓕᖅᐹᖓᓂ ᐊᒻᒪᓗ ᓄᓇᕗᒧᑦ ᑐᕌᖓᓗᐊᖅᑐᓂᒃ ᐃᓱᒪᓕᐊᖏᓐᓂ, ᐅᖃᓚᐅᕐᑐᖅ ᒐᕙᒪᑐᖃᒃᑯᑦ ᐃᑲᔫᑎᒃᓴᓂᒃ ᐋᖅᑭᒃᓯᔭᕆᐊᖃᖕᓂᖏᓐᓂᒃ ᓄᓇᕗᒥᑦ ᓯᓚᐅᑉ ᐊᓯᙳᐸᖅᐸᓪᓕᐊᓂᖓᓄᑦ ᑐᕌᖓᔪᓂᒃ ᐊᒻᒪᓗ ᐊᒃᑐᐃᔾᔪᑎᒋᓇᔭᖅᑕᖏ ᐃᓱᒪᒋᔭᐅᖁᓪᓗᓂᒋᑦ.

ᐅᐱᒋᔭᖃᓚᐅᕐᑐᖅ ᖃᖓᑦᑎᐊᓵᖅ ᓄᓇᕗᒧᑦ ᐱᓕᕆᐊᒃᓴᓄᑦ ᐊᖏᕈᑎᒋᔭᐅᓚᐅᖅᑐᒥᓐ.

“ᐅᓇ ᐱᕕᒃᓴᐅᔪᓐᓇᑦᑎᐊᖅᑐᖅ ᓴᕿᑎᑦᑎᓂᕐᒥᒃ ᒐᕙᒪᓕᕆᔾᔪᑎᐅᔪᒥᒃ, ᑕᐃᒪᐃᑦᑐᓐᓇᖅᖢᓂᓗ ᐃᓄᐃᑦ ᐃᓚᐅᑎᑕᐅᓂᐊᕈᑎᒃ, ᐊᒻᒪᓗ ᐃᓕᖅᑯᓯᑐᖃᐃᑦ ᖃᐅᔨᒪᔭᐅᔪᓪᓗ ᓄᓇᒥ ᐊᒻᒪ ᓯᒡᔭᒥᐅᑕᓂ … ᐃᓱᒪᒋᔭᐅᔭᕆᐊᖃᖅᖢᑎᒃ.”

ᓄᓇᕗᒥᑦ ᐅᓇ ᐱᓕᕆᕝᕕᒃᓴᖃᙱᓗᐊᕐᓂ ᐃᒡᓗᓂ ᐃᓱᒫᓘᑎᒋᔭᐅᓚᐅᕐᒥᔪᖅ, ᐃᓚᖃᖅᖢᓂ ᑭᓱᓕᐅᕐᕕᒃᓴᓂ ᐱᓕᕆᕝᕕᖕᓂᒃ ᐊᒻᒪ ᐊᓯᐊᓄᐊᖅᑕᐅᑎᑦᑎᔾᔪᑎᐅᔪᓐᓇᕋᔭᖅᑐᓂᒃ.

“ᐊᒻᒪᓗ ᐃᑲᔫᑎᖃᕆᐊᖃᕋᔭᒻᒪᕆᒃᖢᑎᒃ ᐃᒪᕐᒥ ᐊᐅᓚᑦᑎᔾᔪᑎᒃᓴᓄᑦ ᐊᒻᒪ ᓴᓗᒪᑎᑦᑎᓇᓱᖕᓂᕐᒧᑦ ᓯᓚ ᖃᓄᐃᕈᓘᔭᓕᖅᐸᒃᑎᓪᓗᒍ,” ᐊᕈᔪ-ᐊᒍᑐ ᐅᖃᕐᑐᖅ.

ᐃᓄᐃᑦ ᐃᓕᖅᑯᓯᖃᕐᒪᑕ ᓯᓚᐅᑉ ᖃᓄᐃᑉᐸᓪᓕᐊᓂᖓᓂ ᐱᓕᕆᔾᔪᑎᖃᕈᓐᓇᖅᐸᒃᖢᑎᒃ ᓄᓇᕗᒥᑦ, ᑭᓯᐊᓂᓕ ᐅᓇ ᓯᓚᐅᑉ ᐊᓯᙳᖅᐸᓪᓕᐊᓂᖓ ᓄᑖᙳᖕᒪᓐ ᐊᒻᒪᓗ ᐊᓯᐊᒍᑦ ᐱᓕᕆᐊᖃᕆᐊᖃᓕᓐᓇᖅᖢᓂ, ᐅᖃᕐᑐᖅ.

ᐃᓱᒫᓗᖕᓇᖅᑐᑦ ᒪᑯᐊ ᐃᒪᖅ ᖁᕝᕙᖅᐸᓪᓕᐊᓂᖓ, ᓯᑯᑐᖃᐃᑦ ᓄᓇᐅᑉ ᐊᑖᓂ ᐊᐅᒃᐸᓪᓕᐊᓂᖏᑦ ᐊᒻᒪᓗ ᐃᒪᕆᔭᐅᔪᑦ ᑕᕆᐅᕐᓱᓐᓂᖅᐸᓪᓕᐊᓂᖏᑦ ᓄᑖᖑᖕᒪᑕ.

ᐃᖃᓗᖕᓂ ᐃᒪᖃᕐᕕᒃ ᑕᑯᔭᖅᑐᓚᐅᕐᒥᔭᖓ, ᐊᒻᒪᓗ ᐅᕐᓱᐊᓗᖃᐅᑎᐅᑉ ᑰᒐᕐᕕᕕᓂᖓ ᐃᒪᕐᒧᙵᐅᔪᕕᓂᖅ ᑖᓐᓇ ᓈᒻᒪᙱᓕᐅᕈᑎᐅᓯᒪᓂᑰᓂᖓᓄᑦ 2021-ᒥ, ᐊᒻᒪᓗ ᓄᓇᓖᑦ ᓱᓕ ᑕᒪᑐᒥᖓ ᑲᒪᒋᔭᖃᕆᐊᖃᖅᖢᑎᒃ ᐱᐅᓯᕚᓪᓕᕐᓯᒪᓕᖅᑎᑦᑎᓇᓱᒃᖢᑎᒃ ᐃᒪᕐᒧᑦ ᐊᖅᑯᑎᖏᓐᓂ ᒫᓐᓇᒧᑦ.

ᐅᖃᓚᐅᕐᑐᖅ ᐱᓕᕆᔨᓄᑦ ᐅᖃᐅᔾᔭᐅᓚᐅᕐᓂᖓᓂ ᑕᒪᒃᑯᐊ ᓈᒻᒪᙱᓕᐅᕈᑎᑦ ᐊᐅᓚᑕᐅᓂᖏᓐᓂᒃ ᐊᒻᒪᓗ ᐃᓱᒫᓘᑎᐅᓗᐊᕐᓂᖓᓂ ᐃᓄᒋᐊᒃᐸᓪᓕᐊᓂᖓᓄᑦ ᓈᒻᒪᒃᑲᓗᐊᕐᒪᖔᑦ ᓄᓇᓕᐸᐅᔭᓄᑦ.

ᐊᐃᕆᓕ 2022-ᒥ, ᒐᕙᒪᑐᖃᒃᑯᑦ ᑐᓂᓯᓂᐊᕐᓂᕋᓚᐅᕐᓯᒪᔪᒃ $214 ᒥᓕᐊᓐ ᑖᓚᓂ ᐱᐅᓯᕚᓪᓕᕈᑎᒃᓴᒥᒃ ᐃᖃᓗᐃᑦ ᐃᒪᖃᕐᕕᖓᓂ ᐱᓕᕆᕝᕕᖕᓂ, ᐊᒻᒪ ᐃᓚᖃᖅᖢᓂ ᐃᑲᔫᑎᒃᓴᓂ ᐊᐃᑉᐸᖓᓂ ᐃᒥᖅᑕᖅᕕᐅᖃᑦᑕᖅᑐᒥᑦ ᑕᓯ ᔨᐅᕈᑏᓐᒧᑦ. ᑖᒃᑯᐊ ᓱᓕ ᐊᕐᕌᒍᒐᓴᖕᓂ ᐱᐊᓂᒃᑕᐅᔾᔮᙱᑦᑐᑦ.

ᐊᕈᔪ-ᐊᒍᑐ ᐅᖃᓚᐅᕐᒥᔪᖅ ᑐᓂᔭᐅᓚᐅᕐᓂᕋᖅᖢᓂ ᓄᓇᕗᒥᑦ ᒐᕙᒪᒃᑯᑦ ᐃᒥᖃᕐᕕᒃᒧᑦ ᖃᓄᐃᓕᐅᕈᑎᒃᓴᓄᑦ ᐋᖅᑭᒃᑕᐅᓯᒪᔪᓂᒃ.

ᐅᖃᐅᓯᕆᓚᐅᕐᑕᖓ ᑖᓐᓇ ᐱᓕᕆᔾᔪᑎᓕᕆᔭᕆᐊᖃᒻᒪᕆᖕᓂᕐᒥ ᑭᓯᐊᓂᓕ ᐅᔾᔨᕆᓂᕋᖅᖢᓂ ᐃᓄᖕᓂ ᐅᖃᕐᕕᐅᓯᒪᙱᓗᐊᕐᓂᖓᓂᒃ.

“ᐱᓕᕆᔾᔪᑎᓕᕆᓂᕐᒨᖓᔪᑦ ᐱᒻᒪᕆᐊᓘᒐᓗᐊᑦ ᑭᓯᐊᓂᓕ ᐅᓇ ᐱᒻᒪᕆᐅᓂᕐᓴᖅ ᐊᐱᖅᑯᑎ, ‘ᑭᓱᒥ ᐱᔪᒪᕕᑕ? ᖃᓄᑎᒋ ᐱᓕᕆᓂᖅ ᐊᑐᕐᓂᖃᕋᔭᕐᒪᑦ? ᓄᓇᕗᓪᓕ ᖃᓄᐃᓕᖓᓪᓚᕆᖕᒪ, ᐃᓕᖅᑯᓯᖏᓪᓗ?”

“ᐱᒻᒪᕆᐊᓘᖕᒪ ᓄᓇᕗᒥᑦ ᒐᕙᒪᒃᑯᓐᓄᑦ ᐃᓄᖕᓂ ᐃᓚᐅᑎᑦᑎᖃᑦᑕᕈᑎᒃ ᐱᓕᕆᓂᒃᑯᑦ ᓈᒻᒪᒋᔭᖏᑦᑎᒍᓪᓗ,” ᐊᕈᔪ-ᐊᒍᑐ ᐅᖃᕐᑐᖅ.

ᐱᑕᖃᕆᐊᖃᕐᒪᓐ “ᑲᑎᖃᑎᒌᖕᓂᕐᒥᒃ” ᓄᓇᖃᖅᑐᓂᒃ ᖃᐅᔨᒪᔭᐅᔪᓂᒃ ᐊᒻᒪ ᐃᓕᖅᑯᓯᕆᔭᐅᔪᓂᒃ ᒪᑯᓄᖓ ᓄᑖᖑᓕᖅᑐᓄᑦ ᐱᓕᕆᔾᔪᑎᓄᑦ ᐊᒻᒪ ᐱᓕᕆᔾᔪᓯᕐᓄᑦ, ᐅᖃᕐᑐᖅ.

ᐅᓇ ᐅᓂᒃᑳᓕᐅᖅᑎᒋᔭᐅᔪᖅ ᐅᓂᒃᑳᓕᐊᖏᓐᓂᒃ ᑐᓂᓯᓛᖅᑐᖅ ᓄᓇᕐᔪᐊᕐᒥ ᑲᑐᔾᔨᖃᑎᒌᑦ ᑭᒃᑯᓕᒫᑦ ᐱᔪᓐᓇᐅᑎᖏᓐᓂᒃ ᑲᑎᒪᔨᕐᔪᐊᓄᑦ ᑲᑎᒪᓕᖅᐸᑕ 57-ᒋᓕᖅᑕᖓᓂ ᓯᑎᐱᕆᒥ.