ᓄᓇᕗᑦ 3000 ᐱᒋᐊᒃᑲᓐᓂᖅᐳᖅ $240 ᒥᓕᐊᓐᓂ ᑭᐳᒦᖦᖢᓂ

For English version, see Nunavut 3000 revs up with $24M on the table

ᐊᔭᐅᕆᓂᐅᔪᒥ ᓄᓇᕗᑦ 3000−ᒥ ᐱᓪᓚᕆᙳᕐᓂᖓᓂ ᐱᒋᐊᓚᐅᖅᐳᖅ $240 ᒥᓕᐊᓐᑐᖅᑐᓂ ᓴᓇᓂᕐᒧᑦ 316 ᐃᒡᓗᒃᓴᓂ ᓄᓇᕗᓕᒫᒥ.

ᓄᓇᕗᒻᒥ ᐃᒡᓗᓕᕆᔨᕐᔪᐊᒃᑯᓐᓂ ᐊᒻᒪ NCC ᐱᕙᓪᓕᐊᑎᑦᑎᓂᕐᒧᑦ ᑎᒥᖓᑦ ᐅᖃᐅᓯᖃᓚᐅᖅᐳᑦ ᑕᖅᑭᐅᓚᐅᖅᑐᒥ ᓴᖅᑭᑎᑦᑎᓇᔭᕐᓂᖏᓐᓂ $134.7-ᒥᓕᐊᓐᓂ ᑎᑎᕋᐅᔭᕐᓂᐅᔪᒥ-ᓴᓇᓂᕐᒧᑦ ᐊᖏᕈᑕᐅᔪᒥ NCC−ᑯᓐᓂ ᓇᑉᐸᖅᑎᕆᓂᖏᓐᓂ 166−ᓂ ᐃᒡᓗᒃᓴᓂ 17−ᓂ ᓄᓇᓕᐅᔪᓂ.

ᖄᒃᑲᓐᓂᐊᓂ $105.3-ᒥᓕᐊᓐᓂ ᑳᓐᑐᕌᖑᔪᒥ NCC ᐱᓯᒫᓂᖕᓂᖏᓐᓂ ᓴᓇᓂᕐᒧᑦ 150−ᓂ ᐃᒡᓗᒃᓴᓂ 8−ᓂ ᓄᓇᓕᐅᔪᓂ, ᐃᓚᖃᖅᑐᒥ ᐃᖃᓗᖕᓂ. ᑕᐃᓐᓇ ᑳᓐᑐᕌᖑᔪᖅ ᐅᖃᐅᓯᐅᓚᐅᖅᐳᖅ ᒪᐃ 2023−ᒥ, ᓇᑉᐸᖅᑎᕆᓂᐅᔪᒥ ᓂᕆᐅᒋᔭᐅᓪᓗᓂ ᐱᒋᐊᕐᓂᐊᕐᓂᖓᓂ ᑕᐃᑲᓂ ᐅᑭᐅᒃᓵᖓᓂ.

ᓇᑉᐸᖅᑎᕆᓂᖅ ᐊᓱᐃᓛᒃ ᐱᒋᐊᓚᐅᖅᐳᖅ ᐃᖃᓗᖕᓂ ᐋᒍᔅᑎᒥ, ᐅᖃᓚᐅᖅᐳᖅ ᑭᓕᐊᕆᓐᔅ ᓴᐃᓈᑦ, NCC ᐱᕙᓪᓕᐊᑎᑦᑎᓂᕐᒧᑦ ᐊᖓᔪᖅᑳᖓ ᐊᒻᒪ ᐊᐅᓚᑦᑎᔨᒻᒪᕆᖓ, ᖃᕋᓴᐅᔭᑎᒍᑦ ᑎᑎᕋᕐᓂᐅᔪᒥ ᓄᓇᑦᓯᐊᖅ ᑐᓴᒐᒃᓴᓕᕆᔨᒃᑯᓐᓄᑦ.

ᓇᑉᐸᖅᑎᕆᓂᖅ ᑲᔪᓰᓐᓇᖅᐳᖅ ᐊᒥᐊᒃᑯᔪᓂ 7−ᖑᔪᓂ ᓄᓇᓕᐅᔪᓂ ᐅᖅᓱᖅᑑᒥ, ᑕᓗᕐᔪᐊᖅ, ᐃᖃᓗᒃᑑᑦᑎᐊᖅ, ᑲᖏᖅᖠᓂᖅ, ᐊᕐᕕᐊᑦ, ᖃᒪᓂᑦᑐᐊᖅ ᐊᒻᒪ ᐃᒃᐱᐊᕐᔪᖕᒥ, ᐅᖃᓚᐅᖅᐳᖅ.

“10−ᓂ 12−ᓄᑦ ᑕᖅᑭᐅᔪᓂ ᒫᓐᓇᐅᔪᒥ ᑕᑯᓂᐊᖅᐳᑦ ᐱᔭᕇᖅᓯᓂᐅᔪᓂ ᐅᑯᓇᓂ,” ᓴᐃᓈᑦ ᐅᖃᓚᐅᖅᐳᖅ ᑕᒪᒃᑭᓂ 150−ᖑᔪᓂ ᐃᒡᓗᒃᓴᓂ ᒪᐃ 2023−ᒥ ᐅᖃᐅᓯᒃᓴᓕᐊᖑᔪᒥ.

NCC ᐱᕙᓪᓕᐊᑎᑦᑎᓂᕐᒧᑦ ᓯᕗᓪᓕᖅᐸᐅᔪᓂ ᐃᒡᓗᒃᓴᓄᑦ 3000 ᓴᓇᓂᐅᔪᒥ ᓂᕆᐅᒋᔭᐅᕗᖅ ᐱᔭᕇᖅᓯᒪᓂᐊᕐᓂᖏᓐᓂ ᔪᓚᐃᒥ, ᐅᖃᐅᓯᐅᓪᓗᓂ ᓴᐃᓈᑦᒧᑦ. 18-ᓂ ᑲᑎᙵᓂᐅᔪᓂ ᐊᑭᑐᓗᐊᙱᑦᑐᓂ-ᐃᒡᓗᒃᓴᐅᔪᓂ ᐋᖅᑭᒃᑕᐅᓯᒪᓂᐅᔨᐅᕗᖅ ᐊᑦᑎᖕᓂᖅᓴᒥ ᐃᖃᓗᖕᓂ.

ᐊᕐᕌᓂ ᑳᓐᑐᕌᖓ ᐊᑭᓖᓚᐅᖅᐳᑦ NCC−ᑯᓐᓂ $600 ᐊᑐᓂ ᑭᑉᐹᕆᒃᑐᒥ ᐃᓯᒐᓪᓗᐊᒥ ᐅᑯᓄᖓ ᐃᒡᓗᒃᓴᐅᔪᓄᑦ. ᐊᑭᖓ ᖁᕝᕙᕆᐊᓚᐅᖅᐳᖅ $670 ᐊᑐᓂ ᑭᑉᐹᕆᒃᑐᒥ ᐃᓯᒐᓪᓗᐊᒧᑦ ᑕᖅᑭᐅᓚᐅᖅᑐᒥ ᐅᖃᐅᓯᒃᓴᓕᐊᖓᓐᓂ.

“ᑮᓇᐅᔭᐃᑦ ᐊᑐᖅᑐᒃᓴᐃᑦ ᓱᑲᖓᕗᑦ ᐃᓯᐊᓂ ᑎᑭᐅᑎᔭᒃᓴᐅᕗᑦ,” ᓴᐃᓈᑦ ᐅᖃᓚᐅᖅᐳᖅ ᐱᓕᕆᓂᐅᔪᒥ.

ᓄᓇᕗᒻᒥ ᒐᕙᒪᒃᑯᑦ ᐊᒻᒪ ᓄᓇᕗᒻᒥ ᐃᒡᓗᓕᕆᔨᕐᔪᐊᒃᑯᑦ ᐅᖃᐅᓯᒃᓴᓕᐅᓚᐅᖅᐳᑦ ᓄᓇᕗᑦ 3000−ᒥ 2022−ᒥ. ᐸᕐᓴᐅᑎᐅᕗᖅ ᓴᓇᓂᕐᒥ 3,000−ᓂ ᐃᒡᓗᒃᓴᓂ ᓄᓇᕗᓕᒫᒥ 2030−ᖑᕋᓱᐊᕐᓂᖓᓂ.

ᐱᓕᕆᐊᒃᓴᐅᔪᖅ ᓇᓚᐅᑦᑖᕆᔭᐅᕗᖅ ᐊᑭᖃᕐᓂᐊᕐᓂᖓᓂ $2.6 ᐱᓕᐊᓐᓂ, $900 ᒥᓕᐊᓐᓂ ᓇᖕᒥᓂᖃᖅᑎᐅᔪᓂ ᐱᓕᕆᕝᕕᐅᔪᓂ ᐊᒻᒪ ᐊᒥᐊᒃᑯᖓ ᐃᓄᓕᒫᓂ ᐱᓕᕆᕝᕕᐅᔪᒥ ᐊᒻᒪ ᐃᓄᖕᓂ ᑲᑐᔾᔨᖃᑎᒌᖑᔪᓂ.

NCC ᐱᓕᕆᐊᒃᓴᖃᖅᐳᑦ ᓴᓇᓂᕐᒥ 2,000−ᖑᔪᓂ ᑖᒃᑯᓇᓂ ᐃᒡᓗᒃᓴᓂ.

ᑕᒪᑐᒪᓂ ᐊᕐᕌᒎᔪᒥ ᐊᖏᕈᑎᖓᓂ ᓴᓇᓂᕐᒧᑦ 166−ᓂ ᐃᒡᓗᒃᓴᓂ ᐃᓕᓯᕗᖅ NCC ᐱᕙᓪᓕᐊᑎᑦᑎᓂᕐᒧᑦ ᐱᓕᕆᓂᖏᓐᓂ ᑕᒪᒃᑭᓂ ᓄᓇᕗᒻᒥ 25−ᖑᔪᓄᑦ ᓄᓇᓕᐅᔪᓄᑦ.

ᑕᒪᒃᑭᐅᒪᔪᒥ ᑎᑎᕋᖅᓯᒪᓂᐅᔪᒥ ᐱᓕᕆᐊᒃᓴᐅᔪᓂ ᐃᓚᖃᖅᐳᖅ:

• 18−ᓂ ᐃᒡᓗᒃᓴᓂ ᐃᖃᓗᖕᓂ;
• 20−ᓂ ᐃᒡᓗᒃᓴᓂ ᑲᖏᖅᖠᓂᕐᒥ, ᐊᕐᕕᐊᑦ, ᖃᒪᓂᑦᑐᐊᖅ, ᐃᒃᐱᐊᕐᔪᒃ, ᐅᖅᓱᖅᑑᖅ ᐊᒻᒪ ᑕᓗᕐᔪᐊᓂ;
• 12−ᓂ ᐃᒡᓗᒃᓴᓂ ᐃᖃᓗᒃᑑᑦᑎᐊᕐᒥ;
• 16−ᓂ ᐃᒡᓗᒃᓴᓂ ᐸᖕᓂᖅᑑᒥ;
• 20−ᓂ ᐃᒡᓗᒃᓴᓂ ᐃᒡᓗᓕᖕᒥ ᐊᒻᒪ ᑭᙵᕐᓂ;
• 12−ᓂ ᐃᒡᓗᒃᓴᓂ ᓴᓪᓕᓂᑦ ᐊᒻᒪ ᖁᕐᓗᖅᑐᕐᒥ;
• 6-ᓂ ᐃᒡᓗᒃᓴᓂ ᐊᐅᓱᐃᑦᑐᕐᒥ, ᑭᒻᒥᕈᑦ, ᖃᐅᓱᐃᑦᑐᖅ, ᕿᑭᖅᑕᕐᔪᐊᖅ ᐊᒻᒪ ᑎᑭᕋᕐᔪᐊᕐᒥ;
• 8−ᓂ ᐃᒡᓗᒃᓴᓂ ᐃᒡᓗᓕᒑᕐᔪᖕᒥ, ᑲᖏᖅᖢᒑᐱᒃ, ᑰᒑᕐᔪᒃ, ᓇᐅᔮᑦ, ᒥᑦᑎᒪᑕᓕᒃ, ᓴᓂᕋᔭᒃ ᐊᒻᒪ ᓴᓂᑭᓗᐊᕐᒥ.

ᐃᓕᓐᓂᐊᖅᐸᓪᓕᐊᔪᓂ ᐃᖅᑲᓇᐃᔭᖅᑎᙳᖅᐸᓪᓕᐊᔪᓂ ᓴᓇᔨᐅᔪᓂ ᑲᖏᖅᖠᓂᕐᒥ ᐱᖓᓱᓂ−ᐃᒡᓗᕈᓯᖃᖅᑐᒥ ᐊᖏᕐᕋᐅᔪᒥ ᐃᓘᓕᕆᔨᕐᒧᐊᒃᑯᓐᓄᑦ ᑎᓯᐱᕆᒥ ᐃᓚᒋᔭᐅᓪᓗᓂ ᓯᕗᓪᓕᖅᐹᒥᒃ ᐱᓕᕆᐊᕆᔭᐅᔪᒥᒃ ᑐᓂᓯᔪᒥ ᐃᓄᖕᓂ ᐊᔪᙱᓐᓂᐅᔪᓂ ᐱᔭᕆᐊᓕᖕᓂ ᐃᑲᔪᖅᓱᐃᓂᕐᒧᑦ ᓴᓇᓂᕐᓄᑦ ᐊᒃᓱᕈᕐᓂᐅᔪᓂ.

ᑕᐃᓐᓇ ᐊᖏᕐᕋᐅᔪᖅ ᐅᖃᐅᓯᐅᓚᐅᖅᐳᖅ ᓄᓇᕗᑦ 3000 ᓴᓇᔭᐅᓂᖓᓂ.

ᑳᓐᑐᕌᖑᔪᖅ NCC ᐱᕙᓪᓕᐊᑎᑦᑎᓂᕐᒧᑦ ᐃᓚᖃᖅᐳᖅ ᑐᕌᒐᕆᔭᐅᔪᒥ ᐱᔭᕇᖅᓯᓂᖏᓐᓂ ᐱᓕᕆᐊᒃᓴᖏᓐᓂ 30 ᐳᓴᓐᑎᒥ ᐃᓅᔪᓂ ᐃᖅᑲᓇᐃᔭᖅᑎᖃᕐᓂᖏᓐᓂ.