ᓄᓇᕗᒧᑦ ᓂᕈᐊᒐᒃᓴᐃᑦ ᐃᓱᒪᒋᔭᖏᓐᓂᒃ ᐃᒻᒥᖕᓄᑦ ᐅᖃᐅᓯᖃᖅᑐᑦ ᓂᕿᖃᑦᑎᐊᖅᑎᑦᑎᓂᕐᒥᒃ

For the English version of this story, please see Nunavut candidates share approaches to Nutrition North, better infrastructure.

ᐱᐅᓯᕚᓪᓕᖅᑎᑦᑎᓂᖅ ᐊᑐᐃᓐᓇᖃᖅᑎᑦᑎᓂᕐᒥᒃ ᓂᕿᓂᒃ ᓄᓇᕗᒥᑦ ᓯᕗᓪᓕᐅᑎᑕᐅᓯᒪᔪᖅ ᑕᒪᐃᓐᓄ ᐱᖓᓱᓄᑦ ᓄᓇᕗᒧᑦ ᓂᕈᐊᒐᒃᓴᓄᑦ, ᑭᓯᐊᓂᓕ ᖃᓄᖅ ᑖᓐᓇ ᐱᓕᕆᐊᕆᔭᐅᓇᔭᕐᓂᖓ ᓇᓗᓇᖅᖢᓂ.

ᑕᒪᕐᒥᒃ ᐃᓱᒫᓘᑎᖃᕐᒪᑕ ᐆᒥᖓ ᓂᕿᑦᑎᐊᕙᓕᕆᓂᖅ ᐅᑭᐅᕐᑕᖅᑐᕐᒥ ᑲᓇᑕᒥ ᓂᕿᓄᑦ ᐃᑲᔫᑎᐅᕙᒃᑐᓂᒃ, ᒫᓐᓇᓗ ᑕᒪᓐᓇ ᕿᒥᕐᕈᐊᖅᑕᐅᓪᓗᓂ ᒐᕙᒪᑐᖃᒃᑯᓐᓄᑦ.

“ᖃᐅᔨᒪᔪᐃᓐᓇᐅᒐᑦᑕ ᓂᕿᑦᑎᐊᕙᓕᕆᓂᖅ ᐅᑭᐅᕐᑕᖅᑐᕐᒥ ᐊᑐᙱᒻᒪᑦ,” ᐅᖃᕐᑐᖅ ᓘᕆ ᐃᓪᓚᐅᖅ, ᓂᕈᐊᒐᒃᓴᐅᒃᑲᓐᓂᖅᑐᖅ ᐊᓐᑏᐲᒃᑯᓐᓄᑦ ᐊᐃᕆᓕ 28-ᒥ ᓂᕈᐊᕐᓇᐅᓂᐊᖅᑐᒥᒃ.

“ᐅᓇ ᓂᕿᑦᑎᐊᕙᓕᕆᓂᖅ ᐅᑭᐅᕐᑕᖅᑐᕐᒥ ᐊᑐᖅᑕᐅᑎᑕᐅᔭᕆᐊᖃᕐᒪᑦ ᐃᓄᖕᓂ ᐃᑲᔫᑎᐅᓗᓂ, ᒪᑯᓄᖓᐅᙱᑦᑐᖅ ᑮᓇᐅᔭᓕᐅᕋᓱᖕᓂᕐᒧᑦ ᑲᒻᐸᓂᓄᑦ ᐅᑯᑎᑐᓇᖅ ᓄᐊᑦ ᕕᐊᔅᑦ ᑲᒻᐸᓂᒃᑯᓐᓄᑦ.”

ᐃᓪᓚᐅᖅ ᐅᖃᓚᐅᕐᑐᖅ ᓂᕿᑦᑎᐊᕙᓕᕆᓂᖅ ᐅᑭᐅᕐᑕᖅᑐᕐᒥ ᐊᓯᐊᒍᑦ ᓄᑖᒥ ᐱᓕᕆᔾᔪᓯᐅᔭᕆᐊᖃᓕᕐᑐᖅ ᓄᓇᓕᖕᓂ ᐃᓄᐃᑦ ᓂᕿᖏᓐᓂᒃ ᓂᐅᕕᐊᒃᓴᖃᕈᓐᓇᖅᓯᓗᑎᒃ.

ᑲᓐᓲᕕᑎᕝᑯᓐᓄᑦ ᓂᕈᐊᒐᒃᓴᖅ ᔭᐃᒥᓯ ᑎ. ᐋᕆᐊᒃ ᐅᖃᓚᐅᕐᑐᖅ ᐅᓇ ᑲᔪᓯᓂᐊᕈᓂ ᓂᕿᑦᑎᐊᕙᓕᕆᓂᖅ ᐅᑭᐅᕐᑕᖅᑐᕐᒥ ᕿᒥᕐᕈᐊᖅᑕᐅᓚᐅᖅᑎᓪᓗᒍ ᐊᓯᔾᔨᖅᑕᐅᔭᕆᐊᖃᕐᓂᐊᖅᑐᖅ ᖃᓄᖅ ᑖᓐᓇ ᐱᓕᕆᐊᕆᔭᐅᔾᔪᓯᖓ.

“ᓕᐳᕈᓪᑯᑦ ᒐᕙᒪᖓᑦ ᑲᑕᐃᒻᒪᔾᔪᒃ ᐊᕐᓴᖅ,” ᐅᖃᕐᑐᖅ. “ᒐᕙᒪᒃᑯᑦ ᐊᔭᐅᕈᒪᒐᒃᑭᑦ ᕿᒥᕐᕈᐊᑦᑎᐊᖁᓪᓗᒋᑦ ᓂᕿᑦᑎᐊᕙᓕᕆᓂᖅ ᐅᑭᐅᕐᑕᖅᑐᕐᒥ.”

ᓕᐳᕈᓪᑯᓐᓄᑦ ᓂᕈᐊᒐᒃᓴᖅ, ᑭᓕᒃᕙᒃ ᑲᑉᓘᓇ, ᐅᖃᓚᐅᕐᑐᖅ ᒫᓐᓇ ᕿᒥᕐᕈᐊᕐᓂᐅᔪᖅ ᓈᒻᒪᒋᓂᕋᖅᖢᓂᐅᒃ ᐱᓕᕆᐊᖑᓂᖓᒍᑦ.

“ᐱᒻᒪᕆᒋᒐᒃᑯᑦ ᖃᐅᔨᒪᑦᑎᐊᖅᑐᓂᒃ ᐅᖃᐅᔾᔭᐅᔪᓐᓇᕐᓗᑕ ᐊᒻᒪᓗ ᓄᓇᓕᖕᓂ ᐱᓕᕆᖃᑎᖃᕐᓂᖅ ᑕᒪᑐᒥᖓ ᐋᖅᑭᒃᓯᔾᔪᑎᐅᔪᓐᓇᖅᑐᓂᒃ,” ᐅᖃᕐᑐᖅ. “ᐊᑯᓂᐅᔾᔮᖅᑰᙱᒻᒪᑦ, ᑭᓯᐊᓂᓕ ᐱᒻᒪᕆᐊᓘᓇᓱᒋᔭᕋ.”

ᒐᕙᒪᑐᖃᒃᑯᑦ ᐱᒋᐊᖅᑎᑦᑎᓚᐅᕐᓯᒪᒻᒪᑕ ᓂᕿᑦᑎᐊᕙᓕᕆᓂᖅᒥᒃ ᐅᑭᐅᕐᑕᖅᑐᕐᒥ 2011-ᖑᑎᓪᓗᒍ ᓂᕿᓂᒃ ᐱᔭᐅᔭᕆᐊᖃᓪᓚᕆᒃᑐᓂᒃ ᐊᑐᐃᓐᓇᐅᑎᑦᑎᓇᓱᒃᖢᑎᒃ ᐊᒻᒪ ᐊᑭᓕᒐᒃᓴᐅᓂᕐᓴᐅᓇᓱᒃᖢᑎᒃ ᐅᑭᐅᕐᑕᖅᑐᕐᒥ. ᑭᓯᐊᓂᓕ ᐊᕐᕌᒍᓂ ᐊᓂᒍᖅᐸᓪᓕᐊᔪᓂᒃ ᐃᓱᒫᓘᑎᖃᑲᑕᓕᕐᒪᑕ ᓂᐅᕕᕐᕖᑦ ᓂᐅᕕᖃᖅᑕᖅᑐᓂᒃ ᐃᑲᔪᖃᑦᑕᕋᓱᒋᔭᐅᙱᖢᑎᒃ ᒪᐅᓇ ᐊᑭᒃᖠᒋᐊᖅᑎᑦᑎᓯᒪᓇᓱᖕᓂᒃᑯᑦ.

ᑲᑉᓘᓇ ᐅᖃᐅᓯᖃᒃᑲᓐᓂᓚᐅᕐᑐᖅ ᐊᓂᒍᐃᑦᑎᐊᖅᓯᒪᓂᖓᓂᒃ ᐊᖑᓇᓱᒃᑎᓄᑦ ᐃᑲᔫᑎᒋᔭᐅᔪᑦ, ᐱᓕᕆᓂᖅ ᐅᕘᓈᖓᓪᓗᓂ ᓂᕿᑦᑎᐊᕙᓕᕆᓂᖅ ᐅᑭᐅᕐᑕᖅᑐᕐᒥ ᐃᑲᔫᑎᐅᓇᓱᒃᖢᓂ ᐊᖑᓇᓱᓂᕐᒧᑦ, ᓂᕿᓕᕆᕙᖕᓂᕐᒧᑦ ᐊᒻᒪ ᓂᕿᖃᖅᑎᑦᑎᓂᕐᒧᑦ.

“ᖁᕕᐊᓱᑦᑎᐊᖅᑐᖓ ᓄᓇᓕᖕᓂ ᑐᓴᖅᑎᑕᐅᑲᑕᖕᓂᕐᓂᑦ ᐅᓇ ᐱᓕᕆᓂᖅ ᐱᒻᒪᕆᐅᓂᖓᓂᒃ ᐊᒻᒪᓗ ᐃᑲᔫᑎᒃᓴᓂ ᐃᑲᔪᖅᑐᐃᒃᑲᓐᓂᕋᔭᖅᖢᖓ,” ᐅᖃᕐᑐᖅ.

ᐃᓪᓚᐅᖅ ᓇᓗᓇᐃᕐᓯᓚᐅᕐᑐᖅ ᐃᓄᐃᑦ ᓂᕿᖏᑦ ᑐᙵᕕᐅᓂᕋᖅᖢᓂᒋᑦ ᓂᕿᖃᑦᑎᐊᖃᑦᑕᕐᓂᕐᒥ ᓄᓇᓕᖕᓂᑦ.

ᐃᑲᔪᖅᑐᐃᓚᐅᕐᑐᖅ ᓄᑖᕐᒥ ᐱᓕᕆᓂᖃᕆᐊᖃᕐᓂᖏᓐᓂᒃ ᐃᒪᓐᓇ ᓄᓇᓕᖕᓂ ᓄᓇᓖᑦ ᖁᐊᖅᓰᕕᖃᖅᑎᑕᐅᓗᑎᒃ ᐊᒻᒪ ᓂᕿᓕᕆᕝᕕᒃᓴᓂᒃ ᐃᑲᔪᕈᑎᐅᓇᔭᖅᑐᓂᒃ ᐃᓂᖃᖅᑎᑦᑎᓂᕐᒧᑦ ᐊᒻᒪ ᑐᓂᐅᖃᐃᖃᑦᑕᕐᓂᕐᒥᒃ ᐃᓄᐃᑦ ᓂᕿᖏᓐᓂᒃ.

“ᐅᓇ ᐋᖅᑭᒃᓱᖅᓯᒪᑦᑎᐊᕆᐊᖃᖅᑐᖅ ᐱᓕᕆᐊᒃᓴᖅ ᐃᓄᐃᑦ ᐃᓕᖅᑯᓯᖏᑦ ᐊᑐᖅᑕᐅᔪᓐᓇᕐᓗᑎᒃ ᑕᒪᐃᓐᓄᑦ ᐃᓄᖕᓄᑦ,” ᐅᖃᕐᑐᖅ. “ᐱᐅᓂᕐᓴᐅᔭᕆᐊᓕᒃ ᐃᓄᐃᑦ ᑕᐅᑐᒃᑕᖓᒍᑦ ᐊᒻᒪ ᐃᓄᐃᑦ ᐱᕙᓪᓕᐊᓕᕈᓐᓇᕐᓂᖏᑦᑎᒍᑦ ᐅᑭᐅᕐᑕᖅᑐᕐᒥ.”

ᐋᕆᐊᒃ ᐅᖃᒃᑲᓐᓂᓚᐅᕐᑐᖅ ᐅᒃᐱᕈᓱᖕᓂᕋᖅᖢᓂ ᐊᖑᓇᓱᒃᑎᑦ ᑖᒃᓰᔭᕈᑎᓂ ᐊᑐᙱᑎᑕᐅᔭᕆᐊᓖᑦ ᐊᑭᓕᐅᑎᒋᕙᒃᑕᖏᑦ ᐃᓅᓇᓱᖕᓂᕐᒧᑦ ᒥᒃᖠᕚᓪᓕᕈᓐᓇᕐᓂᐊᕐᒪᑦ.

“ᐊᖑᓇᓱᒃᑎᑦ ᒪᑯᓄᖓᑦᑕᐅᖅ ᐊᒃᑐᖅᑕᐅᓯᒪᖕᒪᑦ ᑳᐸᓐ ᑖᒃᓰᔭᕈᑎᓄᑦ. ᒑᓴᓖᓐ ᐊᑭᑦᑐᖅᐸᓪᓕᐊᓂᖏᓐᓄᑦ, ᑕᐃᒪᓐᓇᓗ ᐊᖑᓇᓱᒃᑎᓄᑦ ᐊᔪᕐᓇᕐᓂᖅᓴᐅᕙᓪᓕᐊᓪᓗᓂ ᐃᓄᒃᓯᐅᑎᓂ ᓂᕿᖃᖅᑎᑦᑎᑦᑎᐊᕆᐊᒃᓴᖅ,” ᐅᖃᕐᑐᖅ.

ᐱᖓᓱᑦ ᓂᕈᐊᒐᒃᓴᐃᑦ ᐊᖏᖅᑐᐃᓐᓇᐅᓚᐅᕐᑐᑦ ᐱᒻᒪᕆᐅᓛᕆᔭᖃᖅᖢᑎᒃ ᐊᑭᒃᖠᒋᐊᖅᑎᑦᑎᓂᕐᒥᒃ ᐃᓅᓇᓱᖕᓂᕐᒥ ᐅᑭᐅᕐᑕᖅᑐᕐᒥ ᑕᐃᒪᓐᓇᓗ ᐱᖁᑎᖃᖅᑎᑦᑎᓂᕐᓴᐅᔭᕆᐊᖃᖅᖢᑎᒃ.

“ᓈᒻᒪᒃᑐᓂ ᐱᖁᑎᖃᕐᕕᖃᕆᐊᖃᕋᑦᑕ ᐃᑲᔫᑎᐅᔪᓐᓇᖅᑐᓂᒃ ᓂᕿᖃᖅᑎᑦᑎᓂᕐᒥ ᒪᐅᓇ ᖃᖓᑕᓲᓄᑦ ᒥᕝᕕᒃᑎᒍᑦ,” ᐋᕆᐊᒃ ᐅᖃᕐᑐᖅ.

ᐃᓚᖏᑦ ᓄᓇᓖ ᖃᖓᑕᓲᓄᑦ ᒥᕝᕕᖏᑦ ᑕᒃᖠᒋᐊᖅᑕᐅᔭᕆᐊᖃᕐᒪᑕ ᐊᖏᓂᕐᓴᓂᒃ ᖃᖓᑕᓲᑎ ᑎᑭᕝᕕᐅᔪᓐᓇᕐᓂᐊᖅᒪᑕ ᐱᖁᑎᓂ ᐅᓯᔪᓐᓇᕐᓂᕐᓴᓂᒃ, ᐅᖃᕐᑐᖅ ᐃᓪᓚᐅᖅ, ᐅᖃᒃᑲᓐᓂᖅᖢᓂ ᐃᑲᔫᑎᒃᓴᐃᑦ ᐱᖁᑎᒃᓴᓄᑦ “ᐊᖏᓂᖅᐹᖑᔭᕆᐊᓕᒃ” ᓯᕗᓪᓕᐅᑎᔭᕆᐊᓕᖕᓂᒃ.

ᑲᑉᓘᓇ ᐊᖏᖃᑎᖃᓚᐅᕐᑐᖅ ᓂᕈᐊᒐᒃᓴᐅᖃᑎᖏᑦᑕ ᐅᖃᐅᓯᖏᓐᓂᒃ.

“ᐅᓄᕐᓂᖅᓵᓘᒻᒪᑕ ᐊᑭᑐᓂᕐᓴᐅᕙᒃᑐᑦ ᓄᓇᕗᒥᑦ ᐱᖁᑎᖃᑦᑎᐊᖏᓗᐊᕐᓂᑦᑎᓐᓄᑦ,” ᑲᑉᓘᓇ ᐅᖃᕐᑐᖅ.