ᓄᓇᕗᑦ ᓯᕗᓪᓕᖅᐹᒥ ᓄᓇᐃᓐᓇᒃᑯᑦ ᓯᐊᕐᕆᔮᖅᑎᓂ ᐃᓚᐅᑎᑦᑎᕗᑦ ᐅᑭᐅᖅᑕᖅᑐᕐᒥ ᐅᑭᐅᒃᑯᑦ ᐱᙳᐊᕕᒡᔪᐊᕐᓇᒥ

For the English version of this story, please see Nunavut debuts first ski team at Winter Games.

ᓄᓇᕗᑦ ᓄᓇᒃᑯᑦ ᓯᐊᕐᕆᔮᖅᑎᖏᓐᓄᑦ ᐊᔪᕈᓐᓃᖅᓴᖅᑎᑦᑎᔨ ᐱᓄᐊ ᕼᐋᕗᑦ ᐅᖃᐅᓯᖃᖅᑎᓪᓗᒍ ᐱᙳᐊᖃᑎᒌᑦ ᐊᑯᓂᕈᓗᒃ ᐸᕐᓇᓚᐅᕐᓂᖏᓐᓂᒃ ᐅᑭᐅᖅᑕᖅᑐᕐᒥ ᐅᑭᐅᒃᑯᑦ ᐱᙳᐊᕕᒡᔪᐊᕐᓇᒧᑦ, ᓂᐱᖓ ᑕᒪᑐᒥᖓ ᐃᒃᐱᒋᔭᖃᕐᓂᖓᓂ ᖃᐅᔨᓇᓚᐅᕐᑐᖅ.

“ᐊᒃᓱᕈᕐᓇᕈᓘᔭᓚᐅᕐᑐᖅ ᓱᕈᓯᕐᓂ ᓄᓇᒃᑯᑦ ᓯᐊᕐᕆᔭᐅᑎᓂ ᐊᑐᓕᖅᑎᓐᓇᓱᒃᖢᓂ,” ᕼᐋᕗᑦ ᐅᖃᕐᑐᖅ, ᐅᖄᓚᐅᑎᒃᑯᑦ ᐅᕙᙵᑦ ᒫᑦ-ᓱ ᕚᓕ, ᐊᓛᔅᑲᒥ ᑕᕝᕙᓂ ᐱᙳᐊᕕᒡᔪᐊᖅᑎᓪᓗᒋᑦ.

ᐱᙳᐊᕕᒡᔪᐊᖅᑐᑦ ᐱᒋᐊᓚᐅᕐᑐᑦ ᒫᔅᓯ 10-ᒥ ᒫᔅᓯ 16 ᑎᑭᓪᓗᒍ.

ᐊᒃᓱᕈᕐᓇᕈᑎᖃᓗᐊᓚᐅᕐᑐᕐᓕ ᐱᙳᐊᖃᑎᒌᑦ ᐅᑯᐊ ᕼᐋᕗᑦ ᐊᒻᒪ ᐊᔪᕈᓐᓃᖅᓴᖅᑎᑦᑎᔨᐅᖃᑎᖓ ᓵᓇᓐ ᓵᑐᕐ ᐋᖅᑭᒃᓱᐃᕙᓪᓕᐊᓇᓱᓚᐅᕐᒪᑎᒃ ᓄᓇᕗᒥᑦ ᓯᕗᓪᓕᖅᐹᑦᑎᐊᕐᓂ ᓄᓇᒃᑯᑦ ᓯᐊᕆᔮᖅᑎᐅᓂᐊᖅᑐᓂᒃ ᐱᒡᒍᓴᐅᑎᓂᐊᕐᓗᑎᒃ ᐱᙳᐊᕕᒡᔪᐊᖅᓇᒥᑦ.

ᐅᓄᓗᐊᓚᐅᙱᑦᑐᑦ ᑖᒃᑯᐊ, ᑎᓴᒪᓂ ᐱᙳᐊᖅᑎᖃᖅᖢᑎᒃ: ᒌᐳᕆᐊᓪ ᑕᐃᑦ ᒨᓯ, 12; ᑳᓚᒻ ᐊᓄᒐᑯᓗᒃ ᒍᑕᑦ, 11; ᐳᕆᑕᓐ ᓕᕕᖕᓯᑑᓐ ᑎᑕᒻ, 11; ᐊᒻᒪ ᐃᒋᒪᖅ ᕗᐃᓕᐊᒻᓴᓐ ᐹᑐᕆ, 15, ᐊᕐᕌᓂᓕ ᑖᓐᓇ ᓇᔭᒌᒃ ᐱᒡᒍᓴᐅᑎᓚᐅᕐᓯᒪᓪᓗᑎᒃ ᓯᐊᕐᕆᔭᐅᑎᒃᑯᑦ ᓱᒃᑲᓴᐅᑎᔪᓂ.

“ᑎᓴᒪᓂ ᓱᕈᓯᕐᓂ ᐊᔪᕈᓐᓃᖅᓴᖅᑎᑦᑎᒐᑦᑕ ᐊᔪᕈᓐᓃᕐᓴᕈᒪᑦᑎᐊᖅᑐᓂᒃ ᐊᒻᒪᓗ ᓯᕗᓂᑦᑎᓐᓂ ᐱᙳᐊᖃᑎᒌᓛᖅᑐᑦ ᓂᕆᐅᓇᑦᑎᐊᖅᖢᑎᒃ ᓄᓇᕗᒥᑦ,” ᕼᐋᕗᑦ ᐅᖃᕐᑐᖅ.

ᐅᑭᐅᒃᑯᑦ ᐱᙳᐊᕈᑎᓂᒃ ᐱᒋᐊᓚᐅᕐᓯᒪᔪᖅ ᓱᕈᓯᐅᓪᓗᓂ.

“ᐊᔪᕈᑎᖃᓚᐅᕐᓯᒪᒐᒪ ᓱᕈᓯᐅᓪᓗᖓ. ᐋᓐᓂᐊᖃᖅᖢᖓ ᓄᑭᖃᑦᑎᐊᓚᐅᕐᓯᒪᙱᓐᓇᒪ ᓯᕇᐳᕈᓪ ᐹᓯᒧᑦ ᑕᓕᖅᐱᒃᑯᑦ,” ᐅᖃᕐᑐᖅ.

“ᐃᓱᒪᖃᑦᑕᓚᐅᕋᒪ ᐱᖃᓐᓇᕆᔭᒃᑲ ᐱᖃᑎᒋᕙᒡᓗᒋ ᐊᒻᒪ ᐱᙳᐊᖃᑎᒋᕙᒡᓗᒋᑦ, ᑕᐃᒪᓕ 8ᓂ ᐅᑭᐅᖃᓕᖅᖢᖓ ᐊᑖᑕᒐ ᓂᐅᓐᓄ ᐋᖅᑭᒃᑕᐅᓯᒪᔪᓂᒃ ᐃᓚᖏᓐᓂ ᐲᔭᐃᓕᓚᐅᕐᓯᒪᔪᖅ, ᐆᑐᓇᖅ ᕗᕋᔅᑦ ᒐᒻᑉᑎᑐᑦ,” ᐃᒡᓚᖅᖢᓂ.

ᕼᐋᕗᑦ ᐊᔪᕈᓐᓃᓚᐅᕐᓯᒪᔪᖅ ᓯᐊᕐᕆᔮᕈᓐᓇᖅᓯᓚᐅᕐᓯᒪᔪᖅ ᐊᑖᑕᖓ ᓯᐊᕆᔮᕐᕕᓕᐅᖅᑎᓪᓗᖑ.

“ᐱᓇᓱᒻᒪᕆᓚᐅᕐᓯᒪᒐᒪ. ᓯᐊᕐᕆᔮᖃᑦᑕᖅᖢᖓ ᐊᔪᕈᓐᓃᑐᐊᕌᖓᒪ.”

ᐊᕐᕌᒍᒐᓴᖕᓂ ᕼᐋᑭᑲᑕᓚᐅᖅᖢᓂ ᓄᓇᒃᑯᑦ ᓯᐊᕐᕆᔮᖃᑦᑕᓕᓚᐅᕐᓯᒪᔪᖅ ᑯᐸᐃᒃᒥ, ᕼᐋᕗᑦ ᑕᒫᓂᕐᒥᐅᑕᐅᒐᒥ.

“ᓄᓇᒃᑯᑦ ᓯᐊᕐᕆᔮᖃᑦᑕᕐᓂᕋ ᑎᒥᓐᓂ ᐃᓱᒪᒋᔾᔪᑎᒋᓂᕐᓴᐅᓕᓚᐅᕐᓯᒪᔭᕋ ᐊᒻᒪ ᖃᓄᐃᓕᐅᕐᓂᕐᓴᐅᓕᕈᒪᓪᓗᖓ, ᐊᒻᒪᓗ ᐱᖃᓐᓇᕆᔭᖃᐅᓕᖅᖢᖓ ᑕᐃᒪᙵ 9-ᓂ ᐊᕐᕌᒍᖃᓕᓚᐅᕋᒪ,” ᐅᖃᕐᑐᖅ.

ᐱᓄᐊ ᕼᐋᕗᑦ, ᐃᓚᒋᔭᐅᔪᖅ ᐊᔪᕈᓐᓃᖅᓴᖅᑎᑦᑎᔨᓂ ᓄᓇᕗᑦ ᓄᓇᒃᑯᑦ ᓯᐊᕐᕆᔮᖅᑎᓄᑦ, ᓇᖏᖅᑐᖅ ᓯᐊᕐᕆᔮᖅᕕᐅᔪᒧᑦ ᐊᖅᑯᑎᐅᑉ ᓴᓂᑦᑎᐊᖓᓂ ᐹᒧ, ᐊᓛᔅᑲ ᓯᓚᑎᑦᑎᐊᖓᓂᒃ ᐅᑯᐊ ᓄᓇᕗᑦ ᐱᒡᒍᓴᐅᑎᖃᑕᐅᑎᓪᓗᒋᑦ ᓯᕗᓪᓕᖅᐹᒥᒃ ᓄᓇᒃᑯᑦ ᓯᐊᕐᕆᔮᖅᑎᓂᒃ ᐅᕙᓂ 2024 ᐅᑭᐅᖅᑕᖅᑐᕐᒥ ᐅᑭᐅᒃᑯᑦ ᐱᙳᐊᕕᒡᔪᐊᕐᓇᒥ. (ᐊᔾᔨᓕᐅᕆᔨ ᑕᔅᑎᓐ ᐸᑖᕐ, ᓄᓇᑦᓯᐊᕐᒥ ᐱᕙᓪᓕᐊᔪᓄᑦ ᑐᓂᓯᕙᒃᑐᖅ)

ᓄᓇᒃᑯᑦ ᓯᐊᕐᕆᔮᖅᑎᓄᑦ ᐊᔪᕈᓐᓃᖅᓴᖅᑎᑦᑎᔨ ᐊᒻᒪ ᓇᒧᙵᐅᔾᔨᕈᓘᔭᖃᑦᑕᕐᓂᑯ ᐊᑐᖃᑦᑕᖅᑕᕐᒥᓂ ᖃᐅᔨᑎᑦᑎᓇᓱᓕᓚᐅᕐᓯᒪᔪᖅ, ᐱᓕᕆᐊᕆᓪᓗᓂᐅᒃ ᐊᕐᕋᒍᓂ 6-ᓂ ᐱᓕᕆᐊᖃᖅᖢᓂ ᐃᓅᓱᒃᑐᓂᒃ ᓄᓇᒃᑯᑦ ᓯᐊᕐᕆᔮᕈᓐᓇᖅᓯᑎᑦᑎᓇᓱᒃᖢᓂ ᐃᖃᓗᖕᓂ.

ᑭᓯᐊᓂᓕ ᑕᒪᓐᓇ ᓄᓇ ᐊᒻᒪᓗ ᐃᑲᔫᑎᖃᕈᓐᓇᙱᓐᓂᖅ ᐊᒃᓱᕈᕐᓇᓚᐅᖅᑐᖅ ᑕᒪᓐᓇ ᐱᙳᐊᕈᓯ ᐊᐅᓚᑏᓐᓇᕋᓱᒃᖢᓂᐅᒃ.

ᓄᓇᒃᑯᑦ ᓯᐊᕐᕆᔮᖃᑦᑕᕐᓂᖅ ᓯᓚᒥ ᖃᓄᐃᓕᐅᕈᑎᐅᑎᓪᓗᒍ — ᐃᒻᒪᖄᓪᓘᓐᓃᑦ, ᓯᓚᒥ ᑭᓯᐊᓂ ᐱᙳᐊᕈᓯᖅ ᓄᓇᕗᑦ ᐱᒡᒍᓴᐅᑎᖃᑕᐅᕝᕕᒋᓚᐅᖅᑕᖓ ᐱᓇᓱᐊᕈᓯᕐᒥ ᐅᑭᐅᕐᑕᖅᑐᖅᒥ ᐅᑭᐅᒃᑯᑦ ᐱᙳᐊᕐᓇᐅᑎᓪᓗᒍ — ᑭᓯᐊᓂᓕ ᐃᒡᓗᒥ ᐊᔪᕈᓐᓃᕐᓴᕈᑎᐅᔭᕆᐊᖃᖅᐸᒃᖢᓂ ᐅᕝᕙᓘᓐᓃᑦ ᓯᓚᒥ ᓂᒡᓚᓱᓗᐊᙱᑦᑐᒥᒃ ᐅᖅᑰᓂᕐᓴᒥ ᓄᓇᕗᑦ ᓯᓚᖓᓂ.

ᑕᐃᒪᐃᓐᓂᖓᓄᑦ ᓄᓇᕗᒥᑦ ᓄᓇᒃᑯᑦ ᓯᐊᕐᕆᔮᖅᑎᑦ ᐊᔪᕈᓐᓃᕐᓴᕈᓐᓇᙱᓐᓂᕐᓴᐅᖕᒪᑕ ᐅᑭᐅᒃᑯᑦ ᒪᑯᓇᙵᑦ ᐅᖅᑰᓂᕐᓴᒥ ᓄᓇᖃᖅᑐᓂᒃ ᐊᒻᒪᓗ ᖃᓪᓗᓈᓄᑦ ᐊᐅᓪᓚᖅᑎᑕᐅᔭᕆᐊᖃᖅᐸᒃᖢᑎᒃ ᐊᔪᕈᓐᓃᖅᓴᖅᑎᑕᐅᔭᖅᑐᕐᓗᑎᒃ ᐃᒡᓘ ᐃᓗᐊᓂ ᐊᔪᕈᓐᓃᕐᓴᕐᕕᖃᖅᑐᓄᑦ.

ᑕᐃᒪᓕ ᖃᖓᑲᓪᓚᐅᓕᖅᑐᖅ ᕼᐋᕗᑦ ᓄᓇᒃᑯᑦ ᓯᐊᕐᕆᔮᖅᑎᑦᑎᖃᑦᑕᓕᓚᐅᕐᓯᒪᔪᖅ ᐃᓚᖏᓐᓂᒃ ᐃᓕᓐᓂᐊᕐᕕᖕᓂ ᐃᖃᓗᖕᓂ ᒪᑯᓂᖓ ᐃᓕᓐᓂᐊᓕᓵᖅᑐᓂᒃ ᖁᑦᑎᖕᓂᖅᓴᓄᑦ ᐃᓕᓐᓂᐊᖅᑐᓄᑦ. ᑎᓴᒪᓕᒃᒥ ᕼᐋᓐᑕᒥ ᐊᑐᖅᖢᓂ ᓴᓂᓕᕇᖕᓂ ᑐᓛᖃᖅᑐᒥ ᐅᓂᐊᕈᓐᓇᖅᖢᓂ ᓴᓇᕐᕈᑎᓂᒃ ᐋᖅᑭᒃᓱᐃᔾᔪᑎᐅᓂᐊᖅᑐᓂᒃ ᐊᖅᑯᑎᒃᓴᓂ ᐊᐳᑎᒃᑯᑦ.

“ᐃᖃᓗᖕᓂ ᐊᒃᓱᕈᖅᓯᒪᖕᒪᑕ ᐃᓕᓐᓂᐊᖅᑎᑦᑎᓇᓱᒃᖢᑎᒃ ᓄᓇᓕᖕᓂ ᓄᓇᒃᑯᑦ ᓯᐊᕐᕆᔮᕈᓐᓇᕐᓯᓂᕐᒥᒃ,” ᐅᖃᓚᐅᕐᑐᖅ ᐃᓕᓐᓂᐊᕐᕕᒃᒥ ᐃᑲᔪᖅᐸᒃᑐᓂᒃ ᐅᖃᐅᓯᖃᖅᖢᓂ.

ᕼᐋᕗᑦ ᐃᓱᒪᓯᒪᖕᒪᑦ ᐊᐳᑎᓕᐅᕈᑎᐅᔪᓐᓇᖅᑐᒥᒃ ᐃᖃᓗᖕᓂ ᓄᓇᒃᑯᑦ ᓯᐊᕐᕆᔮᕐᕕᐅᖃᑦᑕᕐᓂᐊᖅᑐᓂᒃ ᓯᑎᐱᒋᒥ ᐱᒋᐊᕐᓗᑎᒃ ᓄᕕᐱᕆᒧᑦ ᐊᒻᒪᓗ ᐅᐱᕐᖔᖑᖅᐸᓪᓕᐊᓕᖅᐸᑦ. ᓂᒡᓚᓱᓗᐊᖅᑎᓪᓗᒍᓕ ᑎᓯᐱᕆᒥ ᕕᕝᕗᐊᕆᒧᑦ ᑖᒃᑯᐊ ᐊᔪᕈᓐᓃᖅᓴᕆᐊᕈᓐᓇᕋᔭᖅᖢᑎᒃ ᖃᓪᓗᓈᓄᑦ.

“ᑕᐃᒪᓐᓇ ᑕᐅᑐᙳᐊᕋᒪ,” ᐅᖃᕐᑐᖅ.

ᑎᓴᒪᑦ ᐃᓚᒋᔭᐅᔪᑦ ᐃᓚᒌᑦ ᓄᓇᕗᒧᑦ ᓄᓇᒃᑯᑦ ᓯᐊᕐᕆᔮᖃᑦᑕᕐᓯᒪᓕᖅᑐᑦ ᐊᕐᕌᒎᖕᓂ ᒪᕐᕉᐸᓘᖕᓂ. ᐅᓇ ᐅᑭᐅᖅᑕᖅᑐᕐᒥ ᐅᑭᐅᒃᑯᑦ ᐱᙳᐊᕕᒡᔪᐊᕐᓇᖅ ᓯᕗᓪᓕᖅᐹᖑᓚᐅᕐᑐᖅ ᐱᒡᒍᓴᐅᑎᖃᑕᐅᓪᓗᑎᒃ.

“ᐱᓕᕆᖃᑎᒋᓚᐅᕐᑕᕗᑦ ᐃᑉᐸᒃᓴᖅ ᖃᓄᐃᓕᐅᕈᑎᒋᓂᐊᖅᑕᖏᓐᓂᒃ ᐊᒻᒪᓗ ᐱᓗᐊᖅᑐᒥ ᐊᐳᑎᒥ ᖃᐅᔨᒪᓕᖅᑎᓐᓇᓱᒃᖢᑎᒍ ᐊᒻᒪᓗ ᖃᑦᑎᓂᐅᔪᓂᒃ, ᓲᖃᐃᒻᒪ ᑕᐃᒪᐃᑦᑐᒥ ᐊᐳᑎᒥ ᐊᑐᓗᐊᖅᐸᙱᓐᓇᑦᑕ,” ᕼᐋᕗᑦ ᐅᖃᕐᑐᖅ.

“ᑎᓯᓂᕐᓴᐅᖕᒪᑦ ᐊᐳᑎ, ᓂᒡᓕᓇᕐᓂᕐᓴᐅᓪᓗᓂᓗ, ᑕᐃᒪᓕ ᑕᒪᓐᓇ ᖃᐅᔨᒪᔭᐅᑎᓐᓇᓱᒃᑲᑦᑎᒍ ᓱᒃᑲᓴᐅᑎᓚᐅᖅᑎᓐᓇᒋᑦ.”

ᑖᒃᑯᐊ ᐱᙳᐊᖃᑎᒌᑦ ᒫᔅᓯ 12ᒥ ᐊᐳᑎᒧᐊᓚᐅᕐᑐᑦ ᐱᒋᐊᓕᖅᑎᓪᓗᒋᑦ ᓱᒃᑲᓴᐅᑎᑲᑕᓕᖅᑎᓪᓗᒋ ᐅᑯᐊ ᒍᑕᑦ, ᒨᓯ ᐊᒻᒪ ᑎᑕᒻ ᐃᓚᐅᓪᓗᑎᒃ 3.76 ᑭᓛᒥᑕᒥ ᐱᒋᐊᕐᕕᖃᖅᖢᑎᒃ ᐊᒻᒪᓗ ᕗᐃᓕᐊᒻᓴᓐ ᐹᑐᕆ ᓱᒃᑲᓴᐅᔾᔪᐊᖃᑕᐅᓪᓗᓂ 7.5 ᑭᓛᒥᑕᒥ ᑕᑭᓂᓕᖕᒥ.

ᓄᖅᑲᖓᓚᐅᑲᒃᖢᑎᒃ ᒫᔅᓯ 13ᒥ ᐱᒡᒍᓴᐅᑎᖃᑕᐅᒃᑲᓐᓂᓚᐅᕐᒥᔪᑦ ᒫᔅᓯ 14ᒥ.