ᐃᓄᑐᖃᐃᑦ ᓄᓇᓯᐅᑎᖓᑦ ‘ᐱᓕᕆᑦᑎᐊᖅᓯᒪᙱᓚᑦ’ ᐸᕐᓇᒃᑕᐅᓯᒪᓚᐅᖅᑕᖓᓂ: ᓯᕗᓕᖅᑎ

ᓯᕗᓕᖅᑎ P.J. ᐊᕿᐊᕈᖅ, ᓴᐅᒥᖕᒥ, ᐃᑲᔪᖅᐳᖅ ᒫᑕ ᑎᑭᕕᖕᒧᑦ ᒪᕐᕉᔫᒃ ᐊᖅᑲᖅᑎᖅᑎᓪᓗᒋᑦ ᓄᑖᖑᔪᒥ ᐃᓄᑐᖃᕐᓄᑦ ᓄᓇᓯᐅᑎᖓᓐᓂ ᐃᖃᓗᖕᓂ ᐅᒃᑐᐱᕆᐅᓚᐅᖅᑐᒥ. ᓄᓇᓯᐅᑎᑦ ᓱᓕ ᐱᔨᑦᑎᕋᙱᓚᑦ. (ᑐᓴᒐᒃᓴᓕᕆᔨᒃᑯᑦ ᐊᔾᔨᖁᑎᖓ ᔨᐊᕝ ᐱᓚᑦᑎᐊᐃᒧᑦ)

For English version, see Nunavut elder van project ‘hasn’t panned out’ as planned, premier admits

ᓯᕗᓕᖅᑎ P.J. ᐊᕿᐊᕈᖅ ᐅᖃᖅᐳᖅ ᐃᓕᓐᓂᐊᕈᑎᒃᓴᓂ ᐃᓕᑕᐅᓂᖃᕆᐊᖃᖅᐳᖅ ᐃᓄᑐᖃᕐᓄᑦ ᓇᒧᙵᐅᔪᓐᓇᕐᓂᖏᓐᓂ ᓄᓇᓯᐅᑎᖓᓐᓄ ᐱᓕᕆᐊᒃᓴᐅᔪᒥ ᐅᖃᐅᓯᕆᓚᐅᖅᑕᖓᓂ ᐊᕐᕌᒍᑲᓴᐅᓕᖅᑐᒥ ᓱᓕ ᐱᒋᐊᓚᐅᙱᓐᓂᖓᓂ.

ᐊᐱᖅᑯᑎᒃᓴᓂ ᐱᓕᕆᓂᐅᔪᒥ ᒪᓕᒐᓕᐅᕐᕕᖕᒥ ᓯᑎᐱᕆ 10−ᒥ, ᐊᐱᕆᔭᐅᒃᑲᓐᓂᓚᐅᖅᐳᖅ ᓄᓇᓯᐅᑎᑦ ᒥᒃᓵᓄᑦ.

ᐊᕿᐊᕈᖅ ᐅᖃᐅᓯᖃᓚᐅᖅᐳᖅ ᐅᒃᑐᐱᕆᐅᓚᐅᖅᑐᒥ — ᐊᕐᕌᒍᑲᓴᖕᒥ — ᓄᓇᕗᒻᒥ ᒐᕙᒪᒃᑯᑦ ᓂᐅᕕᓚᐅᖅᐳᑦ ᑕᓪᓕᒪᓂ ᓄᓇᓯᐅᑎᓂᑦ ᐊᑭᐅᔪᒥ $1 ᒥᓕᐊᓐᓂ ᐊᒻᒪ ᐅᒥᐊᕐᔪᐊᒃᑰᖅᑎᑕᐅᓚᐅᖅᐳᑦ ᐃᖃᓗᖕᓄᑦ, ᐃᖃᓗᒃᑑᑦᑎᐊᕐᒧ, ᓴᓪᓕᓄᑦ, ᐸᖕᓂᖅᑑᒧᑦ ᐊᒻᒪ ᑲᖏᖅᖠᓂᕐᒧᑦ.

ᐅᖃᐅᓯᒃᓴᓕᐅᖅᑎᓪᓗᒍ ᐃᖃᓗᖕᓂ, ᐊᕿᐊᕈᖅ ᓇᖏᓚᐅᖅᐳᖅ ᐊᔾᔨᓕᐅᖅᑕᐅᓂᕐᒧᑦ ᐃᑲᔪᖅᑎᓪᓗᒍ ᐃᓄᑐᖃᕐᒥ ᓂᐅᓂᕐᒥ ᓄᓇᓯᐅᑎᒥᑦ.

ᐅᑭᐅᖅᑕᖅᑐᒥ ᓯᕗᓂᒃᓴᒧᑦ ᐊᔪᙱᓐᓂᐅᔪᓂ ᐱᕙᓪᓕᐊᑎᑦᑎᓂᕐᒥ ᐱᓕᕆᑎᑕᐅᓚᐅᖅᐳᑦ ᐱᓕᕆᔨᓪᓚᕆᐅᓪᓗᑎᒃ ᐊᐅᓚᑦᑎᓂᕐᒥ ᓄᓇᓯᐅᑎᓂᑦ, ᐱᓕᕆᖃᑎᖃᖅᖢᑎᒃ ᐅᑭᐅᖅᑕᖅᑐᒥ ᐱᓕᒻᒪᒃᓴᓂᕐᒧᑦ ᐃᖕᒃ ᐊᒻᒪ ᑐᒃᑐ ᑖᒃᓯᓂᑦ.

ᑭᐅᓪᓗᓂ ᐊᐱᖅᑯᑕᐅᔪᒥ ᑲᖏᖅᖠᓂᖅ ᐅᐊᖕᓇᒥ−ᐃᒡᓗᓕᒑᕐᔪᖕᒥ ᒪᓕᒐᓕᐅᖅᑎᖓᓐᓂ ᐋᓕᒃᓵᓐᑐ ᓴᒻᒧᖅᑐᕐᒧᑦ, ᐊᕿᐊᕈᖅ ᓇᓗᓇᐃᖅᓯᓚᐅᖅᐳᖅ ᐱᓕᕆᔨᐅᔪᑦ ᐱᓚᐅᙱᒻᒪᑕ ᓱᓕ ᑮᓇᐅᔭᖃᖅᑎᑕᐅᓂᐅᔪᒥ ᐱᒋᐊᖅᑎᑦᑎᓂᕐᒥ ᐊᐅᓚᑦᑎᓂᕐᒥ ᓄᓇᓯᐅᑎᓂᑦ.

“ᐱᓕᕆᓂᖃᑦᑎᐊᙱᓚᑦ ᐱᓕᕆᔪᒪᓚᐅᕐᓂᖏᓐᓂ,” ᓯᕗᓕᖅᑎ ᐅᖃᓚᐅᖅᐳᖅ.

“ᑐᓴᖅᓯᒪᓪᓚᕆᒃᑲᑦᑕ ᓇᖕᒥᓂᖃᖅᑎᐅᔪᓂ ᐅᑯᓇᓂ ᓄᓇᓯᐅᑎᓂᑦ, ᕿᓃᓐᓇᖅᐳᑦ ᒐᕙᒪᑐᖃᒃᑯᓐᓂ ᑮᓇᐅᔭᖃᖅᑎᑕᐅᓂᐅᔪᒥ ᐊᒻᒪᓗᑦᑕᐅᖅ ᐊᓯᖏᓐᓂ ᑮᓴᐅᔭᖃᖅᑎᑕᐅᓂᐅᔪᓂ ᐊᐅᓚᑦᑎᓂᕐᒧᑦ ᐅᑯᓂᖓ ᓄᓇᓯᐅᑎᓂᑦ, ᑭᓯᐊᓂ ᒫᓐᓇᒧᑦ ᑎᑭᖦᖢᒍ ᐱᔪᓐᓇᖅᓯᒪᙱᓚᑦ.”

ᓯᕗᓪᓕᖅᐸᐅᙱᓚᖅ ᐊᕿᐊᕈᖅ ᓵᙵᓯᒪᓂᖓᓂ ᐊᐱᖅᑯᑕᐅᔪᓂ ᒪᓕᒐᓕᐅᕐᕕᖕᒥ ᐆᒧᖓ ᐱᓕᕆᐊᒃᓴᐅᔪᒧᑦ.

ᐱᕗᐊᕆᒥ, ᐊᕐᕕᐊᓂ ᓂᒋᕐᒥ ᒪᓕᒐᓕᐅᖅᑎ ᔫ ᓴᕕᑲᑖᖅ ᓴᖅᑭᑎᑦᑎᓚᐅᕆᕗᖅ ᓄᓇᓯᐅᑎᑦ ᒥᒃᓵᓄᑦ, ᑕᐃᓯᓪᓗᓂ ᓴᖅᑭᑎᑕᐅᓂᖏᓐᓂ “ᒥᓕᐊᓐᑐᖅᑐᒥ ᐊᔾᔨᓕᐅᖅᑕᐅᓂᕐᒥ ᐱᕕᒃᓴᖃᕐᓂᐅᓂᖓᓂ.”

ᐅᖃᖃᑎᖃᖅᖢᓂ ᑐᓴᒐᒃᓴᓕᐅᖅᑎᓂ ᑭᖑᓂᐊᒍᑦ ᓯᑎᐱᕆ 10−ᒥ ᒪᓕᒐᓕᐅᕐᕕᖕᒥ ᐃᒃᓯᕚᕐᓂᖏᓐᓂ, ᐊᕿᐊᕈᖅ ᐅᖃᓚᐅᖅᐳᖅ ᐊᐃᑉᕆᓕᒥ ᒐᕙᒪᑐᖃᒃᑯᑦ ᓂᕈᐊᕐᓂᕆᔭᖓᓂ ᐱᔾᔪᑕᐅᓚᐅᖅᐳᖅ ᑭᖑᕙᕆᐊᖅᑐᒥ ᑮᓇᐅᔭᖃᖅᑎᑦᑎᓂᐅᔪᒥ ᓄᓇᓯᐅᑎᓄᑦ ᐱᓕᕆᐊᒃᓴᐅᔪᒧᑦ. ᒐᕙᒪᑐᖃᒃᑯᑦ ᑮᓇᐅᔭᐃᑦ ᐊᑐᖅᑕᐅᔪᒃᓴᓂ, ᓴᖅᑭᑎᑕᐅᒐᔪᒃᑐᑦ ᐅᐱᕐᙶᒥ, ᑐᓂᔭᐅᖔᕐᓂᐊᖅᐳᖅ ᐅᑭᐊᒃᓵᒥ.

ᐊᕿᐊᕈᖅ ᐅᖃᓚᐅᖅᐳᖅ ᓄᓇᓯᐅᑎᑦ ᓂᐅᕕᖅᑕᐅᓚᐅᖅᐳᑦ ᑭᐅᓂᕐᒥ ᑐᐊᕕᕐᓇᖅᑐᒥ ᐱᔭᕆᐊᖃᕐᓂᐅᔪᒥ ᑐᓂᓯᓂᕐᒥ ᐊᑐᐃᓐᓇᐅᔪᒥ ᐅᓯᑲᑦᑕᕐᓂᐅᔪᒥ ᐃᓄᑐᖃᕐᓄᑦ, ᐊᒻᒪ ᓂᕆᐅᒃᐳᖅ ᑕᑯᓛᕐᓂᖓᓂ ᐊᐅᓚᑕᐅᔪᓂ ᕿᓚᒻᒥᐅᔪᒥ.

“ᑐᓴᖅᑐᐃᓐᓇᐅᓚᐅᖅᐳᒍᑦ ᐃᓄᑐᖃᕐᓂ ᐆᒥᖓ ᑐᐊᕕᕐᓇᕐᓂᖓᓂ, ᐊᒻᒪ ᑕᐃᑲᙵᑦ ᐱᓕᕆᓂᐅᔪᒥ ᐊᔭᐅᕆᕐᔪᐊᓚᐅᖅᐳᒍᑦ ᑕᐃᒪᐃᑎᑦᑎᓇᓱᐊᕐᓂᕐᒧᑦ,” ᐊᕿᐊᕈᖅ ᐅᖃᓚᐅᖅᐳᖅ.

“ᐃᓱᒪᕗᖓ ᐊᓕᐊᓇᐃᒍᓱᒃᑐᐃᓐᓇᐅᓇᔭᖅᐳᒍᑦ ᑕᑯᓂᕐᒥ ᓄᓇᓯᐅᑎᖓᓂ ᐊᐅᓚᑦᑎᔪᒥ ᑕᒪᒃᑭᑦ ᓄᓇᓕᖕᓂ ᐊᒻᒪ ᓱᓕ ᑕᐅᑐᙳᐊᕐᓂᐅᕗᖅ, ᑭᓯᐊᓂ ᐅᑎᒧᑦ ᕿᒥᕐᕈᔭᕆᐊᖃᖅᐳᒍᑦ ᐱᔾᔪᑎᖃᖅᑐᒥ ᐃᓕᓐᓂᐊᕈᑎᓂ ᐃᓕᑕᑦᑎᓐᓂ.”