ᓄᓇᕗᒥᑦ ᐊᓐᓄᕌᓂ ᐊᑐᖅᐸᖕᓂᖅ ᐊᒻᒪ ᐋᕿᒃᓯᒪᓂᖏᑦ ᑲᑎᑐᐃᓐᓇᖃᑦᑕᖅᑐᑦ ᐃᒻᒥᒍᑦ

“ᐅᒃᐱᕈᓱᒃᑐᖓ ᓄᓇᕗᑦ ᐊᒃᑐᐃᓂᖃᕐᔪᐊᕐᓂᖓᓂᒃ ᐃᓄᐃᑦ ᓴᓇᐅᒐᖏᓐᓄᑦ”

ᑐᑭᓕᕇᒃᓯᒪᔪᑦ ᐊᕐᓄᕌᓂ ᐊᑐᖅᑐᑦ ᐱᓱᓕᒑᓪᓗᑎᒃ ᐅᕙᓂ ᓄᓇᕗᑦ ᐊᓐᓄᕌᓂᒃ ᓴᕿᔮᒐᓂᒃ 2014 ᐊᕐᓴᕐᓃᑦ ᓴᕿᔮᒐᖃᕐᓇᒥᑦ ᐋᑐᕚᒥ. (ᐊᔾᔨᓕᐅᕆᔨ ᓴᐃᕋ ᕌᔾᔪᔅ)

By ᓴᐃᕋ ᕌᔾᔪᔅ

For an English version of this story, see Nunavut fashion and design come into their own

1999-ᒥ, ᓄᓇᕗᑦ ᐱᒋᐊᖅᑎᓪᓗᒍ, ᒫᑕ ᖃᔭᖅ ᐱᒋᐊᕐᓯᒪᓕᓚᐅᕐᓯᒪᔪᖅ ᐱᓕᕆᐊᒥᑦ ᐋᓐᓄᕌᒃᓴᐃᑦ ᖃᓄᐃᓕᖓᓂᒃᓴᖏᓐᓂ—ᑕᐃᒪᐃᑦᑕᕆᐊᖃᕐᓂᕐᒥᓂᒃ ᐅᔾᔨᕈᓱᒃᑐᒃᓴᐅᓇᓂ ᑕᐃᔅᓱᒪᓂ.

ᐊᖏᕐᕋᖓᓂ ᒥᑦᑎᒪᑕᓕᒃᒥᑦ, ᒥᕐᓱᖅᑎ ᐊᒻᒪ ᑎᑎᕋᐅᔭᒐᖅᑎᑦ ᐃᖅᑲᓇᐃᔮᖃᖅᑐᖅ ᐃᓕᓐᓂᐊᕐᕕᒃᒧᑦ ᐊᖓᔪᖅᑳᖑᓪᓗᓂ ᓄᓇᓖᑦ ᐃᓕᓐᓂᐊᕐᕕᐊᓂᒃ. ᑭᓱᓕᕆᔪᓐᓃᕌᖓᒥ, ᖃᔮᖅ ᒥᕐᓱᖃᑦᑕᖅᑐᖅ ᕿᑐᕐᖓᖏᑦᑕ ᐊᓐᓄᕌᒃᓴᖏᓐᓂᒃ ᐊᒻᒪ ᐃᓚᖏᓐᓄᑦ, ᐅᖃᓕᒫᒐᒃᓴᓂᒃ ᑎᑎᕋᐅᔭᒐᖅᐸᒃᖢᓂ ᐊᒻᒪᓗ ᓂᐅᕕᕐᕕᒃᒥᑦ ᐊᐅᓚᑦᑎᓪᓗᓂ ‘ᑭᓱᑖᕐᕕᒃ’, ᖃᓪᓗᓈᖅᑕᓂᒃ ᐊᒻᒪ ᒥᕐᓱᕐᓂᕐᒧᑦ ᐃᓚᒃᓴᓂᒃ ᓂᐅᕕᕐᕕᒃᒥᑦ ᑕᕝᕗᖓᑦ ᕿᑭᖅᑖᓗᒃᒥᑦ ᓄᓇᓕᖕᓄᑦ.

ᐊᕐᕌᒍ ᖁᓕᑦ ᐊᓂᒍᖅᑎᓪᓗᒋᑦ, ᖃᔮᖅ ᐋᑐᕚᒧᑦ ᓄᒃᑎᖅᐳᖅ, ᒪᑯᐊ ᑭᒃᑯᓕᒫᓄᑦ ᑐᓴᐅᑎᓕᕆᔨᒃᑯ ᓄᓇᕗᒻᒧᐊᖃᑦᑕᓕᖅᑎᓪᓗᒋᑦ ᐊᒻᒪᓗ ᕿᓰᑦ ᓴᖅᑭᖢᑎᒃ ᐊᓐᓄᕌᓕᐊᕆᔭᒃᓴᐅᓂᒃᑯᑦ. ᓴᓇᐅᒐᖏᓐᓂᒃ ᓴᕿᑎᑦᑎᖃᑦᑕᓕᓚᐅᕐᑐᖅ ᖃᕋᓴᐅᔭᒃᑯᑦ—ᖁᓕᑦᑕᐅᔭᐃᑦ, ᐊᓐᓄᕌᒃᓴᑦ ᐊᒻᒪ ᐱᖁᑎᒃᓴᒐᓚᐃᑦ—ᓂᐅᕐᕈᑎᒃᓴᐅᓪᓗᑎᒃ ᕙᐃᔅᐳᒃᑯᑦ.

ᒫᑕ ᖃᔮᖅ ᖁᓕᑦᑕᐅᔭᓕᐊᖏᑦ ᐊᑐᖅᑕᐅᓪᓗᑎᒃ ᑕᑯᒃᓴᐅᑎᑕᐅᕗᖅ ᓄᓇᖃᖅᑳᖅᑐᑦ ᓴᓇᐅᒐᓂᒃ ᐊᒻᒪ ᑎᑕᐅᓯᕆᓂᕐᒧᑦ ᑕᑯᔭᒐᖃᖅᑎᓪᓗᒋᑦ ᐋᑯᕚᒥᑦ ᐅᒃᑑᐱᕆᐅᓚᐅᕐᑐᒥ. (ᐊᔾᔨᓕᐅᕆᔨ ᐃᕙᓐ ᓯᐸᓚᑦ)

“ᓲᕐᓗᓕ ᖄᑳᓪᓚᒃᑐᐊᓗᒃ,” ᐅᖃᖅᑐᖅ.

ᐅᓪᓗᒥ, ᖃᔮᑉ ᓇᓗᓇᐃᒃᑯᑎᖓ ᐃᓄᒃᓯᒃ (InukChic) ᓴᕿᔮᖃᑦᑕᓕᖅᑐᑦ ᐊᓐᓄᕌᓂᑦ ᑕᑯᔭᒐᖃᕐᕕᐅᓲᓂᒃ ᑲᓇᑕᒥ; ᓂᐅᕕᐊᒃᓴᖏᑦ ᓄᖑᑕᐅᑲᐅᑎᒋᓲᑦ ᖃᕋᓴᐅᔭᒃᑯᑦ ᓴᕿᑎᑕᐅᔭᕌᖓᑕ ᐅᕝᕙᓘᓐᓃᑦ ᓴᓇᐅᒐᓕᕆᓂᕐᒧᑦ ᓴᕿᔮᒐᖃᖅᑐᓂᒃ. ᒫᓐᓇᓵᖑᓚᐅᕐᑐᖅ ᓴᓇᐅᒐᓂᒃ ᓂᐅᕕᐊᒃᓴᖃᑲᑕᒃᑎᓪᓗᒋᑦ ᐋᑕᕚ ᐅᑭᐅᕐᒧᑦ ᖃᓄᐃᓕᐅᕐᓂᖓᓂᒃ (Winterlude), ᖃᔮᖅ ᑭᐳᖃᕐᕕᖓ ᓴᓇᐅᒐᖏᓐᓂᒃ ᕿᒥᕐᕈᐊᖅᑐᖃᕈᓘᔭᓚᐅᕐᑐᖅ ᓂᐅᕕᕈᒪᔪᓂᒃ.

“ᐅᓄᕐᑐᓂᒃ ᓂᐅᕕᕐᕕᐅᕈᓘᔭᓚᐅᕐᑐᖓ,” ᐅᖃᖅᑐᖅ. “ᐅᓄᕐᓂᕐᓴᐃᑦ ᐃᓄᐃᑦ ᕿᒥᕐᕈᐊᕐᓂᕐᓴᐅᖃᑦᑕᓕᕐᒪᑕ ᓄᓇᖃᖅᑳᖅᑐᑦ ᓴᓇᐅᒐᖏᓐᓂᒃ ᑕᑯᖃᑦᑕᖅᓯᒪᔭᓐᓂᓪᓕ.”

“ᐃᓄᐃᑦ ᐃᑲᔪᖅᑐᐃᒻᒪᕆᖕᒪᑕ ᓄᓇᖃᖅᑳᖅᑐᑦ ᐃᓱᒫᓘᑎᖏᓐᓂᒃ ᐊᒻᒪᓗ ᖃᓄᐃᑦᑐᑐᐃᓐᓇᕐᓂᒃ ᓴᓇᐅᒐᖏᓐᓂᒃ.”

ᓄᓇᕗᒻᒥᐅ ᐋᓐᓄᕌᓂᒃ ᓴᓇᔨᐅᕙᒃᑐᑦ ᐅᖃᕈᓐᓇᖅᑐᑦ ᐱᓕᕆᓂᖏᑦᑎᒍᑦ ᓈᒻᒪᒍᓱᖕᓂᖏᓐᓂᒃ, ᐱᕙᓪᓕᐊᓯᒪᔪᒃᑯᑦ ᐃᑲᔪᖅᑐᑕᐅᓯᒪᓂᒃᑯᑦ ᐊᑦᑕᑕᐅᑎᓄᑦ ᒪᑯᓇᙵᑦ ᐃᓄᖕᓂᑦ ᓴᓇᐅᒐᓕᐅᖅᑎᓂᒃ ᐅᑭᐅᕐᑕᖅᑐᕐᒥᐅᑕᓕᒫᓂᒃ, ᑭᓯᐊᓂᓕ ᑐᙵᕕᖃᖅᖢᓂ ᓇᓗᓇᙱᑦᑐᒃᑯᑦ ᓄᓇᕗᒥᑦ.

ᑖᓐᓇ “ᑭᓱᑭᐊᖅ” ᓇᓗᓇᕐᑐᖅ ᐅᖃᐅᓯᕆᑦᑎᐊᕆᐊᒃᓴᖅ, ᑭᓯᐊᓂᓕ ᑳᑕᓖᓐ ᓂᑯᔅ ᓄᓇᕗᑦ ᓴᓇᙳᐊᖅᑏᑦ ᑲᑐᔾᔨᖃᑎᒌᓄᑦ ᐃᓚᒋᔭᐅᔪᖅ ᐅᖃᓚᐅᕐᑐᖅ ᑕᒪᓐᓇ ᓄᓇᕗᒻᒥᐅᑦ ᒥᕐᓱᖅᑎᖏᑦ ᓇᓗᓇᐃᖅᑕᐅᓯᒪᓕᕐᒪᑕ “ᐱᒻᒪᕆᐊᓘᓂᕐᒥᒃ” ᓴᕿᑎᑦᑎᓕᕌᖓᑕ ᓴᓇᐅᒐᖏᓐᓂᒃ ᑭᒃᑯᓕᒫᓄᑦ.

ᓂᕈᐊᕆᔭᐅᓯᒪᔪᑦ ᐅᕙᙵᑦ Ugly Fish ᕿᓚᓗᒐᐅᑉ ᓴᐅᓂᖓᓂ ᓴᓇᓯᒪᔪᑦ ᓯᐅᑎᕈᑎᑦ ᐊᒻᒪ ᖁᖓᓯᕈᑏᑦ ᓂᐅᕕᖅᑕᐅᑐᐃᓐᓇᕆᐊᖃᓕᖅᑐᑦ. (ᐊᔾᔨᙳᐊᖅ Ugly Fish)

ᐊᑏᓇ ᑕᕐᕋᓕᒃ ᑕᕕ, ᐋᕿᒃᓱᐃᔨᐅᓂᑯ ᐆᒥᖓ ᓴᓪᓕᓂᑦ ᐊᒻᒪ ᓵᔅᑲᑑᓐᒦᑦᑐᖅ Ugly Fish, ᐃᓱᒪᔪᖅ ᓴᖅᑭᒋᐊᖁᑎᒃᑲᓐᓂᐅᓇᓱᒋᓪᓗᓂᐅᒃ ᓄᓇᕗᒥᑦ ᓴᓇᐅᒐᑦ ᖃᖓᑦᑎᐊᓵᖑᓚᐅᕐᑐᒥᒃ, ᐱᔾᔪᑎᖃᓗᐊᖅᖢᓂ ᐃᓄᐃᑦ ᐃᓕᖁᓯᖏᓐᓂᒃ ᐱᓯᒪᓪᓚᕆᓕᕐᓂᖏᓐᓄᑦ.

“ᑕᒪᓐᓇ ᖁᕕᐊᓱᕈᓘᔭᕐᓇᖅᑐᖅ ᓴᓇᐅᒐᓕᕆᓂᕐᒧᑦ,” ᐅᖃᖅᑐᖅ.

“ᑭᒃᑯᓕᒫᓄᑦ ᑐᓴᐅᒪᔾᔪᑎᓕᕆᓂᖅ ᑕᒪᑐᒥᖓ ᐊᓯᙳᖅᑎᑦᑎᓯᒪᓪᓚᕆᖕᒪᑦ—ᓴᕿᔮᖅᑎᑦᑎᓂᒃᑰᖓᒻᒪᕆᖕᒪᑦ. ᐊᒻᒪᓗ ᐅᕙᑦᑎᓐᓂᒃ ᓂᕿᑖᕈᑎᑖᖅᑳᑎᒋᕙᒃᖢᑕ.”

ᓴᓇᐅᒐᓕᐅᖅᑎᐅᔪᑦ ᓄᓇᕗᒥ ᑲᔪᓯᓯᒪᐃᓐᓇᖅᐳᑦ ᐃᓕᕈᓯᓕᕆᓂᕐᒧᑦ ᓇᓗᓇᐃᒃᑯᑎᓂᒃ, ᑭᓯᐊᓂᓕ ᐅᓇ ᑕᕕ ᐅᖃᓚᐅᕐᑐᖅ ᐊᒥᓱᑦ ᐊᑐᕐᓯᒪᓕᕐᑐᑦ ᐃᓄᒃᓱᙳᐊᓂᒃ ᐊᒻᒪ ᐅᓗᙳᐊᓂᒃ.

ᓂᐅᕕᐊᒃᓴᕆᕙᒃᑕᖏᒃ ᓂᐅᒧᑦ ᐊᑐᒐᒃᓴᐅᕙᒃᑐᑦ, ᑕᕕ ᒪᑯᓂᖓ ᐊᑐᕐᓂᕐᓴᐅᕙᒃᑐᖅ ᑕᕐᓴᒃᓴᖏᓐᓄᑦ ᒪᑯᐊ ᐃ ᐅ ᐊ-ᓂᒃ, ᐃᒻᒪᑲᓪᓚᒃ ᐃᓄᖕᓄᑦ ᑐᓐᓂᕆᔭᐅᕙᓚᐅᕐᓯᒪᔪᑦ ᑎᑎᕋᐅᓯᖏᓐᓂᒃ ᐊᒻᒪᓗ ᐃᒻᒪᓕᓴᕐᓂᑦ ᐃᐳᐃᑦᑐᓂᒃ ᐊᕿᓗᕐᓯᙳᐊᓂᒃ ᐃᓱᒪᒃᓴᕐᓯᐅᕈᑎᒋᕙᒃᑕᖏᑦ.

ᓄᓇ ᐊᑐᖅᑕᐅᖃᑦᑕᐃᓐᓇᖅᐳᖅ ᐊᒥᓱᓄᑦ ᓴᓇᐅᒐᓕᐅᖅᑎᓄᑦ ᐱᐅᓛᖑᓪᓗᓂ. ᑕᕕᐅᑉ ᓂᐅᕕᐊᒃᓴᖏᓐᓂᒃ ᓂᐅᕕᖅᑕᐅᓛᖑᕙᒃᑐᑦ, ᕿᓚᓗᒐᐅᑉ ᕿᒥᕐᓗᐊᓂᒃ ᓴᓇᓯᒪᔪᑦ ᓯᐅᑎᕈᑏ, ᑕᑯᔭᐅᔪᓐᓇᖅᑐᑦ ᐊᑐᖅᑕᐅᓪᓗᑎᒃ ᐃᓄᖕᓄᑦ ᐊᕐᓇᓄᑦ ᓴᓇᔪᓂᒃ, ᖁᙱᐊᖅᑕᐅᕝᕕᒃᓂᑦ ᐊᒻᒪᓗ ᐊᔾᔨᓕᐅᒐᑎᒍᑦ. ᒫᓐᓇᓗ ᓴᓇᐅᒐᓕᐊᕆᕙᓕᖅᑕᖓ ᐱᔮᕆᓇᓂ ᐱᒋᐊᓚᐅᕐᓯᒪᓪᓗᓂ.

“ᑖᒃᑯᐊ ᓴᐅᓃᑦ ᓲᕐᓗ ᐃᓯᒐᓐᓄᑦ ᓴᕐᕙᐅᓚᐅᕐᑐᑦ,” ᑕᕕ ᐃᖅᑲᐅᒪᔪᖅ ᐱᓲᔭᖅᑎᓪᓗᒍ ᓴᓪᓕᐅᑉ ᓯᒡᔭᖓᓂ.

“ᓇᓗᓇᐃᒃᑯᑎᖃᓕᕐᓂ ᐱᔮᕆᓯᒪᓚᐅᙱᑦᑐᖅ. ᒪᑐᐃᖅᑐᖃᓚᐅᕐᒪᑦ ᓇᓗᓇᐃᒃᑯᑎᖃᓕᕐᓂᕐᒧᑦ.”

ᖃᔮᖅ ᐊᔾᔨᐸᓗᐊᓂᒃ ᐅᓂᒃᑳᖃᕐᒥᔪᖅ: ᕿᓰᑦ ᓂᒡᔭᐅᓪᓗᑎᒃ ᖁᖓᓯᒥᐅᑕ ᐱᒋᐊᕈᑎᖃᓚᐅᕐᓯᒪᔪᑦ ᐊᕐᓇᙴᔾᔪᑎᒥᒃ ᐊᓕᒃᑐᖃᕐᒪᑦ ᑐᓄᐊᒍᑦ ᑕᑯᔭᐅᓂᐊᖅᑎᓪᓗᒍ, ᖃᔮᖅ ᐋᕿᒍᑎᒋᖃᐅᖅᑐᕈᑎᕕᓂᖓ.

ᒫᓐᓇᓕ ᕿᓰᑦ ᖁᓪᓗᕐᓯᒪᐅᕐᑐᑦ ᐃᓚᓯᒪᓪᓗᑎᒃ ᓄᕗᖅᖠᕐᓂᒃ ᐊᒻᒪ ᐃᒐᓚᐅᔭᕈᔪᖕᓂᒃ—fur sreal, ᑕᐃᔭᖏᑦ—ᐱᔭᐅᔪᒪᐃᓐᓇᐅᔭᖃᑕᐅᓕᕐᑐᑦ.

“ᐃᓄᐃᑦ ᐃᓱᒪᕈᓘᔭᖃᑦᑕᐃᓐᓇᕐᓯᒪᖕᒪᑕ ᖃᓄᐃᑦᑐᑐᐃᓐᓇᕐᓂᒃ ᓇᓂᔪᓐᓇᖅᑕᖏᓐᓂᒃ,” ᖃᔮᖅ ᐅᖃᖅᑐᖅ.

ᑕᒪᓐᓇᓕ ᑐᑭᓕᐅᕈᑎᐅᕗᖅ ᕿᓰᑦ ᐊᐅᓚᑕᐅᓂᕐᓴᐅᓕᕐᓂᖏᓐᓂᒃ, ᐊᒻᒪᓗ ᐊᑐᖅᑕᐅᔪᓐᓇᕐᓂᖏᑦ ᐱᐅᓴᐅᑎᐅᓗᑎᒃ, ᐊᓐᓄᕌᖑᓗᑎᒃ ᐊᒻᒪ ᐊᓯᖏᓐᓂᒃ ᐱᖁᑎᓂᒃ.

ᑕᐃᒪᓐᓇᓗ ᓂᐅᕕᖅᑕᐅᕙᒃᐳᑦ, ᐅᖃᖅᑐᖅ ᒍᕋᑎ ᑲᑯᒃᑎᓐᓂᖅ, ᐃᖅᑲᓇᐃᔭᖃᑦᑕᖅᑐᖅ ᓇᖕᒥᓂᖃᕐᓂᕐᒧᑦ ᖃᐅᔨᒪᔨᐅᓪᓗᓂ ᓄᓇᕗᒥᑦ ᐱᕙᓪᓕᐊᔪᓕᕆᔨᒃᑯᑦ ᑯᐊᐳᕇᓴᒃᑯᓐᓄᑦ: ᐆᒪᔪᕕᓂᙶᖅᑐᑦ ᐱᖁᑎᒃᓴᑦ, ᓴᓇᔭᐅᓯᒪᔪᑦ ᒪᑯᓇᙵᑦ ᑑᒑᓂᒃ, ᐊᕐᕕᐅᑉ ᑕᖅᖢᐊᓂᒃ, ᑐᒃᑐᐃᑦ ᓇᒡᔪᖏᓐᓂᒃ ᐊᒻᒪ ᕿᓯᖕᓂ.

ᐅᕙᓂ ᓄᓇᕗᒥᑦ ᐱᕙᓪᓕᐊᔪᓕᕆᔨᒃᑯᑦ ᑯᐊᐳᕇᓴᓐᑯᓐᓂ, ᑲᒃᑯᑦᑎᓐᓂᐅᑉ ᐱᓕᕆᐊᒃᓴᖓᓕ ᓴᕿᑎᑦᑎᕙᓪᓕᐊᓂᕐᒥᒃ ᐃᓄᐃᑦ ᓴᓇᐅᒐᓕᕆᔩᑦ ᓴᓇᐅᒐᖏᓐᓂᒃ ᐊᒻᒪᓗ ᓂᐅᕕᖅᐸᒃᖢᓂ ᐱᖁᑎᒃᓴᓂᒃ ᓂᐅᕕᕐᕕᒃᓄᑦ ᓄᓇᕗᒥᑦ ᐅᑯᓇᓂ ᐃᕙᓗ, ᑭᓗᒃ, ᔭᓯ ᐅᓈᖅ ᐅᐸᒡᕕᒃ ᐊᒻᒪ ᐅᖅᑯᕐᒥᐅᑦ ᓂᐅᕕᕐᕕᓄᑦ.

“ᓄᓇᕗᒥᑦ ᓴᓇᐅᒐᑕᖃᕈᓘᔭᕐᒪᑦ, ᑭᓯᐊᓂᓕ ᒫᓐᓇ ᐱᓯᒪᓛᕆᔭᕗᑦ ᐱᐅᓴᐅᑎᒐᓚᐅᑦ, ᖃᐅᔨᒪᔭᒃᑯᑦ,” ᑲᑯᑦᑎᓐᓂᖅ ᐅᖃᖅᑐᖅ.

“ᐃᓅᒍᕕᑦ ᓴᓇᐅᒐᓕᐅᕐᑎᐅᓗᑎ ᓇᓂᑐᐃᓐᓇᖅ, ᓴᓇᐅᒐᑎ ᓇᒧᙵᐅᕈᓘᔭᓕᖅᑐᓐᓇᖅᑕᑎᑦ.”

ᑲᑯᑦᑎᓐᓂᖅ ᐅᖃᓚᐅᕐᑐᖅ ᓂᐅᕕᖃᑦᑕᓚᐅᕐᓯᒪᓂᕐᒥᓂᒃ ᐅᓄᓈᕐᓯᒪᔪᓂ 50-ᐅᑲᑕᒃᖢᑎᒃ, ᒫᓐᓇᓗ ᒪᕐᕈᐃᖅᖢᓂ ᐅᓄᕐᓯᕚᓪᓕᖅᑐᖅ 100-ᐅᓕᖅᖢᑎᒃ.

ᑕᒪᓐᓇᓕ ᑐᑭᖃᖅᑐᖅ ᐊᒥᓲᓂᕐᓴᐅᕙᓪᓕᐊᔪᑦ ᐃᓄᐃᑦ ᓴᓇᐅᒐᓕᐅᕐᑎᑦ ᐃᒻᒥᓂᒃ ᐸᕿᓕᕈᓐᓇᕐᒪᑕ ᐱᓕᕆᐊᖏᑦᑎᒍᑦ—ᐱᓇᓱᐊᕈᓯᐊᑉ ᐃᓱᐊᓂᑐᐃᓐᓇᐅᙱᑦᑐᖅ ᐱᓕᕆᐊᖃᕐᓂᕐᒥᑦ.

ᐱᐅᓴᐅᑎᒐᓚᐅᑦ ᐱᔭᐅᔪᒪᑦᑎᐊᕋᓗᐊᖅᖢᑎᒃ, ᐊᓐᓄᕌᑦ ᐃᓂᖃᑦᑎᐊᖅᐳᑦ ᓱᓕ ᓄᓇᕗᒥᑦ ᓴᓇᐅᒐᓕᕆᓂᒃᑯᑦ ᐊᒻᒪᓗ ᒥᕐᓱᖅᑎᐅᑉ ᐃᓱᒪᓕᐅᕆᔪᓐᓇᕐᓂᖓᒍᑦ.

ᑲᑯᑦᑎᓐᓂᖅ ᐸᓂᖓ ᐊᓂᒍᐃᑦᑎᐊᕐᓂᖓᓂᒃ ᐃᒻᒥᓅᓕᖅᑎᑦᑎᔾᔮᙱᑦᑐᖅ, ᑭᓯᐊᓂᓕ ᐅᖃᐅᖃᖢᓂ ᒥᕐᓱᖅᑎᐅᔪᖅ ᕕᒃᑑᕆᐊ ᑲᑯᑦᑎᓐᓂᖅ ᐃᑲᔪᕐᓯᒪᓂᖓᓂ ᐃᓄᐃᑦ ᐊᕐᓇᐃᑦ ᓯᓚᒥᐅᑕᕆᕙᒃᑕᖏᓐᓂᒃ ᐅᑯᑎᒎᓇ ᐊᒃᑐᐊᑦᑎᐊᖅᑐᓂᒃ ᖁᓕᑦᑕᐅᔭᓂᒃ.

ᕕᒃᑑᕆᐊᔅ ᐋᑎᒃ ᕚᓴᓐ ᑐᙵᓱᒃᑎᑕᐅᓚᐅᕐᓯᒪᔪᖅ ᓴᓇᐅᒐᖏᓐᓂᒃ ᓴᕿᔮᖅᑎᑦᑎᖁᔭᐅᓪᓗᓂ ᐱᐅᕆᔅᒥᑦ ᐊᓐᓄᕌᓂᒃ ᓴᕿᔮᖅᑎᑦᑎᓂᕐᒧᑦ ᐱᓇᓱᐊᕈᓯᐅᑎᓪᓗᒍ ᒫᑦᓯᒥᑦ, ᑖᒃᑯᐊᓗ ᓄᓇᕗᒥᑦ ᓴᓇᐅᒐᓂᒃ ᓴᕿᔮᒐᖃᖅᑎᑦᑎᕙᒃᖢᑎᒃ.

“ᐃᓄᐃᑦ ᐃᓱᒪᕈᓘᔭᕈᓐᓇᕐᒪᑕ,” ᑲᑯᑦᑎᓐᓂᖅ ᐅᖃᖅᑐᖅ. “ᐊᒻᒪᓗ ᐅᒃᐱᕈᓱᒃᖢᖓ ᓄᓇᕗᑦ ᑕᒪᑐᒥᖓ ᐃᓄᐃᑦ ᓴᓇᐅᒐᖏᓐᓄᑦ ᐃᑲᔪᕈᑎᒻᒪᕆᐅᓂᖓᓂᒃ.

“ᓴᓇᐅᒐᓕᐅᕐᑏᑦ ᑲᑎᖃᑎᒌᒃᑳᖓᒥᒃ, ᑕᑯᖃᑦᑕᕐᒪᑕ ᐊᓯᖏᑦᑕ ᓴᓇᐅᒐᖏᓐᓂᒃ ᐊᒻᒪᓗ ᐃᓱᒪᓕᐅᕆᔪᓐᓇᕐᓯᕙᒃᖢᑎᒃ.”

Share This Story

(0) Comments

Join the Conversation

Your email address will not be published. Required fields are marked *

*