ᐃᓚᒌᑦ ᓄᓇᕗᑦ (Team Nunavut) ᐊᕐᓴᖅᑐᓂ ᐱᙳᐊᕐᑎ ᐸᐃᑕᓐ ᑕᐃᔪ-ᐊᒃᓇᕕᒐᒃ ᐃᖃᓗᒃᑑᑦᑎᐊᕐᓂ ᓄᓇᓕᒃ ᑎᒍᒥᐊᖅᑎᐅᓂᐊᕐᑐᖅ ᓄᓇᕗᑦ ᐊᐅᓚᖁᑎᖓᓂ ᐱᙳᐊᕕᒡᔪᐊᕐᓇᖅ ᐅᑭᐅᕐᑕᖅᑐᕐᒥ ᐱᒋᐊᓕᖅᑎᓪᓗᒍ ᕗᐊᐃᑦ ᕼᐅᐊᔅᒥ ᒫᔅᓯ 8-ᒥ. (ᐊᔾᔨᙳᐊᖅ ᐅᕙᙵᑦ ᐸᐃᑕᓐ ᑕᐃᔪ-ᐊᒃᓇᕕᒐᒃ)
ᓄᓇᕗᒧᑦ ᐊᐅᓚᖁᑎᒥ ᑎᒍᒥᐊᖅᑎᐅᓂᐊᕐᑐᖅ ᓂᕆᐅᕈᓘᔭᕐᑐᖅ, ᖁᕕᐊᒋᓪᓗᓂᐅᒃ ᐅᑭᐅᕐᑕᖅᑐᕐᒥ ᐅᑭᐅᒃᑯᑦ ᐱᙳᐊᕕᒡᔪᐊᕐᓇᐅᑉ ᓯᕗᓂᐊᒍᑦ
ᐸᐃᑕᓐ ᑕᐃᔪ-ᐊᒃᓇᕕᒐᒃ ᐊᕐᓇᐃᑦ ᐊᕐᓴᖅᑎᖏᓐᓃᑦᑐᖅ ᓂᕈᐊᖅᑕᐅᓂᑯ ᑲᒪᔨᐅᔪᓄᑦ
For English version, see Nunavut flag-bearer ‘anxious’ but ‘honoured’ ahead of Arctic Winter Games.
ᐸᐃᑕᓐ ᑕᐃᔪ-ᐊᒃᓇᕕᒐ ᐅᖃᕐᑐᖅ “ᐅᐱᒍᓱᒃᓂᖓᓂ ᐊᒻᒪ ᓂᕆᐅᕈᓘᔭᖅᖢᓂ” ᓂᕈᐊᕆᔭᐅᓚᐅᕐᑎᓪᓗᒍ ᓄᓇᕗᑦ ᐊᐅᓚᖁᑎᐊᓂ ᑎᒍᒥᐊᖅᑎᐅᓂᐊᕐᓂᖓᓂ ᐱᒋᐊᓕᕐᐸᑦ ᐅᑭᐅᕐᑕᖅᑐᕐᒥ ᐅᑭᐅᕐᑯᑦ ᐱᙳᐊᕕᒡᔪᐊᕐᓇᖅ ᕗᐊᐃᑦᕼᐅᐊᔅᒥ ᒫᔅᓯ 8-ᖑᓕᕐᐸᑦ.
“ᐊᐅᓚᖁᑎᒥ ᑎᒍᒥᐊᕐᓗᓂ ᐱᒋᐊᓕᕐᐸᑦ ᐊᒻᒪ ᐃᓚᒋᔭᐅᓗᓂ ᐃᖅᑲᐅᒪᔭᐅᓇᔭᖅᑐᒥ ᐅᐊᑲᓪᓛᓗᒃ,” ᐅᖃᕐᑐᖅ ᑕᐃᔪ-ᐊᒃᓇᕕᒐᒃ, ᓄᓇᕗᒥᑦ ᐊᕐᓇᐃᑦ ᐊᕐᓴᖅᑎᓄᑦ ᕿᑎᐊᓂ ᐱᙳᐊᖅᑎᒋᔭᐅᔪᖅ,
ᐃᖅᑲᓗᒃᑑᑦᑎᐊᓂ ᓄᓇᖃᕐᓂᑰᓪᓗᓂ, ᒫᓐᓇᓗ ᐃᓕᓐᓂᐊᖅᖢᓂ ᒪᐅᓐ ᕈᐊᐃᐅᓪ ᓯᓚᑦᑐᖅᓴᕐᕕᐊᓗᒃᒥ ᒑᒍᕆᒥ, ᑐᐊᕕᕐᓇᖅᑐᓕᕆᓂᕐᒥ ᐅᕝᕙᓘᓐᓃᑦ ᐃᕐᓂᓱᒃᓰᔨᐅᓕᕐᓂᐊᕐᓗᓂ.
ᓂᕈᐊᕆᔭᐅᓚᐅᕐᓯᒪᔪᖅ ᐊᐅᓚᖁᑎᒥ ᑎᒍᒥᐊᕐᑎᐅᓂᐊᕐᓗᓂ ᑲᒪᔨᒋᔭᖏᓐᓄᑦ ᐅᓕᕕᐊ ᑖᐸᑕᐃ ᐊᒻᒪ ᒦᒐᓐ ᕼᐋᓯᒧᑦ.
“ᐅᒃᐱᕈᓱᑐᐃᓐᓇᙱᒻᒪᑕ ᓄᓇᕗᒥᑦ ᑭᒡᒐᖅᑐᐃᔪᓐᓇᕐᓂᓐᓂ ᑭᓯᐊᓂᓕ ᖃᓄᐃᓕᐅᕈᒪᓂᕐᒥᓐ, ᐱᓕᕆᔪᒪᑦᑎᐊᕐᓂᕐᒥ ᐊᒻᒪ ᐱᓇᓱᐊᑦᑎᐊᕐᓂᕐᒥ ᐅᑯᐊ ᐃᓚᒌᑦ ᓄᓇᕗᑦ ᓇᒃᓴᕈᓐᓇᕐᓂᐊᕐᒪᑕ ᐱᙳᐊᕕᔾᔪᐊᕐᓇᒧᑦ,” ᐅᖃᕐᑐᖅ ᑕᐃᔪ-ᐊᒃᓇᕕᒐᒃ, ᐃᓚᐅᖃᑦᑕᕐᓯᒪᒪᔪᖅ ᐃᖃᓗᒃᑑᑦᑎᐊᓂ ᖃᕝᕕᒑᕐᔪᒃᓂ ᐊᒃᓴᕐᑎᓂ ᐃᓚᐅᔪᓐᓃᕐᐸᒃᖢᓂᓗ.
“ᑕᒪᕐᒥ ᐊᖓᔪᖅᑳᒃᑲ ᐱᙳᐊᖅᑎᓂ ᐃᑲᔪᖅᑎᐅᒻᒪᑕ ᑕᐃᒪᓕ ᐊᐅᓪᓚᖃᑕᐅᓯᒪᓪᓗᓂ ᐱᙳᐊᕆᐊᖅᑐᓄᑦ, ᐊᔪᕈᓐᓃᕐᓴᕆᐊᖅᑐᓄᓪᓗ, ᐃᑲᔪᖃᑦᑕᖅᖢᓂᓗ ᑮᓇᐅᔭᓕᐅᕋᓱᒃᑎᓪᓗᒍ, ᐊᔪᕈᓐᓃᕐᓴᕆᐊᖅᑎᓪᓗᒋᑦ ᐃᓚᐅᕙᒃᖢᑎᒃ — ᑕᐃᒪᓐᓇᕈᓘᔭᖅ,” ᐅᖃᕐᑐᖅ ᐅᖃᐅᓯᕆᓪᓗᓂᒋᑦ ᐊᓈᓇᖓ ᑕᐃᓯ ᐃᓯᒋᑐᒃ ᐊᒻᒪ ᐊᑖᑕᖓ ᑎᐅᕆ ᐊᒃᓇᕕᒐᒃ.
ᓄᓇᕗᒥᑦ ᐊᕐᓇᐃᑦ ᐊᕐᓴᖅᑎᖏᑦ ᐱᕙᓪᓕᐊᔪᓐᓇᕐᓯᓚᐅᕐᑐᑦ ᐱᙳᐊᖃᑕᐅᑎᓪᓗᒋᑦ ᑲᓇᑕᒥ ᐊᐅᔭᒃᑯᑦ ᐱᙳᐊᕕᒡᔪᐊᕐᓇᒥ ᔭᐃᓐ ᔮᓐᔅ ᓂᐅᕙᐅᓐᓛᓐᒥ ᐋᒐᓯᐅᑎᓪᓗᒍ, ᑕᐃᔪ-ᐊᒃᓇᕕᒐᒃ ᐅᖃᕐᑐᖅ. ᐱᙳᐊᖅᑎᐅᓂᑯᑦ ᐱᙳᐊᖃᑕᐅᓂᐊᕐᒥᔪᑦ ᕗᐊᐃᑦᕼᐅᐊᔅᒥ.
“ᐱᙳᐊᖃᑎᒌᑦᑎᐊᕈᓐᓇᕋᑦᑕ,” ᐅᖃᕐᑐᖅ. “ᐱᓕᕆᖃᑎᒌᒍᓐᓇᖅᖢᑕ ᐊᒻᒪᓗ ᑐᑭᓯᓯᒪᓪᓗᑕ ᖃᓄᖅ ᐱᙳᐊᕆᐊᖃᕐᓂᑦᑎᓐᓂ.”
ᓄᓇᕗᒥᑦ ᐊᕐᓇᐃᑦ ᐊᒻᒪ ᐊᖑᑎᑦ ᐊᕐᓴᖅᑎᖏᑦ ᑲᑎᓐᓂᐊᖅᑐᑦ ᔭᓗᓇᐃᒥ ᒫᔅᓯ 4-ᒥ ᐊᔪᕈᓐᓃᕐᓴᕆᐊᖅᑐᕐᓗᑎ ᐱᙳᐊᕕᒡᔪᐊᖅᑐᓄᐊᓚᐅᙱᓐᓂᖏᓐᓂᒃ ᕗᐊᐃᑦᕼᐅᐊᔅᓯ.
ᓄᓇᕗᑦ 313-ᓂ ᐱᙳᐊᖅᑎᑦᑎᓂᐊᕐᑐᑦ ᐅᑭᐅᕐᑕᖅᑐᕐᒥ ᐅᑭᐅᒃᑯᑦ ᐱᙳᐊᕕᒡᔪᐊᕐᓇᒥ ᐃᓚᖃᕐᓗᑎᒃ 219-ᓂ ᐱᙳᐊᖅᑎᓂ ᐱᙳᐊᕐᓂᐊᖅᑐᓂᒃ 14-ᓂ ᐱᙳᐊᒐᒃᓴᓂ. ᐱᙳᐊᕕᒡᔪᐊᕐᓂᐊᖅᑐᑦ ᒫᔅᓯ 8-ᒥ 15-ᒧ.
ᐃᓚᒌᑦ ᓄᓇᕗᑦ (Team Nunavut) ᐱᙳᐊᖃᑎᖃᑲᑕᖕᓂᐊᖅᑐᑦ ᓄᓇᕕᒃᒥᐅᓂ, ᐊᓛᔅᑲᒥᐅᓂᒃ, ᔫᑳᓐᒥᐅᓂᒃ, ᓄᓇᑦᓯᐊᕐᒥᐅᓂᒃ, ᐋᐴᑕᐅᑉ ᓂᒋᐊᓂᙶᖅᑐᓂᒃ, ᑲᓛᓪᖡᑦ ᓄᓇᖓᓂ ᐊᒻᒪ ᓴᕐᐱᒥ ᐅᕙᙵᑦ ᓯᑳᓐᑎᓃᕕᐊᒥ.
(0) Comments