ᓄᓇᕗᒥᑦ ᐃᙱᖅᑎᒻᒪᕇᑦ: ᐊᕐᕌᒍ ᐊᕙᑎᓂᒃ (20) ᐅᖓᑖᓄᓪᓗ ᖁᙱᐊᖅᑕᐅᓕᕐᑐᑦ

For an English version of this story, see Nunavut high performers: 20 years up on stage

ᐃᖅᑲᐅᒪᓇᓱᒋᑦ ᓯᕗᓪᓕᖅᐹᓪᓚᕆᖕᒥᑦ ᐃᓄᒃᑐᑦ ᓈᓚᐅᑎᑎᒎᖅᑎᑕᐅᑲᑕᒃᓯᒪᔪᒥᑦ ᐊᒻᒪᓗ, ᐅᑭᐅᑎᑦ ᓈᒻᒪᒃᐸᑕ ᐃᙱᓕᕋᔭᖅᑐᒃᓴᐅᓪᓗᑎᒃ ᐆᒥᖓ, “O Siem, we are all family. O Siem, we’re all the same”, (ᐆ ᓯᐊᒻ, ᐃᓚᒌᒃᑐᒍᑦ. ᐆ ᓯᐊᒻ, ᐊᔾᔨᒌᒃᑐᐃᓐᓇᐅᔪᒍᑦ).

ᖁᙱᐊᖅᑕᐅᓂᖅ ᐊᒻᒪ ᑕᑯᓐᓇᒐᒃᓴᐅᒐᓱᕉᓘᔭᕐᓂᖅ ᐃᓚᒋᔭᐅᖏᓐᓇᐅᔭᕐᒪᑦ ᐃᓄᐃᑦ ᐃᓕᖁᓯᖓᓂᒃ, ᐊᒻᒪ ᐱᓗᐊᕐᑐᒥᑦ ᐊᕐᕌᒍᓂᑦ ᐊᕙᑎᓂᒃ ᐅᑭᐅᓂᒃ ᐊᓂᒍᕐᓯᒪᔪᓂᒃ. ᓄᓇᕗᑦ ᐃᒻᒥᒃᑯᑦ ᑎᐅᕆᑑᕆᐅᓚᐅᕐᑎᓐᓇᒍ ᐅᕝᕙᓘᓐᓃᑦ ᓄᓇᒧᑦ ᐊᖏᕈᑎᑕᖃᓚᐅᕐᑎᓐᓇᒍᑦ, ᐊᒥᓱᑦ ᐃᓄᐃᑦ ᐃᙱᖅᑏ ᐆᑐᓇ ᕗᐃᓕᐊᒻ ᑕᒍᕐᓈᖅ ᐊᒻᒪ ᓵᓕ ᐸᓂᒍᓂᐊᖅ—ᐊᔪᙱᑦᑐᐊᓘᒐᓗᐊᖅᖢᑎᒃ ᐊᒻᒪ ᐱᒻᒪᕆᒋᔭᐅᓪᓗᑎᒃ—ᖃᐅᔨᒪᑦᔭᐅᑦᑎᐊᑐᐃᓐᓇᓚᐅᕐᑐᑦ ᐅᑭᐅᕐᑕᖅᑑᑉᐅᐊᖕᓇᖓᓂᕐᒥᐅᓂᑦ (North of 60).

ᐅᓇ ᓲᓴᓐ ᐊᒡᓘᒃᑲᖅ ᑭᖑᓂᐊᒍᑦ ᓴᕿᓕᓚᐅᕐᑐᖅ.

ᐸᓂᒋᔭᐅᔪᖅ ᐸᓐᑎᑳᔅᑐᑯᓐᓄᑦ ᒥᓂᔅᑕᒥᑦ ᑭᕙᓪᓕᕐᒥᑦ, ᐊᒡᓘᒃᑲᖅ ᓯᕗᓪᓕᖅᐹᒥᑦ ᓂᐱᓕᐅᒐᖓᓂᒃ ᓴᕿᑦᑎᓚᐅᕐᓯᒪᔪᖅ 1990-ᒥᑦ ᐊᒻᒪᓗ ᑭᖑᓂᐊᒍᑦ 7-ᑲᓐᓂᕐᓂᒃ. ᓵᓚᒃᓴᐅᓯᐊᕐᓯᒪᓕᓚᐅᕐᒥᔪᖅ ᐱᖓᓱᓂᒃ ᔫᓄᓂᒃ, ᐊᒥᓱᓂᒃ ᐊᓯᖏᓐᓂᒃ ᐃᓕᓴᕆᔭᐅᔾᔪᑎᓂᒃ ᐊᒻᒪ ᐅᔾᔨᕆᔭᐅᔾᔪᑎᓄᑦ ᐊᒻᒪᓗ, ᓲᑲᐃᒻᒪ, ᐅᓇ ᑐᓴᕐᓈᒐᕐᓂᒃ ᖁᑦᑎᖕᓂᖅᐹᖑᖃᑕᐅᓯᒪᔪᖅ “O Siem,” ᐅᕙᙵᑦ 1995-ᒥᑦ ᓂᐱᓕᐅᒐᖓᓂᒃ ᐊᑎᖃᖅᑐᖅ This Child (ᐅᓇ ᓱᕈᓯᖅ). ᓯᕗᓕᖅᐹᖑᓚᐅᕐᓯᒪᔪᖅ ᐃᓅᓪᓗᓂ ᐃᙱᕐᑎᐅᓪᓗᓂ ᐹᑉᒥᑦ.

ᑭᓯᐊᓂᓕ, ᖃᐅᔨᒪᓚᐅᙱᑦᑐᖅ ᑭᓇᐅᖕᒪᖔᕐᒥᓂᒃ ᐅᕝᕙᓘᓐᓃᑦ ᖃᓄᐃᓕᐅᓚᐅᕐᓯᒪᖕᒪᖔᑦ ᑕᐃᔅᓱᒪᓂ. ᑭᓯᐊᓂᓕ ᖃᐅᔨᒪᓚᐅᕐᑐᖅ ᐸᒡᕕᒋᔭᖃᕆᐊᒃᓴᖓᓂᒃ ᐊᒻᒪ ᐃᙱᐅᓯᐅᖅᖢᓂ ᖃᐅᔨᓇᓱᒍᑎᒋᓪᓗᓂᐅᒃ.

“ᐅᕙᓐᓄᑦ ᐅᓗᕆᐊᓇᒻᒪᕆᓚᐅᕐᑐᖓ,” ᐅᖃᖅᑐᖅ ᐊᒡᓘᒃᑲᖅ, ᑐᕌᓐᑐᒥ ᐊᖏᕐᕋᖓᓂᒃ, “ᐊᒻᒪᓗ ᑎᑎᕋᖅᐸᓪᓕᐊᓪᓗᖓ ᓲᕐᓗ ᑐᐹᕐᓴᐃᔪᖓ ᖃᓄᐃᖁᔭᐅᓂᓐᓄᑦ.”

 ᓱᕈᓯᐅᓪᓗᓂ ᖁᓄᔪᕐᓂᐊᖅᑕᐅᓂᑰᓪᓗᓂ, ᐊᒡᓘᒃᑲᖅ ᐅᔾᔨᕆᓕᑳᓪᓚᖕᓂᖓ ᓈᒻᒪᙱᓕᐅᕈᑎᓂᒃ ᓴᕿᑎᑦᑎᒍᑎᒋᓚᐅᕐᐸᖏᑦ, ᐃᒻᒥᓂᒃ ᐱᒃᑲᖅᑎᑦᑎᓯᒪᓂᕐᒥᒃ ᐊᒻᒪ ᓂᙵᐅᒪᓂᐊᓗᖕᒥᑦ. “ᑕᒪᓐᓇᓕ ᑐᑭᖃᓚᐅᕐᑐᖅ ᖃᓄᐃᓕᐅᖅᐸᓪᓕᐊᓂᕋ ᐱᓕᕆᕙᓪᓕᐊᓂᕐᓄᑦ ᑭᓱᒥᒃᑭᐊᖅ ᐊᒻᒪᓗ ᓴᕿᑦᑎᐊᒃᑲᓐᓂᖅᐸᓪᓕᐊᓪᓗᓂ ᑭᓇᐅᓂᕋ.”

ᓄᓇᕗᑦ 20-ᙳᕐᓂᐊᓕᕐᑎᓪᓗᒍ ᑕᒪᑐᒪᓂ ᐊᕐᕌᒍᒥᑦ, ᐃᓄᐃᑦ ᑎᑕᒃᑏᑦ, ᐃᙱᐅᓯᐅᕐᑏᑦ, ᑕᑯᓐᓇᒐᒃᓴᐃᑦ, ᐊᐅᓚᑦᑎᔩᑦ, ᒧᒥᕐᑏᑦ ᐊᒻᒪ ᐃᙱᖅᑏᑦ ᐊᑐᖅᑕᐅᓚᐅᕐᓯᒪᙱᑦᑐᒃᑯᑦ ᐱᕈᖅᐸᓪᓕᐊᓂᕐᒦᖕᒪᑕ ᐊᒻᒪ ᖁᕕᐊᓲᑎᐅᓂᕐᒥᒃ—ᑕᒪᐃᓐᓂ ᓄᓇᕗᑦ ᐃᓗᐊᓂᑦ ᐊᒻᒪ ᓯᓚᑖᓂ.

ᐱᕙᓪᓕᐊᔪᑦ ᐊᒻᒪ ᖁᕝᕙᖅᐸᓪᓕᐊᔪᑦ

ᑭᓯᐊᓂᓕ ᑕᒪᒃᑯᓄᖓ ᒫᓐᓇᓕᓴᐅᓕᕐᑐᓄᑦ ᐃᓄᖕᓄᑦ ᐱᒻᒪᕆᐅᒋᔭᐅᓕᕐᑐᑦ ᐆᑐᓇᖅ ᐃᙱᕐᑎ-ᐃᙱᐅᓯᐅᕐᑎ ᐊᒻᒪ ᑎᑕᐅᓯᕐᒥ ᐊᔾᔨᐅᒍᓃᖅᑎᑦᑎᓯᒪᔪᖅ ᑖᓂᐊ ᑕᒑᖅ, ᑎᑕᒃᑏᑦ ᐸᐃ ᒐᓚᖃᐅᑏᑦ ᐊᒻᒪᓗ ᖃᐅᔨᒪᔭᐅᑦᑎᐊᕐᑐᖅ ᓄᓇᕐᔪᐊᒥ ᑕᕐᕆᔭᒐᒃᓴᓕᐅᕐᑎ ᓴᖃᓕᐊᓯ ᑯᓄᒃ, ᐊᒥᓱᕈᓘᔭᐅᖕᒥᖕᒪᑕ ᖁᙱᐊᒐᒃᓴᐃᑦ ᐊᒻᒪ ᐃᓅᓱᒃᑐᑦ ᐱᕙᓪᓕᐊᔪᑦ ᐊᒻᒪ ᖁᕝᕙᖅᐸᓪᓕᐊᔪᑦ.

ᐅᓇ ᑕᑯᓗᒍ ᑭᐊᓕ ᕗᕇᓱ, ᓴᓂᑭᓗᐊᕐᒥ ᐃᓅᓂᑯ ᐅᓇ ᐊᒡᓘᒃᑲᖅ ᑎᑎᕋᑲᑕᓕᖅᑎᓪᓗᒍ ᐃᙱᐅᓯᒃᓴᒻᒪᕆᖏᓐᓂᒃ.

ᕗᕇᓱ, ᐱᕙᓪᓕᐊᒻᒪᕆᒃᑐᖅ ᐃᓄᒃ ᐹᑉ ᒥᑦ ᐃᙱᕐᑎ ᐊᒻᒪ ᐊᒡᓘᒃᑲᕐᒥᑦ ᐱᒻᒪᕆᒋᔭᖃᖅᖢᓂ, ᐃᓕᓴᕆᔭᐅᓕᓚᐅᕐᓯᒪᔪᖅ 2013-ᒥᑦ ᓴᕿᑎᑦᑎᓚᐅᕐᑎᓪᓗᒍ ᔫᑑᑉᑯᑦ ᐃᓄᒃᑎᑑᖓᔪᒥᒃ “ᑕᐃᒪᓐᔅ” ᐃᙱᐅᓯᖓ ᕆᐊᓇᐅᑉ—ᑕᕐᕆᔭᒐᐅᓪᓗᓂ ᐊᒻᒪ ᑕᑯᔭᐅᓯᒪᓕᖅᖢᓂ 336,778 ᐊᒻᒪ ᓱᓕᐅᕙᓪᓕᐊᓪᓗᑎᒃ. 2017-ᒥᑦ ᕼᐃᑉ ᕼᐋᑉ ᓂᐱᓕᐅᒐᖓ ᐊᑎᖃᖅᑐᖅ ᓯᐊᑦᓇ ᓂᕈᐊᒐᒃᓴᐅᓚᐅᕐᓯᒪᔪᖅ ᔫᓄᒧᑦ.

ᐊᒡᓘᒃᑲᖅᑎᑑᙱᑦᑐᕐᓕ, ᕗᕇᓱ, ᒫᓐᓇ 25, ᐃᓐᓇᕈᓕᓚᐅᕐᓯᒪᖕᒪᑦ ᒪᓕᒐᓕᕆᓂᖅ ᐊᒻᒪ ᐃᓅᖃᑎᒌᖕᓂᕐᒧᑦ ᐱᕙᓪᓕᐊᓕᖅᑐᓂᒃ. ᐊᒻᒪᓗ ᐃᓕᓐᓂᐊᕐᓯᒪᓪᓗᓂ ᐃᓄᖕᓄᑦ ᐊᒻᒪ ᓄᓇᖃᖅᑳᖅᑐᓄᑦ ᐃᓱᒫᓘᑎᓂᒃ ᐋᑐᕚᒥᑦ ᐊᒻᒪ ᐳᕆᑎᔅ ᑲᓚᒻᐱᐊᒥᑦ, ᑖᓐᓇ ᒪᒃᑯᒃᑐᖅ ᐃᙱᕐᑎ ᐅᖃᑲᐅᕐᑐᕈᓐᓇᖅᑐᖅ ᑭᓱᓄᒃ ᓈᒻᒪᙱᓕᐅᕈᑎᖃᕐᓂᕐᒥᓂᒃ ᐃᓱᒪᖓᒍᑦ: ᓄᓇᖃᑎᒌᓕᕐᓂᖅ, ᐊᔾᔨᒌᒃᑎᑦᑎᖃᑦᑕᙱᓐᓂᖅ, ᐃᒻᒥᓃᖃᑦᑕᕐᓂᖅ, ᐊᑐᓗᐊᔭᓐᓂᖅ, ᐋᓐᓂᕐᓯᕆᕙᖕᓂᖅ ᐊᒻᒪ ᐃᓱᒪᒃᑯᑦ ᐋᓐᓂᐊᖃᕐᓂᖅ.

“ᐆᒥᖓ ᐃᓄᐃᑦ ᑐᑭᓯᖁᕙᒃᑲ: ᐃᒃᓯᕚᑐᐃᓐᓇᕐᓗᓯ ᒪᓂᑐᐃᓐᓇᙱᓚᐅᕆᑦᑎ. ᐋᓐᓂᐊᖃᓪᓗᐊᕈᓐᓃᕐᑐᒍᑦ. ᐱᓇᓱᒋᐊᖃᒻᒪᕆᒃᐳᓯ ᐱᑦᑎᐊᙱᓐᓂᓕᐊᓗᖕᒥᑦ ᐊᐃᑉᐸᕇᖕᓂᕐᒥᑦ, ᐱᑦᑎᐊᙱᑦᑐᐊᓗᖕᓂᒃ ᐊᖏᕐᕋᒥᑦ, ᓄᓇᖕᓂᓪᓘᓐᓃᑦ ᓅᓪᓗᓯ ᑎᒥᓯ ᖃᓄᐃᖁᓇᒍ ᐊᒻᒪ ᓱᕈᓯᕐᓯ,” ᐅᖃᖅᑐᖅ ᕗᕇᓱ ᐊᖏᕐᕋᖓᓂ ᐅᐃᓂᐱᒡᒥ. “ᑐᑭᓯᔪᖓ ᐊᒃᓱᕈᕐᓇᖅᑐᖅᓯᐅᕐᑐᒍᑦ. ᑭᓯᐊᓂᓕ ᐱᓇᓱᒻᒪᕆᒡᓗᑕ ᐃᑲᔪᖅᑕᐅᔪᒪᔭᕆᐊᖃᕋᑦᑕ.”

ᐅᖃᐅᓯᐅᓂᑯᒥᑦ ᐆᒧᖓ ᐊᓪᓚᖓᔪᓄᑦ ᐃᑲᔪᖅᑎᒻᒪᕆᐅᓚᐅᕐᑐᖅ ᓗᐃ ᐅᕆᐊᓪ ᐊᐱᕆᔭᐅᒐᒥ ᓴᙱᓂᖓᓂ ᑎᑕᐅᓯᕆᓂᖅ: “ᐃᓅᖃᑎᒃᑲ ᓯᓂᖕᓂᐊᕐᑐᑦ ᐊᕐᕌᒍᓂ 100-ᓂ,” ᐅᖃᖅᑐᖅ. “ᑭᓯᐊᓂᓕ ᐃᖅᑯᒻᒪᕈᑎᒃ, ᑎᑕᐅᓯᕆᔨᐅᔪᑦ ᑖᒃᑯᐊ ᑕᕐᓂᖏᓐᓂ ᐅᑎᖅᑎᑦᑎᓂᐊᕐᑐᑦ.”

ᓄᓇᕗᒥᑦ ᑕᑯᕋᓐᓈᒃᓴᓕᕆᔩᑦ ᑕᒪᑐᒥᖓ ᐊᑐᓕᖅᑎᑦᑎᓯᒪᕗᑦ ᐅᖃᐅᓯᕕᓂᕐᒥᒃ.

ᐃᓱᒪᒋᓪᓗᒍ ᓵᓚᑦ ᖃᒪᓂᖅ, ᐃᓚᒋᔭᐅᔪᖅ ᔫᓄᒧᑦ ᓂᕈᐊᒐᒃᓴᐅᔪᑦ ᑲᑕᔾᔭᖅᑏᑦ ᐊᒻᒪ ᐃᙱᖅᑎᐅᓪᓗᑎᒃ ᐱᖓᓱᑦ ᓯᓚ ᐊᒻᒪ ᐅᕋᐃᔅ.

ᖃᒪᓂᖅ ᐅᖃᓚᐅᕐᑐᖅ ᓴᕿᕐᔪᐊᑳᓪᓚᖕᓂᖏᓐᓂᒃ ᐃᓄᐃᑦ ᑕᑯᕋᓐᓈᒐᒃᓴᓕᕆᔨᐅᔪᑦ, ᐱᔾᔪᑎᖃᖅᖢᓂ ᐃᓚᖓᒍᑦ, ᐃᓅᓱᒃᑐᑦ ᑕᐅᑐᖕᓂᕐᓴᐅᓕᕐᒪᑕ ᐃᓄᖕᓂᑦ ᑕᓚᕖᓴᒥᑦ ᐊᒻᒪ ᐃᓕᓴᕆᔭᐅᔾᔪᑎᑖᕐᓂᕐᒧᑦ ᓴᕿᔮᒐᕐᓂᒃ, ᑭᒃᑯᓕᒫᓄᑦ ᖃᓄᐃᓕᐅᕈᑎᒃᓴᓂᒃ, ᐃᒥᒐᓚᒡᕕᖕᓂᒃ ᐊᒻᒪ ᑕᑯᔭᒐᖃᕐᕕᖕᓂᒃ ᐊᒻᒪᓗ ᑐᓵᖃᑦᑕᖅᖢᑎᒃ ᐃᓄᒃᑎᑐᑦ ᐃᙱᐅᓯᕐᓂᒃ ᓈᓚᐅᑎᒃᑯᑦ.

ᑕᒪᒃᑯᐊ ᓴᖅᑭᔮᕈᑎᐅᔪᑦ ᒪᓂᓴᐅᑎᐅᖃᑦᑕᕐᒪᑕ ᐊᒻᒪᓗ ᑕᑯᕋᓐᓈᒐᒃᓴᓕᕆᓂᕐᒥᑦ ᐱᓕᕆᐊᖃᕈᒥᓇᓕᕐᑎᑦᑎᓪᓗᑎᒃ, ᐊᒻᒪ ᐃᓱᒪᓇᕐᓯᓪᓗᓂ ᐊᔪᕐᓇᙱᑦᑐᕐᓇᕐᓂᖏᓐᓂᒃ, ᐅᑲᖅᑐᖅ.

“ᒫᓐᓇ ᓄᓇᖃᖅᑳᖅᑐᓄᑦ ᖁᕕᐊᓇᕐᑐᐊᓗᒃ. ᓴᕿᑦᑎᕙᓪᓕᐊᒻᒪᕆᖕᒪᑕ ᐃᓕᖁᓯᑐᖃᒃᑯᑦ ᐊᑐᖅᑕᐅᕙᒃᑐᓂᒃ ᐊᒻᒪᓗ ᐱᒻᒪᕆᐅᑎᑕᐅᓂᕐᓴᐅᓪᓗᑎ ᐊᓯᐅᑎᑕᐅᑦᑕᐃᓕᓪᓗᑎᒃ,” ᐅᖃᖅᑐᖅ ᖃᒪᓂᖅ ᑐᕌᓐᑐᒥ ᔭᓄᐊᕆᐅᑎᓪᓗᒍ ᐱᓇᓱᐊᕈᓯᕐᓂ ᐱᖓᓱᓂ ᐱᙳᐊᑲᑕᖕᓂᐊᖅᖢᑎᒃ ᑭᕕᐅᖅ ᐅᑎᖅᐳᖅ.

“ᐃᓄᐃᑦ ᐅᔾᔨᕈᓱᖕᓂᕐᓴᐅᓕᕐᒪᑕ ᐅᕙᑦᑎᓐᓂ. ᖃᐅᔨᒪᕈᓘᔭᕐᒪᑕ ᓇᓂᑐᐃᓐᓇᖅ. ᓱᓕ ᑕᒪᑐᒥᖓ ᖃᐅᔨᒪᙱᑦᑐᖅᑕᖃᐅᕐᑑᒐᓗᐊᖅ ᑭᓯᐊᓂᓕ ᐅᔾᔨᕈᓱᖕᓂᕐᓴᐅᓕᕐᓂᖏᑦ ᖃᐅᔨᒪᓇᕐᑐᖅ ᐊᒻᒪ ᐃᓱᒪᔪᖓ ᑕᑯᕋᓐᓈᒐᒃᓴᓕᕆᓂᖅ ᐃᑲᔪᕈᑎᖃᕐᓂᖓᓂᒃ.”

ᑭᓯᐊᓂᓕ ᐊᔪᙱᓐᓂᖅ ᐊᒻᒪ ᐱᔪᒪᓂᖅ ᓈᒻᒪᙱᓗᐊᕐᒪᑦ, ᐱᓗᐊᕐᑐᒥᒃ ᐃᓄᖕᓄᑦ ᓄᓇᕗᒥᑦ, ᐊᔪᕈᓐᓃᕐᓴᕐᓂᖅ, ᓂᐱᓕᐅᕆᓂᖅ ᐊᒻᒪᓗ ᓄᓇᓕᖕᓄᐊᑲᑕᖕᓂᖅ ᐊᑭᑐᔪᐊᓘᓂᖓᓂᒃ ᐊᒻᒪᓗ ᐊᑭᓕᒐᒃᓴᐅᕙᙱᖢᑎᒃ ᐃᓚᖏᑦ.

ᐊᖁᓯᐅᖅᐸᓪᓕᐊᓂᖅ

ᑕᐃᒪᓕ ᐃᓄᐃᑦ ᐊᖁᓯᐅᖅᐸᓪᓕᐊᓯᕗᑦ. ᑲᑐᔾᔨᖃᑎᒌᖑᔪᑦ ᐅᑯᑎᑐᓇᖅ ᖃᒡᒋᐊᕘᑦ ᖃᑐᔾᔨᖃᑎᒌᖏᑦ ᐊᒻᒪ ᓄᓇᕗᑦ ᕼᐃᑦᒪᐃᑯᔅ(Hitmakerz) ᐊᒻᒪᓗ ᐋᑯᓗ ᑎᑕᐅᑎᑦ—ᓄᓇᕗᒥᑦ ᓯᕗᓪᓕᖅᐹᖅ ᐱᒋᐊᓕᕐᓯᒪᔪᖅ ᓂᐱᓕᐅᕐᕕᒃ—ᐋᕿᒃᓯᓚᐅᕐᒪᑕ ᐱᓇᓱᐊᕈᓐᓇᖅᓯᑎᑦᑎᔪᓐᓇᕐᓂᕐᒥᑦ ᓄᓇᕗᒥᑦ ᐃᙱᖅᑎᐅᔪᒪᔪᓂᒃ.

ᖃᒡᒋᐊᕘᑦ, ᖃᒡᒋᖅ ᐱᓕᕆᐊᖓ ᓵᓚᒃᓴᐅᓯᐊᓚᐅᕐᓯᒪᖕᒪᑦ $600,000-ᓂᒃ ᐆᒥᖓ Arctic Inspiration Prize (ᐅᑭᐅᕐᑕᖅᑐᕐᒥᐅᓂᒃ ᐱᖏᐊᖅᑎᑦᑎᓯᒪᓂᕐᒧᑦ) 2015-ᖑᑎᓪᓗᒍ, ᐱᓇᓱᐊᒐᖃᕐᒪᑕ ᐱᕙᓪᓕᐊᑎᑦᑎᓂᕐᒥᒃ ᐃᓄᐃᑦ ᑕᑯᕋᓐᓈᒐᒃᓯᓕᐅᕐᓂᕐᒥᒃ ᒪᐅᓇ ᐊᔪᕈᓐᓃᕐᓴᕈᑎᒃᓴᓂᒃ ᐊᒻᒪ ᐃᑲᔪᖅᑎᐅᕙᒃᖢᑎᒃ. ᐃᑲᔪᕆᓪᓗᓂ ᓴᕿᑎᑦᑎᓂᕐᒥᒃ ᑕᑯᕋᓐᓈᒐᒃᓯᓕᕕᒃᓴᒥᑦ ᐃᖃᓗᖕᓂᑦ, ᑕᐃᒪᐃᑦᑐᒥᒃ ᐱᑕᖃᙱᑯᑖᒃᖢᓂ.

ᐅᓇ ᑕᑯᕋᓐᓈᕈᑎᒃᓴᓕᕆᓂᕐᒧᑦ ᐃᓂᒃᓴᓕᐅᕐᓂᖅ ᐱᑕᖃᑲᐅᖅᑐᕈᓐᓇᙱᑐᐃᓐᓇᖅᑐᖅ, ᐅᖃᖅᑐᖅ ᐊᒡᓘᒃᑲᖅ, ᑲᑎᒪᔨᐅᖃᑕᐅᔪᖅ ᖃᒡᒋᐊᕘᑦ ᖃᐅᔨᓇᓱᒃᐸᓪᓕᐊᓂᕐᒧᑦ ᑲᑎᒪᔨᖏᓐᓄᑦ. ᓄᓇᕗᑦ ᐊᔪᙱᑑᑎᐊᓗᖕᓂ ᐱᑕᖃᐅᕐᒪᑦ ᐊᒻᒪ ᐃᑲᔪᖅᑎᐅᔪᓐᓇᖅᑐᓂᒃ, ᐅᖃᖅᑐᖅ. ᐃᓄᐃᑦ ᐃᑲᔪᖅᑕᐅᔭᕆᐊᖃᕐᒪᑕ ᑮᓇᐅᔭᑎᒍᑦ ᐱᓇᓱᒍᒪᔭᖏᓐᓂᒃ ᑎᑭᐅᑎᓇᓱᖕᓂᐊᕐᓗᑎᒃ ᐊᒻᒪᓗ ᑕᑯᕋᓐᓈᕐᕕᖃᒻᒪᕆᒡᓗᑎᒃ ᑕᐅᑐᒃᑕᐅᖃᑦᑕᕐᓂᐊᕐᒪᑕ ᐅᑭᐅᕐᑕᖅᑐᕐᒥᑦ.

ᖃᒡᒋᐊᕘᑦ ᐊᐅᓚᑦᑎᔨ ᑐᑭᒧᐊᕐᑎᑦᑎᔨ ᐊᓚᓐ ᕼᐋᒧᑕᓐ ᐅᖃᓚᐅᕐᑐᖅ ᓄᓇᑦᓯᐊᕐᒥ ᐱᕙᓪᓕᐊᔪᓄᑦ ᓂᕆᐅᖕᓂᕋᖅᖢᑎᒃ ᐱᒋᐊᒻᒪᕆᖕᓂᐊᕈᒪᓪᓗᑎᒃ ᐃᖃᓗᖕᓃᑦᑐᒥᑦ ᑕᑯᕋᓐᓈᕐᕕᒃᓴᒥᑦ ᑕᒪᑐᒪᓂ ᐊᕐᕌᒍᒥᑦ, ᐊᒻᒪ ᐱᐊᓂᒃᑕᐅᓇᔭᕐᓗᓂ   2020-ᒥᑦ.

ᓄᓇᕗᑦ ᕼᐃᑦᒪᐃᑯᔅ ᐃᑲᔪᕐᒥᔪᑦ ᐱᒋᐊᖅᑎᑦᑎᕙᓪᓕᐊᓂᕐᒥᑦ ᓯᕗᓂᒃᓴᑦᑎᓐᓂᑦ ᖁᙱᐊᖅᑕᐅᖃᑦᑕᕋᔭᖅᑐᓄᑦ. ᕗᕇᓱ ᐊᒻᒪ ᑐᐊ ᓴᐃᒪᓐᓴᓐ, ᑖᒃᑯᐊᒃ ᕼᐃᑦᒪᐃᑯᔅᖑᔫᒃ, ᓄᓇᕗᑦ ᓄᓇᓕᖏᓐᓄᙵᐅᖃᑦᑕᖅᑑᒃ ᒐᕙᒪᒃᑯᓐᓂᑦ ᐊᒻᒪ ᓄᓇᑖᕐᓂᕐᒧᑦ ᐃᑲᔫᑎᒃᓴᓂᒃ ᐃᑲᔪᕆᐊᖅᑐᑲᑕᒃᖢᑎᒃ ᐃᓅᓱᒃᑐᓂᒃ ᑎᑎᕋᕆᐅᕐᓴᓂᕐᒥᒃ, ᓂᐱᓕᐅᕆᓂᕐᒥᒃ, ᐋᕿᒃᓱᐃᔨᐅᓂᕐᒥᒃ, ᓂᐅᕐᕈᑎᖃᓕᕈᓐᓇᕐᓂᕐᒥᒃ ᐊᒻᒪ ᓂᐅᕐᕈᑎᖃᕐᓂᕐᒥᒃ ᑎᑕᐅᓯᓕᐊᖑᓪᓚᕆᒃᓯᒪᔪᓂᒃ.

ᐋᓐᓂᕐᓯᒪᓂᖅ ᑕᑯᕋᓐᓈᓕᐊᕆᓪᓗᒍ

ᑕᒫᓂ ᑎᐅᕆᑑᕆᒥ ᑲᑕᒃᓯᒪᒍᑎᒃᓴᖃᒻᒪᕆᓂᑰᓪᓗᓂ ᐃᓄᒋᐊᒃᑐᓃᓕᖅᑎᑕᐅᓂᒃᑯᑦ, ᐃᓕᓐᓂᐊᕆᐊᕐᕕᐅᕙᓚᐅᕐᓯᒪᔪᓄᑦ ᐊᒻᒪ ᐊᓯᖏᓐᓂᒃ ᓈᒻᒪᙱᓕᐅᕈᑎᒻᒪᕆᖕᓂ, ᒪᑯᐊ ᖃᓄᐃᓕᐅᕈᓘᔭᕈᑎᒃᓴᑦ ᒪᑯᑎᑐᓇᖅ ᑐᑯᓐᓇᒐᒃᓴᖃᕐᕕᖕᓂᑦ, ᐃᒡᓚᕐᓇᖅᑐᓕᕆᓂᖅ, ᒧᒥᑲᑕᖕᓂᖅ, ᑎᑕᐅᓯᐅᕐᓂᖅ ᐊᒻᒪ ᐊᓯᖏᑦ ᐃᓱᒪᒧᑦ ᓴᕿᑎᑦᑎᕕᐅᕙᒃᑐᑦ ᐱᕙᓪᓕᐊᒻᒪᕆᓕᕐᒪᑕ ᒪᑯᓄᙵᐅᙱᑦᑐᖅ ᖁᕕᐊᓇᓚᐅᕐᓯᒪᙱᑦᑐᓄᑦ ᑭᓯᐊᓂᓕ ᑕᐃᒪᐃᓚᐅᕐᓯᒪᓂᕐᒨᔪᒃᓴᐅᔪᖅ.

ᐊᓐᓂᕐᓯᒪᓂᖅ ᓴᕿᑎᓪᖢᒍ ᖃᓄᐃᓕᐅᕐᓂᒃᑯᑦ ᑕᑯᕋᓐᓂᕐᓯᒪᔪᒥᑦ ᐃᓗᒻᒧᑦ ᐃᑲᔫᑦᑎᒻᒪᕆᐅᕗᖅ, ᐅᖃᖅᑐᑦ ᓄᓇᕗᒥᑦ ᑕᑯᕋᓐᓈᒃᓴᓕᕆᔨᐅᕙᒃᑐᑦ ᐊᒻᒪᓗ ᖁᙱᐊᖅᑎᐅᕙᒃᑐᑦ ᑖᒃᑯᓂᖓ.

“ᖁᕕᐅᓇᙱᑦᑐᖃᕈᓘᔭᕐᒪᑦ ᓄᓇᓕᑦᑎᓐᓂᒃ,” ᖃᒪᓂᖅ ᐅᖃᖅᑐᖅ. “ᑕᑯᕋᓐᓈᒃᓴᓕᐅᕐᓂᖅ ᐊᓐᓂᕐᓯᒪᓂᕐᒧᑦ ᐃᑲᔫᑎᒻᒪᕆᐅᖕᒪᑦ. ᑎᑎᕋᕌᖓᕕᑦ ᐊᒻᒪ ᐃᓱᒪᒋᔭᑎᑦ ᓴᕿᓪᓗᒋᑦ, ᐃᓄᖕᓄᑦ ᖁᙱᐊᖅᑕᐅᓕᕌᖓᕕᑦ, ᐊᒻᒪᓘᓐᓃᑦ ᐊᔪᕈᓐᓃᕐᓴᑐᐃᓐᓇᖅᖢᓂ, ᐃᓗᒃᑯᑦ ᐃᖢᐊᕐᓯᕚᓪᓕᕐᓇᕐᒪᑦ.”

ᐅᓇᓕ ᓱᓕᓗᐊᕐᑐᖅ ᐅᕘᓇ ᑕᑯᓐᓇᒐᒃᓴᓕᐊᖑᓯᒪᔪᑎᑐᑦ ᐆᑐᓇ ᕿᕕᐅᖅ ᐅᑎᖅᐳᖅ (Kiviuq Returns), ᖁᙱᐊᒐᒃᓴᖅ ᑐᙵᕕᖃᖅᖢᓂ ᐃᓐᓇᑐᖃᐃᑦ ᐅᓂᒃᑳᖏᓐᓂᒃ, ᑎᑎᕋᖅᑕᐅᓯᒪᓪᓗᓂ ᐃᓄᖕᓂᑦ, ᐱᒋᐊᕐᕕᖃᖅᖢᓂ ᐃᓄᐃᑦ ᐅᓂᒃᑳᖅᑐᐊᖏᓐᓂᒃ ᐊᒻᒪ ᐱᙳᐊᖅᑕᐅᓪᓗᓂ ᐃᓄᒃᑎᑑᖏᓐᓇᖅᖢᑎᒃ.

ᔭᓄᐊᕆ ᕿᑎᐊᓂ, ᖃᔅᓰᑐᐃᓐᓇᖅᖢᑎᒃ ᐱᙳᐊᓚᐅᕐᑎᓪᓗᒋᑦ ᑐᕌᓐᑐ ᑎᐅᕋᒑᓐ ᑕᑯᓐᓇᒐᖃᕐᕕᒃᒥᑦ (Tarragon Theatre), ᑖᓐᓇ ᑕᑯᓐᓇᒐᒃᓴᖅ ᑎᑎᕋᐅᓯᐅᑲᑕᓚᐅᕐᐳᖅ ᐱᐅᒋᔭᐅᓂᕋᖅᑕᐅᓪᓗᓂ ᑐᓴᒐᒃᓴᓕᐅᕈᑎᑎᒍᑦ. ᐱᔾᔪᑎᖃᕐᓂᕐᒨᙱᑦᑐᖅ ᐊᔾᔨᐅᙱᓐᓂᖓᓂᒃ ᐊᒻᒪ ᑕᑯᓕᒪᓇᙱᖢᓂ—ᑭᓯᐊᓂᓕ ᑕᐃᒪᐃᑦᑐᒻᒪᕆᐅᖕᒪᑦ.

ᐱᔾᔪᑎᖃᕐᑐᕐᓕ ᖁᙱᐊᖅᑐᓂᒃ ᑕᐅᑐᒃᑎᑦᑎᓪᓗᑎᒃ ᖁᙱᐊᕐᕕᒃ ᖃᓄᐃᓕᖓᔭᕆᐊᖃᕐᓂᖓᒍᑦ, ᑕᐅᑐᐃᓐᓇᕈᒪᓇᖅᑐᓂᒃ ᐊᒻᒪ ᖁᕕᐊᓇᖅᑐᓂᒃ ᑕᑯᓐᓈᒐᒃᓴᐅᓪᓗᓂ.

ᐊᒻᒪᓗ ᐱᒻᒪᕆᐅᒐᓗᐊᖅᑎᓪᓗᒍ ᐃᓄᐃᑦ ᐱᔪᓐᓇᕐᓂᖏᑦ ᑲᓇᑕᐅᑉ ᓂᒋᐊᓃᑦᑐᓂᒃ ᖁᙱᐊᖅᑕᐅᖃᑦᑕᕐᓂᖏᓐᓂᒃ, ᐊᒥᓲᓂᕐᓴᑦ ᑕᑯᓐᓇᕋᑦᓴᓕᐅᕐᑏᑦ ᐅᖃᕈᓐᓇᖅᑐᑦ ᐱᒻᒪᕆᐅᓂᕐᓴᐅᓂᖓᓂᒃ ᐃᓅᖃᑎᒋᓐᓄᑦ ᖁᙱᐊᖅᑕᐅᖃᑦᑕᕈᑎᒃ.

ᑕᐃᒪᐃᓐᓂᖓᓄᑦ, ᖃᒡᒋᐊᕘᑦ ᓄᓇᕗᒥᑦ ᓄᓇᓕᖕᓅᑲᑕᓚᐅᕐᑐᑦ ᑭᕕᐅᖅᒥᑦ ᐱᙳᐊᑲᑕᒃᖢᑎᒃ, ᑕᒪᒃᑯᐊ ᐃᓅᓱᒃᑐᑦ ᐃᓕᓐᓂᐊᕈᓐᓇᕐᓂᐊᕐᒪᑕ ᖃᓄᐃᓕᐅᕐᐸᓪᓕᐊᒍᑎᕕᓂᖏᓐᓂᒃ ᐊᔪᙱᑦᑐᐊᓘᑉ ᐊᒻᒪᓗ ᐃᓚᐅᔪᒪᓕᕐᐸᒡᓗᑎᒃ.

ᕕᓂ ᖃᕆᑕᖅ, ᐃᑲᔪᓚᐅᕐᑐᖅ ᐋᕿᒃᓱᐃᕙᓪᓕᐊᓂᕐᒥᒃ ᐊᒻᒪ ᑐᑭᒧᐊᖅᑎᐅᖃᑕᐅᓪᓗᓂ ᑭᕕᐅᖅᒥᑦ, ᐅᖃᓚᐅᕐᑐᖅ ᑕᑯᓐᓇᒐᒃᓴᓕᕆᓂᖅ ᐃᓅᓱᒃᑐᓂᒃ ᑲᙳᓱᒍᓐᓃᖅᐹᓪᓕᕈᑎᐅᕙᖕᓂᖓᓂᒃ, ᐃᒪᑲᓪᓕᓚᓴᕐᓂᒃ ᐅᓂᒃᑳᖅᑐᐊᓂᒃ ᖃᐅᔨᒪᓕᕐᓗᑎᒃ ᐊᒻᒪᓗ ᑕᒪᒃᑯᓂᖓ ᓴᕿᑎᑦᑎᔪᓐᓇᕐᓯᓗᑎᒃ ᐅᓂᒃᑳᖅᑐᐊᕆᔭᖏᑦ ᑕᑯᓐᓇᒐᒃᓴᓕᐊᖏᑦᑎᒍᑦ.

“ᓱᕈᓰᑦ ᐊᔪᙱᑦᑐᕐᔪᐊᙳᐊᖑᔪᒪᒍᑎᒃ ᐅᓂᒃᑳᖅᑐᐊᓃᑦᑐᓂᒃ, ᑕᒪᓐᓇ ᖁᕕᐊᓇᖅᑐᒥᑦ ᐱᒃᑯᒋᔭᖃᕐᓂᕐᒥᒡᓗ ᓴᕿᑎᑦᑎᕙᒃᐳᖅ, ᐱᓕᕆᐊᕆᓚᐅᕐᓯᒪᙱᑕᖏᓐᓂᒃ.”

ᖃᕆᑕᖅ, ᐃᒡᓚᕐᓇᖅᑐᒥᑦ ᑕᑯᒃᓴᕙᒃᑐᖅ ᖃᓄᕐᓕᒥᑦ, ᐅᖃᓚᐅᕐᑐᖅ ᑕᒪᓐᓇ ᑕᑯᕋᓐᓈᒃᓴᓕᕆᓂᖅ ᐱᕈᖅᐸᓪᓕᐊᓂᖓ ᓴᕿᔮᓪᓚᕆᖕᓂᕋᖅᖢᓂᐅᒃ ᑐᕌᓐᑑᑉ ᓯᓚᑖᓂᑦ ᐊᒻᒪ ᐃᖃᓗᖕᓂᑦ, ᓄᓇᓕᖕᓂᒡᓗ ᓱᕈᓰᑦ ᐊᔪᕈᓐᓃᕐᓴᖅᑎᑕᐅᕙᒃᖢᑎᒃ ᑲᑕᔾᔭᕐᓂᕐᒥᒃ ᐊᒻᒪ ᕿᓚᐅᔾᔭᕐᓂᕐᒥᒃ; ᑕᒫᓂᓗ ᑯᑭᑦᑕᐹᓂᒃ ᑎᒍᓯᓂᕐᓴᐅᓕᕐᑐᑦ ᐊᒻᒪ ᐃᙱᐅᓯᐅᖅᐸᒃᖢᑎᒃ; ᑕᒫᓂᓗ ᐊᔪᕈᓐᓃᕐᓴᖅᑐᑦ ᐲᑦ ᐹᒃᓯᖕᒥᑦ ᐊᒻᒪ ᐅᕌᑉᒥᑦ.

“ᖃᓄᐃᓕᐅᕈᑎᒃᓴᑦ ᓴᕿᑎᑦᑎᔾᔪᑎᐅᔪᓐᓇᖅᑐᑦ ᐅᓂᒃᑳᑦᑎᓐᓂᒃ ᐱᑕᖃᒻᒪᕆᓕᕐᒪᑕ. ᐃᓂᖃᖅᑎᑕᐅᓚᐅᕐᑕ, ᓴᕿᑎᑦᑎᔪᓐᓇᖅᐳᒍᑦ,” ᖃᕆᑕᖅ ᐅᖃᖅᑐᖅ, ᐱᔾᔪᑎᖃᖅᖢᓂ ᓄᓇᕗᒥᑦ ᑕᑯᓐᓇᕋᒃᓴᓕᕆᔨᓂᒃ. “ᐃᓂᖃᖅᑎᑕᐅᓚᐅᕐᑕ ᓇᖕᒥᓂᕆᓂᐊᖅᑕᑦᑎᓐᓂᒃ, ᐱᓕᕆᐊᖃᕈᓐᓇᕐᓂᐊᕋᑦᑕ ᒪᑯᓂᖓᑐᐊᙳᙱᑦᑐᖅ ᓄᑕᐅᙱᑦᑐᓂᒃ ᐅᓂᒃᑳᓂᒃ ᑭᓯᐊᓂᓕ ᓇᖕᒥᓂᑦᑎᓐᓂᒃ ᓄᑖᓂᒃ ᐅᓂᒃᑳᑦᑎᓐᓂᑦᑕᐅᖅ.”

ᖃᒡᒋᖅ ᓴᓇᔭᐅᓚᐅᙱᓐᓂᖓᓂᓕ, ᓄᓇᕗᒻᒥᐅᑦ ᑲᔪᓯᓯᒪᓂᐊᕐᑐᑦ ᐊᒡᓘᒃᑲᐅᑉ ᐅᖃᐅᓯᖓᒍᑦ ᓄᓇᒥ ᐊᒃᑐᐊᒍᑎᖏᓐᓂᒃ ᖃᐅᔨᓇᓱᐃᓐᓇᕐᓂᕐᒥᒃ ᐊᒻᒪ ᓴᓇᐅᒐᓕᐅᕐᓂᕐᒥᒃ, ᐃᓱᒪᒋᓪᓗᒋᑦ ᓯᕗᕚᖏᑦ ᐊᒻᒪ ᕿᑐᕐᖓᖏᑦ ᑕᒪᓐᓇ ᐃᖏᕐᕋᑏᓐᓇᖁᓪᓗᒍ.

“ᐆᒪᑎᕕᑦ ᑎᓪᓕᕐᓂᖓ ᒪᓕᒡᓗᒍ”

ᕕᕈᓂ ᓂᕐᓗᖓᔪᒃ, ᓯᕗᓪᓕᖅᐹᖑᓂᑯ ᑐᓂᔭᐅᓪᓗᓂ ᓄᓇᕗᒥᑦ ᑲᓇᓯᓇᐅᑉ ᑕᑯᕋᓐᓈᒃᓴᓕᕆᓂᕐᒧᑦ ᐃᓕᓴᕆᔭᐅᔾᔪᑎᐊᓂᒃ 2013-ᒥᑦ, ᐃᓚᒋᔭᐅᕗᖅ ᑖᒃᑯᓄᖓ.

ᐊᑖᑕᖓᑕ ᐃᓕᓐᓂᐊᕐᑎᑦᑎᑎᓪᓗᓂᐅᒃ ᕿᓚᐅᔾᔭᕐᓂᕐᒧᑦ ᐊᕐᕌᒎᑦ 40 ᐅᖓᑖᓂᑦ ᑭᖑᓂᑦᑎᓐᓂᒃ, ᐱᒻᒪᕆᐊᓘᖂᔨᓚᐅᕐᓯᒪᙱᑦᑐᖅ.

ᑰᒑᖁᒻᒥᑦ ᐱᙳᐊᑲᑕᒃᑎᓪᓗᒋᑦ, ᐱᖃᓐᓇᕆᔭᖓᑕ ᑎᓕᐅᓕᖅᖢᓂᐅᒃ ᕿᓚᐅᔾᔭᖅᑐᓂᒃ ᐱᒡᒍᓴᐅᑎᔪᓂᒃ ᐃᓚᐅᖁᓪᓗᓂᐅᒃ—ᑕᐃᒪᐃᓕᐅᓚᐅᕐᓯᒪᙱᖢᓂᓗ—ᐃᓱᒪᒋᓗᓂᐅᒃ ᐊᑖᑕᖓ ᐃᓅᔪᓐᓃᓚᐅᕐᑐᖅ. ᐊᓱᐃᓛᒃ ᐃᓚᐅᓕᖅᖢᓂ, ᐊᒻᒪᓗ ᓵᓚᒃᓴᐅᓯᐊᖅᖢᓂ ᒎᓗᒥᑦ.

“ᓇᑎᕐᒧᐊᕋᒪ ᐱᙳᐊᕕᖕᒥᑦ, ᓲᕐᓗ ᐅᑎᕐᓯᒪᓚᐅᕐᓯᒪᕗᖓ. ᓱᕈᓯᐅᖂᔨᓕᕐᖢᖓ ᐊᑖᑕᒪ ᖃᐅᔨᕙᓪᓕᐊᑎᒐᓱᒃᖢᓂᖓ ᖃᓄᖅ ᐊᐅᓚᒋᐊᖃᕐᓂᕐᒥᑦ. ᓴᓂᑦᑎᐊᓐᓃᓚᐅᕐᓯᒪᔪᖅ ᐊᒻᒪ ᒪᓕᑲᑕᒃᖢᒍ ᐊᖕᒪᓗᒃᑑᑉ ᓯᓂᐊᒍᑦ. ᓲᕐᓗ 5-ᓂᒃ        6-ᓂᓪᓗᑭᐊᖅ ᐅᑭᐅᖃᖅᑰᔨᓕᕐᖢᖓ,” ᐅᖃᖅᑐᖅ ᓂᕐᓗᖓᔪᒃ.

“ᕿᓚᐅᔾᔭᓕᕌᖓᒪ, ᐃᖢᐊᑦᑎᐊᓕᖃᑦᑕᖅᐳᖓ. ᖃᓄ ᐅᖃᒻᒪᕆᒋᐊᒃᓴᖅ ᐊᔪᕐᑕᕋ. ᑎᓪᓕᕐᓂᐅᔪᖅ ᐊᒡᒐᒃᑯᑦ ᐃᒃᐱᒋᓪᓗᒍ. ᐃᖢᐊᕐᑐᐊᓗᒃ. ᐊᐅᓚᑎᓕᕌᖓᒃᑯ ᕿᓚᐅᑎ, ᓲᕐᓗ ᐊᓄᕆᒥ ᐃᒃᐱᒍᓱᒃᑐᑎᑦ. ᕿᓚᐅᑎᐅᑉ

ᑎᓪᓕᕐᓂᖓ—ᓲᕐᓗᓕ ᐆᒻᒪᑎᕕᑦ ᑎᓪᓕᕐᓂᖓᓂᒃ ᒪᓕᒃᖢᓂ.”

ᓖᓴ ᒍᕆᒍᐊ ᑐᓴᒐᒃᓴᓕᐅᕐᑎᐅᓂᑯ ᐊᒻᒪ ᐊᐅᓚᑦᑎᔨᐅᓪᓗᓂ ᐋᕿᒃᓱᐃᔨ ᓄᓇᑦᓯᐊᕐᒥ ᐱᕙᓪᓕᐊᔪᓄᑦ. ᑐᓴᒐᒃᓴᓕᐅᕐᑎᐅᓯᒪᓕᕐᑐᖅ 25-ᓂ ᐊᕐᕌᒍᓂᒃ, ᒫᓐᓇᓗ ᐅᖃᓕᒫᒐᒃᓴᓂᒃ ᑎᑎᕋᑲᑕᒃᑐᖅ ᐊᖏᕐᕋᖓᓂᒃ ᐋᑐᕚᒥᑦ.

ᕼᐊᐃᐳᑏ

ᑎᑕᐅᓯᕆᕙᒃᓴᑕ: ᐅᕌᑉ (Rap)

ᐊᖏᕐᕋᖓ: ᐃᒡᓗᓕᒑᕐᔪᒃ

ᐊᖏᕐᕋᓕᒃ ᐅᕙᓂ: ᐋᑐᕚ

ᖃᓄᐃᓕᐅᕐᓂᕐᒧᑦ ᒪᓕᒃᓯᒪᔭᖏᑦ: ᐊᓪᓚ ᑯᕇ ᐅᕌᐳ ᕼᐊᓚᓐᐹᒃ ᐊᒻᒪ ᑏᒻ ᕆᔪᕕᓱᐊᓪ

ᑎᑕᑲᑕᙱᒃᑳᖓᑦ: ᓄᓇᓕᖕᓂ ᐃᑲᔪᖅᑎᐅᓂᕐᒧᑦ ᐃᓕᓐᓂᐊᕐᑐᖅ, ᑐᙵᓱᕕᖓᑦ ᐃᓄᐃᑦ

ᐊᒡᒋᖅᑐᖅ: ᓄᑖᑦ ᐃᙱᐅᑎᑦ 2019-ᒧᑦ; ᐋᕿᒃᓱᐃᕙᓪᓕᐊᔪᖅ ᕼᐊᐃᐳ ᐃᓄᒃ ᑎᑕᒃᑎᓂᒃ ᐃᑲᔪᕈᑎᒃᓴᓂᒃ

ᐃᙱᐅᓯᖃᖅᖢᓂ ᐃᓅᖃᑎᒌᖕᓂᕐᒥᑦ: “ᖃᐅᔨᒪᙱᓐᓇᑦᑕ ᖃᓄᖅ ᐊᑯᓂᐅᑎᒋᔪᖅ ᐃᓅᓂᐊᕐᓂᑦᑎᓐᓂᒃ ᓄᓇᒥ. ᖃᐅᒃᐸᑦ ᐃᓅᔪᓐᓃᑐᐃᓐᓇᕆᐊᖃᖅᑐᖓ ᐊᒻᒪᓗ ᑐᖁᒍᒪ, ᐊᒃᓱᓪᓘᓐᓃᑦ ᕿᒪᐃᓂᐊᕋᒪ ᐊᑑᑎᖃᕈᓐᓇᖅᑐᒥᒃ. ᐃᑲᔫᑎᐅᔪᓐᓇᖅᑐᒥᒃ ᐃᓄᖕᓂᑦ ᐊᓯᖏᓐᓂᒃ.”

ᐃᓅᓪᓗᓂ ᐅᕌᐴᓂᖓᓄᑦ: “ᐅᕌᑉᒥᑦ ᐱᓕᕆᐊᖃᓕᕐᑎᓪᓗᖓ ᐃᓅᓱᒃᑑᓚᐅᕐᐳᖓ, ᐃᓱᒪᕙᒃᖢᖓ, ‘ᑕᕝᕙᑐᖅ ᐃᓄᖕᒥᑦ ᐅᕌᐳᑕᖃᕐᓕ ᐃᓱᒪᒋᖃᑎᒋᔪᓐᓇᖅᑕᓐᓂᑦ, ᑐᓵᔪᓐᓇᕋᔭᖅᑕᓐᓂᒃ ᐊᒻᒪᓗ ᐱᓕᕆᓕᕈᒪᒍᑎᒋᔪᓐᓇᖅᑕᓐᓂᒃ,’ ᐃᓅᓱᒃᑑᓪᓗᖓ ᑲᙳᑦᑕᐅᓚᐅᕐᑐᖓ… ᐃᓄᖕᓄᑦ ᐅᖃᐅᔾᔭᐅᕙᒃᖢᖓ ᕿᓂᖅᑑᖏᑦᑐᓂᒃ, ᐃᓅᔪᑎ. ᐊᖑᓇᓱᓪᓗᐊᖅᑐᑎ,’ ᖃᐅᔨᕖ? ᐃᔪᕐᓇᓚᐅᕐᑐᖅ. ᐃᒡᓚᐅᑎᒋᑐᐃᓐᓇᖅᐸᒃᖢᒍ.”

ᓄᓇᕗᒥᑦ ᐃᙱᐅᓯᓕᐅᕐᐸᖕᓂᐅᓕᕐᑐᖅ:  “ᐃᓄᐃᑦ ᐱᓇᓱᑲᑕᓕᕐᑐᑦ ᐊᔪᙱᓐᓂᕐᓴᖏᒍᑦ, ᒪᓕᒍᓐᓃᕐᖢᑎᒃ ᐃᙱᐅᓯᑐᖃᑐᐃᓐᓇᕐᓂᒃ. ᐃᓄᐃᑦ ᐹᑉᒥᑦ ᑐᓴᕐᓈᕐᓴᐅᓕᕐᒪᑕ, ᐆᑐᓇᖅ ᑭᐊᓕ ᕗᕇᓱᑐᑦ. ᐃᓄᐃᑦ ᐱᓇᓱᖕᓂᕐᓴᐅᓕᕐᒪᑕ ᑐᓴᐅᑎᑎᒍᑦ ᐊᓇᐅᓪᓚᐅᔭᖅᑐᓂᒃ…ᓂᐊᓴᓐ ᑕᒎᓇ ᐲᑦ ᐹᒃᓯᖕᑐᖅ. ᑖᓐᓇᑦᑕᐅᖅ ᐅᖓᑖᓅᖓᒎᕐᓂᕐᓴᐅᓕᕐᑐᖅ. ᐊᒻᒪᓗ ᑖᓂᐊ ᑕᒑᖅ. ᐃᓄᐃᑦ ᐊᔾᔨᒌᙱᓐᓂᕐᓴᓂᒃ ᐊᑐᕐᓂᕐᓴᐅᓕᕐᒪᑕ ᐃᒻᒪᑐᖃᕐᒥ ᐃᓚᓯᒪᓪᓗᒋᑦ.”

ᑭᐊᓕ ᕗᕇᓱ

ᑎᑕᐅᓯᕆᕙᒃᑕᖓ: ᐹᑉ, ᕼᐃᑉ ᕼᐋᑉ, ᒧᒥᕐᓂᖅ

ᐊᖏᕐᕋᖓ: ᓴᓂᑭᓗᐊᖅ

ᐊᖏᕐᕋᓕᒃ ᐅᕙᓂ: ᐅᐃᓂᐱᒡ

ᖃᓄᐃᓕᐅᕐᓂᕐᒧᑦ ᒪᓕᒃᓯᒪᔭᖏᑦ: ᐱᐊᓐᓰ, ᑏᓇ ᑑᓄ, ᓲᓴᓐ ᐊᒡᓘᒃᑲᖅ, ᑖᓂᐊ ᑕᒑᖅ

ᑎᑕᐅᓯᓕᕆᙱᑦᑕᕌᖓᑦ: ᐃᖅᑲᓇᐃᔭᖅᑐᖅ ᓄᓇᖃᖅᑳᖅᑐᑦ ᒧᒥᕐᓂᕐᒧᑦ ᐃᓕᓐᓂᐊᕐᕕᖓᓂ, ᐃᓕᖁᓯᓕᕆᓂᕐᒧᑦ ᐅᖃᕐᑎ, ᓄᓇᕗᑦ ᕼᐃᑦᒪᐃᑯᔅ

ᖃᓄᐃᓕᐅᒐᒃᓴᖏᑦ: ᑎᑳᓗᓇᐃᔭᐃᓴᓐ (Decolonization), ᐱᖓᓱᒋᓕᕐᑕᖓ ᓂᐱᓕᐅᒐᖏᓐᓂᒃ, 2019-ᒥᑦ ᓴᖅᑭᓐᓂᐊᖅᑐᖅ; ᓄᓇᖃᖅᑳᖅᑐᑦ ᒧᒥᕐᓂᕐᒧᑦ ᐃᓕᓐᓂᐊᕐᕕᖓᓂ ᓴᕿᑎᑦᑎᓂᖅ

ᖃᓄᐃᓕᐅᕈᒪᔭᖓ: ᐃᙱᕐᓗᓂ ᐅ ᑳᓇᑕᒥ ᓈᓴᓄᓪ ᕼᐋᑭ ᓖᒡ ᐱᙳᐊᕐᓂᐊᕐᑎᓪᓗᒋᑦ

ᓈᒻᒪᒋᓯᒪᙱᑕᖓ ᐊᖏᕐᕋᖓᓂ: “ᐃᒪᐃᓕᐅᓕᕐᒪᑕ ᐅᒃᐱᕈᓲᑎᒃᑯᑦ ᐊᑭᕋᖅᑑᑎᔪᑦ. ᑕᐃᒪᐃᓕᐅᕈᑎᐅᓯᒪᔪᖅ ᐃᓅᖃᑎᒃᑲ ᐅᕙᓐᓂᑦ ᐱᐅᒃᓴᙱᖢᑎᒃ. ᐃᓅᖃᑎᒃᑲᓘᓐᓃᑦ ᐱᐅᒃᓴᙱᑦᑐᑦ ᑐᑭᓕᐅᕆᓯᒪᔭᓐᓂᒃ. ᑐᑭᓯᓯᒪᔪᖓ ᖃᓄᐃᒻᒪᑦ ᑕᐃᒪᐃᑦᑕᕆᐊᒃᓴᖏᓐᓂᒃ, ᑭᓯᐊᓂᓕ ᑕᐃᒪᐃᓪᓗᐊᙱᑦᑐᑦ. ᐃᓱᒪᒋᔭᐅᓚᐅᕐᓕ ᐃᓅᓱᒃᑐᑦ ᐃᙱᖅᑎᐅᓕᕈᒪᔪᑦ…ᑕᒪᑐᒧᖓ ᐱᑦᑕᐃᓕᒪᑐᐃᓐᓇᕆᐊᖃᖅᑐᑦ.”

ᐃᓅᓂᕐᒧᑦ ᖃᓄᐃᑕᐅᕙᖕᓂᖓ: “ᐊᒥᓱᐊᓗᐃᑦ ᖃᓪᓗᓈᑦ ᐃᒃᐱᒋᓗᐊᓕᖃᑦᑕᕐᒪᑕ ᐱᔾᔪᑎᐅᒋᐊᒃᓴᖏᓐᓂᒃ ᑕᐃᒪᓕ ᐅᖃᕈᓘᔭᖔᓕᖃᑦᑕᖅᑐᑦ: ‘ᐊᖓᔮᖅᑎᑐᐃᓐᓈᓘᔪᓯ. ᐃᒡᓗᖃᓪᓗᐊᙱᑦᑐᓯ ᐊᑭᖃᙱᑦᑐᓂᒃ ᐊᒻᒪ ᐊᑭᖃᙱᑦᑐᒥ ᐋᓐᓂᐊᖃᖅᑕᐃᓕᓂᕐᒥᒃ ᐊᒻᒪ ᐃᓕᓐᓂᐊᕐᓂᕐᒥᒃ…” ᑲᓇᑕᒥᐅᑕ ᐋᓐᓂᐊᖃᕐᒪᑕ ᓴᐃᓕᓕᕈᓐᓇᙱᑦᑐᓂᒃ ᑐᖁᖓᓕᖅᑐᓂᒃ. ᐃᓱᒪᒐᒪᓕ ᑲᓇᑕᒥᐅᑕᑦ ᐅᕙᑦᑎᓐᓂᒃ ᐃᑲᔪᕆᐊᖃᕋᓱᒋᓪᓗᑎᒃ ᒪᒥᓴᕐᓂᒃᑯᑦ ᐊᒻᒪ ᐃᖕᒥᖕᓂ ᒪᒥᓴᓚᐅᕐᓕᑦ ᒪᑯᐊ ᐃᓱᒪᒋᔭᖃᕐᓂᖅ ᐊᔾᔨᒌᙱᑎᑦᑎᓂᕐᒥᒃ ᐱᐅᙱᑦᑐᓪᓛᓘᖕᒪᑦ.”

ᐃᓄᒋᐊᒃᑐᓂᑦ ᓄᓇᖃᓕᖅᑎᑕᐅᓂᕐᒧᑦ: “ᓂᕈᐊᖅᑎᑕᐅᓚᐅᕐᓯᒪᒍᑦᑕ ᑎᓕᐅᖅᑕᐅᓪᓚᕆᙱᖔᕐᓗᑕ ᒫᓐᓇᐅᓕᖅᑐᖅ ᐃᓅᖃᑎᒌᖕᓂᕐᒧᑦ, ᐃᓱᒪᔪᖓ ᓈᒻᒪᖕᓂᕐᓴᒃᑯᑦ ᐃᓚᓕᐅᑎᒍᓐᓇᕐᓂᕐᓴᐅᓇᔭᓚᐅᕐᑐᒍᑦ, ᐃᓕᖁᓯᕗᑦ ᐱᓯᒪᓪᓚᕆᒡᓗᑎᒍᑦ. ᑭᓯᐊᓂᓕ ᖃᓄᐃᓕᐅᖅᐸᓪᓕᐊᓂᒃᑯᑦ ᑎᑎᕋᐅᓯᐅᕙᓪᓕᐊᕙᒃᑐᓂᒃ ᑕᒪᓐᓇ ᓴᕿᔮᙱᒻᒪᑦ, ᐊᒻᒪᓗ ᐊᐃᑦᑖᖑᒐᓗᐊᖅ, ᐃᓕᓐᓂᐊᕐᕕᖕᓂᑦ, ᑕᒪᑐᒥᖓ ᖃᓄᐃᓕᐅᕈᓯᕕᓂᕐᓂᒃ ᐃᓕᓐᓂᐊᖅᑎᑕᐅᓯᒪᙱᓐᓇᑦᑕ.”

ᓵᓚᑦ ᖃᒪᓂᖅ ᐅᕙᙵᑦ ᓯᓚ ᐊᒻᒪ ᐅᕋᐃᔅ

ᑎᑕᐅᓯᕆᕙᒃᑕᖓ: ᑲᑕᔾᔭᖅᖢᓂ ᕼᐃᑉ ᕼᐋᑉᒥ ᐃᓚᖃᖅᖢᒍ

ᐊᖏᕐᕋᖓ: ᐃᒡᓗᓕᒃ

ᐊᖏᕐᕋᓕᒃ ᐅᕙᓂ: ᐋᑐᕚ

ᑲᑕᔾᔭᕐᓂᕐᒧᑦ ᐃᓕᓴᐃᔨᖏᑦ: ᓯᕿᓂᐅᑉ ᕿᓚᐅᑖ/Suns Drum, ᔫ ᑑᑉᑯᑦ ᓴᕿᔮᒐᐅᕙᒃᑐᑦ

ᓯᕗᓕᖅᐹᖅ ᖁᙱᐊᖅᑕᐅᓂᖓ: ᑕᑯᔭᒐᖃᕐᕕᒃᒥᑦ ᒥᐅᓯᐊᒻ ᐊᕝ ᓇᐃᓱ  (Museum of Nature) ᐅᑯᐊᖑᓪᓗᑎᒃ ᓯᓐᑎᐊ ᐱᑦᓯᐅᓛᒃ, ᐅᕋᐃᒡ ᐋᓴᓐ, 2015

ᖃᓄᐃᓕᐅᒐᒃᓴᖏᑦ: ᓯᓚ ᐊᒻᒪ ᐅᕋᐃᔅ ᐊᐃᑉᐸᖓ ᓂᐱᓕᐊᖓᑦ 2019-ᒥ ᓴᖅᑭᑕᐅᓗᓂ

ᑕᒪᑐᒥᖓ ᐊᓂᒍᐃᑦᑎᐊᕐᓂᖓᓄᑦ: “ᐃᓅᓪᓗᑕ, ᐅᕙᑦᑎᓐᓂ ᓴᕿᔮᖅᑎᓗᐊᙱᓐᓇᑦᑕ ᓂᐱᑭᖢᑕᓗ. ᐊᔪᕐᓇᕐᒪᑦ ᖃᐅᔨᔭᐅᑎᑦᑕᕆᐊᒃᓴᖅ ᑕᐃᒪᓐᓇ ᐱᕈᕐᓴᑎᑕᐅᓪᓗᓂ…ᓯᕗᒧᑦ ᐱᕙᓪᓕᐊᓂᐊᕐᓗᑕ ᐃᓅᓯᕆᓕᖅᑕᑦᑎᓐᓂᑦ, ᐊᓂᒍᐃᑦᑎᐊᕈᓐᓇᕆᐊᖃᖅᐳᑎᑦ. ᐊᓂᒍᐃᑦᑎᐊᕐᓂᖅ ᑐᑭᖃᕐᒪᑦ ᐊᔾᔨᒌᙱᑦᑐᓂᒃ ᐊᔾᔨᒌᙱᑦᑐᓄᑦ. ᐅᕙᓐᓄᓪᓕ, ᐊᑭᓕᕆᐊᓖᑦ ᐊᑭᓕᕐᓱᖤᕈᒃᑎᑦ ᐊᒻᒪᓗ ᕿᑐᕐᖓᒃᑕ ᐃᓅᓯᖃᑦᑎᐊᕐᓗᑎᒃ.”

ᖃᓄᐃᓕᐅᕐᓂᕐᒧᑦ ᒪᓕᒃᓯᒪᔭᖏᑦᑕ ᒥᒃᓵᓄᑦ: “ᑖᓂᐊ ᑕᒑᖅ ᐅᕙᓐᓄᑦ ᐃᑲᔪᕐᓯᒪᒻᒪᕆᒃᑐᖅ. ᐱᒋᐊᖅᑎᑦᑎᓯᒪᖕᒪᑦ ᐅᕙᑦᑎᓐᓂᒃ ᒫᓐᓇᓕᓴᐅᓕᕐᑐᓂᒃ ᐃᓚᖃᓕᕐᖢᑎᒃ ᓄᑕᐅᙱᑦᑐᑐᖄᓗᐃᑦ ᐊᒻᒪ ᐃᓕᖁᓯᑐᖄᓗᐃᑦ. ᓱᓕ ᑲᑕᔾᔭᖃᑦᑕᖅᑐᒍᑦ … ᑭᓯᐊᓂᓕ ᑲᑕᔾᔭᖃᑦᑕᕆᕗᒍᑦ ᒫᓐᓇᓕᓴᕐᓂᒃ ᐃᓚᐅᕐᓯᒪᓪᓗᒍ ᐊᒻᒪᓗ ᐃᓄᖕᓂᑦ ᑕᒪᑐᒥᖓ ᐃᓱᒪᒋᔭᖏᓐᓂᒃ ᒪᑐᐃᕐᑎᑦᑎᒍᑎᐅᓪᓗᓂ.”

ᖃᓪᓗᓈᓂᑦ ᖁᙱᐊᖅᐸᒃᑐᓂᒃ: “ᐃᙱᐅᓯᕗᑦ ᒧᒥᕈᓯᐅᖕᒪᑕ. ᐆᒻᒪᕆᖕᓇᖅᖢᓂ. ᐅᐸᒡᕕᐅᕙᒃᑐᓄᑦ ᑎᑕᐅᓯᐅᖕᒪᑕ. ᑕᐃᒪᓕ ᖁᕕᐊᒋᕙᕗᑦ ᐃᙱᑲᑕᒋᐊᒃᓴᖅ ᒧᒥᕐᕕᖃᖅᑐᓂᒃ ᐊᒻᒪ ᖁᕕᐊᓇᕈᓘᔭᖅᑐᓂᒃ, ᑭᓯᐊᓂᓕ ᐊᒥᓱᐃᕐᖢᑎᒃ ᒧᒥᖅᑐᖃᙱᒻᒪᑦ. ᓇᖏᑐᐃᓐᓇᖅᖢᑎᒃ ᐊᒻᒪ ᖁᙱᐊᑐᐃᓐᓇᖅᖢᑎᒃ, ᓲᕐᓗ ᑕᒪᐃᓐᓂᓕᒫᖅ ᑕᑯᔪᒪᓪᓗᒍ.”