ᐊᐅᓚᑦᑎᔨᒋᔭᐅᔪᖅ ᑲᒻᐸᓂᒧᑦ ᐅᕙᓂ ᒍᕇᔅ ᐸᐃ ᐊᖅᑯᑎᒥ ᐊᒻᒪ ᑐᓚᒃᑕᕐᕕᒃᓴᒧᓪᓗ ᐱᓕᕆᐊᓄᑦ ᐅᖃᕐᑐᖅ ᑖᒃᑯᐊ ᑲᒻᐸᓂᐅᔪᑦ ᑐᓂᓯᓂᐊᕈᒪᓂᕋᖅᖢᓂᒋᑦ ᑐᒃᓯᕋᐅᑎᒃᓴᒥ ᐃᑲᔫᑎᒃᓴᓂ ᒐᕙᒪᑐᖃᒃᑯᑦ ᐱᓕᐊᓐ ᑖᓚᑐᕐᑐᒥ ᐅᑭᐅᕐᑕᖅᑐᕐᒥ ᐱᓕᕆᕝᕕᒃᓴᓄᑦ ᐃᑲᔫᑎᓂ ᐋᑐᕚᒥ ᑐᙵᓱᒃᑎᑦᑎᓕᕐᓂᖏᓐᓄᑦ ᐃᑲᔫᑎᑖᕋᓱᒍᒪᔪᓂᒃ. ᓄᓇᕗᒥᑦ ᐅᓄᕐᑐᓂ ᐊᖏᔪᓂᒃ ᐱᓕᕆᐊᖃᕐᒪᑕ ᒫᓐᓇ ᐃᑲᔫᑎᓄᑦ ᐃᑲᔪᖅᑕᐅᔪᓐᓇᖅᖢᑎᒃ. (ᐊᔾᔨᙳᐊᖁᑎᒋᔭᐅᔪᖅ)
ᓄᓇᕗᒥᑦ ᐱᓕᕆᕝᕕᒃᑖᕈᒪᔪᑦ ᑕᐅᑐᒃᐳᑦ $1 ᐱᓕᐊᓐ ᑖᓚ ᐃᓚᖓᓂ ᒐᕙᒪᑐᖃᒃᑯᑦ ᐃᑲᔫᑎᒃᓴᖏᓐᓂᒃ
ᑲᒻᐸᓂᐅᔪᑦ ᐃᑲᔪᖃᑦᑕᖅᑐᑦ ᐊᖏᔪᓂᒃ ᐱᓕᕆᐊᒃᓴᓂ ᐅᖃᕐᓯᒪᔪᑦ ᐱᓇᓱᖃᑕᐅᔪᒪᓂᕋᖅᖢᑎᒃ ᐅᑭᐅᕐᑕᖅᑐᕐᒧᑦ ᐱᓕᕆᕝᕕᖕᓄᑦ ᐃᑲᔫᑎᒃᓴᓂᒃ
For English version, see Nunavut infrastructure proponents eye $1B federal fund
ᑲᒻᐸᓂᐅᔪᖅ ᑲᒪᒋᔭᖃᕐᑐᖅ ᑭᕙᓪᓕᖅ ᐃᒪᒃᑯᑦ ᕙᐃᐸᒥ ᐊᑦᑕᑕᕈᓐᓇᐅᑎᒥ “ᖃᐅᔨᓇᓱᒃᑐᑦ” ᖃᓄᖅ ᐱᑖᖃᑕᐅᔪᓐᓇᕆᐊᒃᓴᖏᓐᓂ $1 ᐱᓕᐊᓐᑖᓚᓂ ᒐᕙᒪᑐᖃᒃᑯᑦ ᐃᑲᔫᑎᒃᓴᙳᕐᑎᓯᒪᔭᖓᓂ ᐅᑭᐅᕐᑕᖅᑐᕐᒥ ᐱᓕᕆᕝᕕᒃᓴᓄᑦ. ᑕᐃᒪᓐᓇᑦᑕᐅᖅ ᐊᓯᖏᑦ ᓄᓇᕗᒥᑦ ᐊᖏᔪᓂ ᐱᓕᕆᐊᖃᕐᑐᑦ ᑕᐃᒪᐃᓕᖓᖕᒥᔪᑦ.
“ᓄᑭᒃ ᑯᐊᐳᕇᓴᓐ ᖃᐅᔨᓴᕋᓱᑦᑎᐊᓯᔪᑦ ᓈᒻᒪᒐᔭᕐᒪᖔᑦ ᐱᓕᕆᖃᑎᖃᕆᐊᒃᓴᖅ ᒐᕙᒪᑐᖃᒃᑯᑦ ᐱᓕᕆᐊᒃᓴᖏᓐᓂᒃ,” ᐅᖃᕐᑐᖅ ᐋᓐ-ᕋᕙᐃᐅᓪ ᐊᐅᑐᐃᓐ, ᐊᐅᓚᑦᑎᔨ ᐊᖓᔪᖅᑳᖅ ᐆᒻᒪᖅᑯᑎᓕᕆᓂᕐᒧᑦ ᐊᒻᒪ ᑐᓴᐅᒪᔾᔪᑎᓕᕆᓂᕐᒧᑦ ᐊᑦᑕᑕᐅᑎᓂ, ᐊᐱᕐᓱᖅᑕᐅᑎᓪᓗᒍ ᒫᔅᓯ 4-ᒥ.
“ᐅᑯᐊ ᐱᓕᕆᐊᒃᓴᐃᑦ ᓴᖅᑭᑎᑦᑎᓯᒪᔭᕆᐊᖃᖅᑐᑦ ᐱᒻᒪᕆᖕᒥ ᐊᖅᑯᑎᒃᓴᒥ ᐅᑭᐅᕐᑕᖅᑐᕐᒥ ᐱᕈᖅᑎᑦᑎᕙᓪᓕᐊᓂᕐᒧ ᐱᓕᕆᐊᒃᓴᓂᒃ.”
ᐊᐅᑐᐃᓐ ᑕᐃᒪᐃᓕᔾᔪᑎᖃᓚᐅᕐᑐᖅ ᐃᖏᕐᕋᔾᔪᑎᓕᕆᔨᒃᑯᑦ ᑲᓇᑕᒥ ᑐᓴᒐᒃᓴᓕᐅᖅᑎᓪᓗᒋᑦ ᐅᑭᐅᕐᑕᖅᑐᕐᒥ ᐱᓕᕆᕝᕕᖕᓄᑦ ᐃᑲᔫᑎᒃᓴᑦ ᒪᑐᐃᕐᓂᖏᓐᓂᒃ ᑐᒃᓯᕋᐅᑎᓕᐅᕈᒪᔪᓄᑦ.
ᒐᕙᒪᑐᖃᒃᑯᑦ ᓕᐳᕈᓪ ᒐᕙᒪᖏᑦ ᐱᒋᐊᖅᑎᑦᑎᓚᐅᕐᒪᑕ ᐅᑭᐅᕐᑕᖅᑐᕐᒥ ᐱᓕᕆᕝᕕᒃᓴᓄᑦ ᐃᑲᔫᑎᒃᓴᓂ ᐃᓚᒋᔭᐅᓪᓗᓂ
2025-26 ᐊᐅᓇᑦᑎᓪ)ᑎᒃᑕᒧᑦ. ᐅᓇ ᐋᖅᑭᒃᑕᐅᓂᑯ ᐃᑲᔪᕈᑎᐅᓂᐊᕐᓗᓂ ᐊᑭᓕᐅᑎᓄᑦ ᐊᖅᑯᑎᒋᔭᐅᔪᓂᒃ ᐅᑭᐅᕐᑕᖅᑐᕐᒥ ᐃᖏᕐᕋᕝᕕᐅᕙᒃᑐᓂᒃ, ᐊᒻᒪᓗ ᓴᐳᓐᓂᐊᖅᑐᓕᕆᓂᕐᒥ ᐱᒋᐊᖅᑎᑦᑎᒃᑲᓐᓂᕐᓗᑎᒃ ᐅᑭᐅᕐᑕᖅᑐᕐᒥ ᐊᒻᒪ ᑲᓇᑕᐅᑉ ᓂᒋᐊᓂ, ᐃᖏᕐᕋᔾᔪᑎᓕᕆᔨᒃᑯᑦ ᑲᓇᑕᒥ ᑐᓴᒐᒃᓴᖏᑦ ᐅᖃᕐᓯᒪᓚᐅᕐᑐᑦ ᒫᔅᓯ 4-ᖑᑎᓪᓗᒍ.
ᐅᑯᐊ ᑭᕙᓪᓕᖅ ᐃᒪᒃᑯᑦ ᕙᐃᐸᒥ ᐊᑦᑕᑕᕈᓐᓇᐅᑎᒥ ᐱᓕᕆᐊᒃᓴᖅ ᐊᑦᑕᑕᖅᑎᑦᑎᔪᒪᔾᔪᑎᐅᔪᖅ ᑕᓪᓕᒪᓂ ᓄᓇᓕᖕᓂ ᑭᕙᓪᓕᕐᒥ ᐅᕗᖓ ᓄᐊᑦ ᐊᒥᐊᓕᑲ ᐆᒻᒪᖅᑯᑎᓕᕆᔨᒃᑯᓐᓄᑦ ᐅᕘᓈᕐᓗᑎᒃ ᒫᓂᑑᐸᒃᑯᑦ.
ᑕᑭᓂᖃᕐᓂᐊᖅᑐᖅ 1,200 ᑭᓛᒥᑕᓂ, ᓴᙱᔪᕈᓘᓗᓂ ᐅᑯᑎᒎᓇᖅ ᐊᑦᑕᑕᕐᓯᒪᓗᓂ ᒋᓚᒻ, ᒫᓂᑑᐸᑦ ᐅᕗᖓ ᐊᕐᕕᐊᓄᑦ, ᑎᑭᕋᕐᔪᐊᖅ, ᑲᖏᖅᖠᓂᖅ, ᐃᒡᓗᓕᒑᕐᔪᒃ ᐊᒻᒪ ᖃᒪᓂᑦᑐᐊᕐᒥ, ᐊᒻᒪᓗ ᐅᕗᖓ ᐊᒡᓂᑯ ᐄᒍᓪ ᐅᔭᕋᒃᓯᐅᕐᕕᐅᑉ ᒪᕐᕉᒃ ᒎᓗᒥ ᐅᔭᕋᒃᓯᐅᕐᕕᖏᓐᓂ.
ᐊᑭᓕᐅᑎᒃᓴᐅᓂᐊᕋᓱᒋᔭᐅᔪᖅ ᐱᓕᕆᐊᒃᓴᒧᑦ ᒫᓃᑦᑐᖅ $3.3 ᐱᓕᐊᓐ.
ᐅᓄᕈᓘᔭᕐᒪᑕ ᐱᓕᕆᐊᖑᔪᑦ ᓄᓇᕗᒥᑦ ᓴᓇᔭᐅᕙᓪᓕᐊᑲᑕᒃᑐᓂᒃ ᐃᑲᔫᑎᓄᑦ ᐃᑲᔪᖅᑕᐅᖃᑕᐅᔪᓐᓇᖅᑐᓂᒃ ᐅᕙᙵᑦ $1 ᐱᓕᐊᓐ ᑖᓚᓂ ᐃᑲᔫᑎᒃᓴᓂᒃ.
ᐅᓇ ᒍᕇᔅ ᐸᐃ ᐊᖅᑯᑎ ᐊᒻᒪ ᑐᓚᒃᑕᕐᕕᒃᓴᖅ ᐃᓱᒪᒋᔭᐅᔪᑦ ᑐᒃᓯᕋᐅᑎᓕᐅᕈᑎᐅᓂᐊᕆᒃᓴᖏᓐᓂ ᐃᑲᔫᑎᒃᓴᓂᒃ, ᐅᖃᕐᑐᖅ ᒑᕕᓐ ᓛ, ᐱᖓᖕᓇᖅᐸᓯᐊᓂ ᕿᑎᕐᒥᐅᑦ ᐃᑲᔫᑎᒃᓴᓕᕆᓂᕐᒧᑦ ᑯᐊᐳᕇᓴᓐᑯᓐᓄᑦ ᐊᕙᑎᓕᕆᓂᕐᒧᑦ ᐊᐅᓚᑦᑎᔨ ᐅᖃᓚᐅᕐᑐᖅ ᑎᑎᕋᖅᖢᓂ ᖃᕋᓴᐅᔭᒃᑯᑦ ᒫᔅᓯ 4-ᒥ.
ᒍᕇᔅ ᐸᖏ “ᐱᓇᓱᒍᑎᑦᑎᐊᕙᒃ ᒪᕐᕈᐃᓄᑦ ᐊᑐᕐᑕᐅᔪᒃᓴᐅᓂᖓᓄᑦ ᐃᓄᖕᓄᑦ ᐊᒻᒪ ᓴᐳᓐᓂᐊᕐᓂᕐᒧᑦ ᐊᒻᒪ ᓴᙱᒃᑎᑦᑎᕚᓪᓕᖅᑎᑦᑎᓂᕐᒥ ᐅᑭᐅᕐᑕᖅᑐᕐᒥ ᑲᒪᒋᔭᖃᕐᓂᕐᒥᒃ,” ᐅᖃᕐᑐᖅ.
ᐅᓇ ᐱᓕᕆᐊᒃᓴᖅ ᐊᑦᑕᑕᖅᑎᑦᑎᓕᕋᔭᕐᑐᖅ ᐅᑭᐅᕐᑕᖅᑑᑉ ᑕᕆᐊᖓᓂ ᔭᓗᓇᐃᒧᑦ ᐅᕘᓇ ᐃᑎᔪᒥ ᑐᓚᒃᑕᕐᕕᒃᑯᑦ ᐊᒻᒪᓗ ᐊᖅᑯᑎᒃᑯᑦ ᖃᖓᓕᒫᖅ ᐊᑐᖅᑕᐅᔪᓐᓇᖅᑐᒥᒃ. ᐃᓱᒪᒋᔭᐅᔪᖅ ᐊᑭᖃᕋᔭᕆᐊᒃᓴᖓᓂ $1 ᐱᓕᐊᓐ ᑖᓚᓂ.
ᐊᒻᒪᓗ ᒫᔅᓯ 3-ᒥ ᒐᕙᒪᑐᖃᒃᑯᑦ ᑐᙵᓱᒃᑎᑦᑎᓕᓚᐅᕐᑐᑦ ᑐᒃᓯᕋᐅᑎᓂ ᐱᔪᒪᓪᓗᑎᒃ ᐱᓕᕆᕝᕕᒃᓴᓄᑦ ᐃᑲᔫᑎᓂ ᐃᑲᔪᕐᑕᐅᔾᔪᒪᔾᔪᑎᓂᒃ ᐅᑯᓇᙵᑦ $5 ᐱᓕᐊᓐ ᑖᓚᓂ ᑕᐅᕐᓰᓂᒃᑯᑦ ᐃᑲᔫᑎᒃᓴᑎᒍᑦ (Trade Diversification Corridors Fund).
ᐅᓇ ᐃᑲᔫᑎᒃᓴᖅ ᐊᖅᑯᑎᒋᔭᐅᔪᓄᑦ “ᓴᙱᒃᑎᑦᑎᕚᓪᓕᕐᓂᐊᖅᑐᖅ ᑕᐅᕐᓰᑲᑕᖕᓂᒃᑯᑦ ᐃᖏᕐᕋᔾᔪᑎᓄᑦ ᐱᓕᕆᕝᕕᖕᓂ ᐊᒻᒪᓗ ᐅᓄᕐᓯᕚᓪᓕᖅᑎᑦᑎᓗᑎᒃ ᐊᒥᐊᓕᑲᒧᙵᐅᙱᑦᑐᓂ ᐊᐅᓪᓚᖅᑎᑕᐅᕙᓪᓕᐊᔪᓂᒃ,” ᐃᖏᕐᕋᔾᔪᑎᓕᕆᔨᒃᑯᑦ ᑲᓇᑕᒥ ᑐᓴᒐᒃᓴᖏᑦ ᐅᖃᕐᓯᒪᓚᐅᕐᑐᑦ.
ᑕᒪᐃᓐᓄ ᐃᑲᔫᑎ ᐋᖅᑭᒃᑕᐅᓯᒪᔪᑦ ᐱᕚᓪᓕᖅᑎᑦᑎᓇᓱᒍᑎᐅᓪᓗᓂ ᓴᐳᓐᓂᐊᕐᓂᕐᒥᒃ, ᐱᐅᓯᕚᓪᓕᖅᑎᑦᑎᓗᑎᒃ ᑕᐅᕐᓰᖃᑦᑕᕐᓂᕐᒧᑦ ᐱᓕᕆᖃᑎᒌᖕᓂᕐᒥᒃ ᐊᒻᒪ ᐅᓄᕐᓯᕚᓕᕐᓗᑎᒃ ᐱᓕᕆᕝᕕᒃᓴᐃᑦ ᓄᓇᓖᑦ ᐃᒻᒥᖕᓄᑦ ᐊᑦᑕᑕᖃᑦᑕᐅᑎᓯᒪᓗᑎᒃ.
ᓄᓇᕗᒧᑦ ᒪᓕᒐᓕᐅᕐᑎ ᓘᕆ ᐃᓪᓚᐅᖅ ᐅᖃᓚᐅᕐᑐᖅ ᒫᔅᓯ 4-ᒥ ᒐᕙᒪᒃᑯᑦ ᑐᒃᓯᕋᐅᑎᓕᐅᕈᔨᓂᖏᑦ “ᑐᙵᓱᒃᑎᑕᐅᓂᒃᑯᑦ ᑐᓴᒐᒃᓴᐅᓂᖓᓂᒃ.”
ᑭᓯᐊᓂᓕ ᐅᖃᓚᐅᕐᑐᖅ ᐅᑭᐅᕐᑕᖅᑐᕐᒥ ᐱᓕᕆᒡᕕᖕᓄᑦ ᐃᑲᔫᑎᒃᓴᖅ ᓈᒻᒪᙱᓗᐊᕐᓂᐊᕐᓂᖓᓂ ᐊᑯᓂᕈᓗᒃ ᐱᓕᕆᔾᔪᑎᐅᓂᐊᕐᐸᑦ. ᐅᖃᖅᖢᓂ ᑕᑯᔪᒪᓇᔭᕐᓂᖓᓂᒃ ᐊᑐᖅᑕᐅᖃᑦᑕᐃᓐᓇᕋᔭᕐᑐᓂ ᐃᑲᔫᑎᒃᓴᓂᑦ ᓄᓇᕗᒥᑦ ᐱᓕᕆᕝᕕᖕᓄᑦ.
(0) Comments