ᓄᓇᕗᒥᑦ ᐃᓄᐃᑦ ᑕᑯᔭᒐᖃᕐᕕᖓ ᑕᐅᑐᒃᐳᑦ ᐃᖃᓗᐃᑦ ᑲᖏᖅᖢᐊᓄᑦ ᓵᙵᔪᒥᒃ ᐃᓂᒃᓴᕆᔪᒪᔭᖓᓂᒃ

For English version, see Nunavut Inuit Heritage Centre eyes Iqaluit bayside site

ᖃᖓᑦᑎᐊᓵᖅ ᑐᓐᓂᖅᑯᓯᐊᖅᑖᕐᑎᓪᓗᒋᑦ $50 ᒥᓕᐊᓐ ᑖᓚᓂ ᒐᕙᒪᑐᖃᒃᑯᓐᓂᑦ, ᐸᕐᓇᐅᓯᐅᖅᐸᓪᓕᐊᓂᖅ ᑲᔪᓯᑎᑕᐅᓕᕐᑐᖅ ᐆᒧᖓ ᓄᓇᕗᒻᒥ ᐃᓄᐃᑦ ᑕᑯᔭᒐᖃᕐᕕᓄᑦ ᑭᓯᐊᓂᓕ ᐊᓯᖓᓂ ᐃᓂᖃᕐᓂᐊᖅᖢᓂ ᓯᕗᓪᓕᕐᒥ ᐋᖅᑭᒃᓱᐃᕙᓪᓕᐊᔪᑦ ᐃᓱᒪᒋᓂᑯᖓᓂ.

ᐅᓇ ᓴᓇᔪᒪᓂᖅ ᐃᒡᓗᒃᓴᒥᒃ ᑕᑯᔭᒐᖃᕐᕕᒃᓴᒥ ᐃᓄᐃᑦ ᐱᖁᑎᕕᓂᑐᖃᙱᓐᓄᑦ ᖃᓪᓗᓈᓂ ᑕᑯᔭᒐᖃᕐᕕᒃᒦᑦᑐᓂᒃ ᐊᒻᒪ ᓴᖅᑭᔮᒐᖃᕐᕕᖕᓂ ᐃᓚᒋᔭᐅᓯᒪᖕᒪᑦ ᓄᓇᕗᒧᑦ ᐊᖏᕈᑎᑦ ᐃᓗᐊᓃᑦᑐᓂᒃ, ᑖᓐᓇᓗ ᐊᖏᖅᑕᐅᓯᒪᓪᓗᓂ 1993-ᒥ.

ᐊᕐᕌᓂᐅᓚᐅᕐᑐᖅ ᐃᒡᓗᒃᓴᓂ ᑎᑎᕋᐅᔭᒐᖅᑎᑦ ᐸᕐᓇᐅᑎᖏᓐᓂ ᓴᖅᑭᑎᑦᑎᓪᓗᑎᒃ ᑕᑯᔭᒐᖃᕐᕕᒃᓴᒥ, ᐃᓂᒃᓴᖃᖅᑎᑦᑎᓚᐅᕐᓯᒪᔪᑦ ᒫᓂ ᐃᖃᓗᐃᑦ ᖃᐃᕋᓐᓂᖓᓃᓪᓗᓂ ᐊᖅᓴᕐᓃᑦ ᑐᔪᕐᒥᕕᐅᑉ ᑐᓄᖓᓂ.

ᑭᓯᐊᓂᓕ ᑕᒪᓐᓇ ᓄᓇ ᓴᓇᕝᕕᐅᕈᓘᔭᓕᒑᖕᒪᑦ ᐊᕐᕌᒍᓂ ᐊᒡᒋᖅᑐᓂᒃ ᐅᑯᓇᙵ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᑦ ᐸᕐᓇᒃᓯᒪᔭᖏᓐᓂ ᐃᒡᓗᒃᓴᖃᕐᕕᐅᑎᑕᐅᓗᓂ ᐊᒻᒪᓗ ᓴᓇᕝᕕᐅᓂᐊᕐᓗᓂ 8-ᓂ ᓇᑎᓕᖕᒥ ᐊᖏᕐᕋᒃᓴᕆᔭᐅᔪᒥᒃ ᐊᒻᒪ ᓂᐅᕕᕐᕕᖃᕐᕕᐅᔪᓐᓇᕐᓗᓂ ᖃᓂᒋᔭᖓᓃᑦᑐᖅ.

ᑕᒪᓐᓇ ᐃᓱᒪᒋᓪᓗᒍ ᑖᒃᑯᐊ ᑕᑯᔭᒐᖃᕐᕕᒃᓴᓕᕆᔪᑦ ᐊᓯᐊᓂ ᑕᐅᑐᖔᓕᕐᒪᑕ ᐆᒪ ᐅᑭᐅᕐᑕᖅᑐᕐᒥ ᐅᑭᐅᒃᑯᑦ ᐱᙳᐊᕕᒡᔪᐊᕐᓇᒥ ᐊᓐᓂᑭᑦᑐᕐᕕᐅᑉ ᖃᓂᒋᔭᖓᓂ ᑕᕆᐅᕐᒧᑦ ᓵᙵᔪᒥ ᕗᕉᐱᓱ ᐸᐃᒧ. ᐅᓇ ᐃᓂᒃᓴᖅ ᐃᓱᒪᒋᔭᐅᓚᐅᕐᓯᒪᔪᖅ ᐃᓂᒋᔭᐅᔪᓐᓇᕐᓂᐊᕐᓗᓂ ᐊᕐᕌᓂᐅᓚᐅᕐᑐᖅ.

“ᐅᓇ ᐃᓂᒃᓴᑦᑎᐊᕚᓗᒃ ᑕᑯᔭᒐᖃᕐᕕᒃᒧ ᑲᔾᔮᕐᓇᑦᑎᐊᖅᓗᓂ ᑕᕆᐅᕐᒧ ᓵᙵᓪᓗᓂ,” ᐅᖃᕐᑐᖅ ᕗᐃᓕᐊᒻ ᐸᕗᕆᑦᔾ, ᑐᑭᒧᐊᖅᑎᑦᑎᔨ ᐃᓄᐃᑦ ᐱᖁᑎᖏᓐᓂᒃ ᓇᐅᑦᓯᖅᑐᖅᑎᒃᑯᓐᓄᑦ, ᐊᐱᕐᓱᖅᑕᐅᑎᓪᓗᒍ.

ᑲᑐᔾᔨᖃᑎᒌᑦ ᐅᖃᓪᓚᖃᑎᖃᑲᑕᒃᑐᑦ ᐃᖃᓗᐃᑦ ᓄᓇᓕᐸᐅᔭᓂ ᐊᒻᒪ ᓄᓇᕗᒥᑦ ᒐᕙᒪᒃᑯᓐᓂ ᓄᓇᒥ ᐊᑐᕈᒪᓂᕐᒧᑦ, ᐅᖃᕐᑐᖅ.

ᑕᑯᔭᒐᖃᕐᕕᒃ ᐊᖏᑎᒋᓂᖃᕐᓂᐊᕐᑐᖅ ᒫᓂ 65,000 ᑭᑉᐹᕆᒃᑎᓯᒪᔪᓂᒃ ᕖᑦᓂ ᐊᒻᒪ ᐱᐊᓂᒃᑕᐅᓇᔭᖅᖢᓂ 2030-ᒥ.

ᐸᕗᕆᑦᔾ ᑐᙵᓱᒃᑎᑦᑎᒻᒪᕆᒃᑐᖅ $50 ᒥᓕᐊᓐ ᑐᓐᓂᖅᑯᓯᐊᓂᒃ ᒐᕙᒪᑐᖃᒃᑯᓐᓂ ᐊᑐᖅᑕᐅᓂᐊᖅᖢᓂ ᐃᓚᒋᔭᐅᓗᓂ $150 ᒥᓕᐊᓐ ᑖᓚᑐᕐᑐᒥ ᓴᓇᔭᐅᓂᐊᖅᑐᒧᑦ ᐊᑭᓕᐅᑎᒃᓴᓂᒃ. ᐅᓇ ᑮᓇᐅᔭᖅ ᑐᓴᖅᑕᐅᑎᔾᔪᑎᐅᓚᐅᕐᑐᖅ ᒫᔅᓯ 8-ᒥ ᐅᑯᐊ ᐋᑐᕚ ᐊᒻᒪ ᓄᓇᕗᑦ ᑐᙵᕕᒃᑯᑦ ᐊᖏᖃᑎᒌᒃᑎᓪᓗᒋᑦ $1.5 ᐱᓕᐊᓐ ᑖᓚᓂ ᐊᖏᕈᑎᓂᒃ ᐊᑐᓕᖅᑎᑦᑎᓂᕐᒥ ᓄᓇᕗᒧᑦ ᐊᖏᕈᑎᓂᒃ ᐊᕐᕌᒍᑦ ᖁᓕᓂ.

ᓄᓇᕗᒥᑦ ᐃᓄᐃᑦ ᑲᑐᔾᔨᖃᑎᒌᖏᑦ ᑐᓂᓯᓯᒪᓕᕐᒥᔪᑦ $20 ᒥᓕᐊᓐ ᑖᓚᓂ, ᐸᕗᕆᑦᔾ ᐅᖃᕐᑐᖅ. “ᑕᐃᒪᓐᓇ ᓈᒻᒪᒃᑐᒦᑦᑐᒍᑦ,” ᐅᖃᕐᑐᖅ, ᐅᖃᒃᑲᓐᓂᖅᖢᓂ ᐃᑲᔫᑎᒃᓴᓂ ᕿᓂᕐᓂᕋᖅᖢᑎᒃ ᒪᑯᓇᙵᑦ ᐃᑲᔪᖅᑐᐃᕙᒃᑐᓂᒃ ᐊᒻᒪ ᓇᖕᒥᓂᖅ ᐱᓕᕆᐊᖃᖅᑐᓂᒃ.

ᐸᕐᓇᐅᓯᐊᕆᔭᐅᔪᑦ ᓴᖅᑭᑕᐅᔪᑦ ᐅᑯᓇᙵᑦ ᑐᐊᑦ ᒫᓐᑐᕋᑉ ᐋᑭᑕᒃᔅ (Dorte Mandrup Architects), ᑎᐊᓐᒫᒃᒥ ᐱᓕᕆᔨᑦ ᓂᕈᐊᓚᐅᕐᒪᑕ ᖃᓄᐃᓕᖓᓂᐊᕐᓂᖓᓂ ᑕᑯᔭᒐᖃᕐᕕᒃᓴᖃᕐᓗᓂ, ᐱᓕᕆᕝᕕᒃᓴᖅ ᐊᒻᒪ ᑕᕐᕆᔭᕐᕕᒃᓴᖅ.

ᐅᓇ 200,000-ᓂ “ᐃᓕᖅᑯᓯᕐᒧᑦ ᐱᒋᔭᐅᔪᓂᒃ” ᐃᓂᒋᔭᐅᓕᕋᔭᖅᑐᖅ — ᐅᖃᐅᓯᖅ ᓄᓇᕗᒻᒥ ᐃᓄᐃᑦ ᐱᖁᑎᖏᓐᓂᒃ ᓇᐅᑦᓯᖅᑐᖅᑏᑦ ᐅᖃᐅᓯᕆᓕᕐᑕᖓ ᐊᑐᕈᓐᓃᖅᖢᑎᒃ “ᐱᖁᑎᕕᓂᑐᖃᐃᑦ.”

ᐅᓇ ᓄᑖᖅ ᐅᖃᐅᓯᖅ “ᓴᙱᓂᕐᓴᒃᑯᑦ ᑐᑭᖃᕐᓂᖅᓴᖅ” ᐊᒻᒪᓗ “ᓱᓕᓂᕐᓴᐅᓪᓗᓂ,” ᐸᕗᕆᑦᔾ ᐅᖃᕐᑐᖅ.

“ᑕᒪᒃᑯᐊ ᐴᕐᓯᒪᑐᐃᓐᓇᕐᓗᑎ ᐊᒻᒪ ᓯᕐᓗᐊᕐᒦᑐᐃᓐᓇᖅᖢᑎᒃ ᐊᒻᒪᓗ ᐊᑐᐃᓐᓇᐅᔪᓐᓇᙱᖢᑎᒃ ᑕᐃᒪᓕ ᐊᒃᓱᕈᕐᓇᖅᑐᖅ ᐃᓐᓇᑐᖃᕐᓂᖅ ᖃᓪᓗᓈᓄᑦ ᑕᑯᔭᖅᑐᖅᑎᓪᖢᑎᒍᑦ ᐃᓕᖅᑯᓯᑦᑎᒍᑦ ᐱᖁᑎᒋᔭᑦᑎᓐᓂ,” ᐅᖃᕐᑐᖅ.

“ᐃᒃᐱᒍᓱᖃᑦᑕᕐᒪᑕ ᑖᒃᑯᓂᖓ ᓴᙱᓂᖏᓐᓂᒡᓗ, ᐊᒻᒪᓗ ᑕᒪᒃᑯᓄᖓ ᐃᖅᑲᐃᕙᒃᖢᑎᒃ ᖃᖓᓕᓵᓗᖕᓂ.”

ᐃᓄᐃᑦ ᐱᖁᑎᖏᓐᓂᒃ ᓇᐅᑦᓯᖅᑐᖅᑏᑦ ᐋᖅᑭᒃᓱᐃᓚᐅᕐᒥᔪᖅ ᓄᓇᕗᒥᑦ ᐱᖁᑎᖏᓐᓄᑦ ᑐᓴᐅᒪᖃᑦᑕᐅᑎᔾᔪᑎᒥ ᑐᓴᐅᒪᖃᑦᑕᐅᑎᔪᓐᓇᕐᓂᐊᕐᒪᑕ ᐃᓕᖅᑯᓯᒃᑯᑦ ᖃᐅᔨᒪᔭᐅᔪᓂᒃ ᓄᓇᕗᙵᑦ. ᑐᑭᒧᐊᕈᑎᐅᔪᓐᓇᕆᓪᓗᓂ ᖃᓄᖅ ᑖᓐᓇ ᓄᑖᖅ ᑕᑯᔭᒐᖃᕐᕕᒃ ᐱᓕᕆᐊᒃᓴᓂ ᐊᑐᐃᓐᓇᐅᑎᑦᑎᓇᔭᕐᓂᖏᓐᓂᒃ ᐃᖃᓗᖕᓂ ᐊᒻᒪ ᐊᓯᖏᓐᓄᑦ.

ᑐᓴᐅᒪᖃᑦᑕᐅᑎᑦᑎᓂᕐᒧᑦ ᖃᓄᐃᓕᐅᕈᑎᒃᓴᑦ ᐅᖃᐅᓯᐅᓚᐅᕐᓯᒪᔪᖅ ᐅᖅᑯᕐᒥᐅᑦ ᐃᑦᑕᕐᓂᓴᓕᕆᓂᕐᒧᑦ ᑲᑎᒪᕕᓪᓗᒋᑦ, ᑲᑎᒪᓚᐅᕐᒪᑕ ᒫᔅᓯ 18-ᒥ 20-ᒧ ᐃᖃᓗᖕᓂ. ᑲᑎᑎᑦᑎᔾᔪᑎᐅᓚᐅᕐᑐᖅ ᓄᓇᕗᒻᒥᐅᓂᒃ, ᐃᓚᖃᐅᖅᖢᓂ ᐃᓐᓇᑐᖃᕐᓂᒃ ᕿᑭᖅᑖᓘ ᓂᒋᐊᓂ ᑖᒃᑯᐊ ᑲᑎᖃᑲᑎᖃᓚᐅᖅᖢᑎᒃ ᖁᑦᑎᒃᑐᕐᒥᐅᓂᒃ, ᑭᕙᓪᓕᕐᒥᐅᓂᒃ ᐊᒻᒪ ᕿᑎᕐᒥᐅᓂᑦ.

“ᐃᓅᓱᖕᓂᕐᓴᑦ ᐃᓕᖅᑯᓯᕐᒥ ᐊᓯᐅᔨᕙᓪᓕᐊᖕᒪᑕ, ᐅᖃᐅᓯᖏᓐᓂᒃ, ᓯᕗᓪᓕᕕᓂᖏᓐᓂᒃ, ᑭᓱᓕᒫᓂ ᓱᒃᑲᔪᒥᒃ,” ᐅᖃᕐᑐᖅ ᓴᑭᐊᓯ ᓴᐅᑦᓗᐊᐱᒃ, ᐃᓄᐃᑦ ᐱᖁᑎᖏᓐᓂᒃ ᓇᐅᑦᓯᖅᑐᖅᑏᑦ ᑲᑎᒪᔨᖏᓐᓄᑦ ᑲᑎᒪᔨᐅᖃᑕᐅᔪᖅ ᐸᓐᓂᕐᑑᒥ ᐊᐱᕐᓱᖅᑕᐅᑎᓪᓗᒍ.

“ᐃᓱᒪᔪᒍ ᑕᑯᔭᒐᖃᕐᕕᒃ ᐱᒋᒍᑦᑎᒍᑦ ᐱᐅᒻᒪᕆᒐᔭᕐᓂᖓᓂ ᐊᒻᒪ ᐃᓕᑦᑎᒍᑎᐅᓪᓗᓂ ᐃᓄᖕᓄᑦ ᐱᕈᖅᐸᓪᓕᐊᔪᓄᑦ ᑕᐃᒪᓐᓇ ᐊᓯᐊᔨᓗᐊᔾᔮᙱᓐᓇᑦᑕ.”