ᐊᖑᑎ ᑐᖂᑦᑎᓂᑯ ᐸᓖᓯᒥ ‘ᐃᓱᒪᓇᓗᐊᙱᓚᖅ’ ᐊᓂᑎᑕᐅᓂᐊᕆᐊᒃᓴᖓᓂ

For English version, see Nunavut man who killed RCMP officer gets ‘faint hope’ chance at parole

ᐊᖑᑎ ᑐᖂᑦᑎᓂᕋᖅᑕᐅᓯᒪᔪᖅ ᓄᓇᕗᒥᑦ ᐸᓖᓯᒥ 2007-ᖑᑎᓪᓗᒍ ᐱᕕᖃᖅᑎᑕᐅᓂᐊᖅᑐᖅ ᐃᖅᑲᖅᑐᐃᔨᓂ ᐃᑲᔪᖅᑎᐅᓂᑯᓂ ᑭᒻᒥᕈᒻᒥ ᐊᓂᑎᑕᐅᓵᓕᕆᐊᕆᐊᒃᓴᖓᓂ.

ᐱᙳᐊᑐᒃ ᑯᓗᓚ ᐸᓯᔭᒃᓴᐅᑎᑕᐅᒪᐅᕐᓯᒪᔪᖅ 2010-ᒥ ᑐᖂᑦᑎᓚᐅᖅᓯᒪᓂᖓᓂᒃ ᖁᑭᖅᖢᓂᐅᒃ ᐸᓖᓯ ᑕᒡᓚ ᓯᑳᑦᒥ.

ᐃᖅᑲᖅᑐᖅᑕᐅᓪᓗᓂ ᖃᓄᐃᑎᑕᐅᓂᐊᓕᖅᑎᓪᓗᒍ, ᐃᖅᑲᖅᑐᐃᔨ ᕌᐳᑦ ᑭᐊᐹᑐᕆᒃ ᐅᖃᐅᓯᖃᓚᐅᕐᑐᖅ ᓄᕕᐱᕆ 7, 2007-ᒥ ᐊᕐᕌᒍᓕᒃ 20-ᓂ ᑐᖁᑕᐅᓂᖓ ᐊᒻᒪ ᐸᓖᓯᐅᓪᓗᓂ ᑕᖅᑭᓂ 6-ᓂ “ᑐᑭᖃᒋᓪᓚᕆᖕᓂᖓᓂᒃ” ᐊᒻᒪ “ᐊᐃᑦᑖᓘᓪᓗᓂ.”

ᐃᖅᑲᖅᑐᖅᑕᐅᓪᓗᓂ ᒫᔅᓯ 12, 2010-ᒥ ᐃᓅᓯᓕᒫᖓᓂ ᑎᒍᔭᐅᓯᒪᑎᑕᐅᖁᔭᐅᓚᐅᕐᑐᖅ ᐊᓂᙲᓐᓇᕐᓗᓂ ᐊᕐᕌᒍᓂ  25-ᓂ — ᑕᐃᒪᓐᓇᓗ ᐃᓄᐊᕐᓯᔪᑦ ᒪᓕᒃᑎᑕᐅᕙᒃᖢᑎᒃ ᒥᑭᓛᒃᑯᑦ.

ᑯᓗᓚ — ᐊᕐᕌᒍᖃᓚᐅᕐᓯᒪᔪᖅ 37-ᓂ ᖁᑭᖅᓯᑎᓪᓗᒍ — ᐊᓂᓵᓕᓇᓱᒃᑐᖅ ᐊᑐᖅᖢᓂ ᐊᑐᙱᑎᑕᐅᓯᒪᓕᖅᑐᒥᑦ “ᓴᐱᕐᓇᖅᑐᒥ” ᐅᖃᐅᓯᕐᒥ ᐱᕋᔭᒃᑐᓄᑦ ᒪᓕᒐᖅᑎᒍᑦ, ᐅᖃᕐᑐᓚᐅᕐᑐᖅ ᓈᑕᓕ ᐆᓪ, ᐅᖃᖅᑎᒋᔭᐅᔪᖅ ᐸᓯᔭᒃᓴᓕᕆᔨᓄᑦ ᑲᓇᑕᒥ.

ᑖᓐᓇ ᐅᖃᐅᓯᖅ ᐊᑐᖅᖢᒍ, ᐃᓄᐃᑦ ᑎᒍᔭᐅᓯᒪᔪᑦ ᐃᓅᓯᖏᓐᓄ ᐊᓂᑎᑕᐅᔪᓐᓇᓕᖃᑦᑕᖅᑐᑦ ᐊᕐᕌᒍᑦ 15 ᐊᓂᒍᕐᓯᒪᓕᕌᖓᑕ.

ᒪᓕᒐᓕᕆᕕᒡᔪᐊᖅ ᐊᑐᕈᓐᓃᖅᑎᑦᑎᓚᐅᕐᓯᒪᔪᑦ ᓴᐱᕐᓇᖅᑐᒥ ᐅᖃᐅᓯᖅ 2011-ᖑᑎᓪᓗᒍ, ᑭᓯᐊᓂᓕ ᑯᓗᓚ ᐊᔪᙱᑦᑐᖅ ᐱᓇᓱᒋᐊᒃᓴᖅ ᓲᖃᐃᒻᒪ ᐃᖅᑲᖅᑐᖅᑕᐅᓚᐅᕐᓯᒪᖕᒪᑦ ᑎᓯᐱᕆ 2, 2011-ᒥ, ᑖᓐᓇ ᒪᓕᒐᖅ ᐊᓯᔾᔨᖅᑕᐅᑎᓪᓗᒍ.

ᑖᓐᓇ ᐅᖃᐅᓯᖅ ᐊᑐᕐᓂᐊᕐᓗᒍ, ᑎᒍᔭᐅᓯᒪᔪᖅ ᐱᓇᓱᒋᐊᖃᕐᑐᖅ ᐊᖓᔪᖅᑳᒧᑦ ᐃᖅᑲᖅᑐᐃᔨᓄᑦ ᑎᒍᔭᐅᓯᒪᓕᕐᕕᒋᓚᐅᖅᑕᖓᓂᒃ. ᑖᓐᓇ ᐱᓇᓱᒍᑎ ᐊᖏᖅᑕᐅᒃᐸᑦ, ᐃᖅᑲᖅᑐᐃᔨᓄᑦ ᐃᑲᔪᖅᑎᑦ ᑖᔅᓱᒥᖓ ᐱᓇᓱᒍᑎᒥ ᐃᓱᒪᒃᓴᖅᓯᐅᕈᑎᖃᕋᔭᕐᑐᑦ.

ᑭᒻᒥᕈᒻᒥ ᐃᖅᑲᖅᑐᐃᔨᓄᑦ ᐃᑲᔪᕐᑎ ᐃᓂᒃᓴᓕᐅᖅᑕᐅᓯᒪᓚᐅᕐᓯᒪᔪᖅ ᑯᓗᓚ ᖃᓄᐃᓕᐅᕐᑕᐅᓂᐊᕐᒪᖔᑦ ᐅᖃᐅᓯᐅᓂᐊᖅᑐᖅ.

ᑭᓯᐊᓂᓕ ᐃᖅᑲᖅᑐᐃᕕᒃᒥ ᐊᐃᕆᓕ 23-ᖑᑎᓪᒍ ᐃᖃᖅᑐᐃᕕᒃ ᐃᖃᓗᖕᓂ ᑖᓐᓇ ᖃᓪᓗᓈᓂ ᑕᕐᕆᔭᐅᑎᒃᑯᑦ ᑕᐅᑐᒃᑎᑕᐅᓪᓗᓂ ᑯᓗᓛ, ᑕᓐᓇ ᐅᖓᕙᕆᐊᖅᑎᑕᐅᓚᐅᕐᓯᒪᖕᒪᑦ ᐱᓕᕆᕝᕕᒋᔭᐅᕝᕕᒋᓂᐊᖅᑕᖓ.

“ᐅᓇ ᐱᓕᕆᐊᕆᔭᐅᓂᐊᕋᓱᒋᓚᐅᖅᑕᕋᓗᐊᕗᑦ ᒪᐃ 13-ᖑᓕᕐᐸᑦ,” ᐅᖃᕐᑐᖅ ᐄᕙ ᑖᔅ-ᒍᕇᓐ, ᑯᓗᓛ ᓗᐊᐃᔭᖓ, ᐅᖃᓪᓚᒃᖢᓂ ᐃᖅᑲᖅᑐᐃᔨ ᓲᓴᓐ ᓵᔅᕗᐊᑦᒧᑦ ᐃᖅᑲᖅᑐᐃᕕᒃᒥ.

ᓴᐳᓐᓂᐊᖅᑐᓕᕆᓂᒃᑯᑦ ᐋᖅᑭᒃᓱᐃᓚᐅᕐᑐᑦ ᑯᓗᓛ ᐅᐸᒃᓯᒪᓂᐊᖅᑕᖓᓄᑦ ᑭᒻᒥᕈᒻᒥ ᐃᖅᑲᖅᑐᐃᕕᖕᓄᑦ ᐱᓕᕆᐊᖑᑎᓪᓗᒍ, ᑭᓯᐊᓂᓕ, ᑐᕆᓴ ᒪᑳᑎ, ᐸᓯᔭᒃᓴᐅᑎᑦᑎᔨ ᑖᒃᑯᓇᓂ ᑐᐊᕕᕐᓇᖅᑐᒥ ᐃᓚᖏᓐᓂ ᐅᐸᒋᐊᖃᓕᓚᐅᕐᒪᑦ.

“ᐸᓖᓯᒃᑯᑦ ᐋᖅᑭᒃᓱᐃᓇᓱᒃᑐᑦ ᖃᓄᖅ ᒥᔅᑕ ᑯᓗᓛ ᐃᖏᕐᕋᔾᔪᒡᔭᐅᖃᑦᑕᕐᓂᐊᕐᒪᖔᑦ ᑭᓯᐊᓂᓕ ᑕᒪᒃᑯᐊ ᐋᖅᑭᒃᑕᐅᕌᓂᒃᑎᓐᓇᒋ ᑐᐊᕕᕐᓇᖅᑐᖅᓯᐅᓕᓚᐅᕋᒪ ᐃᓚᓐᓄᑦ,” ᒪᑳᑎ ᐅᖃᓚᐅᕐᑐᖅ ᓄᓇᑦᓯᐊᕐᒥ ᐱᕙᓪᓕᐊᔪᓄᐊᖅᑕᐅᔪᓂᒃ.

“ᐃᒡᓗᑕᖃᕆᐊᖃᕐᒪᑦ ᐊᒻᒪ ᓴᐳᔾᔭᐅᓯᒪᓗᓂ ᒥᔅᑕ ᑯᓗᓛ ᑭᒻᒥᕈᒻᒥ ᑕᐃᒪᓐᓇᓗ ᐃᑲᔪᖅᑕᐅᒃᑲᓐᓂᕆᐊᖃᓚᐅᕐᒪᑕ ᑭᒻᒥᕈᒻᒥ, ᑭᓯᐊᓂᓕ ᐱᓕᕆᖃᑎᖃᓚᐅᕐᑐᖓ ᐸᓖᓯᒃᑯᓐᓂ ᑕᒪᓐᓇ ᐱᓕᕆᐊᖑᑎᓪᓗᒍ.”

ᑯᓗᓛ ᐃᖅᑲᖅᑐᐃᔨᑦ ᐃᑲᔪᖅᑎᖏᓐᓄᑦ ᑐᓵᔭᐅᓂᐊᕐᓂᖓ ᐋᖅᑭᒃᑕᐅᒃᑲᓐᓂᓕᓚᐅᕐᑐᖅ ᐋᒐᓯ 19-ᒧᑦ ᑭᒻᒥᕈᒻᒥ.

ᐃᖅᑲᖅᑐᐃᔨᑦ ᐋᖅᑭᒃᓯᒃᐸᑕ ᑯᓗᓛ ᐊᓂᑎᑕᐅᓵᓕᔪᓐᓇᕐᓂᖓᓂ, ᑖᓐᓇ ᐱᓕᕆᔾᔪᑎᐅᔪᖅ ᑲᓇᑕᒥ ᐊᓂᑎᑦᑎᓵᓕᑎᑦᑎᓂᕐᒧᑦ ᑲᑎᒪᔨᓄᑦ ᑐᓂᔭᐅᓂᐊᖅᑐᖅ ᖃᓄᐃᓕᖓᑎᑕᐅᓂᐊᕆᐊᒃᓴᖅ ᐋᖅᑭᒃᑕᐅᓂᐊᕐᒪᑦ.