ᒪᐃᔭᐃᑦ ᐃᓱᒫᓘᑎᖃᕐᑐᑦ ᓂᕿᑖᕈᓐᓇᐅᑎᓕᕆᓂᖅ ᐃᓱᓕᓐᓂᖓᓂᒃ

For the English version of this story, please see Nunavut mayors concerned about end to food-voucher program.

ᑲᑐᔾᔨᖃᑎᒌᑦ ᑭᒡᒐᖅᑐᐃᔪᑦ ᓄᓇᕗᒥᑦ ᕼᐋᒻᒪᓚᒃᑯᓐᓂᑦ “ᐊᒃᓱᐊᓗᒃ ᐃᓱᒫᓘᑎᓖᑦ” ᐃᓱᓕᓐᓂᖓᓂᒃ ᕼᐋᒻᒪᓚᒃᑯᑦ ᓂᕿᑖᕈᓐᓇᐅᑎᓕᕆᓂᕐᒧᑦ ᐱᓕᕆᐊᕕᓂᖓ ᐅᕘᓇ ᐃᓄᐃᑦ ᓄᑕᖅᑲᑦ ᓯᕗᓪᓕᐅᓗᑎᒃ ᐱᓕᕆᐊᒧᑦ.

“ᑲᑐᔾᔨᖃᑎᒌᑦ ᐃᓱᒫᓘᑎᖃᒻᒪᕆᖕᒪᑕ ᖃᓄᐃᓕᐅᕈᑎᐅᔭᕆᐊᓕᖕᓂ ᐋᖅᑭᒃᑕᐅᓂᑯᒥᒃ, ᐱᓗᐊᖅᑐᒥ ᐊᒃᓱᕈᓐᓇᐃᓐᓇᕐᓂᖓ ᓂᕿᖃᖃᑦᑕᑦᑎᐊᙱᓐᓂᖅ ᓄᓇᕗᒥᑦ,” ᓵᓚᒪᓐ ᐊᕙ, ᐊᖓᔪᖅᑳᖅ ᓄᓇᕗᒥᑦ ᕼᐋᒻᒪᓚᒃᑯᑦ ᑲᑐᔾᔨᖃᑎᒌᓄᑦ ᐊᒻᒪ ᒪᐃᔭᒋᔭᐅᓪᓗᓂ ᐃᖃᓗᖕᓂ, ᐅᖃᒪᐅᕐᒪᑦ ᑎᑎᖃᑎᒍᑦ ᓇᒡᓯᐅᔾᔭᐅᓯᒪᔪᒥᒃ ᐊᐃᕆᓕ        28-ᖑᑎᓪᓗᒍ ᓄᓇᑦᓯᐊᕐᒥ ᐱᕙᓪᓕᐊᔪᓄᑦ ᑭᒡᒐᖅᑐᐃᓪᓗᓂ ᓄᓇᕗᒥᑦ ᒪᐃᔭᓂᒃ.

ᐊᕙ ᐅᖃᓚᐅᕐᑐᖅ ᓄᓇᖅᑲᖅᑳᖅᑐᓄᑦ ᐱᔨᑦᑎᕋᐅᑎᓕᕆᔨᑦ ᑲᓇᑕᒥ ᐅᖃᓚᐅᕐᓂᖏᓐᓂᒃ ᑖᒃᑯᓄᖓ ᐃᓱᓕᓐᓂᖓᓂᒃ ᓄᓇᕐᔪᐊᕐᒥ ᓂᕿᑖᕈᓐᓇᐅᑎᓕᕆᓂᖅ ᐅᕗᖓ 2025-26 ᐊᕐᕌᒍᒧᑦ, ᑖᓐᓇᓗ ᓄᓇᑦᓯᐊᕐᒥ ᐱᕙᓪᓕᐊᔪᓄᑦ ᐅᓂᒃᑲᐅᓯᕆᓚᐅᖅᖢᓂᔾᔪᒃ ᑕᖅᑭᐅᓚᐅᖅᑐᒥᓐ.

ᒐᕙᒪᑐᖃᒃᑯᑦ ᐃᑲᔫᑎᑖᕈᑎ ᕼᐋᒻᒪᓚᒃᑯᓐᓄᑦ ᓂᕿᑖᕈᓐᓇᐅᑎᓕᕆᔾᔪᑎᓂᒃ ᐃᑲᔫᑎᐅᖃᑦᑕᓚᐅᕐᒪᑦ $500-ᓂ ᑕᖅᑭᒥ ᓱᕈᓯᕐᓄᑦ ᐅᑭᐅᖃᖅᑐᓄᑦ 18-ᓂᒃ ᑐᖔᓄᑦ ᐊᒻᒪᓗ ᐃᓚᖃᖅᖢᓂ $250-ᓂ ᑕᖅᑭᑕᒫᓐ ᓄᑕᕋᕐᓄᑦ ᐊᕐᕌᒍᓕᖕᓄᑦ 4 ᑐᖔᓂ ᒪᑯᓄᖓ ᖁᐃᖏᓕᓴᕐᓄᑦ ᐊᒻᒪ ᐊᒫᒪᒐᒃᓴᓄᑦ.

ᐅᓇ ᐱᓕᕆᐊᒃᓴᖅ ᐊᑐᖅᑕᐅᖃᑦᑕᑦᑎᐊᓚᐅᕐᑐᑦ 24-ᓂ ᓄᓇᕗᒥᑦ 25-ᖏᓐᓂᑦ ᓄᓇᓕᖕᓂᑦ. ᓄᖅᑲᖅᑎᑕᐅᓂᖓ ᖁᕕᐊᒋᔭᐅᓚᐅᙱᒻᒥᔪᖅ ᓄᑕᖅᑲᓄᑦ ᐃᑲᔪᖅᑎᐅᕙᒃᑐᓄᑦ ᐊᒻᒪ ᓄᓇᕗᒥᑦ ᓯᕗᓕᐅᖅᑎᓄᑦ.

“ᐃᓄᐃᑦ ᐅᕙᑦᑎᓐᓄᑦ ᐅᖃᖃᑦᑕᓚᐅᕐᑐᑦ ᑳᖃᑦᑕᕐᓂᐊᕐᓂᖏᓐᓂᒃ ᕿᑐᕐᖓᖏᑦ ᓂᕆᖁᓂᑯᒧᑦ. ᐅᓇ ᑕᐃᒪᓐᓇ ᐃᓱᒪᓐᓇᖅᑐᖅ ᐊᑐᕐᓂᐊᖅᑕᑦᑎᒍᑦ,” ᕚᓐᓇ ᓯᓇ, ᐃᑲᔪᖅᑎᐅᖃᑕᐅᔪᖅ ᖃᐅᔨᓴᖅᑎᓄᑦ ᐃᓕᓴᐃᔨᓄᑦ ᐅᕙᓂ ᔫᓂᕘᓯᑎ ᑳᓗᕌᑐ ᐴᓪᑐᒥ, ᐅᖃᖅᖢᓂ ᐱᓕᕆᐊᒥᓂᒃ ᐅᑭᐅᕐᑕᖅᑐᕐᒥ ᐊᐱᖅᓱᖅᑕᐅᑎᓪᓗᒍ ᑕᖅᑭᐅᓚᐅᕐᑐᒥᓐ.

ᐊᕙ ᐅᖃᓚᐅᕐᑐᖅ ᓄᓇᕗᒥᑦ ᕼᐋᒻᒪᓚᒃᑯᑦ ᑲᑐᔾᔨᖃᑎᒌᖏᑦ ᑎᑎᕋᖅᓯᒪᓂᕋᖅᖢᓂᖏᑦ ᐊᑕᐅᓰᙱᖢᑎᒃ ᒐᕙᒪᑐᖃᒃᑯᓐᓄᑦ ᐃᑲᔫᑎᒃᓴᓕᕆᓂᖅ ᓄᑖᙳᕆᐊᖅᑕᐅᖁᓪᓗᒍ ᓂᕿᑖᕈᓐᓇᐅᑎᓕᕆᓂᖅ.

ᒫᓯ ᑎᑭᑎᓪᓗᒍ ᓇᓗᓇᕈᔪᓚᐅᕐᓯᒪᔪᖅ ᐅᓇ ᐃᓄᐃᑦ ᓄᑕᖅᑲᑦ ᓯᕗᓪᓕᐅᓗᑎᒃ ᐱᓕᕆᐊᒃᓴᖅ, ᐃᑲᔫᑎᖃᖅᑎᑦᑎᓯᒪᔪᖅ ᑖᔅᓱᒥᖓ ᐱᓕᕆᐊᒃᓴᒥ, ᑲᔪᓯᓇᔭᕆᐊᒃᓴᖏᓐᓂ ᒫᔅᓯ 31 ᑎᑭᓚᐅᖅᑎᓪᓗᒍ.

ᒫᔅᓯ 8-ᒥ ᐋᑐᕚᒥ, ᒋᐅᕆ ᐊᓇᓐᑕᓴᖓᕇ, ᒐᕙᒪᑐᖃᒃᑯᓐᓄᑦ ᓄᓇᖃᖅᑳᖅᑐᓕᕆᓂᕐᒧᑦ ᒥᓂᔅᑕ ᑐᓴᖅᑎᑦᑎᓚᐅᕐᓯᒪᔪᖅ ᐊᕐᕌᒍ ᐊᑕᐅᓯᕐᒧᑦ $121.7 ᒥᓕᐊᓐ ᐊᑐᐃᓐᓇᐅᓂᐊᕐᓂᕋᖅᖢᓂᐅᒃ ᐅᖓᕙᕆᐊᕈᑎᐅᓗᓂ ᖃᓄᐃᓕᐅᕈᑎᒋᔭᐅᔪᒥᒃ ᓄᓇᖃᖅᑳᖅᑐᓕᕆᓂᕐᒧᑦ ᐱᔨᑦᑎᕋᐅᑎᓕᕆᔨᓄᑦ ᑲᓇᑕᒥ.

ᐅᓇ ᓄᓇᕐᔪᐊᕐᒧᑦ ᓂᕿᑖᕈᓐᓇᐅᑎᓕᕆᓂᖅ ᐃᓱᓕᒻᒪᑦ. ᒫᓐᓇᓕ ᓂᕿᑖᕈᓐᓇᐅᑎᒃᓴᓄᑦ ᐃᑲᔫᑎᒃᓴᑦ ᐱᓕᕆᐊᖑᓕᖅᑐᒃᑯᑦ ᓄᑖᓂ ᑐᑭᒧᐊᕈᑎᓂᒃ ᒪᓕᒋᐊᖃᕐᓇᖅᓯᔪᖅ, ᖃᐅᔨᓴᕆᐊᖃᓕᖅᖢᑎᒃ ᐊᑐᓂ ᐃᓄᐃᑦ ᓄᑕᕋᖏ ᐱᔭᕆᐊᖃᕐᓂᖏᓐᓂᒃ.

“ᐱᓇᓱᐊᒐᖃᕋᑦᑕ ᐃᑲᔪᐃᓐᓇᕐᓂᐊᕐᓗᑕ ᐃᓕᖅᑯᓯᒃᑯᑦ ᓈᒻᒪᒃᑐᓂᒃ ᐊᒻᒪ ᐃᑲᔪᕈᑎᐅᔪᓐᓇᖅᑐᓂᒃ ᐱᔭᐅᔭᕆᐊᖃᓪᓚᕆᒃᑐᓂᒃ ᐃᓄᐃᑦ ᓄᑕᕋᖏᓐᓄᑦ ᐊᒻᒪ ᐃᓚᒌᓄᑦ,” ᐊᕙ ᐅᖃᓚᐅᕐᑐᖅ ᑎᑎᖃᑎᒍᑦ.