ᓄᓇᕗᒻᒥ ᑲᓇᑕᐅᑉ ᒪᓕᒐᓕᐅᖅᑎᖏᓐᓂ ᐃᓚᒋᔭᐅᔪᖅ ᓗᐊᕆ ᐃᓪᓚᐅᑦ ᐊᐅᔭᐅᔪᒥ ᓄᖅᑲᖓᓚᐅᑲᖕᓂᖓᓂ ᑭᕙᓪᓕᕐᒦᑉᐳᖅ

For the English version of this story, please see Nunavut MP Lori Idlout spends summer recess in Kivalliq.

ᓄᓇᕗᒻᒥ NDP−ᑯᑦ ᑲᓇᑕᐅᑉ ᒪᓕᒐᓕᐅᖅᑎᖏᓐᓂ ᐃᓚᒋᔭᐅᔪᖅ ᓗᐊᕆ ᐃᓪᓚᐅᑦ ᐊᐅᔭᖅᓯᐅᓚᐅᖅᐳᖅ ᕿᒪᐃᓯᒪᓪᓗᓂ ᑲᓇᑕᐅᑉ ᒪᓕᒐᓕᐅᖅᑎᖏᓐᓂ, ᐳᓚᕋᖅᖢᓂ 7−ᓂ ᑭᕙᓪᓕᕐᒥ ᓄᓇᓕᖕᓂ ᑕᑯᔭᖅᑐᖅᖢᓂ, ᓂᐅᕝᕕᐅᕆᐊᕐᓂᕐᒥ ᐊᒻᒪ ᓈᓚᖕᓂᕐᒧᑦ.

ᐳᓚᕋᕐᓂᖓ ᐅᐸᒃᑎᑦᑎᓚᐅᖅᐳᖅ ᖃᒪᓂᑦᑐᐊᕐᒧᑦ, ᓇᐅᔮᑦ, ᓴᓪᓖᑦ, ᑎᑭᕋᕐᒧᐊᖅ, ᐊᕐᕕᐊᑦ ᐊᒻᒪ ᐃᒡᓗᓕᒑᕐᔪᖕᒧᑦ ᔪᓚᐃ 29−ᒥ ᐋᒍᔅᑎ 7−ᒧᑦ.

ᓄᓇᑦᓯᐊᖅ ᑐᓴᒐᒃᓴᓕᕆᔨᒃᑯᑦ ᐹᖅᓯᓚᐅᖅᐳᑦ ᐃᓪᓚᐅᑦᒥ ᑲᖏᖅᖠᓂᕐᒥ ᑭᖑᓪᓕᖅᐹᖓᓂ ᐅᓪᓗᖓᓂ ᐳᓚᕋᕐᓂᖓᓂ ᐅᖃᖃᑎᒋᔭᐅᓪᓗᓂ ᖃᓄᐃᓚᐅᕐᓂᖓᓂ ᐊᒻᒪ ᐸᕐᓇᐅᑎᖏᓐᓂ ᐱᒋᐊᓚᐅᙱᓐᓂᖓᓂ ᒪᓕᒐᓕᐅᖅᑎᒃᑯᓐᓂ ᐊᕐᕌᒎᑉ ᐃᓚᖓᓐᓂ.   

ᐅᖃᓚᐅᖅᐳᖅ ᐱᓕᕆᓪᓗᓂ ᐊᐅᓪᓛᕐᓂᐅᓚᐅᖅᐳᖅ ᐊᒻᒪ ᐃᒻᒥᓄᑦ ᐊᑑᑎᖃᕐᔪᐊᓚᐅᖅᐳᖅ.

“ᐳᓚᕋᕐᓂᕋ ᐊᔾᔨᒋᙱᐊᕐᔪᖁᓚᐅᖅᐸᕋ ᑕᒪᑐᒪᓂ,” ᐃᓪᓚᐅᑦ ᐅᖃᓚᐅᖅᐳᖅ.

ᐅᖃᓚᐅᖅᐳᖅ ᐅᔾᔨᕆᓚᐅᖅᐳᖅ ᐃᖅᑲᓇᐃᔮᖓ ᓄᓇᕗᒻᒥ ᐃᓚᒋᔭᐅᔪᑑᓪᓗᓂ ᑲᓇᑕᐅᑉ ᒪᓕᒐᓕᐅᖅᑎᖏᓐᓂ ᐱᔭᕆᐊᖃᒐᔪᒃᐳᖅ ᑐᙵᓇᖅᑐᒥ ᓈᓚᖕᓂᐅᔪᒥ ᐃᓄᖕᓄᑦ ᐅᖃᐅᓯᖃᕐᓂᖏᓐᓂ ᐋᓐᓂᐊᕈᑎᖏᓐᓂ ᐊᒻᒪ ᐃᓱᒫᓘᑎᖏᓐᓂ. ᐅᑯᐊ ᓇᖕᒥᓂᖅ ᐅᓂᒃᑳᓕᐊᑦ “ᐃᑲᔪᖅᓱᐃᕗᑦ ᐊᖏᓂᖅᓴᐅᔪᒥ ᑕᑯᒃᓴᐅᓂᐅᔪᒥ” ᐃᓅᓯᐅᔪᒥ ᐃᓄᖕᓂ ᓄᓇᕗᒻᒥ.

ᐊᒥᓱᑦ ᐅᓂᒃᑳᓕᐊᑦ ᑐᓴᖅᐸᒃᑕᖏᑦ ᓱᖏᐅᓐᓇᖅᐳᑦ, ᐅᖃᓚᐅᖅᐳᖅ.

ᐃᓪᓚᐅᑦ ᐊᓈᓇᖓᑕ ᐃᓚᖏᓐᓂ ᑭᕙᓪᓕᕐᒥᐅᑕᕗᑦ.

ᐃᓪᓚᐅᑦ ᒪᒃᑯᒃᑎᓪᓗᒍ, ᐊᑖᑕᖓ ᑐᖁᓚᐅᖅᓯᒪᕗᖅ ᐃᒻᒥᓃᖅᖢᓂ. ᐊᓱᐃᓛᒃ, ᐃᒻᒥᓂᒃ, ᐊᖓᔪᒋᓚᐅᖅᓯᒪᔭᖓ ᐊᒻᒪ ᒪᕐᕉᒃ ᐊᓂᖏᑦ ᐃᓯᓚᐅᖅᓯᒪᕗᑦ ᑎᒍᐊᙳᐊᕆᔭᐅᓂᕐᒥ ᐸᖅᑭᔭᐅᓂᕐᒥ ᐱᓕᕆᔾᔪᓯᐅᔪᒥ. ᐊᐅᓪᓚᖅᑎᑕᐅᕙᓚᐅᖅᐳᑦ ᐊᔾᔨᒌᙱᑦᑐᓄᑦ ᐃᓚᒌᖑᔪᓄᑦ ᖃᐅᓱᐃᑦᑐᕐᒧᑦ, ᐃᒡᓗᓕᒃ, ᒥᑦᑎᒪᑕᓕᒃ, ᑲᖏᖅᖠᓂᖅ ᐊᒻᒪ ᐃᒡᓗᓕᒑᕐᔪᖕᒧᑦ.

“ᑕᐃᒃᑯᐊᓕᒫᑦ ᐃᓚᒌᑦ ᐅᕙᓐᓂ ᐊᒻᒪ ᖃᑕᙳᑎᓐᓂᑦ ᐃᑲᔪᓚᐅᖅᑐᑦ, ᐅᕙᑦᑎᓐᓂ ᐃᑲᔪᓲᖑᖕᒪᑕ, ᐊᒻᒪ ᐃᑲᔪᕈᒪᕙᒃᑲ,” ᐅᖃᓚᐅᖅᐳᖅ.

ᒫᓐᓇᓕᓴᐅᔪᒥ ᐳᓚᕋᕐᓂᖓᓂ, ᑲᓇᑕᐅᑉ ᒪᓕᒐᓕᐅᖅᑎᖏᓐᓂ ᐃᓚᒋᔭᐅᔪᖅ ᑲᒪᒋᔭᖃᓚᐅᕆᕗᖅ ᐱᖅᑯᓯᑐᖃᖅᑎᒍᑦ ᑲᑎᒪᓂᐅᔪᓂ ᕼᐋᒻᓚᒃᑯᑦ ᐃᖅᑲᓇᐃᔭᖅᑎᖏᓐᓂ ᐊᒻᒪ ᓄᓇᓕᖕᓂ ᐊᖑᓇᓱᒃᑐᓕᕆᔨᒃᑯᓐᓂ ᐊᒻᒪ ᒥᑭᒋᐊᕐᓂᐊᖅᑎᓂ ᑲᑐᔾᔨᖃᑎᒌᖑᔪᓂ, ᑭᓯᐊᓂ ᑲᓯᒪᖃᑎᖃᕐᓂᖅᓴᐅᓚᐅᖅᐳᖅ ᓄᓇᓕᖕᒥᐅᑕᓂ ᐊᒻᒪ ᐃᓄᑐᖃᕐᓂ ᐃᓄᓕᒫᓂ ᖃᓄᐃᓐᓂᐅᔪᓂ ᐊᒻᒪ ᐹᐱᖕᐅᕐᓂᐅᔪᓂ ᕼᐋᒻᓚᐅᔪᓂ.

ᐃᓪᓚᐅᑦ ᐅᖃᓚᐅᖅᐳᖅ ᐃᓄᐃᑦ ᐃᓱᒫᓘᑎᖏᑦ ᐊᓯᔾᔨᖅᓯᒪᓗᐊᙱᓚᑦ ᑕᐃᒪᙵᓂ ᓂᕈᐊᖅᑕᐅᓚᐅᖅᑎᓪᓗᒍ 2021−ᒥ. ᖁᑦᑎᓛᖑᔪᖅ ᑎᑎᕋᖅᓯᒪᓂᐅᔪᓂ ᓱᓕ ᐃᒡᓗᓕᕆᓂᕐᒥᐅᕗᖅ ᐊᒻᒪ ᐊᑭᖓᓂ ᐃᓅᓇᓱᐊᕐᓂᕐᒥ.

ᐃᓄᐃᑦ ᐅᖃᓪᓚᓚᐅᖅᐳᑦ ᖃᓄᖅ ᑕᒪᒃᑯᐊ ᐊᑲᐅᙱᓕᐅᕈᑕᐅᔪᑦ “ᒐᕙᒪᑐᖃᒃᑯᓐᓅᖓᓯᒪᔫᔮᖅᑐᓂ ᖃᓄᐃᓕᖓᓂᖓᓂ” ᐊᒃᑐᐃᓂᖃᖅᐳᖅ ᖃᐅᑕᒫᒥ ᐃᓅᓯᖏᓐᓂ, ᐅᖃᓚᐅᖅᐳᖅ.

ᐃᓚᖏᑦ ᐃᓄᑐᖃᐃᑦ ᐅᖃᐅᔾᔨᓚᐅᖅᐳᑦ ᐃᓪᓚᐅᒻᒥ ᖃᓄᐃᓕᖓᓂᐅᔪᓂ ᐊᒃᖢᔪᐃᑦ ᐊᒻᒪ ᐸᖕᒥᐅᓗᐅᖅᑐᓂ ᐃᓘᓂ ᐊᒃᑐᐃᕙᖕᓂᖓᓂ ᐃᓅᓯᖏᓐᓂ.

“ᐊᔪᕐᓇᕐᓂᖅᓴᐅᕗᖅ ᐃᑲᔪᕐᓂᕐᒥ ᐊᓯᖏᓐᓂ ᐃᓄᖕᓂ ᐊᒃᓱᕈᐃᓐᓇᐅᔭᖅᑎᓪᓗᒋᑦ ᐃᒻᒥᓂᒃ,” ᐅᖃᓚᐅᖅᐳᖅ.

ᐃᓱᒪᒧᑦ ᐋᓐᓂᐊᖃᕐᓇᙱᑦᑐᓕᕆᓂᕐᒥ ᐊᑲᐅᙱᓕᐅᕈᑕᐅᔪᓂ ᑐᓂᓯᒋᕗᖅ ᐊᒃᓱᕈᕐᓇᕐᔪᐊᕐᓂᐅᔪᒥ  ᓄᓇᕗᒻᒥ ᓄᓇᓕᐅᔪᓂ.

“ᐃᓄᐃᑦ ᐊᒃᓱᕈᕐᔪᐊᖅᐳᑦ ᐊᒻᒪ ᓇᒧᙵᐅᕝᕕᒃᓴᖅᑕᖃᙱᓚᖅ ᐃᑲᔪᖅᑕᐅᓂᕐᒧᑦ,” ᐃᓪᓚᐅᑦ ᐅᖃᓚᐅᖅᐳᖅ, ᐃᓚᒋᐊᖅᓯᓪᓗᓂ ᐃᖅᑲᐃᑎᑦᑏᓐᓇᐅᔭᕐᓂᖓᓂ ᐃᓄᖕᓂ ᐸᖅᑭᖃᑦᑕᐅᑎᓂᕐᒥ.

“ᐅᑕᖅᑭᑐᐃᓐᓇᕈᑦᑕ ᐃᓱᒪᒧᑦ ᐋᓐᓂᐊᖃᕐᓇᙱᑦᑐᓕᕆᓂᕐᒥᖃᐅᔨᒪᕐᔪᐊᖅᑐᓂ ᐱᔨᑦᑎᕋᕐᓂᕐᒥ, ᑕᐃᒫᒃ ᐃᓱᒪᒧᑦ ᐋᓐᓂᐊᖃᕐᓇᙱᑦᑐᓕᕆᓂᕐᒥ ᓄᖑᑉᐸᓪᓕᐊᓂᐊᕆᕗᖅ,” ᐃᓪᓚᐅᑦ ᐅᖃᓚᐅᖅᐳᖅ.

“ᐃᖅᑲᐅᒪᔭᕆᐊᖃᖅᐳᒍᑦ ᐆᒪᔪᓐᓇᓚᐅᕐᓂᑦᑎᓐᓂ ᑕᐅᓴᓐ−ᖏᓐᓂ ᐊᕐᕌᒍᓄᑦ ᐃᑲᔪᖃᑦᑕᐅᑎᓪᓗᑕ.”

ᐃᑲᔪᖅᑕᐅᓪᓗᓂ ᐃᓚᖏᓐᓂ ᓄᓇᓕᖕᒥᐅᑕᓂ, ᐊᓕᐊᓇᐃᒍᓱᖕᓂᖃᕈᓐᓇᓚᐅᖅᐳᖅ ᕼᐋᒻᓚᐅᔪᓂ.

ᐃᓪᓚᐅᑦ ᐅᖃᓚᐅᖅᐳᖅ ᓈᓚᐃᓐᓇᐅᔭᖅᐳᖅ ᐃᓄᖕᓄᑦ ᓄᓇᓕᖕᓂ ᐊᒻᒪ ᐅᓂᒃᑳᓕᐊᖏᓐᓂ ᒫᓐᓇ “ᐃᓂᖓᓃᓐᓂᖓᓂ ᐅᒃᐱᕆᔭᐅᓂᕐᒥ.”

“ᐊᕐᕌᒍᒐᓴᓗᐊᓂ ᐊᒥᓱᓂ ᐱᑕᖃᙱᓗᐊᕐᓂᖓᓂ ᑲᑎᖅᓱᖅᑕᐅᕙᓪᓕᐊᔪᓂ ᑮᓇᐅᔭᓂ ᑐᖅᑯᖅᑕᐅᕙᓪᓕᐊᓪᓗᑎᒃ ᐱᕈᖅᐸᓪᓕᐊᑎᑕᐅᔪᓂ ᓄᓇᕗᒻᒥ,” ᐅᖃᓚᐅᖅᐳᖅ.

“ᐊᒻᒪ ᐱᔭᕆᐊᖃᖅᐳᒍᑦ, ᐱᔭᕆᐊᖃᖅᐳᖓ, ᐊᑐᕐᓂᕐᒥ ᐅᑯᓇᓂ ᐅᓂᒃᑳᓕᐊᓂ ᐃᑲᔪᕐᓂᕐᒧᑦ ᐅᓂᒃᑳᕆᓂᕐᒥ ᑲᓇᑕᐅᑉ ᒪᓕᒐᓕᐅᖅᑎᖏᓐᓂ ᐱᔭᕆᐊᖃᕐᓂᑦᑎᓐᓂ ᑲᑎᖅᓱᖅᑕᐅᕙᓪᓕᐊᔪᓂ ᑮᓇᐅᔭᓂ ᑐᖅᑯᖅᑕᐅᕙᓪᓕᐊᓪᓗᑎᒃ ᐱᕈᖅᐸᓪᓕᐊᑎᑕᐅᔪᓂ ᐊᒥᓱᒃᑲᓐᓂᕐᓂ.”

ᐳᓚᕋᓚᐅᖅᑎᓪᓗᒍ ᓄᓇᓕᖕᓂ, ᐃᓪᓚᐅᑦ ᖃᖓᑕᓚᐅᖅᐳᖅ ᔭᓗᓇᐃᕝᒧᑦ ᑲᑎᖃᑎᖃᕐᓂᕐᒥ ᐅᕿᖓᓂ, ᐋᓕᓐ ᒪᓕᓐᒥ, ᐸᕐᓇᓚᐅᖅᑐᓂ ᐊᖁᓐᓂᐊᕐᓂᖏᓐᓂ ᐋᑐᕚᒧᑦ.

ᑲᓇᑕᐅᑉ ᒪᓕᒐᓕᐅᖅᑎᖏᓐᓂ ᐋᖅᑭᒃᑕᐅᓯᒪᕗᖅ ᐱᒋᐊᒃᑲᓐᓂᕐᓂᐊᕐᓂ ᓯᑎᐱᕆ 16−ᒥ.