ᒪᕐᕉᒃ ᐱᖓᓱᓂᒃ ᓄᓇᕗᒥᑦ ᐋᓐᓂᐊᓯᐅᖅᑏᑦ ᐃᖅᑲᓇᐃᔭᖅᕕᖏᓐᓂᒃ ᐱᑦᑎᐊᖃᑦᑕᙱᓗᐊᖅᑐᓂᒃ ᑕᑯᓯᒪᔪᑦ

ᑭᐅᔾᔪᑎᒋᔭᐅᓂᑯᑦ ᐋᓐᓂᐊᓯᐅᖅᑏᑦ ᑲᑐᔾᔨᖃᒋᖕᓂᒃ ᓄᓇᑦᓯᐊᕐᒥ ᐊᒻᒪ ᓄᓇᕗᒥᑦ ᖃᐅᔨᓴᕈᑎᓂᒃ

ᐋᓐᓂᐊᓯᐅᖅᑏᑦ ᓄᓇᕗᒥᑦ ᑕᑯᔪᒪᔪᑦ ᐱᓕᕆᐊᖃᕐᓂᕐᓴᓂᒃ ᐋᓐᓂᐊᓯᐅᖅᑎᓂᒃ ᑕᒫᓃᑎᑦᑎᔾᔪᑎᐅᓇᔭᖅᑐᓂᒃ ᐊᒻᒪ ᓄᓇᕗᒥᑦ ᐃᖅᑲᓇᐃᔮᖃᕈᒪᔪᓂᒃ, ᖃᐅᔨᓴᕈᑎᐅᓂᑯᑦ ᓇᓗᓇᐃᓯᓯᒪᔪᑦ. (ᐊᔾᔨᙳᐊᖁᑎᖓ ᒥᓚᓂ ᐅᕆᑦᓵᑦ)

By ᐃᐊᒪ ᑐᕌᓐᑐᕐ

ᒫᓂ ᓄᓇᕗᑦ ᓇᑉᐸᓪᓗᐊᖏᑦ ᐃᖅᑲᓇᐃᔮᖏᓐᓂᒃ ᓄᖅᑲᕐᓂᐊᕈᒪᔪᑦ ᐊᕐᕌᒍᑦ ᖁᓕᑦ ᐊᓂᒍᖅᐸᑕ ᐊᒻᒪᓗ ᒪᕐᕉᒃ ᐱᖓᓱᓂᒃ ᐃᖅᑲᓇᐃᔮᖏᓐᓂᒃ ᕿᒪᒃᓯᓯᔪᒪᔪᑦ ᐊᕐᕌᒎᓕᖅᑑᖕᓂ ᒪᕐᕉᖕᓂ, ᖃᐅᔨᓴᕈᑎᑦ ᓇᓗᓇᐃᕐᓯᒪᔪᑦ ᓴᖅᑭᑕᐅᓚᐅᕐᑐᑦ ᐋᒐᓯ 17ᒥ ᓄᓇᕗᒥᑦ ᒐᕙᒪᒃᑯᓐᓄᑦ.

ᐅᓇ ᖃᐅᔨᓴᕈᑎ, ᕕᕝᕗᐊᕆᒥ ᐱᓕᕆᐊᖑᓂᑯ ᐋᓐᓂᐊᓯᐅᖅᑏᑦ ᑲᑐᔾᔨᖃᑎᒌᖏᑦ ᓄᓇᑦᓯᐊᕐᒥᑦ ᐊᒻᒪ ᓄᓇᕗᒥᑦ, ᑕᐅᑐᒃᖢᑎᒃ ᐃᖅᑲᓇᐃᔭᖅᕕᐅᕙᒃᑐᓂᒃ ᐋᓐᓂᐊᓯᐅᖅᑎᓄᑦ ᑕᒪᐃᓐᓂ ᓄᓇᑦᓯᐊᕐᒥᑦ ᐊᒻᒪ ᓄᓇᕗᒥᑦ.

ᐅᓇ ᖃᐅᔨᓴᕈᑎ ᑭᐅᔭᐅᓚᐅᕐᓯᒪᔪᖅ 328ᓄᑦ ᓄᓇᕗᒥᑦ ᐋᓐᓂᐊᓯᐅᖅᑎᓄᑦ.

ᒫᓃᑦᑐᑦ 60 ᐳᓴᓐᑎᖏᓐᓂᒃ ᐋᓐᓂᐊᓯᐅᖅᑏᑦ ᖃᐅᔨᓴᕈᑎᓂᒃ ᑭᐅᔪᑦ ᐅᖃᕐᓯᒪᓚᐅᖅᑐᑦ ᓈᒻᒪᒃᓴᕐᓂᕋᖅᖢᑎᒃ ᐃᖅᑲᓇᐃᔭᕐᕕᖏᓐᓂᒃ, ᒪᕐᕉᒃ ᐱᖓᓱᒃ ᐅᖃᓚᐅᕐᑐᑦ ᐊᑐᖃᑦᑕᕐᓯᒪᓂᖏᓐᓂᒃ ᐱᑦᑎᐊᖃᑦᑕᙱᓗᐊᖅᑐᓂᒃ ᐃᖅᑲᓇᐃᔭᖅᕕᖏᓐᓂᒃ ᐊᒻᒪᓗ ᑕᑯᖃᑦᑕᖅᓯᒪᓪᓗᑎᒃ ᐱᑦᑎᐊᖃᑦᑕᙱᓗᐊᖅᑐᓂᒃ.

ᐅᓄᕐᓂᕐᓴᐃᑦ ᒪᕐᕉᖕᓂ ᐱᖓᓱᓂᙶᖅᑐᑦ ᐅᖃᕐᓯᒪᔪᑦ ᒫᓐᓇ ᐃᖅᑲᓇᐃᔮᖏᑦ ᑕᖃᖃᑦᑕᕈᑎᐅᓗᐊᕐᓂᖓᓂᒃ, ᑕᐃᒪᓐᓇᓗ ᐅᓄᕐᓂᕐᓴᐃᑦ ᑕᖃᓯᒪᓗᐊᖅᓯᒪᓂᑰᓕᖅᖢᑎᒃ ᑕᖅᑭᑦ 12 ᐃᓗᐊᓂ.

“ᐋᓐᓂᐊᓯᐅᖅᑏᑦ ᐅᖃᕐᓯᒪᓚᐅᕐᑐᑦ ᑕᖃᓗᐊᑲᑕᖕᓂᖅ ᒪᕐᕉᖕᓂ ᐱᔾᔪᑎᖃᓗᐊᕐᓂᖓᓂᒃ, ᐊᐅᓚᑦᑎᓂᕐᒧᑦ ᓈᒻᒪᙱᓕᐅᕈᑎᓂᒃ ᐊᒻᒪᓗ ᐃᑲᔪᖅᑐᖅᑕᐅᒋᓗᐊᕐᓂᕐᒧᑦ,” ᖃᐅᔨᓴᕈᑎᑦ ᓇᓗᓇᐃᕐᓯᒪᔪᑦ.

ᑕᒪᓐᓇᐅᒐᓗᐊᖅᑎᓪᓗᒍ ᐱᖓᓱᑦ ᑕᓪᓕᒪᓂᒃ ᑭᐅᓂᑯᓂᒃ ᖃᐅᔨᓴᕈᑎᓂᒃ ᐅᖃᓚᐅᖅᑐᑦ ᐃᖅᑲᓇᐃᔮᖃᕐᓂᖏᓐ ᓄᓇᕗᒥᑦ ᓈᒻᒪᙱᓗᐊᕐᒪᑕ ᐋᓐᓂᐊᖅᑐᓄᑦ ᐱᔭᐅᔭᕆᐊᓕᒃᑯᑦ.

ᐋᓐᓂᐊᓯᐅᖅᑏᑦ ᐅᖃᓚᐅᕐᒥᔪᑦ ᐊᔪᕈᓐᓃᕐᓴᒃᑲᓐᓂᕆᐊᖃᕐᓂᖏᓐᓂᒃ ᐃᓱᒪᒃᑯᑦ ᐋᓐᓂᐊᖃᖅᑕᐃᓕᓂᕐᒥᒃ ᐊᒻᒪ ᐊᑐᓗᐊᖃᑦᑕᖅᑐᓂᒃ ᐱᓕᕆᐊᖃᕐᓂᕐᒧᑦ, ᑭᒃᑯᓕᒫᓂᒃ ᐋᓐᓂᐊᖃᖅᑕᐃᓕᑎᑦᑎᓂᕐᒥᒃ ᐊᒻᒪᓗ ᐃᓕᖅᑯᓯᕐᓂᒃ ᖃᐅᔨᒪᓂᕐᓴᐅᓂᕐᒥᒃ.

ᐅᓇ ᖃᐅᔨᓴᕈᑎ ᓴᖅᑭᑎᑦᑎᓯᒪᓚᐅᕐᒥᔪᖅ ᒫᓃᑦᑐᑦ ᖃᓂᒋᔭᖓᓂ ᐊᑕᐅᓯᕐᒥ ᐱᖓᓱᓂᒃ ᑭᐅᔪᓂᒃ ᐅᖃᖅᓯᒪᓂᖏᓐᓂᒃ ᐊᖏᕐᕋᖃᕐᓂᕐᓴᐅᓂᕋᖅᖢᑎᒃ ᓄᓇᕗᑦ ᓯᓚᑖᓂᒃ, ᐊᒻᒪᓗ ᒪᕐᕉᒃ ᐱᖓᓱᓂᒃ ᐋᓐᓂᐊᓯᐅᖅᑏᑦ ᕿᑭᖅᑕᓂ ᐋᓐᓂᐊᕕᐊᓗᒃᒥ ᐃᖅᑲᓇᐃᔭᖅᑐᑦ ᐃᖃᓗᖕᓂ ᓄᓇᕗᒥᑦ ᓄᓇᖃᓪᓚᕆᖕᓂᕋᖅᖢᑎᒃ.

ᐱᖓᓱᑦ ᑎᓴᒪᓂᒃ ᐋᓐᓂᐊᓯᐅᖅᑏᑦ ᑭᐅᔪᑦ ᖃᐅᔨᓴᕈᑎᓂᒃ ᐅᖃᕐᓯᒪᓚᐅᕐᑐᑦ ᐃᖅᑲᓇᐃᔮᖃᕐᓂᖏᓐᓂᒃ ᐊᕐᕌᒎᓕᖅᑐᓂᒃ ᑕᓪᓕᒪᓂᒃ ᑐᖔᓂᓪᓘᓐᓃᑦ.

ᑖᒃᑯᓇᙵᑦ ᑭᐅᔪᕕᓂᕐᓂᒃ, ᒫᓂ 20 ᐳᓴᓐᑎᖏᑦ ᓇᓗᔪᐃᑦ ᐃᖅᑲᓇᐃᔮᖏᑦᑕ ᐃᓱᒪᓕᕝᕕᒃᓴᖏᓐᓂᒃ ᐅᕝᕙᓘᓐᓃᑦ ᐃᖅᑲᓇᐃᔮᖃᓪᓚᕆᒃᑐᑦ, ᒫᓃᑦᑐᓪᓕ 78 ᐳᓴᓐᑎᖏᑦ ᐅᖃᕐᓯᒪᓪᓗᑎᒃ ᑳᓐᑐᕌᑎᒍᑦ ᐃᖅᑲᓇᐃᔭᓚᐅᑲᖕᓂᒃᑯᑦ ᐃᖅᑲᓇᐃᔮᖃᕐᓂᕋᖅᖢᑎᒃ.

ᐅᓇ ᖃᐅᔨᓴᕈᑎ ᓴᖅᑭᑎᑦᑎᓯᒪᔪᖅ ᐋᓐᓂᐊᓯᐅᖅᑏᑦ ᓇᑉᐸᖏᑦᑕ ᐅᖓᑖᓂ ᑭᐅᔪᐃᑦ ᓈᒻᒪᒃᓴᓚᐅᕐᓂᕋᖅᑐᑦ ᐅᕝᕙᓘᓃᑦ ᖃᓄᐃᒃᓴᓗᐊᙱᑦᑐᑦ ᐃᖅᑲᓇᐃᔮᖅᑖᕋᓱᖕᓂᕐᒧᑦ ᐱᓕᕆᐊᕆᔭᐅᔪᓂᒃ.

“ᑕᐃᒃᑯᐊ ᐅᖃᕐᓯᒪᔪᑦ ᓈᒻᒪᒃᓴᙱᓐᓂᕋᖅᖢᑎᒃ/ᓈᒻᒪᒃᓴᓗᐊᙱᓐᓂᕋᖅᖢᑎᒃ ᐅᖃᐅᓯᖃᓚᐅᕐᑐᑦ ᐊᑯᓂᓗᐊᖅ ᐊᒻᒪ ᓇᓗᓇᕈᔪᖕᓂᖓᓂᒃ ᐃᖅᑲᓇᐃᔮᖅᑖᕋᓱᖕᓂᐅᔪᖅ, ᐊᓯᐊᓄᑦ ᓄᒃᑎᕐᓂᐊᕐᓂᕐᒧᑦ ᐱᓕᕆᐊᕆᔭᕆᐊᓖᑦ, ᐃᑲᔪᖅᑕᐅᙱᓗᐊᕐᓂᕐᒥᒃ, ᐱᑕᖃᙱᓐᓂᖓᓂᒃ ᐃᖅᑲᓇᐃᔮᒥᒃ ᓂᕆᐅᓇᖅᑐᓂᒃ ᖃᐅᔨᒪᑎᑕᐅᓂᕐᒥᒃ/ᐃᖅᑲᓇᐃᔭᓕᕐᓂᕐᒧ ᐱᓕᕆᔾᔪᓯᕐᓂᒃ, ᑐᓴᐅᒪᖃᑦᑕᐅᑎᑦᑎᐊᙱᓗᐊᕐᓂᖅ ᐊᒻᒪᓗ ᐊᑐᐃᓐᓇᖅᑕᖃᙱᓗᐊᕐᓂᖓᓂᒃ ᐊᒻᒪ ᑐᓴᐅᒪᑎᑦᑎᕙᖕᓂᕐᒥᒃ,” ᖃᐅᔨᓇᓱᒍᑎᑦ ᓇᓗᓇᐃᕐᓯᒪᔪᑦ.

ᓄᓇᕗᑦ, ᐃᓚᖃᖅᖢᓂ ᐊᓯᖏᓐᓂᒃ ᐳᕌᕕᓐᓯᓂᒃ ᑎᐅᕆᑑᕆᓂᒡᓗ, ᐊᑯᓂᐊᓗᒃ ᐃᖅᑲᓇᐃᔭᖅᑎᑖᕋᓱᖕᓂᕐᒥ ᓈᒻᒪᙱᓕᐅᕈᑎᖃᕐᓯᒪᖕᒪᑕ ᐊᒻᒪᓗ ᐃᖅᑲᓇᐃᔭᖅᑎᑦᑏᓐᓇᕐᓂᕐᒥᒃ.

ᖃᐅᔨᓴᕈᑎᒧᑦ ᐅᓂᒃᑳᑦ ᐅᖃᐅᓯᖃᕐᒥᔪᖅ ᐋᖅᑭᒋᐊᕈᑎᐅᑐᐃᓐᓇᕆᐊᓕᖕᓂ ᐋᓐᓂᐊᓯᐅᖅᑎᓂᒃ ᐱᑕᖃᙱᓗᐊᕐᓂᕐᒧᑦ, ᐃᓚᖃᖅᖢᓂ ᐊᕐᕌᒍᒧᑦ ᑮᓇᐅᔭᑎᒍ ᐃᖅᑲᓇᐃᔮᖃᕈᒪᔾᔪᑎᓂᒃ, ᐊᔪᙱᓪᓗᑎᒃ ᕿᓚᒻᒥᐅᓐᓇᖅᑐᓂᒃ ᑳᓐᑐᕌᖃᖅᑎᑕᐅᔾᔪᑎᓂᒃ, ᐊᒻᒪᓗ ᐊᑐᐃᓐᓇᖃᕐᓗᑎᒃ ᐃᖅᑲᓇᐃᔮᒧᑦ ᐱᕙᓪᓕᐊᔾᔪᑎᐅᓇᔭᖅᑐᓂᒃ.

“ᐅᓪᓗᒥᓕ, [ᐋᓐᓂᐊᓯᐅᖅᑏᑦ ᑲᑐᔾᔨᖃᑎᒌᖏᑦ] 2021ᒥ ᐋᓐᓂᐊᓯᐅᖅᑎᓂᒃ ᖃᐅᔨᓴᕈᑎᑦ ᐅᕙᑦᑎᓐᓂ ᐃᑲᔪᕐᓂᐊᖅᑐᑦ ᐃᖅᑲᓇᐃᔭᖅᑎᖃᕈᓐᓇᕐᓂᕐᒥᒃ ᐊᒻᒪᓗ ᐱᔭᕆᐊᖃᖅᑕᖏᓐᓂᒃ ᐱᓇᓱᓂᕐᓴᐅᓂᕐᒧᑦ. ᐅᓇ ᐃᓱᒪᒋᔭᐅᔪᓂᒃ ᑐᓴᐅᒪᑎᑕᐅᓂᖅ ᐃᑲᔪᕐᓂᐊᕐᒪᑦ ᐅᕙᑦᑎᓐᓂᒃ ᐱᓇᓱᐊᒐᑦᑎᒍᑦ ᑐᕌᒋᔭᑦᑎᓐᓂᒃ ᐃᖅᑲᓇᐃᔭᖅᑎᑖᕋᓱᖕᓂᒃᑯᑦ ᐊᒻᒪᓗ ᐃᖅᑲᓇᐃᔭᖅᑎᖃᑯᑖᖕᓂᕐᓴᐅᔪᓐᓇᕐᓂᒃᑯᑦ,” ᓄᓇᕗᒥᑦ ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᒥᓂᔅᑕᖓ ᔮᓐ ᒪᐃᓐ ᐅᖃᓚᐅᕐᑐᖅ ᑐᓴᒐᒃᓴᓕᐅᕆᑎᓪᓗᒋᑦ.

Share This Story

(0) Comments

Join the Conversation

Your email address will not be published. Required fields are marked *

*