ᓄᓇᕗᑦ ᐱᖃᑎᒋᔭᐅᕗᖅ ᐅᑭᐅᕐᑕᖅᑐᕐᒥ ᐅᑭᐅᒃᑯᑦ ᐱᙳᐊᕕᒡᔪᐊᕐᓇᒥ ᐱᙳᐊᑲᑕᑦᑎᐊᕐᓂᕐᒧᑦ ᐃᓕᓴᕆᔭᐅᔾᔪᑎᒥ

For English version, see Nunavut shares sportsmanship award at Arctic Winter Games

ᐃᓚᖏᑦ ᐱᙳᐊᖅᑏ ᓵᓚᒃᓴᐅᓯᐊᕐᓯᒪᓪᓗᑎ, ᐅᑯᐊ ᐅᑭᐅᕐᑕᖅᑐᕐᒥ ᐅᑭᐅᒃᑯᑦ ᐱᙳᐊᕕᒡᔪᐊᕐᓇᒥ ᐃᓚᐅᔪᑦ ᐊᒻᒪ ᐊᖓᔪᖅᑳᖏᑦ ᑲᑎᓚᐅᕐᑐᑦ ᕗᐊᐃᑦᕼᐅᐊᔅᒥ ᖁᕕᐊᓲᑎᖃᖅᖢᑎᒃ ᐱᓇᓱᐊᕈᓯᕐᒥ ᐱᙳᐊᑲᑕᖕᓂᖅ ᐃᓱᓕᑎᓪᓗᒍ ᓯᕙᑖᕐᕕᒃᒥᓐ.

“ᐊᒃᓱᑦ ᐊᓂᒍᐃᕗᒍᑦ,” ᐅᖃᕐᑐᖅ ᑐᕇᓯ ᐱᐊᔅᑭ, ᐊᖓᔪᖅᑳᖅ ᕗᐊᐃᑦᕼᐅᐊᔅᒥ ᐅᑭᐅᕐᑕᖅᑐᕐᒥ ᐅᑭᐅᒃᑯᑦ ᐱᙳᐊᕕᒡᔪᐊᕐᓇᒥ ᑐᙵᓱᒃᑎᑦᑎᔪᓄᑦ ᒪᑐᓕᕐᑎᓪᓗᒍ ᐱᙳᐊᕕᒡᔪᐊᕐᓇᖅ.

ᐱᙳᐊᕐᓇᒥ ᐃᙱᖅᑐᖃᓚᐅᖅᖢᓂ ᐆ ᑳᓇᑖᒥ ᐊᒻᒪ ᒐᕙᓇ ᔭᓄᕈᓪ ᒥᐊᓕ ᓴᐃᒪᓐ ᐅᖃᓪᓚᒃᖢᓂ.

“ᐃᓅᓪᓗᖓ ᐱᕈᕐᓯᒪᓪᓗᖓᓗ ᑲᓇᑕᐅᑉ ᐅᑭᐅᕐᑕᖅᑐᖓᓂ, ᐅᓇ ᐊᒃᓱᐊᓗᒃ ᐃᒃᐱᒋᔭᕋ ᐱᙳᐊᕆᐊᖅᑐᖅᑐᐃᑦ ᐅᑭᐅᕐᑕᖅᑐᕐᒥᐅᑕᓕᒫᑦ ᑲᑎᖢᑎᒃ ᐊᒻᒪ ᐊᔪᙱᓐᓂᖏᓐᓂ ᑕᑯᔭᐅᑎᑦᑎᓪᓗᑎᒃ,” ᓴᐃᒪᓐ ᐅᖃᕐᑐᖅ.

ᑕᕝᕙᓂᑦᑕᐅᖅ ᕼᐋᔾᓴᓐ ᓵᓚᒃᓴᐅᓯᐊᕐᒥ ᑐᓂᓯᓐᓇᓚᐅᕐᒥᔪᖅ, ᐱᙳᐊᖅᑎᓄᑦ “ᐱᙳᐊᑦᑎᐊᑲᑕᓛᖑᓚᐅᕐᑐᓄᑦ ᐱᙳᐊᓂᖅ ᒪᓕᒃᖢᒍᑦ, ᑐᙵᓇᕐᓂᒃᑯᑦ ᐊᒻᒪᓗ ᓈᒻᒪᒃᑐᒃᑯᑦ ᐱᙳᐊᑲᑕᖕᓂᕐᒧᑦ,” ᐅᖃᕐᑐᖅ ᔮᓐ ᕉᑕ, ᐊᖓᔪᖅᑳᖅ ᓄᓇᕐᔪᐊᕐᒥ ᐅᑭᐅᕐᑕᖅᑐᕐᒥ ᐅᑭᐅᒃᑯᑦ ᑲᑎᒪᔨᕋᓛᓄᑦ.

ᓵᓚᒃᓴᖅᑐᑦ ᓂᕈᐊᕆᔭᐅᕙᒃᑐᑦ ᐱᙳᐊᕕᒡᔪᐊᕐᓇᒥ ᐱᓕᕆᔨᒻᒪᕆᖕᓄᑦ ᐊᒻᒪᓗ ᓯᕗᓪᓕᖅᐹᒥ ᐊᔾᔨᒌᓂ ᓂᕈᐊᓚᐅᕐᑐᖅ — ᐃᓚᒌᑦ ᓄᓇᕗᑦ ᐊᒻᒪ ᐋᐴᑕᐅᑉ ᓂᒋᐊᓂᙶᖅᑐᓂᒃ ᓵᓚᒃᓴᐅᓯᐊᕐᒥ 2026-ᒧᑦ ᑐᓂᔭᐅᔪᐃᓐᓇᐅᓪᓗᑎᒃ.

“ᖁᕕᐊᓇᑦᑎᐊᓚᐅᕐᑐᖅ,” ᐅᖃᕐᑐᖅ ᓄᓇᕗᒥᑦ ᕼᐋᑭᒥ ᐱᙳᐊᖅᑎᑦ ᒌᑉ ᒫᓯ, 15, ᐅᖃᐅᓯᖃᖅᖢᓂ ᐅᑭᐅᕐᑕᖅᑐᕐᒥ ᐅᑭᐅᒃᑯᑦ ᐱᙳᐊᕕᒡᔪᐊᕐᓇᒥ. “ᐊᒃᓱᕈᕐᓇᓚᐅᕐᑐᖅ ᓵᓚᒃᓴᕋᓱᒃᖢᑕ ᑕᐃᒪᓕ ᐊᓕᐊᓇᐃᑦ ᓵᓚᒃᓴᓚᐅᕋᑦᑕ.”

ᒫᓯ ᐃᓚᒋᔭᐅᓚᐅᕐᑐᑦ 15 ᑐᖔᓂ ᐊᕐᕌᒍᓕᖕᓄᑦ ᕼᐋᑭᕐᑎᓂ ᐊᒻᒪ ᒎᓗᑖᖅᖢᑎ ᔫᑳᓐᒥ ᐱᙳᐊᖃᑎᖃᖅᖢᑎᒃ ᒫᔅᓯ 13-ᒥ.

ᖁᕕᐊᓲᑎᖃᖅᑎᓪᓗᒋᑦ ᐊᑐᓚᐅᕐᑐᖅ ᒎᓗᒥ ᐅᓗᙳᐊᕐᒥ ᐊᒻᒪᓗ ᐊᐅᐸᕐᑐᒥ ᐊᒻᒪ ᕿᓂᕐᑕᒥ ᐃᓚᒌᑦ ᔫᑲᓐ ᔭᐃᑲᖓᓂ ᑕᐅᕐᓰᖃᑎᖃᓚᐅᖅᖢᓂ ᖁᕐᓱᖅᑕᕐᒥ ᐊᒻᒪ ᑐᖑᔪᖅᑐᒥ ᓴᐃᑲᖓᓂ.

“ᐱᖃᓐᓇᕇᓕᓚᐅᕐᑐᒍᑦ,” ᐅᖃᕐᑐᖅ.

ᑭᖑᓪᓕᖅᐹᖓᓂ ᓵᓚᒃᓴᐅᓯᐊᕐᑐᑦ ᐃᒪᐃᓕᖓᓚᐅᕐᑐᑦ, ᐊᓛᔅᑲ ᐅᓄᓛᓂ 227-ᓂ ᓵᓚᒃᓴᐅᓯᐊᖅᖢᑎᒃ ᑖᒃᑯᐊᓗ 78-ᓂ ᒎᓗᓂ ᓵᓚᒃᓴᐅᓯᐊᕐᓯᒪᓪᓗᑎᒃ, ᐅᖃᕐᓯᒪᓚᐅᕐᑐᖅ ᐅᑭᐅᕐᑕᖅᑐᕐᒥ ᐅᑭᐅᒃᑯᑦ ᐱᙳᐊᕕᒡᔪᐊᕐᓇᒧᑦ ᖃᕋᓴᐅᔭᒃᑯᑦ ᓴᖅᑭᔮᒐᕆᔭᐅᔪᑦ.

ᔫᑳᓐ ᑐᒡᓕᕆᔭᐅᓚᐅᕐᑐᖅ 174-ᓂ ᓵᓚᒃᓴᐅᓯᐊᖅᖢᑎᒃ ᐊᒻᒪ ᑭᖑᓂᑦᑎᐊᖓᓂ ᐋᐴᑕᐅᑉ ᓂᒋᐊᓃᑦᑐᑦ 127-ᓂ ᓵᓚᒃᓴᐅᓯᐊᖅᖢᑎᒃ, ᓄᓇᑦᓯᐊᖅ 98-ᓂ ᓵᓚᒃᓴᐅᓯᐊᖅᖢᑎᒃ ᐊᒻᒪ ᑲᖥᓪᖡᑦ ᓄᓇᖓ 80-ᓂ ᓵᓚᒃᓴᐅᓯᐊᖅᖢᑎᒃ.

6-ᒋᔭᐅᓪᓗᓂ ᓄᓇᕗᑦ 55-ᓂ ᓵᓚᒃᓴᐅᓯᐊᓚᐅᕐᑐᑦ (10 ᒎᓗᒥ, 19 ᓯᐊᕐᓇᓂᒃ ᐊᒻᒪ 26-ᓂ ᑲᔫᔭᕐᓂ), ᑭᖑᓂᐊᒍᓪᓕ ᓵᑉᒥ 24-ᓂ ᓵᓚᒃᓴᐅᓯᐊᖅᖢᑎᒃ ᐊᒻᒪ ᓄᓇᕕᒃ 12-ᓂ (ᐱᖓᓱᑦ ᒎᓗᑦ, ᑕᓪᓕᒪᑦ ᓯᐊᕐᓇᓂᒃ ᐊᒻᒪ ᑎᓴᒪᑦ ᑲᔫᔭᑦ).

ᓯᕙᑖᕐᕕᒃᒥ ᒪᑐᓕᕐᑎᓪᓗᒍ ᓯᓚᒥ ᖁᕕᐊᓱᓗᑲᑕᓚᐅᕐᑐᑦ. ᐱᙳᐊᖅᑎᐅᔪᑦ ᐃᓚᐅᔪᓪᓗ ᒧᒥᑲᑕᒃᖢᑎᒃ ᐋᐸᐅ ᑖᓐᓯᖕ ᑯᐃᓐ (Abba’s Dancing Queen) ᐊᒻᒪ ᐸᐱᐊᓪ ᕉᓐᔅ ᐱᖕᒃ ᐴᓂ ᑲᓚᑉ (Chappell Roan’s Pink Pony Club).

ᐅᑭᐅᕐᑕᖅᑐᕐᒥ ᐅᑭᐅᒃᑯᑦ ᐱᙳᐊᕕᒡᔪᐊᕐᓇᖅ ᐱᒋᐊᓚᐅᕐᓯᒪᔪᖅ ᒫᔅᓯ 8-ᒥ, ᒫᓂ 2,000-ᖏᓐᓂ ᐱᙳᐊᖅᑎᓂ ᑲᑎᔾᔪᑎᐅᓪᓗᓂ ᐅᑯᓇᙶᖅᑐᓂᒃ ᓄᓇᕗᑦ, ᓄᓇᕕᒃ, ᐊᓛᔅᑲ, ᔫᑳᓐ, ᓄᓇᑦᓯᐊᖅ, ᐋᐴᑕᐅᑉ ᓂᒋᐊᓂ, ᑲᖥᓪᖡᑦ ᓄᓇᖓᓂ ᐊᒻᒪᓗ ᓴᑉᒥᑦ ᐅᕙᓂ ᓯᑳᓐᑎᓃᕕᐊᒥ.