ᓄᓇᕗᑦ ᓂᐅᑭᓕᐅᒥ (nuclear) ᐊᑐᓕᕆᐊᖃᖅᑐᖅ, ᐊᒥᐊᓕᑲᒥ ᐃᖅᑲᓇᐃᔭᖅᕕᓕᕆᓂᕐᒧᑦ ᑭᒡᒐᖅᑐᐃᔨ ᐅᖃᕐᑐᖅ

For the English version of this story, please see Nunavut should go nuclear, energy industry representative says.

ᓄᓇᕗᑦ ᐃᓱᒪᔭᕆᐊᖃᕐᑐᖅ ᐃᑲᔫᑎᐅᔪᓐᓇᕈᓐᓇᖅᑐᓂᒃ ᐊᑐᕐᓗᑎᒃ ᒥᑭᑦᑐᓂ ᓂᐅᑭᓕᐅᒧᑦ ᐊᑐᕈᓐᓇᖅᓯᒍᑎᓂᒃ (nuclear reactors) ᐆᒻᒪᖅᑯᑎᓄᑦ ᐊᑐᖅᑕᐅᔪᓐᓇᕋᔭᖅᑐᒥ, ᐅᖃᓚᐅᕐᑐᖅ ᐊᒥᐊᓕᑲᒥ ᓂᐅᑭᓕᐅᒧᑦ ᐆᒻᒪᖅᑯᑎᓕᕆᔾᔪᑎᓂᒃ ᐱᖅᑯᑎᒃᓴᓕᕆᔨᒃᑯᓐᓄᑦ.

“ᐅᓇ ᐱᓕᕆᐊᖑᓕᑐᐃᓐᓇᕆᐊᓕᒃ. ᓈᒻᒪᑐᐃᓐᓇᕋᔭᕐᑐᖅ ᐃᓕᔅᓯᓐᓄᑦ,” ᐅᖃᕐᑐᖅ ᐊᒡᒐᑕ ᓚᔅᑭᕗᐃᑦᔅ, ᐅᑯᓄᖓ eVinci ᐱᓕᕆᐊᓄᑦ ᐱᕙᓪᓕᐊᔪᓕᕆᓂᕐᒥ ᐊᐅᓚᑦᑎᔨ ᑲᓇᑕᒥ ᐅᑯᓄᖓ ᕗᐃᐊᔅᑎᖕᕼᐊᐅᔅ ᐅᐊᔭᓅᖓᔪᓄᑦ ᑯᐊᐳᕇᓴᓐᑯᓐᓂ. Evinci ᐃᓚᒋᔭᐅᔪᖅ ᑲᒻᐸᓂᒃᑯᓐᓄᑦ ᓂᐅᑭᓕᐅᒥ ᐆᒻᒪᖅᑯᑎᓕᕆᓂᕐᒧᑦ (microreactor) ᐱᓕᕆᐊᕆᔭᐅᔪᖅ.

“ᑕᒪᐅᙵᕐᓯᒪᒐᑦᑕ ᐅᔾᔨᕈᓱᓕᖅᑎᑦᑎᓇᓱᒃᖢᑕ ᐊᒻᒪ ᐃᓕᔅᓯᓐᓂ ᖃᓄᐃᓕᐅᖅᐸᓪᓕᐊᓂᑦᑎᓐ ᖃᐅᔨᕙᓪᓕᐊᖁᔨᓪᓗᑕ ᑕᒪᓐᓇ ᐱᓕᕆᐊᒃᓴᖅ ᐱᓕᕆᐊᖑᕙᓪᓕᐊᓂᐊᕐᒪᑦ.”

ᓚᔅᑭᕗᐃᑦᔅ ᐅᖃᓪᓚᓚᐅᕐᑐᖅ 100-ᐸᓗᖕᓄᑦ ᑲᑎᒪᖃᑕᐅᔪᓄᑦ ᐅᕙᓂ ᓄᓇᕗᒥᑦ ᐅᔭᕋᒃᓴᖅᓯᐅᕐᓂᕐᒧᑦ ᑲᑎᒪᓂᕐᒥ ᐊᐃᕆᓕ 10-ᖑᑎᓪᓗᒍ.

ᒪᑯᐊ ᓂᐅᑭᓕᐅᒧᑦ ᐆᒻᒪᖅᑯᑎᖃᖅᑎᑦᑎᔨ ᐊᑐᖃᑦᑕᖅᑐᑦ ᒪᑯᓇᙶᖅᑐᓂᒃ ᔪᕇᓂᐊᒻᒥ ᐊᒻᒪᓗ ᐆᒻᒪᖅᑯᑎᖃᓕᕈᓐᓇᖅᖢᓂ 1 gigawatt of electricity. ᓚᔅᑭᕗᐃᑦᔅ ᐆᒻᒪᖅᑯᑎᖃᕈᑎᓂ ᐅᖃᐅᓯᖃᖅᑐᖅ ᓄᓇᕗᒥᐅᓄᑦ ᐅᓇ 1/200^th-ᖓᓂᒃ ᒥᑭᓐᓂᕐᓴᐅᑎᒋᔪᖅ. ᓴᙱᓂᖃᓪᓗᐊᖅᖢᓂ 5 ᒥᒐᕗᐊᑦᔅᓂ.

5 ᒥᒐᕗᐊᑦᔅ ᐆᒻᒪᖅᑯᑎᖃᕈᑎ ᓈᒻᒪᓪᓗᐊᕋᔭᖅᑐᖅ “ᑮᓇᐅᔭᑎᒍᑦ ᖃᓄᐃᓕᐅᕋᓱᒡᓗᓂ” ᑭᓯᐊᓂᓕ ᒥᑭᓐᓂᖓ ᓈᒻᒪᒐᔭᖅᖢᓂ ᓅᑕᐅᔭᕆᐊᒃᓴᖅ ᐊᒻᒪ ᐊᐅᓚᑕᐅᓕᕆᐊᒃᓴᖅ, ᓚᔅᑭᕗᐃᑦᔅ ᐅᖃᕐᑐᖅ.

ᒫᓐᓇᓕ ᐃᖃᓗᐃᑦ, ᓲᕐᓗ, ᐊᑐᕆᐊᖃᕐᒪᑕ ᒫᓂ 10-ᓂ 11-ᓄ ᒥᒐᕗᐊᑦᔅᓂᒃ ᔭᓄᕇᑕᓂᙶᖅᑐᓂᒃ ᑖᒃᑯᐊᓗ ᐊᑐᖅᐸᒃᖢᑎᒃ 15 ᒥᓕᐊᓐ ᓖᑕᓂᒃ ᑏᓱᒡ ᐅᕐᓱᐊᓗᒃᒥ ᐊᕐᕌᒍᒥ.

ᐅᓇ ᐆᒻᒪᖁᑎᓕᕆᔾᔪᑎ ᐅᖃᐅᓯᕆᔭᖓ ᓚᔅᑭᕗᐃᑦᔅ ᓄᓇᐅᑉ ᖄᖓᓂ ᓂᐅᑭᓕᐅᒧᑦ ᐆᒻᒪᖅᑯᑎᓕᕆᕝᕕᒃ ᓄᓇᒥ 2 ᐊᐃᑯᔅᓂ ᓈᒻᒪᒃᓴᕋᔭᖅᑐᖅ ᐊᐅᓚᑕᐅᓗᓂ ᐊᒻᒪᓗ ᐊᕐᕌᒍᓂ 8-ᓂ ᐊᑐᕈᓐᓇᕋᔭᖅᖢᓂ ᔪᕇᓂᐊᒻᒧᑦ ᐅᕐᓴᒃᑕᐅᓚᐅᖅᑎᓐᓇᒍ.

ᓴᓇᔭᐅᓯᒪᔪᖅ ᓄᒃᑎᖅᑕᐅᔪᓐᓇᕋᔭᕐᓗᓂ ᐅᒥᐊᕐᔪᐊᒃᑯᑦ ᐊᒻᒪᓗ ᐃᓂᒋᓂᐊᖅᑕᖓᓄᐊᕈᓂ ᐅᓪᓗᕐᓂ 30-ᓂ ᓴᓇᔭᐅᓇᔭᖅᖢᓂ.

ᓂᐅᑭᓕᐅᒧᑦ ᐆᒻᒪᖁᑎᖃᖅᑎᑦᑎᔾᔪᑎᐅᔪᖅ 15 ᐳᓴᓐᑎᖓᓂ ᑲᓇᑕᐅᑉ ᐆᒻᒪᖅᑯᑎᖓᓂᒃ. ᒫᓐᓇᓕ ᑕᓪᓕᒪᓂᒃ ᐆᒻᒪᖅᑯᑎᓕᕆᕝᕕᖃᖅᑐᑦ ᐱᖓᓱᓂ ᐳᕌᕕᓐᓯᓂᒃ ᑖᒃᑯᐊᓗ 22-ᓂ ᓂᐅᑭᓕᐅᒧᑦ ᐆᒻᒪᖅᑯᑎᖃᕈᑎᖃᖅᖢᑎᒃ, ᐅᖃᕐᓯᒪᔪᑦ ᑲᓇᑕᒥ ᓂᐅᑭᓕᐅᒥᒃ ᐊᑦᑕᓇᖅᑐᒦᑦᑕᐃᓕᓂᕐᒧᑦ ᑲᒥᓴᓐᑯᑦ.

ᒫᓐᓇᓕ ᐊᑕᐅᓯᕐᒥ ᐱᓕᕆᐊᖃᐃᓐᓇᖅᑐᑦ ᑲᓇᑕᒥ ᐅᑯᓇᙵᑦ ᓄᐊᔅᑎᖕᕼᐊᐅᔅ ᐆᒻᒪᖅᑯᑎᖃᕈᑎᖏᓐᓂᒃ, ᓚᔅᑭᕗᐃᑦᔅ ᐅᖃᕐᑐᖅ.

ᓄᕕᐱᕆ 2023-ᒥ, ᓴᑳᑦᓱᐊᓐ ᒐᕙᒪᖏᑦ ᑐᓴᖅᑎᑦᑎᓚᐅᕐᓯᒪᔪᑦ $80 ᒥᓕᐊᓐᓂ ᐃᑲᔫᑎᖃᖅᑎᑦᑎᓂᖏᓐᓂᒃ ᐅᑯᓂᖓ ᓴᔅᑳᑦᓱᐊ ᖃᐅᔨᓴᖅᑎᓄᑦ ᑲᑎᒪᔨᓄᑦ ᓴᓇᔪᓐᓇᕐᓂᐊᕐᒪᑕ ᓯᕗᓪᓕᖅᐹᒥ ᐆᒻᒪᖅᑯᑎᖃᕈᑎᒃᓴᒥᒃ.

ᓈᒻᒪᒃᑲᔭᖅᑐᖅ ᐆᒻᒪᖅᑯᑎᖃᖅᑎᑦᑎᓂᕐᒥᒃ 5,500 ᐊᖏᕐᕋᕆᔭᐅᔪᓂᒃ ᐊᒻᒪᓗ ᒫᓂᒃ 55,000 ᑕᓐᔅ ᐳᔪᕐᒧᑦ ᐱᐅᔪᓐᓃᕈᑎᐅᔪᓂᒃ ᓯᓚᐃᓐᓇᕐᒨᙱᔾᔪᑎᐅᓇᔭᖅᖢᓂ ᐊᕐᕌᒍᒥᑦ, ᐅᓇ ᐱᓕᕆᐊᒃᓴᒧᑦ ᐸᕐᓇᐅᑎ ᐅᖃᕐᓯᒪᔪᖅ. ᐅᖃᕐᓯᒪᙱᖢᓂ ᖃᓄ ᐊᑯᓂᐊᓇᔭᕐᒪᖔᑦ ᐅᕝᕙᓘᓐᓃᑦ ᐊᑭᒋᓇᔭᖅᑕᖓᓂ ᑲᑎᖢᑎᒃ.

ᓚᔅᑭᕗᐃᑦᔅ ᐅᖃᓚᐅᕐᑐᖅ ᒫᓐᓇ ᐱᐅᓂᖅᐹᖑᓂᖓᓂ ᓄᓇᕗᒻᒥᐅᑕᑦ ᐃᓱᒪᒋᔭᖃᓕᕈᑎᒃ ᓂᐅᑭᓕᐅᒧᑦ ᐆᒻᒪᖅᑯᑎᖃᕐᓂᕐᒥᒃ, ᐱᔾᔪᑎᖃᖅᖢᓂ ᒐᕙᒪᓕᕆᔨᐅᔪᑦ ᖁᓕᕇᓕᕐᒪᓂᒃᑯᑦ ᑕᒪᐃᓐᓂ ᖃᐅᔨᒃᑲᓐᓂᕈᒪᓯᒪᓕᕐᒪᑕ ᐆᒻᒪᖅᑯᑎᓕᕆᓂᕐᒥᒃ ᒥᒃᖠᕚᓪᓕᖅᑎᑦᑎᔪᒪᓂᕐᒥ ᑲᓇᑕᒥ ᑳᐸᓐ ᖃᓄᐃᑉᐸᓪᓕᐊᒍᑎᖏᓐᓂᒃ.

“ᐊᒃᓱᐊᓗᒃ ᐊᓯᔾᔨᕈᓘᔭᕐᓂᖅᑕᖃᕐᒪᑦ ᕿᓚᒥᐊᓗᒃ,” ᐅᖃᕐᑐᖅ, ᐅᖃᐅᓯᖃᖅᖢᓂ ᒐᕙᒪᒃᑯᑦ ᐊᓯᙳᕐᓯᒪᓕᕐᓂᖏᓐᓂᒃ. “ᓲᕐᓗ ᓂᐅᑭᓕᑎᑐᑦ ᓱᑲᓕᑎᒋᔪᖅ.”

ᓚᔅᑭᕗᐃᑦᔅ ᐅᖃᓚᐅᙱᑦᑐᖅ ᐅᑯᐊ ᕗᐃᐊᔅᑎᖕᕼᐊᐅᔅ ᓄᓇᕗᑦ ᒐᕙᒪᒃᑯᓐᓄᑦ ᐅᐸᒍᑎᓚᐅᕐᒪᖔᑕ ᑕᒪᑐᒧᖓ ᓂᐅᑭᓕᐅᒧᑦ ᐆᒻᒪᖅᑯᑎᓕᕆᓂᕐᒧᑦ ᑐᒃᓯᕋᐅᑎᓂᒃ.

ᑕᖅᑭᐅᓵᖅᑐᓂ ᐊᓂᒍᖅᑐᓂᒃ, ᓄᓇᕗᑦ ᑐᓂᔭᐅᓯᒪᓕᕐᒪᑦ ᑲᑎᑦᑐᓂᒃ $26 ᒥᓕᐊᓐᓂ ᒐᕙᒪᑐᖃᒃᑯᓐᓂᒃ ᐃᑲᔫᑎᒃᓴᓂᒃ ᐋᖅᑭᒃᑕᐅᓯᒪᓕᕐᑐᒥ ᐃᖃᓗᖕᓂ ᐃᒪᕐᒧᑦ ᐆᒻᒪᖅᑯᑎᓕᕆᓂᕐᒧᑦ ᑖᓐᓇᓗ 15 ᒥᒐᕗᐊᑦᔅᓂ ᐆᒻᒪᖅᑯᑎᖃᕈᑎᐅᓇᔭᖅᖢᓂ.

ᐅᓇ ᐱᓕᕆᐊᒃᓴᖅ ᐊᐅᓚᑕᐅᔪᖅ ᓄᓇᕗᑦ ᓄᒃᑭᒃᓴᐅᑏᑦ ᑯᐊᐳᕆᓴᓐᑯᓐᓄᑦ, ᐃᓄᖕᓄᑦ ᓇᖕᒥᓂᕆᔭᐅᔪᓂ ᐃᓚᒋᔭᐅᔪᖅ ᕿᕿᖅᑖᓗᒃ ᑯᐊᐳᕇᓴᓐᑯᓐᓂᒃ ᐊᒻᒪᓗ ᐃᓚᖃᕋᔭᖅᖢᓂ ᒫᓂ 50 ᒦᑕᓂ ᐳᖅᑐᓂᓕᖕᒥ ᐃᒪᕐᒧᑦ ᓴᐴᓕᑕᕐᒥᒃ ᐊᒻᒪᓗ ᐆᒻᒪᖅᑯᑎᖃᓕᕆᕝᕕᒃᓴᒧᑦ ᒫᓂ ᑰᒑᓗᒃ ᑰᒃ ᓴᓂᑦᑎᐊᖓᓂ ᐃᖃᓗᖕᓂ ᐅᖓᓯᖕᓂᓕᒃ 60 ᑭᓛᒥᑕᓂ ᐃᖃᓗᐃᑦ ᐅᐊᖕᓇᖓᑕ ᑲᓇᖕᓇᖅᐸᓯᐊᓂᒃ.

ᒫᓐᓇᓕ ᖃᓄᖅ ᑖᓐᓇ ᐊᑭᖃᕋᔭᕆᐊᒃᓴᖓᓂ ᐅᖃᐅᓯᐅᓯᒪᙱᑦᑐᖅ ᐆᒪ ᐆᒻᒪᖅᑯᑎᖃᖅᕕᒃᓴᖅ ᐊᐅᓚᑕᐅᓕᕋᔭᖅᖢᓂ 2033-ᒥ. ᑭᓯᐊᓂᓕ 2017-ᖑᑎᓪᓗᒍ ᐃᓱᒪᒋᔭᐅᓚᐅᕐᓯᒪᔪᖅ ᐊᑭᖃᕋᔭᕆᐊᒃᓴᖓᓂᒃ $500 ᒥᓕᐊᓐᓂᒃ.