ᓄᓇᕗᑦ ᓯᕗᓂᒃᓴᕗᑦ ᕿᓂᖅᐸᓪᓕᐊᓕᖅᐳᑦ ᓄᑖᒥ ᐃᓱᒻᒥᖅᑐᐃᔨᒃᓴᒥ

For English version, see Nunavut Sivuniksavut begins search for new executive director

ᓄᓇᕗᑦ ᓯᕗᓂᒃᓴᕗᑦ ᕿᓂᖅᐳᑦ ᐃᖅᑲᓇᐃᔭᖅᑎᑖᕐᓂᕐᒥ ᓄᑖᖑᔪᒥ ᐃᓱᒻᒥᖅᑐᐃᔨᒃᓴᒧᑦ.

ᑭᓯᐊᓂ ᓯᓚᑦᑐᖅᓴᕐᕕᒃ, ᑐᓂᓯᕙᒃᑐᒥ ᖁᑦᑎᖕᒥᖅᓴᒥ ᐃᓕᓐᓂᐊᕐᓂᐅᔪᒥ ᐃᓄᖕᓄᑦ ᐃᓕᓐᓂᐊᖅᑎᓄᑦ ᐋᑐᕚᒥ, ᐅᖃᔾᔮᙱᓚᑦ ᖃᓄᐃᒻᒪᑦ ᓯᕗᓂᐊᓂ ᐃᓱᒻᒥᖅᑐᐃᔨᐅᓚᐅᖅᑐᖅ ᑕᐃᑲᓂ ᐃᓂᖓᓃᑦᑐᓐᓃᕐᓂᖓᓂ.

ᑕᖅᑭᐅᑉ ᐱᒋᐊᕐᓂᐸᓗᐊᓂ, ᓄᓇᕗᑦ ᓯᕗᓂᒃᓴᕗᑦ ᒪᓂᓴᓚᐅᖅᐳᑦ ᐃᖅᑲᓇᐃᔮᒃᓴᒥ ᓄᑖᖑᔪᒧᑦ ᐃᓱᒻᒥᖅᑐᐃᔨᒃᓴᒧᑦ ᕙᐃᔅᐳᒃᑯᑦ ᒪᒃᐱᒐᖓᓂ.

ᓕᓐ ᕿᓚᕝᕙᖅ ᐃᓱᒻᒥᖅᑐᐃᔨᐅᓚᐅᖅᐳᖅ ᑕᐃᒪᙵᓂ ᒫᔾᔨ 2021−ᒥ. ᑎᒃᑯᐊᖅᑕᐅᓚᐅᖅᐳᖅ ᒪᓕᒃᑐᒥ ᓄᖅᑲᕐᓂᐅᔪᒥ ᒧᐊᓕ ᕼᐋᓐᓴᓐᒧᑦ, ᐃᓕᓐᓂᐊᕐᕕᖕᒦᓯᒪᔪᒥ ᑕᐃᒪᙵᓂ ᐱᒋᐊᓕᓵᐸᓗᖕᓂᖓᓂ.

ᒫᓐᓇᐅᔪᒥ, ᒪᕐᕉᖕᓂ ᐃᖅᑲᓇᐃᔭᖅᑎᐅᔪᓂ ᐃᓕᓐᓂᐊᕐᕕᖕᒥ ᐱᔨᑦᑎᕋᖅᐳᑦ ᐃᓱᒻᒥᖅᑐᐃᔨᐅᓚᐅᑲᖕᓂᖏᓐᓂ: ᑖᓐ ᒍᐊᐃ ᐊᖓᔪᖅᑳᖑᓪᓗᓂ ᐃᓕᓴᐃᔨᐅᕗᖅ ᐊᒻᒪ ᕌᐱᓐ ᒧ−ᓕᐊᓐ ᐃᓄᓕᕆᔨᐅᕗᖅ.

ᑲᑐᔾᔭᐅᔪᒥ ᖃᕋᓴᐅᔭᑎᒍᑦ ᑎᑎᕋᕐᓂᐅᔪᒥ ᑭᐅᓂᕐᒧᑦ ᐊᐱᖅᑯᑕᐅᔪᓂ ᓄᓇᑦᓯᐊᖅ ᑐᓴᒐᒃᓴᓕᕆᔨᒃᑯᓐᓂ, ᒪᕐᕉᒃ ᐊᔭᐅᕆᓚᐅᖅᐳᑦ ᐱᔪᒪᔪᓂ ᑐᒃᓯᕋᕐᓂᕐᒧᑦ ᐃᓂᒃᓴᐅᔪᒧᑦ.

ᑭᓯᐊᓂ, ᒍᐊᐃ ᐊᒻᒪ ᒧ−ᓕᐊᓐ ᐅᓂᒃᑳᕆᓂᖃᓚᐅᙱᓚᑦ ᖃᓄᐃᒻᒪᑦ ᐃᓕᓐᓂᐊᕐᕕᒃ ᕿᓂᕐᓂᖓᓂ ᓄᑖᖑᔪᒥ ᐃᓱᒻᒥᖅᑐᐃᔨᒃᓴᒥ, ᐊᐱᕆᔭᐅᒐᓗᐊᕐᒪᑕ ᕿᓚᕝᕙᐅᑉ ᕿᒪᒃᓯᓂᖓᓂ ᑕᐃᑲᙵᑦ ᐱᓕᕆᐊᖑᔪᒥ.

“ᐅᖃᓚᐅᕋᕕᑦ, ᓄᓇᕗᑦ ᓯᕗᓂᒃᓴᕗᑦ ᒫᓐᓇᐅᔪᒥ ᕿᓂᖅᐳᑦ ᓄᑖᖑᔪᒥ ᐃᓱᒻᒥᖅᑐᐃᔨᒃᓴᒥ,” ᒍᐊᐃ ᐊᒻᒪ ᒧ−ᓕᐊᓐ ᐅᖃᓚᐅᖅᐳᑦ.

“ᐊᕐᕌᒍᓄᑦ 38−ᓄᑦ, ᓄᓇᕗᑦ ᓯᕗᓂᒃᓴᕗᑦ ᐃᒪᐃᓯᒪᕗᖅ — ᐊᒻᒪ ᑲᔪᓰᓐᓇᕐᓂᐊᖅᐳᖅ — ᐃᓂᐅᓗᓂ ᐃᓄᐃᑦ ᒪᒃᑯᒃᑐᑦ ᓂᕆᐅᒍᓐᓇᕐᓂᖏᓐᓂ ᖁᑦᑎᒃᑐᒥ ᐃᓕᓐᓂᐊᕐᓂᐅᔪᒥ ᐊᒻᒪ ᓇᖕᒥᓂᖅ ᐃᓕᑦᑎᓂᐅᔪᒥ ᐊᑦᑕᓇᙱᑦᑐᒥ ᐊᒻᒪ ᑐᙵᓱᒃᑎᑦᑎᔪᒥ ᐊᕙᑎᐅᔪᒥ.”

ᐊᓯᖏᓐᓂ ᐅᖃᐅᓯᒃᓴᓕᐊᖑᓚᐅᖅᑐᓂ ᖃᕋᓴᐅᔭᑎᒍᑦ ᑎᑎᕋᕐᓂᐅᔪᒥ ᒪᕐᕉᖕᓂ ᑎᑎᕋᖅᓯᒪᓂᐅᔪᓂ ᐊᔭᐅᕆᔪᒥ ᓄᑖᓂ ᐃᓕᓐᓂᐊᖅᑎᓂ ᑐᒃᓯᕋᕐᓂᕐᒥ ᐃᓕᓐᓂᐊᖃᑕᐅᔪᒪᓂᕐᒧᑦ ᑎᑭᑉᐸᓪᓕᐊᔪᒧᑦ ᐃᓕᓐᓂᐊᕐᕕᐅᑉ ᐊᕐᕌᒍᖓᓄᑦ.

“ᐅᑕᖅᑭᔪᓐᓇᙱᑉᐳᒍᑦ ᑐᙵᓱᒃᑎᑦᑎᓂᕐᒥ ᐃᓕᓐᓂᐊᕐᕕᐊᕈᓯᖅ 2023-24−ᒥ ᑲᒪᓇᖅᑐᒥ ᐱᓕᕆᐊᕆᔭᑦᑎᓐᓄᑦ,” ᒍᐊᐃ ᐊᒻᒪ ᒧ−ᓕᐊᓐ ᐅᖃᓚᐅᖅᐳᑦ.

ᕿᓚᕝᕙᖅ ᐅᖃᖃᑎᒋᔭᐅᔪᓐᓇᓚᐅᙱᓚᖅ ᐅᖃᐅᓯᒃᓴᓕᐅᕐᓂᕐᒧᑦ. LinkedIn ᑕᑯᒃᓴᐅᓂᖓ ᓇᓗᓇᐃᖅᓯᕗᖅ ᒫᓐᓇᓕᓴᐅᔪᒥ ᐃᓕᓐᓂᐊᕐᕕᐅᑉ ᐃᓱᒻᒥᖅᑐᐃᔨᒋᔭᐅᓂᖓᓂ.

ᐃᖅᑲᓇᐃᔮᖑᔪᖅ ᐃᓱᒻᒥᖅᑐᐃᔨᐅᓂᕐᒥ ᓄᓇᕗᑦ ᓯᕗᓂᒃᓴᕗᒻᒥ ᐃᓚᖃᖅᐳᖅ ᑕᑭᔪᒥ ᑎᑎᕋᖅᓯᒪᓂᐅᔪᒥ ᐱᓕᕆᐊᖑᔪᓂ ᐊᒻᒪ ᑲᒪᒋᔭᕆᐊᖃᕐᓂᐅᔪᓂ, ᐃᓚᖃᖅᑐᒥ ᑮᓇᐅᔭᓂ ᐊᐅᓚᑦᑎᓂᕐᒧᑦ, ᐃᖅᑲᓇᐃᔭᖅᑐᓕᕆᓂᕐᒥ, ᐱᓕᕆᐊᖑᓂᐅᔪᓂ, ᐃᓕᓐᓂᐊᖅᑎᓂ ᐱᓕᕆᐊᖃᕐᓂᕐᒥ ᐊᒻᒪ ᐋᔩᖃᑎᒌᖕᓂᕐᒥ, ᐊᒻᒪ ᐃᒡᓗᕐᔪᐊᒥ ᐊᐅᓚᑦᑎᓂᕐᒥ.

ᐃᓱᓕᕝᕕᒃᓴᖓ ᑐᒃᓯᕋᖅᑐᓄᑦ ᒫᔾᔨ 24−ᖑᕗᖅ, ᐊᒻᒪ ᐃᖅᑲᓇᐃᔮᒃᓴᖅ ᐅᖃᖅᓯᒪᕗᖅ ᓄᓇᕗᒻᒥ ᐱᔪᓐᓇᕐᓂᖅᑖᖅᑎᑕᐅᓯᒪᔪᑦ ᓯᕗᓪᓕᐅᑎᑕᐅᓂᐊᖅᐳᑦ.