ᓄᓇᕗᑦ ‘ᐃᓚᒋᔭᐅᔪᖅ ᑲᓇᑕᒥ’ ᑐᕋᒻᑉ ᐊᑭᓕᐅᑎᒃᓴᒃᑲᓐᓂᒃᓴᓕᕆᑎᓪᓗᒍ

For English version, see Nunavut ‘stands united with Canada’ as Trump threatens tariffs

ᓄᓇᕗᒻᒥᐅᑦ ᐃᒃᐱᒋᔭᖃᓗᐊᕐᓂᐊᖅᑐᑦ ᐆᒧᖓ ᑲᓇᑕ-ᔫᓇᐃᑕᑦ ᓯᑕᐃᑦᔅ ᐱᖁᑎᓄᑦ ᐅᓇᑕᕈᑎᖏᓐᓄᑦ, ᑭᓯᐊᓂᓕ ᓯᕗᓕᐅᕐᑎ ᐸᐅᓗᓯ ᐊᕿᐊᕈᖅ ᓄᓇᕗᒥᑦ ᐃᑲᔪᖅᑐᐃᖁᔨᔪᖅ “ᐅᑯᓂᖓ ᐃᓚᒌᑦ ᑲᓇᑕᒥ” ᐊᒻᒪᓗ ᐆᒧᖓ “ᓴᙱᔪᒥᒃ ᐊᒻᒪ ᐋᖅᑭᒃᓯᓂᒃᑯᑦ ᑭᐅᔾᔪᑎᖏᓐᓂ” ᒪᑯᓄᖓ ᐊᑭᓕᐅᑎᐅᒃᑲᓐᓂᖅᑎᑕᐅᓇᓱᒃᑐᓂᒃ ᑐᓴᒐᒃᓴᓕᐊᖓᓂ ᐊᒥᐊᓕᑲᒥᐅᑦ ᐊᖓᔪᖅᑳᖓᓄᑦ ᑖᓄᑦ ᑐᕋᒻᑉ ᕕᕝᕗᐊᕆ 1-ᖑᑎᓪᓗᒍ.

“ᓄᓇᕗᒻᒥᐅᑕᑦ ᖁᕕᐊᓇᙱᑦᑐᓂᒃ ᐊᑐᖃᑦᑕᕐᓯᒪᔪᑦ,” ᐊᕿᐊᕈᖅ ᑎᑎᕋᕐᓯᒪᓚᐅᕐᑐᖅ ᓈᑦᑏᖑᔭᓛᕐᓂᐊᑉ ᐅᓐᓄᖓᓂ ᑐᕌᒻᑉ ᑐᓴᒐᒃᓴᓕᐅᓚᐅᕐᑎᓪᓗᒍ ᐊᑭᓕᐅᑎᒃᓴᒃᑲᓐᓃᑦ ᐊᑐᓕᖅᑕᐅᓂᐊᕐᓂᖏᓐᓂᒃ ᐊᐃᑉᐹᓂ, ᐊᒻᒪᓗ ᐳᕋᐃᒻ ᒥᓂᔅᑕ ᔭᔅᑎᓐ ᑐᕉᑑ ᓴᖅᑭᑦᑎᓚᐅᖅᑎᓪᓗᒍ ᑲᓇᑕ ᑕᒪᑐᒧᖓ ᖃᓄᐃᓕᐅᕈᑎᒋᓂᐊᖅᑕᖏᓐᓂᒃ.

ᑐᕋᒻᑉ ᐅᖃᖃᑦᑕᓚᐅᖅᑕᒥᓂ ᑕᖅᑭᒐᓴᐃᑦ ᑭᖑᓂᑦᑎᓐᓂ ᐊᑭᓖᑎᑦᑎᖃᑦᑕᕈᒪᓂᖓᓂ 25 ᐳᓴᓐᑎᖏᓐᓂ ᑕᒪᐃᓐᓂᐸᓗᒃ ᑲᓇᑕᒥ ᓴᓇᔭᐅᕙᒃᑐᓂ ᐊᒥᐊᓕᑲᒧᙵᐅᔪᓂᒃ, ᐱᔾᔪᑎᖃᓗᐊᕐᓂᕋᖅᖢᓂ ᑲᓇᑕᒥ ᐱᓕᕆᐊᖃᒃᑲᓐᓂᖁᔨᓪᓗᓂ ᒪᑯᓂᖓ ᕙᓐᑎᓂᐅᓪ ᐋᖓᔮᕐᓇᖅᑐᓂ ᐄᔭᒐᕐᓂ ᐊᒻᒪ ᐊᒥᐊᓕᑲᒥᐅᑕᐅᙱᑦᑐᓂᒃ ᐊᒥᐊᓕᑲᒧᐊᖅᐸᓪᓕᐊᔪᓂᒃ.

ᑐᕉᑑ ᐅᖃᓚᐅᕐᑐᖅ ᑲᓇᑕ ᑕᒪᑐᒧᖓ ᐊᑭᓂᐊᕐᓂᕋᖅᖢᓂᐅᒃ ᐊᑭᓖᑎᑦᑎᕙᓕᕐᓗᑎᒃ ᐊᒥᐊᓕᑲᒥ ᐱᖁᑎᓄᑦ ᑲᓇᑕᒧᐊᖅᐸᓪᓕᐊᔪᓂᒃ. ᑖᓐᓇᓗ ᐊᑭᑦᑐᕆᐊᖅᐹᓪᓕᕈᑎᐅᓂᐊᖅᑐᒃᓴᐅᓪᓗᓂ ᑲᓇᑕᒥᐅᑕᑦ ᐊᑭᓕᐅᑎᒋᕙᒃᑕᖏᓐᓂ ᓂᐅᕕᖃᑦᑕᖅᑕᖏᓐᓄᑦ, ᐃᓚᖃᖅᖢᑎᒃ ᓂᕆᔭᒃᓴᓂᒃ, ᐊᓐᓄᕌᓂᒃ ᐊᒻᒪᓗ ᐊᖏᕐᕋᒥ ᐱᖁᑎᒃᓴᓂ.

“ᐅᓇ ᐱᔪᒪᓚᐅᙱᑕᕗᑦ, ᑭᓯᐊᓂᓕ ᑲᓇᑕ ᐸᕐᓇᒃᓯᒪᔪᖅ,” ᑐᕉᑑ ᑎᑎᕋᓚᐅᕐᑐᖅ ᓴᖅᑭᔮᕐᓇᖅᑐᒃᑯᑦ ᑐᕋᒻᑉ ᑐᓴᖅᑎᑦᑎᓚᐅᖅᑎᓪᓗᒍ ᐊᒥᐊᓕᑲᒥ ᐊᑭᓖᑎᑦᑎᔾᔪᑎᒃᑲᓐᓂᐅᓂᐊᖅᑐᓂ ᐊᒻᒪ ᐅᖃᖃᑎᖃᓚᐅᕐᑎᓐᓇᒍᑦ ᑐᓴᒐᒃᓴᓕᐅᖅᑎᓂ ᐊᑐᕚᒥ ᑲᑎᒪᕕᒡᔪᐊᕐᕕᒃᒥ.

ᑐᕉᑑ ᐅᖃᓚᐅᕐᑐᖅ ᑲᓇᑕᒥᐅᑕᑦ “ᑕᒪᑐᒥᖓ ᑲᒪᓚᐅᕐᑐᑦ” ᑐᕋᒻᑉ ᐃᓱᒪᓕᐊᖓᓂ “ᑐᕌᒐᖃᖅᖢᓂ” ᑲᓇᑕᒥ ᒪᑯᓂᖓᐅᙱᑦᑐᖅ “ᐊᓯᖏᓐᓃᑦᑐᓂᒃ ᓄᓇᕐᔪᐊᕐᒥ.”

ᑐᕌᒻᑉ ᐃᓱᒫᓘᑎᖃᕋᓗᐊᖅᖢᓂ ᐊᒥᐊᓕᑲᒧᐊᖃᑦᑕᖅᑐᑦ ᐊᒥᐊᓕᑲᒥᐅᑕᐅᙱᑦᑐᑦ ᐅᓄᓗᐊᓕᕐᓂᖏᓐᓂᒃ, ᐊᒻᒪᓗ ᕙᓐᑎᓂᐅᓪ ᐄᔭᒐᕐᓂ ᐋᖓᔮᕐᓇᖅᑐᓂ ᑲᓇᑕᒥᙶᖅᑐᖃᖃᑦᑕᕐᓂᖓᓂᒃ, ᑐᕉᑑᓕ ᐅᖃᓚᐅᕐᑐᖅ 1 ᐳᓴᓐᑎᐅᓪᓘᓐᓃᑦ ᑐᖔᓂ ᐊᒥᐊᓕᑲᒧᐊᖅᑐᖃᖃᑦᑕᕐᓂᖓᓂ ᑲᓇᑕᒃᑰᖅᑐᓂᒃ.

ᑐᕉᑑ ᐅᖃᓚᐅᕐᒥᔪᖅ ᑲᓇᑕ ᖃᖓᑦᑎᐊᓵᖅ ᐃᓚᒋᐊᖅᓯᓚᐅᕐᓂᖏᓐᓂᒃ $1.3 ᐱᓕᐊᓐ ᑖᓚᓂ ᓴᖅᑭᒃᑎᑦᑎᕚᓪᓕᕋᓱᒃᖢᑎᒃ ᑲᓇᑕᐅᑉ ᕿᒡᓕᒋᕙᒃᑕᖏᓐᓂᒃ ᑐᕋᒻᑉ ᑕᒪᑐᒥᖓ ᐃᓱᒫᓘᑎᖃᕐᓂᖓᓄᑦ.

“ᐱᓕᕆᖃᑎᒌᖕᓂᖃᑦᑎᐊᓛᖑᔪᒍᑦ ᓄᓇᕐᔪᐊᓕᒫᒥᑦ,” ᑐᕉᑑ ᐅᖃᕐᑐᖅ ᑐᓴᒐᒃᓴᓕᐅᕈᑎᑎᒍᑦ, ᓂᐱᓕᐅᕐᓯᒪᓪᓗᓂ ᓴᖅᑭᔮᕈᓐᓇᖅᑐᒃᑯᑦ.

ᑐᕉᑑ ᐅᖃᓚᐅᕐᒥᔪᖅ ᐅᖃᖃᑎᖃᓚᐅᕐᓂᖓᓂᒃ ᐳᕌᕕᓐᓯᓄᑦ ᐊᒻᒪ ᑎᐅᕆᑑᕆᓄᑦ ᓯᕗᓪᓕᐅᕐᑎᓂᒃ ᕕᕝᕗᐊᕆ 1-ᒥ ᑐᓴᖅᑎᓐᓇᓱᒃᖢᓂᒋᑦ “ᓴᙱᔪᒥ ᑭᐅᓯᔾᔪᑎᒃᓴᓂᒃ” ᑲᓇᑕᒥ ᐊᑐᓕᖅᑎᑕᐅᓇᔭᖅᑐᓂᒃ.

“ᐅᓇ ᑲᓇᑕᒥᐅᑕᓂ ᑲᑎᖃᑎᒌᒍᑎᐅᓪᓗᐊᓕᕐᑐᖅ,” ᑐᕉᑑ ᐅᖃᓚᐅᕐᑐᖅ, ᑖᓐᓇᓗ ᐊᕿᐊᕉᑉ ᐅᖃᐅᓯᕆᒃᑲᓐᓂᖅᖢᓂᐅᒃ ᑭᖑᓂᐊᒍᑦ.

ᐊᕿᐊᕈᖅ ᐅᖃᓚᐅᕐᑐᖅ ᐊᑭᓕᐅᑎᐅᒃᑲᓐᓂᕈᑎᒃᓴᐃᑦ ᓄᓇᕗᒥᑦ ᐃᓚᒌᓂ ᐊᒃᓱᕈᕈᑎᐅᒃᑲᓐᓂᓕᕐᓂᐊᖅᑐᖅ ᐊᑭᓖᔪᓐᓇᐃᓪᓕᕙᒃᑐᓂᒃ ᐃᒡᓗᖏᓐᓂ ᐊᒻᒪ ᓱᕈᓯᖏᑦ ᓂᕆᔭᒃᓴᖃᕈᓐᓃᖅᐸᒃᖢᑎᒃ.

“ᓄᓇᕗᒻᒥᐅᑕᑦ ᖁᑦᑎᓛᒥ ᐊᑭᓖᖃᑦᑕᓕᕐᓂᐊᖅᑐᑦ ᐆᒪᔾᔪᑎᓄᑦ ᑲᓇᑕᒥ ᓲᖃᐃᒻᒪ ᑕᒪᕐᒥᑲᓴᒃ ᐱᖁᑎᒋᔭᕗᑦ ᖃᓪᓗᓈᓂᙶᖃᑦᑕᕐᒪᑕ,” ᐊᕿᐊᕈᖅ ᐅᖃᕐᑐᖅ.

ᐊᑭᓕᐅᑎᒃᓴᒃᑲᓐᓃᑦ ᐊᑭᑦᑐᖅᐹᓪᓕᕈᑎᐅᑐᐃᓐᓇᕆᐊᓖᑦ ᐃᒡᓗᓂ ᓴᓇᓂᕐᒥᒃ ᐊᒻᒪᓗ ᓈᒻᒪᙱᑦᑐᒃᑯᑦ ᓄᓇᕗᒥᑦ ᐊᒃᑐᐃᓂᖃᕐᓗᓂ ᐃᒡᓗᖃᑦᑎᐊᙱᔾᔪᑎᓂᒃ, ᐅᖃᒃᑲᓐᓂᖅᑐᖅ.

ᑭᓯᐊᓂᓕ, ᐱᖁᑎᓄᑦ ᓈᒻᒪᙱᓕᐅᕈᑎᖃᕐᓂᕐᒥ ᓵᖓᑎᓪᓗᒋᑦ ᐊᖏᓂᖅᐹᓂ ᑕᐅᓰᖃᑎᒋᕙᒃᑕᖏᓐᓂ, ᐊᕿᐊᕈᖅ ᑲᓇᑕᒥᐅᑕᓂ ᐅᖃᐅᔾᔨᓚᐅᕐᑐᖅ ᑕᒪᕐᒥ ᑲᓇᑕᒥᐅᑕᓄᑦ ᓴᓇᔭᐅᕙᒃᑐᓂ ᐃᑲᔪᖅᑐᐃᖁᔨᓪᓗᓂ, ᐃᖅᑲᓇᐃᔭᖅᑎᓂᒃ ᐊᒻᒪ ᓇᖕᒥᓂᖅ ᐱᓕᕆᐊᖑᔪᓂᒃ.

ᐅᖃᒃᑲᓐᓂᖅᖢᓂᓗ ᑲᓇᑕᐅᑉ ᐅᑭᐅᕐᑕᖅᑐᖓᓂ ᐃᑲᔪᖅᑐᐃᖁᔨᓪᓗᓂ, ᑕᒪᓐᓇ ᐅᖃᐅᓯᕆᓪᓗᓂᐅᒃ ᐃᒪᓐᓇ “ᖃᓄᐃᓕᐅᕈᓘᔭᕐᕕᐅᓐᓇᖅᑐᖅ.”

ᒫᓐᓇᓕ “ᓇᓗᓈᕿᓐᓇᕐᓂᖓᓂᒃ,” ᐊᕿᐊᕈᖅ ᐅᖃᕐᑐᖅ, “ᐅᑭᐅᕐᑕᖅᑐᖅ ᓄᑖᓂ ᑮᓇᐅᔭᓕᐅᕈᑎᐅᔪᓐᓇᖅᑐᓂ ᐱᒋᐊᖅᑎᑦᑎᔪᓐᓇᖅᑐᖅ ᑲᓇᑕᒧᑦ.”

ᑯᐸᐃᒃᒧᑦ ᓯᕗᓕᐅᕐᑎ ᕗᕌᓐᓱᐊ ᓕᒎᑦ ᐅᖃᓚᐅᕐᑐᖅ ᑲᓇᑕ ᓯᕗᓪᓕᖅᐹᒥᑦ ᓂᕈᐊᕐᓯᒪᓂᕋᓚᐅᕐᑕᖏᑦ ᑕᐅᕐᓰᖃᑎᒌᖕᓂᕐᒧᑦ ᐅᓇᑕᖁᔨᙱᖢᑎᒃ ᑕᐅᕐᓰᖃᑎᒋᓛᕆᕙᒃᑕᖏᓐᓂᒃ.

“ᑭᓯᐊᓂᓕ ᒥᔅᑕ ᑐᕋᒻᑉ ᐅᕙᑦᑎᓐᓂ ᐱᒋᐊᕋᓱᓕᓚᐅᕐᒪᑦ. ᐊᑭᒪᔭᕆᐊᖃᕋᑦᑕ. ᓴᐳᑎᓯᒪᔭᕆᐊᖃᕋᑦᑎᒍᑦ ᑮᓇᐅᔭᓕᐅᕈᑎᕗᑦ ᐊᒻᒪᓗ ᐃᖅᑲᓇᐃᔮᕗᑦ,” ᓕᒎᑦ ᑎᑎᕋᓚᐅᕐᑐᖅ ᕕᕝᕗᐊᕆ 1-ᒥ.

ᓕᒎᑦ ᑎᑎᕋᐅᓯᖃᓚᐅᕐᒥᔪᖅ ᐃᓚᖏᓐᓂ ᑯᐸᐃᒃ ᒐᕙᒪᖓ ᑭᐅᔾᔪᑎᒋᓚᐅᕐᑕᖏᓐᓂ, ᐃᓚᖃᖅᖢᓂ ᐃᑲᔪᕈᑎᖃᕐᓂᖅ ᓇᖕᒥᓂ ᐱᓕᕆᐊᖃᕐᑐᓄᑦ ᐊᒃᑐᖅᑕᐅᓕᒑᔪᓄᑦ ᓄᑖᒧᑦ ᐊᑭᓕᐅᑎᒃᑲᓐᓂᓕᕆᓂᕐᒧᑦ, ᐃᒪᖄᓪᓘᓐᓃᑦ ᐊᒥᐊᓕᑲᐅᑉ ᑲᒻᐸᓂᖏᑦ ᐊᑐᖅᑕᐅᔪᓐᓃᕐᓗᑎᒃ ᒐᕙᒪᒃᑯᓐᓄᑦ ᑳᓐᑐᕌᖃᖅᑎᑕᐅᕙᒃᑐᑦ ᐊᒻᒪᓗ ᐊᒥᐊᓕᑲᒥ ᓴᓇᔭᐅᔪᑦ ᐃᒥᐊᓗᐃᑦ ᓂᐅᕕᐊᒃᓴᕆᔭᐅᔪᓐᓃᕐᓗᑎᒃ ᐃᒥᐊᓗᒃᑖᕐᕕᖕᓂ.

“ᐅᓇ ᐱᔪᒪᓚᐅᙱᑕᕗᑦ ᐱᖁᑎᓄᑦ ᐅᓇᑕᕐᓂᖅ, ᑭᓯᐊᓂᓕ ᐅᕙᑦᑎᓐᓂ ᓴᐳᑎᓯᒪᔪᓐᓇᕋᑦᑕ ᐊᒻᒪᓗ ᐊᓂᒍᐃᔪᓐᓇᕐᓂᐊᖅᖢᑕ ᐊᒻᒪ ᓴᙱᒃᑎᑉᐹᓪᓕᕈᑎᒋᓗᑎᒍᑦ,” ᓕᒎᑦ ᐅᖃᕐᑐᖅ.