ᓵᓚᒃ ᓯᒃᓯᒃ ᐱᓕᕆᐊᕆᔪᒪᔭᒥᓂᒃ ᐱᓇᓱᐊᕐᑐᖅ ᓯᓚᑦᑐᖅᓴᕐᕕᒡᔪᐊᕐᒥ ᕼᐋᑭᖃᑦᑕᕈᓐᓇᕐᓯᓂᕐᒥᒃ ᐃᓕᓐᓂᐊᕆᐊᕐᖢᓂ ᕼᐋᑭᒧᑦ ᐅᑯᓇᙵᑦ ᐃᑲᔫᑎᖃᖅᖢᓂ ᒪᑭᒋᐊᖅᑕᒃᑯᑦ ᑯᕝᕙᕆᐊᕐᓂᖅ ᐱᓕᕆᐊᒃᓴᓂᒃ. (ᐊᔾᔨᙳᐊᖅ ᐅᕙᙵᑦ ᕼᐋᓇ ᓯᒃᓯᒃ)

ᓄᓇᕗᒥᑦ ᐃᓅᓱᒃᑐᖅ ᕼᐋᑭᒥ ᐱᓇᓱᐊᒐᖃᕐᑐᖅ ᓄᑖᓂ ᐃᑲᔫᑎᒃᓴᕐᒧᑦ ᐱᓕᕆᐊᒃᓴᒥᒃ ᐊᑐᕐᓂᒃᑯᑦ

ᒪᑭᒋᐊᖅᑕ ᑐᕌᒐᖃᕐᑐᖅ ᐃᓅᓱᒃᑐᓂᒃ ᓄᓇᕗᒻᒥᐅᓂᒃ ᐆᑐᓇᖅ ᓵᓚᒃ ᓯᒃᓯᒃᑐᑦ ᐱᓕᕆᐊᓄᑦ ᑐᕌᒐᕆᔭᖏᓐᓂᒃ ᐊᑐᕋᓱᒃᑎᓪᓗᒋᑦ

By ᑕᐃᕕᑦ ᓛᕼᐄᑦ

For the English version of this story please see Nunavut teen chasing hockey dreams through new program

ᐱᕈᖅᖢᓂ ᑲᖏᖅᖠᓂᕐᒥ, ᕼᐋᑭᕐᑎ ᓵᓚᑦ ᓯᒃᓯᒃ ᖃᓪᓗᓈᓂ ᐊᑐᖅᑕᐅᔪᓐᓇᖅᑐᓂᒃ ᒫᓂ ᐊᑐᕈᓐᓇᓚᐅᙱᑦᑐᖅ.

ᑭᓯᐊᓂᓕ ᒫᓐᓇ ᐊᔪᕈᓐᓃᕐᑐᖅ.

ᓯᒃᓯᒃ, 17, ᐊᑐᕈᒪᔭᒥᓂᒃ ᐱᙳᐊᖃᑕᐅᔪᓐᓇᕐᓂᕐᒥᒃ ᓯᓚᑦᑐᖅᓴᕐᕕᒡᔪᐊᕐᒥ ᕼᐋᑭᖃᑦᑕᕈᓐᓇᕐᓯᓂᕐᒥ ᐃᓚᐅᖃᑕᐅᓕᕐᓂᕐᒥᒃ ᐅᕙᓂ ᕼᐋᑭᕆᐅᕐᓴᓂᕐᒥᒃ ᐃᓕᓐᓂᐊᕐᕕᒃᒥ (Rink Hockey Academy) ᐅᐃᓂᐱᒡᒥ.

ᐅᓇ ᑕᐃᒪᐃᓕᐅᕈᓐᓇᕐᑐᖅ ᐆᒧᖓ ᐱᓕᕆᐊᒃᓴᒧᑦ ᐊᐅᓚᑕᐅᔪᒥᒃ ᐅᑯᓇᙵᑦ ᒪᑭᒋᐊᖅᑕ, ᑲᑐᔾᔨᖃᑎᒌᑦ ᓄᓇᕗᑦ ᑐᙵᕕᒃᑯᓐᓂ ᑐᕌᒐᖃᖅᖢᑎᒃ ᐃᓄᖕᓂ ᐊᔪᕈᓐᓃᕐᓴᖅᑎᑦᑎᕙᖕᓂᕐᒥᒃ ᐊᒻᒪ ᐃᖅᑲᓇᐃᔮᖃᕈᓐᓇᕐᓯᒍᑎᓂᒃ.

“ᐊᔪᙱᓐᓂᓕᒫᓐᓂ ᕼᐋᑭᕐᑎᐅᔪᒪᒐᒪ ᐊᒻᒪᓗ ᐱᓕᕆᐊᖃᕐᓗᖓ ᐊᔪᕈᓐᓃᕐᓴᕐᓂᕐᒥᒃ ᐊᒻᒪ ᐱᕙᓪᓕᐊᓂᕐᒥᒃ,” ᐅᖃᕐᑐᖅ ᓯᒃᓯᒃ.

ᐅᓇ ᐱᓕᕆᐊᒃᓴᖅ, ᑕᐃᔭᐅᔪᖅ ᖁᕝᕙᕆᐊᕐᓂᖅ, ᑐᕌᒐᖃᕐᑐᖅ ᓄᓇᕗᒻᒥᐅᓂᒃ ᐊᔪᕈᓐᓃᕐᓴᖅᑎᑦᑎᖃᑦᑕᕐᓂᕐᒥᒃ ᐃᖅᑲᓇᐃᔮᕆᔪᒪᔭᖏᓐᓂᒃ ᐱᓇᓱᖕᓂᐊᖅᑎᓪᓗᒋᑦ.

ᐅᓇ ᓯᕗᓪᓕᕐᒥ ᐋᖅᑭᒃᑕᐅᓯᒪᓚᐅᕐᓯᒪᔪᖅ ᐃᑲᔪᖅᑐᐃᔨᐅᓂᐊᕐᓗᑎᒃ ᐊᒻᒪ ᐊᔪᕈᓐᓃᕐᓴᕐᕕᐅᓗᓂ ᐃᖅᑲᓇᐃᔮᓂᒃ, ᐅᖃᕐᑐᖅ ᒪᑭᒋᐊᖅᑕ ᐱᓕᕆᓕᕆᖓ ᐋᓯᕙ ᓇᑲᓱᒃ.

ᑭᓯᐊᓂᓕ ᐱᓕᕆᐊᒃᓴᐅᑉ ᐋᖅᑭᒃᓱᖅᑕᐅᕙᓪᓕᐊᓂᖓᓂᒃ ᐅᑯᐊ ᒪᑭᒋᐊᖅᑕ ᖃᐅᔨᓚᐅᕐᑐᑦ ᖁᕝᕙᕆᐊᕐᓂᖅ ᐃᓚᖃᕆᐊᖃᕐᓂᖓᓂᒃ ᐃᓕᓐᓂᐊᕐᕕᐊᓗᖕᒥ ᐃᓕᓐᓂᐊᖅᑐᑦ ᐃᖅᑲᓇᐃᔮᕆᔪᒪᔭᖏᓐᓂᒃ ᐱᓕᕆᐊᖃᕐᑎᒻᒥᓗᒋᑦ.

“ᐊᑐᑦᑐᔫᑎᑕᖃᐅᕐᒪᓐ ᑕᑕᑎᕆᐊᓕᖕᓂᒃ,” ᓇᑲᓱᒃ ᐅᖃᓚᐅᕐᑐᖅ ᐆᒥᖓ ᓄᓇᕗᒻᒥᐅᓂᒃ ᐃᓄᖕᓂ ᐃᖅᑲᓇᐃᔮᓄᑦ ᐸᕐᓇᒃᑎᑦᑎᕙᓪᓕᐊᓂᕐᒥᒃ.

ᒪᑭᒋᐊᖅᑕ ᐋᖅᑭᒃᓯᔪᒪᓚᐅᕐᒪᑕ ᐱᓕᕆᐊᒃᓴᓂᒃ ᑕᒪᒃᑯᓄᖓ ᑐᓗᖅᑕᕈᑎᐅᔭᑦᑐᓂᒃ. ᑕᐃᒪᓐᓇᓗ ᐅᑯᐊ ᖁᕝᕙᕆᐊᕐᓂᖅ ᐃᑲᔫᑎᒃᓴᖃᖅᑎᑦᑎᔪᖅ ᓄᓇᕗᒥᑦ ᐃᓄᖕᓂ ᐊᔾᔨᒌᙱᑦᑐᓄᑦ ᐃᖅᑲᓇᐃᔮᕆᔪᒪᔪᓄᑦ ᐱᓇᓱᒃᑎᓪᓗᒋᑦ.

ᓲᕐᓗ ᐃᒪᓐᓇ, ᓇᑲᓱᒃ ᐅᖃᕐᑐᖅ, ᐃᓕᓐᓂᐊᕐᑎ ᐊᔪᕈᓐᓃᕐᓴᕐᓗᓂ ᖃᖓᑕᓲᖅᑎᐅᓂᕐᒥᒃ ᐃᑲᔫᑎᑖᕐᓗᓂ ᐊᔪᕈᓐᓃᕐᓴᕐᓂᖅ ᐱᐊᓂᒐᓱᖕᓂᐊᕐᓗᓂᒋᑦ. ᐊᓯᖓᓕ ᒪᑯᐊ ᐅᐊᔭᓕᕆᔨᒃᑯᑦ ᐃᑲᔫᑎᖃᖅᑎᑕᐅᓗᑎᒃ ᐃᑲᕐᕋᓕᐅᕆᐊᖃᖅᑕᖏᓐᓂᒃ ᐱᐊᓂᒐᓱᖕᓂᖏᓐᓂᒃ ᐅᑯᐊ ᕼᐋᒻᒪᓚᒃᑯᑦ ᐅᕝᕙᓘᓐᓃᑦ ᓄᓇᕗᒥᑦ ᓯᓚᑦᑐᖅᓴᕐᕕᒃ ᐃᑲᔫᑎᖃᕈᓐᓇᙱᑉᐸᑕ.

ᐃᓕᓐᓂᐊᕐᕕᐊᓗᖕᒥ ᐃᓕᓐᓂᐊᓪᓗᐊᕐᑐᑦ ᓄᓇᕗᒻᒥᐊᑕᑦ ᕼᐋᑭᕐᑎᒻᒪᕆᐅᓗᑎᒃ ᐆᑐᓇᖅ ᓯᒃᓯᒃᑐᑦ ᐃᓚᐅᑎᑕᐅᔪᑦᑕᐅᖅ. ᑲᖏᖅᖠᓂᕐᒥ ᓯᒃᓯᒃ ᐅᖃᓚᐅᕐᑐᖅ ᕼᐋᑭᖃᑎᖃᐃᓐᓇᕆᐊᒃᓴᖅ ᐊᔪᓚᐅᕐᓂᕋᖅ ᐊᔪᙱᖃᑎᒋᔭᖏᓐᓂᒃ ᓄᓇᓖᑦ ᐊᓯᐊᓃᑦᑐᓂᒃ ᐱᒡᔪᑎᐅᓪᓗᓂ ᖃᖓᑕᓲᒃᑰᕈᑎᑦ ᐊᑭᖏᑦ.

ᐅᓇ ᓈᒻᒪᙱᑦᑐᓕᐅᕈᑎ ᐱᙳᐊᖅᑎᐅᕙᒃᑐᓄᑦ ᓄᓇᕗᒥᑦ ᐱᓂᕐᓴᐅᓪᓗᑎᒃ ᖃᓪᓗᓈᓂ ᓄᓇᖃᖅᑐᓂᓪᓕ.

“ᐊᔪᙱᑕᑦᑎᓐᓂ ᐱᓇᓱᖃᑦᑕᖅᐳᒍᑦ,” ᐅᖃᕐᑐᖅ ᓯᒃᓯᒃ, ᑖᓐᓇ ᒍᕇᑦ 12-ᒥ ᐃᓕᓐᓂᐊᖅᑐᖅ.

ᑭᓯᐊᓂᓕ ᐃᑲᔪᖅᑕᐅᓂᒃᑯᑦ ᐅᑯᓄᖓ ᖁᕝᕙᕆᐊᕐᓂᖅᒥ, ᓯᒃᓯᒃ ᐅᐸᒍᑎᔪᓐᓇᕐᓯᓯᒪᔪᖅ ᕼᐋᑭᒧᑦ ᐃᓕᓐᓂᐊᕐᕕᒃᒥ ᐅᐃᓂᐱᒡᒥ ᐊᒻᒪᓗ ᕼᐋᑭᖅᑎᓂᒃ ᐃᓚᒋᔭᐅᓪᓗᓂ ᐊᕐᕌᒍᓕᖕᓂ 18 ᑐᖔᓂᒃ.

ᐅᓇ ᑖᔅᓱᒥᖓ ᐃᑲᔪᕈᑎᐅᓯᒪᔪᖅ ᑲᔪᓯᔾᔪᑎᒋᓪᓗᓂᐅᒃ ᐊᑐᕈᒪᔭᖓᓂᒃ ᓯᓚᑦᑐᖅᓴᕐᕕᒡᔪᐊᒥ ᐃᓕᓐᓂᐊᖅᑐᑎᑐᑦ ᕼᐋᑭᖃᑕᐅᖃᑦᑕᕐᓂᕐᒥᒃ.

“ᐊᒃᓱᐊᓗᒃ ᐊᓂᒍᑦᑎᐊᑲᑕᒃᑐᖅ,” ᐅᖃᕐᑐᖅ ᓯᒃᓯᒃ, ᐃᓕᓐᓂᐊᕆᐊᕐᓯᒪᓕᖅᖢᓂ ᑕᖅᑭᓪᓗᐊᕐᒥ. “ᐃᓕᓐᓂᐊᒐᒃᓴᖃᑦᑎᐊᕋᒪ ᐊᒻᒪ ᐃᓕᓴᐃᔨᑦᑎᐊᕙᖕᓂ.”

ᓯᓚᑦᑐᖅᓴᕐᕕᒡᔪᐊᒦᓚᐅᕐᓗᓂ ᐃᓱᒪᔪᖅ ᐃᖅᑲᓇᐃᔮᖃᓚᕈᒪᓪᓗᓂ ᐃᓅᓱᒃᑐᓄᑦ ᑐᕌᖓᔪᒥ ᐃᓱᒪᓕᕆᔨᐅᓂᕐᒥᒃ ᐅᕝᕙᓘᓐᓃᑦ ᐆᒪᔪᓂᒃ ᐋᓐᓂᐊᓯᐅᖅᑎᐅᓗᓂ.

ᐅᓄᕐᓂᕐᓴᐃᑦ ᕼᐋᑭᓕᒪᓂᕐᓴᐃᑦ ᓄᓇᕗᒥᑦ ᖃᓪᓗᓈᓄᙵᐅᔭᕆᐊᖃᕐᒪᑕ ᐊᔪᕈᓐᓃᕐᓴᕆᐊᕐᑐᕐᓗᑎᒃ ᐊᒻᒪᓗ ᕼᐋᑭᕈᓐᓇᖅᑐᓂᒃ ᕿᓂᖃᑦᑕᖅᑐᓂᒃ ᑕᑯᔭᐅᔪᓐᓇᕐᓗᑎᒃ, ᑭᓯᐊᓂᓕ ᑕᒪᑐᒧᖓ ᐊᑭᐅᓇᔭᖅᑐᖅ ᖁᑦᑎᒃᓯᔪᓐᓇᕐᒪᑦ, ᓇᑲᓱᒃ ᐅᖃᕐᑐᖅ.

ᐅᖃᓚᐅᕐᑐᖅ ᖁᕝᕙᕆᐊᕐᓂᖅ ᐃᑲᔪᖃᑦᑕᕐᓂᖓᓂᒃ ᓄᓇᕗᒻᒥᐅᓂᒃ ᐆᑐᓇᖅ ᓯᒃᓯᒃᑐᑦ ᐊᑭᓕᕆᐊᓕᖕᓄᑦ ᒪᑯᓄᖓ ᖃᖓᑕᔾᔪᑎᓄᑦ, ᐃᓕᓐᓂᐊᕈᑎᓄᑦ ᐊᒻᒪᓗ ᐊᖏᕐᕋᕆᓂᐊᖅᑕᖏᓐᓄᑦ.

ᓇᑲᓱᒃ ᐅᖃᓚᐅᕐᑐᖅ ᖁᕝᕙᕆᐊᕐᓂᖅ ᐃᖅᑲᓇᐃᔮᒧᑦ ᐸᕐᓇᒍᑎᐅᔪᓐᓇᕐᓂᖓᓂᒃ ᐅᑯᐊ ᐃᓚᐅᓪᓗᑎᒃ ᑎᑕᐅᑎᓄᑦ ᐃᓕᓐᓂᐊᕐᕕᖕᓄᑦ ᐊᒻᒪᓗ ᒪᓕᒐᓕᕆᓂᕐᒧᓐ ᐃᓕᓐᓂᐊᕐᓂᕐᒧᑦ.

“ᐃᒪᓐᓇᐅᖕᒪᑦ ᐊᓯᖏᑦ ᐃᑲᔫᑎᒃᓴᓕᕆᔨᐅᔪᑦ ᐊᑭᓖᔪᓐᓇᙱᑉᐸᑕ ᐱᔭᐅᓇᓱᒃᑐᓄᑦ ᐅᑯᐊ ᒪᑭᒋᐊᖅᑕ ᐃᑲᔫᑎᖃᑐᐃᓐᓇᕆᐊᓖᑦ,” ᐅᖃᕐᑐᖅ.

ᐃᓕᓐᓂᐊᖅᑐᐃᑦ ᐊᖏᕐᕋᖅᓯᓕᖅᐸᒃᑲᓗᐊᖅᖢᑎᒃ ᑖᒃᑯᐊ ᑭᐅᔾᔪᑎᖏᑦ ᐊᒻᒪᓗ ᐊᖓᔪᖅᑳᕆᔭᐅᔪᑦ ᑐᓴᕐᓂᖃᑦᑕᕐᒪᑕ, ᓇᑲᓱᒃ ᐅᖃᕐᑐᖅ.

“ᑕᐃᒪᓕ ᖁᕕᐊᒋᓛᕆᕙᒃᑕᕋ ᖃᐅᔨᓇᓱᓕᕌᖓᑦᑕ ᐃᑲᔪᖅᑎᒋᔭᑦᑎᓐᓂ ᖃᓄᐃᓕᕐᒪᖔᑕ,” ᐅᖃᕐᑐᖅ.

ᐃᓚᖓ ᐊᖓᔪᖅᑳᕆᔭᐅᔪᓂ ᑕᒪᑐᒥᖓ ᖁᕕᐊᒋᔭᖃᒻᒪᕆᒃᑐᖅ ᐅᓇ ᓯᒃᓯᐅᑉ ᐊᓈᓇᖓ, ᕼᐋᓇ ᓯᒃᓯᒃ, ᐅᖃᖅᖢᓂ ᐅᓇ ᐱᓕᕆᐊᒃᓴᖅ ᐸᓂᖓᓂᒃ ᐃᑲᔪᕐᓯᒪᒻᒪᕆᖕᓂᕋᖅᖢᓂᐅᖅ ᖃᓄᐃᓕᐅᕈᒪᔭᖏᓐᓄᑦ ᐊᒻᒪ ᑐᒑᕋᕆᔭᖏᓐᓄᑦ.

“ᐃᑲᔪᖅᑕᐅᓯᒪᑦᑎᐊᕐᓂᕗᑦ ᐅᕙᑦᑎᓐᓄ ᐃᑲᔪᕈᑎᒻᒪᕆᐅᓯᒪᔪᖅ,” ᐅᖃᕐᑐᖅ.

Share This Story

(0) Comments

Join the Conversation

Your email address will not be published. Required fields are marked *

*