ᓄᓇᕗᒥᑦ ᐅᓇᑕᖃᑦᑕᖅᑐᑦ (wrestlers) ᐊᔪᕈᓐᓃᖅᓴᖅᑐᑦ ᐱᒡᒍᔭᐅᑎᓂᐊᕐᓂᖏᓐᓄᑦ ᖃᓪᓗᓈᓂᑦ

ᐊᔪᕈᓐᓃᖅᓴᖅᑎᑦᑎᔨ ᐅᐱᒋᔭᖃᖅᑐᖅ ‘ᐊᒃᓱᕈᖅᖢᑎᒃ ᐱᓇᓱᒃᑐᓂᒃ’ ᐱᙳᐊᖅᑐᓕᕆᓂ ᐊᑐᖅᑕᐅᓂᕐᓴᐅᑎᓐᓇᓱᒃᖢᒍ ᓄᓇᓕᖕᓂᑦ

ᑰᑎᔅ ᔮᓐ ᑕᓕᕆᒃᑐᒃ, ᖁᕐᓱᖅᑐᒥ ᐊᑐᕐᑐᖅ, ᐅᓇᑕᖃᑎᖃᕐᑐᖅ ᑐᕌᓐᑐᒥ ᐅᑯᐊ ᐊᔪᕈᓐᓃᖅᓴᖅᑎᑦᑎᔩᒃ ᑲᐃᓯ ᕼᐊᐸᓇᒃ, ᐃᑭᓗᐊᒃ ᐊᕙᓚᒃ ᐊᒻᒪ ᑯᕆᔅ ᑯᕈᒃᔅ ᑕᐅᑐᒃᑎᓪᓗᒋᑦ ᐅᕙᓂ ᒫᑦᒪᓐ (Matmen Tournament) ᐱᒡᒍᓴᐅᑎᓂᕐᒥ ᑎᓯᐱᕆ 14-ᖑᑎᓪᓗᒍ. (ᐊᔾᔨᙳᐊᖅ ᐅᕙᙵᑦ ᑯᕆᔅ ᑯᕈᒃᔅ)

By ᑎᐅᕋᓐ ᓚᑦᔅ

For English version, see Nunavut wrestlers train for southern competition

ᐅᓇᑕᖃᑦᑕᖅᑐᑦ ᓄᓇᕗᑦ ᓄᑖᒥ ᐊᕐᕌᒍᒥ ᐱᒋᐊᕈᑎᖃᖅᐳᑦ ᖁᕕᐊᒋᔭᖃᖅᖢᑎᒃ ᐊᒻᒪ ᖃᓄᐃᓕᐅᖅᐸᓪᓕᐊᔪᒪᓪᓗᑎᒃ ᖃᔅᓯᒐᓴᐃᑦ ᓄᓇᕗᒥᑦ ᐱᙳᐊᖅᑎᑦ ᐊᔪᕈᓐᓃᖅᓴᖃᑕᐅᔭᖅᑐᖅᑎᓪᓗᒋᑦ ᐅᑭᐊᒃᓵᖅ ᐊᔪᕈᓐᓃᖅᓴᖅᑎᑕᐅᑎᓪᓗᒋᑦ ᐊᑦᒪᓐᑕᓐᒥ ᐊᒻᒪ ᐋᓐᑎᐅᕆᐅᑉ ᓂᒋᐊᓂᑦ, ᐱᓕᕆᐊᖃᕐᑐᑦ ᐅᖃᓚᐅᕐᑐᑦ.

“ᐱᓇᓱᒻᒪᕆᒃᓯᒪᒐᑦᑕ ᐊᕐᕌᒎᕋᑖᖅᑐᓂ ᑎᓴᒪᓂ ᐅᑯᐊ ᐊᔪᕈᓐᓃᖅᑎᕋᓱᒃᖢᑎᒍᑦ ᐅᓇᑕᖃᑦᑕᖅᑐᑦ ᐊᒻᒪ ᓄᓇᓕᓄᐊᑲᑕᖕᓂᕗᑦ ᖁᕕᐊᓇᕈᓘᔭᕐᓯᒪᔪᖅ.” ᐅᖃᕐᑐᖅ ᐊᔪᕈᓐᓃᖅᓴᖅᑎᑦᑎᔨ ᑯᕆᔅ ᑯᕈᒃᔅ, ᓄᓇᖃᖅᖢᓂ ᐃᖃᓗᒃᑑᑦᑎᐊᕐᒥ.

ᐅᓇᑕᑲᑕᖕᓂᖅ ᓄᓇᕗᒥᑦ 7-ᓄᑦ ᓄᓇᕗᒥᑦ ᓄᓇᓕᖕᓄᐊᓚᐅᕐᓯᒪᔪᖅ ᐊᔪᕈᓐᓃᖅᓴᖅᑎᑦᑎᔭᖅᑐᖅᐸᒃᖢᑎᒃ ᐊᔪᕈᓐᓃᖅᓴᖅᑎᑦᑎᔨᐅᓂᕐᒥ ᐊᒻᒪ ᐅᓇᑕᑲᑕᖕᓂᕐᒥᒃ ᐅᑭᐊᒃᓵᖑᓚᐅᕐᑐᖅ, ᐊᒻᒪᓗ 400 ᐅᖓᑖᓂ ᐃᓅᓱᒃᑐᓂ ᐅᐸᒃᑕᐅᓯᒪᓪᓗᑎᒃ ᐊᒻᒪ ᐊᔪᕈᓐᓃᖅᓴᖅᑎᑦᑎᔨᐅᕙᒃᑐᓂᒃ.

ᕉᓴ ᕼᐅᒐᓗᒃ ᐊᔪᕈᓐᓃᖅᓴᖅᑎᑕᐅᔪᖅ ᓄᕕᐱᕆ 15-ᖑᑎᓪᓗᒍ ᐊᑖᑕᑦᑎᐊᖓᓄᑦ ᑯᕆᔅ ᑯᕈᒃᔅ ᐅᕙᓂ ᐊᑦᒪᓐᑕᓐᒥ ᓵᓚᖃᕋᓱᑲᑕᒃᑎᓪᓗᒋᑦ. (ᐊᔾᔨᙳᐊᖅ ᐅᕙᙵᑦ ᑯᕆᔅ ᑯᕈᒃᔅ)

ᓄᕕᐱᕆᒥ, 72 ᓄᓇᕗᒥᑦ ᐅᓇᑕᑲᑕᒃᑏᑦ ᐊᒻᒪ ᐊᔪᕈᓐᓃᖅᓴᖅᑎᑦᑎᔩᑦ ᐅᐸᓚᐅᕐᒪᑕ ᐱᓇᓱᐊᕈᓯᕐᒥ ᐊᔪᕈᓐᓃᖅᓴᖅᑐᓂᒃ ᐊᒻᒪ ᐱᒡᒍᓴᐅᑎᔪᓂᒃ ᐊᑦᒪᓐᑕᓐᒥ, ᐊᒻᒪᓗ ᑎᓯᐱᕆ ᐱᕆᐊᓕᖅᑎᓪᓗᒍ ᑖᒃᑯᐊ 31-ᓂ ᐊᔪᕈᓐᓃᖅᓴᖅᑎᑦᑎᔨᓂ ᐊᒻᒪ ᐅᓇᑕᖃᑦᑕᑕᖅᑐᓂ ᐊᐅᓪᓚᖅᑎᑦᑎᓚᐅᕐᓯᒪᔪᑦ ᐋᓐᑎᐅᕆᐅ ᓂᒋᐊᓄᑦ ᐊᔪᕈᓐᓃᖅᓴᕆᐊᖅᑐᖅᖢᑎᒃ ᐊᒻᒪ ᐱᒡᒍᓴᐅᑎᔭᖅᑐᖅᖢᑎᒃ. ᐅᓇᑕᖃᑦᑕᖅᑐᑦ ᐊᕐᕌᒍᖃᓚᐅᕐᑐᑦ 8-ᓂ ᐃᓐᓇᕐᓄᑦ.

ᐱᙳᐊᖅᑏᑦ ᐊᔪᕈᓐᓃᖅᓴᓚᐅᕐᓯᒪᔪᖅ ᓯᓚᑦᑐᖅᓴᕐᕕᐊᓗᒃᒥᑦ ᐋᐴᑕᒥᑦ ᓄᕕᐱᕆ ᕿᑎᕐᐸᓯᐊᓂ, ᐊᒻᒪ ᐅᐸᒃᑎᑕᐅᑲᑕᒃᖢᑎᒃ ᕼᐋᒧᑕᓐ, ᓇᐃᐊᒍᕋ ᐊᒻᒪ ᑐᕌᓐᑐ ᐱᙳᐊᕐᕕᖏᓐᓄᑦ.

ᕗᐃᓕᐊᒻ ᓇᑯᓚᒃ, 29, ᐊᔪᕈᓐᓃᖅᓴᖅᑎᑦᑎᕙᒃᑐᖅ ᑲᖏᖅᖠᓂᖅᒥᑦ, ᐱᕈᖅᐸᓪᓕᐊᓪᓗᓂ ᐅᓇᑕᖃᑦᑕᓚᐅᕐᓯᒪᖕᒪᑦ ᓴᓪᓕᓂᑦ. ᐃᖅᑲᐅᒪᔪᖅ ᓇᒧᙵᐅᑲᑕᒃᑎᑕᐅᓪᓗᓂ ᑲᓇᑕᒥ ᐱᒡᒍᓴᐅᑎᔪᓄᑦ ᐊᒻᒪᓗ ᐊᔪᕈᓐᓃᖅᓯᒪᔭᓂ ᐊᑐᖅᑕᐅᖁᓪᓗᓂᐅᒃ ᐅᓪᓗᒥ ᐃᓅᓱᒃᑑᓕᖅᑐᓄᑦ.

“ᑖᓐᓇ ᐃᒻᒥᒃᑯᑦ ᐱᙳᐊᕈᓯᐅᓪᓗᓂ, ᐅᓇᑕᑲᑕᖕᓂ ᐃᑲᔪᖃᑦᑕᖅᑐᖅ ᐃᓕᖕᓂ ᐅᒃᐱᕈᓱᒍᓐᓇᕐᓂᕐᒥᒃ ᑎᒥᖕᓂ ᐊᒻᒪ ᐃᓱᒪᖕᓄᑦ,” ᐅᖃᕐᑐᖅ. “ᓇᒧᙵᐅᑲᑕᖕᓂᖅ ᐃᓅᖃᑎᖃᒃᑲᓐᓂᕐᓇᕐᑐᖅ — ᐱᖃᓐᓇᕆᔭᖃᑦᑎᐊᓕᕐᓇᖅᖢᓂ.”

24 ᑐᖏᑦᑎᐊᖓᓂ ᐅᓇᑕᕆᐅᕐᑕᖃᑦᑕᖅᑐᑦ ᑲᖏᖅᖠᓂᖅᒥᑦ, ᓇᑯᓚᒃ ᐅᖃᕐᑐᖅ.

“ᐃᓛᓐᓂ 15-ᓂᑦ 20-ᓄᑦ ᐊᔪᕈᓃᖅᓴᖅᑐᖃᖃᑦᑕᖅᑐᖅ,” ᐅᖃᒃᑲᓐᓂᕐᑐᖅ.

ᑭᖑᓪᓕᖅ ᐊᔪᕈᓐᓃᖅᓴᖅᕕᐅᓂᐊᖅᑐᑦ ᒫᓐᓇ ᐅᖃᐅᓯᐅᑲᑕᓕᕐᑐᑦ ᐅᐱᕐᖔᒧᑦ, ᓇᑯᓚᒃ ᐅᖃᕐᑐᖅ, ᐊᒻᒪ ᓇᓕᐊᒃ ᓂᕈᐊᖅᑕᐅᓂᐊᕐᒪᖔᑕ ᐆᒧᖓ ᐊᐅᔭᖅ ᑲᓇᑕᒥ ᐊᐅᔭᒃᑯᑦ ᐱᙳᐊᕕᒡᔪᐊᕐᓇᒧᑦ, ᑖᓐᓇ ᐋᖅᑭᒃᑕᐅᓯᒪᓪᓗᓂ ᐋᒐᓯ 8-ᒥ ᐋᒐᓯ 25-ᒧᑦ ᔭᐃᓐᑦ ᔮᓐᔅ, ᓂᐅᕙᐅᓐᓛᓐᒥ.

ᑮᓇᐅᔭᓕᐅᕋᓱᑲᑕᓕᕐᓂᐊᕐᑐᑦ ᖃᓂᑦᑐᒃᑯᑦ ᐅᐱᕐᖔᖅ ᐊᔪᕈᓐᓃᖅᓴᕐᕕᒃᓴᖏᓐᓄᑦ, ᑯᕈᒃᔅ ᐅᖃᕐᑐᖅ.

Share This Story

(0) Comments

Join the Conversation

Your email address will not be published. Required fields are marked *

*