ᓄᓇᕗᒻᒥ ᓄᑖᖅ ᐸᓖᓯ ᓯᕗᓪᓕᖅᐸᐅᔾᔨᒍᒪᔪᖅ ᐃᓄᓐᓂᑦ ᐃᖅᑲᓇᐃᔭᖅᑎᑖᖅᑐᕐᓗᓂ

For English version, see Nunavut’s new top cop prioritizes transparency, Inuit recruitment

ᐊᓯᔾᔨᑎᓪᓗᒋᑦ, ᐃᓄᓐᓂᑦ ᐃᖅᑲᓇᐃᔭᖅᑎᓂᒃ ᐸᓖᓯᓂᓪᓗ ᐱᓇᓱᑦᑎᐊᕈᒪᔪᖅ ᐊᖏᔪᖅᑳᕆᔭᖅ ᑭᐊᓐᑦ ᐸᐃᒃ ᓯᕗᓪᓕᖅᐸᐅᔾᔨᓗᓂ ᑏᓰᑉᐱᕆ 10−ᒥᑦ ᑎᒍᓯᑎᓪᓗᒍ ᐊᖏᔪᖅᑳᖑᓂᕐᒥᑦ ᓄᓇᕗᒻᒥ ᐸᓖᓯᒃᑯᓐᓄᑦ.

ᐸᐃᒃ ᑐᓐᖓᓱᑦᑎᑦᑎᔪᖅ ᖁᓕᖓᓐᓂ ᐊᖏᔪᖅᑳᕆᔭᐅᓕᖅᑐᖅ ᐸᓖᓯᒃᑯᓐᓄᑦ ᓇᓗᓇᐃᒃᑯᑎᓕᒻᒥᑦ “V−ᒥᑦ” ᐸᓖᓱᒃᑯᓐᓂ ᖁᕕᐊᓲᑎᖃᖅᑐᑦ ᐃᓗᐊᓂ ᐃᖃᓗᐃᑦ ᖃᖓᑕᓲᒃᑯᕕᐅᑉ ᓱᓇᒃᑯᑖᖃᕐᕕᖓᓐᓂ.

ᐊᓐᓄᓘ ᐸᓛᑲᑖ, ᓇᖏᖅᑐᖅ ᓂᓪᓕᐊᔪᓄᑦ ᓇᖏᕐᕕᒻᒥᑦ, ᐃᓕᓴᖅᓯᔪᖅ ᓴᐃᒻᒪᑎᒻᒥᑦ ᑏᓰᑉᐱᕆ 10−ᒥ ᐊᓯᔾᔨᑎᓪᓗᒋᑦ ᐊᖏᔪᖅᑳᖏᑦ ᐊᖏᔪᖅᑳᕆᔭᖅ ᑭᐊᓐᑦ ᐸᐃᒃ. (ᐊᔾᔨᓕᐅᕆᔨ ᔨᐊᑉ ᐸᓕᑎᐊᕐ)

ᑕᒫᓂᖃᐃ ᐃᑲᕐᕋᐸᓗᒻᒥ ᐃᓕᓴᖅᓯᓚᐅᖅᑐᑦ, ᐊᓐᓄᕌᑦᑎᐊᕙᖏᓐᓂ ᐊᑐᖅᑐᑎᑦ ᐊᐅᐸᖅᑐᓂᒃ. ᓴᖅᑭᔮᖅᑎᑦᑎᓪᓗᑎᑦ ᐸᓖᓯᒃᑯᑦ ᖃᓄᐃᓘᓲᖑᓂᖏᓐᓂ ᖁᕕᐊᓲᑎᖃᖅᑎᓪᓗᒋᑦ ᐸᐃᒃ ᐃᓂᒋᓂᐊᓕᖅᑕᖓᓐᓂ, 40−ᓂᑦ ᖃᐃᖁᔨᓯᒪᓪᓗᑎᑦ.

“ᐱᓕᕆᔪᒪᑦᑎᐊᖅᑐᖓ ᐅᑭᐅᖅᑕᖅᑐᒥ ᐊᒻᒪᓗ ᐱᔪᓐᓇᕐᓂᓕᒫᓂᒃ ᐱᓱᐊᕐᓂᐊᖅᑐᖓ ᑭᒃᑯᓕᒫᓄᑦ,” ᐸᐃᒃ ᐱᕙᓪᓕᐊᔪᓕᕆᔨᒃᑯᓐᓄᑦ ᐅᖃᖅᑐᖅ ᖁᕕᐊᓲᑎᖃᖅᑎᓪᓗᒋᑦ.

ᑕᐃᒃᑯᓂᖓ 157−ᓂᑦ ᐸᓖᓯᓂᒃ ᐃᖅᑲᓇᐃᔭᖅᑐᓂᒃ ᓄᓇᕗᒻᒥ, ᑎᓴᒪᑐᐃᓐᓇᐃᑦ ᐃᓅᓪᓚᕆᐅᓪᓗᑎᑦ.

ᐸᐃᒃ ᐅᖃᖅᑐᓂ ᐱᐅᓯᕚᓪᓕᑎᑦᑎᒐᓱᓐᓂᐊᕐᓂᕋᖅᑐᓂ ᓄᓇᓕᓐᓂᑦ ᐃᖅᑲᓇᐃᔭᖅᑎᑖᖅᑐᕐᓗᓂ ᑭᒡᒐᖅᑐᐃᔨᔅᓴᓂᓪᓗ. ᐱᓕᕆᖃᑎᖃᕈᒪᓪᓗᓂ ᐊᖏᔪᖅᑳᖑᓚᖅᑐᒥᑦ, ᐋᓐᓂᓘ ᐹᑲᑖᒥᑦ, ᐃᓄᓐᓂᓪᓗ ᐅᖃᐅᔾᔨᒋᐊᖅᑎᓂᑦ ᑲᑎᒪᔨᓂᒃ ᓄᓇᓕᓐᓂ ᐃᓱᒪᒋᔭᖏᓐᓂ ᑐᓴᕈᒪᓪᓂ ᐃᓱᒪᓕᐅᕐᓂᐊᖅᑎᓪᓗᒍ.

“ᑕᒪᒃᑯᐊ ᐅᑉᐱᕆᔭᔅᓴᐅᒻᒪᑕ ᓄᓇᓕᖏᓐᓂ ᐅᓂᒃᑳᕐᓗᑎᑦ ᖃᓄᖅ ᐃᑉᐱᒋᔭᖃᕐᒪᖔᑕ ᐱᒻᒪᕆᐅᔪᓂᒃ,” ᐸᐃᒃ ᐅᖃᖅᑐᓂ.

ᐊᖏᔪᖅᑳᒻᒪᕆᒃ ᒪᐃᒃ ᑐᕼᐊᒻ, ᐸᓖᓯᒃᑯᑦ ᑲᓇᑕᒥ ᐊᖏᔪᖅᑳᕆᔭᐅᔪᖅ ᐸᓖᓯᓄᑦ, ᐱᖃᑕᐅᓚᐅᖅᑐᖅ ᖁᕕᐊᓲᑎᖃᖅᑎᓪᓗᒋᑦ. ᐅᖃᖅᑐᓂᓗ ᕿᓚᒥᐅᓂᖅᓴᐅᔫᒥᔪᖅ ᐃᖅᑲᓇᐃᔭᖅᑎᑖᖅᑐᕋᓱᓐᓂᐊᕐᖓᑕ ᐃᓕᓐᓂᐊᖅᑎᓴᕋᐃᓪᓗᒋᓪᓗ.

“ᐃᖅᑲᓇᐃᔭᖅᑎᑖᖅᑐᕈᒪᒐᑦᑕ ᓄᓇᓐᓂᑦ, ᐅᑎᖅᑎᐸᓪᓗᐊᓗᒋᑦ ᓄᓇᓖᑦ ᑕᐃᒪᐃᒍᒪᑉᐸᑕ,” ᐅᖃᖅᑐᓂ ᑐᕼᐊᒻ.

“ᑲᑐᔾᔨᖃᑎᒌᑦ ᑭᒡᒐᖅᑐᖅᑕᐅᒋᐊᖃᕐᖓᑕ ᓄᓇᓕᓐᓂᑦ ᐱᔨᑦᑎᖅᑕᖏᓐᓂ.”

ᐸᐃᒃ ᐅᖃᖅᑐᓂ ᐸᓖᓰᑦ ᖁᕕᐊᓱᒃᑲᓗᐊᕐᒪᖔᑕ ᖃᐅᔨᒪᓇᓱᖃᑕᕐᓂᐊᖅᑐᖅ ᖃᓄᐃᓐᖏᑦᑎᐊᖁᓪᓗᒋᓪᓗ ᐃᖅᑲᓇᐃᔮᒥᓂᒃ. ᓱᓕᓂᕋᖅᑐᓂᓗ ᑕᒪᒃᑯᐊ “ᐊᓯᔾᔨᑦᑎᐊᕐᓂᐊᕐᖓᑕ ᑕᑎᒋᔭᐅᑦᑎᐊᕈᓐᓇᕐᓗᑎᓪᓗ” ᖃᓄᐃᕈᔪᓐᖏᑦᑎᐊᕐᓗᑎᑦ.

“ᐃᔨᕋᖅᑐᖏᑦᑎᐊᕐᖓᑕ ᐅᓂᒃᑳᖃᕈᓐᓇᑦᑎᐊᖅᑐᒍᑦ ᑭᒃᑯᑐᐃᓐᓇᕐᓄᑦ,” ᐅᖃᖅᑐᓂ.

“ᖃᐅᔨᒪᒋᐊᖃᕐᖓᑕ ᐊᒻᒪᓗ ᖃᓄᐃᓘᕐᓂᑎᓐᓂ ᐅᑭᐅᖅᑕᖅᑐᒥ ᖃᐅᔨᒪᒻᒥᓗᑎᑦ.”

ᐸᐃᒃ ᐃᓅᓚᐅᖅᓯᒪᔪᖅ ᐱᕈᖅᓴᓪᓗᓂᓗ ᐳᕆᓐ, ᓅᐸᓪᓛᒥᑦ. ᐸᓖᓯᕈᖅᑐᓂ 2001−ᒥ ᐱᒋᐅᖅᓴᓕᖅᑐᓂ ᐸᓖᓯᕈᖅᐸᓪᓕᐊᓪᓗᓂ ᓄᓇᒥᓂᒃ ᐊᕐᕌᒍᒥ ᑭᖑᓂᖓ.

ᐸᓖᓯᐅᖏᓐᓇᕈᔪᔅᓯᒪᔪᖅ ᐅᑭᐅᖅᑕᖅᑐᒥ ᐊᑯᓂᐅᓂᖅᓴᖅ. ᓛᐸᑐᐊᒥ ᓄᓇᑦᑎᐊᕐᒥ ᐊᐅᓪᓛᖅᑕᐅᑦᑕᖅᑯᖅ ᓄᓇᕗᒻᒧᑦ ᐸᓖᓯᐅᓪᓗᓂ ᑲᒪᔨᐅᓪᓗᓂ ᐱᕋᔭᑦᑐᓕᕆᓂᕐᒥᖅ 2022−ᒥ.

ᐸᓖᓯ ᓇᓴᐃᖅᑐᑦ ᐅᑉᐱᕆᔭᒥᓂᒃ ᓇᓗᓇᐃᖅᓯᓪᓗᑎᑦ ᑏᓰᑉᐱᕆ 10−ᒥ ᐋᓐᓄᓘ ᐸᓛᑲᑖᒥᑦ, ᐃᓱᓕᑦᑎᔪᖅ ᐃᖅᑲᓇᐃᔮᒥᓂᒃ ᓄᓇᕗᒻᒥ ᐊᖏᔪᖅᑳᕆᔭᐅᑎᓪᓗᒍ ᑕᕝᕙᓂ ᐊᕐᕌᒍᒥ. (ᐊᔾᔨᓕᐅᕆᔨ ᔨᐊᑉ ᐸᓕᑎᐊᕐ)

ᐸᓛᒃᑲᑖ ᐃᓱᓕᑦᑎᒻᒪᑦ ᐃᖅᑲᓇᐃᔮᒥᓂᒃ ᐃᓇᖏᓚᐅᖅᑐᖅ ᓄᓇᕗᒻᒥ ᐃᖅᑲᖅᑐᐃᕕᓕᕆᓂᕐᒥᑦ ᔫᓂᐅᑕᐅᖅᑐᒥ, ᐸᐃᒃ ᐊᖏᔪᖅᑳᕈᖅᑎᑕᐅᑲᐃᓐᓇᖅᑐᓂ. ᐃᓕᑦᑕᑕᐃᓐᓇᑦᑕᓕᖅᑯᖅ ᐊᑦᑑᑉᐱᕆᒥ.

“[ᐸᐃᒃ] ᑐᑭᓯᓯᒪᑦᑎᐊᖅᑐᖅ ᐅᑭᐅᖅᑕᖅᑐᒥ, ᓇᒻᒥᓂᕐᓗ ᖃᐅᔨᒪᓇᓱᖃᑦᑕᖅᑐᓂ, ᐃᓕᑉᐸᓪᓕᐊᓪᓗᓂ ᑲᒪᑦᑎᐊᕋᓱᐃᓐᓇᖅᑐᓂᓗ ᓄᓇᕗᒻᒥ ᐱᖅᑯᓯᖏᓐᓂᓪᓗ,” ᐸᓚᑲᑕ ᐅᖃᖅᑐᓂ.

ᐸᐃᒃ ᐅᖃᖅᑐᓂ ᐅᑭᐅᖅᑕᑐᒥ, ᐸᓖᓯᓕᒫᑦ ᐃᑲᔪᖅᑐᖅᑕᐅᖏᓐᓇᕆᐊᖃᕐᖓᑕ. ᑖᔅᓱᒧᖓᓕ, ᐃᓚᒥᓂ ᐅᖃᐅᓯᓕᒃ.

ᐅᖃᖅᑐᓂ ᐅᐸᒐᓐᓂᒐᓱᖃᑦᑕᕐᓂᐊᖅᑐᖅ, ᐱᓕᕆᖃᑎᖃᕐᓗᓂ ᐃᓚᓕᐅᑎᓯᒪᑦᑎᐊᕋᓱᐊᕐᓗᓂᓗ ᓄᓇᓕᓐᓂᑦ ᐅᑭᐅᖅᑕᖅᑐᒥ. ᐊᑯᓂᓗ ᐃᓂᒋᓕᖅᑕᒥᓃᒍᒪᓪᓗᓂ.

“ᐱᔾᔪᑎᒋᓗᐊᖅᑕᖓᑦᑕᐅ ᓴᐃᒻᒪᖅᑎᑕᐅᓯᒪᑦᑎᐊᕐᖓᑦ ᒎᑎᒧᑦ ᐃᓂᒋᔭᒥᓄᑦ ᐊᑯᓂ ᑕᕝᕙᓃᒍᒪᔾᔪᑎᒋᕚ. ᖃᖓᒃᑯᓪᓕ ᐃᓱᓕᑦᑎᒐᔭᕐᒪᖔᖅ ᖃᐅᔨᒪᓇᓐᖏᑦᑐᖅ,” ᐅᖃᖅᑐᓂ ᐸᐃᒃ.

“ᐱᓕᕆᔪᒪᑦᑎᐊᖅᑐᖓ ᐸᓖᓯᓄᑦ ᑕᒫᓂ ᓄᓇᕗᒻᒥ ᓄᓇᖅᑲᑎᒥᓄᓪᓗ.”