ᓄᓇᕘᑉ ᒪᒃᑯᒃᑐᖏᑦ ᐊᒻᒪ ᐊᕐᓇᐃᑦ ᐊᓄᓪᓚᒃᓰᕕᖏᑦ ᑲᑎᑎᕆᕗᑦ ᐊᐅᓚᑦᑎᓂᕐᒥ

ᐊᐃᑉᕆᓕ 1−ᒥ, ᓄᓇᕗᒻᒥ ᐊᕐᓇᓄᑦ ᐃᑲᔪᖅᑕᐅᕕᖓ ᐊᒻᒪ ᐃᓱᒪᖅᓱᙱᑦᑐᒃᑯᕕᒃ ᐅᑭᐅᑭᑦᑐᓄᑦ ᑎᒍᔭᐅᓯᒪᕝᕕᒃ, ᐃᓂᖃᖅᑐᓂ ᓴᓂᓕᕇᒃᑐᓂ ᓯᕗᒧᒋᐊᖅ ᐊᖅᑯᑎᖓᓂ ᐃᖃᓗᖕᓂ, ᑲᑎᑎᕆᕗᑦ ᐃᖅᑲᓇᐃᔭᖅᑎᖏᓐᓂ.

“ᐅᓇ ᐊᖏᒡᓕᒋᐊᖅᑎᑦᑎᓂᐊᖅᐳᖅ ᐃᖅᑲᓇᐃᔭᖅᑎᖃᕐᓂᕐᒥ ᐊᑐᐃᓐᓇᐅᔪᒥ ᑐᓂᓯᓂᕐᒥ ᐱᓕᕆᐊᖑᓂᐅᔪᓂ, ᐃᓅᓯᓕᕆᓂᕐᒥ ᐊᒻᒪ ᐱᓕᕆᐊᖑᔪᓂ ᐊᐅᓚᑕᐅᓂᖏᓐᓂ,” ᐅᖃᓚᐅᖅᐳᖅ ᓯᑏᕙᓐ ᓵᑖᒃ, ᓄᓇᕗᒻᒥ ᒐᕙᒪᒃᑯᑦ ᑐᑭᒧᐊᒃᑎᑦᑎᔨᖓ ᐊᑐᐊᒐᓄᑦ ᐊᒻᒪ ᐸᕐᓇᐃᓂᕐᒧᑦ, ᖃᕋᓴᐅᔭᑎᒍᑦ ᑎᑎᕋᕐᓂᐅᔪᒥ.

ᐊᕐᓇᓄᑦ ᐊᒻᒪ ᒪᒃᑯᒃᑐᓄᑦ ᐊᓄᓪᓚᒃᓯᖅᑐᑦ ᐊᕕᓯᒪᐃᓐᓇᕐᓂᐊᖅᐳᑦ, ᑭᓯᐊᓂ ᑲᑎᙵᓂᖃᕐᓂᐊᖅᐳᑦ ᑖᒃᑯᓂᖓᑦᑕᐃᓐᓇᖅ ᑲᑎᙵᓂᐅᔪᓂ ᐃᖅᑲᓇᐃᔭᖅᑎᐅᔪᓂ, ᐃᑲᔪᖅᑕᐅᕕᐅᑉ ᐊᖏᔪᖅᑳᖓ ᐊᒻᒪ ᐃᑲᔪᖅᑕᐅᕕᐅᑉ ᐊᖏᔪᖅᑳᖓᑕ ᐃᑲᔪᖅᑎᖓ, ᐅᖃᓚᐅᖅᐳᖅ.

ᑲᑎᓪᓗᒍ, ᒪᕐᕉᒃ ᐃᒡᓗᕐᔪᐊᑦ 24−ᓂ ᐃᖅᑲᓇᐃᔭᖅᑎᖃᕐᓂᐊᖅᐳᑦ.

“ᐊᔾᔨᐅᙱᑦᑐᒥ ᐊᑲᕐᕉᑎᖓ ᐱᔪᓐᓇᕐᓂᐅᔪᖅ ᐱᒋᐊᖅᑎᑦᑎᓂᕐᒥ ᐃᓚᓕᐅᑎᓯᒪᔪᒥᑦ ᐃᖅᑲᓇᐃᔭᖅᑎᓂ ᓇᓕᐊᑐᐃᓐᓇᒧᑦ ᑲᑎᙵᓂᐅᔪᒥ ᐱᔭᕆᐊᖃᕈᑎᒃ,” ᓵᑖᒃ ᐅᖃᓚᐅᖅᐳᖅ.

ᐊᑦᑎᒃᑐᒥ ᐅᓄᕐᓂᐅᔪᓂ ᐊᓄᓪᓚᒃᓯᖅᑐᓂ ᑕᒪᒃᑭᓂ ᐃᒡᓗᕐᔪᐊᓂ ᖄᖏᖅᓯᒪᔪᓂ ᖃᔅᓯᐊᕐᔪᖕᓂ ᐊᕐᕌᒍᓂ ᑐᕌᖅᑎᑦᑎᓚᐅᖅᐳᖅ ᐃᓱᒪᓕᐊᖑᓂᐅᔪᒧᑦ. 2024−ᒥ, ᐊᕐᓇᓄᑦ ᐊᓄᓪᓚᒃᓰᕕᖓ ᐊᓄᓪᓚᒃᓯᖅᑎᑦᑎᓚᐅᖅᐳᑦ 31−ᓂ ᐊᕐᓇᓂᑦ, ᒪᒃᑯᒃᑐᒃᑯᕕᒃ ᐃᒡᓗᕐᔪᐊᖓ 7−ᖑᓪᓗᑎᒃ, ᐅᖃᐅᓯᐅᓪᓗᓂ ᐃᑲᔪᖅᑕᐅᕕᖕᒥ ᐊᕕᒃᑐᖅᓯᒪᓂᐅᔪᒥ 2024-25−ᒥ ᐅᓂᒃᑳᓕᐊᖓᓂ.

ᑕᐅᑐᒃᖢᒍ 352−ᓂ ᐊᓄᓪᓚᒃᓯᖅᑐᓂ ᐊᓄᓪᓚᒃᓯᖅᑐᓂ ᐊᖑᑎᓄᑦ ᐊᓄᓪᓚᒃᓰᕕᖓᓄᑦ ᐃᖃᓗᖕᓂ, ᐊᒻᒪ 50−ᓂ ᐊᓄᓪᓚᒃᓯᖅᑎᑕᐅᔪᓂ ᑲᖏᖅᖠᓂᐅᑉ ᐊᓄᓪᓚᒃᓰᕕᖓᓄᑦ, 2024−ᒥ.

ᑲᑎᑎᕆᓂᖅ ᐱᓗᐊᖅᑐᒥ ᐱᕚᓪᓕᕈᑎᖃᕐᓂᐊᖅᐳᖅ ᐊᕐᓇᓄᑦ ᐃᒡᓗᕐᔪᐊᖓᓄᑦ, ᓵᑖᒃ ᐅᖃᓚᐅᖅᐳᖅ, ᐊᖏᒡᓕᒋᐊᖅᑎᑦᑎᓂᐊᕐᒪᑦ ᐱᓕᕆᐊᖑᓂᐅᔪᓂ “ᐸᕐᓇᐃᑦᑎᐊᕈᓐᓇᕐᓂᕐᒥ ᐊᕐᓇᓂ ᐊᓄᓪᓚᒃᓯᖅᑐᓂ ᖃᖓᒃᑲᓐᓂᕐᓂᐅᔪᒥ ᐊᓂᑎᑕᐅᓛᕐᓂᖏᓐᓄᑦ.”

ᐊᓯᔾᔨᕐᓂᐅᔪᖅ ᑎᑭᑉᐳᖅ ᐊᕐᓇᐃᑦ ᐃᒡᓗᕐᔪᐊᖓ ᐊᑐᖅᓯᒪᓂᖓᓂ ᐱᓕᕆᐊᖑᓂᐅᔪᒥ “ᐊᒥᒐᕐᓂᖃᓗᐊᕐᓂᐅᔪᒥ” ᒫᓐᓇᓕᓴᐅᔪᓂ ᐊᕐᕌᒍᓂᑦ, ᐅᖃᓚᐅᖅᐳᖅ ᑭᒻ ᑰᓕᑦ, ᓄᓇᕘᑉ ᖃᐅᔨᓴᖅᑎᒻᒪᕆᖓ.

ᑰᓕᑦ ᐃᖅᑲᓇᐃᔮᖓ ᓇᓗᓇᐃᖅᓯᓂᕐᒥ ᓄᓇᕘᑉ ᐊᓄᓪᓚᒃᓰᕕᖏᑦ ᒪᓕᑦᑎᐊᕐᓂᖏᓐᓂ ᒪᓕᒐᕐᒥ ᐊᒻᒪ ᓱᕋᐃᓂᖃᙱᓐᓂᖏᓐᓂ ᐊᓄᓪᓚᒃᓯᖅᑑᑉ ᐱᔪᓐᓇᕐᓂᕆᔭᖏᓐᓂ.

ᐊᕐᕌᓂ, ᐊᕐᓇᓄᑦ ᐊᓄᓪᓚᒃᓰᕕᖓ ᐊᐅᓚᑦᑎᓚᐅᖅᐳᑦ 10−ᓂ ᐱᓕᕆᐊᖑᔪᓂ, ᐃᓚᖃᖅᑐᒥ ᒥᖅᓱᕐᓂᕐᒥ, ᕿᓯᓕᕆᓂᕐᒥ ᐊᒻᒪ ᐃᒥᐊᓗᖕᒧᑦ ᓄᖅᑲᕋᓱᐊᕐᓂᕐᒥ ᑲᑎᙵᓂᐅᔪᒥ. ᐊᖑᑎᓄᑦ ᐊᓄᓪᓚᒃᓰᕕᖓ, ᑕᐅᑐᒃᖢᒋᑦ, 37−ᓂ ᐱᓕᕆᐊᖑᓂᖃᓚᐅᖅᐳᑦ.

ᒪᕐᕉᖕᓂ ᐊᕕᒃᑐᖅᓯᒪᔪᓂ ᐃᖅᑲᓇᐃᔭᖅᑎᓂ ᐅᓄᙱᑦᑐᑯᓗᖕᓄᑦ ᐊᓄᓪᓚᒃᓯᖅᑐᓄᑦ “ᐊᑑᑎᖃᑦᑎᐊᖅᑐᒥ ᐊᑐᕐᓂᐅᙱᓚᖅ ᐃᑲᔪᕈᑎᒃᓴᓄᑦ,” ᑰᓕᑦ ᐅᖃᓚᐅᖅᐳᖅ, ᐃᓚᒋᐊᖅᓯᓪᓗᓂ ᑲᑎᑎᕆᓂᖅ ᐱᐅᙱᑦᑐᒥ ᐊᒃᑐᐃᓂᖃᔾᔮᙱᑦᑐᒃᓴᐅᕗᖅ ᐊᓄᓪᓚᒃᓯᖅᑐᓄᑦ ᖃᐅᑕᒫᒥ ᐃᓅᓯᖏᓐᓂ.

“ᐊᐅᓚᑦᑎᓂᕐᒥ ᐃᓱᒪᓕᐊᖑᓂᖅᓴᐅᕗᖅ,” ᐅᖃᓚᐅᖅᐳᖅ.