ᐃᓗᐊᖅᓴᐃᔨ ᖃᐃᖁᔨᓂᖃᖅᐳᖅ ᐊᑦᑕᓇᙱᓐᓂᖅᓴᓂ ᐊᖅᑯᑎᓂ ᐊᐳᖅᑕᐅᓚᐅᖅᑎᓪᓗᒍ ᑎᓴᒪᓕᖕᒧᑦ
ᑐᕇᓴ ᕘ ᒪᒥᓴᖅᐳᖅ ᐋᓐᓂᕐᓂᐅᔪᓂ ᐊᐳᖅᑕᐅᓚᐅᖅᑎᓪᓗᒍ ᑎᓴᒪᓕᖕᒧᑦ
ᑐᕇᓴ ᕘ, ᐳᓚᕋᖅᑐᒥ ᑐᐊᕕᕐᓇᖅᑐᒧᑦ ᐊᒻᒪ ᐱᓂᕐᓗᒡᔪᐊᕐᓂᐅᔪᓄᑦ ᐃᓗᐊᖅᓴᐃᔨ ᐋᓐᓂᓚᐅᖅᐳᖅ ᑎᓴᒪᓕᒃᑯᑦ ᐊᐳᖅᓯᓂᐅᔪᒥ ᐅᖅᓱᖅᑑᒥ, ᒪᒥᓴᖅᐳᖅ West Park ᐋᓐᓂᐊᖃᕐᓇᙱᑦᑐᓕᕆᓂᕐᒥ ᐸᖅᑭᕝᕕᐅᔪᒥ ᔪᓚᐃ 7−ᒥ, ᑎᒥᒃᑯᑦ ᐃᓅᓕᓴᖅᑕᐅᓂᖓᓂ. ᕘ ᖁᒃᑐᕋᐅᑉ ᓴᐅᓂᖓ ᓄᑎᓐᓂᖃᖅᖢᓂ, ᑮᓇᖓᒍᑦ ᓄᑎᓐᓂᖃᖅᖢᓂ, ᐊᒡᒐᐅᑎᖓᓂ ᓄᑎᓐᓂᖃᖅᖢᓂ ᐊᒻᒪ ᓈᖓᓂ ᐋᓐᓂᕐᓂᐅᔪᓂ ᔫᓂ 18−ᒥ ᐊᐳᖅᑕᐅᓂᐅᔪᒥ. (ᓵᒻ ᓚᔅᑲᕋᔅ ᐊᔾᔨᖁᑎᖓ ᐊᓯᐊᒎᖅᑐᒥ ᓄᓇᑦᓯᐊᖅ ᑐᓴᒐᒃᓴᓕᕆᔨᒃᑯᓐᓄᑦ)
For the English version of this story, please see Nurse calls for safer roads after she was struck by ATV.
ᑐᐊᕕᕐᓇᖅᑐᒧᑦ ᐊᒻᒪ ᐱᓂᕐᓗᒡᔪᐊᕐᓂᐅᔪᓄᑦ ᐃᓗᐊᖅᓴᐃᔨ ᑐᕇᓴ ᕘ ᐅᖃᖅᐳᖅ ᐃᖅᑲᓇᐃᔭᕐᓗᓂ ᐅᑭᐅᖅᑕᖅᑐᒥ ᐱᖃᕆᐊᖃᖅᐳᖅ “ᐃᔾᔪᔪᒥᒃ ᐅᕕᓂᖕᒥ” ᐊᒻᒪ ᐱᔪᓐᓇᕐᓂᖃᕐᓗᓂ ᑲᒪᒋᔭᖃᕐᓂᕐᒥ ᓂᕆᐅᓇᙱᑦᑐᓂ.
ᑕᖅᑭᐅᓚᐅᖅᑐᒥ, ᓂᕆᐅᓇᙱᑦᑐᖅᓯᐅᓚᐅᖅᐳᖅ.
ᕘ, ᐳᓚᕋᖅᑐᒥ ᐃᓗᐊᖅᓴᐃᔨᒥ ᐱᓇᓱᐊᕈᓯᕐᓂ-ᑎᓴᒪᓂ ᑎᓕᔭᐅᓂᐅᔪᒥ ᐅᖅᓱᖅᑑᒥ, ᐊᖏᕐᕋᖓᓄᑦ ᐱᓱᓚᐅᖅᐳᖅ ᐅᓐᓄᐊᒃᑯᑦ ᐃᖅᑲᓇᐃᔭᕐᓂᐅᓚᐅᖅᑐᒥ ᓄᓇᓕᖕᓂ ᐋᓐᓂᐊᕕᖓᓂ ᔫᓂ 18−ᒥ ᑎᓴᒪᓕᖕᒧᑦ ᐊᐳᖅᑕᐅᓪᓗᓂ.
“ᑐᓴᓚᐅᖅᐳᖓ ᐊᐅᓚᐅᒻᒥ ᓱᒃᑲᓴᕆᐊᖅᑐᒥ, ᓴᐅᒥᓐᓄᑦ ᑕᑯᒋᐊᖅᖢᖓ, ᐊᒻᒪ ᑕᑯᓪᓗᖓ ᑎᓴᒪᓕᖕᒥ ᐅᕙᓐᓄᑦ ᑐᕌᑦᑎᐊᖅᑐᒥ,” ᕘ ᐅᖃᓚᐅᖅᐳᖅ ᔪᓚᐃ 6−ᒥ ᒪᒥᓴᕐᕕᖕᒥ ᑐᕌᓐᑐᒥ.
ᐃᖅᑲᐅᒪᕗᖅ ᐊᐳᖅᑕᐅᑦᑕᐃᓕᓇᓱᐊᕐᓂᕐᒥ ᕿᒡᒋᖅᖢᓂ ᓴᓂᕋᖓᓄᑦ.
“ᖃᐅᔨᓕᖅᖢᖓᓗ ᐅᕙᖓ ᒪᓂᖅᑲᒦᑦᑐᖓ ᐋᓐᓂᐊᕐᔪᐊᖅᖢᖓ,” ᕘ ᐅᖃᓚᐅᖅᐳᖅ.
ᕘ ᖁᒃᑐᕋᐅᑉ ᓴᐅᓂᖓᓂ ᓄᑎᓐᓂᖃᖅᖢᓂ, ᐊᒡᒐᐅᑎᖓᓂ ᐊᒻᒪ ᑮᓇᖓᒍᑦ, ᐊᒻᒪ ᓈᖓᒍᑦ ᐋᓐᓂᖅᖢᓂ ᐊᐳᖅᑕᐅᓂᐅᔪᒥ. ᒪᓕᒃᑐᓄᑦ ᐃᑲᕐᕋᓄᑦ 48−ᓄᑦ, ᒪᕐᕈᐃᖅᓱᖅᖢᓂ ᑐᖁᑲᓴᓚᐅᖅᐳᖅ ᐅᑕᖅᑭᑎᓪᓗᒍ ᑐᐊᕕᕐᓇᖅᑐᒃᑯᑦ ᐊᐅᓪᓚᖅᑎᑕᐅᓂᐅᔪᒥ ᖃᖓᑕᓲᒃᑯᑦ ᐅᖅᓱᖅᑑᒥ ᐃᐊᑦᒪᓐᑕᓐᒧᑦ ᐊᓯᐊᒎᖅᑐᒧᑦ ᐱᓂᕐᓗᒡᔪᐊᕐᓂᐅᔪᒥ ᐸᖅᑭᔭᐅᓂᕐᒧᑦ.
ᖃᓄᐃᑉᐸᓪᓕᐊᑎᓪᓗᒍ, ᕘ ᐅᖃᓚᐅᖅᐳᖅ ᐃᖅᑲᓇᐃᔭᖃᑎᖏᑦ ᐋᓐᓂᐊᕕᖕᒥ ᐅᖃᐅᔾᔨᖅᓱᐃᖏᓐᓇᓚᐅᖅᐳᑦ ᖃᓄᐃᓐᓂᖓ ᐊᓯᔾᔨᕌᖓᑦ, ᐃᓚᖃᖅᑐᒥ ᐊᐅᑉᒨᓕᖓᔪᖓ ᑲᑕᒃᖢᓂ ᐊᐅᖏᖅᓯᓗᐊᒧᑦ ᐊᒻᒪ ᐆᑕᕐᓇᖅᓯᓪᓗᓂ.
“ᑲᑉᐱᐊᓱᒃᑲᓗᐊᖅᑎᓪᓗᖓ ᐊᒻᒪ ᐊᑕᐅᓯᐅ)ᓯ ᑐᖁᓂᐊᕋᓱᒋᓪᓗᖓ, ᐅᒃᐱᕇᓐᓇᓚᐅᖅᐸᕋ ᐊᔪᙱᓐᓂᖏᓐᓂ,” ᐅᖃᓚᐅᖅᐳᖅ.
ᕘ ᐅᖃᓚᐅᖅᐳᖅ ᐊᐅᓪᓚᖅᑎᑕᐅᓂᖅ ᐊᑕᐅᓯᐅᓪᓗᓂ ᐊᔪᕐᓇᓛᖑᓚᐅᖅᐳᖅ ᐊᑐᕐᓂᑯᖓᓐᓂ, ᓯᓚᒥᒃ ᐊᒻᒪ ᐃᖅᑲᓇᐃᔭᖅᑎᓂ ᐊᑲᐅᙱᓕᐅᕈᑕᐅᔪᓂ ᑭᖑᕙᕆᐊᖅᑎᑦᑎᓪᓗᓂ ᐊᐅᓪᓚᖅᑎᑕᐅᓂᖓᓂ ᓄᓇᓕᖕᓂ.
ᐋᔩᖃᑎᒌᖕᓂᐅᔪᒥ ᐊᑲᐅᙱᓕᐅᕈᑎᖃᓚᐅᕆᕗᖅ, ᑐᒃᓯᕋᖅᑕᐅᔪᒥ ᐊᐅᖕᒥ ᑎᑭᓐᓇᓂ ᑐᐊᕕᕐᓇᖅᑐᒃᑯᑦ ᐊᐅᓪᓚᖅᑎᑕᐅᓂᕐᒧᑦ ᖃᖓᑕᓲᒥ ᐱᓕᕆᔨᐅᔪᓂ.
“ᐃᓗᐊᖅᓴᐃᔨᐅᓪᓗᓂ, ᐊᑲᖅᓴᙱᓇᖅᐳᖅ ᐊᐅᓚᑦᑎᔪᓐᓇᙱᓐᓇᑦᑕ,” ᕘ ᐅᖃᓚᐅᖅᐳᖅ.
“ᐅᓂᒃᓯᒪᓗᓂ, ᑲᑉᐱᐊᓱᖕᓇᖅᐳᖅ. ᖃᓄᐃᓐᓂᕐᒦᑉᐳᑎᑦ ᖃᓄᒃᑲᓐᓂᖅ ᐊᔪᕐᓇᕐᓂᖓᓂ ᑭᓯᐊᓂ ᐊᖏᓂᖅᓴᒧᑦ ᐋᓐᓂᐊᕕᖕᒧᐊᕈᕕᑦ.”
ᖃᓄᐃᓐᓂᐅᔪᖅ ᐱᒋᐊᖅᑎᑦᑎᓚᐅᖅᐳᖅ ᕼᐋᒻᓚᒃᑯᓐᓂ ᓯᕗᒻᒧᑦ ᐃᖏᕐᕋᓂᕐᒧᑦ ᓄᑖᙳᕆᐊᖅᑎᑦᑎᓂᕐᒥ ᓄᑕᐅᙱᑦᑐᒥ ᑎᓴᒪᓕᖕᓄᑦ ᒪᓕᒐᕋᓛᖓᓐᓂ, ᑭᓯᐊᓂ ᐊᖏᓂᖅᓴᐅᔪᖅ ᐊᑲᐅᙱᓕᐅᕈᑎ ᐱᑕᖃᙱᓗᐊᕐᓂᖓᓂ ᐱᔪᓐᓇᕐᓂᐅᔪᒥ ᐊᑐᓕᖅᑎᑕᐅᓂᖓᓂ, ᕘ ᐅᖃᓚᐅᖅᐳᖅ. ᐅᖅᓱᖅᑑᖅ ᐱᖓᓱᓂ ᐃᓄᓕᖕᓂ ᐸᓖᓯᖃᖅᐳᑦ ᓄᓇᓕᖕᓄᑦ 1,500−ᐸᓗᖕᓂ ᐃᓄᖃᖅᑐᓂ, ᐊᒻᒪ ᐊᑕᐅᓯᕐᒥ ᓄᓇᓕᖕᓂ ᒪᓕᒐᓕᕋᓛᓕᕆᔨᐅᔪᒥ.
“ᖁᕕᐊᓱᒃᐳᖓ ᑭᐅᔭᐅᓕᕐᓂᖓᓂ ᒫᓐᓇᐅᔪᒥ, ᑭᓯᐊᓂ ᖃᐅᔨᒪᙱᓚᖓ ᓈᒻᒪᒃᑐᓂ ᑲᓇᑕᒥ ᐸᓖᓯᖃᕐᓂᖓᓂ ᓇᐅᑦᑎᖅᓱᕐᓂᕐᒧᑦ ᐃᓄᖕᓂ ᒪᓕᖕᒪᖔᑕ ᒪᓕᒐᕐᓂᑦ,” ᐅᖃᓚᐅᖅᐳᖅ.
ᐊᑦᑕᓇᔾᔭᐃᖅᓯᓯᒪᓂᕐᒧᑦ ᐊᑲᐅᙱᓕᐅᕈᑕᐅᔪᓂ ᐱᑕᖃᐃᓐᓇᖅᑐᒥ ᐊᑲᐅᙱᓕᐅᕈᑕᐅᓯᒪᕗᖅ ᐅᖅᓱᖅᑑᑉ ᐊᖅᑯᑎᖏᓐᓂ.
ᐱᓇᓱᐊᕈᓯᐸᓗᖕᓂ ᒪᕐᕉᖕᓂ ᓯᕗᓂᐊᓂ ᕘ ᐋᓐᓂᓚᐅᕐᓂᖓᓂ, ᒪᒃᑯᒃᑐᒥ ᐋᓐᓂᖅᑐᖃᓚᐅᖅᐳᖅ ᑎᓴᒪᓕᒃᑯᑦ ᐊᐳᖅᑕᐅᓂᐅᔪᒥ ᐊᒻᒪ ᑐᐊᕕᕐᓇᖅᑐᒃᑯᑦ ᐊᐅᓪᓚᖅᑎᑕᐅᔭᕆᐊᖃᓚᐅᖅᐳᖅ ᔭᓗᓇᐃᕝᒧᑦ ᑐᐃᖓᓄᑦ ᐋᓐᓂᕐᓂᐅᔪᒧᑦ.
ᐅᖃᓚᐅᖅᐳᖅ ᐅᔾᔨᕆᓚᐅᕆᕗᖅ ᐊᓯᖏᓐᓂ ᓯᕗᓂᐊᓂ ᐳᓚᕋᕐᓂᐅᔪᓂ ᐅᖅᓱᖅᑑᒧᑦ, ᐃᓚᖃᖅᑐᒥ ᓱᒃᑲᓴᓗᐊᖅᑐᓂ ᓄᓇᓯᐅᑎᓂᑦ, ᓱᕈᓰᑦ ᐊᖁᑦᑐᓂ ᑎᓴᒪᓕᖕᓂ ᐊᒻᒪ ᐃᑭᒪᔪᑦ ᐃᖏᕐᕋᓪᓗᑎᒃ ᓴᐳᔾᔨᔾᔪᑕᐅᔪᓂ ᐊᑐᕐᓇᑎᒃ.
ᒫᓐᓇ ᒪᒥᓴᖅᐸᓪᓕᐊᓪᓗᓂ West Park ᐋᓐᓂᐊᖃᕐᓇᙱᑦᑐᓕᕆᓂᕐᒥ ᐸᖅᑭᕝᕕᐅᔪᒥ ᑐᕌᓐᑐᒥ, ᕘ ᑕᐅᑐᒃᑕᑐᐊᖃᑲᐃᓐᓇᖅᐳᖅ ᓴᙱᒃᑎᒋᐊᖅᓯᓂᕐᒥ ᐋᓐᓂᖅᓯᒪᔪᒥ ᓂᐅᖓᓂ ᐃᖃᐃᓕᓴᖅᑎᑕᐅᓂᒃᑯᑦ.
ᑐᕇᓴ ᕘ ᖁᖓᑉᐳᖅ ᐊᑐᖅᖢᓂ ᐱᓱᒍᑎᒥᒃ ᒪᒥᓴᖅᑎᓪᓗᒍ West Park ᐋᓐᓂᐊᖃᕐᓇᙱᑦᑐᓕᕆᓂᕐᒥ ᐸᖅᑭᕝᕕᐅᔪᒥ ᑐᕌᓐᑐᒥ ᔪᓚᐃ 7−ᒥ. (ᓵᒻ ᓚᔅᑲᕋᔅ ᐊᔾᔨᖁᑎᖓ ᐊᓯᐊᒎᖅᑐᒥ ᓄᓇᑦᓯᐊᖅ ᑐᓴᒐᒃᓴᓕᕆᔨᒃᑯᓐᓄᑦ)
GoFundMe ᐱᓕᕆᓂᐅᔪᒥ ᐋᖅᑭᒃᓱᖅᑕᐅᔪᒥ ᐃᖅᑲᓇᐃᔭᖃᑎᖏᓐᓂ ᐱᕈᖅᓴᐃᓚᐅᖅᐳᑦ $15,000 ᐅᖓᑖᓂ ᐃᑲᔪᖅᓱᐃᓂᕐᒧᑦ ᒪᒥᓴᕐᓂᖓᓂ.
ᕘ ᐅᖃᓚᐅᖅᐳᖅ ᐅᑕᖅᑭᒋᕗᖅ ᐃᓕᑦᑎᓂᕐᒥ ᐱᔪᓐᓇᕋᔭᕐᒪᖔᑦ ᐃᖅᑲᓇᐃᔭᖅᑎᓄᑦ ᐋᓐᓂᖅᑐᓄᑦ ᓇᓪᓕᐅᒃᑯᒫᖅᑖᕈᓐᓇᕐᒪᖔᑦ ᓄᓇᕗᒻᒥ ᒐᕙᒪᒃᑯᓐᓂ ᐋᓐᓂᓚᐅᕐᒪᑦ ᐊᖏᕐᕋᒧᑦ ᐱᓱᒃᖢᓂ ᐃᖅᑲᓇᐃᔭᕐᕕᖓᓂ.
ᐊᒃᓱᕈᕐᓇᕋᓗᐊᖅᑎᓪᓗᒍ, ᕘ ᐅᖃᓚᐅᖅᐳᖅ ᐸᓯᒃᖠᙱᑦᑐᖅ ᒪᒃᑯᒃᑐᒥ ᐊᖁᑎᐅᔪᒥ ᓄᓇᓕᒡᓘᓐᓃᑦ.
“ᓂᙵᐅᒪᙱᑦᑐᖓ ᒪᒃᑯᒃᑐᒧᑦ ᐊᖁᓚᐅᖅᑐᒥ ᑎᓴᒪᓕᖕᒥ,” ᐅᖃᓚᐅᖅᐳᖅ, ᐃᓚᒋᐊᖅᓯᓪᓗᓂ ᒪᒃᑯᒃᑐᖅ ᐊᖁᑎ ᑭᖑᓂᐊᒍᑦ ᐋᓐᓂᐊᕕᓕᐊᓚᐅᖅᐳᖅ ᐊᓈᓇᖓᓗ ᐊᒻᒪ ᕿᒪᐃᓪᓗᓂ ᒪᒥᐊᑦᑐᒥ ᑎᑎᖅᑲᒥᒃ.
“ᓂᙵᐅᒪᙱᑦᑐᖓ ᓄᓇᓕᐅᔪᒥᑦ ᐊᒻᒪ ᐊᑭᕋᖅᑐᕐᓂᖃᙱᑦᑐᖓ. ᐊᑭᕋᖅᑐᖅᐸᙱᓚᖓ,” ᐅᖃᓚᐅᖅᐳᖅ.
ᕘ ᐅᖃᓚᐅᖅᐳᖅ ᐅᑎᓛᕈᒪᕗᖅ ᐅᖅᓱᖅᑑᒧᑦ ᒪᒥᓵᓂᒃᑯᓂ ᐊᒻᒪ ᐸᕐᓇᒃᐳᖅ ᐱᒋᐊᕐᓂᖓᓂ ᐃᓗᐊᖅᓴᐃᔨᙳᕐᓂᖓᓂ ᐃᓕᓐᓂᐊᕐᓂᕐᒥ ᓯᑎᐱᕆᒥ.
(0) Comments