ᒪᓕᒐᓕᕆᔨᒃᑯᑦ ᒥᓂᔅᑕᖓᓂ ᒥᓂᔅᑕᐃᑦ ᑲᑎᒪᔨᖏᑦ ᐋᖅᑭᒃᓱᖅᑕᐅᒃᑲᓐᓂᓚᐅᖅᑎᓪᓗᒋᑦ

For the English version of this story, please see Nutarak is Nunavut’s justice minister after cabinet shuffle.

ᓄᑖᖑᔪᒥ ᓂᕈᐊᖅᑕᐅᔪᒥ  ᒥᓂᔅᑕᐃᑦ ᑲᑎᒪᔨᖏᑦᑕ ᐃᓚᒋᔭᐅᓂᖓᓂ ᑐᓄᓂᕐᒧᑦ ᒪᓕᒐᓕᐅᖅᑎ ᑭᐊᕆᓐ ᓄᑕᕋᖅ ᑎᒃᑯᐊᖅᑕᐅᓯᒪᕗᖅ ᐱᓕᕆᐊᖑᓂᐅᔪᒥ ᒪᓕᒐᓕᕆᔨᒃᑯᑦ ᒥᓂᔅᑕᖓᓄᑦ.

ᓯᕗᓕᖅᑎ P.J. ᐊᕿᐊᕈᖅ ᐅᖃᐅᓯᖃᓚᐅᖅᐳᖅ ᑎᒃᑯᐊᖅᓯᓂᐅᔪᒥ ᐃᓚᖃᖅᑐᒥᓪᓗ ᒥᓂᔅᑕᐃᑦ ᑲᑎᒪᔨᖏᑦᑕ ᐋᖅᑭᒃᓱᖅᑕᐅᒃᑲᓐᓂᐅᔪᓂ, ᒫᔾᔨ 14−ᒥ ᑐᓴᒐᒃᓴᓕᐊᖑᔪᒥ.

“ᐱᓪᓚᕆᐅᔪᒥ ᑎᑭᐅᑎᓯᒪᕗᒍᑦ ᐱᓕᕆᐊᒃᓴᑦᑎᓐᓂ, ᐅᓄᙱᓐᓂᖅᓴᐅᔪᒥ ᐊᕐᕌᒍᓂ ᒪᕐᕉᖕᓂ ᑎᑭᐅᑎᓂᕐᒧᑦ ᐱᔭᕆᑐᔪᓂ ᑐᕌᒐᒃᓴᑦᑎᓐᓂ,” ᐅᖃᓚᐅᖅᐳᖅ.

“ᓇᓗᓇᐃᖅᓯᔪᒪᕗᖓ ᑲᑎᔾᔭᑦᑎᓐᓂ ᐆᒻᒪᕆᖕᓂᕗᑦ ᒥᓂᔅᑕᐃᑦ ᑲᑎᒪᔨᐅᓪᓗᑕ ᑕᐅᑐᒃᑕᑯᐊᖃᑲᐃᓐᓇᕐᓂᖓᓂ ᐱᓕᕆᐊᒃᓴᑦᑎᓐᓂ ᓯᕗᓪᓕᐅᖁᔭᐅᓂᐅᔪᓂ ᐊᒻᒪ ᐱᓕᕆᐊᒃᓴᓂ ᓱᓕ ᐱᓕᕆᔭᕆᐊᖃᖅᑐᓂ.”

ᐊᕿᐊᕈᖅ ᐅᖃᓚᐅᖅᐳᖅ ᓄᑖᖑᔪᑦ ᐱᓕᕆᐊᒃᓴᐅᔪᑦ ᐊᑐᓕᑲᐅᑎᒋᓂᐊᖅᐳᑦ ᐃᕐᙲᓐᓇᑲᐅᑎᒋᒥ.

ᓄᑕᕋᖅ ᓂᕈᐊᖅᑕᐅᓚᐅᖅᐳᖅ ᒥᓂᔅᑕᐃᑦ ᑲᑎᒪᔨᖏᓐᓄᑦ ᒫᔾᔨ 4−ᒥ ᐊᒻᒪ ᐊᖏᖅᑎᑕᐅᓪᓗᓂ ᒫᔾᔨ 6−ᒥ.

ᒪᓕᒐᓕᕆᔨᒃᑯᓐᓂᓪᓗ, ᓄᑕᕋᖅ ᒥᓂᔅᑕᐅᒋᕗᖅ ᑲᒪᒋᔭᖃᖅᑐᒥ ᓄᓇᕗᒻᒥ ᐅᑭᐅᖅᑕᖅᑐᒥ ᓯᓚᑦᑐᖅᓴᕐᕕᖕᒥ, ᒥᓂᔅᑕ ᑲᒪᒋᔭᖃᖅᑐᒥ ᐃᖅᑲᓇᐃᔭᖅᕝᓂᕐᒧᑦ ᐊᒻᒪ ᒥᓂᔅᑕ ᑲᒪᒋᔭᖃᖅᑐᒥ ᓄᓇᕗᒻᒥ ᐃᓄᖕᓄᑦ ᐱᔪᓐᓇᕐᓂᕆᔭᖓᓂ ᑲᑎᒪᔨᐅᔪᓄᑦ.

ᓄᑕᕋᖅ ᐅᖃᐅᔾᔨᓚᐅᖅᐳᖅ ᓄᓇᑦᓯᐊᖅ ᑐᓴᒐᒃᓴᓕᕆᔨᒃᑯᓐᓂ ᖁᕕᐊᓐᓂᖓᓂ ᑎᓕᔭᐅᔪᒥ ᐱᓕᕆᐊᒃᓴᖏᓐᓂ.

“ᑐᑭᓯᒋᐊᖅᑎᑕᐅᓯᒪᕗᖓ ᓄᑖᖑᔪᓂ ᐱᓕᕆᕝᕕᐅᔪᓄᑦ, ᐊᒻᒪ ᖁᕕᐊᑉᐳᖓ ᐹᖅᓯᓂᐊᕐᓂᓐᓂ ᐱᓕᕆᔨᕐᔪᐊᖑᔪᓂ ᐊᒻᒪ ᑐᑭᓯᐅᒪᑦᑎᐊᒃᑲᓐᓂᕐᓂᕐᒥ ᓯᕗᓪᓕᐅᔾᔭᐅᖁᔭᐅᔪᓂ ᐊᒻᒪ ᐊᑲᐅᙱᓕᐅᕈᑕᐅᔪᓂ ᓵᙵᔭᖏᓐᓂ,” ᐅᖃᓚᐅᖅᐳᖅ.

ᓄᑕᕋᖅ ᐱᓗᐊᖅᑐᒥ ᐅᖃᐅᓯᖃᓚᐅᖅᐳᖅ ᑕᐅᑐᒃᑕᑐᐊᖃᑲᐃᓐᓇᕐᓂᕐᒥ ᐱᐅᓯᒋᐊᖅᑎᑦᑎᓂᕐᒥ ᐊᒻᒪ ᓄᑖᙳᕆᐊᖅᑎᑦᑎᓂᕐᒥ ᐃᓚᒌᓄᑦ ᐋᓐᓂᖅᓯᕆᓂᐅᔪᒥ ᓄᖅᑲᖅᑎᑦᑎᓂᕐᒥ ᒪᓕᒐᐅᔪᒥ. ᐅᖃᐅᓯᖃᓚᐅᕆᕗᖅ ᐱᓕᕆᖃᑎᖃᕐᓂᕐᒥ ᑲᓇᑕᒥ ᐸᓖᓯᒃᑯᓐᓂ ᐱᐅᓯᒋᐊᖅᑎᑦᑎᓂᕐᒧᑦ ᓄᓇᓕᖕᓂ ᐊᑦᑕᓇᔾᔭᐃᖅᓯᓯᒪᓂᕐᒥ ᐊᒻᒪ ᓴᖅᑭᑎᑦᑎᓂᕐᒥ ᐊᓪᓚᓄᑦ ᐊᒻᒪ ᐃᓄᖕᓂ ᐸᓖᓯᙳᖅᑎᑦᑎᓂᐅᔪᒥ ᐱᓕᕆᐊᖑᔪᒥ.

ᐅᖃᓚᐅᕆᕗᖅ ᐊᖏᒡᓕᒋᐊᖅᑎᑦᑎᔪᒪᓂᖓᓂ ᓄᓇᕗᒻᒥ ᐅᑭᐅᖅᑕᖅᑐᒥ ᓯᓚᑦᑐᖅᓴᕐᕕᖕᒥ ᐱᓕᕆᐊᖑᓂᐅᔪᓂ ᐃᑲᔪᕐᓂᐊᖅᑐᒥ ᑐᓂᓯᓂᕐᒥ ᐃᓄᖕᓂ ᐅᓄᕐᓂᖅᓴᐅᔪᓂ ᐃᖅᑲᓇᐃᔮᕆᔭᐅᔪᒪᔪᓂ ᐱᕕᒃᓴᖃᕐᓂᐅᔪᓂ ᐋᓐᓂᐊᖃᕐᓇᙱᑦᑐᓕᕆᓂᕐᒥ ᐸᖅᑭᓂᐅᔪᒥ, ᐃᓱᒪᒧᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐸᖅᑭᓂᐅᔪᒥ, ᐊᒻᒪ ᐅᐃᕆᓯᒪᓂᕐᒧᑦ ᐃᓅᓕᓴᐃᓂᕐᒧᑦ.

ᑕᐃᕕᑦ ᐊᕿᐊᕈᖅ, ᒪᓕᒐᓕᕆᔨᒃᑯᑦ ᒥᓂᔅᑕᕆᓚᐅᖅᑕᖓ, ᒫᓐᓇ ᒥᓂᔅᑕᐅᕗᖅ ᐃᖅᑲᓇᐃᔭᖅᑐᓕᕆᔨᒃᑯᓐᓂ.

ᑖᓂᐅᓪ ᖃᕝᕕᒃ ᐱᓕᕆᓂᐊᖅᐳᖅ ᐱᓕᕆᓂᐅᔪᒥ ᒥᓂᔅᑕᒧᑦ ᐃᓕᖅᑯᓯᓕᕆᔨᒃᑯᓐᓄᑦ.

ᓯᕗᓕᖅᑎ ᐊᕿᐊᕈᖅ ᐅᖃᐅᓯᖃᓚᐅᖅᐳᖅᑕᐅᖅ ᐃᓚᒋᐊᖅᓯᓯᒪᓂᖓᓂ ᒥᓂᔅᑕᒥ ᑲᒪᒋᔭᖃᖅᑐᒥ ᐃᓄᑐᖃᕐᓄᑦ ᓇᖕᒥᓂᖅ ᑲᒪᒋᔭᕆᐊᖃᖅᑕᖏᓐᓄᑦ.