ᓂᕿᑦᑐᑎᐊᕙᓕᕆᔨᒃᑯᑦ ᐅᑭᐅᕐᑕᖅᑐᕐᒥ ᑲᑎᒪᔨᖏᓐᓄᑦ ᐃᓚᒋᔭᐅᔪᖅ ᓄᖅᑲᖅᑐᑦ ᐸᓛᔅᑕᐃᓐ ᐱᔾᔪᑎᒋᓪᓗᒍ

For the English version of this story, please see Nutrition North advisory board member resigns over Palestine.

ᓄᓇᕗᒥᑦ ᓂᕿᑦᑎᐊᕙᖃᖅᑎᑦᑎᓂᕐᒥᒃ ᐃᑲᔪᖅᑎ ᐱᐊᑦ ᑰᑦᑎᖅ ᓄᖃᖅᑐᖅ ᐱᓕᕆᐊᖓᓂ ᓂᕿᑦᑎᐊᕙᓕᕆᓂᕐᒥᒃ ᐅᑭᐅᕐᑕᖅᑐᕐᒥ ᑲᑎᒪᔨᓂᒃ ᓈᒻᒪᒃᓴᙱᖢᓂ ᑲᓇᑕᒥ ᒐᕙᒪᒃᑯᑦ ᐃᑲᔪᖅᑐᐃᓯᒪᓂᖏᓐᓂᒃ ᐃᔅᕋᐃᓕᐅᑉ ᐅᓇᑕᖅᑐᒃᓴᖏᓐᓂᒃ ᐅᐸᒍᑎᓯᒪᔪᓂᒃ ᒑᔭᒧᑦ.

“ᐊᔪᕋᒪ, ᐃᓱᒪᔪᓐᓇᑦᑎᐊᖅᖢᖓ, ᐱᓕᕆᐊᖃᕆᐊᒃᓴᖅ ᒐᕙᒪᒃᑯᓐᓄᑦ ᐃᑲᔪᖅᑐᐃᔪᓂᒃ ᑐᖁᕋᐃᑐᐃᓐᓇᖅᑐᓂ ᐹᓕᔅᑎᓂᐊᓐᒥᐅᑕᓂᒃ ᑕᒪᐅᓇᑦᑕᐃᓐᓇᕐᓗ ᖃᓄᐃᓕᐅᕈᑎᒃᓴᓕᕆᓪᓗᑎᒃ ᐊᒻᒪᓗ ᐊᑐᖅᑐᓂᒃ ᓄᓇᖃᖅᑳᖅᑐᓄᑦ ᐊᑐᖅᑕᐅᓚᐅᕐᓯᒪᔪᓂᒃ,” ᑰᑦᑎᖅ ᑎᑎᕋᓚᐅᕐᑐᖅ ᓄᖅᑲᖅᑎᓪᓗᒍ ᑎᑎᕋᖅᑕᖏᓐᓂᒃ ᓄᓇᑦᓯᐊᕐᒥᑦ ᐱᕙᓪᓕᐊᔪᓄᑦ ᑐᓴᖅᑎᔾᔪᑎᒋᔭᐅᖅᑕᖏᓐᓂᒃ ᑎᓯᐱᕆ 8-ᖑᑎᓪᓗᒍ.

ᑰᑦᑎᖅ ᓗᐊᐃᔭᐅᔪᖅ ᐃᖃᓗᖕᓂ ᐊᒻᒪ ᑲᑎᒪᔨᐅᖃᑕᐅᓪᓗᓂ ᓄᓇᓕᖕᓂ ᖃᑐᖅᑐᕐᕕᒃᒧᑦ. ᑎᒃᑯᐊᖅᑕᐅᓚᐅᕐᓯᒪᖕᒪᑦ ᓂᕿᑦᑎᐊᕙᓕᕆᔨᒃᑯᓐᓄᑦ ᐅᑭᐅᕐᑕᖅᑐᕐᒥ ᑲᑎᒪᔨᓄᑦ ᔪᓚᐃ 2021-ᖑᑎᓪᓗᒍ.

ᓂᕿᑦᑎᐊᕙᓕᕆᔨᒃᑯᑦ ᐅᑭᐅᕐᑕᖅᑐᕐᒥ ᐱᓕᕆᐊᕆᔭᐅᔪᖅ ᓂᕿᓄᑦ ᐊᑭᒃᖠᒋᐊᕈᑎᐅᕙᒃᖢᓂ ᐊᒻᒪ ᓂᕿᑦᑎᐊᕙᓕᕆᓂᕐᒥᒃ ᐃᓕᓐᓂᐊᖅᑎᑦᑎᕙᒃᖢᑎᒃ. ᑲᑎᒪᔨᖏᑦ ᐊᑐᐊᒐᓕᐅᖅᑎᐅᕙᙱᑦᑐᑦ. ᑕᖅᑭᖅ ᐊᑕᐅᓯᖅᖢᒍ ᑲᑎᒪᕙᒃᑐᑦ ᖃᓄᐃᓕᐅᕈᑎᓂ ᖃᐅᔨᓇᓱᒃᖢᑎᒃ ᐊᒻᒪ ᖃᓄᖅ ᐱᐅᓯᕚᓪᓕᖅᑎᑦᑎᔪᓐᓇᕐᒪᖔᑕ ᓂᕿᓕᕆᓂᕐᒥᒃ ᐅᑭᐅᕐᑕᖅᑐᕐᒥ.

ᑎᑎᕋᕐᑕᖏᓐᓂᒃ ᑐᕌᖓᔪᒥᒃ ᐅᑭᐅᕐᑕᖅᑐᕐᓕᕆᓂᕐᒧᑦ ᒥᓂᔅᑕᒧᑦ ᑖᓂᐅᓪ ᕚᓐᑐᓪᒧᑦ, ᑰᑦᑎᖅ ᓇᓗᓇᐃᕐᓯᓚᐅᕐᑐᖅ ᓈᒻᒪᒃᓴᙱᓐᓂᕐᒥᓂ ᑲᓇᑕ ᐃᑲᔪᖅᑐᐃᓂᖓᓂᒃ ᐅᓇᑕᖅᑐᒃᓴᓂᒃ ᐃᔅᕋᐃᓕᒥᑦ ᐊᕐᕌᒎᓕᖅᑐᓂᒃ 75 ᐅᖓᑖᓂ ᐊᒻᒪᓗ ᒫᓐᓇ ᒐᕙᒪᒃᑯᑦ “ᐃᑲᔪᖅᑐᐃᓂᖏᓐᓂᒃ ᑐᖁᕋᐃᑐᐃᓐᓇᖅᑐᓂᒃ 16,000 ᐅᖓᑖᓃᑦᑐᓂᒃ ᖃᓄᐃᓕᐅᙱᑦᑐᓂᒃ ᐸᓕᔅᑕᐃᓐᒥ.”

“ᓄᓇᖃᕋᓱᖕᓂᕐᒧᑦ ᐱᑦᑎᐊᙱᔾᔪᑎᐊᓗᒃ ᑕᑯᔭᕗᑦ ᐹᓚᔅᑕᐃᓐᒥ ᐊᒃᑐᐊᓂᖃᕐᒪᑦ ᓄᓇᑖᕋᓱᓚᐅᕐᓯᒪᔪᓂᒃ ᐱᑦᑎᐊᙱᓐᓂᐊᓗᑯᑦ ᑲᓇᑕᒥ ᐃᒻᒪᑲᓪᓚᒃ ᓄᓇᖃᖅᑳᖅᑐᓂᒃ.” ᑎᑎᕋᕐᓯᒪᔪᖅ, ᐅᖃᐅᓯᖃᖅᖢᓂ ᐃᒡᕋᐃᓕᐅᑉ ᐅᓇᑕᖅᑐᒃᓴᖏᓐᓂᒃ’ ᐊᒻᒪ ᐃᓄᖕᓂ ᐅᐸᒃᑎᑦᑎᑦᑕᐃᓕᓪᓗᑎᒃ ᓂᕿᖃᖅᑎᑦᑎᓇᓱᒃᑐᓂᒃ, ᐃᒪᕐᓂ ᐊᒻᒪᓗ ᐋᓐᓂᐊᖅᑐᓄᑦ ᐃᓅᓕᓴᐅᑎᒃᓴᓂᒃ ᐅᕗᙵᕋᓱᒃᑐᓂᒃ ᒑᔭᒧᑦ.

“ᑕᐃᒪᓐᓇᑦᑕᐃᓐᓇᖅ ᐊᑐᓚᐅᕐᓯᒪᖕᒪᑕ ᑲᓇᑕᒥ ᓄᓇᖃᖅᑳᖅᑐᓂ ᐃᓂᖃᕈᓐᓃᖅᑎᑦᑎᓇᓱᒃᖢᓂ ᓄᓇᒥ, ᑮᓇᐅᔭᓕᐅᕈᑎᒃᓴᓂ ᐱᓇᓱᐊᖅᑎᑦᑎᓪᓗᑎᒃ ᐊᒻᒪᓗ ᓄᓇᖃᖅᑳᖅᑐᓂᒃ ᐱᐅᒋᔭᐅᙱᔾᔪᑎᒃᓴᓂ ᓴᖅᑭᑎᑦᑎᑲᑕᒃᖢᑎᒃ ᑖᒃᑯᐊᓗ ᓂᐱᖏᓐᓂᒃ ᐊᑐᖅᑎᑦᑎᑦᑕᐃᓕᓪᓗᑎᒃ.”

ᐊᐱᕐᓱᖅᑕᐅᑎᓪᓗᒍ ᑎᓯᐱᕆ 11-ᒥ ᑰᑦᑎᖅ ᐅᖃᓚᐅᕐᑐᖅ ᒑᔭᒥ ᐅᓇᑕᕐᓂᐅᔪᖅ ᓄᖅᑲᕈᑎᒋᓗᐊᒪᐅᕐᓂᖓᓂ, ᐃᓱᒪᓯᒪᔪᕐᓕ ᐅᐱᕐᖔᓂ ᓄᖅᑲᕈᒪᓕᓚᐅᕐᓂᖓᓂᒃ.

“ᐃᓱᒪᓕᓚᐅᕋᒪ ᑲᑎᒪᔩᑦ ᐱᓕᕆᐊᖏᑦ ᑕᐃᒪᓐᓇ ᐊᑐᖅᑕᐅᔾᔮᕋᓱᒋᓚᐅᕐᓯᒪᙱᓐᓇᒃᑭᑦ ᐃᓚᐅᓕᓵᖅᑎᓪᓗᖓ,” ᐅᖃᕐᑐᖅ, ᐅᖃᒃᑲᓐᓂᖅᖢᓂ ᑲᑎᒪᔩᑦ ᐱᓕᕆᐊᖏᑦ ᐊᒃᑐᐃᓂᖃᓗᐊᙱᓐᓇᓱᒋᓪᓗᓂᒋᑦ ᐱᓕᕆᐊᒧᑦ.

ᑎᑎᕋᕐᑕᖏᓐᓂᒃ ᑰᑦᑎᖅ ᐅᖃᐅᓯᖃᓚᐅᕐᒥᔪᖅ ᐊᖑᓇᓱᒃᐸᒃᑐᑦ ᐃᑲᔫᑎᑖᕆᕙᒃᑕᖏ ᓄᖅᑲᖅᑎᑕᐅᓯᒪᓕᕐᓂᖏᓐᓂᒃ ᑖᓐᓇᑦᑕᐅᖅ ᐃᓱᒪᒋᓪᓗᓂᐅᒃᑕᐅᖅ ᓄᖅᑲᓚᐅᕐᒥᔪᖅ.

“ᖃᐅᔨᓪᓗᓂ ᐃᑲᔫᑎᒃᓴᑦ ᑭᐱᔭᐅᓂᐊᕐᓂᖏᓐᓂᒃ 80 ᐳᓴᓐᑎᒥ ᐊᒻᒪᓗ ᒫᓐᓇ ᒐᕙᒪᐅᔪᑦ ᐃᑲᔪᖅᑐᐃᓪᓗᑎᒃ ᑐᖁᕋᐃᔪᓂᒃ ᐹᓕᔅᑕᐃᓐᒥ, ᑕᐃᒪᓕ ᑕᐃᒪᓐᓇ ᑕᐅᑐᑐᐃᓐᓇᕋᒃᑯ ᓄᓇᖃᖅᑳᖅᑐᓂ ᓄᖒᑦᑎᓇᓱᓚᐅᕐᓯᒪᓂᖏᓐᓂᒃ ᑲᓇᑕᒥ ᐊᒻᒪᓗ ᑐᖁᕋᐃᓐᓇᓱᒃᑐᓂᒃ ᒫᓐᓇ. ᑕᐃᒪᓕ ᐃᓱᒪᓐᓇᑐᐃᓐᓇᖅᑐᖅ ᐊᒃᑐᐊᖃᑦᑕᐅᑎᓂᖏᓐᓂᒃ,” ᐅᖃᕐᑐᖅ.

“ᐊᒻᒪᓗ ᐋᖅᑭᒋᐊᒃᑲᓐᓂᕈᑎᒃᓴᓂᒃ ᐅᖃᐅᓯᖃᖅᖢᑎᒃ ᐃᓚᐅᓪᓗᑎᒃ ᑐᖁᕋᐃᕙᓪᓕᐊᔪᓂᒃ. ᐃᓱᒪᒐᒪᓕ ᐅᓇ ᒪᓕᒐᓕᕆᓂᕐᒥ ᐱᙳᐊᕈᑎᐅᓂᖓᓂᒃ. ᐊᐃᑦᑖᓘᒐᓗᐊᖅ ᐊᒻᒪᓗ ᐃᓱᒪᓪᓗᖓ ᑲᔪᓯᔪᓐᓇᙱᓐᓂᓐᓂ ᐱᓕᕆᐊᖃᕐᓂᕐᒥᒃ ᐅᖃᐅᓯᕆᓚᐅᕐᓇᒍ.”

ᐊᖑᓇᓱᒃᐸᒃᑐᓄᑦ ᐃᑲᔫᑎᒃᓴᖅ ᐃᑲᔫᑎᐅᕙᖕᒪᑦ ᐅᕘᓇ ᓂᕿᑦᑎᐊᕙᓕᕆᔨᒃᑯᓐᓂᒃ ᐅᑭᐅᕐᑕᖅᑐᕐᒥ. ᐋᖅᑭᒃᑕᐅᓯᒪᔪᖅ ᐅᑭᐅᕐᑕᖅᑐᕐᒥᐅᑕᐃᑦ ᓂᕿᒋᕙᒃᑕᖏᓐᓂᒃ ᐱᔪᓐᓇᕐᓂᕐᓴᐅᑎᑕᐅᓇᓱᒃᖢᑎᒃ ᒪᐅᓇ ᐊᖑᓇᓱᖃᑦᑕᕐᓂᒃᑯᑦ, ᓂᕿᓕᕆᓂᒃᑯᑦ ᐊᒻᒪ ᓂᕿᖃᖅᑎᑦᑎᓂᕐᒧᑦ.

ᑮᓇᐅᔭᓂ ᐊᑭᓖᕙᒃᑐᑦ ᐊᑐᓂ ᓄᓇᓕᖕᓄᑦ ᐊᒻᒪ ᓄᓇᖃᖅᑳᖅᑐᑦ ᑲᑐᔾᔨᖃᑎᒌᓄᑦ. ᓄᓇᕗᑦ ᑐᙵᕕᒃ ᑐᓂᔭᐅᓚᐅᕐᓯᒪᖕᒪᑕ $28.8 ᒥᓕᐊᓐ ᑖᓚᓂ ᐃᑲᔫᑎᒃᓴᓂᒃ ᐃᓱᖃᓂᐊᖅᖢᓂ ᒫᔅᓯ 2024-ᒥ.

ᐅᖃᓪᓚᒃᖢᓂ ᓄᓇᑦᓯᐊᕐᒥ ᐱᕙᓪᓕᐊᒧᓄᑦ, ᕚᓐᑐᓪ ᑎᑎᕋᖅᑎᖓ ᑲᐃᐅᓪ ᐋᓚᓐ ᐅᖃᓚᐅᕐᑐᖅ; “ᓱᖅᑯᐃᓇᓚᐅᖅᑕ: ᓄᖃᖅᑎᑦᑎᓯᒪᙱᑦᑐᒍᑦ ᐃᑲᔫᑎᒃᓴᓂᒃ ᐊᖑᓇᓱᒃᐸᒃᑐᓄᑦ 80 ᐳᓴᓐᑎᖓᓂᒃ.”

ᐅᖃᓚᐅᕐᑐᖅ ᒐᕙᒪᑐᖃᒃᑯᑦ ᐊᕐᕌᒍᓂ ᐱᖓᓱᓂᒃ ᐃᑲᔫᑎᒃᓴᓂ ᐅᓄᕐᓯᕚᓪᓕᖅᑎᑦᑎᓚᐅᕐᓂᖏᓐᓂᒃ ᐊᖑᓇᓱᒃᑎᓄᑦ ᐃᑲᔫᑎᒃᓴᓂᒃ. ᐅᓇ ᐊᖏᕈᑎ ᐃᓱᓕᕝᕕᒃᓴᖃᖅᑐᖅ 2024-ᒥ, ᑭᓯᐊᓂᓕ ᐅᑭᐅᕐᑕᖅᑐᕐᒥᐅᑕᓕᕆᔩᑦ ᓄᑖᒥ ᑐᒃᓯᕋᐅᓯᐅᕋᓱᒃᑐᑦ ᐃᑲᔫᑎᒃᓴᓂᒃ.

ᑰᑦᑎᖅ ᐅᖃᓚᐅᕐᑐᖅ ᑐᓴᓚᐅᙱᓐᓂᕋᖅᖢᓂ ᕚᓐᑐᓪ ᑎᑎᕋᕐᕕᖓᓂ ᑕᐃᒪᙵᑦ ᓄᖃᓚᐅᖅᑎᓪᓗᒍ, ᑭᓯᐊᓂᓕ ᐅᖃᓚᐅᕐᑐᖅ ᐃᑲᔪᖅᑐᖅᑕᐅᓯᒪᓂᕋᖅᖢᓂ ᐊᓯᖏᓐᓂᒃ ᑲᑎᒪᔨᓄᑦ ᑕᒪᓐᓇᓗ “ᐃᑲᔫᕈᑎᐅᓪᓗᓂ.”

“ᓄᓇᕗᒻᒥᐅᑕᓂ ᓈᒻᒪᒃᓴᙱᑦᑐᓂᒃ ᑕᑯᔭᖏᓐᓂᒃ ᐅᖃᐅᓯᖃᖃᑦᑕᕆᐊᖃᕐᑐᑦ ᑲᑉᐱᐊᓱᙱᓪᓗᑎᒃ, ᐊᒻᒪᓗ ᐃᑲᔪᖅᑐᖅᑕᐅᔪᓐᓇᖅᑐᓯ ᐅᖃᑐᐃᓐᓇᕈᒪᓐᓂᕈᔅᓯ,” ᐅᖃᕐᑐᖅ.

ᐋᓚᓐ ᐅᖃᓚᐅᕐᑐᖅ ᓄᓇᑦᓯᐊᕐᒥ ᐱᕙᓪᓕᐊᔪᓂᒃ ᕚᓐᑐᓪ ᖁᔭᓕᓚᐅᕐᓂᕋᖅᖢᓂᐅᒃ ᑰᑦᑎᕐᒥ ᐱᔨᑦᑎᕋᑲᑕᓚᐅᕐᓂᖓᓂᒃ ᓂᕿᑦᑎᐊᕙᓕᕆᔨᒃᑯᓐᓂᒃ ᐅᑭᐅᕐᑕᖅᑐᕐᒥ ᑲᑎᒪᔨᓄᑦ ᐊᒻᒪᓗ “ᓄᖅᑲᕈᓐᓇᕋᓂ ᐃᑲᔪᕋᓱᖕᓂᖓᒍᑦ” ᐃᓄᖕᓂ ᓄᓇᕗᒥᑦ.

“ᐱᓕᕆᐊᕆᓂᐊᖅᑕᖓᓂᒃ ᖃᓄᐃᖁᓇᓂᐅᒃ ᓯᕗᓂᒃᓴᑦᑎᓐᓂᒃ,” ᐋᓚᓐ ᑎᑎᕋᓚᐅᕐᑐᖅ ᖃᕋᓴᐅᔭᒃᑯᑦ.

ᑕᐃᒪᐃᑎᓪᓗᒋᓪᓕ ᐅᓇ ᑲᓇᑕᐅᑉ ᐊᖓᔪᖅᑳᒻᒪᕆᖓ ᔭᔅᑎᓐ ᑐᕉᑑ ᒑᔭᐅᑉ ᒥᒃᓵᓄᑦ ᐊᓯᙳᖅᐸᓪᓕᐊᓕᕐᑐᖅ.

ᑐᕉᑑ ᐅᖃᓚᐅᕐᑐᖅ ᐃᔅᕆᐅᓪ “ᐃᓱᒪᒋᔭᖃᑦᑎᐊᕆᐊᖃᕐᓂᖓᓂ ᓄᓇᕐᔪᐊᒥ ᐆᒪᔪᑦ ᒪᓕᒐᖓᓂ” ᑎᓯᐱᕆ 12-ᒥ ᐅᑯᓂᖓ ᐊᖓᔪᖅᑳᓂ ᐊᔅᑐᕇᓕᐊᒧᑦ ᐊᒻᒪ ᓂᐅ ᔩᓚᓐᒧᑦ ᐱᖃᑎᒋᓪᓗᓂᒋᑦ.

ᐅᖃᓚᐅᕐᒥᔪᑦ ᐃᑲᔪᖅᑐᐃᓂᖏᓐᓂᒃ “ᑐᐊᕕᕐᓇᖅᑐᓂᒃ ᓄᓇᕐᔪᐊᒥ ᓄᖃᖅᑎᑦᑎᓇᓱᒃᑐᓂᒃ ᐅᓇᑕᖅᑐᓂᒃ” ᐊᒻᒪᓗ ᕼᐋᒪᔅᒥ ᓵᓚᖃᕋᓱᖕᓂᒃ “ᑲᔪᓯᔾᔪᑎᐅᔭᕆᐊᖃᙱᓐᓂᖓᓂᒃ ᐹᓕᔅᑏᓂᐊᓐ ᐃᓄᖏᓐᓂᒃ.”

“ᐅᓇ ᐃᓚᐃᓐᓇᕐᓯᐅᑕᐅᔭᕆᐊᖃᙱᒻᒪᑦ,” ᐅᖃᐅᓯᐅᔪᑦ ᐅᖃᕐᓯᒪᔪᑦ.

“ᕼᐋᒪᔅ ᑎᒍᓯᒪᔭᖏᓐᓂᒃ ᑎᒍᓯᓯᒪᔭᕆᐊᖃᕈᓐᓃᖅᑐᑦ ᐊᑐᕆᐊᖃᙱᑦᑐᑦ ᐹᓕᔅᑏᓂᐊᓐᓂ ᓴᐴᓕᑕᖃᕋᓱᖕᓂᕐᒥᒃ ᐊᒻᒪᓗ ᐅᓇᑕᕈᓐᓃᕐᓗᑎᒃ.”