ᐃᒃᓴᕐᕕᓕᕆᔨᐅᔪᑦ ᐱᓕᕆᐊᖏᓐᓂ ᑕᐅᕐᓰᖃᑦᑕᖅᑐᑦ ᑐᐊᕕᕐᓇᖅᑐᓕᕆᓂᕐᒧᑦ
ᕿᑎᕐᒥᐅᑦ ᐱᖓᖕᓇᖓᓂ ᐃᑲᔫᑎᓕᕆᓂᕐᒧᑦ ᑯᐊᐳᕇᓴᓐᑯᑦ, ᕿᑭᖅᑖᓗᒃ AEDC ᐊᒻᒪ ᓯᑯᑭ ᐊᑎᓕᐅᓚᐅᕐᒪᑕ ᑐᑭᓯᖃᑦᑕᐅᑎᓯᒪᓂᕐᒥ ᑐᓴᐅᒪᑎᑦᑎᖃᑦᑕᐅᑎᓂᐊᕐᓂᕐᒥᒃ
ᐳᕆᐊᓐᑕᓐ ᐱᐊᓪ, ᐊᐅᓚᑦᑎᔨ ᐊᖓᔪᖅᑳᖅ ᕿᑎᕐᒥᐅᑦ ᐱᖓᖕᓇᖓᓂ ᐅᖃᓪᓚᒃᑐᖅ ᓄᓇᕗᒥᑦ ᐃᖅᑲᓇᐃᔮᓂ ᕿᒥᕐᕈᐊᕐᓇᒥ 2024-ᖑᑎᓪᓗᒍ. ᑲᒻᐸᓂᕆᔭᖓ ᐊᒻᒪᓗ ᐅᑯᐊ ᕿᑭᖅᑖᓗᒃ AEDC-ᑯᑦ ᐊᑎᓕᐅᓚᐅᕐᒪᑕ ᑐᑭᓯᖃᑦᑕᐅᑎᓯᒪᓂᕐᒥ ᐆᒥᖓ ᓯᑯᑭ ᓅᒃ ᑲᖏᖅᖢᖕᒥᑦ A/S. (ᐊᔾᔨᓕᐅᕆᔨ ᔨᐊᕝ ᐱᐊᑦᓯᐄ)
For the English version of this story, please see Nuuk deepsea port companies co-ordinate for better emergency response.
ᐱᖓᓱᑦ ᐃᑎᔪᒥ ᑐᓚᒃᑕᕐᕕᓕᕆᔩᑦ ᓄᓇᕗᒥᑦ ᐊᒻᒪ ᑲᓛᖡᑦ ᓄᓇᖓᓂ ᐊᖏᕈᑎᓂ ᐊᑎᓕᐅᓚᐅᕐᒪᑕ ᑕᐅᕐᓰᖃᑎᒌᖃᑦᑕᕐᓂᐊᕐᓗᑎᒃ ᑐᐊᕕᕐᓇᖅᑐᓕᕆᔪᓐᓇᕐᓂᕐᓴᐅᓂᐊᕐᒪᑕ ᒪᑯᓂᖓ ᐃᒃᑲᓗᐊᖅᑐᒥ ᐊᔪᕐᓯᑦᑐᓂ ᐊᒻᒪ ᑯᕕᔪᖃᕐᓂᕈᓂ ᑕᕆᐅᕐᒧᑦ.
ᕿᑭᖅᑖᓗᒃ AEDC, ᐃᓚᒋᔭᐅᔪᖅ ᕿᑭᖅᑕᕐᔪᐊᖅᒥ ᐃᑎᔪᓂᒃ ᐃᒃᓴᕐᕕᓕᕆᔨᒃᑯᓐᓂ ᐊᒻᒪᓗ ᕿᑎᕐᒥᐅᑦ ᐱᖓᓇᖓᓂ ᐃᑲᔫᑎᓕᕆᓂᕐᒧᑦ ᑯᐊᐳᕇᓴᓐᑯᑦ, ᐃᓚᒋᔭᐅᔪᖅ ᒍᕇᔅ ᐸᐃ ᐊᖅᑯᑎᒧᑦ ᐊᒻᒪ ᐃᑎᔪᒥᑦ ᑐᓚᒃᑕᕐᕕᓕᕆᔨᓄᑦ, ᐅᖃᖃᑎᖃᑲᑕᒃᓯᒪᖕᒪᑕ ᓯᑯᑭ ᓅᒃ ᑲᖏᖅᖢᐊᓂ A/S ᐱᒋᐊᖅᖢᑎᒃ 2020-ᒥ, ᐅᖃᕐᑐᖅ ᕿᑎᕐᒥᐅᑦ ᐱᖓᖕᓇᖓᓂ ᐊᐅᓚᑦᑎᔨ ᐊᖓᔪᖅᑳᒥᑦ ᐳᕆᐊᓐᑕᓐ ᐱᐊᓪᒥ ᐊᐱᖅᓱᖅᑕᐅᑎᓪᓗᒍ ᓯᑎᐱᕆ 1-ᒥ.
“ᑲᓛᖡᑦ ᓄᓇᖓ ᒪᓕᒍᒥᓇᕐᑐᖅ ᖃᓄᐃᓕᐅᕐᑕᖏᓐᓂ,” ᐱᐊᓪ ᐅᖃᕐᑐᖅ ᐅᖃᓘᑎᒃᑯᑦ ᑎᑎᕋᕐᕕᖓ ᑳᒍᕆᒥ. “ᐃᓱᒪᒋᓪᓗᒍ, ᐊᖏᓂᕐᓴᒃᑯᑦ, ᐱᖁᑎᒋᔭᐅᔪᑦ ᐊᒻᒪᓗ ᑐᓚᒃᑕᕐᕕᓕᕆᓂᖓᑦ.”
ᑲᒻᐸᓂᐅᔪᑦ ᐊᑎᓕᐅᓚᐅᕐᒪᑕ ᑐᑭᓯᖃᑦᑕᐅᑎᓯᒪᓂᕐᒥᒃ, ᑖᓐᓇᓗ ᑎᑎᕋᕐᓯᒪᓪᓗᓂ ᑕᒪᐃᓐᓂ ᑐᕌᒐᕆᔪᒪᔭᖏᓐᓂ ᐊᒻᒪ ᐱᒻᒪᕆᐅᒋᔭᖏᓐᓂᒃ ᐆᒧᖓ “ᓴᙱᒃᑎᑉᐹᓪᓕᕋᓱᒃᖢᒋᑦ ᐱᓕᕆᖃᑎᒌᖕᓂᕆᔭᐅᔪᑦ ᑕᕆᐅᕐᒥ ᐱᖁᑎᒋᔭᐅᔪᓄᑦ,” ᐅᖃᕐᓯᒪᓚᐅᕐᑐᖅ ᑐᓴᒐᒃᓴᓕᐊᕆᔭᐅᔪᖅ ᑖᒃᑯᓇᙵᑦ ᐱᓕᕆᕝᕕᖕᓂ, ᑎᑎᕋᖅᑕᐅᓂᑰᓪᓗᓂ ᐋᒐᓯ 31-ᒥ.
ᐅᖃᐅᓯᖃᓪᓚᕆᑲᑕᓕᓚᐅᕐᓯᒪᔪᑦ ᐊᖏᕈᑎᓕᐅᕈᒪᓂᕐᒥᒃ ᐊᕐᕌᒍ ᐊᑕᐅᓯᖅ ᐃᓚᖃᖅᖢᓂ ᑕᖅᑭᓂ 6-ᓂ.
“ᐅᑯᐊ ᑐᓚᒃᑕᕐᕖᑦ ᐃᖕᒥᖕᓄᑦ ᐅᖓᓯᒌᒃᑑᑎᐅᖕᒪᑕ,” ᐱᐊᓪ ᐅᖃᕐᑐᖅ, “ᑭᓯᐊᓂᓕ ᐊᑕᐅᑦᑎᒃᑯᑦ ᐊᒃᑐᐃᓂᕐᓴᐅᔪᓐᓇᕋᔭᕐᒪᑕ. ᐱᓕᕆᕝᕕᒋᔭᐅᔪᖅ ᖁᕝᕙᖅᐹᓪᓕᕋᔭᕐᒪᑕ ᐊᒃᑐᐊᖃᑦᑕᐅᑎᒍᑎᑦ ᐊᒻᒪ ᑕᐅᓰᕈᑎᐅᕙᒡᓗᑎᒃ ᐱᖁᑎᒋᔭᐅᓂᖏᓐᓄᑦ ᐅᑭᐅᕐᑕᖅᑐᕐᒥ.”
ᓲᕐᓗ ᐃᒪᓐᓇ, ᐅᖃᕐᑐᖅ, ᑐᐊᕕᕐᓇᖅᑐᖃᓕᕐᓂᖅᐸᑦ, ᒪᐅᓇ ᐃᒃᑲᑦᑐᒧᑦ ᐊᔪᓯᖅᑐᖃᕐᓂᕈᓂ ᐅᕝᕙᓘᓐᓃᑦ ᑯᕕᔪᖃᕐᓂᖅᐸᑦ ᑕᕆᐅᕐᒧᑦ, ᐅᒥᐊᕐᔪᐊᖅᑕᖄᓂᓕᖅᖢᓂ ᐅᑭᐅᕐᑕᖅᑐᕐᒦᑦᑐᓂᒃ ᐊᒻᒪᓗ ᕿᓚᒥᕈᓗᒃ ᐊᐅᓪᓚᖅᑎᑕᐅᔪᓐᓇᖅᖢᑎᒃ.
ᐱᐊᓪ ᐅᖃᓚᐅᕐᑐᖅ ᐊᑯᓂᐅᓂᕐᓴᖅ ᓯᑯᖃᑦᑕᕈᓐᓃᕐᓂᖓ ᓄᐊᑦ ᐊᒥᐊᓕᑲᐅᑉ ᐅᑭᐅᕐᑕᖅᑐᖓ ᑕᐃᒪᓕ ᐅᒥᐊᕐᔪᐊᕐᓂ ᐱᑕᖃᓐᓂᕐᓴᐅᓇᔭᕐᒪᑦ ᒪᐅᓇ ᓱᓪᓗᐊᓗᒃ ᐅᐊᓕᓂᖅᒥ ᕿᑭᖅᑖᓗᒃᒧ ᑕᕆᐅᒃᑯᑦ ᐊᖅᑯᑎᒃᑯᑦ, ᑕᐃᒪᓐᓇᓗ ᓈᒻᒪᙱᓕᐅᕈᑎᓂ ᓴᖅᑭᑦᑐᖃᒃᑲᓐᓂᓕᕐᓗᓂ.
“ᐅᓇ ᐱᓕᕆᖃᑎᒌᒋᐊᖃᕐᓂᑦᑎᓐᓂᑦ ᓇᓗᓇᕈᓐᓃᕐᑐᖅ ᐊᒻᒪᓗ ᐅᖃᐅᓯᕆᑲᑕᒡᓗᒍ,” ᐅᖃᕐᑐᖅ. “ᑭᖑᕙᓗᐊᓚᐅᙱᓐᓂᑦᑎᓐᓂ … ᑯᕕᔪᕕᓂᕐᓂ ᐱᓕᕆᐊᖃᕈᓐᓇᙱᓐᓇᑦᑕ ᐅᕝᕙᓘᓐᓃᑦ ᐅᒥᐊᕐᔪᐊᑦ ᓈᒪᙱᓕᐅᕈᑎᖃᓕᖅᐸᑕ ᐅᕝᕙᓘᓐᓃᑦ ᑐᐊᕕᕐᓇᖅᑐᓕᕆᓂᕐᒧᑦ ᐱᖁᑎᑦ ᑕᑉᐸᐅᖓᖅᑎᑕᐅᔪᓐᓇᙱᓪᓗᑎᒃ.”
ᑭᒡᒐᖅᑐᐃᔨᐅᔪᑦ ᐅᑯᓄᖓ ᕿᑎᕐᒥᐅᑉ ᐅᐊᓕᓂᖓᓂ ᐃᑲᔫᑎᒃᓴᓕᕆᔨᒃᑯᑦ ᑯᐊᐳᕇᓴᓐ ᐊᒻᒪ ᕿᑭᖅᑖᓗᒃ AEDC ᐃᓚᒋᔭᐅᓚᐅᕐᑐᑦ ᐱᓕᕆᐊᓂ ᐱᓕᕆᐊᖃᓕᖅᑎᓪᓗᒋᑦ ᑲᓛᖡᑦ ᓄᓇᖓᓂ ᐱᓇᓱᐊᕈᓯᐅᓚᐅᖅᑐᒥᓐ ᐊᐅᓚᑕᐅᓪᓗᓂ ᓄᓇᕗᑦ ᑐᙵᕕᒃᑯᓐᓄᑦ.
ᐊᑎᓕᐅᖅᑎᐅᔪᑦ ᑐᑭᓯᖃᑦᑕᐅᑎᓯᒪᓂᕐᒥ ᑲᑎᓚᐅᕐᑐᑦ ᓅᒃᒥ ᐅᖃᐅᓯᖃᕆᐊᖅᑐᖅᖢᑎ ᑭᖑᓪᓕᕐᒥ ᖃᓄᐃᓕᐅᕐᓂᐊᕐᒪᖔᑕ, ᐱᐊᓪ ᐅᖃᓚᐅᕐᑐᖅ, ᐅᖃᒃᑲᓐᓂᖅᖢᓂ ᖃᐅᔨᔪᒪᑦᑎᐊᕐᓂᖓᓂ ᑲᓛᖡᑦ ᓄᓇᖓᓂ ᐊᒻᒪᓗ ᐊᑐᖅᑕᐅᑎᑦᑐᓐᓇᓗᒋᑦ ᐅᕙᓂ ᒍᕇᔅ ᑲᖏᖅᖢᒃᒥᑦ.
ᐊᐱᕆᔭᐅᒐᒥ ᖃᓄᐃᓕᐅᕈᑎᒃᓴᖏ ᑭᖑᓂᐊᒍᑦ ᖃᓄᐃᓕᖓᓂᐊᕐᒪᖔᑕ, ᐱᐊᓪ ᑭᐅᔪᒪᓚᐅᙱᑦᑐᖅ ᐅᖃᖅᖢᓂ “ᐅᕙᓐᓂ ᐅᖃᐅᓯᖃᕈᒪᙱᓐᓇᒪ.”
“ᐅᕙᒍᓪᓕ ᐊᒻᒪᓗ ᕿᑭᖅᑖᓗᒃ AEDC-ᑯᑦ ᐸᕐᓇᐅᓯᐅᖅᐸᓪᓕᐊᓂᕋᖅᖢᓂᒋᑦ ᒫᓐᓇᐅᔪᖅ, ᐊᒻᒪᓗ ᖃᐅᔨᔭᕆᐊᖃᓪᓚᕆᒃᑲᑦᑕ ᓅᒃᒥᑦ,” ᐅᖃᕐᑐᖅ. “ᖃᓄᐃᓕᐅᕆᐊᖃᕐᓂᕐᒥ, ᖃᓄᐃᑦᑐᓂᒡᓗ ᑲᒪᒋᔭᖃᙱᓪᓗᑕ, ᐃᑲᔫᑎᐅᔪᓐᓇᕐᓂᐊᖅᑐᓂᒡᓗ.”
ᐅᖃᓪᓚᒃᑎᓪᓗᒍ ᓄᓇᑦᓯᐊᕐᒥ ᐱᕙᓪᓕᐊᔪᓄᑦ, ᑭᒡᒐᖅᑐᐃᔨᐅᔪᑦ ᓯᑯᑭᒥ ᐅᖃᓚᐅᕐᑐᑦ ᐅᖃᐅᓯᖃᓚᐅᕐᓂᖏᓐᓂᒃ ᐱᓕᕆᐊᒧᑦ ᖃᓄᐃᓕᐅᕈᑎᐅᓂᐊᖅᑐᓂᒃ ᒪᕐᕉᖕᓄ ᓄᓇᕗᒥᑦ ᑲᒻᐸᓂᒋᔭᐅᔪᓂ. ᑐᑭᓯᖃᑦᑕᐅᑎᓯᒪᓂᖅ ᑖᒃᑯᓂᖓ ᐱᖓᓱᓂ ᐃᑲᔫᑎᐅᓂᐊᖅᑐᖅ ᐱᓕᕆᖃᑎᒌᒍᓐᓇᕐᓂᕐᒥᒃ.
“ᐅᓇ ᑐᙵᕕᐅᓕᕈᓐᓇᖅᑐᖅ ᐱᕈᖅᐸᓪᓕᐊᓂᕐᒧᑦ,” ᐅᖃᐅᓯᐅᓯᒪᔪᑦ ᐅᖃᕐᓯᒪᔪᑦ, ᐃᓚᖃᖅᖢᓂ ᑖᒃᑯᐊ ᖃᐅᔨᓇᓱᖕᓂᐊᖅᖢᑎᒃ ᖃᓄᖅ ᑕᐅᕐᓰᖃᑎᒌᒍᓐᓇᕋᔭᕐᒪᖔᑕ ᑐᐊᕕᕐᓇᖅᑐᓕᕆᓂᕐᒥᒃ, ᐅᒥᐊᕐᔪᐊᓂ ᐃᑲᔪᖅᑐᐃᓗᑎᒃ ᐊᒻᒪ ᑐᓴᐅᒪᖃᑦᑕᐅᑎᓗᑎᒃ ᖃᓄᖅ ᐅᑭᐅᕐᑕᖅᑐᕐᒥ ᑐᓚᑕᕐᕖᑦ ᐊᐅᓚᑕᐅᑦᑎᐊᕈᓐᓇᕋᔭᕐᒪᖔᑕ.
(0) Comments