ᓅᒃ ᐱᕙᓪᓕᐊᓂᖓ ‘ᐱᓇᓱᒻᒪᕆᖕᓂᕐᒧᑦ’ ᐃᖃᓗᖕᓄᑦ: ᑲᑎᒪᔨ

ᑲᓛᖡᑦ ᐊᖓᔪᖅᑳᖃᖅᕕᖓ ᑕᑯᓯᒪᕗᖅ ᑮᓇᐅᔭᓕᐅᖅᕕᒃᓴᓂ, ᐊᖏᕐᕋᕆᔭᐅᔪᒃᓴᓂ ᐃᒡᓗᓂ ᐱᕈᒻᒪᕆᒃᑐᓂᒃ; ᒥᑦᑕᕐᕕᒃ, ᐃᓕᓐᓂᐊᕐᕕᒃᓗ ᐱᐅᓯᕚᓪᓕᖅᑎᑕᐅᕙᓪᓕᐊᔪᑦ

ᓅᒃ, ᑲᓛᖠᑦ ᓄᓇᖓᑕ ᐊᖓᔪᖅᑳᖃᖅᕕᖓ ᐃᓄᖃᖅᑐᖅ 20,000 ᑐᖏᑦᑎᐊᑯᓗᐊᓂ. (ᐊᔾᔨᓕᐅᕆᔨ ᔨᐊᕝ ᐱᐊᑦᓯᐄ)

By ᔨᐊᕝ ᐱᐊᑦᓯᐄ
ᓄᓇᓕᖕᓂ ᑐᓴᒐᒃᓴᓕᐅᕐᑎᐅᓂᕐᒧᑦ ᐱᓕᕆᐊᒃᓴᓄᑦ ᑐᓴᒐᒃᓴᓕᐅᕐᑎ

ᓄᑖᒥ ᖃᖓᑕᓲᒃᑯᑦ ᓅᒃ, ᖃᓛᖡᑦ ᓄᓇᖓᓂ, ᐃᖃᓗᖕᓂᙶᖅᑐᑦ ᑕᑯᔪᓐᓇᕐᓂᐊᓯᔪᑦ ᓄᓇᓕᐸᐅᔭᓂ ᐊᔾᔨᐸᓗᒋᒐᓗᐊᖅᖢᓂᐅᒃ ᑭᓯᐊᓂ ᐊᖏᓂᕐᓴᐅᓪᓗᓂ, ᕿᓚᒥᕈᓗᒃ ᐱᕈᖅᐸᓪᓕᐊᓪᓗᓂ ᐊᒻᒪᓗ ᐱᔨᑦᑎᕋᐅᑎᖃᐅᖅᖢᓂ ᓄᓇᕗᑦ ᐊᖓᔪᖅᑳᖃᖅᕕᖓᓂ ᐱᑕᖃᙱᑦᑐᓂ.

ᒥᓐᓇᔭᖅᑐᑦ ᓄᓇᓕᐸᐅᔭᓄᑦ ᓯᓚᖃᖅᑐᒥ ᐊᔾᔨᐸᓗᐊᓂ ᐊᒻᒪᓗ ᑕᕐᓴᖃᐅᕈᓘᔭᖅᑐᓂ ᐃᒡᓗᓂ, ᐊᑐᕈᓐᓃᕐᓂᖏᓐᓄᑦ ᑕᕐᓴᑎᒍᑦ ᐋᖅᑭᒃᓱᐃᕙᓚᐅᕐᓯᒪᓂᖏᓐᓂ ᖃᓄᖅ ᐱᓕᕆᕝᕕᐅᓂᖏᓐᓄᑦ.

ᑭᓯᐊᓂᓕ, ᑕᑯᓇᔭᕐᒥᔪᑦ ᓅᒃᒥ ᐊᖓᔪᖅᑳᖃᖅᕕᒃᒥ ᐱᕈᖅᐹᓪᓕᖅᓯᒪᒻᒪᕆᒃᑐᒥ ᐊᒻᒪ ᖁᑦᑎᒃᓯᕚᓪᓕᖅᖢᓂ ᐃᖃᓗᖕᓂᓪᓕ ᐊᒻᒪᓗ ᐃᓚᖃᐅᖅᖢᓂ ᓇᖕᒥᓂᖅ ᐱᓕᕆᐊᕆᔭᐅᔪᓂᒃ ᐊᒻᒪ ᐱᖁᑎᓂᒃ ᐃᖃᓗᖕᓂ ᐱᑕᖃᙱᑦᑐᓂ.

“ᐃᒃᐱᖕᓇᖅᑐᖅ ᓅᒃ ᐱᕈᖅᓯᒪᓕᕐᓂᖓᓂ ᒥᑭᑦᑐᒥ ᓄᓇᓕᐅᓚᐅᖅᖢᓂ ᑭᒃᑯᓕᒫᓪᓗ ᐃᖕᒥᖕᓂ ᖃᐅᔨᒪᐅᖅᖢᑎ ᒪᐅᖓ ᐊᖓᔪᖅᑳᖃᖅᕕᐅᖂᔨᓕᖅᖢᓂ ᐅᕝᕙᓘᓐᓃᑦ ᐃᐅᕈᑉᒥ ᓄᓇᓕᐸᐅᔭᐅᓪᓗᓂ, ᑕᐃᒪᐃᙱᒃᑲᓗᐊᖅᖢᓂ, ᐊᖏᑎᒋᓂᖓᓕ,” ᐅᖃᕐᑐᖅ ᕌᔅᒪᔅ ᑯᕆᔅᑎᐊᓐᓴᓐ, ᑐᓴᐅᒪᔾᔪᑎᓕᕆᓂᕐᒧᑦ ᐊᐅᓚᑦᑎᔨ ᐅᑯᓇᓂ ᓯᕐᒥᕐᓲᖅ ᓄᓇᓕᖕᓂ.

ᓯᕐᒥᕐᓲᖅ ᐊᕙᓗᓯᒪᔪᖅ ᓅᒃᒥ ᐊᒻᒪ ᐊᓯᖏᓐᓂ ᓄᓇᓕᖕᓂ ᐊᖏᓂᖅᑲᖅᖢᓂ 531,900 ᑭᑉᐹᕆᒃᑎᓯᒪᔪᓂ ᑭᓛᒥᑕᓂ ᑲᓛᖡᑦ ᓄᓇᖓᑕ ᓂᒋᐊᓂ ᑲᓇᖕᓇᖅᐸᓯᐊᓂ.

ᐃᓅᓯᓕᒫᖓᓂ ᓅᒃᒥ ᓄᓇᓕᒃ, ᑯᕆᔅᑎᐊᓐᓴᓐ ᐃᖅᑲᐅᒪᔪᖅ ᑭᓱᓕᒫᑦ ᒥᑭᓐᓂᕐᓴᐅᓚᐅᕐᓯᒪᓂᖏᓐᓂ ᐊᒻᒪ “ᐃᖢᐊᕐᓂᖅᓴᐅᓪᓗᓂ.”

ᐅᖃᐅᓯᖃᓚᐅᕐᑐᖅ ᐃᓚᖏᓐᓂ ᐱᕙᓪᓕᐊᔾᔪᑎᕕᓂᕐᓂ ᐊᕐᕌᒍᑦ ᖁᓕᑦ ᐃᓗᐊᓂ ᐅᖓᑖᓄᓪᓘᓐᓃᑦ.

ᐅᓄᕈᓘᔭᕐᑐᑦ ᓄᑖᑦ ᐃᒡᓗᒃᓴᐃᑦ ᒪᑭᑎᑕᐅᓯᒪᓕᕐᑐᑦ, ᐅᓇᓗ ᓅᒃᒥ ᐅᐸᒡᕕᒃ ᓂᐅᕕᕆᐊᕐᕕᒃ ᒪᑐᐃᓚᐅᖅᖢᓂ, ᒪᕐᕉᒡᓗ ᑮᓇᐅᔭᖃᕐᕖᒃ ᑎᑎᕋᕐᕕᒃᑖᓚᐅᖅᖢᑎᒃ, ᐅᓇᓗ ᐃᑎᔪᒥ ᑐᓚᒃᑕᕐᕕᒃ ᐊᕐᕌᒍᓕᒫᖅ ᐊᑐᖅᑕᐅᔪᓐᓇᖅᑐᖅ ᐊᖏᒡᓕᒋᐊᖅᑕᐅᓪᓗᓂ, ᐊᒻᒪᓗ ᐅᓇ ᕿᙳᕐᐳᑦ ᐃᒡᓗᖃᕐᕕᒃᓴᖅ ᐋᖅᑭᒃᓱᖅᑕᐅᓚᐅᖅᖢᓂ ᓄᓇᓕᐸᐃᔭᐃᑦ ᕿᑎᐊᑕ ᓯᓚᑎᑦᑎᐊᖓᓂ.

ᓄᓇᓖᑦ ᓴᓇᓚᐅᕐᒥᔪᑦ ᐅᓄᕈᓘᔭᖅᑐᓂ ᕿᑯᕐᓂ ᐊᖅᑯᑎᓂ ᐃᓚᖏᑦ ᐅᑎᕐᕕᖃᖅᖢᑎᒃ ᐊᒻᒪᓗ ᓄᖅᑲᕈᑎᓂ ᖃᐅᒻᒪᖅᑯᑎᖃᖅᖢᑎᒃ.

ᓅᒃ ᒫᓐᓇ ᐃᓄᖃᖅᑐᖅ 20,000 ᖃᓂᒋᔭᖓᓂ ᑕᑯᓪᓗᒍᓕ 16,000 ᐅᖓᑖᓃᓚᐅᕐᓯᒪᓪᓗᑎᒃ ᖁᓪᓕ ᐅᑭᐅᑦ ᓯᕗᓂᐊᓂ, ᑕᐃᒪᓐᓇ ᓇᐃᓴᐃᔨᑦ ᑲᓛᖡᑦ ᓄᓇᖓᓄ.  ᐃᖃᓗᐃᑦ ᐃᓄᖃᖅᑐᑦ 8.000 ᑐᖔᓂ ᐅᑯᑎᒎᓇᖅ 2021-ᒥ ᓇᐃᓴᐃᓂᕐᒥ.

ᑯᕆᔅᑎᐊᓐᓴᓐ ᐅᖃᓚᐅᕐᑐᖅ ᓄᓇᓕᐸᐅᔭᐃᑦ ᐱᕈᕐᓂᖓ ᐃᓚᖓᒍᑦ ᐱᔾᔪᑎᖃᓗᐊᖅᑐᖅ ᐃᓄᖕᓂ ᓄᒃᑎᕈᒪᓯᒪᔪᓂ ᐃᓄᑭᓐᓂᕐᓴᓂ ᓄᓇᓕᖕᓂ ᓅᒃᒧᑦ, ᑕᕝᕙᓂ ᐅᓄᕈᓘᔭᖅᑐᓂ ᐱᖁᑎᒃᓴᖃᐅᕐᒪᑕ ᐊᒥᓱᑦ ᕼᐋᒻᒪᓚᐅᔪᑦ ᐱᒋᙱᑕᖏᓐᓂ, ᒪᑯᑎᑐᓇᖅ ᑳᕕᑐᕆᐊᕐᕖᑦ ᐊᒻᒪ ᐅᓄᕐᓂᕐᓴᐅᓪᓗᑎᒃ ᓇᖕᒥᓂᖅ ᐱᓕᕆᐊᖑᔪᐃᑦ.

ᐱᕈᖅᐸᓪᓕᐊᓂᖓᓄ ᓴᓇᔨᐅᕙᒃᑐᑦ ᐃᒡᓗᓕᐅᕈᒪᓂᕐᓴᐅᓕᖅᖢᑎᒃ.

“ᓲᕐᓗᓕ ᐃᓄᐃᑦ ᐅᕙᓂ ᓄᓇᓕᐸᐅᔭᓂ ᐱᕈᖅᑎᑦᑎᔪᒪᔪᑦ, ᐅᓄᕐᓂᖏᑦᑎᒍᑐᐃᓐᓇᐅᙱᑦᑐᖅ ᑭᓯᐊᓂᓕ ᐱᔨᑦᑎᕋᐅᑎᑎᒍᑦ ᐊᒻᒪ ᖃᓄᐃᓕᐅᕈᑎᐅᔪᓐᓇᖅᑐᓂᒃ,” ᑯᕆᔅᑎᐊᓐᓴᓐ ᐅᖃᕐᑐᖅ.

ᓅᒃ ᐱᒋᐊᖅᑕᐅᓚᐅᕐᓯᒪᔪᖅ 1728-ᒥ ᐆᒧᖓ ᐆᒧᖓ ᑕᐃᓂᔅ-ᓅᕖᔾᔭᓐ ᑐᒃᓯᐊᖅᑎᐅᓚᐅᖅᓯᒪᔪᖅ ᕼᐋᓐᔅ ᐃᒋᑎ ᐊᒻᒪ ᓱᒃᑲᐃᑦᑐᒥ ᐱᕈᖅᐸᓪᓕᐊᓕᖅᖢᓂ. ᐃᓄᐃᑦ ᐃᖃᓗᒐᓱᒃᓯᒪᖃᑦᑕᖅᑎᓪᓗᒋᑦ ᐊᒻᒪ ᐊᖑᓇᓱᒃᐸᒃᖢᑎᒃ ᐊᕐᕌᒍᒐᓴᒻᒪᕆᐊᓗᖕᓂ, ᓄᓇᓕᐸᐅᔭᐅᓕᕐᓂᖓ ᖃᖓᑦᑎᐊᓵᖑᓂᕐᓴᐅᓚᐅᕐᒪᓐ.

ᐊᐃᑉᐸᖓᓂ ᐅᓇᑕᕐᕕᒡᔪᐊᕐᓈᓘᓚᐅᕐᓯᒪᔪᒥ, ᓅᒃ ᐊᐅᓚᑦᑎᕕᐅᓕᓚᐅᕐᓯᒪᖕᒪᑦ ᑲᓛᖡᑦ ᓄᓴᖓᓄ ᑎᐊᓐᒫᒃᒥ ᐃᓚᐅᔪᓐᓃᖅᑎᓪᓗᒍ, ᑖᓐᓇᓗ ᓈᑦᓯᓄ ᐃᓂᒋᔭᐅᓕᕐᓯᒪᓪᓗᓂ.

ᐅᓇᑕᕕᒡᔪᐊᖅᑎᓪᓗᒋᑦ ᓱᓕ, ᖃᔭᖅᑐᖅᑎ ᐸᖕᓂᖅᑑᕐᒥᐅᑕᖅ ᐊᑎᖃᖅᑐᖅ ᓇᑲᓱᒃ ᐊᒥᐊᓕᑲᒥᐅᑕᑦ ᐅᓇᑕᖅᑐᒃᓴᖏᓐᓂ ᕗᕉᐱᓱ ᐸᐃᓕᐊᕈᑎᓚᐅᕐᓯᒪᔭᖏᑦ ᑕᕝᕙᓂᓗ ᐅᓇᑕᖅᑐᒃᓴᓄᑦ ᐃᒡᓗᓕᐅᖅᖢᑎᒃ 1940 ᐱᒋᐊᕐᓯᒪᓕᖅᑎᓪᓗᒋᑦ.

1995-ᒥ, ᐃᖃᓗᐃᑦ ᓂᕈᐊᕆᔭᐅᓚᐅᖅᓯᒪᔪᖅ ᓄᓇᕗᒧᑦ ᐊᖓᔪᖅᑳᖃᖅᕕᐅᓂᐊᕐᓗᓂ, ᑖᓐᓇᓗ ᓄᓇᕗᙳᓚᕆᓕᖅᖢᓂ ᐊᕐᕌᒍᑦ ᑎᓴᒪᑦ ᐊᓂᒍᖅᑎᓪᓗᒋᑦ.

ᐅᖃᕐᑐᖃᒡᒍᔪᖅ ᐃᓄᐃᑦ ᐊᒻᒪ ᐱᓕᕆᖃᑎᒌᒃᑐᑦ ᓄᓇᕗᒥᑦ ᑲᓛᖡᑦ ᓄᓇᖓᓄᑦ ᖃᐅᔨᓇᓱᖃᑦᑕᕐᓂᖏᓐᓂ ᖃᓄᐃᓕᐅᕈᑎᐅᔪᓐᓇᕐᓂᐊᖅᑐᓂᒃ, ᐱᓕᕆᖃᑎᒌᒃᐸᓪᓕᐊᓂᕐᒧᑦ ᐊᒻᒪᓗ ᐃᓕᖅᑯᓯᓕᕆᓂᕐᒨᖓᔪᓄᑦ.

2022-ᒥ, ᓄᓇᕗᑦ ᐊᒻᒪ ᑲᓛᖡᑦ ᓄᓇᖓ ᐊᑎᓕᐅᓚᐅᕐᓯᒪᖕᒪᑎᒃ ᐊᖏᕈᑎᓂ ᐱᔾᔪᑎᖃᖅᑐᓂ, ᐆᒧᖓᓕ ᓄᓇᕗᒧᑦ ᓯᕗᓕᐅᖅᑎᒧᑦ ᐸᐅᓗᓯ ᐊᕿᐊᕈᖅᒧᑦ, ᑖᒃᑯᐊ ᒪᕐᕉᒃ “ᑲᔪᓯᔪᓐᓇᖁᓪᓗᒋᑦ ᐱᓕᕆᖃᑎᒌᖃᑦᑕᕐᓂᖏᑦ ᐃᓄᖏᓐᓂ ᐱᔨᑦᑎᕋᕐᓂᕐᓴᐅᓂᐊᕐᒪᑕ.”

ᓅᒃ ᐱᖁᑎᖃᐅᕐᒪᓐ ᐃᖃᓗᐃᑦ ᐱᔪᒪᓇᔭᕐᒥᔭᖏᓐᓂᒃ, ᐅᖃᕐᑐᖅ ᐃᖃᓗᖕᓄᑦ ᑲᑎᒪᔨ ᕈᒪᐃᓐ ᓯᑏᕙᓐᓴᓐ, ᑖᓐᓇᓗ ᐃᓚᖃᖅᖢᓂ ᑲᓛᖡᑦ ᓄᓇᖓᓂ ᐊᒻᒪᓗ ᓅᒃᑯ ᒪᐃᖑᑎᓪᓗᒍ ᐳᓛᓚᐅᕐᓯᒪᓪᓗᓂ ᐱᓕᕆᐊᒥᔪ ᐅᑯᓇᓂ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᓄᑦ.

ᐊᑕᐅᓯᕐᓕ ᓅᒃ ᐊᔪᙱᔾᔪᑎᒋᓂᕐᓴᖓ ᐅᓇ ᑐᓚᒃᑕᖅᕕᒃ ᐊᕐᕌᒍᓕᒫᖅ ᐊᑐᖅᑕᐅᖃᑦᑕᕐᓂᖓ ᐅᓇᓕ ᐃᖃᓗᖕᓂ ᑐᓚᒃᑕᖅᕕᒃ ᐅᒥᐊᕐᔪᐊᖃᕈᓐᓇᙱᒻᒪ ᓯᑯ ᖁᐊᖑᑎᓪᓗᒍ, ᓯᑏᕙᓐᓴᓐ ᐅᖃᕐᑐᖅ.

ᐊᒻᒪᓗ ᐊᔪᙱᔾᔪᑎᒋᒃᑲᓐᓂᕐᒥᔭᖓ ᐅᓇ ᐆᒻᒪᖅᑯᑎᓕᕆᓂᕐᒥ ᐃᒪᕐᒧᑦ ᐊᑐᕈᓐᓇᖅᑐᒥ (hydroelectricity). ᐅᖃᐅᓯᖃᑲᑕᒃᑲᓗᐊᖅᖢᑎᒃ ᐃᒪᕐᒧᑦ ᐊᑐᕈᓐᓇᖅᑐᒥ ᐆᒻᒪᖅᑯᑎᓕᕆᓂᕐᒥ ᐃᖃᓗᖕᓂ ᓱᓕ ᓄᓇᓕᐸᐅᔭᐃᑦ ᑏᓱᓪᒥ ᐊᑐᖃᑦᑕᖅᑐᑦ ᐆᒻᒪᖅᑯᑎᖃᕐᕕᖓ.

ᓅᒃ ᐊᒃᑕᑯᓂ ᐃᑭᑎᑦᑎᕝᕕᖃᕐᒥᔪᖅ, ᒪᑯᓇᙵᑦ ᐊᓂᑕᐅᕙᓪᓕᐊᔪᓂᒃ ᓄᓇᓕᐸᐅᔭᓂ ᐊᒻᒪ ᖃᓂᒋᔭᖏᓐᓃᑦᑐᓂᒃ ᓄᓇᓕᖕᓂ ᐃᑭᑎᑦᑎᕙᒃᖢᑎᒃ ᐊᒻᒪᓗ ᐅᖅᑰᓯᑦᑎᑎᕙᒃᖢᓂ ᐅᖅᑰᓴᐅᑎᓕᕆᔾᔪᑎᖏᓐᓂᒃ.

“ᑖᒃᑯᐊᒃ ᒪᕐᕉᒃ ᐅᔾᔨᕆᓗᐊᓚᐅᕋᒃᑭ ᐊᒻᒪᓗ ᐃᓱᒪᒋᔭᐅᓕᕈᓐᓇᖅᖢᓂ ᐃᖃᓗᖕᓂ ᐊᒻᒪ ᓄᓇᕗᒧᑦ,” ᓯᑏᕙᓐᓴᓐ ᐅᖃᕐᑐᖅ, ᐅᖃᐅᓯᖃᖅᖢᓂ ᐆᒻᒪᖅᑯᑎᓕᕆᕝᕕᒃ ᐊᒻᒪᓗ ᐊᒃᑕᑯᓂ ᐃᑭᑎᑦᑎᕕᒃᒥ.

“ᐃᓱᒪᔪᖓᓕ ᐃᔪᕐᓇᕈᔪᒃᐸᓵᕐᒪ ᖃᓄᐃᓕᐅᕈᓘᔭᖃᑦᑕᕐᓂᖏ ᒫᓂᓕ ᐊᑐᕈᒥᓇᑐᐃᓐᓇᖅᖢᑎᒃ,” ᐅᖃᕐᑐᖅ, ᐅᖃᐅᓯᖃᖅᖢᓂ, ᐃᖏᕐᕋᔾᔪᑎᓕᕆᓂᖅ, ᐊᖅᑯᑎ ᐊᒻᒪ ᐊᖅᑯᑎᐅᑉ ᓴᓂᐊᒍ ᐱᓱᒡᕕᒃᓴᓄ ᐊᒻᒪ ᑭᒃᑯᓕᒫᓄᑦ ᐃᖏᕐᕋᕝᕕᐅᔪᓐᓇᖅᑐᓂᒃ.

ᐃᖃᓗᖕᓂ ᑲᑎᒪᑎᓪᓗᒋᑦ ᒪᐃᒥ, ᓯᑏᕙᓐᓴᓐ ᐅᖃᓚᐅᕐᑐᖅ ᓄᓇᓕᐸᐅᔭᐃᑦ ᑐᙵᓱᒃᑎᑦᑎᓪᓗᐊᕐᓂᖏᓐᓂ ᓅᒃᒥᐅᑕᓂ ᓯᑎᐱᕆᐅᓕᕐᐸᑦ ᐅᕙᓂ ᓄᓇᕗᒥᑦ ᐱᓕᕆᐊᓂ ᑕᑯᔭᒐᖃᕐᕕᒃᒧᑦ.

ᑯᕆᔅᑎᐊᓐᓴᓐ ᐅᖃᓚᐅᕐᑐᖅ ᐱᓕᕆᔨᒻᒪᕇᑦ ᓅᒃᒥ ᖃᓄᐃᓕᐅᕈᑎᐅᔪᓐᓇᖅᑐᓂ ᖃᐅᔨᓇᓱᖕᒪᑕ ᐃᖃᓗᖕᓂ. ᑕᒪᑐᒪᓂ ᐊᕐᕌᒍᒥ, ᓅᒃ ᐊᖏᔪᓂ ᐃᒡᓗᓕᐅᖅᑕᐅᔪᓂᒃ ᐱᐊᓂᒃᑐᓂ ᑕᑯᓛᖅᑐᑦ.

ᖃᖓᑕᓲᒃᑯᕕᐅᑦ ᖃᖓᑦᑕᐅᑎᓕᕆᕝᕕᖓ ᒪᑐᐃᓚᐅᕐᑐᖅ ᓱᓕ ᐃᒡᓗᓕᐅᖅᑐ ᐱᐊᓂᙱᖢᑎᒃ.

ᐊᒻᒪᓗ, ᖃᖓᑕᓲᓄᑦ ᒥᕝᕕᐅᔪᑦ ᑕᒃᖠᒋᐊᖅᑕᐅᓚᐅᖅᖢᓂ 2,200 ᒦᑕᓂ, ᑕᐃᒪᓐᓇᓗ ᓱᒃᑲᔪᕐᔪᐊᖅᒥ ᑎᑭᕝᕕᐅᔪᓐᓇᕐᓂᐊᓕᖅᖢᑎᒃ ᐅᕙᙵ ᑰᐸᕼᐊᐃᒐᓐ, ᑎᐊᓐᒫᒃ ᐊᖓᔪᖅᑳᖃᕐᕕᖓ.

ᐃᖃᓗᐃᑦ ᖃᖓᑕᓲᓄᑦ ᒥᕝᕕᖓ 2,623 ᒦᑕᓂ ᑕᑭᓂᖃᕐᒪ ᐊᒻᒪᓗ ᖃᖓᑕᓲᒃᑯᕕᖓ ᒪᑐᐃᓚᐅᕐᓯᒪᓪᓗᓂ 2017-ᒥ.

ᐅᓄᕐᓂᕐᓴᓂ ᑎᑭᒃᑐᖃᖃᑦᑕᓛᕋᓱᒋᓪᓗᒋᑦ, ᑯᕆᔅᑎᐊᓐᓴᓐ ᐅᖃᓚᐅᕐᑐᖅ ᓅᒃ ᑲᔪᓯᓂᕋᖅᖢᓂᐅᒃ ᐱᕈᖅᐸᓪᓕᐊᓂᖓ ᐊᒻᒪ ᓄᓇᕐᔪᐊᒥ ᓄᓇᓕᕐᔪᐊᖅᑎᑑᓕᖅᖢᓂ.

“ᐃᓱᒪᔪᖓᓕ ᐅᓄᕈᓘᔭᕐᑐᑦ ᐃᓄᐃᑦ ᐃᓱᒪᔪᑦ ᓅᒃ ᓄᒃᑎᕐᕕᐅᔪᒪᖃᑦᑕᕐᓂᖓᓂᒃ, ᐃᖅᓇᐃᔮᑦᑎᐊᕙᖕᓄᑐᐊᙳᙱᑦᑐ ᐅᕝᕙᓘᓐᓃᑦ ᑲᔾᔮᕐᓇᕐᓂᖓᓄᑦ,” ᐅᖃᕐᑐᖅ.

“ᓲᖃᐃᒻᒪ ᓅᒃ ᓄᓇᓕᐅᓕᕐᒪ ᐊᖏᕐᕋᕆᔪᒥᓇᕐᓯᓪᓗᓂ ᖃᓄᑐᐃᓐᓇᖅ ᐊᒻᒪ ᑭᓱᒧᑐᐃᓐᓇᖅ.”

Share This Story

(0) Comments