ᐆᐱᑦ ᐸᐸᑦᑏᓐᓇᖅᐳᖅ ᐃᓂᒋᔭᒥᓂᑦ ᐊᖓᔪᖅᑳᖑᓂᕐᒥ ᐃᓄᐃᑦ ᑕᐱᕇᑦ ᑲᓇᑕᒥ

For English version, see Obed retains post at helm of Inuit Tapiriit Kanatami

ᓇᑖᓐ ᐆᐱᑦ ᑎᓴᒪᖓᓐᓂ ᓂᕈᐊᖅᑕᐅᕗᖅ ᐊᖓᔪᖅᑳᓂᕐᒥ ᐃᓄᐃᑦ ᑕᐱᕇᑦ ᑲᓇᑕᒥ ᓵᓚᖃᓚᐅᖅᑎᓪᓗᒍ ᓂᕈᐊᕐᓂᐅᔪᒥ ᑲᑎᒪᖃᑕᐅᔪᓂ ᓯᑎᐱᕆ 18−ᒥ ᐃᖃᓗᒃᑑᑦᑎᐊᕐᒥ.

ᑲᓇᑕᒥ ᐃᓄᖕᓄᑦ ᑲᑐᔾᔨᖃᑎᒌᖑᔪᒥ ᐅᖃᐅᓯᖃᓚᐅᖅᐳᖅ ᖃᓄᐃᓕᖓᓂᖏᓐᓂ ᓯᑎᐱᕆ 18−ᒥ ᑐᓴᒐᒃᓴᓕᐊᖑᔪᒥ. ᐆᐱᑦ, ᓇᐃᓐ, ᓛᐸᑐᐊᒥᐅᑕᓪᓚᕆᐅᓪᓗᓂ, ᐊᑕᐅᓯᕐᒥ ᓂᕈᐊᒐᒃᓴᖃᑎᖃᓚᐅᖅᐳᖅ ᓵᓚᖃᕋᓱᐊᕐᓂᐅᔪᒥ —CBC−ᑐᑦ ᐅᐊᖕᓇᒥ ᐊᐅᓚᑦᑎᔨᐅᓚᐅᖅᓯᒪᔪᖅ ᐋᖅᑭᒃᓱᐃᔨᐅᓪᓗᓂ ᑲᕙᓐ ᖃᑉᓗᑦᓯᐊᕐᒥ .

ᑭᒡᒐᖅᑐᐃᔨᐅᔪᑦ ᐃᓄᖕᓄᑦ ᑲᑐᔾᔨᖃᑎᒌᖑᔪᓄᑦ ᑲᓇᑕᓕᒫᒥ ᕿᑎᕐᒥᐅᓂ ᓄᓇᓕᖕᒦᓚᐅᖅᐳᑦ ᐱᓇᓱᐊᕈᓯᐅᓚᐅᖅᑐᒥ ᐃᓄᐃᑦ ᑕᐱᕇᑦ ᑲᓇᑕᒥ ᐊᕐᕌᒍᑕᒫᒥ ᑕᒪᐃᑎᒍᑦ ᑲᑎᒪᓂᐅᔪᒥ.

13−ᓂ ᐃᓄᖕᓂ ᓂᕈᐊᕈᓐᓇᓚᐅᖅᐳᑦ.

ᐃᓚᖃᓚᐅᖅᐳᑦ ᒪᕐᕉᖕᓂ ᑭᒡᒐᖅᑐᐃᔨᐅᔪᓂᑦ ᓄᓇᕗᒻᒥ ᑐᙵᕕᒃᑯᓐᓂ, ᑭᒡᒐᖅᑐᐃᔪᓂ ᐃᓄᖕᓂ ᓄᓇᕗᒻᒥ; ᒪᑭᕝᕕᒃ ᑎᒥᖁᑎᖏᓐᓂ, ᑭᒡᒐᖅᑐᐃᔪᑦ ᓄᓇᕕᖕᒥ; ᐃᓄᕕᐊᓗᐃᑦ ᐊᕕᒃᑐᖅᓯᒪᓂᐅᔪᓄᑦ ᑎᒥᖁᑎᖏᓐᓂ, ᑭᒡᒐᖅᑐᐃᔪᓂ ᓄᓇᑦᓯᐊᕐᒥ; ᐊᒻᒪ ᓄᓇᑦᓯᐊᕗᑦ ᒐᕙᒪᖓᓂ, ᑭᒡᒐᖅᑐᐃᔪᒥ ᓛᐸᑐᐊᒥ.

ᕼᐆᑉ ᓇᑭᒪᔭᒃ ᑐᓂᔭᐅᓚᐅᕆᕗᖅ ᓂᕈᐊᕈᓐᓇᐅᒻᒥ ᑎᒃᑯᐊᖅᑕᐅᓚᐅᖅᑎᓪᓗᒍ ᓯᑎᐱᕆ 17−ᒥ ᒪᕐᕉᖕᓄᑦ ᐊᑐᕐᓂᖃᐅᑎᓂᑦ: ᕿᓚᒻᒥᐅᔪᒥ ᐊᖓᔪᖅᑳ ᐃᓄᐃᑦ ᐅᑭᐅᖅᑕᖅᑐᒥ ᑲᑎᒪᔨᐅᔪᓄᑦ ᑲᓇᑕᒥ ᐊᒻᒪ ᐊᖓᔪᖅᑳᑉ−ᑐᒡᓕᐊᓂ ᐃᓄᐃᑦ ᑕᐱᕇᑦ ᑲᓇᑕᒥ.

ᓂᕈᐊᕈᓐᓇᓚᐅᕐᒥᔪᑦ ᑐᐊᐃᓐ ᓯᒥᑦ, ᐃᒃᓯᕙᐅᑕᐅᔪᖅ ᐊᒻᒪ ᐊᐅᓚᑦᑎᔨᒻᒪᕆᒃ ᐃᓄᕕᐊᓗᐃᑦ ᐊᕕᒃᑐᖅᓯᒪᓂᐅᔪᒥ ᑎᒥᖁᑕᐅᔪᓂ; ᔨᐊᕋᒥ ᑑᙶᓗᒃ, ᐊᖓᔪᖅᑳ ᓄᓇᕗᒻᒥ ᑐᙵᕕᒃᑯᓐᓄᑦ; ᔪᕼᐋᓇᔅ ᓛᒻᐱ, ᐊᖓᔪᖅᑳ ᓄᓇᑦᓯᐊᕗᑦ ᒐᕙᒪᒃᑯᓐᓂ; ᐊᒻᒪ ᐲᑕ ᐋᑕᒥ, ᐊᖓᔪᖅᑳ ᒪᑭᕝᕕᒃ ᑎᒥᖁᑕᐅᔪᓂ.

ᐃᓄᐃᑦ ᑕᐱᕇᑦ ᑲᓇᑕᒥ ᐅᖃᓚᐅᙱᓚᑦ ᖃᓄᖅ ᓂᕈᐊᕐᓂᐅᔪᑦ ᐊᕕᒃᓯᒪᓚᐅᕐᓂᖏᓐᓂ.

ᐆᐱᑦ, ᐱᔨᑦᑎᕋᖅᓯᒪᔪᒥ ᐊᖓᔪᖅᑳᓂᕐᒥ ᐃᓄᐃᑦ ᑕᐱᕇᑦ ᑲᓇᑕᒥ ᑕᐃᒪᙵᓂ 2015−ᒥ, ᐊᖏᖅᑎᑕᐅᓚᐅᖅᐳᖅ ᓯᑎᐱᕆ 18−ᒥ ᐊᒻᒪ ᒪᑐᓯᓪᓚᕆᓚᐅᖅᐳᖅ ᐊᕐᕌᒍᑕᒫᒥ ᑕᒪᐃᑎᒍᑦ ᑲᑎᒪᓂᐅᔪᒥ.

ᐊᖓᔪᖅᑳᖑᓂᖓᓂ ᐊᑯᓂᐅᑎᒋᓂᐊᖅᐳᖅ ᐊᕐᕌᒍᓄᑦ ᑎᓴᒪᓄᑦ.