ᐋᑐᕚᒥ ᐃᓕᓐᓂᐊᕐᕕᖕᓂ ᑲᑎᒪᔨᑦ ᓱᓕ ᕿᓂᖅᐳᑦ ᐃᓄᒃᑎᑐᑦ ᐃᓕᓴᐃᔨᒃᓴᓂ

ᐋᑐᕚᒥ−ᑳᕈᑕᓐ ᐊᕕᒃᑐᖅᓯᒪᓂᐅᔪᒥ ᐃᓕᓐᓂᐊᕐᕕᓄᑦ ᑲᑎᒪᔨᖏᑦ ᑐᕌᒐᖃᖅᐳᖅ ᐊᑐᐃᓐᓇᖃᖅᑎᑦᑎᓂᕐᒥ ᓄᓇᖃᖅᑳᖅᓯᒪᔪᒥ ᐅᖃᐅᓯᕐᒥ ᐃᓕᓐᓂᐊᕐᕕᐊᕈᓯᕐᓂ

ᐋᑐᕚᒥ−ᑳᕈᑕᓐ ᐊᕕᒃᑐᖅᓯᒪᓂᐅᔪᒥ ᐃᓕᓐᓂᐊᕐᕕᓄᑦ ᑲᑎᒪᔨᖏᑦ ᐊᑐᐃᓐᓇᖃᖅᑎᑦᑎᔪᓐᓇᔾᔮᙱᓚᑦ ᐃᓄᒃᑎᑐᒻᒥ ᐅᖃᐅᓯᕐᒥ ᐃᓕᓐᓂᐊᕐᕕᐊᕈᓯᕐᓂ ᑭᓯᐊᓂ ᐱᔪᓐᓇᑦᑎᐊᖅᑐᓂ ᐃᓕᓴᐃᔨᓂ ᓇᓂᓯᒍᑎᒃ, ᐅᖃᖅᐳᖅ ᐅᖃᖅᑎᐅᔪᒥ ᓄᓇᕐᔪᐊᒥ ᐊᒻᒪ ᓄᓇᖃᖅᑳᖅᓯᒪᔪᓄᑦ ᐅᖃᐅᓯᕐᓄᑦ ᐱᓕᕆᐊᖑᔪᒥ. (ᒫᑕᓕᓐ ᕼᐊᐅᕕᑦ ᐊᔾᔨᖁᑎᖓ)

By ᒫᑕᓕᓐ ᕼᐊᐅᕕᑦᒧᑦ

ᐃᓕᓐᓂᐊᖅᑏᑦ ᐋᑐᕚᒥ ᐃᓕᓐᓂᐊᕐᕕᖕᓂ ᑲᑎᒪᔨᐅᔪᒥ ᖃᐅᔨᓴᕐᓂᖃᕈᒪᕗᑦ ᐃᓄᒃᑎᑐᒻᒥ ᒪᕐᕈᒋᔭᐅᓗᓂ ᐅᖃᐅᓯᐅᓂᖓᓂ ᐅᑕᖅᑭᔭᕆᐊᖃᕐᓂᐊᖅᐳᑦ ᑭᓯᐊᓂ ᐃᓕᓴᐃᔨᓂᒃ ᓇᓂᓯᒍᑎᒃ.

ᐅᖃᖅᑎᐅᔪᖅ ᐋᑐᕚᒥ−ᑳᕈᑕᓐ ᐊᕕᒃᑐᖅᓯᒪᓂᐅᔪᒥ ᐃᓕᓐᓂᐊᕐᕕᓄᑦ ᑲᑎᒪᔨᖏᓐᓄᑦ ᐅᖃᓚᐅᖅᐳᖅ ᓱᓕ ᕿᓂᖅᐳᑦ ᐱᔪᓐᓇᑦᑎᐊᖅᑐᓂ ᐃᓕᓴᐃᔨᒃᓴᓂ ᓄᓇᖃᖅᑳᖅᓯᒪᔪᓄᑦ ᐅᖃᐅᓯᕐᒧᑦ ᐃᓕᓐᓂᐊᕐᕕᐊᕈᓯᕐᓂ.

“ᒫᓐᓇᒧᑦ ᑎᑭᖦᖢᒍ, ᖃᔅᓰᖅᓱᒐᓚᒃᖢᑕ ᐃᓕᓴᐃᔨᑖᕋᓱᐊᖅᓯᒪᕗᒍᑦ ᐃᓕᓐᓂᐊᖅᑎᑦᑎᓂᐊᖅᑐᓂ ᐃᓄᒃᑎᑐᑦ, ᑯᕇ ᐊᒻᒪ ᐊᓯᖏᓐᓂ ᓄᓇᖃᖅᑳᖅᓯᒪᔪᓄᑦ ᐅᖃᐅᓯᕐᓂ ᐱᒋᐊᓕᓵᖅᑐᓄᑦ ᐃᓕᓐᓂᐊᖅᑎᐅᔪᓄᑦ, ᑭᓯᐊᓂ ᐱᔪᓐᓇᖅᓯᒪᙱᓚᒍᑦ ᓂᕈᐊᒐᒃᓴᓂ ᐊᑐᐃᓐᓇᐅᔪᓂ ᐃᓕᓐᓂᐊᖅᑎᑦᑎᓂᕐᒧᑦ,” ᐅᖃᓚᐅᖅᐳᖅ ᓂᒃᑎᐅᕆᐊ ᑲᕋᒋᐅᓯᔅ, ᐱᓕᕆᔨᐅᔪᖅ ᓄᓇᕐᔪᐊᒥ ᐊᒻᒪ ᓄᓇᖃᖅᑳᖅᓯᒪᔪᓄᑦ ᐅᖃᐅᓯᕐᓄᑦ ᑲᑎᒪᔨᒃᑯᓐᓂ.

“ᕿᒥᕐᕈᔪᒪᑦᑎᐊᕋᔭᖅᐳᒍᑦ ᐅᑯᓂᖓ ᓂᕈᐊᒐᒃᓴᐅᔪᓂ ᐃᓕᓐᓂᐊᖅᑎᓄᑦ ᐊᒻᒪ ᓄᓇᓕᖕᓄᑦ ᐊᒻᒪ ᒪᑐᐃᖓᕗᒍᑦ ᑐᕌᕐᓂᐅᔪᓐᓇᖅᑐᓂ ᐅᕙᑦᑎᓐᓂ ᐃᑲᔪᕋᔭᖅᑐᓂ ᐆᒧᖓ ᑐᕌᕋᓱᐊᕐᓂᐅᔪᒧᑦ,” ᐅᖃᓚᐅᖅᐳᖅ.

ᓯᑎᐱᕆ 2021−ᒥ, ᐋᓐᑎᐅᕆᐅᒥ ᒥᓂᔅᑕᖃᕐᕕᖓᓂ ᐃᓕᓐᓂᐊᕐᓂᓕᕆᓂᕐᒧᑦ ᑲᑎᒪᔨᕋᓛᖑᔪᑦ ᐊᖏᖅᓯᒪᓂᖃᓚᐅᖅᐳᑦ $23.96 ᒥᓕᐊᓐᓂ ᐊᖏᒡᓕᒋᐊᖅᑎᑦᑎᓂᕐᒧᑦ ᓄᓇᖃᖅᑳᖅᓯᒪᔪᓄᑦ ᐃᓗᓕᖏᓐᓂ ᐊᒻᒪ ᐃᓕᑦᑎᓂᕐᒥ ᑲᓇᑕᒥ ᐊᕕᒃᑐᖅᓯᒪᓂᐅᔪᒥ ᐃᓕᓐᓂᐊᕈᑎᓕᐅᖅᑕᐅᓯᒪᔪᓄᑦ.

ᓵᓇᓐ ᓯᒥᑦ, ᐊᖓᔪᖅᑳᖑᔪᖅ ᐃᓕᓴᐃᓂᕐᒧᑦ ᐋᑐᕚᒥ ᑲᑎᒪᔨᐅᔪᓄᑦ, ᐅᖃᐅᔾᔨᓚᐅᖅᐳᖅ ᓄᓇᑦᓯᐊᖅ ᑐᓴᒐᒃᓴᓕᕆᔨᒃᑯᓐᓂ ᐅᒃᑐᐱᕆ 2021−ᒥ ᐃᓕᓐᓂᐊᕐᕕᖕᓄᑦ ᑲᑎᒪᔨᖏᑦ ᓂᕆᐅᖕᓂᖃᓚᐅᖅᐳᑦ ᐊᑐᕐᓂᕐᒥ ᐃᓚᖓᓐᓂ ᑮᓇᐅᔭᖃᖅᑎᑕᐅᓂᐅᔪᒥ ᐊᑐᐃᓐᓇᖃᖅᑎᑦᑎᓂᕐᒧᑦ ᐃᓄᒃᑎᑐᒻᒥ ᐊᒻᒪ ᐊᓯᖏᓐᓂ ᓄᓇᖃᖅᑳᖅᓯᒪᔪᓄᑦ ᐅᖃᐅᓯᕐᓂ ᐃᓕᓐᓂᐊᕐᓂᐅᔪᓂ 2022-2023−ᒥ ᐃᓕᓐᓂᐊᕐᕕᖕᒥ ᐊᕐᕌᒍᖓᓂ.

“ᐱᓕᕆᓂᐅᕗᖅ ᓇᓂᓯᓂᕐᒥ ᐃᓕᓴᐃᔨᓂ ᐊᒻᒪ ᐃᓕᓐᓂᐊᖅᑎᑦᑎᔨᐅᔪᓂ ᐱᓕᕆᐊᖑᔪᒧᑦ.” ᐅᖃᓚᐅᖅᐳᖅ.

ᑐᕌᒐᒃᓴᖓ ᐊᖏᒡᓕᒋᐊᖅᑎᑦᑎᓂᕐᒥ ᐱᕕᒃᓴᖃᕐᓂᐅᔪᓂ ᐃᓕᓐᓂᐊᖅᑎᓄᑦ ᑲᑎᖃᑎᖃᕐᓂᖏᓐᓂ  ᓄᓇᖃᖅᑳᖅᓯᒪᔪᓄᑦ ᐅᖃᐅᓯᕐᒥ ᐅᖃᖅᑎᐅᔪᓂ, ᐃᓚᒋᐊᖅᓯᓚᐅᖅᐳᖅ.

“ᐋᑐᕚ ᖁᑦᑎᕐᔪᐊᖅᑐᒥ ᐅᓄᕐᓂᖃᖅᐳᖅ ᐃᓄᖕᓂ ᓄᓇᖃᖅᑐᓂ ᐅᕙᓂ ᐊᔾᔨᒌᙱᕈᓘᔭᖅᑐᓄᑦ ᐱᔾᔪᑕᐅᔪᓄᑦ ᐊᒻᒪ ᓲᖃᐃᒻᒪ ᐃᓗᐊᓂ ᐃᓕᓐᓂᐊᕐᕕᑦᑎᓐᓂ, ᑕᐃᒫᒃ ᑐᑭᓯᓇᑦᑎᐊᖅᑐᒥ ᐃᓂᐅᕗᖅ ᑕᐅᑐᒃᑕᑐᐊᖃᑲᐃᓐᓇᕐᓂᕐᒥ ᐅᕙᑦᑎᓐᓄᑦ,” ᓯᒥᑦ ᐅᖃᓚᐅᖅᐳᖅ.

2022−ᒥ, ᑲᓇᑕᒥ ᑭᓪᓕᓯᓂᐊᖅᑎᒃᑯᑦ ᐅᓂᒃᑳᕆᓚᐅᖅᐳᑦ 1,730−ᓂ ᐃᓄᖕᓂ ᓄᓇᖃᖅᐳᑦ ᐋᑐᕚ-ᒑᑎᓅᒥ ᐊᕕᒃᑐᖅᓯᒪᓂᖓᓂ.

Share This Story

(0) Comments

Join the Conversation

Your email address will not be published. Required fields are marked *

*