ᐱᕋᔭᒃᑎᐅᕙᒃᑐᑦ ᑲᑐᔾᔨᖃᑎᒌᑦ ᑐᕌᒐᖃᖅᑐᑦ ᓄᓇᕗᒥᑦ, ᐸᓖᓯᒃᑯᑦ ᐅᖃᖅᑐᑦ

For English version, see Organized crime targeting Nunavut with drugs, RCMP says

ᑲᓇᑕᒥ ᐊᒻᒪ ᓄᓇᕐᔪᐊᕐᒥ ᐱᕋᔭᒃᑎᐅᕙᒃᑐᑦ ᐃᖏᕐᕋᑎᑦᑎᕙᓪᓕᐊᔪᑦ ᓱᐴᕐᑐᒐᕐᓂ ᐋᖓᔮᕐᓇᖅᑐᓂ ᓄᓇᕗᒧᑦ ᐊᒻᒪᓗ ᑕᒫᓂ ᓂᐅᕐᕈᑎᖃᖃᑦᑕᖅᑐᑦ ᐅᓄᕐᓯᕙᓪᓕᐊᕗᑦ, ᐅᖃᕐᑐᖅ ᓰᕝ ᓲᐳᐃᓐᑕᓐᑕᓐᒡ ᑭᐊᓐᑦ ᐸᐃᒃ, ᓄᓇᕗᒥᑦ ᐸᓕᓯᓄᑦ ᐊᖓᔪᖅᑳᕆᔭᐅᔪᖅ.

ᐸᓖᓯᑦ ᓴᖅᑭᔮᖅᑎᑦᑎᔪᑦ 6 ᑭᓗᒍᕌᒻᔅᓂ ᑯᑲᐃᓐᒥ, $280,000-ᓂ ᑮᓇᐅᔭᓂ ᐊᒻᒪᓗ ᐅᓄᕈᓘᔭᕐᑐᓂᒃ ᖁᑭᐅᑎᓂ ᐊᐃᕆᓕ 15-ᖑᑎᓪᓗᒍ ᑐᓴᒐᒃᓴᓕᐅᖅᑎᓪᓗᒋᑦ. ᐅᓇ ᐃᓚᐃᓐᓇᑯᓗᖓ ᐋᖓᔮᕐᓇᖅᑐᓂ ᓱᐴᕐᑐᒐᕐᓇᖅᑐᐃᑦ ᐊᒻᒪ ᐱᖁᑎᓂᒃ ᐸᓖᓯᓄᑦ ᑎᒍᔭᐅᓂᑯᓂ ᐊᕐᕌᒎᑉ ᐃᓗᐊᓂ. (ᐊᔾᔨᓕᐅᕆᔨ ᐋᑎ ᓵᑭᓯᐊᓐ)

“ᐅᑯᐊ ᐊᖏᔫᑕᐅᓈᖅᓯᒪᔪᑦ ᑎᑭᑎᑕᐅᕙᓪᓕᐊᔪᑦ ᐃᓄᖕᓄᑦ ᑖᒃᑯᓂᖓ ᑐᖁᓐᓇᖅᑐᓂᒃ ᓄᓇᕗᒧᑦ,” ᐅᖃᒃᑲᓐᓂᖅᑐᖅ ᓄᓇᕗᒥᑦ ᒪᓕᒐᓕᕆᔨᒃᑯᓐᓄᑦ ᒥᓂᔅᑕ ᔪᐊᔾ ᕼᐃᒃᔅ, ᐸᐃᒃ ᓴᓂᑦᑎᐊᖓᓃᖢᓂ ᑐᓴᒐᒃᓴᓕᐅᖅᑎᓪᓗᒋᑦ ᐊᐃᕆᓕ 15-ᖑᑎᓪᓗᒍ ᐅᕙᓂ ᐸᓖᓯᒃᑯᓐᓂ ᐃᖃᓗᖕᓂ.

ᐅᓄᕈᓘᔭᕐᒪᑕ ᐊᖅᑯᑎᐅᑎᑕᐅᕙᒃᑐᑦ ᓱᐴᕐᑐᒐᕐᓂ ᐊᖓᔮᕐᓇᖅᑐᓂ ᓄᓇᕗᒧᙵᐅᔪᓂᒃ, ᐃᓚᖃᖅᖢᒍ ᑎᑎᖃᒃᑯᕕᒃᑯᑦ ᓇᒡᓯᐅᔾᔭᐅᕙᒃᑐᑦ ᐊᒻᒪᓗ ᐃᓄᖕᓄᑦ ᓇᒃᓴᖅᑕᐅᕙᒃᖢᑎᒃ ᐅᑯᓇᙵ ᔭᓗᓇᐃᒥ, ᐋᑐᕚᒥ, ᒪᓐᑐᕆᐊᒥ ᐅᕝᕙᓘᓐᓃᑦ ᐅᐃᓂᐱᒡᒥᑦ, ᐸᐃᒃ ᐅᖃᕐᑐᖅ.

ᐃᓚᖏᑦᑎᒍᑦ, ᐸᓖᓯᒃᑯᑦ ᖃᐅᔨᓴᖅᑎᐅᔪᑦ ᖃᐅᔨᖃᑦᑕᕐᒪᑕ ᓂᐅᕐᕈᑎᖃᖅᑐᓄᑦ ᐊᒃᑐᐊᓂᕆᔭᐅᔪᑦ ᑲᓇᑕᐅᑉ ᓯᓚᑖᓂ.

“ᑭᓱᓕᒫᑦ — ᑎᔅᓯᓇᕋᓱᙱᖢᖓ — ᓵᒦᑦᑐᐃᓐᓇᐅᕗᑦ,” ᐸᐃᒃ ᐅᖃᕐᑐᖅ, ᑖᒃᑯᐊ. ᑖᓐᓇ ᐊᒻᒪ ᕼᐃᒃᔅ ᐃᒃᓯᕚᖅᑑᒃ ᑭᐴ ᓴᓂᑦᑎᐊᖓᓂ ᖃᖓᓃᖢᑎᒃ 6 ᑭᓗᒍᕌᒻᔅ ᑯᑲᐃᓐ, $280,000 ᑖᓚᐃᑦ ᑮᓇᐅᔭᐃᑦ ᐊᒻᒪᓗ ᐅᓄᕈᓘᔭᒻᒪᕆᒃᑐᑦ ᖁᑭᐅᑎᑦ ᐱᕋᔭᖕᓂᒃᑯᑦ ᐱᔭᐅᓯᒪᓂᑯᓂᒃ. ᐅᖃᓚᐅᕐᑑᒃ ᐅᑯᐊᒎᖅ ᐃᓚᐃᓐᓇᓪᓚᑯᓗᖏᑦ ᓱᐴᖅᑐᒐᑦ ᐋᖓᔮᕐᓇᖅᑐᑦ ᐱᔭᐅᓯᒪᔪᑦ ᐸᓕᓯᓄᑦ ᐊᕐᕌᒎᑉ ᐃᓗᐊᓂ.

ᑕᐃᒪᙵᑦ ᓄᓇᕗᑦ ᐱᒋᐊᓚᐅᕐᓯᒪᑎᓪᓗᒍ 1999-ᒥ, ᐸᓖᓯᒃᑯᑦ ᓇᓂᓯᖃᑦᑕᖕᓂᖏᑦ ᐅᓄᕐᓯᕙᓪᓕᐊᔪᑦ ᓱᐴᕐᑐᒐᐃᑦ ᐋᖓᔮᕐᓇᖅᑐᑦ ᑎᑭᑎᑕᐅᕙᓪᓕᐊᔪᑦ ᐊᒻᒪ ᑎᒍᔭᐅᖃᑦᑕᕐᑐᑦ ᓄᓇᕗᒥᑦ, ᐸᐃᒃ ᐅᖃᕐᑐᖅ.

ᓲᕐᓗ, 2025-ᒥ, ᐸᓖᓯᒃᑯᑦ ᐃᖃᓗᒃᑑᑦᑎᐊᕐᓂ ᑎᒍᓯᓚᐅᕐᓯᒪᔪᑦ 1.5 ᑭᓗᒍᕌᒻᔅ ᑯᑲᐃᓐᓂ ᐊᑭᖃᓪᓗᐊᖅᑐᓂᒃ $300,000.

ᐸᐃᒃ ᐅᖃᓚᐅᕐᑐᖅ ᓂᐅᕕᐊᒃᓴᖃᖃᑦᑕᕐᓂᖅ ᐋᖓᔮᕐᓇᖅᑐᓂᒃ ᓱᐴᕐᑐᒐᕐᓂ ᖃᓄᐃᓕᐅᕈᑎᐅᕈᓘᔭᖃᑦᑕᓚᐅᕐᓂᖏᓐᓂ ᐊᕐᕌᓂᐅᓵᖅᑐᖅ ᐊᒻᒪᓗ ᖃᓄᐃᓕᐅᕈᑎᐅᓯᒪᓪᓗᑎᒃ ᓄᓇᓕᖕᓂ ᐃᓄᖃᓪᓗᐊᖅᑐᒥ 2,000-ᓂ, ᐊᒥᓱᓪᓗ ᓄᓇᖃᖅᑐᑦ ᐅᓗᕆᐊᓇᖅᑐᒦᓐᓇᓱᒋᓕᖅᖢᑎᒃ.

ᐃᖃᓗᐃᑦᑕᐅ ᒫᓐᓇᓵᖅ ᐅᓄᒻᒪᕆᒃᑐᓂ ᐋᖓᔮᕐᓇᖅᑐᓂ ᑕᑯᖃᑦᑕᕐᓯᒪᖕᒥᔪᑦ ᐱᔭᐅᖃᑦᑕᖅᑐᓂᒃ — ᒫᓂ 6.2 ᑭᓗᒍᕌᒻᔅᓂ ᑯᐊᐃᓐᓂ ᑎᒍᓯᓯᒪᓪᓗᑎᒃ ᐸᓖᓯᒃᑯᑦ 2025-ᒥ, ᖁᕝᕙᖅᐹᓪᓕᖅᓯᒪᓪᓗᓂ ᐅᕙᙵᑦ 32 ᒍᕌᔅ 2024-ᒥ.

ᑲᑎᓕᒫᖅᖢᑎᒃ $1.24 ᒥᓕᐊᓐ ᑖᓚᑐᓪᓗᐊᕐᑐᑦ ᐋᖓᔮᕐᓇᖅᑐᑦ ᓱᐴᕐᑐᒐᐃᑦ ᑎᒍᔭᐅᓚᐅᕐᓯᒪᔪᑦ ᐃᖃᓗᖕᓂ 2024-ᒥ ᐊᒻᒪ 2025-ᒥ ᑖᒃᑯᐊ ᑲᑎᓯᒪᓪᓗᑎᒃ.

27 ᐃᓄᐃᑦ ᐸᓯᔭᒃᓴᙳᖅᑎᑕᐅᓯᒪᔪᑦ ᐋᖓᔮᕐᓇᖅᑐᓂ ᐊᒃᑐᐊᔪᓄᑦ ᐱᕋᔭᐅᑎᓄᑦ.

“ᑕᐃᒪᓕ ᐃᒪᓐᓇ ᐅᖃᕈᒪᔪᒍᑦ, ‘ᐋᒃᑲ, ᐅᓇ ᓄᓇᕗᑦ ᒪᑐᐃᖓᙱᑦᑐᖅ ᐋᖓᔮᕐᓇᖅᑐᓄᑦ ᓱᐴᕐᑐᒐᓕᕆᓂᕐᒥ,’” ᐸᐃᒃ ᐅᖃᕐᑐᖅ.

ᐃᓄᖕᓂ ᑐᓴᐅᒪᑎᑦᑎᓇᓱᒃᑐᖅ ᐅᖃᐅᓯᖃᖃᑦᑕᖁᔨᓪᓗᓂ ᐋᖓᔮᕐᓇᖅᑐᓂ ᓱᐴᕐᑐᒐᕐᓂ ᐅᖃᐅᓯᖃᖃᑦᑕᖁᔨᓪᓗᓂ, ᐸᓖᓯᓄᒻᒪᕆᐅᙱᑦᑑᒐᓗᐊᖅ ᑭᓯᐊᓂᓕ ᖃᐅᔨᒪᔭᐅᙱᓪᓗᑎᒃ ᐱᕋᔭᖕᓂᕐᒥ ᓄᖅᑲᖅᑎᑦᑎᓇᓱᖕᓂᒧᑦ ᐅᖄᓚᕝᕕᐅᔪᓐᓇᖅᑐᒃᑯᑦ.

ᕼᐃᒃᔅ ᐅᖃᓚᐅᕐᑐᖅ ᓄᓇᕗᒥᑦ ᒐᕙᒪᒃᑯᑦ ᑕᑯᔪᒪᓂᕋᖅᖢᓂᒋᑦ ᓴᐳᓐᓂᐊᕐᓂᖅ ᐊᒃᑐᕉᑕᐅᒃᑲᓐᓂᕈᓪᓗᓂᐅᒃ ᐅᕙᓂ ᔭᓗᓇᐃᕝ ᒥᑦᑕᕐᕕᐊᓂᒃ, ᑖᓐᓇ ᐃᓱᒪᒋᔭᐅᖕᒪᑦ ᓱᐴᕐᑐᒐᓕᕆᓂᕐᒥ ᓂᐅᕕᐊᒃᓴᕐᕕᐅᖃᑕᐅᓪᓚᕆᖕᓂᖏᓐᓂ ᓄᓇᕗᒥᑦ.

ᒫᓐᓇᓕ, ᒥᑦᑕᕐᕕᒃ ᖃᐅᔨᓴᖃᑦᑕᙱᒻᒪᑕ ᖃᖓᑕᓲᒃᑰᕐᓂᐊᖅᑐᓂᒃ ᐅᑭᐅᕐᑕᖅᑐᕐᒥ ᓄᓇᓕᖕᓄᐊᖃᑦᑕᖅᑐᓂᒃ.

ᑕᐃᒪᓐᓇ ᖃᐅᔨᓴᕈᑎᒃᓴᓂ ᐊᓯᔾᔩᕐᔪᑎᐅᓇᔭᕐᒪᑦ ᑕᒪᐃᓐᓂ ᑎᐅᕆᑑᕆᑎᒍ ᐊᒻᒪ ᒐᕙᒪᑐᖃᒃᑯᑦ ᒪᓕᒐᓕᕆᓂᖓᓂᒃ, ᐅᖃᕐᑐᖅ.

“ᑕᒪᓐᓇ ᖃᓄᒃᑲᓐᓂᖅ ᐱᒻᒪᕆᐊᓂᖓ ᐅᖃᐅᓯᐅᒃᑲᓐᓂᕈᓐᓇᙱᒻᒪᑦ ᑕᒪᓐᓇ ᓯᕗᒧᑦ ᐱᒋᐊᖅᑎᑕᐅᓂᐊᕐᓗᓂ,” ᕼᐃᒃᔅ ᐅᖃᕐᑐᖅ.

“ᐅᓇ ᒪᑯᓇᙶᙱᒻᒪ ᐋᖓᔮᕐᓇᖅᑐᓂ ᓱᐴᕐᑐᒐᕐᓂᐊᖅᑕᖏᓐᓂ ᓇᒃᓴᖅᐸᒃᓗᑎ,” ᐅᖃᕐᑐᖅ, ᐅᖃᐅᓯᖃᖅᖢᓂ ᐅᓄᒻᒪᕆᒃᑐᓂ ᓱᐴᕐᑐᒐᕐᓂ ᐋᖓᔮᕐᓇᖅᑐᓂ ᑎᒍᔭᐅᓯᒪᓕᕐᑐᓂᒃ. “ᐅᑯᐊ ᑲᑐᔾᔨᖃᑎᒌᖑᔪᑦ — ᑕᐃᒪᐃᓐᓂᖏᓐᓄ ᑕᐃᒪᓐᓇ ᑭᓗᒍᕌᒻᔅᒪᕆᐊᓗᖕᓂ ᐱᑲᑕᖕᓂᖏᓐᓂ.”