ᐋᑐᕚ ᐅᖓᕙᕆᐊᖅᑎᑦᑎᕗᖅ ᐃᓄᐃᑦ ᓱᕈᓯᕐᓄᑦ ᓯᕗᓪᓕᐅᓗᑎᒃ ᐱᒋᐊᕈᑕᐅᔪᖅ ᑮᓇᐅᔭᖃᖅᑎᑦᑎᓂᐅᔪᒥ

For the English version of this story, please see Ottawa extends Inuit Child First Initiative Funding as expiry nears.

ᒐᕙᒪᑐᖃᒃᑯᑦ ᐅᖓᕙᕆᐊᖅᓯᓂᐊᖅᐳᑦ ᐃᓄᐃᑦ ᓱᕈᓯᕐᓄᑦ ᓯᕗᓪᓕᐅᓗᑎᒃ ᐱᒋᐊᕈᑕᐅᔪᒥ, ᓴᖑᑎᑦᑎᔪᒥᒃ ᐃᑲᔪᖅᓱᐃᔨᐅᔪᓂ ᐱᓕᕆᐊᖑᔪᒥ ᐃᓂᖅᑎᕆᓚᐅᖅᑐᒥ “ᐃᓄᖕᓄᑦ ᐱᐅᓯᒋᐊᖅᑎᑦᑎᓂᐅᔪᒥ ᐃᑲᔪᖅᓱᐃᓂᕐᒥ ᑐᐊᕕᕐᓇᕐᓂᐅᔪᒥ” ᑮᓇᐅᔭᖃᖅᑎᑦᑎᓂᐅᔪᒥ ᐃᓱᓕᓐᓂᖃᕐᓂᐊᕈᓂ ᒫᔾᔨ 31−ᒥ ᐸᕐᓇᒃᑕᐅᓯᒪᓂᖓᓂ.

ᒋᐊᕆ ᐊᓇᓐᑕᓴᖓᕇ, ᑭᖕᒧᑦ−ᓄᓇᖃᖅᑳᖅᓯᒪᔪᓄᑦ ᐱᓕᕆᓂᐅᔪᒥ ᒥᓂᔅᑕᖓ, ᐅᖃᐅᓯᖃᓚᐅᖅᐳᖅ ᐊᕐᕌᒍᒥ-ᐊᑕᐅᓯᕐᒥ ᐅᖓᕙᕆᐊᖅᑕᐅᓂᖓᓂ ᐱᓕᕆᐊᖑᔪᒥ ᓄᓇᕗᒻᒥ-ᐱᔾᔪᑎᓕᖕᒥ ᐅᖃᐅᓯᒃᓴᓕᐊᖑᔪᒥ ᐋᑐᕚᒥ ᒫᔾᔨ 8−ᒥ.

ᐅᖃᓪᓚᒃᖢᓂ ᖃᔅᓯᒐᓚᖕᓄᑦ ᐃᓄᖕᓄᑦ ᐋᑐᕚᒥ ᓄᓇᕗᑦ ᓯᕗᓂᒃᓴᕗᑦ ᓯᓚᑦᑐᖅᓴᕐᕕᖓᓂ, ᐊᓇᓐᑕᓴᖓᕇ ᐅᖃᓚᐅᖅᐳᖅ ᐅᖃᐅᓯᒃᓴᓕᐅᕐᓂᖃᕐᓂᖓᓂ ᐅᖓᕙᕆᐊᖅᑎᑕᐅᓂᐅᔪᒥ ᑭᒡᒐᖅᑐᐃᓪᓗᓂ ᓄᓇᖃᖅᑳᖅᓯᒪᔪᓄᑦ ᐱᔨᑦᑎᕋᖅᑎᓄᑦ ᒥᓂᔅᑕᖓᓄᑦ ᐹᑎ ᕼᐊᔾᑐᒧᑦ, ᐱᓕᕆᕝᕕᖓ ᑮᓇᐅᔭᖃᖅᑎᑦᑎᔪᒥ ᐱᓕᕆᐊᖑᓂᐅᔪᒥ.

“ᓇᓗᓇᐃᖅᓯᔪᒪᓚᐅᖅᐳᒍᑦ ᐃᓚᑰᓂᖃᙱᓐᓂᖓᓂ ᐱᔨᑦᑎᕋᕐᓂᐅᔪᓂ,” ᐊᓇᓐᑕᓴᖓᕇ ᐅᖃᓚᐅᖅᐳᖅ ᐊᐱᖅᓱᖅᑕᐅᓂᐅᔪᒥ ᐅᖃᐅᓯᒃᓴᓕᐅᓚᐅᖅᑎᓪᓗᒍ.

ᖁᙱᐊᖅᑐᑦ ᐸᑦᑕᒃᑐᕐᔪᐊᓕᓚᐅᖅᐳᑦ ᐅᖃᓚᐅᖅᑎᓪᓗᒍ ᐱᓕᕆᐊᖑᔪᖅ ᑲᔪᓯᓂᐊᕐᓂᖓᓂ.

“ᑐᓴᖅᓯᒪᕗᖓ ᐱᐅᔪᒥ ᐊᒃᑐᐃᓂᖃᕐᓂᖓᓂ ᓱᕈᓯᕐᓄᑦ ᓯᕗᓪᓕᐅᓗᑎᒃ ᐱᒋᐊᕈᑕᐅᔪᑦ ᑐᓂᓯᓯᒪᓂᖓᓂ,” ᐊᓇᓐᑕᓴᖓᕇ ᐅᖃᓚᐅᖅᐳᖅ, ᐃᓚᒋᐊᖅᓯᓪᓗᓂ ᐃᓕᑦᑎᓚᐅᕐᓂᖓᓂ “ᓯᕗᓪᓕᐅᓪᓗᓂ” ᐱᓕᕆᐊᖑᔫᑉ ᐊᒃᑐᐃᓂᖓᓂ ᓄᓇᕗᒻᒦᑎᓪᓗᒍ ᒐᕙᒪᒃᑯᓐᓄᑦ ᐱᓕᕆᓂᐅᔪᒥ ᖃᔅᓰᖅᓱᒐᓚᒃᖢᓂ ᑕᒪᑐᒪᓂ ᐊᕐᕌᒎᔪᒥ.

ᐊᓇᓐᑕᓴᖓᕇ ᐅᖃᐅᔾᔨᓚᐅᖅᐳᖅ ᓄᓇᑦᓯᐊᖅ ᑐᓴᒐᒃᓴᓕᕆᔨᒃᑯᓐᓂ ᕕᕗᐊᕆᒥ ᐊᔪᕐᓇᓚᐅᖅᐳᖅ ᐅᖓᕙᕆᐊᖅᓯᓂᕐᒥ ᐱᓕᕆᐊᖑᔪᒥ ᑭᓯᐊᓂ ᑲᓇᑕᐅᑉ ᒪᓕᒐᓕᐅᖅᑎᖏᑦ ᐅᑎᕈᑎᒃ ᒫᔾᔨ 24−ᒥ. ᐃᖅᑲᓇᐃᔭᖅᑏᑦ ᕼᐊᔾᑐ ᑎᑎᕋᕐᕕᖓᓂ ᐅᖃᓚᐅᖅᐳᖅ ᒐᕙᒪᒃᑯᑦ ᐱᓕᕆᓇᓱᐊᕐᓂᖏᓐᓂ ᐊᑯᓂᐅᔪᒥ ᑮᓇᐅᔭᖃᖅᑎᑦᑎᓂᐅᔪᒥ ᐱᓕᕆᐊᖑᔪᒥ.

ᑲᓇᑕᒥ ᐊᖓᔪᖅᑳᕐᔪᐊᖅ ᔭᔅᑎᓐ ᑐᕉᑑ ᑐᕌᖓᓪᓗᓂ ᐃᓚᐅᖃᑕᐅᓚᐅᖅᐳᖅ ᐃᓱᒪᓕᐊᖑᔪᒥ ᐅᖓᕙᕆᐊᖅᓯᓂᕐᒥ ᐱᓕᕆᐊᖑᔪᒥ ᑲᓇᑕᐅᑉ ᒪᓕᒐᓕᐅᖅᑎᖏᑦ ᐅᑎᓚᐅᙱᓐᓂᖏᓐᓂ, ᐊᓇᓐᑕᓴᖓᕇ ᐅᖃᓚᐅᖅᐳᖅ, ᑕᐃᓯᓪᓗᓂ ᐊᕐᕌᒍᒧᑦ-ᐊᑕᐅᓯᕐᒥ ᐅᖓᕙᕆᐊᖅᑕᐅᓂᖓᓂ “ᐊᑕᐅᓯᐊᑐᐃᓐᓇᖅᑐᒥ” ᓅᓐᓂᐅᔪᒥ ᑭᐅᓂᕐᒧᑦ “ᓱᖏᐅᓐᓇᙱᕐᔪᐊᖅᑐᒥ ᐊᑲᐅᙱᓕᐅᕈᑕᐅᔪᒥ.”

ᐊᓇᓐᑕᓴᖓᕇ ᓇᓗᓇᐃᖅᓯᓚᐅᖅᐳᖅ ᐊᕐᕌᒍᒥ-ᐊᑕᐅᓯᕐᒥ ᐅᖓᕙᕆᐊᕐᓂᐅᕗᖅ — ᐊᑯᓂᐅᔪᒥ ᐋᖅᑭᒍᑎᒃᓴᐅᙱᑦᑐᖅ — ᓱᓕ ᐅᕘᓈᕆᐊᖃᖅᑐᒥ “ᑲᓇᑕᐅᑉ ᒪᓕᒐᓕᐅᖅᑎᖏᓐᓄᑦ ᐱᓕᕆᓂᐅᔪᒥ.”

ᐃᓄᐃᑦ ᓱᕈᓯᕐᓄᑦ ᓯᕗᓪᓕᐅᓗᑎᒃ ᐱᒋᐊᕈᑕᐅᔪᖅ ᑮᓇᐅᔭᖃᖅᑎᑦᑎᓂᐅᔪᒥ ᐊᑕᐅᓯᐅᓚᐅᖅᐳᖅ “ᐱᒻᒪᕆᕐᔪᐊᖑᔪᓂ ᖃᓄᐃᓕᐅᕐᓂᐅᔪᓂ” ᑐᕉᑑ ᐃᓱᓕᑦᑎᔪᒪᓚᐅᕐᓂᖓᓂ ᓄᖅᑲᓚᐅᙱᓐᓂᖓᓂ ᑲᓇᑕᒥ ᐊᖓᔪᖅᑳᕐᔪᐊᖑᓂᖓᓂ

ᓕᐳᕈᒃᑯᑦ ᓂᕈᐊᓚᐅᖅᐳᑦ ᒫᒃ ᑳᕐᓂᒥ ᓄᑖᖑᔪᒥ ᐱᓕᕆᕝᕕᐅᔪᒥ ᓯᕗᓕᐅᖅᑎᐅᓂᖓᓂ ᒫᔾᔨ 9−ᒥ. ᑳᕐᓂ ᐃᓇᖏᖅᓯᕗᖅ ᑐᕉᑑᒥ, ᐅᖃᐅᓯᖃᓚᐅᖅᑐᒥ ᔭᓄᐊᕆᒥ ᐸᕐᓇᐅᑎᖓᓂ ᓄᖅᑲᕐᓂᐊᕐᓂᕐᒧᑦ ᐊᕐᕌᒍᑲᓴᓂ 12−ᓂ ᐊᖓᔪᖅᑳᖑᓪᓗᓂ ᓕᐳᕈᒃᑯᓐᓄᑦ ᐱᓕᕆᕝᕕᐅᔪᒥ, ᐃᓚᖃᖅᑐᒥ ᐅᓄᕐᓂᖅᓴᐅᔪᓂ ᐊᕐᕌᒍᓂ 9−ᓂ ᑲᓇᑕᒥ ᐊᖓᔪᖅᑳᕐᔪᐊᖑᓂᖓᓂ.

ᐃᓄᐃᑦ ᓱᕈᓯᕐᓄᑦ ᓯᕗᓪᓕᐅᓗᑎᒃ ᐱᒋᐊᕈᑕᐅᔪᖅ ᑐᓂᓯᓲᖑᕗᖅ ᑮᓇᐅᔭᖃᖅᑎᑦᑎᓂᐅᔪᒥ ᐃᓄᖕᓄᑦ ᓱᕈᓯᕐᓄᑦ ᐃᑲᔪᖅᑕᐅᓂᖏᓐᓂ ᐊᑭᓖᓂᕐᒧᑦ ᑭᓱᑐᐃᓐᓇᓂ ᐊᒃᑐᐃᕙᒃᑐᒥ ᐋᓐᓂᐊᖃᕐᓇᙱᑦᑐᓕᕆᓂᖓᓐᓂ ᐅᕝᕙᓘᓐᓃᑦ ᐃᓕᓐᓂᐊᕐᓂᖓᓂ. ᒐᕙᒪᑐᖃᒃᑯᑦ ᐊᖏᖅᓯᒪᓚᐅᖅᐳᑦ $167.5 ᒥᓕᐊᓐᓂ ᐊᕐᕌᒍᓄᑦ ᒪᕐᕉᖕᓄᑦ, ᐱᒋᐊᖅᑐᒥ 2023-24−ᒥ ᑮᓇᐅᔭᓕᕆᓂᕐᒥ ᐊᕐᕌᒍᖓᓂ, ᐱᓕᕆᐊᖑᔪᒧᑦ.

ᓱᖏᐅᓐᓇᓛᖑᔪᒥ ᐱᔨᑦᑎᕋᕐᓂᖓᓂ ᓂᕿᑖᕈᓐᓇᐅᑎᓂ ᐱᓕᕆᐊᖑᔪᓂ ᒫᓐᓇᓕᓴᐅᔪᒥ ᐊᑐᓕᖅᑎᑕᐅᓂᑯᒥ ᐊᒥᓱᓄᑦ ᓄᓇᕗᒻᒥ ᕼᐋᒻᓚᐅᔪᓂ. ᐊᕐᕌᓂ, ᐃᖃᓗᐃᑦ ᐱᒋᐊᖅᑎᑦᑎᓚᐅᖅᐳᖅ ᓂᕿᑖᕈᓐᓇᐅᑎᖓᓂ, ᑐᓂᓯᕙᒃᑐᒥ $500−ᒥ ᓂᕿᑖᕈᓐᓇᐅᑎᒥᒃ ᑕᖅᑭᑕᒫᒥ ᐃᓚᒌᖑᔪᓄᑦ ᐊᑐᓂ ᓱᕈᓯᕐᒧᑦ ᐅᑭᐅᓕᖕᓂ 18 ᑐᖔᓂ ᐊᒻᒪ ᖄᒃᑲᓐᓂᐊᒍᑦ $250−ᒥ ᐊᑐᓂ ᓱᕈᓯᕐᒧᑦ ᑐᓴᒪᓂ ᐊᕐᕌᒍᓕᖕᓂ ᑐᖔᓃᑦᑐᓄᑦ.

ᐃᑲᔪᖅᓱᐃᔨᐅᔪᑦ ᐱᓕᕆᐊᖑᔪᒥ, ᐃᓚᖃᖅᑐᒥ ᓄᓇᕗᒻᒥ ᑲᓇᑕᐅᑉ ᒪᓕᒐᓕᐅᖅᑎᖏᓐᓂ ᐃᓚᒋᔭᐅᔪᖅ ᓗᐊᕆ ᐃᓪᓚᐅᑦ, NDP−ᑯᓐᓄᑦ ᑲᑎᒪᔨᕐᔪᐊᖑᔪᓄᑦ ᖃᐃᖁᔨᓯᒪᕗᖅ ᒐᕙᒪᑐᖃᒃᑯᓐᓂ ᓕᐳᕈᒃᑯᓐᓄᑦ ᒐᕙᒪᐅᔪᓂ ᑕᖅᑭᒐᓴᖕᓄᑦ ᐅᖃᐅᓯᖃᕐᓂᕐᒥ ᐅᖓᕙᕆᐊᖅᓯᓂᐅᔪᒥ.

ᕕᕗᐊᕆ 28−ᒥ ᑐᓴᒐᒃᓴᓕᐊᖑᔪᒥ ᐋᖅᑭᒃᓱᖅᑕᐅᔪᒥ ᐃᓪᓚᐅᑦᒧᑦ, ᑕᔭ ᑑᑑ ᐃᖅᑲᓇᐃᔭᓲᖑᔪᒥ ᐅᑭᐅᖅᑕᖅᑐᒥ ᓱᕈᓯᕐᓄᑦ ᐊᒻᒪ ᒪᒃᑯᒃᑐᓄᑦ ᑐᙵᕕᐅᔪᒥ, ᐃᓂᖅᑎᕆᓚᐅᖅᐳᑦ ᓇᓗᓇᕐᓂᖓᓂ ᖃᓄᐃᓐᓂᐊᕐᒪᖔᑦ ᒫᔾᔨ 31 ᐊᓂᒍᓚᐅᖅᑎᓪᓗᒍ “ᐃᓄᖕᓄᑦ ᐱᐅᓯᒋᐊᖅᑎᑦᑎᓂᐅᔪᒥ ᐃᑲᔪᖅᓱᐃᓂᕐᒥ ᑐᐊᕕᕐᓇᕐᓂᐅᔪᒥ ᓴᓇᕙᓪᓕᐊᓂᖓᓂ.”

ᐃᓪᓚᐅᑦ ᐅᖃᓚᐅᖅᐳᖅ ᐱᓕᕆᐊᖑᔪᖅ ᐃᑲᔪᖅᓯᒪᕗᖅ ᐅᓄᕐᓂᖅᓴᐅᔪᓂ 15,000−ᓂ ᐃᓄᖕᓂ ᓱᕈᓯᐅᔪᓂ.