ᐋᑐᕚᒥ ᐃᓕᓐᓂᐊᖅᑎ ᐱᕕᒃᓴᖃᖅᐳᖅ ᐃᓕᑦᑎᓂᕐᒥ ᐃᓄᒃᑎᑐᒻᒥ

For the English version of this story, please see Ottawa students get chance to learn Inuktitut.

ᓵᒻ ᐊᐃᐱᓕ ᐃᒃᓯᕚᖅᐳᖅ ᐋᑐᕚᒥ ᐱᔭᕆᑐᔪᓂ ᒪᕐᕈᖓᓂ ᐃᓕᓐᓂᐊᕐᕕᖓᓂ ᐃᓕᓐᓂᐊᕐᕕᐊᕈᓯᕐᒥ, ᖁᙱᐊᖅᖢᓂ ᐅᖃᐅᓯᕐᒥ ᐱᓕᕆᔨᕐᔪᐊᖅ ᓃᓇ ᑯᐹᖅ ᐃᑯᒻᒪᒃᓴᐃᑎᓪᓗᒍ ᐅᔭᖅᑲᒥ ᖁᓪᓕᕐᒥ ᐃᓗᓪᓕᖅᓯᓚᐅᖅᑎᓪᓗᒍ ᐅᖅᓱᒥᕐ ᐊᒻᒪ ᑲᖒᔭᕐᒥ.

ᑯᐹᖅ ᐅᖃᓪᓚᒃᐳᖅ ᑲᑎᙵᓂᐅᔪᒥ ᑕᓪᓕᒪᓂ ᐃᓕᓐᓂᐊᖅᑎᓂ ᓴᓂᓕᐊᓂ ᐃᒃᓯᕚᖅᑐᓂ, ᐅᓂᒃᑳᕆᓪᓗᓂ ᖃᓄᖅ ᑕᐃᔅᓱᒪᓂᑐᖃᖅ ᐃᑯᒪᔾᔪᑎᐅᓚᐅᕐᓂᖓᓂ ᐊᒻᒪ ᐅᖅᑰᓴᕐᓂᕐᒧᑦ ᐃᓄᐃᑦ ᐊᖏᕐᕋᕆᔭᐅᔪᓂ.

ᐃᓕᓐᓂᐊᖅᑎᒥᒃ ᐊᐱᕆᔪᖃᕋᒥ ᖃᓄᖅ ᐆᒪᔫᑉ ᐅᖅᓱᖓ ᐊᑐᖅᑕᐅᕙᓚᐅᕐᓂᖓᓂ ᐃᑯᒻᒪᒃᓴᐃᓂᕐᒧᑦ ᖁᓪᓕᕐᒥ, ᑯᐹᖅ ᐅᓂᒃᑳᖅᐳᖅ ᓇᑦᑎᐅᑉ ᐅᕝᕙᓘᓐᓃᑦ ᕿᓚᓗᒐᐅᑉ ᐅᖅᓱᖓ ᑲᐅᑕᐅᔭᖅᑕᐅᓪᓗᓂ ᐅᖅᓱᙳᖅᑎᑕᐅᓪᓗᓂ.

ᓵᒻ ᐊᐃᐱᓕ, ᖁᑦᑎᖕᓂᓕᖕᒥ 12−ᒥ ᐃᓕᓐᓂᐊᖅᑎ ᐋᑐᕚᒥ ᐱᔭᕆᑐᔪᓂ ᒪᕐᕈᖓᓂ ᐃᓕᓐᓂᐊᕐᕕᖓᓂ, ᓇᖏᖅᐳᖅ ᐊᔾᔨᓕᐅᖅᑕᐅᓂᕐᒧᑦ ᕕᕗᐊᕆ 12−ᒥ ᐃᓕᓴᐃᔨᖓ, ᐃᓄᒃᑎᑐᑦ ᐱᓕᕆᔨᕐᔪᐊᖅ ᓃᓇ ᑯᐹᖅ, ᖁᓪᓕᕐᒥ ᐃᑭᒻᒧᒃᓴᐃᑎᓪᓗᒍ ᐃᓕᓐᓂᐊᕐᕕᐊᕈᓯᕐᒥ. (ᓃᕼᐋ ᐱᒧᓪᒧᑦ ᐊᔾᔨᓕᐅᖅᑕᐅᔪᖅ)

ᐊᐃᐱᓕ, ᖁᑦᑎᖕᓂᓕᖕᒥ 12−ᒦᑦᑐᖅ, ᐊᑕᐅᓯᐅᓪᓗᓂ ᓯᕗᓪᓕᖅᐸᐅᔪᓂ ᐃᓕᓐᓂᐊᖅᑎᓂ ᓄᑖᖑᔪᒥ ᐃᓄᒃᑎᑐᑦ ᐅᖃᐅᓯᕐᒥ ᐃᓕᓐᓂᐊᕐᕕᐊᕈᓯᐅᔪᒥ ᐊᑐᐃᓐᓇᐅᑎᑕᐅᔪᒥ ᕕᕗᐊᕆ 3−ᖑᓕᖅᑐᒥ. ᐅᖃᓚᐅᖅᐳᖅ ᑕᑯᕙᖓ ᐱᕕᕐᓴᐅᓂᖓᓂ ᐅᖃᓪᓚᒋᐅᖅᓴᒃᑲᓐᓂᕐᓂᕐᒥ ᐃᓄᒃᑎᑐᒻᒥ.

“ᐃᓕᒃᑎᒃᑲᓐᓂᕈᓐᓇᖅᐳᖓ ᐅᐅᖃᓯᓐᓂ ᐊᒻᒪ ᑐᑭᓯᐅᒪᓗᓂ ᐊᒻᒪ ᑭᐅᔪᓐᓇᕐᓗᖓ ᐃᓄᒃᑎᑐᑦ ᐅᖃᖃᑎᖃᖅᑎᓪᓗᖓ ᐃᓚᓐᓄᑦ. ᓯᕗᓪᓕᖅᐹᒥ ᐅᖃᐅᓯᕆᒐᒃᑯ ᑭᓯᐊᓂ ᐊᓯᐅᔨᓚᐅᕋᒃᑯ, ᐊᓕᐊᓇᐃᒍᓱᑦᑎᐊᖅᐳᖓ ᐃᓕᑦᑎᒃᑲᓐᓂᕐᓂᕐᒧᑦ,” ᐅᖃᓚᐅᖅᐳᖅ.

ᐅᓇ ᓯᕗᓪᓕᖅᐹᒥ ᐃᓕᓐᓂᐊᕐᓂᖅ ᐊᑐᐃᓐᓇᐅᑎᑕᐅᓂᖓᓐᓂ ᐋᑐᕚ−ᑳᕈᑎᓐ ᐊᕕᒃᑐᖅᓯᒪᓂᐅᔪᒥ ᐃᓕᓐᓂᐊᕐᕕᓂ ᑲᑎᒪᔨᖏᓐᓄᑦ.

“ᐃᖅᑲᐅᒪᓇᖅᑑᓂᐊᖅᐳᖅ ᓄᓇᖃᖅᑳᖅᓯᒪᔪᓄᑦ ᐃᓄᖕᓄᑦ, ᐱᓗᐊᖅᑐᒥ ᐃᓄᐃᑦ ᓄᓇᓕᐅᔪᓄᑦ, ᐱᔾᔪᑎᖃᖅᑐᒥ ᐅᖃᐅᓯᕐᒥ ᐅᑎᖅᑎᕆᓇᓱᐊᕐᓂᕐᒥ ᐊᒻᒪ ᐋᖅᑭᐅᒪᑎᑦᑎᓂᕐᒥ ᑲᑎᖃᑎᖃᕐᓂᖏᓐᓂ ᐃᓕᖅᑯᓯᖓᓐᓄᑦ,” ᐅᖃᓚᐅᖅᐳᖅ ᔭᓂᕗᕐ ᒥᓄᒥᓂ, ᓄᓇᖃᖅᑳᖅᓯᒪᔪᓄᑦ ᐅᖃᐅᓯᕐᓄᑦ ᐱᓕᕆᔨ ᐃᓕᓐᓂᐊᕐᕕᐅᑉ ᑲᑎᒪᔨᖏᓐᓄᑦ.

ᐃᓕᓐᓂᐊᕐᓂᖅ 8−ᓂ ᐃᓕᓐᓂᐊᖅᑎᖃᖅᐳᑦ ᐃᓚᐅᖃᑕᐅᔪᓂ ᖁᑦᑎᖕᓂᓕᖕᓂ 9−ᒥ 12−ᒧᑦ. ᑕᒪᒃᑭᒐᓚᐃᑦ ᐃᓕᓐᓂᐊᖅᑏᑦ ᐃᓕᓐᓂᐊᕐᕕᐊᕈᓯᕐᒥ ᐃᓅᑎᓪᓗᒋᑦ, ᖃᔅᓯᐊᕐᔪᖕᓂ ᐊᓪᓚᑕᖃᖅᐳᖅᑕᐅᖅ.

“ᖃᐅᔨᒪᕗᒍᑦ ᐱᔭᕆᐊᖃᓪᓚᕆᖕᓂᖓᓂ ᓄᓇᖃᖅᑳᖅᓯᒪᔪᓄᑦ ᐅᖃᐅᓯᕐᓂ ᐃᓗᐊᓂ ᐃᓕᓐᓂᐊᖅᑐᓕᕆᔨᒃᑯᓐᓄᑦ, ᑕᐃᒫᒃ ᐱᓪᓚᕆᐅᕗᖅ,” ᒥᓄᒥᓂ ᐅᖃᓚᐅᖅᐳᖅ, ᐃᓚᒋᐊᖅᓯᓪᓗᓂ ᐃᓕᓐᓂᐊᖅᑎᓂ ᐊᒻᒪ ᐃᓚᒋᔭᐅᔪᓂ ᐊᕕᒃᑐᖅᓯᒪᓂᐅᔪᒥ ᐊᐱᕆᓯᒪᓂᖏᓐᓂ ᖃᓄᖅ ᐃᓚᐅᖃᑕᐅᔪᓐᓇᕐᓂᖏᓐᓂ.

ᔮᔅᒥᓐ ᑐᐊᐃᒡ, ᓄᓇᖃᖅᑳᖅᓯᒪᔪᓄᑦ ᐃᓱᓕᑦᑎᓂᕐᒥ ᐊᔪᕆᖅᓱᐃᕙᒃᑐᖅ ᐃᓕᓐᓂᐊᕐᕕᖕᒥ, ᐱᓕᕆᖃᑕᐅᓚᐅᖅᐳᖅ ᐱᒻᒪᕆᐅᔪᒥ ᐊᑐᕐᓂᖓᓂ ᐃᑲᔪᖅᓱᐃᓂᕐᒥ ᐱᓕᕆᐊᖑᔪᒥ.

“ᑕᐃᑯᖓᑦᑕᐃᓐᓇᖅ ᐃᓕᓐᓂᐊᕐᕕᖕᒧᑦ ᑲᑎᒪᔨᐅᔪᓅᖃᑕᐅᓚᐅᖅᐳᖓ ᐃᓅᓪᓗᖓ ᐃᓕᓐᓂᐊᖅᑎᐅᓪᓗᖓ ᑖᒃᑯᓂᖓᑦᑕᐃᓐᓇᖅ ᐱᕕᒃᓴᖃᓚᐅᙱᑦᑐᒥ,” ᐅᖃᓚᐅᖅᐳᖅ.

“ᐱᒋᐊᓕᓵᖅᑎᓪᓗᖓ ᐃᓱᓕᑦᑎᓂᕐᒥ ᐊᔪᕆᖅᓱᐃᕙᒃᑐᒥ ᐊᕐᕌᒍᐸᓗᑦ ᑎᓴᒪᓂ ᖄᖏᖅᓯᒪᓕᖅᑐᓂ, ᐱᔨᑦᑎᕋᓚᐅᖅᐳᖓ ᖁᑦᑎᒃᑐᒥ ᐅᓄᕐᓂᐅᔪᓂ ᐃᓄᖕᓂ ᐃᑲᔪᖅᓱᐃᕌᓂᓚᐅᖅᑕᓐᓂ ᓄᓇᓕᖕᓂ, ᐊᒻᒪ ᖃᐅᔨᒪᓚᐅᖅᐳᖓ ᐊᒥᓱᓂ ᐃᓚᒌᖑᔪᓂ ᐊᒻᒪ ᐃᓄᑐᖃᕐᓂ. ᐃᓕᓐᓂᐊᕐᕕᖕᒥ ᑲᑎᒪᔨᐅᔪᓂ ᑐᑭᓯᐅᒪᑎᑦᑎᓇᓱᐊᓚᐅᖅᐳᖓ ᐱᒻᒪᕆᐅᓂᖓᓂ ᐊᔾᔨᒌᙱᓐᓂᐅᔪᒥ ᓄᓇᖃᖅᑳᖅᓯᒪᔪᓄᑦ ᐊᒻᒪ ᐃᓄᐃᑦ ᐃᓕᖅᑯᓯᖓᓐᓂ, ᐅᖃᐅᓯᕐᒥ, ᐊᒻᒪ ᐊᑐᖅᑕᐅᕙᓚᐅᖅᑐᓂ.”

ᐃᓕᓐᓂᐊᕐᓂᖅ ᐃᓕᓐᓂᐊᖅᑎᑕᐅᕗᖅ ᑯᐹᕐᒧᑦ, ᐃᓄᒃᑎᑐᑦ ᐸᐃᑉᐹᖃᖅᑎᑕᐅᓂᕐᒥ ᐋᓐᑎᐊᕆᐅ ᓯᓚᑦᑐᖅᓴᕐᕕᖕᒥ ᐃᓕᓴᐃᔨᓂ ᐊᔪᕐᓇᙱᑎᑕᐅᓚᐅᖅᐳᖅ ᐊᕐᕌᒍᒐᓴᓂ ᐃᑲᔪᖅᓱᐃᓂᐅᔪᒥ ᑐᙵᓱᕝᕕᖓ ᐃᓄᖕᓄᑦ ᐊᒻᒪ ᐅᖃᐅᓯᓕᕆᔩᑦ ᑲᑎᒪᔨᕋᓛᖑᔪᓂ.

ᐅᖃᐅᓯᓕᕆᔩᑦ ᑲᑎᒪᔨᕋᓛᑦ ᑲᑎᙵᓂᐅᕗᑦ ᐃᓄᖕᓂ ᐃᓄᑐᖃᕐᓂ ᑐᓂᓯᕙᒃᑐᓂ ᐊᑐᓕᖁᔭᐅᔪᓂ ᐋᓐᑎᐊᕆᐅ ᓯᓚᑦᑐᖅᓴᕐᕕᖕᒥ ᐃᓕᓴᐃᔨᓄᑦ ᐱᔾᔪᑎᖃᖅᑐᒥ ᐃᓕᓐᓂᐊᖅᑎᑦᑎᓂᐅᔪᒥ ᐃᓄᒃᑐᑦ ᐅᖃᐅᓯᕐᓂ ᐋᓐᑎᐊᕆᐅ ᐃᓗᐊᓂ.

ᖃᐅᔨᓴᐃᓲᖑᒋᕗᑦ ᐃᓕᓐᓂᐊᖅᑏᑦ ᐅᖃᐅᓯᕐᒥ ᐊᔪᙱᓐᓂᐅᔪᓂ, ᑐᓂᓯᓪᓗᑎᒃ ᑕᐃᒃᑯᓂᖓ ᖃᐅᔨᒫᓂᒃᑐᓂ ᐃᓄᒃᑎᑐᒻᒥ ᐱᕕᒃᓴᖃᕐᓂᐅᔪᒥ ᐱᓂᕐᒥ ᐃᓚᒋᐊᕈᑕᐅᔪᓂ. ᒫᓐᓇᒧᑦ ᑎᑭᖦᖢᒍ, ᐱᖓᓱᓂ ᐃᓕᓐᓂᐊᖅᑎᓂ ᐱᓯᒪᕗᑦ ᐃᓚᒋᐊᕈᑕᐅᔪᓂ.

ᐃᓄᒃᑎᑐᑦ ᐃᓕᓐᓂᐊᕐᓂᖅ ᑐᓂᓯᕙᒃᐳᖅ ᐃᓕᓐᓂᐊᖅᑎᓂ ᐃᓚᒋᐊᕈᑕᐅᔪᓂ ᐊᑐᖅᑕᐅᔪᓐᓇᖅᑐᓂ ᐃᓇᖏᖅᓯᓂᐅᔪᒥ ᐅᐃᕖᑎᑐᑦ ᐅᖃᐅᓯᕐᒥ ᐱᔭᕆᐊᖃᕐᓂᐅᔪᒥ ᐋᓐᑎᐊᕆᐅ ᒪᕐᕈᖓᓂ ᐃᓕᓐᓂᐊᕐᕕᖕᒥ ᐸᐃᑉᐹᖅᑖᕐᓂᕐᒧᑦ ᐊᒻᒪ ᐋᓐᑎᐊᕆᐅ ᒪᕐᕈᖓᓂ ᐃᓕᓐᓂᐊᕐᕕᖓᓂ ᐃᓱᓕᑦᑎᓂᕐᒧᑦ.

ᐃᓕᓐᓂᐊᕐᓂᖅ ᐃᓚᓕᐅᔾᔨᒋᕗᖅ ᐃᓄᐃᑦ ᐱᙳᐊᕈᓯᖏᓐᓂ, ᑲᑕᔾᔭᕐᓂᕐᒥ, ᕿᓚᐅᔾᔭᕐᓂᕐᒥ, ᐊᒻᒪ ᐱᖅᑯᓯᑐᖃᖅᑎᒍᑦ ᓄᓇᒥ-ᑐᙵᕕᓕᖕᓂ ᖃᓄᐃᓕᐅᕈᑕᐅᔪᓂ.

“ᐃᓕᓴᐃᔨ ᑲᑎᖃᑎᖃᖅᑎᑦᑎᓪᓚᕆᖕᓂᐊᖅᐳᖅ ᐃᓕᖅᑯᓯᒥ ᖃᐅᑕᒫᖑᔪᒧᑦ,” ᒥᓄᒥᓂ ᐅᖃᓚᐅᖅᐳᖅ.

“ᑕᐃᒫᒃ ᑕᐃᒪᐃᒐᔪᒃᑐᒥ ᐃᓕᓐᓂᐊᕐᕕᐊᕈᓯᐅᔾᔮᙱᓚᖅ ᐃᓕᓐᓂᐊᕐᓂᕐᒥ. ᖃᐃᖁᔨᓂᖃᖃᑦᑕᕐᓂᐊᖅᐳᖅ, ᐃᓕᓐᓂᐊᖅᑎᓂ ᓄᓇᓕᐊᕈᔾᔨᕙᒡᓗᓂ, ᓄᓇᓕᖕᓂ ᐱᓕᕆᖃᑎᖃᕐᓂᐅᔪᓄᐊᕐᓗᑎᒃ, ᐊᒻᒪ ᐃᓕᑦᑎᓂᕐᒥ ᖃᓄᖅ ᓴᓇᔪᓐᓇᕐᓂᖏᓐᓂ ᓇᖕᒥᓂᖅ ᖁᓪᓕᖏᓐᓂ ᐊᒻᒪ ᐅᔭᖅᑲᓂ ᓴᓇᙳᐊᒐᕐᓂ.”

ᑕᒪᒃᑭᓂ ᖃᓄᐃᓕᐅᕈᑎᒃᓴᓂ ᐸᕐᓇᒃᑕᐅᓯᒪᔪᓂ ᑕᒪᑐᒧᖓ ᐃᓕᓐᓂᐊᕐᓂᐅᔪᒥ, ᐊᐃᐱᓕ ᐅᖃᓚᐅᖅᐳᖅ ᖁᕕᐊᓐᓂᖅᐹᖑᕗᖅ ᖁᓕᑦᑕᐅᔭᓕᐅᕐᓂᕐᒥ.

ᐃᓕᓐᓂᐊᕐᕕᖕᒥ ᑲᑎᒪᔨᐅᔪᑦ ᐊᖏᒡᓕᒋᐊᖅᑎᑦᑎᓛᕈᒪᕗᑦ ᐱᓕᕆᐊᖑᔪᒥ ᓯᕗᓂᒃᓴᒥ.

“ᐊᒥᓱᓂ ᐱᔪᒪᓂᖃᖅᐳᑦ ᐊᓯᖏᓐᓂ ᐃᓕᓐᓂᐊᕐᕕᓂ ᑲᑎᒪᔨᐅᔪᑦ ᐃᓗᐊᓂ ᐊᒻᒪ ᐊᕕᒃᑐᖅᓯᒪᓂᐅᔪᖅ ᑐᓂᓯᔪᒪᓪᓗᑎᒃ ᐃᓄᒃᑎᑐᒻᒥ ᐊᓯᖏᓐᓄᑦ ᐃᓕᓐᓂᐊᖅᑎᐅᔪᓄᑦ,” ᒥᓄᒥᓂ ᐅᖃᓚᐅᖅᐳᖅ.

“ᑕᐃᒫᒃ ᐊᖏᒡᓕᕙᓪᓕᐊᓂᐊᖅᐳᒍᑦ, ᑭᓯᐊᓂ ᒫᓐᓇᐅᔪᒥ ᑕᐅᑐᒃᑕᑐᐊᖃᑲᐃᓐᓇᖅᐳᒍᑦ ᐆᒥᖓ ᐃᓕᓐᓂᐊᕐᓂᐅᔪᒥ ᐊᒻᒪ ᐱᒋᐊᕐᓂᑦᑎᓐᓂ, ᐊᒻᒪ ᐊᖏᒡᓕᕙᓪᓕᐊᓂᐊᖅᐳᒍᑦ ᓯᓚᒻᒧᑦ.”