ᐊᖏᕐᕋᕗᑦ: ᐅᑭᐅᖅᑕᖅᑐᒥᐅᑦ ᐊᒡᒐᖏᓐᓄ ᓴᓇᔭᐅᖃᑦᑕᑎᓪᓗᒋᑦ ᐅᑭᐅᖅᑕᖅᑐᒥᐅᑦ ᐊᖏᕐᕋᖏᑦ

ᐊᖏᕐᕋᕗᑦ ᑎᓴᒪᐅᓕᖅᑲᖓᓪᓗᓂ ᐅᓂᒃᑳᕆᔭᐅᔪᖅ ᓄᓇᑦᑎᐊᕐᒥ ᓇᒻᒥᓂᖅᑖᕈᑎᔅᓴᐅᓚᐅᖅᓯᒪᔪᖅ ᐃᓪᓗᓄᑦ ᐊᒻᒪᓗ ᐱᕙᓪᓕᐊᓂᕐᒧᑦ ᐊᒻᒪᓗ ᐃᓄᓐᓄᑦ ᐃᑲᔫᑎᔅᓴᓂᒃ ᓄᓇᕗᒻᒥᐅᑕᕐᓄᑦ ᓇᒻᒥᓂᖅ ᐃᓪᓗᓕᐅᕈᓐᓇᖁᓪᓗᒋᑦ.

“ᓅᓚᐅᖅᓯᒪᔪᒍᑦ ᓰᑏᑉᐱᕆᒥ 28, 1989−ᖑᑎᓪᓗᒍ,” ᐅᖃᖅᑐᓂ ᒫᑕ ᕼᐃᒃᔅ, ᐃᔅᓯᕚᖃᑎᓕᒃ ᐅᐃᒥᓂᒃ, ᐃᓐᓇᕐᒥᑦ ᕌᐳᑦ ᕼᐃᒃᔅᒥᑦ, ᓂᕐᕆᕕᖓᓂ ᐅᑭᐊᔅᓵᖑᑎᓪᓗᒍ ᓯᕙᑖᕐᕕᒻᒥ ᐅᓐᓄᓴᒃᑯᑦ ᑲᖏᖅᖠᓂᕐᒥ. ᐃᓪᓚᖅᓯᑲᓪᓚᑦᑐᓂ, ᖁᖓᑦᑐᓂᓗ ᐃᖅᑲᐃᒐᒥ ᐅᓪᓗᖓᓂᓪᓗ ᐃᖅᑲᐅᒪᑦᑎᑦᑕᐅᑎᒋᓪᓗᓂ. ᑕᒫᓂᖃᐃ 35−ᓂᒃ ᐅᑭᐅᖑᓕᖅᑐᓂᑦ ᐊᓂᒍᖅᑐᓂᒃ, ᐊᖏᕐᕋᖓ ᓱᓕ ᒪᑭᑕᔪᖅ ᐱᑐᖃᐅᓕᖅᑐᖅ ᓯᐊᕐᓇᐅᓪᓗᓂ “ᓲᕐᓗ ᐃᔪᕈᑦᑕᓕᒃ” ᓯᓚᑖᓂ ᑕᑯᓪᓗᒍ, ᒫᑕ ᐅᖃᖅᑐᖅ ᑭᒃᑯᓕᒫᓄᑦ, ᓴᓗᒪᔫᒐᓗᐊᖅ ᐱᕕᑎᓪᓗᓂᓗ ᐃᓗᐊ.

ᕼᐃᒃᔅ ᐱᕈᖅᓴᐃᓯᒪᔪᖅ ᕿᑐᕐᖓᖏᓐᓂ ᐱᖓᓲᔪᖅᑑᓪᓗᑎᑦ ᐊᖏᕐᕋᖓᓂ. ᕿᑐᕐᖓᖏᑦ ᓯᐅᕆ, ᓵᓐᑎ, ᐹᐱ, ᓲᓴᓐ, ᐸᓐᔨᒪᓐ ᐊᒻᒪᓗ ᑐᕆᓂᑎ ᑕᕝᕙᓂ ᐱᕈᔅᓴᓯᒪᔪᐃᓐᓇᐃᑦ, ᐃᕐᖑᑕᖏᓪᓗ ᑕᐃᑲᓂᒥᐅᑕᐅᓕᖅᑐᑎᑦ. ᑭᖑᕚᖏᑦ ᑖᒃᑯᐊ ᐳᓛᕐᕕᒻᒦᕋᔭᑦᑐᑎᑦ ᑰᖃᕐᕕᒥᓪᓗ: ᐊᒥᐊᖅᓯᒪᔪᒥᑦ ᓇᐹᑦᑐᓐᖑᐊᖃᖅᑐᓂ ᐊᒻᒪᓗ ᐊᓯᐊᓂ ᓄᓂᕙᓐᖑᐊᖅᑐᖅ ᐴᖅᑲᐃᓪᓗᓂ ᖃᑦᑕᕐᒧᑦ, ᐊᔾᔨᓐᖑᐊᑦ, ᓴᓇᒌᖅᓯᒪᓐᖏᑦᑐᖅ ᓴᓇᒋᐊᖅᓯᒪᔫᒐᓗᐊᖅ.

“ᖁᕕᐊᓪᓚᕆᓚᐅᖅᓯᒪᔪᒍᑦ ᐊᐅᓪᓛᓕᕋᑦᑕ,” ᒫᑕ ᐅᖃᖅᑐᓂ. “ᐊᖏᕐᕋᖅᑕᕗᑦ, ᐱᕈᕐᕕᒋᓯᒪᔭᕗᑦ, ᓇᒻᒥᓂᖁᑎᒋᓪᓗᑎᒍ, ᐱᐅᓂᖅᓴᒧᑦ.”

ᓇᒻᒥᓂᕐᓗ ᓴᓇᓯᒪᓪᓗᓂᔾᔪᒃ.

ᐃᓅᓱᓐᓂᖅᓴᐅᓪᓗᑎᑦ, ᒫᑕ ᐃᖅᑲᓇᐃᔭᓚᐅᖅᓯᒪᔪᖅ ᓴᓇᔪᓕᕆ­ᔨᒃᑯᓐᓄᑦ ᓄᓇᑦᑎᐊᑉ ᒐᕙᒪᒃᑯᖏᓐᓄᑦ − ᓄᓇᕗᕈᓚᐅᖅᑎᓐᓇᒍᓪᓕ ᑕᐃᔅᓱᒪᓂ − ᕌᐳᑦ ᐃᖅᑲᓇᐃᔭᖅᑐᓂ ᑲᖏᖅᖠᓂᐅᑉ ᐊᓐᓂᑭᑦᑐᐊᕐᔪᕝᕕᖓᓐᓂ ᓴᓇᔨᐅᓪᓗᓂ.

ᑕᐃᔅᓱᒪᓂ ᑲᑎᑎᑕᐅᓯᒪᓕᓚᐅᖅᓯᒪᔫᒃ 15−ᓄᑦ ᐅᑭᐅᓄᑦ, ᐃᓪᓗᕈᓯᓕᓐᓂᑦ ᐱᖓᓱᓂᒃ ᐃᓪᓗᓕᕆᔨᒃᑯᑦ ᐃᓪᓗᖓᓐᓂᒥᐅᑕᐅᓪᓗᑎᑦ ᑕᓕᒪᓂᒃ ᕿᑐᕐᖓᖃᖅᑐᑎᑦ ᑮᓇᐅᔭᓕᐅᖅᑎᐊᖅᑐᑎᓪᓗ. ᑭᓯᐊᓂ ᐱᕕᑐᓂᖅᓴᒨᕈᒪᓚᐅᖅᓯᒪᔪᑦ ᐃᓚᒌᑦ, 1987−ᖑᓕᖅᑎᓪᓗᒍ ᑐᔅᓯᕋᓚᐅᖅᓯᒪᔫᒃ ᓄᓇᑦᑎᐊᕐᒧᑦ ᐃᓪᓗᓕᕆᔨᕐᔪᐊᒃᑯᖏᓐᓄᑦ. ᐅᓪᓗᒧᑦ ᓇᒻᒥᓂᖅᑖᔅᓴᒧᑦ ᐃᑲᔫᑎᓂᒃ, ᐅᕝᕙᓘᓐᓂᑦ ᑕᐃᔭᖅ HAP−ᒥᑦ ᓇᐃᑦᑑᓪᓗᒍ.

ᑕᐃᔅᓱᒪᓂᓕ, ᓄᓇᑦᑎᐊᕐᒥ ᑐᔅᓯᕋᕈᓐᓇᖃᑦᑕᓚᐅᖅᓯᒪᒻᒪᑕ ᐃᓪᓗᔅᓴᒥᑦ ᓇᒻᒥᓂᖅᑖᕆᔪᒪᔭᒥᓂᒃ ᐃᓪᓗᔅᓴᓂᑦᑎᑕᐅᓪᓗᑎᑦ ᓇᒻᒥᓂᖅ ᐃᓪᓗᓕᐅᕐᓗᑎᒃ ᐊᑭᓖᒃᑲᓂᓐᖏᑦᑎᐊᕐᓗᑎᑦ. ᐃᓪᓗᓕᕆᔨᕐᔪᐊᒃᑯᑦ ᓇᓗᓇᐃᖅᓯᕕᐅᑐᐃᓐᓇᕆᐊᖃᖅᑐᑎᑦ ᐅᑭᐅᖃᕐᓂᖏᓐᓂ 19−ᓂᒃ ᓄᓇᑦᑎᐊᕐᒥᐅᑕᐅᓪᓗᑎᓪᓗ, ᐊᑭᓕᔅᓴᖏᓐᓂᓪᓗ ᐊᑭᓕᖅᓱᐃᒍᓐᓇᖅᑐᑎᑦ ᓇᒻᒥᓂᖅᑖᕆᓂᐊᖅᑕᒥᓄᑦ, ᓇᒻᒥᖁᑎᖃᓚᐅᖅᓯᒪᓐᖏᑦᑎᐊᕋᓗ­ᐊᖅᑎᓪᓗᒋᑦ ᓇᒻᒥᓂᕐᓗ ᐃᓪᓗᓕᐅᕈᓐᓇᖅᑐᑎᑦ ᐅᕝᕙᓘᓐᓃᑦ ᐱᖃᓐᓇᕆᔭᒥᓂᒃ ᐃᑲᔪᖅᑎᖃᕐᓗᑎᑦ ᐃᓚᖏᓐᓂᓪᓗ, ᐊᓯᖏᓐᓂᓪᓗ ᒪᓕᒐᖅᑕᖃᐅᕐᓂᕋᓗᐊᕆᓪᓗᑎᒃ.

ᕼᐃᒃᔅᑯᑦ ᑐᔅᓯᕋᓚᐅᖅᓯᒪᒻᒥᔪᑦ ᓄᓇᒥᑦ ᑕᐃᑲᓐᖓ ᔮᓐᓴᓐ ᑰᕝᒥᑦ, ᒫᓐᓇ ᐃᓂᒋᔭᖓ, ᐃᒐᓛᒃᑯᑦ ᑕᑯᔪᓐᓇᖅᑐᑦ ᓯᔾᔭᓱᖅᑐᒥᑦ ᓄᓇᒧᑦ ᖁᐊᖅᑕᖅᑐᖓᓐᖏᑦᑐᒧᑦ ᐊᑐᕆᐊᕐᒧᑦ ᐃᕕᔅᓱᒐᖃᒐᓛᔪᒥ. “ᑕᐃᒪᐃᑦᑐᑯᓗᒻᒥᑦ ᑲᔾᔮᓇᖅᑐᒥᑦ ᑕᑯᓐᓇᒐᓕᑦᑕᖃᓐᖏᑦᑐᖅ!” ᕌᐳᑦ ᐅᖃᖅᑐᓂ.

ᕌᐳᑦ ᕼᐃᒃᔅ ᓇᖏᑦᑐᖅ ᐃᒐᓛᑉ ᓵᖓᓐᓂ — ᑕᐅᓄᖓ ᕿᒥᕐᕈᓲᖅ ᔮᓐᓴᓐ ᐃᒪᖓᓐᓄᑦ (Johnston Cove). (ᐊᔾᔨᓕᐅᒐᖓ ᑕᐃᕕᑦ ᕙᓐ)

ᐃᓪᓗᓕᕆᔨᕐᔪᐊᒃᑯᑦ ᐊᖏᖅᓯᓪᓗᑎᑦ ᑐᔅᓯᕋᐅᑎᖓᓐᓂ ᑕᕝᕙᑦᑕᐅᑎᒋ, ᐃᓪᓗᓕᐅᕆᐊᓯᓕᓚᐅᖅᓯᒪᔪᑦ ᑕᖅᑭᑦ 12 ᐃᓗᐊᓂ ᐸᐃᑉᐹᑦ ᑎᔫᑕᐅᓚᐅᖅᑎᓪᓗᒋᑦ. ᐃᓪᓗᔅᓴᓂᓪᓗ ᓱᓇᒃᑯᑖᔅᓴᓂᓪᓗ ᐊᐅᔭᖓᓐᓂ 1988−ᒥ ᐱᓪᓗᑎᑦ, ᐱᒋᐊᑦᑕᓕᖅᑯᑦ.

“ᐊᐅᓪᓛᕋᑦᑕ, ᕿᑐᕐᖓᓕᒫᕗᑦ ᐃᓪᓗᕈᑎᖃᖅᑐᑎᑦ ᐱᕕᑐ­ᓂᖅᓴᐅᓪᓗᓂᓗ ᓴᓗᒪᓂᖅᓴᐅᓪᓗᓂᓗ ᓄᑖᖅ ᐃᓪᓗ,” ᐅᖃᖅᑐᓂᒫᑕ. “ᓴᐃᓕᓇᑦᑎᐊᖅᑐᖅ, ᐅᐃᒪᔮᕐᓇᖏᑦᑎᐊᖅᑐᖅ ᓇᒻᒥᓂᖅ ᐃᓪᓗᖃᖅᑐᓂ ᐊᓯᖏᓐᓂᓪᓗ ᐊᐅᓐᖏᓕᐅᕈᑎᑕᖃᓐᖏᑦᑎᐊᓕᖅᑐᓂ, ᐱᐅᓐᖏᑦᑐᐊ­ᓗᓐᓂᑦ.”

ᓇᒻᒥᓂᖅ ᐃᓪᓗᖃᖅᑐᓂ — ᑖᒃᑯᐊᓕ ᕼᐃᒃᔅᑯᑦ ᓇᒻᒥᓂᖃᓕᖅᑎᓪᓗᒋᑦ ᐃᓪᓗᒥᑦ − ᑭᓯᐊᓂᓕ ᑕᐃᒪᐃᑦᑐᑕᖃᓐᖏᑦᑎ­ᐊᓕᖅᑐᖅ ᓄᓇᕗᒻᒥ ᐅᓪᓗᒥᐅᔪᖅ.

ᐃᓪᓗᔅᓴᐃᑦ 22−ᓂᑦ ᓄᓇᓕᓐᓂᑦ ᑖᒃᑯᓂᖓ 25−ᓂᒃ ᓄᓇᕗᒻᒥ ᐊᔅᓱᕈᓐᓇᖅᑐᒦᓕᖅᑐᑦ, ᐱᔭᐅᒋᐊᖃᓪᓚᕆᑦᑐᑎᓪᓗ ᐅᕝᕙᓘᓐᓃᑦ ᐱᐅᓐᖏᑦᑐᒦᓕᖅᑐᑦ, ᑕᐃᒪᐃᓕᖓᔪᑦ ᓄᓇᕗᒻᒥ ᐃᓪᓗᓕᕆᔨᕐᔪᐊᒃᑯᑦ ᐊᕐᕌᒍᑕᒫᖅᓯᐅᑎᖓᓐᓂ ᐅᓂᒃᑳᖅ 2021-2022−ᒥ. ᐃᖃᓗᓐᓂ ᐃᓪᓗᑖᕆᐊᓖᑦ 85%−ᓂᑦ ᒫᓐᓇᐅᔪᖅ, ᑲᖏᖅᖠᓂᖅ 70%−ᒥᑦ ᐊᒻᒪᓗ ᓇᐅᔮᓂᓕᑦ 69%−ᓂᑦ ᐱᔭᕆᐊᖃᖅᑎᓪᓗᒋᑦ.

ᒫᑕ ᕌᐳᓪᓗ ᕼᐃᒃᔅ ᐃᓚᒋᔭᐅᖃᑕᐅᓯᒪᔪᑦ ᕼᐊᓐᓇᓚᖏᓐᓃᑦᑐᓂᒃ ᐃᓄᓐᓂᑦ, ᑕᐃᑲᓂ 1980−ᖏᓐᓂ, ᓇᒻᒥᓂᖅ ᐃᓪᓗᓕᐅᖅᑐᑎᑦ ᐊᑭᖃᓐᖏᑦᑎᐊᖅᑐᓂ ᓇᒻᒥᖅᑖᓂᕐᒧᑦ (HAP).

ᐃᓚᖏᑦ ᐃᓄᐃᑦ, ᖃᐅᔨᓴᖅᑏᑦ ᐃᓄᐃᓪᓗ ᐃᖅᑲᓇᐃᔭᓚᐅᖅᓯᒪᔪᑦ ᐃᓪᓗᓕᐅᕐᓂᕐᒥᑦ ᐃᓪᓗᓕᕆᓂᕐᒥᓪᓗ ᓇᒻᒥᓂᖅᑖᕈᑎᔅᓴᓄᑦ ᐊᑭᑭᓐᓂᖅᓴᐅᓚᐅᖅᓯᒪᔪᖅ ᒐᕙᒪᒃᑯᓐᓄ ᐃᓪᓗᓕᕆᔨᒃᑯᑦ ᐃᓪᓗᖁᑎᖏᓐᓂ ᐊᑐᐃᓐᓇᐅᑲᓐᓂᕆᐊᓕᐅᓗᐊᖅ ᓄᓇᕗᒻᒥᐅᑕᓄᑦ. ᐊᐃᕙᓪᓗᑎᑦ ᐃᑲᔫᑎᓂᒃ ᐊᒥᓲᓚᐅᕐᓂᕋᐃᓪᓗᑎᑦ: ᐃᓪᓗᓄᑦ ᓇᒻᒥᓂᖅᑖᔅᓴᒧᑦ ᐊᑭᖏᑦ ᒐᕙᒪᒃᑯᓐᓂ ᐊᑭᑭᓐᓂᖅᓴᐅᓚᐅᖅᑐᑦ ᐃᓪᓗᓕᕆᔨᒃᑯᓐᓂ ᐊᐅᓚᑦᑎᔾᔪᑎᖏᓐᓄᑦ: ᐃᓪᓗᓕᕆᔨᒃᑯᓐᓂ ᐃᓪᓗᑖᖅᑐᕋᓱᓐᖏᓂᖅᓴᐅᒐᔭᖅᑐᑦ; ᐃᓄᐃᑦ ᐊᑭᖏᓐᓂ ᐃᓪᓗᓕᐅᓂᕐᒥᑦ ᐃᓕᒃᑲᓂᕐᓗᑎᓪᓗ; ᐃᒻᒥᒃᑰᖅᑐᑦ ᓇᒻᒥᓂᖅ ᐅᐱᒋᓂᖅᓴᐅᓕᕐᓗᑎᑦ ᓇᒻᒥᓂᖅ ᐃᓪᓗᓕᐅᖅᑐᒥᓂᐅᓂᖏᓐᓄᑦ; ᐊᒻᒪᓗ ᐃᖅᑲᓇᐃᔮᑦ ᐃᑲᔪᕐᓂᖃᕋᔭᖅᑐᑦ ᓄᓇᓕᓐᓂ ᒪᑭᒪᒐᓱᒃᑲᓐᓂᕐᓂᖏᓐᓂ.

ᓯᓚᑖ ᒫᑕ ᐊᒻᒪᓗ ᕌᐳᑉ ᕼᐃᒃᔅ ᐊᖏᕐᕋᖓ “ᓲᕐᓗ ᐃᔪᕈᖅᑕᓕᒃ ᐃᓪᓗᒃ,” ᐅᖃᖅᑐᓂ ᒫᑕ, ᑭᓯᐊᓂᓕ ᑲᔾᔮᓇᖅᑐᐊᓗᒻᒧᑦ ᓵᓐᖓᔪᖅ. (ᐊᔾᔨᓕᐅᒐᖓ ᑕᐃᕕᑦ ᕙᓐ)

ᐱᒋᐊᕐᖓᕐᓂᖓᓂ 1970−ᖏᓐᓂ, ᑲᓇᑕᐅᑉ ᒐᕙᒪᒃᑯᖏᑦ ᓇᒻᒥᓂᖃᕐᓂᖅᓴᐅᓚᐅᖅᑐᑦ ᐊᖏᕐᕋᓂᑦ ᐊᑐᐃᓐᓇᖅᑕᖃᓪᓗᐊᖏᑦᑐᓂᑦ ᓄᓇᓕᓐᓂ ᓄᓇᑦᑎᐊᕐᒥ ᐅᓪᓗᒥᐅᔪᕐᓗ ᓱᓕ ᐃᓄᐃᓴᓗᐊᖅᑐᖅ ᐅᑭᐅᖅᑕᖅᑐᒥ ᐃᓪᓗᐃᑦ. ᒐᕙᒪᑐᖃᒃᑯᑦ ᓴᖅᑮᓚᐅᖅᓯᒪᔪᑦ ᐃᓪᓗᖁᑎᓐᓂᒃ ᐃᑲᔫᑎᖃᖅᑐᑎᓪᓗ ᐊᑐᖅᑐᐊᕈᑎᖓᓐᓂ, ᓱᓕ ᑖᒃᑯᐊᖑᒐᓗᐊᖅᑎᓪᓗᒋᑦ ᐃᓪᓗ ᓴᓕ ᓇᒻᒥᓂᕆᔭᐅᓂᖅᓴᐅᓚᐅᖅᑐᑦ ᑖᒃᑯᓄᖓ.

ᐊᓪᓛᒃ 1981−ᖑᑎᓪᓗᒍ, ᐃᓪᓗᖁᑎᓖᑦ ᓇᒻᒥᓂᖅ 16.3%−ᖑᓪᓗᑎᑦ ᓄᓇᓕᕋᓛᖑᓂᖅᓴᐅᔪᓂᒃ 45−ᓂᑦ, ᑖᒃᑯᐊᓕ 1986−ᒥ ᓄᓇᑦᑎᐊᑉ ᐃᓪᓗᓕᕆᔨᕐᔪᐊᖏᑦ ᑎᑎᕋᓚᐅᖅᓯᒪᔪᑦ ᓇᒻᒥᓂᖅᑖᕋᓱᐊᕐᓂᕐᒧᑦ ᐃᓪᓗᓂᑦ (HAP). ᐃᓪᓗᓕᕆᔨᕐᔪᐊᒃᑯᑦ ᑕᑎᖃᐃᓐᓇᖃᑦᑕᓚᐅᖅᑐᑦ ᒐᕙᒪᒃᑯᑦ ᐃᓪᓗᖁᑎᖏᓐᓂ, “ᐃᓄᐃᓪᓗ ᑮᓇᐅᔭᑭᔅᓴᓂᕐᓗ, ᓱᓕ ᑕᐃᒪᐃᑐᐃᓐᓇᕋᔭᕐᒥᔪᖅ.”

ᑕᐃᒪᓕ, ᐃᓱᐊᓂ 1970, ᓇᐹᖅᑐᐃᑦ ᑭᓪᓕᖓᑕ ᐊᑖᓃᑦᑐᑦ ᖃᓄᖅᑑᕋᓱᖃᑦᑕᓕᓚᐅᖅᑐᑦ ᓄᓇᓕᓐᓂ ᐃᓪᓗᓕᐅᕐᓂᕐᒥᑦ. ᓇᐹᖅᑐᓂᒃ ᓇᑲᑎᕆᓪᓗᑎᑦ, ᕿᔪᑯᑖᕈᖅᑎᒐᓱᐊᖅᑐᒋᑦ ᐊᖏᕐᕋᓕᐅᓕᖅᑐᑎᓪᓗ. ᐊᕕᑦᑐᖅᓯᒪᔪᑦ ᒐᕙᒪᒃᑯᖏᑦ ᐅᔾᔨᕈᓱᓕᕐᖓᑕ ᑕᒪᑐᒥᖓ ᕿᔪᔅᓴᖃᖅᑎᑦᑎᓕᓚᐅᖅᑐᑦ ᑕᐃᒃᑯᓄᖓ ᐊᑐᐃᓐᓇᖃᓐᖏᑦᑐᓄᑦ ᓄᓇᓕᓐᓄᑦ, ᒪᑯᓂᖓᓗ ᖄᔅᓴᖏᓐᓂ ᐃᓪᓗᐃᑦ ᐃᑭᐊᖅᑎᔅᓴᖏᓐᓂᓪᓗ, ᑕᐃᑲᓂ 1987−ᒥ ᖃᐅᔨᓴᖅᑕᐅᓂᐅᔪᓂᒃ ᐃᓪᓗᓂᑦ ᓈᒻᒥᓂᖅᑖᕋᓱᐊᕐᓂᕐᒧᑦ ᓇᒻᒥᓂᖃᖅᑐᖅ ᐴᒍᓴᓐ ᓴᒥᒃ ᑲᓛᒃᒧᑦ.

ᑕᒪᓇ ᐃᓱᒪᒋᔭᐅᓚᐅᖅᑐᖅ ᐃᓪᓗᔅᓴᓂᑦ ᐊᑐᐃᓐᓇᖃᕐᓂᖅ ᐃᓄᓐᓄᑦ ᕿᑐᕐᖏᐅᕈᑎᓂᑦ ᐊᑭᓕᖅᓱᐃᓗᑎᒃ ᓇᒻᒥᓂᖃᖅᑐᓄᑦ ᐃᓪᓗᓄᑦ ᐃᑲᔫᑎᓄᑦ ᐊᕐᕌᒍᓄᑦ ᑕᓪᓕᒪᓄᑦ 1983−ᒥ.

ᐅᑭᐅᓄᑦ ᑎᓴᒪᓄᑦ ᓯᕗᓪᓕᖅᐹᓄᑦ, ᒐᕙᒪᒃᑯᑦ ᐃᑲᔪᓚᐅᖅᓯᒪᔪᑦ 438−ᓂᒃ ᓇᒻᒥᓂᖅᑖᖅᑐᖅᑐᓂᒃ (HAP) ᐊᕕᑦᑐᖅᓯᒪᔪᓂᑦ, ᐊᒥᓱᕈᕆᐊᖅᑕᐅᕙᑦᑐᑎᑦ ᐊᕐᕌᒍᑕᒫᑦ. ᐃᓪᓗᑭᔅᓴᕈᓐᓃᑎᑕᐅᒐᓱᐊᖅᑐᑎᑦ, ᒪᓂᒪᔾᔪᑎᖃᕋᓱᐊᕐᓗᑎᑦ ᓇᒻᒥᓂᖅᑖᖅᑐᖅᑎᑦᑎᑲᓐᓂᓂᕐᒥᑦ ᑕᑎᖃᖃᑦᑕᕐᓂᐊᖏᒻᒪᑕ ᐊᓯᖏᓐᓂ, ᑎᒍᒥᐊᕐᓗᑎᑦ ᓄᓇᓕᓐᓂ ᓇᒻᒥᓂᖅ ᐃᓪᓗᓕᕆᓂᕐᒥᑦ ᐋᖅᑭᐅᒪᔾᔪᑎᖃᕋᓱᐊᖁᓪᓗᒋᑦ ᐃᓪᓗᓕᐅᖃᑦᑕᕐᓗᑎᑦ, ᑕᐃᒫᒃ ᑎᑎᕋᖅᓯᒪᓚᐅᖅᑐᖅ ᒐᕙᒪᒃᑯᓐᓂ.

ᒫᑕ ᕼᐃᒃᔅ ᓇᖏᖅᑐᓂᑦ ᐳᓛᕐᕕᖓᓐᓂ ᓯᕙᑖᕐᕕᐅᑎᓪᓗᒍ ᐅᓐᓄᓴᒃᑯᑦ. (ᐊᔾᔨᓕᐅᒐᖓ ᑕᐃᕕᑦ ᕙᓐ)

ᐱᐅᔪᒃᑯᓪᓗ ᓴᖅᑭᑲᓐᓂᓚᐅᖅᑐᖅ ᑕᒪᓐᓇ, ᓲᕐᓗ ᐃᖅᑲᓇ­ᐃᔭᔅᓴᐃᓐᓇᕆᐊᖃᓕᖅᑐᑎᑦ ᐊᑭᓕᐅᑎᔅᓴᓄᑦ, ᑮᓇᐅᔭᓕᐅᕋᓱᐊ­ᕈᑎᖃᓐᖏ­ᓂᖅᓴᐅᒻᒪᑕᓕ ᐃᓪᓗᓕᕆᔨᒃᑯᓐᓂ ᐃᓪᓗᖃᖅᑐᑦ ᐊᑭᓕᖅᓱᐃᓐᖏᓂᖅᓴᐅᓂᖏᓐᓄᑦ.

ᖄᖅᓯᓚᐅᖅᑐᑦ ᑕᒪᒃᑯᐊ ᑐᕌᒐᐃᑦ, ᑕᐃᒫᒃ ᖃᐅᔨᓴᖅᑏᑦ ᐅᖃᓚᐅᖅᑐᑦ.

“ᑕᒪᓇ ᐱᐅᔪᐊᓘᓚᐅᖅᑐᖅ ᑕᑯᒃᑲᓐᓂᕈᒪᔭᕋᐊᓗᕗᑦ ᐅᑎᖅᑎᑕᐅᓗᓂ,” ᒫᑕ ᐅᖃᖅᑐᓂ. “ᖃᐅᔨᒪᔪᖓ ᐃᓅᓱᓐᓂᖅᓴᐃᑦ ᐃᖅᑲᓇᐃᔮᖃᖃᑦᑕᕐᖓᑕ ᓂᐅᕕᕈᒪᒐᓗᐊᖅᑐᑎᑦ ᐃᓪᓗᒥᑦ, ᑭᓯᐊᓂᓕ ᐊᐃᓐᓇᖅᑕᖃᓐᖏᒻᒪᑦ.”

ᓲᓴᓐ ᕼᐃᒃᔅ, ᒫᑕᐅᑉ ᐸᓂᖓ, ᐃᖅᑲᐅᒪᔪᖅ ᐊᐅᓪᓛᓕᕐᖓᑕ ᐅᑭᐅᖃᖅᑎᓪᓗᒍ ᑎᓴᒪᓂᒃ, ᐱᐅᔅᓴᓚᐅᖅᓯᒪᔪᖅ ᐱᐅᔪᐊᓗᒻᒥᑦ. 39−ᓂᑦ ᐅᑭᐅᖃᓕᖅᑐᖅ ᒪᕐᕉᓐᓂᒃ ᕿᑐᕐᖓᖃᖅᑐᓂ, ᐅᐃᖃᖅᑐᓂ ᐃᓪᓗᓕᕆᔨᒃᑯᑦ ᐃᓪᓗᖁᑎᖓᓐᓃᑦᑐᓂ, ᐃᓱᒪᖃᑦᑕᖅᑐᖅ ᓇᒻᒥᓂᖅᑖ­ᕋᔭᖅᑐᖅ ᑭᓯᐊᓂᖃᐃ ᐊᖏᔪᖅᑳᖏᑦ ᓇᒻᒥᓂᖅ ᐊᑭᓕᖅᓱᐃᒍᓐᓇ­ᕈᓐᓃᖅᑲᑎᒃ ᐱᕈᖅᓴᕐᕕᒋᓚᐅᖅᑕᖓᓐᓄᑦ ᓲᓴᓐ ᐅᑎᕐᓗᓂ.

“ᑕᐃᒪᐃᑦᑐᒥᑦ ᐱᑕᖃᓐᖏᓪᓚᕆᒻᒪᑦ ᒫᓐᓇ,” ᓲᓴᓐ ᐅᖃᖅᑐᓂ, ᑕᑯᕋᓐᓈᖅᑐᓂᐅᒃ ᕼᐊᑭᖅᑐᖅ ᐸᓂᖓ ᑲᖏᖅᖠᓂᕐᒥ (Agnico Eagle) ᐊᓐᓂᑭᑦᑐᐊᕐᔪᒻᒥ. “ᐃᓅᓯᑦᑎᐊᕙᒻᒥ ᑕᑯᓐᓇᑎᑦᑎᓇᓱᑦᑑᒐᓗᐊᑦ ᕿᑐᕐᖓᒥᓂᒃ, ᓂᐅᕕᕋᓱᐊᖃᑦᑕᖅᑐᑎᑦ ᐱᖅᑯᓯᕐᒥᓂᒃ ᑕᑯᑎᑦᑎ­ᔪᒪᓪᓗᑎᑦ, ᑮᓇᐅᔭᓂᓪᓗ ᓄᐊᑦᑎᒐᓱᔅᓯᓐᓈᖅ − ᐱᔭᕆᐊᑐᔪᐊᓗᒃ.”

ᓲᓴᓐ ᓅᓚᐅᖅᓯᒪᔪᖅ ᐊᖏᕐᕋᐅᑲᐃᓐᓇᖅᑐᒧᑦ, ᒪᕐᕉᓐᓂ ᐃᓪᓗᕈᓯᓕᒃ ᑕᓪᓕᒪᐅᓕᖅᑲᖓᔪᓄᑦ ᑲᑎᓐᖓᔪᓄᑦ “ᐊᓄᕆᓐᖏᓂᖅᓴᐅᕙᑦᑐᑦ ᑕᐃᒪᐃᑦᑐᑦ” ᑏᓰᑉᐱᕆᒥ 2009−ᒥ ᓴᓇᔭᐅᕋᑖᓚᐅᖅᑎᓪᓗᒍ. ᐅᐃᒌᒃ ᐃᖅᑲᓇᐃᔭᖅᑐᐃᓐᓈᒃ ᓇᒻᒥᓂᖅ ᐃᓪᓗᑖᕋᓱᑉᐸᑦᑑᒐᓗᐊ, ᓴᓇᓯᒪᒌᖅᑐᒥᑦ ᐅᕝᕙᓘᓐᓃᑦ ᑲᑎᖅᓱᒐᕐᒥᑦ, ᑭᓯᐊᓂᓕ ᐱᑕᖃᓐᖏᑦᑎᐊᖅᑐᖅ.

ᐃᑲᔫᑎ ᓲᕐᓗ ᐃᓪᓗᑖᕈᑎᔅᓴᖅ ᐃᑲᔫᑎ (HAP), ᐅᖃᖅᑐᓂ, ᐃᓅᓱᑦᑐᑦ ᐃᓚᒌᑦ ᐱᔪᓐᓇᕐᒥᔫᒐᓗᐊᑦ ᑕᐃᒪᐃᓚᐅᖅᓯᒪᒻᒪᑕ.

“ᓄᖅᑲᖓᑎᑕᐅᑐᐃᓐᓇᖅᑑᔮᕋᑦᑕ, ᑕᐃᒃᑯᐊ ᓯᕗᒧᐊᒍᒪᔫᓗᐊᑦ ᓇᒻᒥᓂᖅ ᐃᓪᓗᖃᕐᓗᑎᑦ,” ᐅᖃᖅᑐᓂ. “ᓱᒃᑲᓐᓂᕈᓐᓇᖏᑦᑐᖓ − ᖃᐅᑕᒫᑦ ᐃᓅᓇᓱᐊᑐᐃᓐᓇᕐᓗᖓ ᐱᐅᓂᖅᓴᒥᓪᓗ ᓂᕆᐅᓪᓗᖓ, ᑐᓴᕈᒥᓇᖅᑐᓂᓪᓗ ᓂᕆᐅᓪᓗᖓ.”

ᑕᕝᕘᓇ ᐃᓪᓗᑖᕈᑎᔅᓴᖅ ᐃᑲᔫᑎ (HAP) ᓄᓇᑦᑎᐊᑉ ᐃᓪᓗᓕᕆᔨᕐᔪᐊᒃᑯᖏᑦ ᐊᑐᖅᑐᐊᖅᑎᑦᑎᒐᔭᖅᑐᖅ ᐊᕐᕌᒍᓄᑦ ᑕᓪᓕᒪᑦ ᐊᓂᒍᖅᑲᑕ ᐃᓱᒪᒋᔪᓐᓇᐃᖅᑕᐅᓗᓂ ᐊᑭᓕᔅᓴᓂᒃ 20%−ᖑᖃᑦᑕᖅᑐᑎ ᐊᕐᕌᒍᑕᒫᑦ. ᓂᐅᕐᕈᑎᖃᕐᓂᖅᑲᑦ ᐊᕐᕌᒍᑦ ᓈᓚᐅᖅᑎᓐᓇᒋᑦ, ᐊᑭᓖᕆᐊᖃᕋᔭᖅᑐᑦ ᐊᑐᖅᑐᐊᕈᑎᖓᑦᑕ ᐊᒥᐊᒃᑯᖏᓐᓂ. ᓂᐅᕕᐊᔅᓴᓕᒃ ᓇᒻᒥᓂᖅ ᐃᓪᓗᓕᐅᕆᐊᖃᖃᑦᑕᓚᐅᖅᓯᒪᔪᑦ, ᑭᓯᐊᓂᓕ ᐃᑲᔪᖅᑕᐅᓪᓗᑎᑦ ᐊᖏᔪᖅᑳᖓᓐᓄᑦ ᐃᓪᓗᑖᕈᑎᔅᓴᖅ ᐃᑲᔫᑎ (HAP). ᐅᐊᔭᓕᕆᓂᕐᓗ ᑳᓐᑐᓛᑦᑕᐅᓪᓗᑎᑦ ᒐᕙᒪᒃᑯᓐᓄᑦ.

ᑕᒫᓂᖃᐃᑦ ᐃᓪᓗᑖᕈᑎᔅᓴᖅ ᐃᑲᔫᑎ (HAP) ᐊᖏᓂᖃᖃᑦᑕᓚᐅᖅᑐᑦ 8.5 X 9.1 ᒦᑕᓂᑦ, ᖃᐅᔨᓴᖅᑕᐅᓪᓗᑎᑦ ᑕᐃᒪᐃᑦᑑᖃᑦᑕᓚᐅᖅᑐᑦ ᐊᑭᖏᓪᓗ ᒐᕙᒪᒃᑯᓐᓂ 43%−ᒥ ᖃᑦᑏᓐᓇᐅᓂᖅᓴᐅᓪᓗᑎᑦ ᐃᓪᓗᓕᕆᔨᒃᑯᑦ ᐃᓪᓗᖓᓐᓂ ᐅᑭᐅᓄᑦ 50−ᓄᑦ ᐊᑐᕈᓐᓇᖅᑐᒥᑦ ᐃᓪᓗᒧᑦ.

ᐃᓄᐃᑦ ᓂᕈᐊᕈᓐᓇᖅᑐᑎᑦ ᑭᓱᓕᔅᓴᓕᒫᑦᑎᐊᐸᓗᖏᓐᓂ ᐃᓪᓗᒋᓂᐊᖅᑕᒥᓄᑦ. ᒐᕙᒪᒃᑯᑦ ᓇᓖᕌᕈᑎᔅᓴᓂ ᐊᑐᐃᓐᓇᖃᖅᑲᑕ ᐊᔾᔨᒌᖃᑦᑕᕋᔭᓐᖏᒻᒪᑕ ᐃᓪᓗᓕᖏᑦ ᖃᓄᐃᓕᖓᓂᖏᓪᓗ, ᐱᖅᑯᓯᕐᒥᓂᒃ ᐱᔭᕆᐊᓕᒻᒥᓄᑦ ᓇᒻᒪᖃᑦᑕᓚᐅᖅᑐᑦ ᐅᑭᐅᖅᑕᖅᑐ­ᒥᐅᑕᕐᓄᑦ. ᑕᐃᒫᕌᓗᒃ ᐱᓚᐅᖅᑐᑦ ᐃᑲᔪᖅᑎᖃᖅᑐᑎᑦ ᐱᓕᕆᐊᒧᑦ ᑐᑭᒧᐊᖅᑎᖓᓐᓂ.

ᓇᐅᔮᑦ ᒪᐃᔭᖓ ᐋᓚᓐ ᕌᐱᓐᓴᓐ ᐃᔅᓯᕚᖅᑐᖅ ᐊᓪᓚᕕᖓᓐᓂ ᐅᓂᒃᑳᖅᑐᓂ ᑭᓲᓚᐅᖅᓯᒪᒻᒪᖔᖅ ᓈᒻᒥᓂᖅᑖᕈᒪᔪᓄᑦ ᐃᓪᓗᒧᑦ ᐃᑲᔫᑏᑦ (HAP). (ᐊᔾᔨᓕᐅᒐᖓ ᑕᐃᕕᑦ ᕙᓐ)

ᐃᓱᐸᓗᖏᓐᓂ 1980 ᐱᒋᐊᕐᖓᕐᓂᖏᓐᓂᓪᓗ 1990, ᐋᓚᓐᓪ ᕌᐱᓐᓴᓐ ᐱᓱᕋᔭᖃᑦᑕᖅᑐᒥᓂᖅ ᐃᖃᓗᑦᑑᑦᑎᐊᕐᒥ ᐊᒻᒪᓗ ᐊᓯᖏᓐᓂ ᐅᐊᓐᓇᖓᓐᓂ ᓄᓇᕗᑦ ᓄᓇᓕᖏᓐᓂ ᐸᐃᑉᐹᒃᑯᕕᒻᒥ ᑎᒍᒥᐊᖅᑐᓂ.

ᑲᑎᒪᖃᑎᖃᖃᑦᑕᖅᑐᑦᓂ ᐃᓪᓗᑖᕈᑎᔅᓴᖅ ᐃᑲᔫᑎ (HAP) ᐱᔪᒪᔪᓂᑦ, ᐊᔾᔨᓐᖑᐊᕐᓂᑦ ᓂᕈᐊᕋᔅᓴᖏᓐᓂ ᕿᒥᕐᕈᑎᑦᑎᓪᓗᓂ ᐱᑐᖃᓐᖑᐊᓂᑦ ᐃᓪᓗᔅᓴᓂᒃ ᐊᔾᔨᒌᓐᖏᑦᑐᓂᑦ ᐃᓗᓕᖏᑦ ᖃᓄᐃᑦᑑᒐᔭᕐᓂᖏᓐᓂ; ᑰᖃᕐᕕᖏᓪᓗ ᐊᖏᓂᖏᑦ ᐊᔾᔨᒌᓐᓇᑎᑦ ᐊᓇᕐᕕᖏᓪᓗ, ᒪᑐᐃᖅᑕᖅᑐᓐᖑᐊᓪᓗ ᐊᔾᔨᓐᖑᐊᖃᖅᑐᓂ, ᓂᕿᓕᐅᕐᕕᓐᓂᑦ, ᓇᑎᕐᓂᑦ ᑐᓐᖓᕕᔅᓴᖏᓐᓂᓪᓗ.

ᐱᔪᒪᔪᑦ ᐅᖃᐅᔾᔨᒐᔭᖅᑐᑎᑦ ᕌᐸᓐᓴᒥᑦ ᖃᓄᐃᑦᑐᒥ ᐱᔪᒪᒻᒪᖔᑕ ᐊᒥᐊᖓᓐᓂᓪᓗ ᑭᓱᓕᒫᑦᑎᐊᑦ ᐱᔪᒪᔭᖏᓐᓂ − ᐃᓪᓗᒥᑦ, ᐊᕙᓗᖏᑦ, ᐊᒥᐊᖓ ᓯᓚᑖᑕ − ᑐᑭᓯᒋᐊᕈᑏᑦ ᑐᔫᑎᒋᓕᖅᑐᓂᒋᑦ ᐅᑕᖅᑭᑦᑕᓕᖅᑯᑦ ᐱᔅᓴᖏᓐᓂ ᐊᐅᔭᒃᑯᑦ ᐅᒥᐊᕐᔪᐊᒃᑯᑦ.

“ᐃᓕᖅᑯᓯᑦᑎᐊᕙᕐᔪᐊᕌᓘᓚᐅᖅᑐᑦ. ᐊᑐᑦᑎᐊᖅᑐᓂᓗ,” ᕌᐱᓐᓴᓐ ᐅᖃᖅᑐᓂ, ᐅᑭᐅᖃᓕᖅᑐᖅ 78−ᓂᒃ ᒪᐃᔭᐅᓪᓗᓂ ᓇᐅᔮᓂᑦ.

ᐃᓱᐸᓗᖏᓐᓂ-1980, ᕌᐸᓐᓴᓐ ᓅᓚᐅᖅᓯᒪᔪᖅ ᐅᑭᐅᖅᑕᖅᑐᒧ ᓄᓇᑦᑎᓯᐊᑉ ᐃᓪᓗᓕᕆᔨᕐᔪᐊᒃᑯᖏᓐᓃᓕᖅᑐᓂ ᑐᑭᒧᐊᑦᑎᑦᑎᔨᐅᓪᓗᓂ ᐱᓕᕆᐊᔅᓴᓄᑦ ᑭᕙᓪᓕᕐᒥ. ᕿᔪᓕᕆᔨᐅᓚᐅᖅᓯᒪᓪᓗᓂᓗ ᐊᖏᕐᕋᓄᑦ ᐃᓪᓗᓕᐅᖅᑎᐅᓪᓗᓂ, ᐃᑲᔪᕆᐊᖃᖃᑦᑕᓚᐅᖅᓯᒪᔪᑦ ᑐᔅᓯᕋᖅᑐᓂᒃ ᐃᓪᓗᓕᐅᕐᓂᒥᓪᓗ ᐊᖏᖅᑕᐅᑦᑎᐊᕆᐊᖃᕐᓂᖏᓐᓂᓪᓗ ᓴᓇᔭᐅᒌᖅᑲᑕ.

ᐃᖅᑲᓇᐃᔮᖃᐃᓐᓇᕐᓂᖓᓂ, ᓄᓇᓕᓐᓅᕋᔪᖃᑦᑕᓚᐅᖅᓯᒪᔪᖅ ᖃᐅᔨᓴᕆᐊᖅᑐᓂ ᐃᓪᓗᑖᕈᑎᔅᓴᓂᑦ ᐃᑲᔫᑎᒃᑯᑦ (HAP). ᕿᓐᖓᐅᓅᕆᐊᖃᓚᐅᖅᓯᒪᔪᖅ ᐊᔾᔨᐸᓗᖓᓂ ᕿᒥᕐᕈᔭᖅᑐᖅᑐᓂ ᐃᓪᓗᔅᓴᒥᑦ, ᐃᓄᐃᑦ ᓇᒻᒥᓂᖅ ᐃᓪᓗᓕᐅᖃᑦᑕᑎᓪᓗᒋᑦ ᐃᓪᓗᔅᓴᒥᓂᒃ.

ᕌᐸᓐᓴᓐ ᐅᖃᖅᑐᓂ ᐅᐱᒋᔭᖃᑦᑎᐊᕐᓂᕋᖅᑐᓂ ᐱᓕᕆᖃ­ᑎᖃᖅᑐᓂ ᐃᓄᓐᓂᑦ ᑲᔪᓯᑦᑎᐊᖅᑐᐊᓘᖃᑦᑕᓚᐅᖅᓯᒪᒻᒪᑕ ᑕᐃᔅᓱᒪᓂ. ᖁᕕᐊᓱᓐᖏᓗᐊᓕᕋᐃᒻᒪᑦ ᐊᔾᔨᓐᖑᐊᓂᑦ ᕿᓐᖓᐅᒥᑦ ᕿᒥᕐᕈᓲᖅ ᖁᕕᐊᑦᑕᖅᑐᓂ. ᐅᐱᒋᑦᑎᐊᖅᑐᓂᒋᑦ ᐅᓂᒃᑳᕆᓲᖏᑦ ᐊᖏᕐᕋᐃᑦ ᓴᓇᔭᐅᕙᑦᑐᒥᓃᑦ ᓇᒻᒥᓂᖅ − ᐊᑕᐅᓯᖅ ᑕᐃᒪ ᐱᓗᐊᖅᑐᖅ ᐅᖅᓱᖅᑑᒥ, ᑲᒪᒋᖃᑦᑕᖅᓯᒪᔭᖓ “ᑕᐃᒪᐃᑦᑐᒥᑦ ᐃᓪᓗᑦᑎᐊᕙᐅᓂᖅᐹᒥᑦ ᑕᑯᓚᐅᖅᓯᒪᓐᖏᑦᑐᕉᖅ ᐃᓅᓯᓕᒪᒥᓂᒃ.”

“ᐱᐅᔪᕐᔪᐊᕌᓗᒃ,” ᕌᐱᓐᓴᓐ ᐅᖃᖅᑐᓂ, “ᑭᓪᓕᖏᑦ ᓇᑏᑦ, ᐊᕙᓗᖏᑕᓗ, ᐱᐅᔪᕐᔪᐊᕌᓗᑦ − ᑰᖃᕐᕕᖏᑕᓗ ᒪᑐᐃᖅᑕᖅᑐᖏᑦ − ᐱᐅᔪᖅᐹᓗᐃᑦ.” ᐃᖅᑲᓇᐃᔭᖅᑎᑖᕈᒪᓚᐅᖅᓯᒪᔪᖅ ᐱᔭᕇᖅᑕᐅᓗᑎᑦ ᐱᖓᓱᑦ ᐃᓪᓗᐃᑦ ᓇᒻᒥᓂᖅᑖᔅᓴᐃᑦ (HAP) ᐃᓪᓗᐃᑦ ᖃᐅᔨᓴᓚᐅᕐᓗᓂᒋᑦ. ᐅᖃᖅᑐᓂ, ᐅᖃᐅᑎᓂᐊᖅᑲᒋᑦ, ᐃᒪᖃᐃ ᐱᒍᑦᑕ,” ᐅᖃᖅᑐᓂ, ᐃᓪᓗᓕᐅᖅᑎ ᑮᓇᐅᔭᒥᑦ ᑐᓂᓯᒍᒪᓪᓗᓂᐅᒃ. “ᐃᒫᖃᐃ, ᕌᐱᓐᓴᓐ ᓂᕐᕆᕕᒻᒥ ᐸᑎᔅᓯᓪᓗᓂ ᐊᓪᓚᕕᖓᓐᓂ, ᐅᐸᒋᐊᖅᑐᓂᐅᒃ ᖁᖓᑦᑐᓂᓗ, “ᐃᓪᓗᐃᑦ ᐱᔭᕇᓚᐅᖅᓯᒪᔭᖏᑦ ᐱᖓᓱᑦ ᑮᓇᐅᔭᖅᑖᖅᑐᓂ $15,000−ᓂᒃ.”

ᐊᔅᓱᕈᓐᓇᖃᑦᑕᓚᐅᖅᓯᒪᒻᒥᔪᑦ ᑕᒪᒃᑯᐊ, ᑭᓯᐊᓂ, ᓇᒥ ᓴᓇᔭᐅᓂᐊᕐᓂᖏᑦ ᑭᒃᑯᓄᓪᓗ.

ᐅᖃᖅᑐᓂᓗ ᐃᓚᖏᑦ ᑕᒫᓂᒥᐅᑦ ᐃᓚᖃᓐᖏᑦᑐᑦ ᐱᖃᑕᐅᑎᑕᐅᕙᓐᖏᑦᑐᑦ ᐃᓪᓗᑖᕈᑎᔅᓴᒥᑦ. ᐊᓯᖏᑦ ᐅᖃᖅᑐᑎᑦ ᖁᑦᑎᓂᖅᓴᒥᑦ ᑮᓇᐅᔾᔭᔅᓴᔪᑦ ᐱᖃᑕᐅᖁᔭᐅᓇᑎᑦ; ᐊᒥᓱᑲᓪᓚᐃᑦ ᐅᖃᖅᑐᑎᑦ ᑲᑎᒪᔩᑦ ᓇᓗᓇᐃᖅᓯᓲᖑᒻᒪᑕ ᑭᒃᑯᑦ ᐃᓪᓗᑖᕆᐊᖃᕐᒪᖔᑕ; ᐊᑕᐅᓯᖅ ᐅᖃᖅᑐᓂᑦ ᓴᖅᑭᔮᖅᑎᑕᐅᖃᑦᑕᖅᓯᒪᔫᒐᓗᐊᑦ ᑭᓯᐊᓂ ᑕᐃᒃᑯᓄᖓ ᐃᓪᓗᑖᕆᐊᖃᓪᓚᕆᑦᑐᓄᑦ ᓴᖅᑭᔮᖅᑎᑕᐅᓯᒪᓇᑎᑦ, ᑐᑭᓯᐅᒪᓐᖏᒻᒪᑕᒎᖅ.

ᐃᓚᖓᓐᓂ ᓄᓇᓕᒻᒥ, ᖃᐅᔨᓴᖅᑎ ᖃᐅᔨᓚᐅᖅᑐᖅ ᐃᓪᓗᑖᕈᑎᔅᓴᖅ ᐃᑲᔫᑎ (HAP) ᐱᖃᑕᐅᑎᑦᑎᒍᒪᓐᖏᑦᑐᑦ ᐊᕐᓇᓂᑦ, ᐃᓐᓇᕐᓂᑦ, ᑎᒥᒥᑎᒍᓪᓘᓐᓃᑦ ᐊᔪᕈᑎᓕᓐᓂ, ᑭᓯᐊᓂᓕ ᓴᓇᔨᖃᕈᓐᓇᕐᓂᐊᖅᑲᑕ ᐃᓪᓗᒻᒥᑦ. ᖃᐅᔨᓴᖅᑎᓗ ᐅᖃᖅᑐᓂ ᐋᖅᑭᓱᖅᓯᒪᒻᒪᑕᓕᒎᖅ ᐱᔪᓐᓇᖅᑐᓄᑦ ᑭᓯᐊᓂ, “ᐃᓚᓕᐅᔾᔨᖏᑦᑎ­ᐊᖅᑐᑎᑦ ᐊᓯᖏᓐᓂ” “ᑕᒪᓐᓇ ᑕᐃᒫᒃ ᐊᔪᕈᑎᖃᖅᑲᑕ ᐱᖃᑕᐅᑎᑕᐅᒐᔭᓐᖏᑦᑐᑦ.”

ᐃᓚᖏᓪᓗ ᐃᓪᓗᐃᑦ ᐱᔭᕇᖅᑕᐅᓯᒪᓐᖏᑦᑎᐊᒻᒪᕆᑦᑐᑦ, ᐊᒻᒪᓗ ᓄᓇᑦᑎᐊᑉ ᐃᓪᓗᓕᕆᔨᕐᔪᐊᒃᑯᖏᑦ ᐃᓛᓐᓂᒃᑯᑦ ᐱᑦᑕᓕᖅᑯᑦ ᐃᓪᓗᓕᕆᔨᒃᑯᓐᓄᑦ ᑲᒪᒋᔭᐅᖔᓕᖅᑐᑎᑦ. 1992−ᒥ ᑎᑎᕋᖅᓯᒪᔪᑦ ᐱᖓᓲᔪᖅᑐᓂᒡᒎ ᓄᓇᓕᓐᓂ ᐱᔭᕇᖅᓯᒪᔪᖃᓐᖏᑦᑐᑦ ᐃᓪᓗᑖᕈᑎᔅᓴᓂᑦ ᐃᑲᔫᑎᑎᒍᑦ (HAP) ᐅᑎᖅᑎᑕᐅᑐᐃᓐᓇᕆᐊᖃᖅᓯᒪᔪᓂᑦ ᒐᕙᒪᒃᑯᓐᓄᑦ; ᓄᓇᕗᑦ ᓄᓇᓕᖏᓐᓃᑦᑐᐃᓐᓇᐅᓚᐅᖅᓯᒪᔪᑦ.

ᑐᑭᓯᑲᒻᒪᔅᓯᒪᔪᖃᑐᐃᓐᓇᕆᐊᖃᕐᖓᑦ ᐃᑲᔫᑎᒥᑦ ᐊᑐᐃᓐᓇᐅ­ᑎᑕᐅᔪᓂᒃ, ᐃᓚᖏᑦ ᐊᐱᖅᓱᖅᑕᐅᒐᐃᒻᒪᑕ ᐃᑲᔫᑏᑦ ᒥᔅᓵᓄᑦ ᐃᓪᓗᖓᓐᓄᑦ ᓱᓕ ᒐᕙᒪᒃᑯᓐᓄ ᐱᒋᔭᐅᓱᒋᔭᐅᖃᑦᑕᓚᐅᖅᑐᑦ ᐃᓪᓗᒃ. 23% ᑐᑭᓯᓯᒪᓐᖏᓐᓂᕋᓚᐅᖅᓯᒪᔪᑦ ᑎᑎᖅᑐᒐᖅᓯᒪᔪᓂᒃ ᖃᓄᐃᓕᖓᓂᐊᕐᓂᖓᓐᓂ ᑕᐃᒪᓕ ᓴᓇᑦᑕᓕᕐᓂᖅᑯᑦ ᑕᑯᓯᒪᔭᒥᓂᒃ ᒪᓕᑦᑐᑎᑦ ᐊᓯᐊᓂ ᐃᓪᓗᒥᑦ.

40% ᖃᐅᔨᓴᖅᑏᑦ ᐊᐱᖅᓱᖅᑐᑎᑦ ᐃᓪᓗᑖᕈᑎᔅᓴᖅ ᐃᑲᔫᑎ (HAP) ᐊᖏᕐᕋᖏᑦ ᐃᓪᓗᕈᓯᖃᓐᖏᓗᐊᕆᔭᐅᓪᓗᑎᑦ, ᐅᕝᕙᓘᓐᓃᑦ ᒥᑭᓗᐊᕆᔭᐅᓪᓗᑎᑦ, ᐊᒻᒪᓗ 14% ᐅᖃᖅᑐᑎᑦ ᑰᖃᕐᕕᖓᑦᑕ ᒥᔅᓵᓄᑦ ᑕᐃᒫᔅᓴᐃᓐᓇᖅ ᐅᖃᖅᑐᑎᑦ; ᐊᓐᓄᕌᓐᓄᒡᒎᖅ ᐅᐊᓴᕐᕕᒃᑯᕕᖓ ᒥᕕᑭᓗᐊᖅᑐᓂᓗ.

ᑭᓯᐊᓂᓕ, ᖃᐅᔨᓴᖅᑏᑦ ᕿᒥᕐᕈᓪᓗᑎᑦ ᐱᐅᔪᒥᑦᑕᐅ ᑕᑯᓚᐅᕐᒥᔪᑦ ᐊᓯᔾᔨᕆᐊᖃᕐᓂᖏᓐᓂ ᑕᒪᒃᑯᓂᖓ ᐃᓪᓗᓕᕆᓂᕐᒥᑦ; ᓇᒻᒥᓂᕆᔭᐅᓪᓗᑎᑦ, ᓈᒻᒪᑦᑐᒥᓪᓗ ᐱᔪᒪᓪᓗᑎᑦ.

ᓄᓇᑦᑎᐊᖅ ᐃᓪᓗᓕᕆᔨᕐᔪᐊᒃᑯᑦ ᐅᖃᐅᓯᖃᖃᑦᑕᓚᐅᖅᑐᑦ ᐱᖁᔭᖏᓐᓂ ᕿᑐᕐᖏᐅᕈᑎᑎᒍᑦ ᑕᐅᖅᓰᓗᑎᑦ ᑮᓇᐅᔭᖔᖅᑎᒍᑦ, ᑭᓯᐊᓂᓕ ᓇᓗᓇᐃᖅᓯᒪᑦᑎᐊᓐᖏᓗᐊᖅᑐᖅ ᑕᒪᓐᓇ ᑲᔪᓯᑦᑎ­ᐊᕐᓂᕐᒪᖔᖅ. ᐊᒥᓱᑦ ᐃᓪᓗᑖᕈᑎᔅᓴᖅ ᐃᑲᔫᑎ (HAP) ᐱᔪᒥᓃᑦ ᑎᑎᕋᖃᑦᑕᓚᐅᕐᖓᑕ ᐃᑲᔪᖅᑎᒋᓂᐊᖅᑕᖏᓐᓂ ᐱᖃᑎᒥᓂᒃ ᐊᒻᒪᓗ ᐃᓚᒥᓂᒃ ᓴᓇᓂᐊᖅᑎᓪᓗᒋᑦ.

ᑕᐃᒪᓕ, ᕌᐱᓐᓴᓐ ᐅᖃᖅᑐᓂ ᐃᑲᔫᑎ ᐊᓯᐊᒍᑦᑕᐅ ᐋᖅᑭᒋᐊᕆᐊᓕᒥᓂᐅᒐᓗᐊᖅ, ᐱᓗᐊᖅᑐᒥᑦ, ᑎᑎᖅᑐᒐᖅᓯᒪᔪᑦ ᒪᓕᒐᖏᑦ ᓇᓗᓇᐃᔭᖅᓯᒪᑦᑎᐊᕐᓗᑎᑦ ᐃᓄᑦᑎᑑᓕᖅᓯᒪᓗᑎᓪᓗ.

ᓲᓴᓐ ᐊᖏᕐᕋᕆᑲᐃᓐᓇᖅᑕᖓ ᐅᖁᒃ ᒥᑭᓗᐊᖅᑐᓄᓗ ᐃᓚᒌᓐᓄᑦ. ᐊᑭᓖᖃᑦᑕᕐᓂᕋᖅᑐᖅ $1,400 ᑕᖅᑭᑕᒫᑦ ᐃᓪᓗᓕᕆᔨᒃᑯᓐᓄᑦ. ᑭᖑᕙᖅᓯᒪᓕᖅᑐᓂᓗ ᐊᑭᓕᖅᓱᕆᐊᓕᒻᒥᓂᒃ, ᒫᑕ ᑮᓇᐅᔭᓂᒃ ᐃᓕᓐᓂᐊᕆᐊᕐᓂᒥᓂᕐᒥᓄᑦ ᑮᓇᐅᔭᖅᑖᒥᓂᖏᓐᓄᑦ ᐊᑭᓕᖅᓴᑐᖃᖓᓂ ᐸᓂᖓᑦᑕ ᐊᑭᓕᐅᑎᒋᓪᓗᓂᒋᑦ ᐃᓚᖏᑦ.

ᓲᓴᓐ ᐃᓱᒪᔪᖅ ᑭᓱᐊᓗᒻᒧᑦ ᑮᓇᐅᔭᐃᔭᖅᐸᒻᒪᖔᑎᒃ ᖃᓄᕐᓗ ᓯᕗᓂᔅᓴᖏᓐᓄᑦ ᐃᑲᔫᑎᐅᒻᒪᖔᑕ ᐃᓚᒋᓐᓄᒃ. ᐃᖅᑲᐃᔪᓐᓇᖏᑦᑐᖅ ᓱᒻᒪᐅᒻᒪᖔᖅ.

“ᐃᓱᒪᓐᖑᐊᕐᓗᑎᑦ ᐱᕕᖃᖅᑎᑕᐅᓐᓂᕈᕕᑦ, ᓱᓕ ᓄᓇᕗᑦ ᐱᖃᕐᓂᖅᑲᑦ ᑭᓱᖃᕋᔭᕐᓂᖅᑭᑦ [HAP].”