ᐸᖕᓂᖅᑑᖅ ᐱᓕᕆᕙᓪᓕᐊᕗᑦ ᑖᕐᓯᒥ ᐱᔨᑦᑎᕋᕐᓂᕐᒥ, ᖃᔪᖅᑐᕐᕕᒃᓴᒥ

For English version, see Pangnirtung working on taxi service, soup kitchen, mayor says

ᐸᖕᓂᖅᑑᑉ ᓄᑖᖑᔪᒥ ᓂᕈᐊᖅᑕᐅᔪᖅ ᒪᐃᔭᖓ ᐋᖅᑭᒃᓱᐃᓯᒪᕗᖅ ᐱᔪᒪᓂᖃᑦᑎᐊᖅᑐᒥ, ᓱᒃᑲᔪᒥ-ᐃᖏᕐᕋᔪᒥ ᑲᑎᒪᔾᔪᑎᒃᓴᒥ ᓇᐃᑦᑐᒥ, ᑕᖅᑭᓂ−18-ᓂ ᒪᐃᔭᐅᓂᐊᕐᓂᖓᓂ.

ᐆᒫᑉ ᑯᒃᑲᑎ ᓵᓚᖃᓚᐅᖅᐳᖅ ᒪᐃᔭᙳᕐᓂᕐᒥ 85 ᐳᓴᓐᑎᒥ ᓂᕈᐊᕐᓂᐅᔪᒥ ᒫᔾᔨ 30−ᒥ ᑕᒪᐅᓇᑐᐃᓐᓇᖅ ᓂᕈᐊᕐᓂᕐᒥ ᐃᓇᖏᖅᓯᓂᕐᒥ ᒪᐃᔭᓚᐅᖅᑐᒥ ᓕᓐ ᒪᐃᒃᒥ, ᓄᖅᑲᓚᐅᖅᑐᒥ ᑎᒥᐱᕆᒥ.

ᑯᒃᑲᑎ ᐅᖃᓚᐅᖅᐳᖅ ᓯᕗᓪᓕᕐᒥ ᓯᕗᓪᓕᐅᑎᑕᐅᖁᔭᖓ ᐊᔭᐅᕆᓂᕐᒥ ᓄᓇᖃᖅᑎᐅᔪᓂ ᐃᓚᐅᒃᑲᓐᓂᖁᓪᓗᓂᒋᑦ ᓄᓇᓕᖕᓂ ᒐᕙᒪᖓᓂ ᐃᓱᒪᓕᐅᕆᓂᐅᔪᓂ.

“ᑲᑎᙵᓗᑕ ᓴᓇᓂᐊᖅᐳᒍᑦ ᓴᙱᓂᖅᓴᒥ, ᐃᓚᐅᑎᑦᑎᓂᖅᓴᐅᔪᒥ, ᐊᒻᒪ ᐱᕕᖃᖅᑐᒥ−ᐊᐅᓚᑕᐅᔪᒥ ᓄᓇᓕᐅᔪᒥ ᑐᙵᕕᖃᖅᑐᒥ ᑲᑐᔾᔨᖃᑎᒌᖕᓂᐅᔪᒥ, ᐃᒃᐱᒍᓱᑦᑎᐊᕐᓂᐅᔪᒥ, ᐊᒻᒪ ᐊᒥᖅᑳᖅᑕᐅᔪᒥ ᐱᔾᔪᑕᐅᔪᒥ,” ᐅᖃᓚᐅᖅᐳᖅ, ᐊᐱᖅᓱᖅᑕᐅᓂᐅᔪᒥ ᑎᑎᕋᕐᕕᖓᓂ ᐊᐃᑉᕆᓕ 20−ᒥ.

ᑕᐃᑯᖓ ᐃᓱᐊᓄᑦ, ᑯᒃᑲᑎ ᐃᓴᑲᑕᒃᐳᖅ ᓄᓇᓕᖕᓂ ᐅᖃᓪᓚᒡᕕᖓᒍᑦ ᑕᐅᓇᓂᒃᑲᓐᓂᖅ ᓱᓪᓗᑯᑖᖕᒥ ᐃᖅᑲᐃᑎᑦᑎᓂᕐᒧᑦ ᓄᓇᖃᖅᑎᐅᔪᓂ ᑐᙵᓱᖕᓂᖏᓐᓂ ᐅᐸᖃᑕᐅᓂᕐᒧᑦ ᑲᑎᒪᔨᓄᑦ ᑲᑎᒪᓂᐅᔪᓂ.

ᖃᔅᓯᒐᓚᖕᓂ ᐃᒃᓯᕙᐅᑕᓂ ᓴᓂᕋᕐᒦᑦᑐᓂ ᑲᑎᒪᔨᒃᑯᑦ ᑲᑎᒪᕝᕕᖓᓂ ᖁᙱᐊᖅᑎᓄᑦ.

ᑭᓯᐊᓂ, ᓄᓇᖃᖅᑎᐅᔪᑦ ᐅᖃᖃᑎᖃᕈᒪᔪᑦ ᑲᑎᒪᔨᐅᔪᓂ ᐅᐸᒃᓯᒪᓗᑎᒃ ᑭᓱᑐᐃᓐᓇᒥᒃ ᐊᑲᐅᙱᓕᐅᕈᑕᐅᔪᒥ ᐅᕝᕙᓘᓐᓃᑦ ᐃᓱᒫᓘᑕᐅᔪᒥ ᓯᕗᓂᐊᓂ ᑎᑎᕋᖅᓯᒪᕙᒌᕆᐊᖃᖅᐳᑦ ᐅᓪᓗᓂ ᐱᖓᓱᓂ ᓯᕗᓂᐊᒍᑦ, ᑯᒃᑲᑎ ᐅᖃᓚᐅᖅᐳᖅ.

ᑯᒃᑲᑎ ᐱᓕᕆᒋᕆᕗᖅ ᓇᓗᓇᐃᖅᓯᓂᕐᒥ ᕼᐋᒻᓚᒃᑯᑦ ᐅᖃᓗᒃᑐᓂ−ᓂᐱᓕᐅᕐᕕᖓᑕ ᐱᓕᕆᔾᔪᓯᖓ ᐋᖅᑭᐅᒪᑎᑕᐅᑦᑎᐊᕐᓂᖓᓂ ᐊᒻᒪ ᐊᑐᐃᓐᓇᐅᓗᓂ ᐱᓂᕐᒧᑦ ᐅᖃᓗᒃᑐᓄᑦ ᐅᖃᐅᓯᒃᓴᓕᐊᖑᔪᓄᑦ, ᐅᖃᓚᐅᖅᐳᖅ.

ᓄᑖᙳᕆᐊᖅᑎᑕᐅᓂᐅᔪᓂ ᑲᑎᒪᔨᒃᑯᑦ ᐱᓕᕆᔭᖏᓐᓂ ᑐᓂᔭᐅᖃᑦᑕᕐᓂᐊᕆᕗᑦᑕᐅᖅ ᐅᖃᓪᓚᒡᕕᑎᒍᑦ ᐱᓇᓱᐊᕈᓯᑦ ᒪᕐᕉᒃ ᐊᓂᒍᓪᓗᐊᑕᕌᖓᑕ.

ᐋᖅᑭᒃᑕᐅᓯᒪᒐᔪᒃᑐᒥ ᓄᓇᓕᖕᓂ ᑲᑎᒪᕝᕕᖓᓂ ᑲᑎᓐᓂᐅᔪᓂ ᐱᓕᕆᐊᖑᓂᐊᖅᐳᑦ ᓄᑖᙳᕆᐊᖅᑎᑦᑎᓂᕐᒥ ᐃᓄᓕᒫᓂ ᑲᑎᒪᔨᒃᑯᑦ ᐱᓕᕆᐊᖏᓐᓂ ᐊᒻᒪᓗ ᑲᑎᖅᓱᐃᓂᕐᒧᑦ ᐅᖃᐅᓯᒃᓴᖏᓐᓂ, ᐃᓚᒋᐊᖅᓯᓚᐅᖅᐳᖅ.

“ᐱᓕᕆᖃᑦᑕᕈᒪᓇᔭᖅᐸᒃᑲ ᑕᖅᑭᑕᒫᒥ,” ᐅᖃᓚᐅᖅᐳᖅ. “ᑕᐃᒪᐃᓕᖅᑎᓐᓂᐊᖅᐸᕋ ᒪᐃᒥ.”

ᒫᓐᓇᐅᔪᒥ, ᒪᐃᔭ ᐃᓕᓯᓯᒪᕙᒌᖅᐳᖅ ᐃᓚᖏᓐᓂ ᐸᕐᓇᐅᑎᖏᓐᓂ ᐃᖏᕐᕋᓕᖅᑎᑕᐅᓂᖓᓂ.

ᐊᓯᖏᓐᓂ ᐱᓕᕆᐊᒃᓴᐅᔪᓂ ᓄᑖᖑᔪᖅ ᒪᐃᔭ ᐅᖃᓚᐅᖅᐳᖅ ᐱᓕᕆᐊᕆᔭᖓᓐᓂ ᐃᓚᖃᕐᓂᖓᓂ ᐱᕙᓪᓕᐊᑎᑦᑎᓂᕐᒥ ᓄᑖᖑᔪᒥ ᖃᔪᖅᑐᕐᕕᒃᓴᒥ, ᐱᓕᒻᒪᒃᓴᓂᕐᒧᑦ ᐱᓕᕆᐊᖑᔪᒥ ᐊᐅᓚᐅᓯᕆᔨᓄᑦ ᐊᒻᒪ ᓴᖅᑭᑎᑦᑎᓂᐅᔪᒥ ᑖᒃᓯᒥ ᐱᔨᑦᑎᕋᕐᓂᕐᒥ.

ᑯᒃᑲᑎ ᐅᖃᓚᐅᖅᐳᖅ ᕼᐋᓐᓚᒃᑯᑦ ᓴᖑᑎᑦᑎᖁᕙᖏᑦ ᐸᖕᓂᖅᑑᑉ ᐅᖃᓪᓚᒡᕕᕕᓂᖓᓂ ᐃᒡᓗᖁᑎᖓᓂ ᐊᑭᓕᖅᓱᖅᑕᐅᙱᑦᑐᓂ ᐃᑲᔪᖅᑎᐅᔪᓄᑦ-ᐊᐅᓚᑕᐅᔪᒥ ᖃᐅᑕᒫᒥ ᖃᔪᖅᑐᕐᕕᒃᓴᒧᑦ ᐊᒻᒪ ᐊᔪᖅᓴᖅᑐᓄᑦ ᓂᕿᑖᕐᕕᖕᒥ ᑎᓯᐱᕆᙳᕋᓱᐊᕐᓂᖓᓂ. ᐃᓇᖏᖅᓯᓇᔭᖅᐳᖅ ᕼᐋᒻᓚᒃᑯᑦ ᖃᔪᖅᑐᕐᕕᖓᓂ, ᒪᑐᓚᐅᖅᓯᒪᔪᖅ ᖃᔅᓯᒐᓚᖕᓂ ᐊᕐᕌᒎᓕᖅᑐᓂ.

ᐅᕘᓇ ᐱᓕᒻᒪᒃᓴᓂᕐᒧᑦ ᐱᓕᕆᐊᖑᔪᒥ ᐊᐅᓚᐅᓯᕆᔨᓄᑦ ᑕᕝᕙᑐᖅ ᐱᒋᐊᕐᓂᐊᕐᓂᖓᓂ ᑕᒪᑐᒪᓂ ᐊᕐᕌᒎᔪᒥ, ᑎᓴᒪᓂ ᐃᓕᓐᓂᐊᖅᑎᓂ ᐊᐅᓪᓚᖅᑎᑕᐅᓂᐊᖅᐳᑦ ᐋᑐᕚᒧᑦ ᑕᖅᑭᓄᑦ ᒪᕐᕉᖕᓄᑦ ᐃᓕᓐᓂᐊᕐᕕᐊᕈᓯᕐᒥ ᐱᓕᒻᒪᒃᓴᓂᕐᒧᑦ ᐊᒻᒪ ᑕᖅᑭᓄᑦ ᒪᕐᕉᖕᓄᑦ ᐊᑭᓕᖅᓱᖅᑕᐅᓗᑎᒃ ᐃᖅᑲᓇᐃᔭᖅᓯᓐᓈᕐᓗᑎᒃ ᐱᓕᒻᒪᒃᓴᓂᐅᔪᒥ. ᐅᖃᓚᐅᖅᐳᖅ ᐊᑭᖃᓪᓗᐊᕋᔭᕐᓂᖓᓂ $4,000−ᒥ ᐊᕐᕌᒍᑕᒫᒥ ᐊᑐᓂ ᐃᓕᓐᓂᐊᖅᑎᒧᑦ, ᑮᓇᐅᔭᑦ ᓂᕆᐅᒃᐳᖅ ᐱᓂᐊᕐᓂᖓᓂ ᐃᓄᖕᓄᑦ ᑲᑐᔾᔨᖃᑎᒌᖑᔪᓂ ᐊᒻᒪ ᒐᕙᒪᒃᑯᓐᓂᙶᖅᑐᓂ.

ᕼᐋᒻᓚᒃᑯᑦ ᕿᓂᖅᐳᑦ ᑎᓴᒪᓂ ᐃᓄᖕᓂ ᓇᖕᒥᓂᖃᖅᑎᒃᓴᐅᔪᓂ ᓴᖅᑭᑎᑦᑎᓂᕐᒥ ᒪᕐᕉᖕᓂ-ᓄᓇᓯᐅᑎᓂ ᑖᒃᓯᒥ ᐱᔨᑦᑎᕋᕐᓂᕐᒧᑦ. ᓇᖕᒥᓂᕆᔭᐅᔪᖅ ᓇᖕᒥᓂᕆᔭᐅᓇᔭᖅᐳᖅ ᐊᖁᑎᐅᔪᓄᑦ, ᑯᒃᑲᑎ ᐅᖃᓚᐅᖅᐳᖅ.